الخيار والفقوس في تسمية النفوس ..!!!

عادي جدا تلقى واحد إسمو "جمعة"..
ومن الطبيعي يكون في واحد إسمو "خميس" ..
ومااااا اكتر إسم "سبت" ..
طيب ليه ماف زول إسمو " أربعاء " أو " ثلاثاء " أو "إثنين" ؟؟؟
مع العلم إنو جمعة وسبت وخميس قطع شك مقصود بيها ايام الاسبوع !!!

خرتومية زول إسمو " رمضان " ..
وجغلومية واحد إسمو " شعبان " ..
وطفشطاشر واحد إسمو " رجب " ..
طيب ليه ماف زول سموهو " جمادي الأخر " أو "ذو القعدة " أو " جمادي الأولى" ؟؟؟
مع العلم إنو رمضان وشعبان ورجب قطع شك مقصود بيها الشهور العربية !!!

بنسمع كتير بي عوائل إسمها " الفيل "..
وكتير جداً بنسمع بي ناس " نمر " ..
وسمعنا بي حافظ " الأسد" ..
وبي اسرة " تمساح "..
ودي كلها اسماء حيوانات ..
طيب ليه ماف زول اسمو " وحيد القرن " أو "غوريللا" أو "ارنب" !!!

ده كلللللللللللللو كوم والاسماء المركبة دي كوم تاني كمان ..
يعني خلطة الاسم المركب دي بيعملوها على ياتو أساس؟؟؟
يعني تلقى زول إسمو " محمد علي" ..
وزول اسمو " عمر الفاروق " ..
وواحد إسمو "محمد احمد" ..
طيب ليه ما بيسمو واحد " عبد القادر عبد العظيم " !!!!؟؟؟
وليه الاسماء المركبة دي حصرية على الرجال ؟؟
يعني مفروض لو الواحد جابو ليهو بت يسميها " خديجة ريم "..
أو " علوية ماجدة "..
أو " ست النفر التاية " ..

عمر الفاروق
صديقى الجافى
كل سنة وانت طيب

هاك دى

ياخميس قول لجمعة سبت قال ليك تعال يوم الاحد


لكل قبيلة اسماء ولكل شعب ايضا

للهندوس اسماء لا تخلو من كومار
وللمسلمين الهنود اسماء لا تخلو من دين

وفى السودان..لكل جهة اسم ولكل قبيلة

البطاحين..نادرا ما يخلو اسم
من طه او الصديق طلحة..او كباشى

واهلنا فى غرب السودان نادرا ما يخلو اسم من ادم او ابكر..
والشوايقة لازم يكون هنالك سيد احمد

عريس الغفلة إتورطت ..كان فنجطت أو نططت ..
ابوقوتة باشا ..
كل عام وانت بخير ياخ وربنا يحقق الامنيات ..
اها كمان التسمية القبلية دي موضوع تاني ..
يعني ناس الغرب بدل ابكر دي لو خلوها ابوبكر ساي فيها شنو ؟؟..
وناس الشرق ديل المسكهم في اوهاج واوشيك واو كاش شنو ؟؟..

حاجة استغرب..

الفاروق عمر

سلام

Quote: وليه الاسماء المركبة دي حصرية على الرجال ؟؟ يعني مفروض لو الواحد جابو ليهو بت يسميها " خديجة ريم ".. أو " علوية ماجدة ".. أو " ست النفر التاية " ..

هناك أسماء للنساء دلالة على الجمال أو الأخلاق أو أي صفة جميلة
مثال :

نعمة البراق
ست الجيل


مثال آخر : أم نفَسين ( دي كانت صاحبة إنداية في عطبرة لها عزْم 3 خيول و لا ينقطع لها نفس )

سآتيك بالمزيد من الفقوس ...

أظنك ما سمعت بسوسن هالة يا عمر الفاروق.

يا ريس ابو جهينة :

Quote: سآتيك بالمزيد من الفقوس ...

في انتظار الخيار ..الفقوس هين ..

ود الفاروق

كل عام وانت وضيوفك بالف خير
وعيدكم سعيد

Quote: أظنك ما سمعت بسوسن هالة يا عمر الفاروق.

