الطيّب مدّثر ..

فنّان أنيق..
فنّان مهذب..
فنّان راقي..
فنّان صاحب حنجرة طروبة وصوت عذب يتخلخل في دواخلي وينساب كما الدماء في عروقي..
أرتاح لطلته عبر الشاشة أيما راحة ..
وأستمتع بصوته والأداء أيما إستمتاع ..
تلامس حركاته وجداني وإنفعالته تجبرني على الإندماج في بحور الأغنية ..
هو فنان من الزمن الجميل ينتقي كلماته والحانه بدقة ..
ويختار أغاني الغير بعناية فائقة ..
معجب به انا أيما إعجاب ..
وبالأمس إزدادت مساحاته في داخلي وهو يكرّم زعيم أمة الهلال الراحل الطيب عبد الله في حلقة عبر النيل الأزرق وهو يحكي فيها علاقته اللصيقة بالراحل الطيب عبد الله وصداقته للزعيم ..
وعندما تغني بأغنية الراحل العملاق العطبراوي " صابر عليك " قال إنها كانت الأغنية المفضلة التي يحب سماعها الراحل الطيب عبد الله بصوت الطيب مدثر..
بالأمس تغنّى بها الطيب مدثر كأحلى ما يكون بمصاحبة فرقته الموسيقية ولكن وللأسف لم أتمكن من تسجيلها ..
عموماً الشكر لراكوبة فقد تحصلت على تسجيل بالعود لهذه الأغنية من موقع سودانيز دوت نت وهنا التحية للقائمين بأمر هذا الموقع أيضاً ..

مخلوقة إنتي تعيشي فوق..وتكوني فوق..
تكوني فوق ما جمبنا ..
ما ست سماحة ..وست جمال ..
ما زيّ بناتنا وزيّنا ..
تعبانة ليه ما تسألي ..مجبور عليك اسأل انا ..


في أروع من كده يا جماعة .. ؟

Quote: [وأستمتع بصوته والأداء أيما إستمتاع.. ¿

وأنا أيضا

وانا برضو نمت أمبارح منتشي جدا
جدا
جدا

لكن خطر لي سؤال أثناء مقطع
مخلوقة إنتي تعيشي فوق..وتكوني فوق..
تكوني فوق ما جمبنا ..
ما ست سماحة ..وست جمال ..
ما زيّ بناتنا وزيّنا ..
تعبانة ليه ما تسألي ..مجبور عليك اسأل انا ..

إنو كلمة ما التحتها خط دي بمعني ( عكس ) أو بمعني ( شبه )
يعني المحبوبة مختلفة عن بناتنا ولا بتشبه بناتنا؟؟؟؟؟؟؟؟؟؟؟؟؟؟؟؟؟؟؟؟؟

أفيدوني يرحمكم الله

لأنو إشكالية المعني دي بتلاقيني طوالي فى الأغاني السودانية

مودتي
فضل كرار

Quote: " صابر عليك "

Quote: وأستمتع بصوته والأداء أيما إستمتاع ..

طيب ياخى مادام بتستمع بصوتو مش مفروض تسمعو اول بقول فى شنو؟!!!!

(صـــابر معــاك )

(صـــابر معاك )

ما عليك
!!!

الاخ عمر الفااروق...

لك التحية على هذا البوست الجميل
و انت تتحدث عن هذا الفنان صااحب
الصوت الشجى الطروب ...
فعلا فناان يجبرك للاستمااع اليه
لم يتعجل الشهرة بل فرض نفسه
بامكانياته الصوتية الكبيرة...
استمعت اليه فى عدة اعماال اخرى
لا يقل ادائه فيها عن اغنية العطبراوى
صاابر معااك...
اضااف لاغنية العزيزة الما بتسأل عن ظروفنا
نكهته الخااصة فى التطريب فخرجت منه كاحسن
ما يكون...
ايضا فى اغنية الرااحل رمضان زائد انا ليتنى
زهر اظهر مقدرة فاائقة فى التطريب العاالى
الذى ادى به هذه الاغنية...
و له ايضا الكثير من الاعمال الخااصة الجميلة جدا
و بالتحديد الاغنياات التى كتبها له الراحل حسن
الزبير...و لى عودة انشاء الله فى هذا الموضوع..

لك التحية اخ عمر الفااروق مرة اخرى وانت تجعلنا
نبدأ هذا اليوم مع الفنان صاحب الصوت الانيق..

