عرسك كان مختلف ؟؟؟ ماااااااااااااااااااااا أظن ...

شريط زواجي يشبه للحد البعيد شريط ود جيرانا ويكاد يطابق شريط صحبي أما زواج خالي فهو صورة طبق الأصل من شريط زواج عمي ..
وشريط زواج زميلتنا في الجامعة هو نسخة بالكربون من شريط صاحب ود عمي !!!
المناظر هي زااااااااااااااااااتا .. والصور نفس المشاهد ..
قد يختلف الحضور والمعازيم لكن اللبس نفس اللبس..
قد يختلف الفنانون لكن الأغاني نفس الأغاني ..
قد تختلف الصالات لكن الكراسي نفس الكراسي..
قد تختلف صحون العشاء لكن المحتوى هو هو ..

ح أصور ليكم مشاهد كتابةً ولاحظوا لي أي عرس لو ما لقيتوا فيهو نفس المشاهد دي فيا بشراكم فزواجكم كان مختلف تماااااااااماً ...

المشهد الأول :
يجيبو ليك لقطة لي أم شايلا شافعها والشافع نايم بينما تدعي الأم عدم درايتها بالتصوير وتقنع نفسها بي إنها مندمجة مع الأغنية ..

دي في أشرطتكم في ولا ماف ؟

المشهد التاني :
مجموعة من الشباب يدّعون إنهم فردك لمن غلط ملفوفين حولك واحد بيرقص معاك والتاني بيهمس ليك في أضانك والتالت بيبشر ليك ..

المشهد الثالث:
واحدة (في الغالب بايرة) تكون ملصقة في العروس زي اللحام تقنع نفسها بي إنو مهمتها تصليح وحمل زفاف العروس متى ما إحتاجت العروس وشايلا ليها منديل تمسح للعروس وشها لو في عرق ولا ماف ..

مشهد رابع :
لازم في شريطك تظهر لقطة لي زول يا إما شايل صينية العشا يا إما واقف هو ومرا تانية والمرا بتأشر ليهو على ناس ما إتعشوا يا إما زولة بتمدّ ليها في تلاتة صحون لي واحدة تانية ..

مشهد خامس :
مجموعة بنات قاعدات في طاولة واحدة أول ما تجي الكاميرا عليهم واحدة بتعمل فيها سرحانة هناااااااااااااااك وواحدة بتكون شايلة منديل ورق في يدها وبتصفق بيهو
وواحدة بتعمل فيها بتصلح في طرحتها بينما أخرى عاملة فيها ما عايزة تظهر في الشريط وبتكلم في التانية وبتقول ليها أها مشى ولا لسة ؟

مشهد سادس:
صف الرجال ده بتاع الكاميرا بيجيهو في أول أغنية مسحة سريعة كده وتاني والله ما بتشوف ليك راجل إلا زول شوبار وجا يرقص ولا واحد جاي قاطع عشان يقول لي مرتو أطلعي
غايتو البيجي بدري ويقعد في الصفوف الأمامية بيلحق يظهر وغير كده إلا يكابس في ساحة الرقيص..

ود الفاروق ...هووووي ..جبت شريط عرسي دا من مين؟؟؟؟

بالكربون

برلومي العزيز هاني عربي:
كدي أدينا مشهد مشهدين ..

انا غايتو حضرت حنتي بي رده
حيرت ليك الفنان زاتو
لمن جيت داخل الحفل
الناس كلها اتخلعت

ابو قال لي يا ولد حا تفضحنا
قلت ليه يا ابوي
انا في عرسك سالتك قال لي
قلت ليه العرس موش فرحة
قال لي اي
قلت ليه كده انا مبسوط
ضحك ومشي

لمن دخلت نص الدايرة وكانت اول غنية والبتغني كانت رشا بت المورده
ومافي زول في الدايرة برقص
وقفت في النص وقعدت ارقص براي

قطعت الرقيص وقعدت تضحك

اتحدي اي زول لو لقى حنة زي حنتي

ود الفاروق إزيك
كيفنك يا عزيز
عرسي كان بفرقة الصحوة
والنسوان بي جانب
الرجال على الجانب الآخر
والإضاءة ضعيفة " قدر ما تشوف بيها عمتك كان وقعت "
العشاء كان ساندوتشات
والدنيا كانت برد شديد " عشان كدة ما فيها شفع ولا عجائز "
....

