كيف سيكون الحال بعد أن يتحقق الإنفصال ..؟

سؤال جادّي جداً ومحيرني وانا أفكر بعد ان تتم عملية الإنفصال والتي هي على وشك أن تتحقق..
المحيرني إنو إذا تحقق الإنفصال هل سيتم تقسيم السودان لي دولتين ؟؟
طيب الاسماء حا تكون كيف ومنو الأحق بي إسم السودان القسم الجنوبي ولا الشمالي؟؟
طيب إذا اتقسم السودان لي دولتين فمن هم شعوب الدولتين ؟؟؟؟
هل حا يمشي كل الجنوبيين لي الجنوب ويرجع كل الشماليين للشمال؟؟؟
هل سيكون هناك تقرير مصير للأفراد فمثلاً جنوبي يقول لالالالا انا عايز اقعد في الشمال أو شمالي يقول انا ماشي اقعد في الجنوب ؟؟ ما هي معايير ومواصفات المواطن الجديد لكل دولة ؟؟؟
ما هو مصير الجواز السوداني في هذه الفترة التي سيحدث فيها الانفصال ؟؟
أسئلة لا أدري إن كانت الإتفاقية تجيب عليها أم لا فانا ليس لي العلم كافي بكوامن هذه الاتفاقية ..

الأسئلة دي سببها إنو الإنفصال يكاد يكون قاب قوسين أو أدنى فبعد ترسيم الحدود الجنوبية الشمالية والحجج الواهية لأسبابها وبعد المراشقات بين الحكومة والحركة يبدو اننا على وشك الإنفصال ..
عن نفسي لا امانع الانفصال ولهذا ابحث عن الاجابات لهذه التساؤلات ..

فهل من مجيب؟؟؟

الأخ العزيز عمر

تحياتي

مع منطقية ومشروعية تساؤلاتك ، إلا أن أكثر ما توقفت عنده سابقاً هو إجابة الأستاذ ياسر عرمان عنما سئل في ألمانيا عن مصيره كـ ( شمالي ) إذا قرر الجنوب الإنفصال بعد الفترة الإنتقالية ؟؟
فأجاب
" وما أهمية مصير الأفراد إذا تشظى وطن بحاله ؟؟ "

الأخ عمر الفاروق
كل سنة وإنت طيب
أعتقد إذا حدث الإنفصال
سيتضرر الشمال لا الجنوب
الجنوب يمتلك كل المقومات لكي يصبح دولة قوية وموحدة
أما الشمال سوف لن ينعم بإستقرار ويتشتت بدوره إلي دويلات غربا موالي لتشاد وشرقا موالي لإريتريا وشمالا مواليا لمصر
أما التسمية تكون في البداية دولة شمال السودان ودولة جنوب السودان
وبالطبع لن يتم ترحيل قسري لأي من مواطني الشمال أو الجنوب


لك كل التقدير

المحترم عاطف عمر:

Quote: " وما أهمية مصير الأفراد إذا تشظى وطن بحاله ؟؟ "

الرد جميل وفيهو كتير جدا من الديبلوماسية لكني لا اثق في تصريحات الساسة فهم باعة كلام ..
الذي يحدث في ارض الواقع تحركات من أجل الإنفصال ورغماً عن ذلك تنكرها الحركة ..

الأخ ادروب:
كل عام وانتم بخير..