كل مودتى...
و مرفق اغنية صاابر معااك بصوت الفنان الطيب
مدثر بالاوركسترا..




للحفظ

وليد طه يا حبيب:
يا زول والله فعلاً كلامك صاح !!
ياخ المعنى إتغير كلّو وبقا حاجة تانية مختلفة تماماً..
لكن بيني وبينك كده كل ما أتذكر مشاوير بندة والسوق بلقى إنو انا فعلاً قاصد
صابر عليك

الأخ عبد الله صديق:
شكراً ليك كتير على المرور وتسجيل الإعجاب بهذا الصوت الدافئ..

الأخ فضل كرار:

Quote: يعني المحبوبة مختلفة عن بناتنا ولا بتشبه بناتنا؟؟؟؟؟؟؟؟؟؟؟؟؟؟؟؟؟؟؟؟؟

انا أتوقع المقصود إنها ما بتشبه بناتنا ديل ..
طبعاً اي زول محبوبتو بيكون شايفها ما بتشبه البنات التانيات ديل ..
وفعلاً كتير من الأغاني السودانية الفنانين بيغلطوا في مخارجها فبيقوم يختلف المعنى تماااااماً والأمثلة كتيرة ..
شكراً ليك ياخ..

الأخ محمد عثمان :
شكراً كتير على الأغنية بي الأوركسترا بالرغم من إنها سريعة شوية بس اداء مميزر خالص..
وزي ما قلت الطيب مدثر لديه من الأعمال الخاصة ما ينافس به الفنانين الكبار من حيث الكلمات والالحان ..
وهاهو يقدم لوحة غنائية راقية من كلمات الراحل حسن الزبير والحنه أغنية (الصورة) التي أعتبرها واحدة من الأغاني التي تحمل لحناً شجياً وكلمات بسيطة مفعمة بالمعاني الكبيرة ..
والأصل مااااااااااا ببقا صورة ..

Quote: وليد طه يا حبيب: يا زول والله فعلاً كلامك صاح

والله لكن ياوليد زولك كمان قال بتاع فن وبتاع كورة

ياخى الطيب زى عافية حسن بتلصق فى الغناء..حارس التلفزيون 24 ساعة
وما قاعد يجدد...الزول من بلدياتى اهل عوض من جبل اولياء وقريب الهادى الجبل

لكن حيرنى الطيب عبد الله ..انا قيلو بتاع كروة ساى..لكن زولك طلع ادارى محنك
ورجل قدير له بصماته فى الوزارات...واجمل ما تضحكنى نكة عمك بريمة قبل انقاذ الجماعة ديل
وكان بجد فكاهة السهر...اما ناسك الضيفوف..غير تيسير والريح قاعدين كنب
ولا شغل الادارين زى كدا ما بعرف...
عموما الاغنية للعطبراوى..وسمعتها اول مرة من نصر الدين الفاضل من شباب الهند ومن اولاد الثورة...شاب مبدع مبدع مبدع..
ودى لك

يا فاروق

الطيب ده واحد من المطربين

لما اقول مطربين
يعنى هو من الفنانين الجد جد

ذوقك عال فعلا

بس عيبك الوحيد

إنك "مانيونايتدى"

ياخ بالله زول بحب الطيب مدثر

يقوم يحب "رونى"

دى كيف دى

طيب بالميت كده خليهو

ميسى

اها واقول ليك اشاعة سمحة

ك. رونالدو مش قال مدد

كضب، جايينا بى هناك

وكمان ت. هنرى برضو جاى الجنة

الطيب مدثر ذاتو نحن عايزين نسجله

هنااااااك فى كاتالونيا

Quote: هنااااااك فى كاتالونيا

با اللـــــــــــــــه...

حيرتنى يابو امنة

انت زول جامع كل الجمال ..

بشجيعك للبرسا...لكن لو شالو منها مسى وريو وايتو بتعقعد هورا

عشان كدا انا قاعد بشجع فى الثلاثة ديل...

