عمر البشير شخصية محبوبة للشعب السوداني..

صراحة وطيلة فترة ال 50 عاماً الماضية على تاريخ الحكم في السودان وربما بعد وفاة الزعيم الأزهري لم يمر على السودان رئيس أحبه الناس بقدر الرئيس الحالي عمر البشير ..
إختلف الناس أم إتفقوا حول سياسات الإنقاذ ورجالات الإنقاذ إلا أن الرئيس عمر البشير يظل هو الشخصية الأكثر وضوحاً وثباتاً في طرحه ..ويظل هو الشخصية الأكثر تطوراً في مجال العمل السياسي ويظل هو الرئيس الأكثر شعبية وجماهيرية ..
لاحظت أن معظم الشعب السوداني يتعاطف مع عمر البشير في شخصه ومعظمهم يصفه بالطيبة ونقاء السريرة وعفة اليد واللسان ..
عمر البشير نموذج للمواطن السوداني بكل حزافيره طيبة إبن البلد..بساطة القروي .. حماقة السوداني ..رقي إبن المدينة ..واضح وصريح .. مجامل للحد البعيد في الأفراح والأتراح ..
لم تشغله حياة الرؤوساء من نسيان واجباته الإجتماعية حيال أهله أولاً ثم رعيته ثانياً ..
في غالب الأحيان يتجول في المناسبات الخاصة دون حرس فيعود المريض في المستشفى ويبارك الزواج لإبن أخيه ويعزي في موت فلان دون أي ضوضاء وإزعاج وأصوات مواتر النجدة وما أدراك ما عربات الرئاسة ..
أكاد أجزم بأن عمر البشير حالياً هو الشخصية الجماهيرية الأولى ولو قمنا بعمل إستفتاء جماهيري عن شخصية عمر البشير لوجدنا المؤيدين له أكثر بكثير من المعارضين ..
وهنا لابد من أن أركز على (شخصية) عمر البشير وليس النظام الذي يتبع له عمر البشير ..
عن نفسي أحب هذا البشير لأبعد درجة وأتمنى من كل قلبي مقابلته ومصافحته ..
سيييييييير سيييييييييييير يا البشيييييييييييييير..

ياعمر الفاروق
ربما يكون كل ما ماقلته عن الرجل صحيح ميه في الميه
لكن نحنا مجبرين ان نقيمة كرئيس للبلد
ماذا قدم وماذا اخر
الطيبة راقدة ياخ والله يبقصوا منها
لكنها لاتكفي لاشباع جائع ولاقسوة عاري ولاعلاج مريض ولا تأمين خايف
واظن ان التقييم الموضوعي لفترة حكم الرجل مازال غائبا وضائعا
بين حب ضريروكره اعمى




تخريمة
لكن هسي دا موضوع بوست تفتحو لينا ايام القراية دي
كان كدي مانجحنا

عمر الفاروق اخوي
مسكاقمي
تعرف
سالمين محمد بله

الاخ عمر الفاروق


الشعب السوداني شعب عاطفي بطبيعته ممكن يختلف سياسيا مع حكامه لكن في الواجبات الاجتماعية والمناسبات بيتناسوا اي حاجة او في الحقيقة بسيبوها على جنب ، يعني رغم العمله فيهو الرئيس نميري وبعد الهليمانة في الانتفاضة ( واطلاق كلمة السفاح على نميري ) الا انه اول ما نميري رجع للسودان الناس استقبلته عادي جدا لدرجة انه نميري كان ممكن يمشي في الشارع جدا بدون ما يتأذي من اي مواطن قبل كدا زيته طلع بسبب نميري وصوته راح بسبب الهتاف ضد نميري

مع انه اتخيل لي الرئيس نميري اكتر رئيس حكم السودان بيمتلك كاريزما ، عشان كدا ممكن تلقا كتير من الناس بيقولوا ( نميري ما بيتكره = لا يمكن تكرهوا رغم عمايله العملها)