شفت ياعمر .. دى ملاسى نجرا ليك من راسه اسع دا

الأخ عمر الفاروق
Happy Eid
للأسماء عندنا الكثير من الطرائف
في شأن الأسماء المركبة فحدث ولا حرج فلم يقتصر الأمر على الرجال دون النساء فكما هناك محمد أحمد وسيد أحمد وتاج السر ، فللنساء نصيب مثل بت المني وفضل الساتر وأم بلينا وكوندليزا رايس وفضلو واسع (فضله واسع).
فبت أو بنت المني يقابلها في أسماء الذكور أب عاج أو أب عاجات أو ود مدني أو ود رملي
وفضل الساتر تعتمد على النظام الحاكم فإذا كانت الحكومة عسكرية سوف يكون هناك الكثير من السواتر الترابية بداعي الأمن حول الكباري على قلتها وضيقها وإرتفاعها عن سطح النيل ، ولأن الفضيحة والسترة متباريات أى ماشات جمباً إلى جمب كان الفضل هو القاسم المشترك بين المرأة والرجل في تركيبة الإسم بل أن المعني واحد كما هو الحال في (فضل الله) و(فضل الساتر) فالساتر هو الله والله هو الساتر والفضل أولاً وأخير له وهو القاسم المشترك في الإسم بين الرجل والمرأة.
قالو زمان كان عدد السودانيين قليل عطفاً على المساحة فكان لابد أن يعطي كل مولود ذكر كان أم أنثي بإسم مركب بالإضافة إلى لقب مجاناً وبدون خروف فيمكن أن يكون إسمك تاج السر وهو كما تري إسم مكون من تاج وأيضاً سر بالرغم من أن رغدة قالتها وبصريح العبارة "أنا ما عنديش أسرار" عندما سئلت عن سر نضارتها فالمسألة لا تتعدي أكثر من إستخدامها لصابون لوكس ، ونحن الذين عكفنا على إستخدامه صابوناً وشور جل دون أن يقدم أو يؤخر شيئاً في جلودنا حى تفقت عبقرية بعض نساء العالمين وحذون حذو كريت والضررة فعل القرض بهن ما لم يفعله بجلد كريت وإن شاءالله يلاقني.
المهم أتفق معك بسب الحالة المزاجية لي وأختلف معك دون إبداء أسباب أننا في حاجة إلى ثورة في عالم الأسماء فلا يمكن أن يكون الحاج هو الإسم الحقيقي لعم وائل يعني وائل الحاج مبلوعه لكين الحاج وائل.
ما لماذا لا يتسمي الناس في بلادنا بباقي أيام الأسبوع فربما تتعدد الأسباب فمثلاً لا يطلقون إسم أربعاء على أولادهم دراً للعين لأن الأربعاء إرتبطت بالكوارث خاصة إذا تصادف وأن وقعت في آخر شهر أو عقاب شهر. والإثنين كتلو بيهو الحسن والحسين والثلاثاء عماره والأحد بطالة الإنجليز لذلك لم يبقى في الأسبوع غير جمعه وسبت وخميس وهي كما تلاحظ تمثل الويك إند في الكثر من الأمصار
أما في شأن الشهور قد أطلقت أشهر الشركات المتخصصة في تصنيع العربات إسم شهر غير عربي على صناعتها فكانت نيسان ولم يكن أيلول أو حزيران ، ويمكن أن نتسمي بأسماء على شاكلة ذو الحجة أو ذو القعدة (والقعدة كما تعلم قد تكون بريئة وقد تكون غير ذلك) فهناك ذو النون وذو القرنين وكلها ذوات ، وأراك قد أغفلت عمداً أو سهوا ربيع وهو الشهر الثالث والرابع على التوالي وفي أحدهما ليلة المولد وهناك محرم

Quote: شفت ياعمر .. دى ملاسى نجرا ليك من راسه اسع دا

يا زول أهو دا خشبا بيدفق قدامي..

حتى نضع حداً للأسماء المركبة أقترح على حكومتنا الموكرة أن تفرض ضريبة على كل إسم يتعدي الحرفين وبالتالي سوف يتحول إسم إمرأة على شاكلة ست البنات إلى مي وأم الحسنين إلى هند وفي جانب الرجل يمكن لفضل المولى وتفادياً للضرائب أن يكون إسمه "طه" ومحمد الأمين "يس" وبالضرورة في ناس لضيق ذات اليد حا يكونوا بدون إسم ولن يعنيهم الأمر إذا إبتسم محبوب فلان أو إنقسمت الدنيا وأمتلأت فرح وباعه جائلون

اخونا الملا عمر :

Quote: الأخ عمر الفاروق Happy Eid

Close UP
..

Quote: ما لماذا لا يتسمي الناس في بلادنا بباقي أيام الأسبوع فربما تتعدد الأسباب فمثلاً لا يطلقون إسم أربعاء على أولادهم دراً للعين لأن الأربعاء إرتبطت بالكوارث خاصة إذا تصادف وأن وقعت في آخر شهر أو عقاب شهر. والإثنين كتلو بيهو الحسن والحسين والثلاثاء عماره والأحد بطالة الإنجليز لذلك لم يبقى في الأسبوع غير جمعه وسبت وخميس وهي كما تلاحظ تمثل الويك إند في الكثر من الأمصار

تعرف يا ملا عمر حكاية الزول يسموهو سبت أو جمعة دي مبلوعة شوية بحكم إنو الجمعة عيد مسلمين والسبت ده عيد يهود وكده ؟؟
انا المحيرني خميس ده !!!! يعني دينياً كده ما اظن حصل فيهو حاجة وكان اولى منو يوم الاثنين بحكم ميلاد ووفاة رسولنا الكريم لكن الزول السمى خميس ده بيكون زول بيحب الترطيب ومن عشاق حضور تلاتة حصص وبعدها البيوت وربما هو من عشاق سهرة عالم السينما سابقا لمن كانت بتجي يوم الخميس أو تيمناً بي خميس مشيط وعدى ذلك فهو اسم ما عندو اي معنى ..