لكن بحيرنى كاكا دا تشعر بيه مسكين ويتيم لكن لو لمى فى الكرة وهو فى خط 18

ببهدل الدفاع حتى لو كان حائط منيع

تحياتى

ابو قوته
كيفك يا زول يا ياقوته

طولنا منك ياخ ومن نضميك الأخضر

تعرف انا اقول ليك شى

نحن عملنا الطريقة "البرشلونية"

وكل يوم أحد عندنا حولية
شيخنا "لابورتا" تلقاهو لابس جبته باللون الأزرق الداكن والأحمر القانى

وأنا قاعد ادق النوبة
"زمان كنت بتاع بنقز فى المدرسة"

بعدين كيف يعنى الزول ما يكون من أتباع الطريقة البرشلونية دى

ما ممكن اصلا

انت بتشجع ليك تلاتة بس

انا من شدة ما متيم

البشجع البارسا انا بشجعه

سيبك من ناس عمر الفاروق ديل ما تشتغل بيهم

حبيبنا أبو ذر:
ياخ والله دخولك لي بوستاتنا ده غير الهوا ما بيجيب لينا شي!!!
لأنو الناس لمن تشوفك خشيت بوست لي عمر الفاروق يا قالوا عمر ده الليلة إتقطّع عديييييل كده يا كمان ابوذر ده بقا من ناس زعيط ومعيط

Quote: ك. رونالدو مش قال مدد

انت قاصد مدّد كرعينو يعني ؟
يا اخوي بعد ادانا الدوري ما مشكلة يجيكم عشان انتو كمان حبايبنا وعايزين ليكم ترجعو من جديد لي منصات التتويج الشي يا كافي البلا لا دوري لا كاس لا شامبينز !!!!!
ما وريتنا رايك في الصدارة المدريدية دي !!!!

بالمناسبة الطيب مدثر عامل حفلة لي السير فريجسون في بيتو بمناسبة الدوري ونجاح بت فريجسون في مرحلة الاساس بمدرسة شمال لندن..

ما تقول كده يا عمر

ياخى نحن بنسعد والله نكون فى حضرتك

إنت زول ذواق وخبير ببواطن السماحة والجمال

معليش نسيت ما باركت ليك "فك الحد"
الحمد لله ساى "الفطرتو" بعد ال "رمضان الطويل ده"

وعشان اوريك نحن ناس كرماء وطيبين كيف

ناس الود كرستيانو وغيرو كلهم من السنة الفاتت بعد ما شافو البهرجة والشغل النضيف العارفه داك
كلهم قالو عايزين يدخلو الجنة ديك

لكين جماعتنا قالو ليهم لا، استنو شويه وخلو ناس الفنايل الحمر ديل يردو نفسن شويه

لأنهم سمعو بى تحت تحت كده إنه "اليزابيث التانية" حلفت طلاق لى فيرجسون
إنه السنة دى ما تسوو ليكم شى فيهو فائدة إلا ناديكم ده نبيعه ليكم فى "صالة ثوذبى" بتاعة المزادات ديك

اها قلنا ليهم ياخى ساعدو الجماعة ديل وتعالو على راحتكن

يعنى الكاب نو ده طاير ولا طاير

اسمع رايك شنو

نفك ليكم "ترام" بى كم حبه كده

الايام دى نحن محتاجين "للفكه" العملات العندنا كلها كبيرة

وتقبل تحيات زمبروتا

اها قبل ما انسى

بالنسبة لتصدر ناس سانتياغو برنابيو

دى يا اخوى قالو اوامر عليا من صاحب الجلالة ملك اسبانيا

قال لى ناس برشلونة خلو الجماعة ديل يتفسحو السنة دى

قالو ليهو

سمعا وطاعة جلالتك

انت شكلك كده زول طيب وبتصدق اخبار الجرائد والتلفزيون

قال كانافارو قال

الطيب ود ام نعيم هذا صدبقى ياعمر
ساعود لاحدثك عن الطيب الانسان لا الطيب الفنان فتلك اعترف بها كل الناس
الطيب انسان من معدن لايصدأ
الطيب النبيل الوديع
عاشرت كثير من المشاهير ولكن لم اعرف فنان اكثر تواضعا من الطيب
عمر عائد انا هذا البوست ..ومهما يقول البعض ان شهادتى فى الطيب مجروحة
ساعود بعد ان وجدت من يزيح ترددى عن افتح بوست عن صديقى الطيب

شكرآ الفاروق الجميل كدا رجعت الفاروق البنعرفو ينثر الفرح أينما حط وحيثما كان بدوري وبعد أن سكرت طربآ من الصوت الشجي الطيب مدثر (وعلى فكرة ده رأيي في الزول الفنان ده من زمان_يعني انت لسه شافع)بدوري أهدي الأغنية للأخ السماني وصديقه اللدودهشام شيخ الدين ومن يازول يازول الي أساسي القبل الكراسي كما يقول الفاروق وشكرآ مجددآ عمرالفاروق.