لكن صراحة واسمح لي اختلف معاك هنا الحال بيختلف شوية ، الناس اتعودت على الظلم من حكامها فاصابها نوع من التبلد في مشاعرها تجاه حكامها ، تماما زي فكرة الالم الشديد في الاخر الناس بتفقد الاحساس بالالم وده بالظبط الحصل طول فترة الانقاذ ، بالعكس ممكن تلقا نسبة الكراهية موجودة بكثرة لكن يمكن بس حصلت حالة تأقلم ذات درجة عالية
لكن ما اظن انه لو اتعمل استفتاء حنلقا نسبة محبين لشخصيته توجد بنسبة كبيرة
وفي الاخر حتى المجاملات البتحصل بتكون في اطار التسويق لشيء معين او بتحكمها طبيعة الشعب السوداني المجاملة لبعضها البعض في السراء والضراء ، يعني اي زول لو حكم السودان كان حيعمل كدا

تخريمة : عمر الفاروق انت نويت تنزل الانتخابات ولا شنو ؟؟

قول بسم الله

الأخ الحبيب عمر الفاروق

حب الناس هبة إلهية

وكده أكدت لينا نبوءة عمنا محمد التوم
التى يبدو أنك لم تطلع عليها

Quote: دبرسة وكوم قرف.. (Re: عمر الفاروق) الأخ الحبيب عمر الفاروق تعرف أنا من أوائل الذين مروا على هذا البوست مساء يوم 20/4/2008م لحظتها كان يقف الى جوارى عمنا اللذيذ جداً محمد التوم أها عمك محمد التوم أول شاف صورتك تخيل قال لى شنو؟ قال لى: أسمع أنت الجاب صورة الرئيس عمر البشير هنا شنو؟ قلت ليهو سلامة النظر ياعمنا ده ما رئيس الجمهورية لكن برضو ما مشيت بعيد الزول ده إسمه عمر الفاروق. لم أستطع التداخل لحظتها لضيق زمنى ثم تعثرت الشبكة بجنوب جدة عموماً لعدة أيام، وحين عادت فكرت أعمل بوست منفصل لكن لقيتك الليلة قرفان شديد وبدون سبب فقلت أرفع معنوياتك شوية. أها شن قولك فى كلام عمك التوم؟

هل نعتبر البوست ده رد على كلام عمك التوم؟

زولنا الما ساكت :

Quote: لكن نحنا مجبرين ان نقيمة كرئيس للبلد ماذا قدم وماذا اخر

حتى في هذا الجانب فقد تفوق البشير على الروؤسا السابقين فقدم للبلد وبحسابات الأرقام ما لم يقدمه من سبقوه الطرق الكباري البترول الإنتعاش الإقتصادي كلها مؤشرات تحسب لهذا الرجل ..

تخريمة :
يا زول سيبك من القراية أم دق وخلّيك مع شعارنا الجديد:
الجكّة دي لله ..

الأخت مايا :

Quote: مع انه اتخيل لي الرئيس نميري اكتر رئيس حكم السودان بيمتلك كاريزما ،

في دي عندك حق والله ..
اب عاج شخصية عندها حضور وهيبة ماااااا عادية وكمية القصص التي تروى عنه تزيدك إعجاباً به رغما عن كل المجازر التي إرتكبها في حق أهلنا الأنصار ..
يقال والعهدة على الراوي إنو أبعاج في المباراة النهائية للسودان وغانا في 70 وبعد أن رفض المنتخب الغاني الصعود لإستلام الميداليات الفضية من الرئيس نميري أصدر أبعاج ومن المقصورة قرار بي إنو الفريق ده ما يبيّت في الخرطوم ولااااااااااااا دقيقة ومن الإستاد لي غانا بي طيارة عسكرية

اما بخصوص السياسات وفصلها عن الشخصيات فها هي أمريكا لديها سياسات تنفذ مهما تغيّر الرئيس ورغماً عن ذلك تجد من الرؤوساء من تتزايد شعبيته وبين من يزداد كرهه ..
البشير شخصية محبوبة حسب توقعي ..
تخريمة :
بيني وبينك كان لقيت لي ولاية مااااا باباها الرئاسة دي صعبة شوية لكن