Quote: سيتضرر الشمال لا الجنوب الجنوب يمتلك كل المقومات لكي يصبح دولة قوية وموحدة

انا ما عارف انتو ليه شايفين الجنوب لن يتضرر!!!
الجنوب حتى الان ليست به مقومات الدولة ولا حتى بنية تحتية وعلى الاقل سيحتاج الجنوب لعشرات السنين لهذه البنى التحتية !!!!!!
الجنوب فيهو شنو ؟؟؟ بترول ؟؟؟ زراعة ؟؟؟ طيب دي في الشمال في كمان !!!
الجنوب الجو فيهو سمح ؟؟ امر رباني ليس للشمال دخل فيه ...
طيب ليه بتشوفو إنو الشمال سيتمزق وكل جهة ستنضم لوجهة ولا تنظرون للجنوب بنفس المعيار وهو المجتمع القبلي المقسم ما بين شلك ونوير وزاندي ودينكا!!!!!!
منو القال الجنوب حا يكون مستقر؟؟؟
الشمال ما حاتجيهو أي عوجة إن شاء الله من الانفصال فهاهو السودان عاش طيلة فترة ال25 سنة الفائتة والجنوب بعيداً عن حساباته بل كان يكلفه مبالغ طائلة بسبب الحروبات !!!

كدي نمشي ننادي ليك بشاشة
يكب ليك مكنته بتاعة المستعلواتية
والخديوية و البابوية والسودان الزنجي
و بائع اللبن ,,,,
انتظرني ما تمشي ؟؟!!

يا ابوحميد :
ياخ كل سنة وانت طيب ..
والسنة الجاية المريخ يشد حيلو ..

ياخ والله لو جبت لي الدفتردار ده هنا تكون خدمتني خدمة سنينك ..
منتظركم ..
سمح؟

Quote: والسنة الجاية المريخ يشد حيلو ..

رايك شنو يال الفاروق

بعد الانفصال المريخ يمشى الى دولة السودان الجنوبى
والهلال يبرطع براهو فى دولة السودان الشمالى

رايك شنو ؟

يا ابوعلوة :

Quote: رايك شنو يال الفاروق بعد الانفصال المريخ يمشى الى دولة السودان الجنوبى والهلال يبرطع براهو فى دولة السودان الشمالى

ما أهو الهلال أسة قاعد يبرطع برااااااااااااااااااااااااهو في السودان الجديد شنو ؟

بالنسبة للشمال لا أعتقد أنه سيكون هناك كثير من الفرق فالجنوب فعلاً كان طوال هذه الفترة خارج الحسابات..

وعندما تحدث ياسر عرمان عن (تشظي وطن) فلا أعتقد أن الكثير من الشماليين يرون الجنوب وطناً أو جزءا من الوطن وهو لا يتعدى عندهم ما درسوه عنه في مناهج الجغرافيا في المدرسة.

لن يختلف الكثير في الشمال بل حتى الجنوبيين المقيمين في الخرطوم لا أعتقد أن الكثير منهم سيذهب (ولا أقول سيرجع) إلى الجنوب رغم أنهم سيفقدون ظهرهم السياسي باختفاء الحركة الشعبية، وقد تنتج حركة سياسية جديدة في الشمال تراعي مصالحهم.

سيقل الحديث عن العنصرية بكثير وأنا متفائل بعودة الديمقراطية وعودة الرخاء في شمال السودان.

الجنوب نفسه لديه إمكانية إقامة دولة مستقرة إذا لعبت الحركة الشعبية دورها بحكمة وحرصت على إشراك جميع القوى السياسية والعسكرية والقبائل المختلفة في الحكم وهم أقرب وأكثر فهماً للوضع الاجتماعي في الجنوب.

من ناحية مادية سيكون لجنوب السودان دعم جيد من الولايات المتحدة وأوروبا لتأسيس البنية التحتية ولن يستغرق ذلك وقتاً طويلاً وسيتم ابتعاث خبراء أجانب لتأسيس قطاع الخدمات والقطاعات الأخرى في الجنوب (نفس سيناريو دول الخليج العربية لكن مع خبراء أجانب بدلاً من الوافدين العرب).

المهم بعد ذلك هو قدرة الحكومتين على تحقيق السلام داخل دولتيهما والمحافظة على علاقة جيرة متميزة بينهما.