يا ابقوتة إنت بي جدك!!!

Quote: لكن حيرنى الطيب عبد الله ..انا قيلو بتاع كروة ساى..لكن زولك طلع ادارى محنك

الزول ده لمن قرا جامعة ما كان إسمها جامعة ولمن نضم إنجليزي أظنو اليزا بيث زاتا ما كانت بتعرف تتكلم !!!
ده البابا والزعيم ياخ !!
بس مشكلتو كان زول بعيد من الأضواء والإعلام ..
الحلقة يا ابقوتة كان ممكن تكون اجمل من كده لو زمنها كان أطول والإستعداد ليها كان أفضل..
لكن ما وريتنا رايك في المشجع الهلالي بريمة وهو بيقول انا اتغديت مع نميري..

اخوي وعمي وصديقي صديق الموج والله بقيت ليك زي محمد عادل مع مبارك الفاضل)

Quote: ساعود لاحدثك عن الطيب الانسان لا الطيب الفنان فتلك اعترف بها كل الناس الطيب انسان من معدن لايصدأ الطيب النبيل الوديع عاشرت كثير من المشاهير ولكن لم اعرف فنان اكثر تواضعا من الطيب عمر عائد انا هذا البوست ..ومهما يقول البعض ان شهادتى فى الطيب مجروحة ساعود بعد ان وجدت من يزيح ترددى عن افتح بوست عن صديقى الطيب

انت يا موج حركتك البايخة دي ما حاتخليها ؟؟؟
أسة تقوم تزوغ وتلبد وتشحتفنا زي ما شحتفتني زمان في بوست عن الحقيبة وشبكتني جاييك يا عمر وحا أحكي ليك وحا أقول ليك ومن ديك وعييييييك ..
اها يا موج البوست ده عليييييييك الله كان ما جيت حكيت فيهو عن الطيب مدثر وبي التفصيل الممل ..
امانة فييييييييي ذمتك يا موج ما تزوغ ..
وعليك علي كل يوم أعمل ليك (مس كول) أذكرك

بس أوعا تجي تقول لي الطيب مدثر عمل عملية الراحل العميري في الحرم وقال (أجي!!!)

عمنا الخلوق الرفاعي (مش شبكتني لمن كنت انت شافع اها خم وصر)

تحياتنا ليك وللأسرة من خلالك والإهداء ده بدل تديهو لي ناس يا زول كان الأةلى يمشي النيل في الجهة الغربية ومن شندي وانت طالع والبنطون وانت ماش ..

ولا شنو ؟

ونحن في المرحلة الثانوية كان إعجابي بالفنان الأستاذ عثمان حسين قد قارب من مرحلة الهوس . شراء للأشرطة ، حفظ للأغنيات ومعرفة شعرائها ومتى تغنى الأستاذ بها لأول مرة . تضايقت الوالدة الحبيبة يوماً ( أو ربما تملكتها غيرة ) من هذا الحب الجنوني . فيوماً وأنا مندمج مع أبو عفان قفلت المسجل وخاطبتني
" هسع عليك الله غير الراجل المخرف دا ما لقيت ليك فنان تدوشنا بيهو ؟؟ "
فرددت عليها
" دي جديدة يا حاجة . بس في ذمتك غناهو ما عاجبك ؟؟؟ "
فردت على طول
" يا ولدي الذمة حااارة ، لكين الأولاد القدرك ياهو مبارين ناس زيدان وأبوعركي "
ففهمنا الطرفة في إطارها .
مرت السنين
وجدتها يوماً ( متلبسة ) بانسجام عجيب مع الفنان الطيب مدثر وكان في سهرة تلفزيونية فكانت فرصتي
" أها يا حاجة أنا عرفت أنو ( المخرف ) عثمان حسين ما من جيلي ، هسع دحين إنتي الولد دا من جيلك ؟؟
فردت وعلى الفور
" والله ياولدي مع غناهو السمح التقول بغنيهو لى روحوا دا ، عاجباني ( غرودة ) عيونو دي "

الفاروق عمر

سلام وتحية ومحبة

Quote: فنّان أنيق.. فنّان مهذب.. فنّان راقي.. فنّان صاحب حنجرة طروبة وصوت عذب يتخلخل في دواخلي وينساب كما الدماء في عروقي.. أرتاح لطلته عبر الشاشة أيما راحة .. وأستمتع بصوته والأداء أيما إستمتاع .. تلامس حركاته وجداني وإنفعالته تجبرني على الإندماج في بحور الأغنية .. هو فنان من الزمن الجميل ينتقي كلماته والحانه بدقة .. ويختار أغاني الغير بعناية فائقة .. معجب به انا أيما إعجاب ..

