Post: #1
Title: هذا البوست برعاية التركينج ... ( خارج و داخل نطاق ANDANDI و OONIGOO )
Author: ابو جهينة
Date: 03-17-2008, 01:18 PM
Parent: #0
يقال أن طيب الذكر ( سيد أحمد الحواتي ) ... كان يغني و هو غاطس في جوف النيل في عز شهر ( طوبة ) و ( كيهك ) بينما الناس يلتحفون ( الفرو ) المصنوع من جلود الخراف و يصطلون بالنار من زمهرير الشتاء ...
و عندما سألتُ جدتي ( فاطنة خليل كُبُشُو ) الصواردابية عن سر سطوة هذا السماكي قالت بصوت هامس :
In KORED KOLLO FEJIRRO TOO SOODIL ANGISSIN ZAIT KOBBAYAWAIKKA SOKKA NI
ترجمة فورية : هذا العملاق بيشرب على الريق كل صباح كباية زيت سمك.
و عندما حاولت التحقق أكثر .. عرفتُ أن أمثاله كُثُر ...
منهم ذاك الذي تعرف القرية كلها ما دار ليلة الأمس بينها و بين زوجها في المخدع .. حيث تجلس ظهيرة اليوم كله و هي تربط رأسها ( بالطرحة البناتي ) و هي تنظر ساهمة نحو غابات النخيل و من بين فرجاتها إلى النهر الجاري شمالاً ..
و أيضاً ( عبد الفتاح ) طيب الذكر الذي كان يحمل ( جوال البلح القصاري ) بيد واحدة بأن يخمش الشوال من منتصفه كما يخمش ربطة برسيم و يرميه في اللوري ...
أو طيب الذكر ( عبد المجيد عبيدي ) من نواحي قرية ( تبج ) الذي كان يسحب الفلوكة خارج النهر كما يسحب خروف الأضحى خلفه .. و يقال أنه سأل بعض السابلة عن من هو أقوى منه في القرى و الأمصار ( في منطقة السكوت ) ..
فقالوا له : ( صالح مومو MOOMOO) .. إيدو طرشا .. حاسب منو ..
فأنطلق لا يلوي على شيء حتى أتى قرية ( نلوة ) بالضفة الغربية للنهر .. و أستلف ( فلوكة ) من ( صواردة ) و قطع النهر في سرعة قياسية ..
و هناك بالضفة الغربية سأل عن ( صالح مومو ) .. فدلوه عليه و هم ينظرون إليه بعين الشك و الريبة ..
و أنطلق حيث الرجل .. فوجده جالساً مستنداً إلى جذع نخلة ... لو هزها لتساقطت السعفات و العنباج و أعشاش الطيور.
وجده يغزل من سعف النخيل ( برشاً ) ...
فسأله : إنت ( صالح مومو ) ...
قال الرجل بهدوء : نعم
فعاجله عبد المجيد بضربة من ( بصطونة ) في يده ... فإنقسمتْ البصطونة إلى نصفين طولياً حتى مقبضها .. و صالح لم يطرف له عين ..
ثم إنحنى الرجل .. و أمسك بتلابيب عبد المجيد و ناوله صفعة بيده اليسرى كما ضربة الليث الذي قابل ( بشار بن برد ) الجاهلي ..
يقول عبد المجيد .. أنه سمع صدى طرقعة ( جضومه ) تتردد ... ثم رأى أشياء لامعة أمامه ظنها نجوماً في عز الظهر .. ثم دخل في غيبوبة ..
عندما استفاق .. وجد الرجل جالساً يواصل عمله .. و قال له الرجل :
ILAHI IRON KOAGINGELMAINA
INNATOAN DAF
ترجمة فورية : يا مقطوع الطاري .. غور من هنا
و عاد عبد المجيد و هو مقتنع تماماً بأن ( حوا والدة ) ....
