Post: #1
Title: عثمان محي الدين ..تستاهل
Author: عمر الفاروق
Date: 01-08-2008, 04:07 PM
Parent: #0
عثمان محي الدين واحد من أصحاب الأنامل التي تداعب الكمان كما تداعب طفلة صغيرة خصلات شعرها تنساب الأوتار بين أنامله كأنسياب المياه في الجداول في يوم خريفي ..
واحد من الشباب المهموم بالحركة الموسيقية طرح نفسه في ساحة تضج بالعمالقة أمثال محمدية وعربي وفرض وجوده مع فنانين عمالقة وفي فرق موسيقية لها وزنها فكان خلف وداللمين وزيدان وغيرهم من الفنانين ..
وأمتدت يده بيضاء لأبناء جيله فكان مع محمود عبد العزيز وعصام محمد نور وعمار السنوسي وغيرهم..
كم كنت معجب بهذا العازف الفنان قبل أن ألتقيه أو أن أعرفه ولاحظت أن معظم الفنانين كانوا يعطونه مساحة للصولات بإستخدام الة الكمنجة فكان يبدع فيها أيما إبداع فتجده ينقل إحساسه الموسيقي كله في هذه الالة الوترية الحنينة ..
الصدفة وحدها جمعتني به إبان إجازتي الأخيرة في السودان فوجدته كما تخيلته شاب مثقف واعي مهموم بقضايا الموسيقى لا شغل له ولا شاغل إلا تقديم فكر موسيقي شبابي جديد في قالب حديث مع المحافظة على إرثنا القديم ..
حكى لي عن سنين الغربة التي قضاها بعيداً عن السودان فراهنته على فشل تجربته طالما إنه إنقطع عن السودان وعن الأذن الموسيقية السودانية اللماحة فأبهرني بإنتاج ضخم ظل يقوم به طيلة خمس سنوات فأدركت أنه كسب الرهان ..
ما أعجبني في عثمان أنه كان شجاعاً وخرج من بوابة حصر نفسه في عازف كمان وخاض تجربة التلحين فقدم تجربة لحنية قمة الروعة وهو يقدم للفنان عصام محمد نور لحن لأغنية بتستاهل من كلمات الشاعر الكوباني ..
وقد قام عثمان بتوزيع هذا العمل وكنت قد وعدته أن أشرك الجميع من الذوّاقة والمتخصصين والمحبين للموسيقى بأن أطرح تجربته اللحنية هذه على الموقع للإستفادة من الأراء حول العمل الإيجابي منها والسلبي خصوصاً وأننا في هذا الموقع لدينا الكثيرون من المتخصصون موسيقياً الموسيقار الموصلي وساطور وعزيز والصاوي وناذر وغيرهم من الشباب الحلو إضافة للذوّاقة ..
دعونا نستمتع بهذا العمل الموسيقي الجميل
object data="http://www.3aza.com/upload/user_uploads/omeralfaroug7be9/Bietstahal.mp3" width="144" height="60" type="audio/mpeg">
|
Post: #2
Title: Re: عثمان محي الدين ..تستاهل
Author: هاشم أحمد خلف الله
Date: 01-08-2008, 05:53 PM
Parent: #1
أخي العزيز عمر الفاروق أنا من الذواقة وقد شدتني هذه الأغنية بالفعل
فلك الشكر اخي وعبرك ارسل التحايا للاستاذ عثمان محي الدين والفنان
المبدع عصام محمد نور والبوست يستاهل .
|
Post: #3
Title: Re: عثمان محي الدين ..تستاهل
Author: حجة امنة
Date: 01-08-2008, 09:25 PM
Parent: #1
من مده بفكر انى انشر بوست عن الاغنية و عن عبقرية عثمان محى الدين الاتجلت فى العمل دا
لحد امس بالذات فكرت فى نفس عنوانك دا زاتو ... سبحان الله 
اسمح لى اقتبس و انقل كلامك من هنا, لانو عبر عن الكلام الكنت دايرة اقولو بالضبط
,,,,,,
اغنية جميلة من جميع النواحى ...
