الهلال في مجموعة الموت ..القوي مع الأقوياء..

أوقعت القرعة فريق الهلال زعيم أمة الكرة السودانية في المجموعة التي تضم إلى جانبه كل من :
الأهلي المصري..
الترجي التونسي..
وأسيك أبديجان العاجي..

لا لا ما القوي مع الاقويا
دا البغل المزامل الخيل

Quote: دا البغل المزامل الخيل

يا محمد عمر انت يا عالم يا فيلسوف
كده راجع نفسك شوية
والله كلامك دا فى محلو



تحياتى ودام الود

مخو

المباراة الأولى للهلال ستكون في مواجهة الأهلي المصري بالقاهرة في الأيام 22-23-24 يونيو..

ودي مباراة ثأرية بعد أن خسر الأهلي أخر لقاء في القاهرة من الهلال الزعيم بهدف ريتشارد جاستن..

وا فضيحتا ،، وا بهدلتا

كدا نشوف تصنيف نادي المئتين الكبار بطلع شنو ؟؟؟

محمد عمر الفكي:
خلّيت قعاد الكافتريات والتشتّح والتلصّق ولا لسّة ؟

Quote: محمد عمر الفكي: خلّيت قعاد الكافتريات والتشتّح والتلصّق ولا لسّة ؟

عمر الفاروق
خلى روحك رياضية عادى عادى انا رفعت بوست الاوب والروب قبل القرعة
لو حرقك قول الروب ولا اوب


تحياتى
ودام الود
مخو

عندنا 9 نقاط إن شاء الله مضمونة وفي الجيب مع أي مباراة تقام في مقبرة طلعت فريد ..
بس المشكلة كيف نقدر ننتزع نقطة واحدة من فرق كبيرة زي دي؟؟؟

محمد عمر الفكي:
خلّيت قعاد الكافتريات والتشتّح والتلصّق ولا لسّة ؟
من زمان هسي شغال بيع دلاليك"جمع دلوكة" وتقييم اصوات فنانين وبيع صفافير

احضاننا مفتوحة لكم يا اخوتنا في الهلال تعالوا ارتموا فيها وابداوا النحيب

واااااا شماتي

خالص تعازينا للاخوة الرشاشات
الفراش وين يا عمر
تسلم

الفروق اخوي

قدر الكبير للكبار وقدر الصغير للصغار

جماعت الصغير شايفهم فرحانين وشمتانين علينا

ربنا يورينا فيهم

عباس اخوي
بيني وبينك دي ما مجموعة نصاح
دي حا تبقي عليكم رايح جاي
ويبقي الرماد كال نفيسة
تسلم

ها ها ها ها ها ها ها


صدقتك

المجموعة التى يلعب فيها الهلال مجموعة قوية
وحتى المصريين قبل اجراء القرعة توقعوا هذه
المجموعة بالضبط واسموها المجموعة الحديدية
وياالفاروق هذا قدر الهلال القوى ان يواجه
الاقوياء والكبير دائما مع الكبار

والصغير النزل مع الانزال

الشئ البعرفو انهم قسمو الـ 8 فرق لأربعة مستويات
جاء اصحابنا الكرام ناس العرضة شمال مع الفريق الليبي في المستوى الرابع
يعني الاخير
يعني استراحة الفرق
استريحوا يا الاخوان
واستجموا كمان
وتزودوا بالنقاط فان خير الزاد عند الهلال
وامغصتي

Quote: الشئ البعرفو انهم قسمو الـ 8 فرق لأربعة مستويات جاء اصحابنا الكرام ناس العرضة شمال مع الفريق الليبي في المستوى الرابع يعني الاخير يعني استراحة الفرق استريحوا يا الاخوان واستجموا كمان وتزودوا بالنقاط فان خير الزاد عند الهلال وامغصتي

ياحمزاوي جريدة الصحاف ( الصدي ) صنفت المريخ مستوي ثالث في مجموعة الصلات الطيبة

العزيز حمزاوى

Quote: الشئ البعرفو انهم قسمو الـ 8 فرق لأربعة مستويات جاء اصحابنا الكرام ناس العرضة شمال مع الفريق الليبي في المستوى الرابع يعني الاخير يعني استراحة الفرق استريحوا يا الاخوان واستجموا كمان وتزودوا بالنقاط فان خير الزاد عند الهلال وامغصتي

اتخيل معاى لو قالوا القائمة دى كده يجروووها لحد ماتصل
المريخ والقطن التشادى وهلمجرا حيكونوا رقم كم لاحظ انو
الفرق الثمانية بما فيهم الهلال والاتحاد الليبى اسمهم
الثمانية الكباااااااااااار
وزى ماقال عادل امام انا اسمى مكتوب .. طيييييييب
ويااخى حمزاوى الاسماعليى ده حتروحوا منو فين !!

كل أمنياتي للكرة السودانية بالنهوض من جديد لتسير في ركب كبار الكرة الافريقية والعربية ....

أمنياتي للهلال بتخطي عقبة الأهلي المصري والترجي التونسي والتأهل للنهائي والعودة بالكأس ليزرع الفرح في كل ركن من اركان الوطن الغالي .

