عبارات من البرامج ..

المزيعة تطلب من الفنان اغنية ..
الفنان يقول ليها حا أغني أغنية الفنان المرحوم فلان ..
طوالي تنط المزيعة وتقول :
ولا ننسى في هذه المساحة ان نتقدم لأسرة الفنان المرحوم فلان بالتحايا ونبارك لهم العيد ..

مقدم البرنامج يسأل الضيف:
أحكي لينا موقف طريف مرّ بيك ..
الضيف يرد ليهو :
والله شوف ..طبعا المواقف كتييييييرة والواحد والله ما متزكر منها شي في اللحظة دي وانت فاجأتني بي سؤالك ده لكن انا حا أكي ليك موقف طريف جداً مرّ بي وانا في بريطانيا ..ويحكي الضيف الموقف الطريف جداً فلا يضحك إلا مقدم البرنامج والضيف للموقف ونكون نحن في إنتظار أن يتم الموقف بينما نكتشف ان الموقف انتهى !!!

كل ضيوف البرامج لمن تسألهم المزيعة سؤال يبدأو بالرد :
والله انا ما عارف .. لكن
نق نق نق نق نق نق نق نق نق (ده الحالة ما عارف)

تعرف يا عمر (امكن ) دي يوم اقعد احسب بتتقال كم مرة في اي برنامج
اي مذيع او ضيف شوفه بيقول امكن كم مرة ويبتدي بيها كلامه

( الله يديك العافية )

( الله يديكي العافية )
..
كان في النيل الأزرق .. وكان في التلفزيون العادي ده ..

غايتو ( معتصم الجعيلي ) كان عمل لينا الحركة دي في قناة هارموني برضو ..
بيكون هو زاتو الله يديهو العافية..


الله يديك العافية يا عمر

( والله طبعاً القصة دي أصلاً )
( والله حقيقة )
( والله كان زول رائع)
( والله والله..)
والله دي لازمة من لوازم أي برنامج
من غير حليفة الله كتل الخليفة..


تسلم عمر.

اساسي القبل الكراسي:
(إمكن) إنت ما قاعد تسمع كويس ..
يعني (إمكن) إنو الناس ديل ما قاعدين يقولوا (إمكن) ..
ولا (إمكن )قاعدين يقولوها ..
بالمناسبة يا اساسي
هل في فرق بين ممكن وإمكن؟

ايوة في فرق

امكن للحاجة الحصلت

ممكن للحاجة الحتحصل

شفتني كيف مذاكر قواعد

اخونا تمبس:
الله يديك ال(عافية) انت كمان
والعافية زاااااااااتا بقت خشم بيوت في عافية زيوت وعافية فنانة وعافية صحة
اها انت يا اللخو كان قالوا ليك عايز ياتو عافية بتشيل ياتا ؟

غايتو ناس هارموني البدوها بي الفيديو الفيهو قبيض الايدين ده ولبس المحزق والكت فنحن موعودون بقناة واعدة
تخريمة :
وطّي صوت التلفزيون ده عليك الله يا تمبس..

اذاعة مانجو


راديو 96


المذيع اعرف نفسك من خلال نومتك

الو

الو معاي منو


معاك رحاب من الدروشاب

ايوه يا رحاب بتنومي ع جنبك اليمين وللا ع الشمال وللا ع بطنك وللا ع ظهررررك يا رحاب

اه بنوم بنوم ع جنبي اليمين مرات ومرة ع ضهري


انتي قلقة يا رحااااااب

شكررررررا رحاب تو توت توت ..

وبس



________
بالله الخلي الزول السطحي ده يفسر الانسان من خلال نومو منو

(والله) يا تماضر (في الحقيقة) إنتي زولة (رائعة)


غايتو السودانيين ديل لو بيسمعوا فاتاوى السعوديين في الحليفة دي الواحد كان بقا الصايم ديمة ولا رجع لي ايام العبودية وجاب ليهو مراح بتاع (رقاب)..

تماضر الخنساء:
بالله ادينا موقف طريف مرّ بيك

Quote: انتي قلقة يا رحااااااب

فاصل ونواصل..