عبد المجيد نفسه .. هو الذي قام بشنْق ( العِجِل ) على الشجرة لخلاف نشب على ملكيته .. قام بربطه من رقبته و رمى بالحبل من على غصن شجرة ضخمة .. و رفع العجل حتى لفظ أنفاسه ...
كل هؤلاء ... فُطِموا على التركينج ... و جبلوا على أكله ليل نهار ...
نعود للتركينج ... و إلى السمك
فهذه الأكلة رغم أنها اختراع نوبي بحْت ... إلا أنه و ككل الأكلات اللايوقة السودانية قد عمَّ القرى و الحضر.
زوجتي المصرية ( رحمها الله ) .. تذوقتْه ذات عشاء عند صديقي الدنقلاوي ... فعشقتْه من أول لقمة .. و قالت : الله .. دة من عائلة الفسيخ و البطارخ ...
ثم أهدتْها زوجة صديقي الدنقلاوي بعد عودتها من الإجازة الصيفية ، أهدتْها ( برطمانية مليئة بالسائل ذو اللون الفيراني المدعو تركينج ) ... و قامت بشرح عملية إعداد هذه الأكلة التي تجعل آكلها مدمناً لها من أول لقمة ...
مساء الأربعاء ذهبنا و اشترينا الدقيق اللازم ... و ( دوكة كهربائية ) خط 220 فولت .. و بشكير صغير بديلا للمعراكة ..
يوم الخميس ... كنت أسابق الزمن كى أسترجع ذكرياتي مع عشقي الأبدي ...
فالتركينج كان إفطاري .. و كان العشاء الجماعي ...
و عبقتْ رائحة القراصة .. ( رغم أنها كانت أسْمك من الحد المعمول به في كتاب المحس و الدناقلة للمقاييس ) إلا أنني قلت في نفسي : طعم التركينج سيغطي على سماكة القراصة حتى و لو كانت معجنة ..
ثم أتى الصحن الماكن ...
و البصل الأخضر يدلدل أطرافه الخضراء من خلف الطبق الذي أحضرته لنا ( الخالة صفية رحمها الله ) ...
و هناك يرقد صحن صغير بخليط من الشطة الحمراء و الليمون ...
غمرتْني الريبة عندما نظرتُ إلى الصحن الماهل ...
فقد كان التركينج يرقد كالآيسكريم .. متكوماً يصارع بصيلاتاً محمرة و مساحيق البهارات ..
أخذْتُ قطعة من القراصة و غمسْتها في جبل التركينج .. و تذوقت ...
كنت كمن أكل سمكة بلطي كاملة ..
قلت لها : إيه دة يا حبيبتي ...
قالت ببراءة : يادوبك البرطمانية بتكفي صحن واحد ...
( و لكم أن تتخيلوا صحن تركينج معمول من برطمانية كاملة من التركينج ال خام) ..
و طبَّقْتُ نظرية سمير غانم في مسرحية المتزوجون .. طبقتها بحذافيرها و قلتُ في عناد : حآكلو يعني حآكلو ...
و أكلتُ .. و أظنها كفتْني مؤونة عام من التلهف على التركينج ...
قالت صغرى بناتي .. : يابوي طعمو ما بطال .. بس مافي طريقة تغيرو ليهو لونو دة.
و جلستُ ذات ليلة أدرس طرق تغيير لونه دون إحداث خلل في طعمه أو لزوجته ...
و بما أن التركينج معمول من السمك بعد تعرضه لإنحباس في أزيار فخارية مع كمية من الملح .. فقد إكتشفتُ أن لا مجال لتغيير لونه بعد أن يصبح السمك تركينجاً ..