وامنياتي للمريخ بالفوز بالبطولة الكنفودرالية ....


بعيداً عن التعصب الاعمى ...... عاش هلال السودان وعاش مريخ الوطن .....

ســلام ...

أستغرب وأستعجب من الزوبعة التي يقيمها الصهاينة اليوم ..
دوري المجموعات دوري لا يلعب بنظام المغلوب وهذه الفرق قابلناها من قبل وحققنا عليها الفوز ..
الترجي التونسي هزمناه أكثر من مرة بالثلاثة وبغض النظر عن مباراة الرد ..
الأهلي كسرنا عيون جووووووووة القاهرة وهو ما عجز عنه الأهلي نفسه في قلعة طلعة فريد في هذه الأيام ..
لو في خوف فهو من الفريق الذي جاء لأرض الصهاينة ولقنهم درساً في ملعبهم وغادر بكأس من داخل إستادهم الا وهو أسيك ابيدجان ..
البقاين هينين ونحن بنقدر عليهم ..
البيحيرني المريخاب فرحانين بي قرعتنا وما شغالين بي قرعتهم الشغلة التقول هم لاعبين مع جزيرة الفيل و الميرغني كسلا !!!!!
تمشوا نيجيريا تضربوا القدو قدو لمن الله يغفر ليكم انتو قايلين تاني في قطن ؟؟

بينما يواصل الصهاينة حقدهم ومغستهم لتأهل الهلال شوفوا جمهور الأهلي المصري بيقول شنو :

Quote: الاهلى الهلال السودانى اسيك الترجى يالهوى ايه المجموعه دى دى بتضم اصعب فرق افريقيا امال مين اللى فاضل فى افريقيا كل الفرق المرشحه للبطوله فى مجموعه واحده يخربيت قرعتك يا اتحاد يا افريقي

Quote: فرقه الهلال جامده يا مان المفروض منستهونش بيها هو انا قلت ان الهلال ضعيف دا كفايه بس اللى عمله فى اخونا الل................

Quote: شكرا والمجموعة معقولة جدا وخصوصا ان اسيك السنة دي مش زي اسيك بتاع السنة اللي فاتت عشان احتراف ابرز نجومه في اوروبا وخصوصا الخطير ياكونان وكمان الترجي مقدور عليه ان شاء الله والهلال السوداني قوته في ملعبه بس والاهلي يقدر يعمل نتيجة كويسة في السودان حتى لوكان التعادل السلبي

والمداخلة الأخيرة دي بتوضح إنو الأهلاوية خايفين من الهلال أكتر من باقي الفرق ..

Quote: والمداخلة الأخيرة دي بتوضح إنو الأهلاوية خايفين من الهلال أكتر من باقي الفرق ..

ياراجل!

سلامات يا عمر يا فاروق،

مهمة الهلال صعبة مافي كلام، والفرق الثلاثة ليست
من تلك التي تفرط في النقاط بأرضها، بل تسعى للفوز
أو على الأقل التعادل خارج أرضها!

لو اتعاملنا بي فهم إنو نقاط مباريات أمدرمان مضمونة
حتكون النتيجة مخيبة للآمال من كل النواحي. يا ريت يكون
الإعداد الفني والبدني والنفسي والإداري في مستوى الحدث،
عشان تختفي الهزائم الكبيرة وما نتحسر على ضياع فوز
مضمون.

لازم الهلال كلــو يقاتل من أجل كل نقطة داخل وخارج
السودان، ونسيب حكاية التحكيم والمعاملة السيئة لأنو دي
ما أول مرة تواجهنا.

الهلال خلق سمعة طيبة في الأدوار السابقة بنتائجه
القوية وعروضه الجيدة، بدرجة جعلته مرشحاً وبقوة
للعب دور "الحصان الأسود" في مجموعة المــــوت...

بس نحنا أعرف من غيرنا بالفرق السودانية، يوم
في السما ويوم في الأرض، يوم آخر تألق ويوم هزيمة
كبيرة! والأسباب كتيرة منها: الفارق في المستوى
المهاري والخططي مع الفرق الأخرى، ضعف الاستعداد
البدني والنفسي، والايقاف المتكرر للاعبين مؤثرين.

عشان كده يا أبوعمار أحسن نبعد من التفاؤل لمجرد
التفاؤل وندعو مجلس الهلال والجهاز الفني واللاعبين
للتركيز الشديد والانصراف عن مجاراة ندنا التقليدي
في الفرقعات الإعلامية ومعارك التسجيلات... أحسن
نتعامل بفهم [نحنا ما عندنا وقت نضيعو في الكلام
الفارغ].

المشكلة الكبيرة يا عمر حتكون الدوري الممتاز! لأنو
الضغوط فيهو كتيرة والتعثر فيه يؤثر بشدة على الروح
المعنوية واللعب المتواصل فيه يعرض اللاعبين للإجهاد
والإصابات. شوف الأهلي المصري: الدوري في مصر
انتهى واللاعبين الأساسيين في إجازة وباقي ليهم
-محلياً- مباريات كأس مصر فقط!