نص , لحن , و اداء الفنان عصام محمد نور رائع كما اعتدنا
شكرا عمر ...
حنكون هنا برضو
عثمان محى الدين,, بتستاهل ..للمشاهده اضغط
|
Post: #4
Title: Re: عثمان محي الدين ..تستاهل
Author: محمد سنى دفع الله
Date: 01-08-2008, 10:44 PM
Parent: #3
عمر الفاروق
جميلة الغنية وشجية
الأداء التعبير عالي
الموسيقى والتوزيع ينبئ بملحن رائع قادم بقوة
الأجمل انك تكتب عن الملحن
الملحن هو الدعامة الأساسية لكل فن غنائي
الملحن هو المحرك للصور والتعابير النايمة على الورق
ان تكتب عن الملحن هو الأعتراف بالمبدع الحقيقي للأغنية
التحية والتقدير لكل من لحن اغنية سامقة لونت وجدان الأمه
لك الشكر عمر
ولك المحبة
والتقدير لهذا العمل المدهش واجمل ما فيهو النهاية
سلام
|
Post: #5
Title: Re: عثمان محي الدين ..تستاهل
Author: Mohamed Ahmaed Olyesh
Date: 01-08-2008, 10:48 PM
Parent: #4
يا سلام عليك يا عثمان محي الدين
لغه موسيقيه عاليه
نغم وشجن
توزيع جميل وخصوصا حركه البراصات دي
تلوين جميل للكلمات مع الايقاع
سامع صوت عبد المنعم شو في الدرمس
(ده مانقد ولا تحليل علمي)دي حاجه بسموها مبارات ناس المزيكا وكده
بلغوه حبي
عليش
|
Post: #6
Title: قووووف
Author: حجة امنة
Date: 01-08-2008, 10:58 PM
Parent: #1
كلمات د/ علي الكوباني
الحان / عثمان محي الدين
بتستاهل تشيل الهم
الهم ومرالبّين
بتستاهل
ابيت الحبو ليك صافي
وشالك في رموش العين
ودرتا القلبو ليك جافي
وجافاك من سنين وسنين
بتستاهل
*****
تعيش في غربة الافكار
وضايع في الوهم محتار
وتبني قصور في الخيال تختار
وما قايل الزمن غدار
بشيل زهر العمر نوار
ظروفو القاسيه ما بتلين
وتستاهل
****
تعاين في نواصي الليل
تكوس من بين نجومو دليل
وطرفك من
وطرفك من سهادو عليل
مجافي النوم ودمعو يسيل
عذابك ما كتر بالحيل
متين تلقاهو الفرح لمتين
وتستاهل
****
بتستاهل لانك ماعرفت هنَاك
ولا قدّرت احساس البعزو هواك
مشيت في سكة الاشواك
وخليت الروحو ديمه معاك
وانتا الليله في لحظات ضّناك وشقاك
بتشكي الحال نواح وانين
وتستاهل
|
Post: #7
Title: Re: قووووف
Author: Mohamed Ahmaed Olyesh
Date: 01-08-2008, 11:03 PM
Parent: #6
شكرا حجه امنه
وانت وين طال غيابك؟
عليش
|
Post: #9
Title: Re: قووووف
Author: حجة امنة
Date: 01-08-2008, 11:44 PM
Parent: #7
Quote: شكرا حجه امنه
وانت وين طال غيابك؟
عليش |
حاليا حا اقعد هنا لحد ما يجى الفاروق
تسلم يا عليش ..
|
Post: #8
Title: Re: عثمان محي الدين ..تستاهل
Author: عبدالوهاب همت
Date: 01-08-2008, 11:11 PM
Parent: #1
وعثمان محي الدين كوستاوي وحلفاوي (متبرطن)يقيم في مدينة كارديف بالمملكة المتحدة. وكما هوبارع في التلحين كذلك كتب قصائد ولحنهالكنهيصر على اعتقالها لاسباب يعرفها.
