شكوى المريخ ضد الهلال ..النتيجة !!!

لمن يضيع عرق الجباه الشم شمار في مرقة ..
يا نوووووووووووووووووووووووووورا اه ..

والله إتحاد شدّاد ده رطّب بي قروش شكاويكم دي يا المريخاب..
والله إدارة المريخ دي بتزكرني بي الدورات الرمضانية ودورات فقداء الشباب في الحِلّة ..
الكورة تنتهي بي جاي يجيك واحد يدّق ليك الباب بي جاي يقول ليك هاك دي 500 جنيه نحن رافعين شكوى في اللمين كرناف ..
تقوم إنت طوالي تقول ليهو يا زول خلاص كسبتو الشكوى بكرة تعالوا العبو النهائي إنتو وانا بكلم الفريق داك أقول ليهو انتو مغلوبين 2- صفر..
بالله عليكم دي الشكوى رقم كم ترفعوها في الهلال ؟؟؟؟
وشكاوي كلها ضاربة تنم عن إدارة جاهلة تماماً وفقط همها تخدير جمهورها بعد أن فشلت ولمدة 5 سنوات من الفوز داخل الملعب في هذه البطولة ..
يا تمبس تتزكر التتر مدرب القراقير؟؟؟؟
مش كان جنوا شكاوي ؟

خسر المريخ الشكوى كعادته وتم رفضها كالعادة وضرب شداد ورفاقه قروش الشكوى كالعادة ..
مبروك للمريخ هذا السقوط الإداري والفشل الإداري ومبروك هذه المرة لإدارة الهلال ..

Quote: الكورة تنتهي بي جاي

ورايك شنو في الناس اللي بتشتكي
قبل المباراة ما تبدأ ؟؟؟
إنتو بيكتو من أيدو قبل الحكم ما يقول تيت ..
ولا ... نسيت ؟؟؟

Quote: وشكاوي كلها ضاربة تنم عن إدارة جاهلة تماماً

والجهل الفاضح والجرسة بتاعة ايدو نسيتها ولا شنو ؟؟

بكيت قبل ما تشتكي ..
وايدواهو تم ليك الناقصة ..
شكوى ثم بكية .. ثم جهل اداري وصحفي قاتل ..

الأخ حسين :
ورأيك شنو في الشكوى البيرفعوها والكورة شغالة وفي المقصورة ونتيجة الشكوى تطلع في نفس اللحظة والغريبة كانت مباراة كأس وكده ..
ويقوم رئيس الإتحاد يبتّ في الشكوى ويقرر المريخ فايز ويديهو الكأس ..
ولا شنو يا عاكف عطا؟

في مباراة القمة ( 2/0 ) القبل الاخيرة ..


في البداية نزل لاعبو المريخ بالزي الاحمر وايداهو كان بالرقم 14 .
ناس الهلال وقبل نزول الفريقين قدموا شكوى في ايداهو وكاتبين في الشكوى اللاعب رقم 14 .
اهاا اللعيبة رجعوا في غرفة تبديل الملابس ورجعوا لابسين اصفر وايداهو مغيرالرقم ..

شفت مقلب زي دهـ قبل كدهـ
والله ياعمر دي كانت اغرب شكوى في تاريخ كرة القدم ..تكتب’ في الشكوى اللاعب رقم 14 واللاعب كان بالرقم لاحظ للصورة كويس ..


تحياتي ياجميييييل ..

