Post: #1 Title: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: Mahmoud Mustafa Mahmoud Date: 03-16-2008, 10:09 PM
بتذكرك.. وكت الكلام يصبح صعب.. والليل يودر في النعاس.. وكت النجم يتلالا زي عقداً بيضوي عليهو ماس..
أنا في المداين الضايعة ضايع لي زمن.. غريب عيون .. سرحان على الأرض الغريبة وبسأل الشوق عن وطن.. بسأل الناس عن شوارعاً فيها سافرت ومشيت وعن كلاماً داير أقولو.. قلت فيهو وياما غنيتو وبكيت وعن عيونك كيف بتصدح فيها أحلام الأماني كيفن بتصبح لهجة تانية مع الأغاني
والسفر خلاني اشتاق للسفر لو ألقى لي خاطراً سمح كان كلمة واحدة أقولها وتداوي الجرح كان مرة في عينيك أنسي ومرة أقسى ومرة ياخدني النعاس وكت النجم يتلالا زي عقداً بيضوي عليهو ماس..
------
يا الله يا الله... يا سلام ياخ الأغنية العجيبة دي.. لو أن أحمد شاويش لم يغني غيرها... لكفته..
اليوم وصلتني رسالة جميلة ورقيقة من صديقي الشاعر المرهف الأستاذ عصام عيسى رجب..وكعادة رسائله الرائعة..تفعل في النفس فعل السحر..لكن رسالة اليوم حملت إلينا هذه الأغنية الرائعة.. وحديث من ذكريات حميمة وحنين ووفاء... الله على تلك الأيام الجميلة يا عصام.. ومليون سلام وتحية شوق للأخوان.. صلاح عبد الله..صديق النور.. الهادي أحمد علي... عمر محمد الحسن كوميتي..والشيخ يوسف..ونجايل الهلتون..ومقرن النيلين..
عاينوا هنا.. ما في زول يجيني حانف وشو يقول لي عايز رابط الحفظ... ما بعرف أعمل الحركة دي... يلا أسمعوا وإنتو ساكتين سااااااكت..
Post: #2 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: Raja Date: 03-16-2008, 10:37 PM Parent: #1
يا الله..
يعني يا مصطفى أقول شنو؟
الغنية دي أول مرة سمعتها من زي 10 سنين كده. ولأننا للأسف ما بنعرف الفنانين الظهروا في السودان بعد 87. أصلو ما عرفنا الزول ده منو ووقتها ما كان في فضائيات زي الحاصل الأيامات دي.. .. لما رجعت السودان من سنتين عرفت الفنان والأغنية.. وعرفت فنانين تانين عجبوني بجد.. زي محمود تاور.. ومعتز صباحي
شكرا للغنية.. وللحاجات الحلوة الرجعت مع اللحن والكلام..
.. ويا ريت تجيب لينا لينك الحفظ ..
Post: #3 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: Mahmoud Mustafa Mahmoud Date: 03-16-2008, 11:02 PM Parent: #1
أوه ماي قود.. هار ماجيستي راجا أباسي هنا؟؟؟
هسي الزول يصدق الحاجة دي كيف؟؟
غايتو جنس هجايم في الدنيا دي..!!!!
Quote: الغنية دي أول مرة سمعتها من زي 10 سنين كده. ولأننا للأسف ما بنعرف الفنانين الظهروا في السودان بعد 87. أصلو ما عرفنا الزول ده منو ووقتها ما كان في فضائيات زي الحاصل الأيامات دي.. .. لما رجعت السودان من سنتين عرفت الفنان والأغنية..
عندي طبعاً غلاط كتير في الحتة دي.. لأنه أحمد شاويش ظهر قبل كدا بكتير.. وهو فنان أي نعم مقل لكنه مجود.. بس عشان خاطرك ما حا أغالطك .. أنا قاعد ألقاك بالساهلة عشان أقعد أغالط فيك؟؟
Quote: .. ويا ريت تجيب لينا لينك الحفظ ..
يعني يا رجاء عليك الله كان في داعي للإحراج؟؟ ما قلنا ليكم مااااااا بنعرف للحركة دي... لكن بسيطة.. عشان خاطرك برضو.. نستعين بالأصدقاء..الراسخين في العلم..ناس تمبس جمل الشيل وحمال الأسية..
تصدقي بالله يا رجاء؟؟ فكرت أعزمك عن طريق المسنجر لتسجيل الحضور في هذا البوست.. ما عارف لشنو.. إحساس غريب كدا بإنك ممكن تكوني واحدة من الناس العاجباهم الأغنية دي...أو عندهم معاها ذكريات جميلة.. تقومي تجي برااااااك؟؟؟ (براك أوباما)؟؟؟
تقديري الشديد واحترامي الكثير لشخصك العزيز..
محمود
Post: #4 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: ترهاقا Date: 03-17-2008, 07:03 AM Parent: #3
Quote: الغنية دي أول مرة سمعتها من زي 10 سنين كده. ولأننا للأسف ما بنعرف الفنانين الظهروا في السودان بعد 87. أصلو ما عرفنا الزول ده منو ووقتها ما كان في فضائيات زي الحاصل الأيامات دي..