Quote: انتي قلقة يا رحااااااب

هاهاهاي تعرف يا عبد المنعم ذكرتني نكتة الحبوبة وحفيدتها
الحفيدة (حنكوشة وكدا) داخلة ومارقة الحبوبة تعاين ليها ساي
في النهاية الحبوبة سالت البت : مالك يا بتي
الحفيدة: والله عندي (قلق) يا نانا..!
النانا : سجمي..!!! ودا قام ليك وين ؟

Quote: الحفيدة (حنكوشة وكدا) داخلة ومارقة الحبوبة تعاين ليها ساي في النهاية الحبوبة سالت البت : مالك يا بتي الحفيدة: والله عندي (قلق) يا نانا..! النانا : سجمي..!!! ودا قام ليك وين ؟

:
:
:
:


نسمع أغنية ...

Quote: ودا قام ليك وين ؟

فاصل ويواصل



_____

اضحكتني يا اساسي

برنامج بتع مسابقات او اهداءات المهم نوع البرامج البتعتمد على نقة التلفونات
تتصل واحدة بالمذيع او المذيعة وبصوت نعسان : ممكن اشارك!!!
اكيد ممكن تشاركي
( يعني واحدة تكبدت مشاق التلفون والاتصال عشان تشارك ، اكيد حتشارك طبعا
اها لو المذيعة قالت ليها لأ !! حتمشي وين؟؟؟ )


مذيعة هبلة:
نهدي الاغنية للاهل بكاب الجداد .. والخالة فاطمة والخال سيداحمد بالسعودية ( نظام لازم يكون في خال او عم في السعودية ) .. والعمات والاخوات برجل الفولة ... وناس عوضية بالثورة الحارة العشرين ...و..و...
والواحد يكون نام لغاية ما مسلسل الاهداءات ينتهي

حذف للتكرار

حذف للتكرار

حذف للتكرار

حذف للتكرار دي في ياتو برنامج يا عمر

أخي عمر الفاروق الله يديك الصحة والعافية
حقيقةً ، ودي برضو من عبارات البرامج ، في حاجات في الفضائية السودانية تخجل أن تسمعها أو تراها حتى وإنت براك ما معاك ولا زول تقعد تتلفت ناهيك عن أنها فضائية بشوفوها الناس حول العالم ، وأتمنى من الله بمناسبة المولد النبوي الشريف الذي لم آكل فيه فته مع القوم أو أشتري فيهو حصان أو عروسه أن يتم تشفير الفضائية السودانية ولو دي صعبه يتم تهكيرها بالقدر الذي تصبح معه الما فضائية سودانية.
ناس الكورة شايفهم طالعين في حكاية الطرف الشمال ، ولعبه كعبيه أى بالكعب بحسب ما فهمت ، إرتداد في وسط الملعب ، مخاشنه ، الغريبة في الوصف المذيع دائماً ما يذكرني بصوت رجل آلي كورة بينيه طويله ماشي .... إرتداد هجوم عكسي
عمر الفاروق تشتري مني التلفزيون والراديو وصورة وليم جلـبرت مكتشف الكهرباء

العزيز الفاروق ، وعندكم يحلو المقيل ،،
====
من نشرات الأخبار الأخبار
- رتق النسيج الإجتماعي
- فتق الرتق
- نسج الفتق
- آآآآآآ (تأتأة جميل عزر) حصريا أسامة الخليفة،،
- شكرا جزيلا لك،،(ومايكون جاوب على أي سؤال للمقاطعات العديدية والتأتأة،،
===

(شكراً جزيلا لك) أخي الفاروق

حبيبنا ود الفاروق
أحبائنا المشاهـــدين ..
مرة قاعد أسمع لي في لقاء في التلفزيون ...
المذيع داير يثنى على كلام الضيف ..
قال ليهو : والله ده كلام مركــــــــــــــوز .
المرة سألتني : مركـــــــــــوز يعني شنو ؟
قلته ليها : والله يكون المزيع ده إتذكر المركــــــوب بتاعه الوداهو لي النبلتي يخيتو .
شكراً على هذا البوست المركــــــــــــــوز
تحياتي ،
الأرباب