وعثمان كغيره من العازفين الذين ضربوافي فجاج الارض حاملين رسالتهم الفنيه ينثرونها بين الناس
ليخففوا عنهم الام المهاجر والمنافي.لم تتوقف رسالته عند ذلك وكون له منظمة تهتم بعكس جوانب من الموسيقى والفلكلور السوداني. وبنظرة الفنان الثاقبه اختار مجموعة من الاطفال السودانيين ليترجموا ذلك.انضم اليه في هذا العمل مؤخرا الفنان المسرحي عبدالمجيد حسن عبدالمجيد.
|
Post: #10
Title: Re: عثمان محي الدين ..تستاهل
Author: عمر الفاروق
Date: 01-09-2008, 06:34 AM
Parent: #1
الحبوب هاشم :
| Quote: أخي العزيز عمر الفاروق أنا من الذواقة وقد شدتني هذه الأغنية بالفعل |
يا راجل إنت فيك روح فنان وبما أن الفنان قد شدّته الأغنية فهذا يعني ان اللحن نقلك إلى عوالم التلذذ بي الموسيقى ..
شكراً يا هاشم وشكراً عثمان محي الدين خوض معركة التجديدية ..
|
Post: #11
Title: Re: عثمان محي الدين ..تستاهل
Author: عمر الفاروق
Date: 01-09-2008, 06:48 AM
Parent: #1
Quote: من مده بفكر انى انشر بوست عن الاغنية و عن عبقرية عثمان محى الدين الاتجلت فى العمل دا
لحد امس بالذات فكرت فى نفس عنوانك دا زاتو ... سبحان الله |
حاكو ..حاكو ..بس..
عثمان محي الدين لا عمر الفاروق ولا حجة امنة ولا عمي اللمين بيفوهوا حقو(مين عمي اللمين ده؟)
الود فنان وشارب الموسيقى شراب وجارية في عروقه ..
والفطرة غالبة والمسحة العلمية موجودة فكان ده نتاج طبيعي ..
تخريمة :
البوست بوستك انا ماسك لي موية في الحواشة
|
Post: #12
Title: Re: عثمان محي الدين ..تستاهل
Author: عمر الفاروق
Date: 01-09-2008, 07:16 AM
Parent: #1
وهذه تحيات الأخ عثمان محي الدين عبر الإيميل لكل رواد البوست :
Quote: الاحباء جميعا لكم مني الحب
عرفت فيما سبق- كما كان يقول عني بعض الزملاء الموسيقيين- سمكرجي للاغنيات-حديثها وقديمها,ثم اتت هجرتي الي بريطانيا حيث ولِدت معظم هذه الاعمال ومنها بتستاهل,تلك الاعمال التي اعتبرها مشروع وحلم السنتـين القادمتـين ...كمساهمه مني في رفد الحراك الموسيقي الثقافي السوداني,بعد سنوات احتراف اكََمَلت ال20 عاما..
بعد اصدار شريط الاخ الحبيب عصام محمد نور هاتفته وتحدثت معه عن صدي الشريط-فكل شخص تعتمل دواخله بإحساس الخوف حين اقدامه علي تجربه تعتمد في التقييم علي تباين مزاج الناس-فقال لي ممازحا يا عثمان بتستاهل لمن تسمعها في الصوت النهائي ما حتعرفها,اضافة الي انني اعتبرها من اغنيات السمع وهي ما احتاج لهذه المرحلة اسأل الله لي ولك التوفيق وانا في انتظار عودتك الي السودان لنتهي من(تحدي) الانتاج المشترك (غناء ومدائح)بيني وبينك.انتهي كلامه هنا وبدأ استعدادي لسماع رأي اُناس اعرف عنهم عدم محاباتهم ومجاملتهم في امور مثل هذه,يصدقوك القول ولو كان عكس ما تحب..بكل وعي وبدون ايلام ..فكان ان ارسلت الاغنيه عبر الايميل لهم وجاءتني ردودهم بكل الشفافيه والتي احمد الله اولا واخيرا علي اتفاقهم بجوده الاغنيه والاداء فيها..وبعض المتخصصه منهم ابدوا ملاحظاتهم الدقيقه والتي سأراعيها مستقبلا وهو ما يتعلق بالناحيه الفنيه البحته.
