ادريس ابراهيم عاد وعاد معه صوته الجميل

بعد غيبة طويلة عاد الفنان صاحب الصوت المتفرد ادريس ابراهيم... بعد ما طاب له المقام فى الوطن بعد غربة طالت ..
وبالامس رايت له حلقة توثيقية فيما يبدو يريد منها تسجيل اعماله فى التلفزيون هكذا جاءنى هذا الاحساس وكان معه الشاعر محمد العبيد شاعر عثمان اليمنى المعروف ..
الحلقة قدمها الزميل محمد جمال بحضور ممتاز وان كان فاتت عليه تكرار احدى الاغنيات وربما مرد ذلك ان اخونا محمد جمال اندل البلد متاخر بعد الكبر يعنى ما عاش فى تلك البيئة الجميلة ما حش قش ولا مسك الموية وما شافلو ساقى ولم يفتل حبل اشميق ..
عشان كدة كان كلامه كلام مدن عن تلك البيئة التى ينتمى اليها بحكم الجذور لكن على العموم كانت حلقة جيدة ومطلوبة ..
لكننى احسست بيد عثمان اليمنى داخلة فى الاختيار التوقيت واختيار الشاعر والفنان ومقدم الحلقة ..
اقول ذلك لاننى سمعت بان مجموعة اليمنى عادت اكثر قوة لنادى الطمبور بعد غربة طالت وجماعة ود الرواسى وصديق راحت شمار فى مرقة بعد مرض الفنان القدير صديق احمد ..
لابد لى من شرح قليل لهذه الكلمات التى ذكرتها ..
فى مرحلة ما انشق نادى الطمبور بعد وقوف اخونا اليمنى وتغنيه باغانى الجهاد اتهمته مجموعة من اعضاء النادى بتسيس الغناء والفن فى فترة شحن وتحديات للجميع تجاوزها الوطن الان الى حد كبير ..
اعود للحلقة لاتحدث بصراحة عن اغنية القمر بوبا التى قالوا عنها فى الحلقة انها مجهولة المصدر وهذا راى ادريس ولكن ود العبيد قال انها تشبه اغانى المحس .. ولكن ما هى الحقيقة ..
دائما عدم معرفة جغرافية الاقليم الشمالى من كثير من السودانيين يتسبب فى كثير الاغفال لمناطق واشخاص لهم دور مقدر سجله لهم التاريخ ..
هل سمعتم بود صليليح اول فنان تغنى بالطمبور وبهذه الطريقة التى تغنى بها النعام وغيره من الفنانيين الجدد وهو فنان الله هوى ليلي انا الله الليل ليلى انا وشاعر القمر بوبا وكان فنانا قديرا فى المنطقة التى تقع ما بين دنقلا الحالية ومنطقة العفاض وكان بالمراكب يصل الى منطقة الشايقية ويغنى بهذه الطريقة المتعشارفة اليوم وكان غناء الشايقية يختلف تماما عن تلك الطريقة وكان النحاس والدليب بطريقة بلاص هى السائدة فى منطقة الشايقية اما البديرية فكان ود صليليح هو رائدهم ومنه انطلق النعام وبقية الذين اتوا بعده ...والقصة طويلى وبواصل بس ارجونى

الاخ الكيك
تحية وود..

""القمر بوبا" أشهر قلادة عند النوبيين: ذهبية ثقيلة، تتدلى من أعناق النساء على الصدر. كل صبية تتطلع شوقا وتسأل الأيام فى لهفة: متى أنمو فتاة محددة التضاريس، فتعطينى أمى قلادة "القمر بوبا" أحس بثقلها على صدرى. أنزل حلبة الرقص، وأرقص مشاركة فى كل الرقصات فتتواثب الحلية الثقيلة على صدرى. تشاغبه وتقلبه، أزداد نشوة ولهفة فأعطى الفن الراقص الناطق"
من إحدى قصص الكاتب النوبى حجاج حسن أدول

ولقد كنت اعتقد ان شاعر القمر بوبا هو اسماعيل حسن وهاهو نص القصيدة البديعة

القمر بوبا/

الصغيرة شجيرة الأراك
ياقمر عشرة الفي سماك
شاغلة روحي وقلبي المعاك
وين لقيتك لامن آباك
القمر بوبا عليك تقيل

العيون الما بدمعن
نامن أو صاحيات يبرقن
لا بصيدن لا بعشقن
سرهن في الجوف يحرقن
كشفن رموشن أو غمضن
كلو موت ماتقول برحمن
القمر بوبا عليك تقيل

الصغيرون الما كبير
الرقيبة قزازة عصير
السنون براقن يشيل
العيون متل الفناجيل
مابتحش قش التناقير
مابتشيل جردل على البير
الزراق فوقا تقول حرير
شتتي الشبال يام ضمير
خلي قلوب الصبيان تطير
انتي ريحتك دمور فرير
ولا بت السودان اصيل
القمر بوبا عليك تقيل