عشان الأفلام المكررة دي جاتنا طرد وانتهى الموضوع ....

تعريجة " جديدة لنج دي وكامل الحقوق لي "
تابعت ترجمة الأفلام ... من منازلهم ...
بس لا في وقت لي رد ولا حتى قراية ..
...
الربوة كيف معاك ؟؟؟؟

يا ولّي :
احمد الله تراجي ما حضرت حنتك دي ..
والله كانت تجيك بي ليمونتها طوالي ..

يا اخوي انت عرسك الغنّوا فيهو 19 فنّان ده قطع شك بيكون مختلف ...
انا خايفك تكون في الحنة الكبيرة جيتهم طرزان

والله يا عمر الفنانين كانو اكتر من المعازيم
كملو العشا كلو

الحفلة الكبير شريطين فديو

موش بي جمبة الشريط بكتبو اسم الفنان منو

اها الحته ديل ما شالتهم في الفنانين

ياخ كان في اربعة ترباس

ترباس الرسمي
و3 ترباس تقليد
البعيو الرسمي والبعيو تقليد
محمود على الحاج
المرحوم بادي
عوض الكريم عبد الله
حسين شندي
عبد الله محمد
ياخ كتااااار ما بقدر اتمهم ليك

غير الفنانات
حنان بلوبلو
زهري مان
سميرة دنيا
نجاة عطية
رشا بت المورده
ووحدات ما بعرفهم كده

طبعا العرس كان كلو شعبي
مافي رق كده ما جا اليوم داك
واخوك عاوز يرقص اسلو
انقر ما رقصت ليك اسلوا بالرق
هاهاهاهاهاهاهاهاهاهاهاهاها
حيرت ليك حنان الناس

قالوا العريس مسطول

يا عمران :
يا اخوي انت عرست بت عبد الحي يوسف ولا شنو ؟؟؟
الظاهر عليك خميت بتنا دي ساااااااااااااااي وشبكتها لمن تجي السعودية بعمل ليك عرس ماحصلش لكن أسة مشي نفسك بالصحوة والصفوة ديل ..
بعدين يا عمك شنو العشا الكان ساندويتشات ده ؟ أسة لو زول عيشتو طلعت فاضية يتصييع ولا كيف يعني؟
وبي طريقتك دي ممكن عاااااااادي مجموعة من الشباب يعملوا بوش ويفتّوا عيشهم مع بعض خصوصا لو كان في ساندويتشات فول وجبنة ..
تخريمة :
كنتو ضمن مخططنا الهجومي الخميس الفات بس دقت في العراضة ..

Quote: مشهد خامس : مجموعة بنات قاعدات في طاولة واحدة أول ما تجي الكاميرا عليهم واحدة بتعمل فيها سرحانة هناااااااااااااااك وواحدة بتكون شايلة منديل ورق في يدها وبتصفق بيهو وواحدة بتعمل فيها بتصلح في طرحتها بينما أخرى عاملة فيها ما عايزة تظهر في الشريط وبتكلم في التانية وبتقول ليها أها مشى ولا لسة ؟

دى بالغت فيها يا عمر ، لكن ألف عديل كده ...

مشهد سابع :
العريس محمول على الأكتاف في سياحة يبشر يمنة ويسرى وفي نفس الوقت خايف يقع ..

مشهد صف كم راجل كده ومعاهم مرتين وطفلين واقفين جنب العروس وتجي عليهم كاميرا الفيديو وتلقاهم بس بيعاينوا صامتين زي الصنم في حالة ابو الهولية كانه صورة فوتغرافية

Quote: مشهد صف كم راجل كده ومعاهم مرتين وطفلين واقفين جنب العروس وتجي عليهم كاميرا الفيديو وتلقاهم بس بيعاينوا صامتين زي الصنم في حالة ابو الهولية كانه صورة فوتغرافية

الأخت مايا :
خالص التحايا ..
ويجي يقطع الصورة واحد ماري جمب الكاميرا فيظهر ليك في الشاشة بنطلون بني وقميص كاروهات بي البيجي ..