من خلال مساهماتي-المتواضعه- في معظم الانتاجات الفنيه للكاسيت منذ العام 1993 وحتي لحظه خروجي من السودان كنت مهموم بجعل آلة الكمان تلعب الدور الرئيسي دونما قيود عند تسجيل و تنفيذ الاغاني ولعب الاداء الفردي (الصولو) لإظهار امكانية الآله والمهارة عليها بإعتبار-كما علمونا اساتذتنا- ان الكمان روح الموسيقي,ويظهر ذلك بوضوح في بتستاهل .وهذا الهم يمتد ايضا الي تحريك ساكن للخروج بهذه الآله الي افق آخر,فقمت بتسجيل اول البوم لآلة الكمان-سيصدر قريبا- وفيه تقوم الكمان بالغناء لعدد مقدر من الاغنيات التي شكلت وجدان الشعب السودان مثل ,كيف لا اعشق جمالك لإستاذ الاجيال عثمان حسين,ويلاك يا عصفور للعميد احمد المصطفي,وقمر دورين للاستاذ الكابلي ,علي سبيل المثال.. بأساليب المدارس المختلفه لعزف الكمان في بانوراما ابتديتها من مدرسه اعلامنا في الآله:السر عبدالله-بدر التهامي-جيل عربي ومحمديه,مرورا بميرغني الزين ورفاقه الرائعين الي عاصم الطيب مجدي العاقب الذيَن اعتبرهم الجيل الذي يسبقنا مباشرة وقد وثـقت هذه الاعمال المعروفة علي الة الكمان قاصدا كسرحاجز الدخول الي المستمع السوداني- الواعي والذواق- وبعدها اقوم بتسجيل اعمالي الخاصه (واضعا تجربة صديقي الفنان الموسيقي حافظ عبد الرحمن كنبراس لي)..
مداخلاتكم وارائكم اعتبرها جواز مروري الي قلوبكم وقلوب جميع المستمعين, الكمال لله وحده هي كلها محاولات فإن انتجت عملا جيدا ,فذلك الفضل من الله ,وان لم يكن بالجوده المطلوبة فلي اجر المحاوله ولكم العتبي ,فالموسيقي علم جمال يصعب معه المعيار القياسي المحدد لأنك تتحدث عن احساس وانفعال بشئ ما!!يختلف من فرد الي آخر,فما يراه البعض جميل ,يراه آخر غير,اسمحوا لي بالإعتذار للاطاله ولكم تقديري علي ما سطرتم في حقي من كلمات احتاجها كزاد لي في هذا الطريق الوعر.
محبتي للجميع
عثمان محي الدين |
|
Post: #13
Title: Re: عثمان محي الدين ..تستاهل
Author: nazar hussien
Date: 01-09-2008, 07:55 AM
Parent: #12
بتستاهل يا عثمان محي الدين هي بداية الطريق لمزيد من الابداع...
وابداع آلة الكمان بالذات...خليها تتحكر في قلب غنانا وروحنا
شكرا لك يا عمر الفاروق ان اشركتنا في سماع ثلاث مبدعين..كوباني وعصام وعثمان
يا عمر تخيل معاي لو اتلاقوا: محمدية...ومجدي العاقب...وعثمان محي الدين
رأس اقواس مع بعض...وعزفوا لينا وتبادلوا في الصولات...
|
Post: #14
Title: Re: عثمان محي الدين ..تستاهل
Author: عمر الفاروق
Date: 01-09-2008, 12:01 PM
Parent: #1
السني يا ود دفع الله :
الشغلانية بقت كفر ووتر وتمثيل ..
أدينا معاك فرقة نتجدع ..
فعلاً يا السني اللحن يمثل الضلع الأكبر في المثلث وإن كان مرة متساوي الأضلاع ولكنه في مرات يصبح اللحن ضلعه الأكبر..
يعني أسة كدي إتخيل معاي زاد الشجون دي يكون لحنها غير كده وبيشبه لحن دقة الباب وجانا وجريت ليهو حفيان مش كان ضاعت شمار في مرقة ساي رغم الإبداع في الكلام ؟
طيب تعال نشوف أغنية زي اللبن أبو لي بي لو ما لحنها ده في زول كان هببو ليها ..