Quote: لاحظت أن معظم الشعب السوداني يتعاطف مع عمر البشير في شخصه ومعظمهم يصفه بالطيبة ونقاء السريرة وعفة اليد واللسان .. عمر البشير نموذج للمواطن السوداني بكل حزافيره طيبة إبن البلد..بساطة القروي .. حماقة السوداني ..رقي إبن المدينة ..واضح وصريح .. مجامل للحد البعيد في الأفراح والأتراح .. لم تشغله حياة الرؤوساء من نسيان واجباته الإجتماعية حيال أهله أولاً ثم رعيته ثانياً .. في غالب الأحيان يتجول في المناسبات الخاصة دون حرس فيعود المريض في المستشفى ويبارك الزواج لإبن أخيه ويعزي في موت فلان دون أي ضوضاء وإزعاج وأصوات مواتر النجدة وما أدراك ما عربات الرئاسة .. أكاد أجزم بأن عمر البشير حالياً هو الشخصية الجماهيرية الأولى ولو قمنا بعمل إستفتاء جماهيري عن شخصية عمر البشير لوجدنا المؤيدين له أكثر بكثير من المعارضين ..

للأسف كثير من السودانيين لا يعرفون الحقائق.. سوف تظهر الحقيقة في يوم من الأيام.. سأعود ببعض الأشياء الموثقة..





مدِّر بدِّر يا رواسي نحن بعاد لحقنا القيفة
انت مدبج ونحن نقاسي برد ام شير والموج والزيفة
مركبك الماليها مطارق تمشي .. تقيف .. تسرح بي كيفا
مرة مغارب ومرة مشارق وانت تخاف الريح وحفيفا
سوّها زينة وفوقها بيارق وانت مدبج توب وقطيفة
فيها المات والضاربو الفالج والسالمين في حالة مخيفة

كل الناس ترزح في كفة وانت وناسك فوق الدفّة
الدايشين والراسهم لفّ والشاخصين في المدى للضفة
صوت أطبالك فوقهم ألفى جوه الموية وريقهم جفّ
من العطش النص اتوفى وباقي النص الفضّل جيفة

ضاقوا المر والحال استعصى الشغال واللاحق الحصة
الواصال للرحم اتقصّ والهاداي مو لاقي الفرصة
الرساي سافر ما وصى خل مُحمد وأحمد و حفصة
الأطفال العرفو القِصّة سدت جوّ حلوقهم غُصّة
من الجوع الدم اتمصّ واصبح كل الحلم رغيفة

كل الراكب شاف أحلامو دون احساس ماتت قدامو
فنّ كتابو وكسر أقلامو للوالدين لا جال مالامو
ناس الحلة القعدوا وقاموا أصرّ وألحّ يمشي كلامو
هزموه اخوانه البيجوع ناموا وكم خريج مالاقي وظيفة

يالفكيتها وقلتّ لها سيري وعارف انو الدنيا دميري
لا في ضفاف لا شفنا جزيرة لا في الحيري ولا في الطيري
كسرت جناحها وقلتّ لها طيري واتملكت الكانت ميري
يالسودت الناصع جيرة إيد الحق صابونة وليفة

قبلك كم متعلم وقاري عكس الريح فكّولو الصاري
مشدوهين متعشي وحاري ريسها شلته والبحّاري
كم سنوات علامّها الباري واقفة وهم شيايفنها جاريي
بقينا هلاك والقيف متضاري لا حجّار لا دوحة وريفة

حسِّك عينك ما تتمادى وتنسى الراكب عندو إرادة
الأهوال الشافها وخاضها كان في مدرسة ولا عيادة
شفنا الإيد الكان أجوادة يا مبتورة ويا شحادة
وياما رقاب كانت سدادة علّمت الله من التعريفة

يا ريسنا قدر مدّيرك فك الدّفة وأدّها غيرك
أحفظ نفسك ترضي ضميرك وقّف أوعى تواصل سيرك
كان طاوعتنا شن بيضيرك عرض أكتافك وفك البيرك
لاهنا شكرا وكتّر خيرك وكل انسان في الأرض خليفة