الغالي عمر

مشهد ثامن :
مجموعه من شباب الحي يقفون في الخلف جوار باب الخيمه يعني قرابة العشرين ثلاثين شاب يحملون عدد خمسه سجارات يخمسوها مع بعض ويعلقون على الفتيات السمحات القاعدات قدام ....

جائعون يتسللون من تحت الخيمه عشان يخطفوا بواقي الصحانه حقت العشاء ...

مشهد تاسع

واحد عوير او سكران طينة ( كيمو مثلا) واقف في فسحة الرقيص على جمبه كده ، وبرقص رقيص قاطعه من راسة ، لكن بايقاع عالي ، وكمية من الاطفال بتفرجو فيه ، اتنين منهم قاعدين في الارض

عمر الفاروق

سلام

غايتو كاميرتك الديجتال رهيبة

Quote: المشهد التاني : مجموعة من الشباب يدّعون إنهم فردك لمن غلط ملفوفين حولك واحد بيرقص معاك والتاني بيهمس ليك في أضانك والتالت بيبشر ليك ..

تفتكر العريس بيكون بيسمع في الكلام المهموس في أضانو؟

في لقطة ما جبتهايا عمر :

جوكر الحفلات ال بيجي الحفلة من غير عزومة .. و أهل العريس فاكرنو من أهل العروس و هاك يا إحترام.
و أهل العروس فاكرنو من أهل العريس و هاك يا إهتمام

دمت

مشهد حداشراوي

العروس قاعدة مضبلنة في الكرسي ومدنقرة راسة نظام على استحياء وبتاع الكاميرا مدفن في ا عشان يصور كلوش الفستان والحنة الفي ايدينا, وطبعا الكفين بيكونوا مكتفات في بعض كدة بحركة علي شكل وردة.







انا فطيت المشهد العاشر قلت اكيد في زول بيجهز فيهو, اها قلت ما احرق ليو الفيلم ساي

اما التصــــــوير
كمية من المونتاج تفقدك طعم حفلتك اصحابك وجيرانك وفردك
وقرايبك وزمايلك من سنين ما شفتهم وعزمتهم وجو شاركوك فرحك
عملو ليهم مونتاج
واستعان المصور بكمية من البراويز ووضعك انت والعروس ولف بيكم شارع النيل
من فراشة لفراشة
وبعد دا كلو يستلم ليهو 700 او 800 الف على شنو ما بعرفو

قال شنو تصوير الديرة اهم شي .

واللذيذة ناس البلد لما يشوفو الكاميرا تجى عليهم
الرجال العمة مكرفسة والنسوان اليدين ناشفات لا حنة لا منكير .

وكمان فنانين الايام دى يمسك يذيع فى اسماء اخوان واخوات واقارب العريس
والعروس ذى توزيع النتايج ما يخلى الفى جدة والفى الصحافة .

يا محمد فرح :
مشهدك ده في مشهد تاني مشابه ليهو بس من الجهة العكسية ..
نفس الشباب ديل يقوموا يخشوا بي تحت خيمة النسوان ويقيفوا وراهم وتسمع ليك ضحمة من النوع ابو كديس ديك ..
هيييييييييييييييييييييييييييي يكككككككككككككا ..

الريس ابو جهينة :
والله العريس لا بيكون سامع لا فارز ..
ياخ اقرب مثال العريس حديث العهد بالزواج صاحبنا مصعب أدوهو التلفون قالوا ليهو هاك كلم بت خالتك من هولندا بتبارك ليك ..
زولنا إتونس معاها بالتلفون إمكن عشرة دقايق أها بكرة من الصباح جا لي الوالدة يلوم في الناس وقال ليها إنتي يا أمي لي بت خالتي دي ما ضربت باركت لي ؟