ود المايقوما:
موضوع إيداهو ده كان موضوع كبير وشغل الترضيات كان فيهو واضح وشغل الرشاوي كمان كان أوضح واللعب ما بين نيالا والخرطوم كان مبالغ فيهو ..
والموضوع تمت فيهو التسويات والترضيات وبقت زي إتفاقية بين الإتحاد والمريخ ..
نقول لي ناس الهلال الشكوى ضاربة ونخليهم يسجلوا علاء الدين ..
وأهو منها كمان نقفل على موضوع التزوير الشهير والبصمة وما أدراك ما العجب..
ولا شنو يا حووصة ؟؟
أو كما يقول مزمل

عمر الفاروق

سلاماتي يارجل

انا بفتش فيك

من بوست لي بوست

من زمنك القفلت

وما لقيتك

عشان نقول ليك والله شعار شعر

وقصيدتك عاجبانا ودايرين نغنيها

وكان ردينا عليها بنبوظا ساكت

اها ارقدعافيه

قت لي الموضوع شنو

الهلال مالو المريخ كيف كيف

ماعارف حاجه انا

لكن اكيدكلامك صاح


ودعناكم الله

Quote: شكوى المريخ ضد الهلال .. !!!

لو سمحتا يا شاب العنوان الصحيح:
شكوي مزمل أبوالقاسم ضد الهلال
كتبا
ودقع الرسوم




















وقبض الريح

ود اللمين طارق:

Quote: عشان نقول ليك والله شعار شعر

أححححححححححححححححححححححححي ..ريحتني في كنكوجي وما تسألني الكنكوج ده وين لأني ما عارفو ..

Quote: وقصيدتك عاجبانا ودايرين نغنيها

أها دي قعدة في التلفزيون من هسسسسع دي وراجي برامج رمضان عشان أسمعا وحا أرسل لي أهلي في أم ضريوة ووادي عقرب وأم دقرسي عشان يشتروا الجاز من الليلة للدينمو ويوصّلوا لي الجيران من غير قروش ويزيدوا ساعات الكهرباء وبدل تكون من 6 لي 9 مساء يعملوها من5 لي 12 مسا..

تخريمة :
أصل الحكايا يا طارق شكوى والشكوى لغير الله مذلّة وقووووووووومي كده يا علوية أقعدي في العنقريب واتفرجخي وقووووووم كده يا حاج الطاهر خت السفّة من الحقة ..
بث..

والله يا عمر بتعيش احلي ايامك . تاني مين يقدر يكلمك ...

يا ناس خدر الشين عشان تقولوا عمر الفاروق زول عادي

والله يطارق ا ابو خصل ريحتني في حناني زاتي عشان ناس كدا

ايوة بالله يا عمر ارفع راسنا

وسيدي بي سيدو

اها في زول عنده كلام في ناس الهيلاهوب ديل؟

يا قرضابي:
وانا اقووووووووووووووووووووووووووووول..
زولك مسيكيييييييين ويكتب بي خجل عن الشكوى ويقول ليك انا عارف الاتحاد ما حا يوافق بالرغم من صحتها وانا عندي احساس وانا عندي فرناس..
لكن والله باااااااااااااااااااااالغ عمي الراجل..

تخريمة :

Quote: قبض الريح

يكون الريح مصطفى يا ربي؟

طارق الامين

انت يازول بصحك..تقوم تترك الشعراء الاماجد مثل ناس ابقوتة وتغنى لعمر الفاروق

اساسى والله الشهرة قربنا منها بعد كدا...طبعا عمر تانى بكون لينا واسطة
مع طارق والمجموعة...

عمر اعمل تقيل الايام دى ما تقوم تتصل على الفرقة...يقوم معارضين الادب الكى بوردى
يتصلو على هئية النصوص ويبلغو بان الفاروق غير لائق ادبيا...

تمنياتنا للفاروق بايام سعيدة الى قدوم رممضان..وانا بدورى ساتكفل بالدعاية ليك
فى ريفى ابقوتة...وقرى الجزيرة التى قيها تلفزيون ابيض واسود
ودمتم

خبر عاجل

تم اعتمادالاخ الشاعر

عمر الفاروق

رئيسا للجنه النصوص

بمستشاريه الهيلاهوب

كما تم اعتمادر

اسحق الحلنقي نائبا له



سونا

يا عمر ما ترضي اسحق الحلنقي شايف نفسه وزول نقته كتيرة بعدين بغني ليهو كل من هب ودب من كبار الفنانين