نعم بصمة الفنان مهمة لإكمال اللوحة وإخراجها في أرقى ثوب والمجهود متكامل بين الجميع عازفين فنان شاعر ملحن لكن تبقى الحبكة الفنية في وضع اللحن العبقري..
وده اللي نجح فيهو عثمان بإفتراض إنها أول تجربة لحنية واضحة المعالم ..
تحياتي ليك يا ذوق..
|
Post: #15
Title: Re: عثمان محي الدين ..تستاهل
Author: Talal Halfa
Date: 01-09-2008, 02:07 PM
Parent: #1
السلام عليكم
أولا" أشكرك اخ عمر علي البوست الرائع .
أنا احد المحبين لعثمان محي الدين لأنو أخ حبيب وصديق وبالمناسبة أنا شهدت لحظات تسجيل "بتستاهل"
في استديوهات قناة الخرطوم الدولية وياما سهرنا الليل في شهر رمضان أنا وعثمان بسبب "بتستاهل"
أنا شخصيا" معجب جدا" بالأغنية وبصراحة "غيران" من حبيبي عصام ولم اخف ذلك من عثمان وكنت اتمني
أن يكون هذا العمل لي ، بس برضو عصام فنان رائع يمتلك كل أدوات التطريب والأغنية ذي ما تكون
مفصلة عليه وهي امتداد لأغنياته الجميلة.
أنا برضو لي تجربة مع عثمان من كلمات دكتور كوباني بتقول :
كوني ذي ما انتي كوني عامرة والأصالة ...
انتي روحي ونور عيوني وبهجة الدنيا وجمالا ...
وطبعا" لا أود الخوض فيها لأنها ليست موضوعنا ، بس حبيت أؤكد انو عثمان فنان وأمتدت ألحانه
للعديد من الشباب (عصام ، طلال ، صباحي ...)
وكلها تشهد بظهور ملحن بارع مقتدر والأهم انو عارف ما يناسب امكانات كل فنان تعامل معه فيأتي
اللحن كما لو كان مفصلا" عليه.
تحدث معي عثمان وطلب مني سماعها بعد نزول الكاسيت وبالجد لم أسمعها الا الآن فلك الشكر والتحية.
كما أتمني أن أري عثمان في الخرطوم كما وعدني لأنو محله شاغر في الفرقة .
لكم التحية جميعا" وحبي وودي .
|
Post: #16
Title: Re: عثمان محي الدين ..تستاهل
Author: عمر الفاروق
Date: 01-09-2008, 05:03 PM
Parent: #1
يا عليش:
| Quote: سامع صوت عبد المنعم شو في الدرمس |
إجابة صحيحة ..شيل ليك صندوق وأوووووعا من الفاضي ..
الدرمز شغلو جميل بس لو هو والبيز خففو شويييييييييية كده كان بيكون الشغل أحلى ..
|
Post: #19
Title: Re: عثمان محي الدين ..تستاهل
Author: Mohamed Ahmaed Olyesh
Date: 01-09-2008, 09:11 PM
Parent: #16
شكرا الفاروق
بعدين حجه امنه دي قالت انا قاعده لامن يجي عمر الفاروق
اهو انت جيت....
(دي لغه مسرح بيفهما السني)
والله الشغل جميل حسب السمع ونحن طبعا يعتبر مستمع متذوق للموسيقي وليس متخصصا
وبرغم انو الواحد مرات بتجيهو حاجات كده يجري يعزفها بالعود لكن سرعان ما تطير
عليش
|
Post: #17
Title: ياعمر شايفاك مسكت في درب الحواشه(الظاهر الموسم السنه دي خيرو كتير)
Author: حجة امنة
Date: 01-09-2008, 08:30 PM
Parent: #1
استاذ السني
رجل ضليع في المسرح-بدون شك -يعني لووضع تصور لي فيديو كليب للاغنيه
ويكون بي سيناريو مباشر كدا بتخيل انو الاغنيه دي ممكن تأخد شكل غير بالصورة ......