وفى ظاهرة بقت منتشرة بكثرة وتكرر فى جميع المناسبات
بالذات للعرسان المغتربين بمجرد ما تصل يجيك ود ناس فلان
يقولو ليك دا متعهد حفلات وبجيب ليك الفنانة الفلانية الساكنة
الانقاذ ولا الازهرى ما عارف
وتثق فيهو وتديهو القروش يروح جايبها ليك ، بس بيكون ضربك
فى 200 او 300 ألف على الاقل
بعد داك الشباب يقولو ليك انت ما لقيت غير دا تديهو القروش
دا ما حرامى ، وهى الفنانة دى عاوزة ليها واسطة والله بحق العشاء كان بتجيك
بعد ماالرماد كال حماد

very funny

مشهد مُكرر:
أخو العريس أو العروس..شايل مسدس و بيضرب طلقات في الجو و الجكس بيصرٌخ...و حبوبة كبيرة خاتة إيدينا في أضنينا و بتقول (( عاد يا ولدي..لا إله إلا الله ))) .

مشهد تلاتاشراوي:
جكسوية شديدة قاعدة تضرب ليها في كراع جدادة...أول ما تقرٌب الكاميرا تخُت الصحن و تعمل نفسها بتصلح في شعرها و خشمها يلمع ..التقول ماكلة لقيمات!

مشهد أربعتاشراوي:
العروس مغيوظة من شافعة عفصت فستانها و تعاين ليها و الشرر يتطاير من عيونها..أول ما تلمح الكاميرا تبتسم في دلال و تغروِد عيونها و تطبع قُبلة على خد الطفلة المذهولة!

Quote: مشهد تلاتاشراوي: جكسوية شديدة قاعدة تضرب ليها في كراع جدادة...أول ما تقرٌب الكاميرا تخُت الصحن و تعمل نفسها بتصلح في شعرها و خشمها يلمع ..التقول ماكلة لقيمات! مشهد أربعتاشراوي: العروس مغيوظة من شافعة عفصت فستانها و تعاين ليها و الشرر يتطاير من عيونها..أول ما تلمح الكاميرا تبتسم في دلال و تغروِد عيونها و تطبع قُبلة على خد الطفلة المذهولة!

مشهد متفق عليه :
كل الجكس الصحانة بتاعتهم بيرجع منها البيض (الجناجداد زي ما بيقولوا) بينما صحانة الرجال يرجع منها فقط قشر البيض مع باقي سلطة الأسود..

مشهد مكرر في الأحياء البسيطة :
أخر الحفلة العشا بيبقا بس مخلل وبطاطس محمر وعيشة ولو محظوظ تجيك قطعة باسطة ..
بعد الساعة 9 لو راجعتوا صحانتكم حا تلقوا روحكم زي القاعدين في اعراس مختلفة لأنو اي زول صحنو بيكون مختلف من التاني تمااااااااماً ..

مشهد إستغلالي:
معظم الرجال في اليوم داك بيسلموا على النسوان بالأحضان كان قريبتك ولا ما قريبتك ..

مشهد حزين :
مجموعة شماشو بيلقطوا في باقي العشا ويجي واحد بي عكاز ساكيهم وتسمع ورررررررررررررر..

مشهد خمسمياوي

لازم يد فيها دهب تظهر براها كمشهد اساسي
واحدة لابسة غويشتين قدر الليلة وبكرة في يدها واول ما تجي الكاميرا تقوم تهز يدها منمدمجة مع الاغنية نظام شوفوا اليد والدهيبات
وتظهر اليد قاااااشرة قدام الكاميرا

مشهد ما عارفة كم
اتنين قعدين بيقطعوا قطيعة حااااارة لغاية ما متنبهين حتى لكشافات الكاميرا

مشهد رقم طفشطاشر:
العريس يعمل فيها ظريف ويقوم يرقص ليهو مع شافعة صغيرونة ونظام الولد بيحب الاطفال وكده وتقوم الكاميرا تجيب المشهد ده نظام حركة وكده ..

مشهد كم وتاشر كده

مجموعة من الشباب عاملين دائرة وبرقصوا بحاولوا يدخلوا واحد في نص الدائرة وهو بيتعزز عامل فيها مايكل جاكسون وفي النهاية بيخش ويقعد يتكعوج زي العنده شلل أطفال ...