الاخ عمر الفاروق
عيد سعيد وكل سنة وانت طيب
بوادر الانفصال امر لا تخطئه العين
ولا ينكرها الا مكابر ... ولكن المهم
هل سيستقر الجنوب بعد الانفصال ام سيكون ذلك
بداية حرب ضروس تأكل الاخضر واليابس ؟ وهل سيؤدي ذلك
الى استقرار الشمال ام سينزع قتيل الاقتتال مرة اخري بين
الشمال والجنوب؟

Quote: سيقل الحديث عن العنصرية بكثير وأنا متفائل بعودة الديمقراطية وعودة الرخاء في شمال السودان.

كلام سمح يا ايمن ..

Quote: ما أهو الهلال أسة قاعد يبرطع برااااااااااااااااااااااااهو في السودان الجديد شنو ؟

يبرطع بى شنو ؟؟؟؟؟؟؟
بالصفر الدولى الكبير ؟؟

Quote: بالصفر الدولى الكبير ؟؟

غايتو يا المريخاب عاملين زي الكيزان ..
تقول لي البرطعة في السودان ولمن ازنقك تقول لي دولي !!!!!؟؟؟
عاد ده كلام ده ..
بتين الإنفصال ده يجي عشان تمشوا تغلبوا كتور جوبا وهلال واو وموردة فشلا..

الحبيب عمر الفاروق تحياتي وسلامي وأشكرك كثير الشكر على إثارة على الأمر الهام في هذا الوقت لكي يعرف الجميع ما هو المصير المرتقب لسودان الغد المجهول برغم من بوادر الأنفصال الظاهرة للعيان من إقامة حكومة الجنوب بكل مهام الدولة وتفريغ الولايات الجنوبية من العنصر العربي وسياسات القمع والتعسف التي تمارس ضد ابناء الشمال في الجنوب وما يجرى من خلافات ومناوشات بين الحركة والمؤتمر كلها أسباب منطقية جداً ووجيهة للانفصال برغم من الدعوات الفردية والتي لا تغني ولا تسمن من جوع بشأن الوحدة وما أدراك ما الوحدة الجاذبة وغيرها من الشعارات التي لن تجدي ولن تفيد في لم شمل هذا الوطن الذي في الأساس لم ولن يكون صالحاً ومهئياً لكي يكون دولة واحدة الاختلافات الكثيرة بين شعب الشمال والجنوب بداء من العادات والتقاليد والديانات وغيرها من عوامل الاختلاف والفرقة التي تفوق كماً وعدداً عوامل الوحدة والتوحد
عليه أتمنى من قادة المؤتمر وقادة الحركةأن يفكروا في فراق بسلام بدلاً من وحدة تتجاذبها الاختلافات والمناكفات والمشاكسات وكلو يوم يطلع لينا واحد من أولاد قرنق وكأنه وحيد زمانه من أمثال بقان وعرمان وغيرهم من أولاد جون
الحال ياعمر الفاروق في راي المتواضع جداً هو الانفصال والتسريع به بدلاً من إهدار الموارد والأمكانيات الشحيحة المتاحة بين دولتين لا أعتقد ان الوحدة سوف تكون هي الخيار . فالجنوبي الآن لا يرى في الشمالي سوى سارق لأرضه وخيراته وأنه مستعبد لجدوده ومهيمن على كل موارد الدولة فلذلك سوف يأتي مننا نحن ابناء الشمال أولاً قبل أن يأتي منهم هم الجنوبين .

الفاروق قابلت شاب ظريف جداً جداً ومحترم لأبعد الحدود في رحاب الحرم في أواخر ليالي رمضان وسألته عنكم فأجب بأنك دفعة في الجامعة فقلت له أنقل تحياتي لك ولقلمك الشريف القوي المصادم المدافع دوماً عن الحق والبعيد عن الاسفاف إنه محمد عثمان