انا برشح انك تختار نايبك بطريقتك عشان يكون في ندية بينك وبينه عشان تطوره المستشارية بتاعة الهيلاهوب

ابعد من ابو قطاطي وتاج السر الحسن محمد يوسف موسى والتجاني حاج موسي دا زاته براية حايمة

ركز علي سيف الدين الدسوقي ولا حسين بازرعة لانه في تقارب وندية

عمر الفاروق في أول حوار صحفي له يفجّرها داوية ويقول:
* انا معجب بفرقة الهيلاهوب منذ نعومة أظافري ..
* بدأت كأي شاعر عادي من خلال الدورات المدرسية وكتابة القصاصات الشعرية في كرّاس الإملاء..
* طارق الأمين قدمني للجمهور وهذه نصيحتي للشعراء الشباب..
* أرفض إتهامات محمد وردي وحمد الريح حول أعمالي وهاكم الأسباب..
* لجنة المصنفات تكيل بمكيالين ولهذه الأسباب رفضت مقابلة التجاني حاج موسى..
* شركات الإنتاج تتغول على أعمال الغير والتلفزيون في نوم عميق..
* القدّال وحمّيد وخيري شعراء كبار ولكن !!!!!؟؟...
* لا يوجد ما يسّمى بالأغنية الشبابية والجمهور السوداني ذوّاق ..
* العالم أصبح قرية صغيرة وطريقنا للعالمية يبدأ من هنا ..
* السلم الخماسي مسموع في أوروبا وعبد القادر سالم خير سفير وهاكم الدليل..
* وزير الداخلية طلب مقابلتي ..وهذه قصتي مع الأمين العام للأمم المتحدة ..


كل هذا والكثير المثير في مجلة سيدتي هذا العدد فقط ترقبوه..
مجلة سيدتي ..وأخيراً أصبح للمرأة في الوطن العربي مجلّة ..

أساسي وأبقوتة:
ندّمتو الزول على هظارو ..يعني الواحد تاني ما يهظر معاكم ولا شنو ؟
والله طارق اللمين أسة بقى في البتحلّو ..
تخريمة :
اها يا طارق أخبار ود الحاوي ما خلص من التلحين ؟
يا زول غيروهو وعوضنا الله أدوها لي وردي يلحنها..

اعلان هام
ننوه الى انه قد تقرر ان لايدلي الشاعر الكبير النحرير عمر الفاروق باي تصريحات
لوسائل الاعلام بشتى انواعها الا عن طريق المكتب الخاص وبموافقة مدير اعماله
وعلى الراغبين في اجراء حوارات او لقاءات صحفية تعبة النموزج الموجود باستقبال المكتب او عن طريق الانترنت على البريد الالكتروني
[email protected]
ونظراً لكثرة الطلبات ولمشغوليات سيادتة في تنقيح الطبعات الجديدة من دواوينه الشعرية التي نفدت منها الطبعات العربيه والانجليزيه فاننا لانعد في ان يتم اي لقاء قبل مضي ستة اشهر من تقديم الطلب
وسيقوم الحرص الخاص بالتامل مع اي تفلتات امنيه بالحسم المطلوب حفاظاً على روحه الغاليه
وشكر
زول ساكت(سبت)
مديرالاعمال والمشرف على المكتب الخاص

الزول الما ساكت :

Quote: التي نفدت منها الطبعات العربيه والانجليزيه

يا زول إنت تشابه عليك البقر ولا شنو ؟
انا ما الزول الألّف كتاب ال Backup & Recovery لي ناس سايبكس ..
إنت أظنك ملخبط ساي..

تخريمة :
ديواني ده لو ما لقيتو في جرير شوف العبيكان ولا ما لقيتو في العبيكان جرّب مكتبة المريخ وإذا ما لقيتو هناك حاول شوف طريق الملك عبد الله وإذا ما حصّلتو هناك بعد كده ما عندك حل غير تمشي الكتاب المستعمل ..

* ملحوظة:
تأكد من إنك فطرت قبل ما تبدأ جولتك دي ..