أخيراً، الفوز في مباريات أمدرمان ومباغتة الأهلي بمصر
هو أقصر الطرق لدور الأربعة، كلام يمكن يكون غريب شوية
لكن صدقني: الفوز على الأهلي بمصر ليس مستحيلاً، بل هو
أسهل من الفوز على الترجي بتونس وأسيك بساحل العاج...
[أقول أسهل وليس سهلا].

الدور دور الكبار، والمباريات صعبة صعبة؛ واللـي خايف
يــروّح!

الحمد لله الذي برد لنا صيفنا ورزقنا من حيث لا نحتسب
بالخمسات والستات من اللقطات ..
يا جماعة الكورة الاولي متين عشان نوثق
لهذه الفترة الخطيرة من تاريخ الكورة الهلاليه
الي المريخاب في كل مكان
جهز عدد سته شريط الفديو وجهز الفديو ذات نفسة
تاكد من سلامة التلفزيون وسلامة مفتاح ريكورد(RC) في جهاز الفديو
تاكد من سلامة الاريلات والدششه والوصلات من والي الدش -الرسيفر-الفديو-التلفزيون
فان الشهور القادمة من امتع الشهور!

خليك ذيب وسط الاسود و لا تكون نمر وسط النعاج

حبيبنا أحمد الريح :
أول شي مبروك النيو لوك في الكتابة بالخط الأرزق
تاني شي فعلاً كل ما ذكرته صحيح والمشكلة الأكبر تكمن في الجمهور يا ابوحميد ..
نفس الهلال اللي صنع التاريخ وتأهل للمجموعات يمكن أن يصير فريق منغوم ومغضوب عليه بسبب هزيمة واحدة ..
أعجبتني الطريقة التي تعامل بها مدرب الأهلي القاهري وهو يريح جميع لاعبيه بالفريق الأول في مباريات الدوري المصري الأكثر أهمية بعد أن حسم الدوري..
المدرب أراح اللاعبين في مباراة الزمالك وخسر بهدفين نظيفين ..
واراح اللاعبين في مباراة الإسماعيلي وخسر بهدف ..
وبالرغم من أننا نعلم أن مباراة الزمالك تعتبر بطولة بذاتها إلا أن المدرب فضل خسارتها والتفرغ لدوري الأبطال..
وكما نعلم بأن مباراة الإسماعيلي كانت مباراة ثأر لأنه الفريق الوحيد الذي هزم الأهلي دورياً هذا العام حينها ورغم ذلك لعب بالصف الثاني لإراحة اللاعبين ..
فهل كان مجلس الهلال وجمهور الهلال يتحمّل لو لعب الهلال ضد المريخ بنجوم الصف الثاني؟؟؟؟
وهل كنا لنتحمل أن يخسر الهلال من الموردة ونحن نلعب بنجوم الصف الثاني ؟؟؟
ياخ نحن المباراة التجريبية لو تعادلنا فيها تقوم الدنيا ولا تقعد !!!
ودي مشكلتنا ...
لكن يا ابو حميد لو نظرنا للموضوع من زاوية تانية فأنا عندي رأي مخالف كمان ..
فرصة الفوز أو التعادل مع الأهلي في مباراة الإفتتاحية واردة وممكنة وهي فرصة ممتازة أن يبدأ الهلال خارج أرضه والبداية تكون مع الأهلي..
فالبداية بكل تأكيد ليست كالنهائية والادوار المتقدمة ..
فالفرق تبدأ بصورة رتيبة في البداية لعدم التأقلم ولكنها تكتسب الحيوية والنشاط في الادوار المتقدمة ..
أن يستريح لاعبو الأهلي طيلة هذه الفترة ويغيب إحساسهم بالتنافس هي نقطة في مصلحة الهلال ولاعبيه الذين لايزالون يلعبون تحت الضغوط والجو التنافسي وهو ميزة على لاعبو الهلال الإستفادة منها كثيراً ..
والأهلي بكل صراحة ليس بالفريق المخيف وصدقوني هو كما الزمالك إن لم يكن الزمالك الأفضل ولكن الأهلي يستفيد هذه الأيام من عوامل نفسية لا أكثر..
الهلال تعود على اللعب في مصر ويمكن أن يستفيد من حذر الأهلي من اللعب ضد فريق فاز على الفرق المصرية كثيراً وأصبح يتعامل مع مباريات مصر دون ضغوط ..
كل التمنيات لهلال السودان بتحقيق إنتصارات مدوية وتحقيق التأهل للأدوار النهائية ..
وحتى لا ننسى إمكانياتنا الحقيقية فهذا لا يمنعنا من أن نضع إحتمالات الخسارة وفقدان التأهل في أول تجربة لنا في أدوار المجموعات مع فرق تأهلت لها أكثر من مرة ..

Quote: عندنا 9 نقاط إن شاء الله مضمونة وفي الجيب مع أي مباراة تقام في مقبرة طلعت فريد

جنس فصاحتكم دي المغطسه حجركم

نعم للهلال نعم للمريخ
معا نزرع الامل لنحصد الانتصارات

سودانا فوق

أن شاء الله تجيبو مريسة تامزين