Quote: الأخ ياسر تحية طيبة أشكرك على ايراد القصيدة التي هزت العروش.. (مدر مدر يا رواسي) التي نظمها الشاعر حاتم حسن الدابي... وللعلم هذه هي القصيدة الوحيدة التي نظمها حاتم الدابي نهارا حيث أن اعتاد أن يأتيه (شيطان شعره) ليلا كما قال.. والكثيرون لا يعلمون الدافع المباشر الذي استفز حاتم وجعله ينظم قصيدة (الرواسي) نهارا... كان الشاعر يعمل بهيئة توفير المياه فنيا لحفر الآبار الارتوازية وعمل لمدة 9 سنوات بدارفور في مناطق عدة ومنها مدينة الفاشر... وكان ذلك قبل أحداث دارفور... وكان عدد من سائقي اللواري من أبناء المنطقة يذهبون الى دارفور حيث يستضيفهم شاعرنا في بيته... لا حظ أحد ضباط الجيش برتبة عقيد أن حاتم (مضيوف) دائما فكان يأتي للمنزل بين الفينة والأخرى في غياب الشاعر ويضع خلف باب الحوش جوال سكر أو جوال بصل أو أي من المواد الغذائية ويذهب... واحتار حاتم ثم عرف أن الشخص هو صديقه العقيد...ودار الزمان دورته وعاد حاتم الى موطنه الصغير بعد أن استقال من هيئة توفير المياه.. ثم ذهب في إحدى المرات لأم درمان وفي سوق رواكيب في أحد أطراف المدينة وجد شخصا بجلابية بالية وشال عفا عليه الزمن يضعه فوق رأسه ، وجده (قاعد فوق عنقريب صغير) ويفرش أمامه أكوام صغيرة من التمر... تفرس حاتم في الوجه فوجده صديقه القديم (العقيد)... سلم عليه بحرارة وسأله عن أحواله فعرف أن سيف (الصالح العام) قد وصله... ودعه حاتم واشترى كراس من أقرب محل.. وعندما وصل محل اقامته كتب البيت الأخير: لاهنا شكرا وكتّر خيرك وكل انسان في الأرض خليفة مامان

البشير المو كشير..

قول لي ياعمر الفاروق مش أنت القلت توتي دي كرهك فيها حمد الريح يعني الأن خليت كراهية توتي وحمد الريح ومشيت لي حب عمر البشير .. بخيت ومبروك عليك

عمنا حمزاوي:

Quote: تعرف سالمين محمد بله

لا والله ..


عثمان :

Quote: قول بسم الله

بسم الله ..

والله يا عمر طيارتك قامت ..
هسع يجيك واحد يقول ليك ولقد أعلن عمر الفاروق عن ( كوزنته ) صراحة ..
طبعا خلاص اتلحك ياسر الشريف .. يعني يحلك الحلا بلة ..

..
..

الأخ/ عمر الفاروق

كلامك في الوقت دا يمكن يكون فيهو نوع من الغلط !

ما ممكن زول يكون مسؤول عن ناس وبلد كبيرة زي البلد دي وتقول هو أكثر شعبية وطيبة ! لو قنا في أيام الإنقاذ الأولى بكون صاح ! لكن كيف يكون طيب وأكثر شعبية والناس ماتت والما مات تضرر جوعاً وذله ومهانة ! نضرب مثال : ما بعيد قصة عمارة ساجدة وما آلت له .. ترقية المسؤول وضاع المال العام سُداُ .

دا مثال تاني: والله سمعتو من القال الكلام دا وهو يجزم ويحلف بالله مغلظاً وهو صادق في ما يقوله فالرجل صاحب هذا الكلام ورع ويخاف الله رب العالمين وقد كان يعمل في الإمدادات الطبية مساعد طبي وكان أن هناك إجتماع مع البشير مساء لعرض مشاكلهم وآلامهم وفي نص الإجتماع كانت الكلمة له (( فقال للبشير والله أنت أطيب سوداني لكن الحوليك والبطانة بتاعتك _ خره_ )) ولم يتذمر البشير بل قال له بالحرف الواحد (( في كل مجتمع في الصالح والطالح ونحنا انشاء الله حا ننظف البطانه دي من الطالح ليبقى الصالح )) كان هذا الكلام في عام 95 يعني الإنقاذ كان ليها 6 سنوات !!!! وأفتكر من المثال دا واضح أنو هو أطيب وأبلد زول وما يهمو شنو البيحصل للبشر في عهده !! وعمرها الطيبة ما ممكن تغفر ليهو ما سواه في البلد وناسها !! وما عاوز أمشي ليك لى دارفور أو الشرق أو الجنوب فالله بهم كفيل!!