مشهد جعان
بعض الجمجارات يحلفو ويقولو ما اتعشينا
برى برى من ناس فلانة الجعانين عزمونا وما عشونا

ولما تجى تتفرج الشريط تلقى فلانة دى قداما 3 صحانة عشاء
وسايقة معاها شفعا الخمسة

الصور كلها فى ماجستيك
ويوم الخميس بالصف وتلقى الناس واقفة عشان تشوف ياتو عروس السمحة
وياتو عريس الوجيه

والكوافير انتصار جحا ، التسريحة شبة مكررة

الفنانين بيصلو ما بين تسعة ونص وعشرة
دربك دربك الحفلة انتهت
العريس مذهول
فى صمت قروشى ؟؟؟؟

اهم مشهد
للمغترب الما شاف عروستو قبل كدا الا يوم الزفاف تلاقيهو كل مرة
يختلس النظر ويقعد يعاين للعروس بقعر عينو
ياربى سمحة ولا شينة وما قادر يجمع الا تجى واحدة وترفع معنوياتو
وتقول ليهو عروسك ما شرط لكيييين .

والله يا عبد الدائم كلامك ده كلام زول يا عرس اكتر من مرة يا كمان بتباري علوب

Quote: الصور كلها فى ماجستيك ويوم الخميس بالصف وتلقى الناس واقفة عشان تشوف ياتو عروس السمحة وياتو عريس الوجيه

والذ شي لمن تكون انت العريس وعمرك صغيييير وتلاقي العرسان المعاك ده عمرو 45 وده عمرو 50 وده وهن العظم منه وده اشتعل الراس شيبا
والله لمن تتكيف في حنان حنانك ..

Quote: والكوافير انتصار جحا ، التسريحة شبة مكررة

والحنة عند اماني تنس..

لا يا عمر ..
أنا عرسي أول مرة كان مختلف خالص ..
مع العلم إني عرست مرة واحدة بس ..
أولاً بالتبادي يوم العقد أخوي الكبير صحاني زي الساعة خمسة صباحاً ..
مع أنو كنا مساهرين في بيت بت خالتي عاملة لينا زي حنة كدا لحدي الساعة أربعة صباحاً ..
جهزك .. جهزك .. طلعنا من البيت زي الساعة سبعة إلا ربع ..
وصلنا المحكمة الساعة تمانية إلا ..
الساعة تمانية و تلت كدا ..
دخلنا القفص ..
( بعد إجراءات طويلة و عويرة و مضحكة ) ..
في واحدة قريبتنا زغردت في المحكمة الناس الملاقيف قاموا جو جارين عايزين يعرفوا الحاصل شنو !!
القاضي ذاتو مرق من مكتبو مكشر وشو ..
الجماعة شرحوا ليهو الحاصل أبتسم و رجع ..
بعد داك طوالي على البيت ..
جيت البيت أتصلوا علي ناس الشغل ..
عملت مصهيَن ..
أتصلت على العروس ..
عملت تقيلة .. ردت على أختها ..
قالت لي الزولة دي نايمة ..
قلت ليها ما بتنوم مالها ؟؟
أنا ذاتي قمت نمت ..
صحاني أتصال من العروس ..
عاينت للرقم قلت أتعزز شوية ؟؟
ما قدرت ..
لما رديت لقيت أخوها ..
لما نطيت ..
قال لي ياخي ناس الفندق ديل أتصلوا ..
عشان يأكدوا حجز الصالة يوم الخميس ..
قلت ليه أكد ليهم ..
و نمت تاني ..

حأواصل ..
لو حصلت على التصاريح اللازمة ..

Quote: مشهد كم وتاشر كده مجموعة من الشباب عاملين دائرة وبرقصوا بحاولوا يدخلوا واحد في نص الدائرة وهو بيتعزز عامل فيها مايكل جاكسون وفي النهاية بيخش ويقعد يتكعوج زي العنده شلل أطفال ...