لذا فإنني أناشد منافذ البيع لكى يطلبوا و يناشدوا محتكري صناعة هذا التركينج العزيز بأن يضعوا أي مادة غير ضارة تقوم بتغيير لونه ... مثل الكركم ... أو ثمار الكركدي الطازجة ... يضعوها في تلكم الأزيار ليأتيناً تركينج معدل اللون .. و مين عارف .. يمكن لونو الجديد يغري جاليات أخرى بتذوقه ... و من ثم طلبه بكميات تفتح مجالا للبيزنس..
|
Post: #2
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: هاشم أحمد خلف الله
Date: 03-17-2008, 01:44 PM
Parent: #1
اها يا ريس انا من دربي ده ماشي اكل التركينج
طالما معاهو بصل اخضر كمان  الله لعابي سال
الله يسامحك بس وما عافي ليك اكان ما عزمتني عليهو
|
Post: #4
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: ادريس خليفة علم الهدي
Date: 03-17-2008, 01:59 PM
Parent: #2
ياريس
كنت أحسب أن القنديلة المعطونة بالحليب والحليب الممزوج بالسمن البلدي لامثيل لهما.. اليوم ظهر لهما منافس قوي .
رفسه:
بالله المكان والخلطة .. لانو عندي شكلة مع طارق نقد ..بعد شهر
|
Post: #8
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: ابو جهينة
Date: 03-17-2008, 05:16 PM
Parent: #4
الشاعر الفذ إدريس ود الناظر
سلام متركنْج
| Quote: كنت أحسب أن القنديلة المعطونة بالحليب والحليب الممزوج بالسمن البلدي لامثيل لهما.. اليوم ظهر لهما منافس قوي . |
هم الإتنين بيعملوا المفعول دة ... و لو واحد فيهم ثبت نقصانو في الدم بتلقى الواحد أشول و قوتو في الجزء الشمال .. و تلقاهو ماشي زي الشايل ليهو جوز موية مويتو ما موزونة ..
Quote: رفسه:
بالله المكان والخلطة .. لانو عندي شكلة مع طارق نقد ..بعد شهر |
لو بعد شهر .. أبشرك دي حتكون ضربة ترجيحية .. مش رفسة
قالوا لي أمشي غبيرة و إستعمل حاسة الشم... بتلقى نفسك واقف قدام صفيحة التركينج أوتوماتيكلي
|
Post: #16
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: ادريس خليفة علم الهدي
Date: 03-17-2008, 09:39 PM
Parent: #8
| Quote: لو بعد شهر .. أبشرك دي حتكون ضربة ترجيحية .. مش رفسة |
الله يبشرك بالخير يا ريس (وش محدر لطارق نقد )
|
Post: #5
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: ابو جهينة
Date: 03-17-2008, 02:26 PM
Parent: #2
عزيزي هاشم
سلام
| Quote: اها يا ريس انا من دربي ده ماشي اكل التركينج |
ما تاكلو بدون الكتالوج ..
و أهم صفحة في الكتالوج هو :
إذا أكلت التركينج لا بد من أكل تمر أو أي شيء حلو بعد الوجبة مباشرة.
و لا تشرب الماء إلا بعد تلت ساعة على الأقل
Quote: طالما معاهو بصل اخضر كمان الله لعابي سال
الله يسامحك بس وما عافي ليك اكان ما عزمتني عليهو |
صدقني أول كمية تصل حأعزمك ...
قالوا في غبيرة في .. لو كدة الخميس دة إنكرب
|
Post: #3
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: Mahir Mohammed Salih
Date: 03-17-2008, 01:56 PM
Parent: #1
Quote:
In KORKED KOLLO FEJIRRO |
أبو جهينة يا أخى والله جعلت غُددى النخامية تشتغل شغل نضيف عند قراءة التركينج وقد وضعت حرف الكاف فى كوركيد حتى يعطى المعنى الصحيح وحتى لا يتهمك أحدهم ويقول ليك : إنت خرطومى .