وما أظن الطيبة عندنا بهذا المعنى ! والناس لمن تطيب خاطرها مفروض تنتبه لي مصالحها وتشوف مشاكلها تحلها ليهم ، (( الأمان - رغد العيش الكريم - التعليم - العدل )) والعدل هو أساس الحكم !! والعدل دا كوم براهو !!!

الشعب العراقي كان رغم قهر صدام الا انو كان بينعم بالأمن والأمان في عهده بصورة كبيرة وهم يترحمون على أمن صدام !! (( ونحنا مرات كتيرة بنحن لأيام العدالة الناجزة التي طبقها الدكتاتور نميري لأنو الأمن الكان فيها ما سبقوا أمن ))

وكان ممكن يولي على الصالح العام من يخاف الله في عباده ،،( لمن شخص بيعول كمية من الأطفال ويذهب الى الصالح العام وين بيمشي ومن وين بيوكل أولادهُ؟؟؟؟ .)

الكلام كتير وكتير وهو ما أطيب زول ولا حاجة ولا محبوب !! بل ظالـــم وفاســـد !!


البشير (( إمام جائر)) والله بيننا وبينه !!!


هشام

Quote: الرئيس عمر البشير يظل هو الشخصية الأكثر وضوحاً وثباتاً في طرحه ..ويظل هو الشخصية الأكثر تطوراً في مجال العمل السياسي ويظل هو الرئيس الأكثر شعبية وجماهيرية ..

الأخ عمر:
ماالمعايير التي استندت عليها في أنه "الأكثر وضوحا وثباتا في طرحه؟ هل من أمثلة، أم أعطيك أمثلة مخالفة لقولك.
عبارة "الأكثر تطورا في مجال العمل السياسي" تحتاج إلى توضيح بدلا عن الكلمات الفضفاضة التي لا تسمن ولا تغني من جوع!
وعلى ماذا استندت حقيقة بـ"الأكثر شعبية وجماهيرية"؟

قلنا ليك خلي ركوب الافيال ما سمعت الكلام .. منو العوض وعليهو العوض ..

Quote: عمنا حمزاوي: : تعرف سالمين محمد بله لا والله ..

كيف يا عمر الفاروق ابن اخوي ما تعرفه
الزول زول طيب سالمين ود موحومد ودبله رجل تختو على الجرح يبرى
اخو اخوان شيال تقيلة تلقاهـ في اي مناسبة قدام الرجال حاضر ولا لو في وفاة هو البيغسل الميت ويكفنه ويمشي يحفر القبر وينزل الجنازة في ود اللحد وصينيتو حاضرة اول الناس وتلقاه بعمودو في المستشفى كان زول راقد في المستشفى كل الناس بيحبونه زول كريم ومضياف ما يطلع منه العيبة حلال عقد زول مجالس الله يحفظه.
اها عرفت الزول سالمين محمد بله يا اللخو يا ود الفاروق

عمر الفاروق،
صباح التجليات ...
السودان خلااااااااص كمّل كل الاستفتاءات و قبل على الشعبية بتاعت رئيسة الما منتخب؟

عليك الله صحح نتيجة الاستفتاء ده و خليهو الشعب السوداني – (مطروح منه) نفر!

لانو بصراحة انا لو اتحسبت مواطن، مع انهم ما حاسبيني في التعداد، ما بختار رئيسي بالمحبة و الحنان و كشوفات الافراح و الاتراح. و شخصيته انا ما بقدر احكم عليها ما دام ما بعرفه شخصيا حتى لو جا شال فاتحة في ابوي لانو الأجر للبيعزي وما مفروض اديهو بيهو وصل محبة ...