Quote: انا ما عارف انتو ليه شايفين الجنوب لن يتضرر!!! الجنوب حتى الان ليست به مقومات الدولة ولا حتى بنية تحتية وعلى الاقل سيحتاج الجنوب لعشرات السنين لهذه البنى التحتية !!!!!! الجنوب فيهو شنو ؟؟؟ بترول ؟؟؟ زراعة ؟؟؟ طيب دي في الشمال في كمان !!! الجنوب الجو فيهو سمح ؟؟ امر رباني ليس للشمال دخل فيه ... طيب ليه بتشوفو إنو الشمال سيتمزق وكل جهة ستنضم لوجهة ولا تنظرون للجنوب بنفس المعيار وهو المجتمع القبلي المقسم ما بين شلك ونوير وزاندي ودينكا!!!!!! منو القال الجنوب حا يكون مستقر؟؟؟ الشمال ما حاتجيهو أي عوجة إن شاء الله من الانفصال فهاهو السودان عاش طيلة فترة ال25 سنة الفائتة والجنوب بعيداً عن حساباته بل كان يكلفه مبالغ طائلة بسبب الحروبات !!! [Profile] [Edit] [اضف رد]

ستأتى امريكا واسرائيل وكل أوربا وأيضا اليابان وستدعم جنوب السودان وسيعقد السودان اتفاقية مياه النيل مع دولة الأماتونج الفتية وسوف تكون هنالك قواعد امريكية واسرائيلية فى الجنوب معادية لدولة الاسلام الرسالىوالذى ستصبح حدوده اشمالية الفاصل بين شمال القارة المسلم وجنوبها المسيحى وستتوقف كل فرص الدعوة الاسلامية وسوف يرتد ويتنصر اغلبية المسلمين هناك !
وسيتفصل ايضا اغليم دارفور وسيتكون السودان من امتداد الصحراء الكبرى وصحراء العتمور وسلسلة جبال الاحمر والسافنا الفقيرة وستتكون فيه حكومة ائتلافية بقيادة المرغنى والمهدى والترابى وسترتفع فيه نسبة التضخم والعطالة والايدز والانتحار!
وسيعض عمر الفاروق اصبع الندم ولات حين مندم!
جنى

Quote: وسيعض عمر الفاروق اصبع الندم ولات حين مندم!

هاهاهاهاهاهاهاهاهاهاها

نكتت الموسم انو امريكا ومنو كده ما عارف حا تجي وتستثمر في الجنوب استثمار مفيد للجنوب وما ادراكما..!ّ

وين حصل استثمرت امريكا في حته ونفعتها ، غير انها مصت كل الفيها لي صالحها ؟

اذا حصل انفصال المتضرر الاول هو الجنوب


ودي بدأت تظهر منذ الان

المشاكل والاقتتال بين الجنوب والجنوب في قمتها من بعد التوقيع على الاتفاقية بس الاعلام معتم عليه

الحرب في الجنوب مدورة

ده خلاف الفساد البساوي اضعاف الفساد الفي الشمال والبرضو معتم عليه

اما حكاية انو الجنوب دولة زراعية دي مكنه يا عمر
الجنوب ما عنده مقومات زراعة ولا يحزنون

وانا قاصد بالزراعة الزراعة حقت الاكل ( النجانجاه )
معدل هطول الامطار ما بسمح بزراعة اغلب الشجيرات البعتمد الانسان عليها في غذائه
قمح زره وخلافه

خلاف انو التربة في الجنوب فقيرة جدا متلها متل اي تربة في خط الاستواء
مناطق الزراعة الحقيقية كلها في الشمال
الجزيرة وسهول البطانة وسهول دارفور وكردفان


اما المشاكل القبلية في الجنوب اكبر واعمق

دينكا × نوير
دينكا × شكلك

الأخ عمر الفاروق
الإنفصال ليس في صالح مصر ولا الشمال ولا الجنوب لكن إذا حدث (وهذا ما لا نتمناه) ستكون مصر والشمال أكثر المتضررين!
الإختلافات العرقية في الجنوب مهما كانت ليست بالقدر التي في الشمال ويكفيك أن تنظر لمشكلة دارفور فهي لوحدها أعمق وأعقد من مشكلة الجنوب ناهيك عن جبال النوبة ومناطق النيل الأبيض والشرق والمشكلة الحقيقية ياعمر هي مشكلة هامش مغبون وظلامات تاريحية وسياسية وإقتصادية تجاه مركز تهيمن وتستأسد عليه فئة قليلة