الفاضل الفاروق... هذا الفنان المرهف المبدع يصعب أن تخطئه الأذن إلا إذا كان بها صمم.. والمريخ كعادته ينجب الأفذاذ.. التحية والتقدير للطيب مدثر..
وخالص الود.

يا عمر يا فاروق ايها الجميل مالك علينا مهيج الاشجان ؟
احب العطبراوى جدا ،
كنت متوقعاك تخلينا نسمع واحدة من اغنيات الفنان الطيب
لانى بالجد ما سمعت الفنان دا من قبل،
امكن ظهر فى سنوات الغياب حقتى
المهم انه صوتو جميل
رغم انه الاغنية حزينة ،
لكن اداؤه جميل، حقا جميل ،
لانه الاغنية تتيح للصوت ان يتمادى فى التطريب
ولان العطبراوى فنان مطرب عالى التطريب
له الرحمة وللفنان الطيب مزيدا من النجاحات
وشكرا لك هذا الالق (الصباحى )
(0فارق التوقيت)

عمر الفاروق
سلام يا زول يا راقى
عن اذنك ارد على سلمى الشيخ
سلمى انت بى جدك الطيب مدثر غنى فى مهرجان الثقافة الثالث ( ليلة الواعدين)
فى تلك اليله على سبيل المثال غنى / مصطفى سيد احمد , الخالدى ,عثمان الاطرش
الامين عبد الغفار ومجموعة كبيرة من الفنانين.
غربتك طالت يا سلمى بالله من الزمن داك انت فى امريكا يديك العافية ويرجعك لينا بالسلامه.

احمـــد خضـــر

الطيب صوت أكثر من رائع...

حضرت بعض جلساته مع الزعيم...له الرحمة والمغفرة

Quote: انت يا موج حركتك البايخة دي ما حاتخليها ؟؟؟ أسة تقوم تزوغ وتلبد وتشحتفنا زي ما شحتفتني زمان في بوست عن الحقيبة وشبكتني جاييك يا عمر وحا أحكي ليك وحا أقول ليك ومن ديك وعييييييك .. اها يا موج البوست ده عليييييييك الله كان ما جيت حكيت فيهو عن الطيب مدثر وبي التفصيل الممل .. امانة فييييييييي ذمتك يا موج ما تزوغ .. وعليك علي كل يوم أعمل ليك (مس كول) أذكرك

عمر الغالى وحاتك كان ما كلامك ده ومكالمة تلقيتها من اخونا
الطيب وكلفنى ان اشكرك شخصيا وكل المتداخلين كنت حاازوغ زوغة ..
ولا سبب غير المشغوليات...
اول شىء الطيب ده زول ود قبائل من جبل اولياء وهو يفخر بذلك
كثيرا ويقول ليك انا الطيب ود مدثر ود محى الدين اهلى من الجبل
كله كان قلت (عسال) اهلى ..(المسرة )اهلى..(قبل جاى) اهلى.. ويدين بالفضل
لفنانه من جبل اولياء توفيت الى رحمة الله فى العام 2004 اسمها الحاجة بت حسين
و هى من ديم البساطاب كان لهذه المرأة فضل كبير على الغناء بالمنطقة
وعليه شخصيا...وايضا يثنى على فنان عموم جبل اولياء الفنان النعيم نور الدائم
ولكن من وضعه على عتبات الفن هو استاذه فى المدرسة الابتدائية الفنان
وعازف الكمنجة المشهور الاستاذ مبارك سعد موسى...ايضا كثير ممن اخذوا بيده
وهم الاستاذ برعى محمد دفع الله الاستاذ على ميرغنى الراحل ابوداؤد عليهم الرحمة
والاستاذ يوسف حسن الصديق....والطيب انسان وفى لاصدقائه.
الطيب بدا بقصر الشباب والاطفال ولكن لم يكن يغنى بل كان عازف ساكسفون مقتدر.
وانتقل بعدها لمركز شباب امدرمان ومثل المركز فى مهرجان الثقافة الثالث كمغنى
تغنى للعديد من الشعراء و للطيب اعمال فنية كثيرة جلها للمرحوم حسن الزبير
اذ له عشرة اعمال من شعره .
ايضا من الاشياء المهمة والتى لابد من ذكرها ان نقول ان اغنية السيرة المشهورة
(يمه الخير بريدو) والتى يرددها الاستاذ الطيب هى اغنية تراثية من المنطقة
ولكن عولجت بواسطة الاستاذ يوسف حمد وقد ادخل عليها بعض الابيات وهو
والد الاستاذاحمد يوسف صاحب شركة حصاد للانتاج الفنى.
موعدون انتم فى خلال الايام القادمة بحلقه مع الاستاذ الطيب مدثر فى برنامج ليالى النغم..