غايتو ياعمر، بوسطيك ده تم لي الناقصة و عرس ود اختي ياهو اللي ما حضرته و ستفتقدني الكلاكلات و الحاج يوسف دهرا

Quote: في غالب الأحيان يتجول في المناسبات الخاصة دون حرس

عمر البشير صحيح بيتجول دون حرس لكن مش عشان هو حاكم عادل عدالة عمر بن الخطاب زي ما بيتبادر لذهن أي شخص بيسمع الكلام ده؛
لكن الحقيقة لأنو الشعب السوداني شعب متسامح، ولو البشير أوالنميري ديل كانو في أي دولة تانية كان شفت شيء تاني.

الشعب السوداني هو شعب الملمات وتجد الناس يتجمعون في أقل من لحظة في أي حدث (كورة، حادث، عزاء، مسيرة، إنفجار، فيضان).. لكن من المهم أن نعرف أن طبيعة حضور السوداني لا تعني موافقته أو تأييده لما يحدث. لذلك فوجيء النميري عند حدوث ثورة أبريل لأن الناس قبليها طلعت في كم مسيرة مليونية وإلخ.. واستوعب الدرس بعد فوات الأوان.

فعمر البشير لو صدق إنو كل الناس البيشوفا عند زياراته دي هي دليل على تأييده تكون غابت عليه هذه الحقيقة.

ثانياً السوداني لا بيشكي ولا بيتظلم بسهولة (الشكية لغير الله مذلة)، لكن في لحظة أن يفيض الكيل تجد أمامك شخص/شعب تكاد لا تعرفه. وكل ما يحدث هو تراكمات وغليان يحدث بعده الفيضان، والشخص الذي ينظر إلى السطح لا يستطيع أن يسبر أغوار ما يمور في الدواخل. فالحذر من الهدوء الذي يسبق العاصفة.

صحيح عمر البشير صاحب أكثر انجازات في عهود الديكتاتورية حيث أن عمر الديمقراطيات القصير لا يؤهلها للقياس والمقارنة.

فهو الذي استخرج البترول الذي نسمع به ولا نراه وكأنه في بلد آخر غير سوداننا.

وهو الذي بنى البنية التحتية والكباري والشوارع لكي تسير فيها سيارات الكيزان وشركاؤهم. أما الشعب فلا يجد حتى "الرصيف والهامش".

ويكفي مثالا أننا مغتربين لعشرات السنوات وغير مسموح لنا بإدخال عرباتنا للسودان دون دفع ما يعادل أكثر من قيمتها نقداً للبشير ونظامه.

وصحيح توفرت المواد الغذائية والتموينية لكن بأسعار تفوق "دخل المواطن العادي".

وصحيح توفرت المدارس والجامعات لكن لمن "استطاع إليها سبيلا".

وتوفرت شركات وشبكات الإتصال، لكن جل الشعب "خارج الشبكة".

وفوق كل ذلك تنقصنا الحرية والديمقراطية والحكم الرشيد والتي بدونها نراه يحرث في البحر.

بل نحن نقول توقف يالبشير قبل أن يأتي الطوفان. ولا خير فينا إن لم نقلها.

Quote: قلنا ليك خلي ركوب الافيال ما سمعت الكلام .. منو العوض وعليهو العوض ..

اخونا عمر
ده الكنت خايفلك منو

لكن والله حبيتك ودخلت قلبي المارق منو عمر

المره دي زيد المصطفي صلاة وسلام

والف صلاة وسلام علي الحبيب



نصيحة مني الافيال دي اخيرليك من كوز أو كباية

ياعمر ..

بتحضر فى عالم الرياضة قطعوا الارسال وجابوا ليك
عمر البشير مع سامى الحاج فى مستشفى الامل وطوالى
قمت طلعت بالنتيجة دى ..اها الاكثر من مائة الف قتيل
فى دارفور والمئات من الالاف المشردة نسال منها منو ؟
بعد طلعت عمر البشير الاكثر شعبية ومحبة بين القادة..
شغلك دا شغل عاطفة ساكت مابتسندو حقائق

عمر الفاروق.

شايف بوستاتك في الفترة الاخيرة بارت وما بقت تجيب دخل.
لذلك لجئت لمثل هذا البوست، عسى ولعل يجيب دخل.
محاولة زكية برضه.


دينق.