حقيقة أنا إستغربت لمان رأيت المنادين بالإنفصال من الشماليين دعواتهم بدأت بعد الإتفاقية ووقف إطلاق النار يعني كان يكون ليها مسوغ نتيجة يأس من حلها أو بسبب تطاولها الزمني ومعاناة الكل منها والخسارة في المال والأرواح ولكن أن تكون المطالبة بالإنفصال بعد السلام ومن قبل الشماليين لا الجنوبيين أمر يثير الحيرة!
الحرب في الجنوب رغم خسارتها كانت لها فائدة لحكومة المركز لتساعد في تعطيل إنفجارات براكين في أقاليم أخري ولهذا كنا نتوقع بمجرد وقف حرب الجنوب أن ينفجر الغرب وتلحقه أقاليم أخري

المركز يخشي كثيرا أن يتكالب عليه الهامش ولهذا وضع الإنفصال وربما عودة الحرب أفضل حالا له!!!
أما البنية التحتية حتي الشمال لا يمتلكها وليس من الصعب علي الجنوب أن ينهض إذا وجد إدارة حكيمة ودعم خارجي وهذا متوقع من دول الغرب ودول أخري لأسباب كثيرة ومما يمتلكه من ثروات بترولية ومياه وأراضي زراعية خصبة ومناخ ملائم مقابل عدد قليل نسبيا من السكان وإذا أردت أن تقارن أنظر إلي إريتريا دولة فتية فرضت موقعها في الخارطة الإقليمية رغم شح مواردها

Quote: انا ما عارف انتو ليه شايفين الجنوب لن يتضرر!!! الجنوب حتى الان ليست به مقومات الدولة ولا حتى بنية تحتية وعلى الاقل سيحتاج الجنوب لعشرات السنين لهذه البنى التحتية !!!!!! الجنوب فيهو شنو ؟؟؟ بترول ؟؟؟ زراعة ؟؟؟ طيب دي في الشمال في كمان !!! الجنوب الجو فيهو سمح ؟؟ امر رباني ليس للشمال دخل فيه ... طيب ليه بتشوفو إنو الشمال سيتمزق وكل جهة ستنضم لوجهة ولا تنظرون للجنوب بنفس المعيار وهو المجتمع القبلي المقسم ما بين شلك ونوير وزاندي ودينكا!!!!!! منو القال الجنوب حا يكون مستقر؟؟؟ الشمال ما حاتجيهو أي عوجة إن شاء الله من الانفصال فهاهو السودان عاش طيلة فترة ال25 سنة الفائتة والجنوب بعيداً عن حساباته بل كان يكلفه مبالغ طائلة بسبب الحروبات !!!

عمر الفاروق.

البهمك شنوا بعد أنفصال الجنوب؟
من الاحسن ليك من الان أن تهتم "بالشمال" الذي في خيالك. طبعا أنت ضامن أنو الشرق والغرب حيكونو في جيبكم, أصحا للون يا عمر. السودان لم يعد هو ذلك السودان الذي كان في ذهننا جميعا.

بخاف.

ده مش أنت زاتك وليد المبارك العنصري البكري طردو من البورد ده, ولا أنت زول تاني؟

دينق.