الجزيرى ام بحرا حما
فيك روحي وحبي النما
مابسيبا ان بقا في السما
ما بخلي الناس تظلما
روحي في دربك سايما
يا غرق يا جيت حازما
القمر بوبا عليك تقيل

القديما قديم الحمام
الوزيزين في موجو عام
ياما رايقة قليلة الكلام
وا حلاتا تقول السلام
القمر بوبا عليك تقيل

الغزال الفوق في السلم
المحبة تزيد الألم
كل يوم اصبح لي في هم
سيسبان عودك منظم
شمعدان نفسك يام ختم
البرتكان نهدك مدردم
القمر بوبا عليك تقيل

الصغيرونة ام الجنا
ياكريم ربي تسلما
تبعد الشر من حلتا
جنة للأم الولدتا
الفي جبل عرفات وضعتا
تسلم البطن الجابتا
دي ترباية حبوبتا
التميرة الفي سبيطتا
الصفار صابغ خضرتا
ومعذورة امها كان دستا
وا هلاكي الناس شافتا
معذباني ... ود حلتا
القمر بوبا عليك تقيل

الدفيفيق الدابو ني
البسيمتو بتكويني كي
اهلو ضنو عليها وعلي
حبها النساني والدي
ما بخليك ان بقيت حي
يا قصيبة السكر الني
نهدك الما رضع جني
ووب على امك ووبين علي
القمر بوبا عليك تقيل

الديوان الديمة مقشوش
بالزهور والورد معروش
بالحرير الأصلي مفروش
ريحتو مايقوما بلا رتوش
كان دا وصفو ماهو مغشوش
قدروا الساكنينو في الحوش
القمر بوبا عليك تقيل

بحر الدميرى العبّا ونزل
مرة يسقي الفل والنخل
فيهو عام وزينا وقدل
ياحنينة البيك عقلي انشغل
بعت روحي عشان ليك اصل
وانت ابعد لي من زحل
يا قمر بوبا عليك تقيل

المبارك شيخ الظهر
العليك ساسقت وفتر
قلي جنيت ولا دستر
واي أنا المرضان مكنتر
جابو لي حكيم خير وشر
قالي يا زول مرضك كتر
سببك ام شلاخا خضر
القمر بوبا عليك تقيل
__
لقد نقلت القصيدة من الانترنيت. عدلت بعض اخطائها اللغوية والطباعية قدر قدرتى. لو فيها حاجة دايرة تصحيح ارجو التنبيه الى ذلك.

Quote: الصغيرون الما كبير الرقيبة قزازة عصير السنون براقن يشين العيون متل الفناجين مابتحش قشة تناقير مابتشيل جردل على الزير الزراق فوقا تقول حرير شتتي الشبال يام ضمير خلي قلوب الصبيان تطير انتي ريحتك دمور فرير ولا بت السودان اصيل القمر بوبا عليك تقيل

الصغيرون الما كبير
الرقيبة قزازة عصير
السنون براقن يشيل
العيون متل الفناجيل
مابتحش قش التناقير
مابتشيل جردل على البير
الزراق فوقا تقول حرير
شتتي الشبال يام ضمير
خلي قلوب الصبيان تطير
انتي ريحتك دمور فرير
ولا بت السودان اصيل
القمر بوبا عليك تقيل
والله أعلم
شكرا عادل لتذكيرنا بهذا الجمال
جنى

شكرآ لعبد الوهاب همت وجنى على تكرمهما بتصحيح بعض ابيات "القمر بوبا". ولا اكتمكم سرآ إذا قلت انا كنت قايل القمر بوبا سفنجة بلاستيك! قبل ان اعرف انها قلادة من الذهب الخالص تزين صدور البنات النوبيات الجميلات مثل البنات النوبيات.

فتاة نوبية

Quote: شكرآ لعبد الوهاب همت وجنى على تكرمهما بتصحيح بعض ابيات "القمر بوبا". ولا اكتمكم سرآ إذا قلت انا كنت قايل القمر بوبا سفنجة بلاستيك! قبل ان اعرف انها قلادة من الذهب الخالص تزين صدور البنات النوبيات الجميلات مثل البنات النوبيات.

على حسب علمى إن القمر بوبا هلال ذهب يعرف بالعكش ويعلق فى الإذنين وليس قلادة
والله أعلم
فى السودان قبل فترة طويلة كانت هنالك سفنجة حمراء متينة تسمى القمر بوبا وهى تسمية غير موفقة

جنى

إنتى ريحتك دمور فرير.. ولا بت السودان أصيل..