عن لون التركينج هنالك طريقتين يمكن علاج اللوب بهما ،، إحدى الطريقتين لابد منها فى بداية إجراءآت إعداد التركينج وهى أن تنظف بطن الناجِّى ( الناجى هو صغار السمك والذى لا يتجاوز طوله حوالى 5 سم ) فإن لم تغعل ذلك فى بداية البداية فتأكد أن تركينجك يطلع أسود تماماَ ،، أما الطريقة الثانية فيمكنك تطبيقها أثناء طبخ التركينج ، وهى أن تضع كمية مقدره من دقيق الفينو الأبيض حتى يعطيه اللون الكستنائى الجميل الذى يميز التركينج عن سائر الطبخات الأخرى .
أما عن عبدالمجيد عبيدى وصالح مومو فقد كان لدينا شخص أسمه " سيد أسد " كان شديد البأس قوى البنية فارع الطول كثير الحجم والعرض ،، أما إذا ضربك بيده فتأكد أن بعضهم يجرون طوالى إلى المقابر لتجهيز المقبرة ، وأتفق معك تماماَ بأن التركينج له علاقة قوية بحجم أهل منطقتنا .
خالص التحية ،،،
ماهر
|
Post: #15
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: ابو جهينة
Date: 03-17-2008, 09:04 PM
Parent: #3
قريبي الحبيب ماهر
سلام بنكهة التركينج بعد الإعداد
| Quote: أبو جهينة يا أخى والله جعلت غُددى النخامية تشتغل شغل نضيف عند قراءة التركينج وقد وضعت حرف الكاف فى كوركيد حتى يعطى المعنى الصحيح وحتى لا يتهمك أحدهم ويقول ليك : إنت خرطومى . |
أنا خرطومي بعمل بقوة دفع رباعي تركينجي
| Quote: عن لون التركينج هنالك طريقتين يمكن علاج اللوب بهما ،، إحدى الطريقتين لابد منها فى بداية إجراءآت إعداد التركينج وهى أن تنظف بطن الناجِّى ( الناجى هو صغار السمك والذى لا يتجاوز طوله حوالى 5 سم ) فإن لم تغعل ذلك فى بداية البداية فتأكد أن تركينجك يطلع أسود تماماَ ،، أما الطريقة الثانية فيمكنك تطبيقها أثناء طبخ التركينج ، وهى أن تضع كمية مقدره من دقيق الفينو الأبيض حتى يعطيه اللون الكستنائى الجميل الذى يميز التركينج عن سائر الطبخات الأخرى . |
طبعا الطريقة الأولى مافي طريقة ليها لأنها تابعة للمصنع و المصدرين ..
أما الطريقة التانية جربناها فكانت النتيجة غير فتاكة ... يعني التركينج ما عمل عمايلو المعروفة عنو .. و خصوصاً النعاس الذي يصيب الأجفان قبل العيون..
| Quote: أما عن عبدالمجيد عبيدى وصالح مومو فقد كان لدينا شخص أسمه " سيد أسد " كان شديد البأس قوى البنية فارع الطول كثير الحجم والعرض ،، أما إذا ضربك بيده فتأكد أن بعضهم يجرون طوالى إلى المقابر لتجهيز المقبرة ، وأتفق معك تماماَ بأن التركينج له علاقة قوية بحجم أهل منطقتنا . |
صراحة أنا قابلت ناس في منطقتنا لو دخلوا عالم الملاكمة .. الضحايا كانوا حيكونوا بالكوم و يمكن حقوق الإنسان كان حيوقف اللعبة دي
دمتم
|
Post: #6
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: كمال ادريس
Date: 03-17-2008, 02:34 PM
Parent: #1
يا استاذ سلام وتحية....والله خليتني انكرش عدييل كده، خرمة ليها سنتين بدون عطلات....واصل هذا الجمال الذي لايفهمه لالا المحترفين.
|
Post: #7
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: يوسف السماني يوسف
Date: 03-17-2008, 03:11 PM
Parent: #1
الريس ابوجهينة
سلام
Quote: و البصل الأخضر يدلدل أطرافه الخضراء من خلف الطبق الذي أحضرته لنا ( الخالة صفية رحمها الله ) ...