جدير بالذكر ان نشير الى ان الاستاذ الطيب تخرج من معهد الكليات التكنولوجية
(جامعة السودان حاليا) شعبة المحاسبة،،،
عمر اها نزل الشغل الفنى انت....

عمر كلفنى الاخ الطيب ان انقل لكم عميق شكره على هذا البوست التوثيقى ايضا
يشكر صاحب وامين الموقع الاستاذ بكرى ابوبكر وهو مستعد للتعاون مع بورداب العالم
اين ماكانو.....
التحية لك اخى الفاروق على هذا الجهد المقدر والاحتفاء بالمبدعين والطيب
واحد من الذين يحملون هم فن الغناء فى السودان،،،

هو زول غناي و أنيق فعلاً لكن مشكلتو زيك يا عمر ..



هلالابي ..





الله يشفيكم ..

أستاذي العزيز عاطف عمر:
ياخ مش في ناس الزول بيريدهم ساي بلا شغلة ؟
أها الله يعلم انت واحد منهم ..
من يوم ما كنت بتونس مع شاكر جيتار وجات سيرتك في الكلام وما حكاه شاكر عنك وانا زي البعرفك لي سنة ضوئية كده ..
غايتو الليلة إنت وابوذر دخلتو البوست ده فأكدتو لي إنو الطيب مدثر فنان راقي ما بيسمعوهو إلا الراقين ..

Quote: والله ياولدي مع غناهو السمح التقول بغنيهو لى روحوا دا ، عاجباني ( غرودة ) عيونو دي "

تعرف يا عاطف تعبير والدتك ده انا كنت بحاول أكتبو في بداية البوست وغلبني أكتبو عشان ما قدرت أعبر عليهو ..
بالجد ده تعبير عجييييييييب وعمييييييييق انا العامل فيها قريت جامعة ده قاعد لي ساعة كاملة عشان أكتبو ولمن غلبني خليتو ..
يا سلااااااااااااام ياخ ده وصف عجيب بالجد ..

الأخ محمد الأمين موسى:
تحياتي..

Quote: والمريخ كعادته ينجب الأفذاذ..

عاد ده كلام ده ..
امبارح الطيب قاعد في حضرة روح زعيم الهلال الطيب عبد الله وطلع صديقة الشخصي وتجي تقول لي مريخابي..
لكن بيني وبينك انا امبارح كلامو ما ريحني المزيع قدر ما يقول ليهو الهلال والكورة يكش ويقول ليهو والله انا هلالابي من بعيد لي بعيد كده ..
الزول ده يكون إرتدّ ؟

الأستاذة سلمى الشيخ سلامة :
بالجد بتديني إحساس بالزمن الجميل حق منتصف الثمانينات داك الناس المتصالحة مع نفسها ديك واللي كانت جنها حب ديك
تلاقي الواحد منكم عندو أغنية واااااااحدة وفنان واااااااحد بيحبو وبتكون الأغنية دي بالجد بتعني ليهو حاجة ومتى ما يسمعها يا سرح يا بكى يا جاهو الألم الممتع داك !!!
الحاجة دي جيلنا أسة إفتقدها الواحد مننا عايز ينطط ويجبجب والنبق النبق وجب جب جب ..
زمنكم كان سمح يا سلمى عشان كده سمعكم كان سمح وذوقكم كان اسمح ..
الطيب مدثر واحد من فناني الزمن الجميل وربما يكون هو اخر العنقود الفني وبعده جاءت الموجة إياها وتقلبت الأذواق واختلفت الأمزجة وصار الناس يختلفون على الفنان ..
الطيب مدثر من الفنانين الذين لا يمكن ان تختلف على عذوبة صوتهم وروعة الاداء فيهم ..
هو فنان ما ان تسمعه إلا وتردد :
" ياااااااه الزول ده غنّاي عدييييييييل كده " ..
وأتمنى أن تتابعي التلفزيون وكما بشرنا صديق الموج بسهرة سحر النغم والتي تبث كل خميس كسهرة في تلفزيون السودان فما عليك إلا ان تلبدي للتلفزيون كل خميس وتنتظري لتستمتعي لهذا الفنان وتتذوقي حلاوة الفن وطلاوة الصوت وقبل كل ذلك جمال المظهر والهندام ..