Quote: في غالب الأحيان يتجول في المناسبات الخاصة دون حرس فيعود المريض في المستشفى ويبارك الزواج لإبن أخيه ويعزي في موت فلان دون أي ضوضاء وإزعاج وأصوات مواتر النجدة وما أدراك ما عربات الرئاسة .. أكاد أجزم بأن عمر البشير حالياً هو الشخصية الجماهيرية الأولى ولو قمنا بعمل إستفتاء جماهيري عن شخصية عمر البشير لوجدنا المؤيدين له أكثر بكثير من المعارضين .. وهنا لابد من أن أركز على (شخصية) عمر البشير وليس النظام الذي يتبع له عمر البشير .. عن نفسي أحب هذا البشير لأبعد درجة وأتمنى من كل قلبي مقابلته ومصافحته .. سيييييييير سيييييييييييير يا البشيييييييييييييير..

تحياتى ليك وللبشير
ام وضاح

عمر الفاروق ,, إنت أمبارح ضارب شنو ؟؟









الفلبينى بتاع الرياض ده مرات بيعمل كده ,, تحياتى ,,[/B]

دى مواصفت شيخ حلة وليست رئيس بلد العاشر فى المساحة فى العالم وربما التاسع!
مليون ميل مربع ويمشى لاتراح الناس بنفسه
انا شخصيا ما بحبه!
بعد كل انهار الدم دى!
وكمان تقارنوا بالازهرى!
نميرى كتير عليهو!
شفت ليك رئيس عوير واحمق وبحلف طلاق وبكتل الناس بدم بارد فى قروشهم!
جنى

الأخ ابو عبيدة :

Quote: الأخ الحبيب عمر الفاروق حب الناس هبة إلهية وكده أكدت لينا نبوءة عمنا محمد التوم

والله عمنا محمد التوم ما قصّر معاي ..الرئيس مرة وااااحدة
قول ليهو كدي درجنا شوية وقول بشبه النائب الثاني وبعد داك العافية درجات ..


ياسر الشريف :
ثم ماذا بعد القصيدة ؟
نعم البشير المو كشير قول المشير ..عمر البشير..

عمار زكي:

Quote: خليت كراهية توتي وحمد الريح ومشيت لي حب عمر البشير .. بخيت ومبروك عليك

ياخ إتلومت فيني والله .. حمد الريح عديييييل كده ؟ الزول ده كرهني في توتي ليتجاوزها ويعبر بي لكراهية إتحاد الفنانين وأغاني الشباب واليوم الجابو فيهو الكوراك والنّهير زاتو ..
شتّان ما بين كراهية توتي حمد الريح ومحبة البشير وإن كنت أكره ظهور حمد الريح أكثر من حبي للبشير..


الحبيب حمّيدة :

Quote: والله يا عمر طيارتك قامت ..

يا زول هووووووي الطيارات البتقوم الأيام دي شايفا بتجيب ليها إنفجارات عشان كده خليهو قطر ساي يا اخوي..
بالمناسبة الطيارة الوقعت أمبارح هل عدّت أحداثها دون أحداث الإثنين أم وقعت المجازر ؟

الأخ هشام :
شكراً للمداخلة المقدرة وأحترم رأيك يا سيدي ولو إختلاف الأراء لبار عمر البشير ..

Quote: لكن كيف يكون طيب وأكثر شعبية والناس ماتت والما مات تضرر جوعاً وذله ومهانة ! نضرب مثال : ما بعيد قصة عمارة ساجدة وما آلت له .. ترقية المسؤول وضاع المال العام سُداُ .

يا عزيزي حتى نكون منطقيين وواقعيين في نفس الوقت دعنا من الشعارات والعبارات التي أصبحت لا تتحقق في زماننا هذا ففي كل العهود السابقة وفي العهود القادمة سيكون الجوع والموت والقهر فقد ولّى يا عزيزي زمن البعير التي لو تعثرت في الطريق لخاف الرئيس والحاكم ولقد ولّى زمان الأمن والإستقرار في كل العالم ..
المال العام ضاع في زمن الأحزاب وضاع في زمن النميري وضاع في زمن البشير وسيضيع في زمن (وائل) ووائل هذا هو الرئيس القادم الذي لم يولد حتى الان ..