و هناك يرقد صحن صغير بخليط من الشطة الحمراء و الليمون ...
غمرتْني الريبة عندما نظرتُ إلى الصحن الماهل |
تعرف لمن قريت الكلام قلت اكيد كان معاكم د. زيادة حيمور .
مودني
|
Post: #9
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: تماضر الخنساء حمزه
Date: 03-17-2008, 05:24 PM
Parent: #1
غايتو الصواردة ديل؟ أي شئ زايدين ليو جيم
تركيييييين
الجيم دي دلع ولا شنو ياأبو جهينة؟؟
ماأحلاه كوداداً وجوداداً
|
Post: #10
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: GamarBoBa
Date: 03-17-2008, 06:24 PM
Parent: #9
ابوجهينة
سمعت في حكايات تحكي هذه القصة عن عبيدي ومومو
ثم ياخي انت وماهر صعبين خلاص في حكاية السرد....
حكاوي من اجمل ما تكون
ومع سردك للتركين اكتشفت انني لم اتناول هذه المادة لاكثر من شهرين لاننا عزابة لفترة
وهو الواحد حيتناول تركين كيف اذا كان علي يمينه صحابي اسمه ابوهريرة وآخر من الدولة العباسية عبدالرحمن اخوي
لكن عملت Order من التركين الاصلي (ابوشريط)
وبزبطه... اصلا سنوات السعودية القليلة اتعلمنا فيها الحلل
يا تماضر تعرفي انو انا كلمة تركينج الكاتبها عمنا جلال هي البسمعها من الكبار...والناس الاتربوا في المدن بقولوا تركين...وبقت بمرور الزمن معانا زاتو تركين
ياخي يديكم الف عافية
|
Post: #11
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: مهتدي الخليفة محمد نور
Date: 03-17-2008, 06:57 PM
Parent: #10
عزيزي أبو جهينة, تحياتي
متعتان هما...التركينج في حد ذاته, و سلاسة حكيك عنه..دمت
و دامت أنداندي. صادق مودتي
|
Post: #12
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: الفاتح يسن
Date: 03-17-2008, 07:23 PM
Parent: #11
استاذنا كيفك والاسرة والاهل والتركينج خشم ببوت من سيداحمدى الماركة التجارية المعتمدة من ايسو تركينج عالي الجودة وخالي من الكلسترول يعني اصلي وتركين الجبل وهنا بالنون بدلا من الجيم لانو يتم تصنيعه خارج نطاق المياه السيد احمدية وبعد هذا كلو نحن نتعامل بشراهة مع وارد بكين من التركين
موقف تركيني طريف من اندياتنا كان يعمل في الكويت عند عودته من اي اجازة معه تركينج وفي مرة اتساغل عليهو عامل الجمارك وقعد يقلب في شنطو وفجاة لمح بطرمانيه وما ان مد يده اليها حتى انفجر صاحبنا بالصياح اوووعك من البرتمانيه دي وارتعش عامل الجمارك وسحب يده وبدا يضحك يلا خذ عفشك وروح يازول وعليه اناشد ناس الاغذية باجراء بحوث في التركينج وتسلم
|
Post: #13
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: Sayed Bekab
Date: 03-17-2008, 07:35 PM
Parent: #1
ابو جهنيه و كل من اندينا وعشاق التركين
التركين من حلاوته وصل جنوب امريكا اعشق التركين وكل ما اشتاق ليهو اضبح علبه تونه ببصل 
صورة فى الخيال لمة شباب فى احدي جمعيات السعودية و تركين حار صح الصح شطة و ايادي سمراء كتيرة فى صحن كبير وشاي وونسه و جكاااااااااااااااااااااااااااار
| Quote: التركين و الجكاااااااااااار اخوان |
|
Post: #14
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: د.محمد حسن
Date: 03-17-2008, 08:43 PM
Parent: #1
الحبيب الريس
طول عمري كنت مفتكر ان اسمه تركين
لكن لاول مرة اكتشف انو مضاف ليه آي إن جي
جاييك تاني
|
Post: #17
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: الطيب شيقوق
Date: 03-17-2008, 10:19 PM
Parent: #14
ابو جهينة
جابتني ليك لحمة النسب المننا
| Quote: هذا العملاق بيشرب على الريق كل صباح كباية زيت سمك. |
ات عارف الحاجة دى ذكرتني بوست عملو الاخ الزاكي عبد الحميد عندما روى فيه عن زيارته لبومباي في السبعينات لتغطية مؤتمر صحفي مع رئيس الوزراء الهندى - لم استحضر الاسم .