الطيب فنان حرمتنا الغربة منه لفترة ولكنه عاد والحبيب مهما طال غيابو لابد يرجع لي أهلو وصحابو.. ولكن ماذا نفعل للعصافير التي هاجرت في موسم الشوق الحلو ؟؟

Quote: كنت متوقعاك تخلينا نسمع واحدة من اغنيات الفنان الطيب

<أضغط زر التشغيل للإستماع

(**إيقاف تشغيل الأغنية الأولى)

ده واحدة من الأغاني الجميلة بهديها ليك إسمها زعل الدهب وهي من الأعمال الما مسموعة للفنان الراقي الطيب مدثر
أها أدينا رأيك يا دهب بسمن غير زعل..

Quote: تلاقي الواحد منكم عندو أغنية واااااااحدة وفنان واااااااحد بيحبو وبتكون الأغنية دي بالجد بتعني ليهو حاجة ومتى ما يسمعها يا سرح يا بكى يا جاهو الألم الممتع داك !!!

و الله يا عمر كلامك صحي ..

ياخي أنا هسع عندي أغنية كدة كان دايرني أبكي ليك بكاء السنين بس شغلها لي .. لكن ما حا أوريك ليها ..

و أغنية زي ( حاجة فيك ) لما أسمعا بتخليني زي شنو كدا أنا ذاتي ما عارف لكن زي التقول عندي جوانح و مستمخ جوة حناني دا ..

عمر الفاروق
تحياتي ...
تعرف ياعمر الفاروق في العام 1986م تعرضت لإصابة ..(عارف التاريخ حا يجيب لي الهواء ، ما عايز أي أسئلة إنصرافية )
أجلستني هذه الإصابة في البيت أكثر من شهر ..!!
تصدق كان رفيقي الطيب مدثر ...؟؟ في أول شريط له ..
ورغم رداءة تسجيل ذلك الزمن ( الشريط مهكر بواسطة هواة وليس تسجيل لشركة )
كان الوالد يسألني بإستهجان ده منو الـ .... البتسمع فيهو ده ..؟؟
وكانت أغنية العطبراوي منذ ذلك التاريخ لها نكهة خاصة عند الطيب ...
ومنذ ذلك التاريخ أستمع لهذا الطيب بكل وجداني ..
لعمق الصوت والهدوء الذي يملكه ...
لك التحية أخي عمر فقد أرحتني هنــــــــا
(رمي طعمية وكدة يعني ...........)

(وأتمنى أن تتابعي التلفزيون وكما بشرنا صديق الموج بسهرة سحر النغم والتي تبث كل خميس كسهرة في تلفزيون السودان فما عليك إلا ان تلبدي للتلفزيون كل خميس وتنتظري لتستمتعي لهذا الفنان وتتذوقي حلاوة الفن وطلاوة الصوت وقبل كل ذلك جمال المظهر والهندام ..)
انت بى صحك؟
التلفزيون ياتو يا خوى ؟
يا ريت ،
تتصور انى من زمان فى خصام مع التلفزيون؟
نحنا ناس اذاعة
ومعليش واكرر اسفى انى ما سمعت بالفنان دا امكن لانه بغنى فى التلفزيون
وتانى حاجة تلفزيون السودان دا عشان تشترك فيهو (عييييييييييك ) تكاليف ،
تقول تشوفو ولا ترسل لى اهلك ؟

ألأخ/الفاروق

لك التحية


والله إبداع

وشكرآ ليك ياظريف


إسماعيل محمد أحمد عباس..................أم درمان.

