Post: #1
Title: تصرفات جماعية ..
Author: عمر الفاروق
Date: 12-11-2006, 06:28 AM
Parent: #0
تشرب من المزيرة ولمن تخلص تدي البعدك الكوز مليان موية !!!!
هل ده تصرف بتاع زول خجلان وشايف انها ما لذيذة تديهو الكباية فاضية ..
هل هي تعويدة وانت شايف كل الناس القبالك عملوها فقلت انت تعملها ؟
هل هو تصرف من صميم قلبك يدل على احترامك للشخص!!!!
|
Post: #2
Title: Re: تصرفات جماعية ..
Author: عمر الفاروق
Date: 12-11-2006, 06:30 AM
Parent: #1
تمشي زيارة لي صحبك في بيتهم لأول مرة ويقوم يعرفك بي افراد أسرتو ..
أم صاحبك بعد تسلم عليك بتقول ليك :
وكيف أهلك إن شاء الله كويسين !!!!
بدون ما تشعر بيكون ردك :
والله كويسين بيسلموا عليكم !!!!
هل فعلاً أهلك قالوا ليك سلم على ناس فلان ؟؟ مع العلم إنو هم ما عارفنك اصلا ماشي ليهم
هل هو رد تعودنا عليهو اي زول يقول ليك كيف ناس فلان تقول ليهو كويسين بيسلموا عليكم ؟
أم هي المجالمة في الردود ؟؟
|
Post: #3
Title: Re: تصرفات جماعية ..
Author: عمر الفاروق
Date: 12-11-2006, 06:34 AM
Parent: #2
تكون قاعد في المطعم بتاكل في طلب فول ..
يجي يقعد جمبك واحد تاني شايل طلب كبدة ..
فجأة وبدون مقدمات تلقاهو فتح معاك موضوع وخشيتو في الونسة ولا شعورياً يقوم يلز صحنو عليك ويبقا عشاكم واحد..
ولمن تقوم انت قبالوا بتلقى نفسك مشيت الكاشير للحساب والغريبة بتقوم تدفع انت الحساب وتلح وتصر على الزول ده ما يدفع !!!
هل دفعت الحسابين من باب الخجل لأنك حسيت بي إنك عصرت عليهو وأكلت من الكبدة أكتر منو ؟؟
ولا دفعتها لأنك ارباب وزول واجب ؟
ولا حا تدفعها على مضض وانت متغايظ وبتقول يا ريتني لو قمت بعدو ؟
|
Post: #4
Title: Re: تصرفات جماعية ..
Author: عمر الفاروق
Date: 12-11-2006, 06:40 AM
Parent: #3
في المواصلات والناس زحمة لقيت ليك بت مشمعة (واقفة شماعة) وقمت وقفت ليها ..
هل وقفت ليها إحتراماً ؟؟
أم هي العادة التي جرت بي إننا لازم نقيف لي النسوان (مع العلم إنهن نصف المجتمع ولهن ما علينا)
الغريبة نحن عندنا استايل معين البنقيف ليهو في المواصلات !!
|
Post: #5
Title: Re: تصرفات جماعية ..
Author: عمر الفاروق
Date: 12-11-2006, 06:43 AM
Parent: #4
تمشي تشتري ليك حاجة (او في المواصلات ) ويقوم سيد المحل أو (الكمساري مثلا) يقول ليك والله ماف فكّة فتجدنا في الغالب وبي كل طيبة بنقول ليهو :
خلاص يا زول ماف مشكلة ...ونمشي نخلي الباقي!!!!
هل هو خجل من الإلحاح بإسترجاع الباقي ولو كان تافهاً !!!
أم هي واحدة من الاشياء التي تعودناها بأن نتنازل عن الحقوق الصغيرة والتي ستصبح كبيرة لاحقاً !!
أم هي مراعاة لي ظروف الشخص المعتذر لعدم توفر الباقي وعشان كمان تكسب زمنك انت كمان ..
|
Post: #6
Title: Re: تصرفات جماعية ..
Author: Alsa7afa_30
Date: 12-11-2006, 07:00 AM
Parent: #1
كونـوا على الموعـد..
فــي
الإتجـاه المعاكس مـع..
 عمـر الفاروق
الــرأي و الرأي الآخـر
|
Post: #7
Title: Re: تصرفات جماعية ..