Quote: الكلام كتير وكتير وهو ما أطيب زول ولا حاجة ولا محبوب !! بل ظالـــم وفاســـد

أها ده الكلام العايز براهين وما يكون كلام من طرف ساي !!! فانا اتحدث عن عمر البشير الشخصية عليه أن مطالب بسرد وقائع تؤكد فساد البشير الشخص ..بس ما تبقى لي زي الناس الجات هنا وجابت لينا صور لي بيوت أخوات البشير !!!

الشيخ صاح :

Quote: عبارة "الأكثر تطورا في مجال العمل السياسي" تحتاج إلى توضيح بدلا عن الكلمات الفضفاضة التي لا تسمن ولا تغني من جوع!

ما عنيته يا عزيزي الفاضل أن عمر البشير 89 بكل تأكيد ليس هو عمر البشير 2008 فحتى خطابه السياسي إختلف من سابقه وتناوله للقضايا الدولية منها والمحلية إختلفت طريقة مناقشته لها ..

البشير ما زول كامل وغلط ويغلط كغيره

يا معتصم :

Quote: قلنا ليك خلي ركوب الافيال ما سمعت الكلام .. منو العوض وعليهو العوض ..

يا زول نحن تعدينا مرحلة الأفيال وحالياً بنجرب نركب الجاكواار

عزاز ال شامي:

Quote: عليك الله صحح نتيجة الاستفتاء ده و خليهو الشعب السوداني – (مطروح منه) نفر!

الكلام ده كان ممكن أصححو لو موضوع الطيارة داك ظبط معاك

Quote: لانو بصراحة انا لو اتحسبت مواطن، مع انهم ما حاسبيني في التعداد، ما بختار رئيسي بالمحبة و الحنان و كشوفات الافراح و الاتراح. و شخصيته انا ما بقدر احكم عليها ما دام ما بعرفه شخصيا حتى لو جا شال فاتحة في ابوي لانو الأجر للبيعزي وما مفروض اديهو بيهو وصل محبة ...

ياخ الأمريكان الشايفنهم أسيادنا وتاج راسنا معايرهم في إختيار الرئيس أسوأ بمراحل من معاييري دي فيكفي إنهم وصلوا مرحلة من المراحل لإختيار كلينتون لربطة عنقه ووجهاته ..
أسة عليك الله أحسن الطيبة ولا ربطة الكرفتة ؟

Quote: غايتو ياعمر، بوسطيك ده تم لي الناقصة و عرس ود اختي ياهو اللي ما حضرته و ستفتقدني الكلاكلات و الحاج يوسف دهرا

يا حليلك يا عزاز فقد أضعتي فرصة العمر بتناول البيض المسلوق والمخلل مع البطاطس الناشفة وسلطة الأسود التي إلتصقت بي العيشة المدوورة وقليل من مشاغلات ربما تأتيك من خلف الخيمة وكرسي يخرم البلوزة مع سبق الإصرار والترصد ..

يا عمر الفاروق
كيفك


الجماعة ادوك حاجة ولا شنو ...


اوع يكون وعدوك ......



نشوفك بخير ...

Ir Hickir fi weyyagna


Ir caillatoan ir cailla goonun duniaimmi walla akhraya
Jerca weadicca jillmonang irbirrediss donia medrasaya

woa irckil agjiccoo

الاخ عمر الفاروق

تحياتي؛؛؛



والله النصيحة ليك يارب انا بحب عمر البشير جدا جدا



كتبت:

Quote: المال العام ضاع في زمن الأحزاب وضاع في زمن النميري وضاع في زمن البشير وسيضيع في زمن (وائل) ووائل هذا هو الرئيس القادم الذي لم يولد حتى الان ..

ياعمر ياخوي طيب المناضلين ديل ماقطعت عليهم الطريق




أحبك الله الذي أحببت فيه البشير



أبوأحمد

عمر البشير شخصية محبوبة للشعب السوداني..


ياراجل

ليه التسطيح ده يا عمر الفاروق خسارة ياخ انا بحب كتاباتك لكن فى دى فقعتا مرارتى