Quote: - آآآآآآ (تأتأة جميل عزر) حصريا أسامة الخليفة،،

عبد اللطيف بكري أحمد والله قربت تبالغ زاتو ، وبصراحة أسامه الخليفه القرب يبالغ ودي لحظات لا تنسي وخلاص كان بيني وبين عضة المركوب حاجه بسيطه ولمن قلت الله يلعنك يا إبليس ، إبليس قال لي أنا ناقص ما تلعن الكان السبب ومن يومها إعتزلت المعاينة والمتواقة للتلفزيون

مرحباً بكم من جديد

الأخت مايا .. أيوة سامعنك .. الو .. الو ..الو
الو مرحبا بيكم معاكم مايا ..
المذيع يكون من نوع ناس حمزة عوض الله وعايز يتظارف : مايا نصري ؟؟ هأ هأ هأ ..
أيوة يا مايا إتفضلي ممكن تهدي ..
ترد مايا :
ماعندكم مسابقة ؟
وبمناسبة المسابقات شاهدت حلقة أول أمس في القناة المفضلة للملّا عمر الفضائية السودانية كانت الجائزة فيها لأخت من ماليزيا جاوبت إجابة شافية وضافية وكاملة عن سيرة المصطفى عليه أفضل الصلاة وأتم التسليم سمّاعة هيتفون !!! اي والله سماعة هيتفون ..
واللذيذة إنو المزيعة عايزة تخليها ظريفة شوية وقالت ليها :
مبروووووووك كسبتي سمّاعة إنترنت ..
والله فضحتونا مع الضيوف كان اخير لينا برنامج محمد سليمان داك لمن كان بيهدي موز وشعيرية ..

سامي الخصال:

Quote: حذف للتكرار دي في ياتو برنامج يا عمر

في برنامج نكرر غداً ..

عمر الفاروق

والله مافي شئ واجع لي قلبي غير معاي منو البشيلو ويقدونا بيها والإبداع أرفع صوتك ما سامعك والغريبة في كل مكالمة بقولوا الكلام ده
ومالك انت على الولد الشفت وليد زاكي الدين عامل فيها مذيع مشاهدي كل الجمال بقولها في الحلقة 50مرة أو أكتر بنفس الطريقة طلع زيتنا

الحبيب / عمر الفاروق

كل هذا التخبط مرده لعدم الاعداد السليم والتنسيق مع الضيف ,اختيار الضيوف والمواضيع

يتم في الغالب بالمجاملة ممايضر كثيرا بسمعة هذا الجهاز والعاملين فيه , والضرر

الاكبر يقع على المشاهد الذي هو انت ..والحديث يطول ونسبة لاشارة المخرج بانتهاء

البرنامج لايسعنا في هذه السانحة الا ان نتقدم بجزيل الشكر لضيفنا السخيف والمشاهدين

التعساء بقضاء امسية الله لا عادا



كت اووت :

انت ياعمر الشلاقة ليك شنو ؟ ماشايف BC , ROTANA

المذيعة:

الليلة بناخد الإتصالات حقتكم و عايزين نعرف رأيكم فى العرس و البورة شنو؟؟

المتصل:

الو

-ااااااى عازوين نعرف رأيك فى العرس و البورة

كويس

-ياتو, العرس و لا البورة

طيب ممكن اهدى

- يا أستاذ أظنك ضارب غلط, إحنا برنامج بناخد رأى الناس على الهوا

لا أنا ضارب صاح

- طيب رأيك شنو

ممكن أكلم محمد

-شكر يا أستاذ على المشاركة.. و ناخد الاتصال التانى



تعليق
حوار دار فعلا... مع محاولة تذكر أكبر قدر من المحادثة

كلمتين لا بد منهم

يعني .. وباقي الكلام ما عندو اي معنى اهو كلام والسلام
بالعكس ( بالعكس كلمة تلغي ما قبلها وتوديهو الاخرة ببساطة)

والعجب لو صادرة من مذيع بيعمل ضغط من عينة حمزة او عمر الجزولي

اللهم لا اعتراض على حكمك فيما تقدمه الفضائيات

مسـاء (المنقـة)..

و صـباح (القريب)..