عمر و المتداخلون الكرام .. المتشائمين منهم و المتفائلين :
لو حدث الإنفصال ، عندي إحساس بأن ناس مصر ، الضحك شرطُم عديل ،
فلن يأمنوا دخول الجنوب في تحالف إستراتيجي مع مجنزرات إسرائيل ،
و هذا التحالف سيكون الأولوية فيه مياه النيل و ما أدراك ما مياه النيل.
فبعض الناس لا يصدق أن خارطة كبيرة معلقة في الكنيست مكتوب عليها ( من الفرات للنيل ) و فوق الكلام دة خارطة تضم السودان و مصر و الأردن و سوريا و العراق بالإضافة لفلسطين .
مصر تعرف هذا جيدا ، و ما تسليحها لجيشها بعد الصلح مع إسرائيل إلا لحماية ( الموية الزرقا دي ) ، فلو إنفصل الجنوب بأي مساحة كانت ، فإن في إعتقادي بأن مصر ( مهما كان الرئيس ) ، سيتحالف مع دولة الجنوب لإضعاف حكومة باقي السودان ، ثم عمل خلخلة و أزمات طاحنة ، ثم ينتهي الأمر بإنقلاب دموي ، تكون فيه الغلبة لجناح التعددية و العلمانية ، و الذي يأبى الإنقاذ الآن من الإقتناع به و ( يتزاوغ ) منه بأكثر من طريقة.

و الله يكضب الشينة ، فإن هناك إحتمال تشاؤمي آخر يدغدغ توقعاتي ، و هو أن تكون نهاية الخلخلة إياها ، مصدر إنفصال الغرب و إنفصال الشرق ، و يبقى الفاضل من السودان جغرافيا حاجة كدة شكلها من الجو و بالأقمار الصناعية زى رِجْل البنطلون . الله يكضب الشينة.

هذا كان من أمر التشاؤم.

أما لو تفاءلنا ، فإنني بعد الست سنوات ( إن شاء الله ما عجاف ) أشوف الجنوب صوت للوحدة ، و تقوم إنتخابات حرة و نزيهة ، و يجي رئيس عينو قوية لإنو منتخب ، لا يعجبو العجب و لا الصيام في رجب ، فيعمل عدة عواصم للولايات السودانية المتحدة ، الخرطوم العاصمة السياسية ، توريت العاصمة الشتوية ، أركويت العاصمة الصيفية ( و حينها ممنوع دخول العرسان على زوجاتهم في أركويت حتى لا تنزعج الحكومة ) ، ثم وادي حلفا عاصمة شتوية أخرى و مؤاخاتها مع توريت ، و الفاشر و الأبيض عاصمتان تجاريتان ( لأن خيراتهما جوة و برة ). و ننعم بوحدة تامة ، و يا ميري كلمينا و يا عشة لا تبهدلينا.

و يصير الدخول للسودان بتأشيرة إسمها ( توكلرز كارد Two Colors Card ) يعني البطاقة ذات اللونين ، و يزينها النيلان الأبيض و الأزرق رمز الإندماج بين كل الأعراق و كل سنة اللوتري السوداني يستقدم بضعة آلاف من شرق آسيا و الدول العربية التعبانة شوية.

و الأمل كبير أن يصير السودان قوة تعادل قوة إسرائيل ، فنسترجع حلايب ( حمرة عين ساكت ) ، و نفرض على موسوفيني إتاحة الفرصة لجيش الرب في إقتسام السلطة و الثروة ، و نقبل على الزول داك الإسمو أفورقي ، و نضعه أمام أمرين ، إما الإتحاد مع ملس زيناوي أو عمل إنتخابات حرة و ديمقراطية شاملة.

و يصير سودانا فوووووووووووووووووق هامات السحب. و الله يحقق الأمل دة.
و لكن بالجد ، أنا متشاءل. ( ما بين متفائل و متشائم )

Quote: بخاف. ده مش أنت زاتك وليد المبارك العنصري البكري طردو من البورد ده, ولا أنت زول تاني؟

دي البطيخة

جاوبتا صاح اشيل ورقه ؟

اها من الليل حا اسميك
دينق هتشكوك

بعدين اسمو وليد محمد المبارك .. كويس

برضو الجنوب ما عنده اراضي يزرعها ، والموية زاتها بالنسب ليه مشكلة ، وهو زاتو عاوز يتخارج منها بي جنقلي ما قادر ، والاراضي هناك مسطحة يعني ما حا يقدر يعمل سد يخزن الموية

وما بقدروا يعملوا حاجة مع اسرائيل بخصوص الموية لو في حاجة بتتعمل كان عملتها يوغندا من زمااااااااااان
والبهبش موية النيل المصرين بحتوه معاه قرض عديل كد
موش الجنوب او اسرائيل
لو بت امريكا زاتا

الأخ ابراهيم علي:
كل عام وانت بخير ياخ ..