ياخ دى اغنية
صورتها جاهزه جوه اللحن
|
Post: #18
Title: Re: عثمان محي الدين ..تستاهل
Author: Elmosley
Date: 01-09-2008, 08:51 PM
Parent: #1
صديقي عمر
لقد سبقتني والله وكنت اريد ان انزلها فقد عجبتني جدا بعد استماعي اليها
وقد تفضل عثمان بارسالها الي شخصي
عموما انت برضو ود كارنا
=========================
عثمان محي الدين
(الغلباوي) طبعا الغلبه بتاعتو دي ماهي الا طاقة موسيقية زائدة لذا فنحن نتوقع منه ان تتفجر
الحانا وأفكارا
فله كل الحب
ولك
|
Post: #20
Title: Re: عثمان محي الدين ..تستاهل
Author: ترهاقا
Date: 01-11-2008, 06:02 AM
Parent: #18
الاخ عمورى كل عام وإنت بخير والعيال طيبيين
حقيقة خسارة والله زول زى ده يطفش من السودان ، حضرت ليهو كم صولو لكن زى ما إنت عارف العازفين حقهم ضايع عادة
والزول ده حقيقة قاعد يضع بصماته بقوة وهو عازف للكمان مميز وفنان للنخاع
تحياتى له عبرك
وبعدين يا عمر قربنا ندييك الجنسية النوبية ، بس إنت طول بالك ، وبتنا تكون راضية عنك ، لووووول
والتحية لاصحابي الجميليين بالرياض
احمد ساطور
|
Post: #21
Title: Re: عثمان محي الدين ..تستاهل
Author: عمر الفاروق
Date: 01-12-2008, 06:27 AM
Parent: #1
يا همت :
| Quote: وعثمان محي الدين كوستاوي وحلفاوي |
اهاااااااااااا داير تجيب لينا الهوا مالك وتقلب لينا البوست هامش وتراجي وبشاشا ونادر السوداني ..
ما كنا كويسين 
كوستاوي دي من كوستي لكن في منربنا ده بتوديك الكرمبة !!!
هي الكرمبة دي شنو ؟
تحية لي كوستاوي بتاع الموسيقى ما كوستاوي بتاع واشنطن ونيويورك والدول المجاورة ..
|
Post: #22
Title: Re: عثمان محي الدين ..تستاهل
Author: Elmosley
Date: 01-15-2008, 08:38 AM
Parent: #1
اما الاغنية فهي تميزت بكلمات مباشره
وبسيطه تصل الي قلبك مباشرة
اما اللحن فهو متدفق ونشط
كما ان لمسات عثمان محي الدين في التو زيع
فيها بصمته الخاصة جدا
كما ان الطريقة التي يتغني بها عصام
تخلق بينك وبين صوته وكآنها علاقة اسرية
فلهم جميعا التحية
ومزيد من الاعمال التي تخرجنا من وحسة
الموسيقي التي تميز بها بضع كبير من الزمن القريب الفات
|
Post: #23
Title: Re: عثمان محي الدين ..تستاهل
Author: عمر الفاروق
Date: 01-15-2008, 06:29 PM
Parent: #1
Quote: يا عمر تخيل معاي لو اتلاقوا: محمدية...ومجدي العاقب...وعثمان محي الدين
رأس اقواس مع بعض...وعزفوا لينا وتبادلوا في الصولات... |
معقولة بس يا نزار؟
دي تكون سمفونية عديييييييييل ومتعة المتعة مع أقواس (قزح)..
تسلم يا حبوب..
|
Post: #24
Title: Re: عثمان محي الدين ..تستاهل
Author: Kostawi
Date: 01-15-2008, 06:51 PM
Parent: #23
| Quote: تحية لي كوستاوي بتاع الموسيقى ما كوستاوي بتاع واشنطن ونيويورك والدول المجاورة |
الكوسة المقابلة الحر
عامل صلعتك الشينة دي
أنت كنت بتبيع مساويك في العشرة?
|
|