Author: Mohamed E. Seliaman
Date: 12-11-2006, 07:19 AM
بمسح سريع للسوق العام
حيث ترى أهل المركز يسيطرون على هذه الأكشاك
المسماة زورا مكتبات ويبيعون فيهاالتنباك
والصحف والمجلات الهايطة والمساحيق المغربية الشاذة
والأكسيد والكريمات الضارة إلى آخر القائمة المعروفة.
في الجانب الآخر
تجد مشردي الهامش يفترشون الأرصفة وهم
يبيعون مبيض الأسنان والمساويك
ومبيضات الملابس ومنظفاتها وسم الدبيب والفأر!!
على حين غفلة من كومر البلدية
الذي سوف يأتي ليطاردهم ويصادر
بضاعتهم أو يرمي بها في أقرب مجرى
صرف صحي........
................
هل يتم ذلك على أساس عرقي؟
أم بالواسطة والمعرفة والمحاسيب؟؟
في ظل سيطرة أهل المركز : أسأل على أي أساس يتم توزيع الأ...ك في المواقع المميزة
|
Post: #8
Title: Re: تصرفات جماعية ..
Author: عمر الفاروق
Date: 12-12-2006, 02:06 AM
Parent: #1
الصحافة ظلط:
يا زول انا ديموقراطي جداً ..
بسمع كلام الناس وبعمل الفي راسي انا 
تحياتي ..
|
Post: #9
Title: Re: تصرفات جماعية ..
Author: Alsa7afa_30
Date: 12-12-2006, 06:14 AM
Parent: #8
| Quote: بسمع كلام الناس وبعمل الفي راسي انا |
و يشهــد الموصلــي على ذلك..
|
Post: #10
Title: Re: تصرفات جماعية ..
Author: سيد أحمد خليفة
Date: 12-12-2006, 07:28 PM
Parent: #9
الفاروق ازيك
نسمع الكثير من كلمات الاطراء والغزل المكتوم فى المنبر
فاذا كتب واحد قصيدة ملفقة من هنا وهناك وتفتقر الى ابجديات البناء الشعرى
رد عليه العشرات من المستهامين بشعره او شلته وابناء عترته
ووصفوه بالرائع ووصفوا قصائده( بالروائع)حتى يكاد البعض ان يصدق نفسه
واذا كتب احدهم نثرا فتاتا اانهالت عليه التبريكات
واذا علقت تعليقا عارضا
يقولون لك مثلا: (ايها الحبيب ) او (الطلة البهية)
او(نورت البوست)او (التحايا النواضر)
ولايكاد يوجد مكان اخر فى لعالم
تحتشد فيه المجاملات وتبادل مسح الاجواخ
والتربيت على الكتف مثل هذا الحيز الاسفيرى الضيق
فلا الوسائل المرئية ولا المطبوعة
ولاالمسموعة يوجد فيها هذا العدد من البشر
الذين يتسامرون طول اليوم ويتبادلون( تخميسة)المديح
ليل نهار
فهل هذا من القلب ام هو سلوك جماعى ......سؤالك فى محله ياعمر
|
Post: #11
Title: Re: تصرفات جماعية ..
Author: عمر الفاروق
Date: 12-13-2006, 02:01 AM
Parent: #10
الأخ محمد سليمان :
شكراً للمرور وإضافة تساؤلات أخرى تشغل تفكيرك ..
الأخ سيد أحمد :
التحايا القلبية
تعرف تساؤلاتك دي عن نفسي أضمن ليك إنو بنسبة 90% كل الإطراء والمجاملات تأتي من الأصابع والكيبورد وليس للقلب دخل فيها..
كلها مجاملات تزول بزوال المؤثر ووضع مفتاح التشغيل في الكمبيوتر في وضع الإيقاف...
ولك التحايا العطرة يا ايها الجميل الرائع (ستزول حال اغلاقي الجهاز)
|
Post: #12
Title: Re: تصرفات جماعية ..
Author: ابو جهينة
Date: 12-13-2006, 09:19 AM
Parent: #11
الركاب في القطر أو في الباخرة ...
تلقاهم شكل و دفر و كوراك ... و خنق ..
بعد شوية تلقى الواحد يزح للزول الكبير و للعيان و للمرة الكبيرة
و بعد شوية تلقى الزوادة بقت زى ال shared document و حق مشاع بين أعداء اللحظات القليلة الفائتة. و تلقى ال عندو بطانية زيادة يغطي بيها رفيقو ..
و ال بيمشي على البوفيه يجي خامي الأكل و الشاى
**
موضوع في الصميم يا عمر
واصل
|
|