Quote: عليه أتمنى من قادة المؤتمر وقادة الحركةأن يفكروا في فراق بسلام بدلاً من وحدة تتجاذبها الاختلافات والمناكفات والمشاكسات وكلو يوم يطلع لينا واحد من أولاد قرنق وكأنه وحيد زمانه من أمثال بقان وعرمان وغيرهم من أولاد جون

ده الكلام الواضح وصريح ودي الحقيقة المفروض الكل يتنادى بيها ..

Quote: الحال ياعمر الفاروق في راي المتواضع جداً هو الانفصال والتسريع به بدلاً من إهدار الموارد والأمكانيات الشحيحة المتاحة بين دولتين لا أعتقد ان الوحدة سوف تكون هي الخيار . فالجنوبي الآن لا يرى في الشمالي سوى سارق لأرضه وخيراته وأنه مستعبد لجدوده ومهيمن على كل موارد الدولة فلذلك سوف يأتي مننا نحن ابناء الشمال أولاً قبل أن يأتي منهم هم الجنوبين

.
والله عين العقل يا ابراهومة ..
السودان ده كبير خلاص وانا متأكد الخواجة زاااااااتو لمن جا يقيسو تعب وقطع وقام قال ياخ اقول ليهم مليون ميل والسلام لكن صدقني هو اكبر من كده ..
وبلد بي الامكانيات الشحيحة دي ليس في حاجة لمثل هذه المساحة ..

تخريمة :

Quote: إنه محمد عثمان

ونعم الصديق والله ..
وكلاكما محظوظ بالاخر ..
محمد عثمان زول من الزمن الجميل ..
الغريبة انا كنت في الحرم .. ما لاقيت ليك زول شين كده وعندو صلعة ؟

يا جني:

Quote: ستأتى امريكا واسرائيل وكل أوربا وأيضا اليابان وستدعم جنوب السودان

وكأنما جنوب السودان هو جنة الله في الأرض!!!!!
وعلى قول عادل إمام (سايبين الشقة كلللللللها وساكنين في أوضة واحدة!!!!)
كذلك الحال لليابان وامريكا( سايبين العالم كلللللللللله وبس عايزين جنو السودان!!!)
ياخ لو جنوب السودان سمح معناها كينيا سمحة ..طيب ليه يتعبوا روحهم في بلد زي الجنوب وعينهم للبلد الجاهز ومظبط زي كينيا مثلاً !!!!!
والله انا خايف اليابانيين يكونوا قايلين السودان ده كوكب خليك لمن يكونوا عارفين الجنوب !!!!

Quote: وسوف تكون هنالك قواعد امريكية واسرائيلية فى الجنوب معادية لدولة الاسلام الرسالىوالذى ستصبح حدوده اشمالية الفاصل بين شمال القارة المسلم وجنوبها المسيحى وستتوقف كل فرص الدعوة الاسلامية وسوف يرتد ويتنصر اغلبية المسلمين هناك !

شوف يا جني طالما ربنا قال فيما معناه وإنّا له لحافظون دينا ده الحبة ما بتجيوهو ..
يا اخوي هو تعداد سكان الجنوب كم ؟؟؟ مليون ؟؟ عشرة مليون ؟؟ وشنو يعني !!!!
العشرة مليون ديل فيهم تسعة مليون في الخرطوم !!!

رجعنالك ..