يا زول انت شوفتني وييييييييين قبل كده ؟

Quote: والله يا عبد الدائم كلامك ده كلام زول يا عرس اكتر من مرة يا كمان بتباري علوب

هو فى احلى من عرس الدبل
علوب وعلى دهب ديل جيرانا فى الصحافة

اخونا عصام دهب ما فاهمين حاجة انت عرست فى السعودية ولا شنو
محكمة وقاضى ، نايم ونايمة
فى شنو وريــنا ؟

مشهدرقم كم كدة مابعرف : -

بداية الحفلةوالمكان فاضي .. الفنان يؤدي أغنيةبطيئة الايقاع ومافي ناس ا شوية شفع بيتجاروا هنا وهناك .... الكاميرا حايمة ولايجة والمصور ما عارف يهمل شنو الي ان تظهر أخوات العريس من بعيد فيهجم عليهن المصور حلا لورطته.

دة بيحصل والا لا ؟

Quote: المشهد التاني : مجموعة من الشباب يدّعون إنهم فردك لمن غلط ملفوفين حولك واحد بيرقص معاك ووالتاني بيهمس ليك في التاني بيهمس ليك في أضانك والتالت بيبشر ليك ..

عندما شاهدت شريط زفافى .. فى واحد من اصحابى كل مره يجى بيهمس لي في أضانى ... الجماعه قالوا

لى صاحبك ده كان بيقول ليك شنو ؟


صدقونى لى هسه انا ما عارف ..

والاغرب هو نفسو ما عارف ....

المشهد الجغلومية :
واحد يجي يمسك المايك وبعد الليل اللحدي أسة بيحبي يقوم يقول:
ياشباااااااااااااااااب بالله وسعوا الساحة ..والله نحن سعيدين بي مشاركتكم لكن عشان الحفلة تستمر..
الرقصة الجاية للعريس والعروس يا شباااااااااااااااااب..

وما أن تبدا الأغنية ويطلع زولك ده زي البيأذن في مالطا..

وكأن بيوت العرس (كوبي آند بيست)
أهم شي في أي بيت عرس (ظل العروس)و هن ال(كم شافعة) البفتكرو العروس كائن أسطوري و يرافقنها ك(ظلها) محل ما تقبل لامن يجيها (خراج روح)!
من هذا النوع ربنا ابتلاني ب4 يوم عرسي
واحدة فيهم تخصصت في (نتف) الخرز و الشغل العلى فستان الزفاف و طبعاً أنا تم تحذيري مسبقاً (لنا مافي عصبية ولا في راي واضح ولا صراحة ولا سخرية ولا إكسبرشنز اليوم دة ..مفهووووم؟) و طبعاً (مفهووووم) ووعد ناجز كمان!!
المهم كل ما أجي أنهر الشافعة اتذكر تحذير أمي و صاحباتها ف (أصم خشمي ) و لكن السيل (بلغ الزبى) لمن الحذاء من ورم الرجلين و الإرهاق ضاق فبراحة تخلصت منه و أزحته (خلسة) إلى ما تحت مقعد الكوشة
أها لمن جو يسوقوني و جيت نازلة السلم بتاع المسرح أصرت واحدة من الطفلات المعجزات (ظلي) أن ترفع لي ذيل الفستان [عثان ما تتعتري يا خالتو(طبعاً من يومها إترقيت مباشرة لخالتو)]!!
وأنا أشيل و أقول ليها (لا يا ماما ما مشكلة )و هي تشيل و تصر ترفع طرف الفستان قليلاً عشان خالتو( اليوما أبيض )ما تتعتر
وطبعاً خالتو (العروس)(الأسطورة) حفيانة!
المهم ما عرفت أعمل شنو قمت (حمّرت) للبنية (خلسة برضو)-ما وعدتا ما أحمّر- ففاجأتني بأن أطلقت صرخة و كأنها تحتضر جاءت على اثرها والدتها جارية لا تلوي على شيء
وبينما تسألها أمهامالك؟) و قبل أن ترد وجدتني ببراءة الدنيا أسألها:مالك يا ماما؟
ومن ديك و (ظلي) بقو 3 بس

ما بكره حاجة الا يجيك واحد ابو عضلات وعاوز يبارك ليك ويمسكك ويجبدك
من رقبتك لحدى ما ترترتع من عتبة الكوشة ولا واحد اهبل تانى يجرك من الكرفته


اهداء
عـلـــــــــــــــــــوب