سلامات ياعمـر

(العزيزة) ياعمـر لما يغنيهـا الطيب طوالي بتشعر بأنك طيب والله راضي
عليك (العزيزة) يا فاروق لما تسمعا منو الناس كلهم ببقو عزاز عليك
ياخي كمية كدا من التطريب, وبتدفق..اي والله بتدفق وببقى رقراق كمان
فلو عندكم اللوحة التطريبية دي اجدعونا بيها واكون عنكم من الراضـين.

اقول قولي هـذا واشهـد انك لمن السمعين ياعمـر (بضم العين والراء)

ودي.

Quote: لكن بيني وبينك انا امبارح كلامو ما ريحني المزيع قدر ما يقول ليهو الهلال والكورة يكش ويقول ليهو والله انا هلالابي من بعيد لي بعيد كده .. الزول ده يكون إرتدّ ؟

تعرف يا ابن الفاروق.. أنا خايف لو بحثنا ربما نجد إنك أنت كذلك مريخابي ولكن بتمارس ما يسمى بالكاميرا الخفية!

.

شكرا اخ عمر الفاروق الفنان الطيب مدثر من الفنانيين القلائل يمتلك حنجره فيها

تطريب تتذوقه من اول وهله..وهو من الفنانيين المجتهديين اصقل موهبته بسرعه وصعد

وتبوأ مكانه في الهرم الفني وملك قلوب الكثيريين بفنه وعطائه ...

التقينا بقصر الشباب والاطفال عام 1979 وكنا في بداياتنا ولكنه كان متقدما باعماله

الخاصه ..وكان معنا الفنان عادل التجاني وتغنينا مع مجموعة قصر الشباب والاطفال

وكنا صغار لكن نكبرهم . والتحق الطيب بمركز شباب السجانه

والتحقت بعده ثم تحول لنادي الخرطوم جنوب مع مجموعة كبيره من الفنانيين منهم جلال الصحافه

عثمان الاطرش ايوب عبدالرحيم مكي البغدادي واخرين اثر خلاف مع ادارة المركز..

ثم دخلنا مدرسة المقرن الثانويه العليا سويا ومنها تقدم الطيب في ليلة الواعدين

كما ذكر مع الفنانيين عثمان الاطرش الخالدي وعزالدين مزمل وعزالدين عبدالماجد والامين عبد الغفار

واخرين وكان هو اصغرهم سنا وشارك باغنية ياملهم الفن والشعر انا قلبي من حساك شعر

رائعة الفاتح محمد عظيم وتلاها بـ يلا قوقن ياقماري للفاتح عظيم ثم حسن الزبير (رحمه الله)

ثم صعد سلم الشهره ...انه صديق من الزمن الجميل ولكن طالت اللقيا لخروجي من السودان

قبل 15 عاما ولكني متواصل في ترديد اغانيه ومشاهدته مرات في الفضائيه السودانيه..

كما ذكر بعض الاخوان فهو رجل بحق طيب المعشر فهو ابن الجبل (اللديه) والجبل

مزدهره بالمبدعين خضر.. عبدالهادي حامد (ودالجبل) وعوض الشادي بكري مكاوي عماد علي

الفاتح عظيم والاستاذ خليفه ساكس ...

الاخ عمر الفاروق بوستك خلاني احفر في الذاكره الخربه غايتو تمرين ما بطال

سلم لي علي الاخ الطيب مدثر واسرته الكريمه وكدي اشوف ذاكرته...

لك وللطيب محبتي وودادي ...

الاخ عمر الفاروق تحياتي

ياريت اسمع اغنيه الزوهور صاحيه وانت نايم

بصوت الفنان الطيب مدثر

لك حبي وودادي

Quote: فنّان صاحب حنجرة طروبة وصوت عذب يتخلخل في دواخلي وينساب كما الدماء في عروقي..

الراقي عمر الفاروق
سلام
اي والله الطيب مدثر من الأصوات المتفردة وعندما تغنى بأغاني غيره ابدع فيها واعطاها حقها كامل
دون نقص

قلبت علينا المواجع

السمحة يا ست البنات
يا ست عقابنا وكُلنا

مخلوقة إنتِ تعيش فوق
وتكوني فوق ما جنبنّا

لك التحية والمودة لطرق باب لفنان جُهل في زحمة الفوضى الغنائية

خالد محجوب

يا سلااااااااام يافارووووق
تعرف أنا بافتش لى صابر معاك دى من
سنة كم وتسعين والله...
ياخى..إنت ريحتنى فى وجدانى زاااتو
مش حنانى بس !! شكرا ليك ياخ.