Quote: فكانت نيسان ولم يكن أيلول أو حزيران

غايتو في الشهور دي اخواننا الزلمات (اللبنانيين) اتلومو !!!
يعني مفروض زي ما بنسمي رمضان هم يسمو شباط ..بالجد اسم شباط اسم استايل خالص :
تؤبرني يا شباط ناولني الأرجيلة ..
لك شو خيو شباطو ..
والعجب لو سميت زول (تموز) .. حينها فقط كنت ادركت بأن ابراهيم حسين كان يتغنى لهذا الاسم :
تموز انت ويدوم خيرك تموز والدنيا ما تضيرك ولو جارت عليك ايام تعال لي عيونا بتشيلك ..

والنفوس أخي عمر كثيرة فهناك نفس لوامه ونفس حوامه ونفس XXL والأخيرة تعبت في مرادها الأجسام
هناك محمدين وحسنين وعوضين ونفرين وأم عزين وأم حقين وجادين وطالما كانت هناك أسماء بهذا الوزن الذري كان بالإمكان إطلاق الإثنين إسما على شخص ، تعال يا إتنين قوم يا إتنين وفي مطارات الدول العربية ما هو إسمك؟ تقوم تقول إثنين ولسانك يحاكي الحرباء ويقرب يصل نخرة ضابط الجوازات بالمطار كلو عشان ثاء ثمر ما كان تخلوها سين مش يمكن نكون سافين والثاء أكيد حا تخرب وتلخبط التمباك. لكين كمان ممكن يسمك يعلمك الهبالة أو الدغالة يعني لو في واحد واقف في كشك وقال لي الراجل الببيع إتنين بالله تقوم تتلفت إنت وتفتكروا بتكلم معاك وتطلع في النهاية زيك وزي أى سندوتش أو فول حتى. محمد إتنين أخو عبد الرحمن إتنين أختهم الفحيصه عفاف إتنين يا أخي ناس البيت الناصية عندهم ركشه سوداء مكتوب عليها الإتنين الليله وين بس دي ما ركشتهم ودا بيتهم ، أها محمد إتنين ده كان لعاب لعب في الكورة لكين ما كان بريدها يعني بتاع مزاجات بس موهبه خطيرة. ماذا إذا أردنا أن نتسمي بأسماء الشهور القبطية فالذي ينظر إلى الـ Coptic Calendar ، يجد ما يسره فهناك بابه وهو إسم شايع في العالم بابه نويل وبابا يارو وبابا أنجيد وحسين بابا اللاعب البحريني وبابو وباب الله ، أما هاتور وكهيك وطوبه وبرمهات فصعبة جداً وعند وصولنا إلى برموده علمنا أنه إسم سبق ون أطلقه مصمم الأزياء العالمي إيف أى وير الفش على سروال لا هو بنطلون ولا هو شورت فكان البرمودا ، وهناك شهر بشنس وبوؤنه وأبيب ومسرى ، أما عند اهلنا الحبش فذلك شأن آخر ناس فمثلاً لو عاوز تسمي واحد إتنين يكون إسمو بحسب الـ Ethiopian Colander سينيو والثلاثاء ماكسنيو والأربعاء زيها وزي أى لبن متخثر رووب والخميس هموس والجمعه الجامعه بيقولو عليها أرب والأحد أيهود أو ehud وأظن إيهود بارك وإيهود إلمرت ديل فلاشا.

نجرا شنو يا اخوانا؛
ياخي دي شقيقة زميلنا – زمان – معتصم إدريس.

هي ممكن تكون زهرة السوسن أو عقد الجلاد أو ست الريد أو شمس الضحي

يا سحس:
كل سنة وانت طيب ..
لو كان ده عيد الضحية كنا قلنا ده الشربوت عمل عمايلو لكن والله في عيد الفطر ده صعبة نلقى ليك العذر
لسة ما حا تغيير اقوالك وتتراجع عن الاسم ؟

كدي يا ود الفاروق خلينا شوية من ناس سبت وخميس واربعاء واخر شهر ايه رايك في الاسماء دي ..


جربوع بن كدسة الثعلبي


ماشي سريع بطي


سلم بن طالع بن نازل الدرجي


دغيميس بن فنيس المطازيزي


جريو بن كليب بن مزيغيب القرمطي


صدقني دي اسماء حقيقية ...



ود الباوقة