حكي الاخ الزاكي قائلا كان عمر الرئيس يتجاوز التسعين عاما ولكنه كان حاضر البديهة - وبعد الاجابة على جميع اسئلة الصحفيين باغتتة صحفية من كولومبيا قائلة له ( لماذا يا سعادة الرئيس وانت في هذا العمر حاضر البديهة هكذا؟)
فاجاب قائلا هذا سؤال في غاية من الاهمية والاجابة عليه هو اننى قد اعتدت على تناول فنجان من بولي عند كل صباح .
|
Post: #18
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: Salah Abdulla
Date: 03-17-2008, 11:01 PM
Parent: #17
العزيز أبا جهينة
يا سلام عليك ياخي ، وأسعد الله ايامك ، وجعلها تركينية المذاق ..
عمي سعيد أبوجبل رحمه الله ، كان تاجراً بسوق السجانة ووكيلاً لترحيلات عمر عبدالسلام بالسجانة ،
وأحد أكبر مصدري التركين الى دنقلا والحفير (وارد جبل أولياء)..
كل سفرية بيكون رافع ليهو عدد مقدر من الصفائح ذات الروائح الزكية ،
وهو وجبة أساسية جداً عندنا
سيد خالي ، وهند ، بيحبو التركين ( ني ) ولكني أفضله مطبوخاً.
والله يوم الخميس الفات ده متعشي تركين ، وكان لقيتو آكلو مع شاي الصباح .
كنا قاعدين نذاكر عند واحد صاحبنا دنقلاوي ، جابوا لينا فطور تركين من النوع الموصوف أعلاه ،
وجاء أحد ابناء الحلة (معرف بطول اللسان) وجلس معنا وهو ليس نوبياً ولا علاقة له بالتركين
وأكل معانا وهو صامت ، وبعد الفطور سألنا ، ده شنو ، قلنا ده تركين ، مالو كويس واللا كعب ،
قال لا والله لذيذ جداً ، فقلنا الحمد لله ، قام صاحبك ومشى على الباب وقال لينا والله انتو مطرطشين ، هسي تاكلو ده ، وبعدين تطلعوا شنو؟...
التحية لك ولكل عشاق التركين في مشارق الارض ومغاربها ..
|
Post: #19
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: عمار عبدالله عبدالرحمن
Date: 03-17-2008, 11:09 PM
Parent: #17
...
| Quote: كل هؤلاء ... فُطِموا على التركينج ... و جبلوا على أكله ليل نهار ... |
واكيد انت منهم لان قلمك ده بوخ التركينج طالع منو اديل كده ,,
اديتنا الجوع ,,
|
Post: #20
Title: Re: هذا البوست برعاية التركينج ... ( خارج و داخل نطاق ANDANDI و OONIGOO )
Author: Alsa7afa_30
Date: 03-17-2008, 11:19 PM
Parent: #1
Quote: ثم أتى الصحن الماكن ...
و البصل الأخضر يدلدل أطرافه الخضراء من خلف الطبق الذي أحضرته لنا ( الخالة صفية رحمها الله ) ...
و هناك يرقد صحن صغير بخليط من الشطة الحمراء و الليمون ... |
يااااااااااااااااه ..
جهجهتنا و شحتفت روحنا يا أبا جهينة ..
|
|