الفاضلة رجاء اخبارك وإنشاءالله صحة وعافية
الفنان شاويش بيغنى من قبل 87 بكتير وبالرغم من الامكانيات الضخمة لكن ظل مغمورا وربما هو السبب لانو ما سّوق نفسه بطريقة صحيحة ، ولو لاحظتى لونيته من لونية ابوعركى ولو غنى ليكى اغنية لابوعركى يحيرك ، لا شك فى إنه فنان مقتدر لكن يشوف القنوات الصحيحة لإظهار هذا الاداء الجميل - ولكم الود - والتحية لصاحب البوست وللفنان احمد ( نحنن بنقول جاويش)
Post: #5 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: ماجدة عوض خوجلى Date: 03-17-2008, 09:14 AM Parent: #1
Quote: بتذكرك.. وكت الكلام يصبح صعب.. والليل يودر في النعاس.. وكت النجم يتلالا زي عقداً بيضوي عليهو ماس..
سلامات مصطفى يكفى من الاغنيه مطلعها ده يخلينا نرجع سينين وسينين وناخد لينا نفس طويل ... تطلع معاه ذكريات جميله لزمن نادر وجميل .. معافى من امراض كتيرة كلها طفحت فى الزمن الصعب ده .. لكن فى نفس الوقت مع كل الجمال .. رجعت افكار وخواطر هى مامنسية لكن قدر مانقدر بنحاول نخليها فى الغريق وهى الحنين الى المكان الفيه كل المذكور فى الاغنيه دى ممكن ، وطن النجوم والاحساس بالليل مختلف ، عارف الليل عندنا هنا والله ماذى حقنا الزمان .. لكن هو صاحبى فى كل الاحوال .. لكن الليل عندنا فى السودان مختلف وجميل شديد من السهوله انك تختار فيه نجمه تكون هى رفقيتك طوالى تقدر تحكى ليها عن كل الفى راسك تفتح قلبك ومخك وبدون ماتتكلم هى بتقراهو وبتكون امينة على اسرارك وبتجيك كل يوم فى نفس الميعاد مابتخلفو ابدا الا فى اوقات معلومه لكنها معروفه مسبقا علشان كده الواحد مابيتفاجا وبيكون عامل حسابو شديد .. النجمه دى بتقدر تعرفا من بين الملايين نجمه وهى بتكون حريصه انها تكون واضحه ليك شديد انا مابعرف هى بتعملا كيف لكن بيجيك احساس انها بتكون حريصه شديد انك تعرفا بسهولة ، عندنا هنا النجوم مافى على مدار السنه الا فيماندر وعلشان تشوف نجمه لابد تتبع حاله الارصاد وتبارى الشبابيك والغريبه حتى لوجات بتجى قريب الصباح ماذى النجوم عندنا والاغرب انت تقدر تحدد العدد بتاعه بسهوله واستطيع ان اجزم انها مااليفة ذى حقتنا.. شكرا ليك كتير على البوست الجميل ده .. وشكرا للاستاذ مصطفى رجب صاحب الرساله الرجعت لينا زمن جميل .. لى رجعة تانيه باذن الله لانو كلامى ده فى المطلع بس والاغنيه كلها كلها جميله .. تسلم يارب ...
Post: #6 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: عصام عيسى رجب Date: 03-17-2008, 10:51 AM Parent: #5
شكراً جميلاً ليك يا محمود ولي رجاء وترهاقا وماجدة وكل الجميلات والجميلين
والمحبة لا شك لي الجميل شاويش والشاعر الجميل / محمد نجيب محمد علي، لولا أن تراوغني الذاكرة
يمكن الأغنية الرهيفة دي ومثيلاتها هي محاولة ما لمقاومة القبح والقهر والـ ..... مثلما يقول نزيه أبو عفش:
ندفعُ اليأسَ بالأُغنيات ونداري كآبتَنا بالجميلِ مِن الكلِمات ونُحِبُّ على قدرِ ما نستطيعُ الحياةْ
احمد شاويش فنان جميل من الزمن الجميل هو دفعة الفنان ابو عركي البخيت التي تخرجت عام 1978 من معهد الموسيقي والمسرح مع كثير من المبدعين من بينهم الراحل المقيم خليل اسماعيل كان من الناشطين في مركز شباب السجانة ونادي الخرطوم جنوب بدآ مقلدا لابوعركي البخيت آو بالاصح مغنيا لاغنيات ابو عركي نسبة لتقارب الاصوات بينهما ولكن سرعان ماشق طريق التفرد بعد ان عمل بالاذاعة السودانية حينما بدآت الاذاعة تستوعب خريجي المعهد احييه من هنا واسجل اعجابي معكم لانه ضرب للمقلدين مثلا في كيفية الخروج الي رحابة التفرد =====================
ويا محمود مصطفي محمود رجوية دي ماتدلعوها: ساكتD لازم تعرف الحقيقة النص كارب شكرا لك ولعصام ولمحمد نجيب
Post: #8 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: على عجب Date: 03-17-2008, 03:05 PM Parent: #7
بعد التحية لكل المتحدثين وصاحبالبوست
اضم صوتي لكل من يقول ويريد ان يقول
ان الفنان جاويش فنان مرهف
ومؤدي يجيد التطريب وانتقاء الحديث العذب
اتمني له دوم الصحة والابداع
Post: #9 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: عبد اللطيف بكري أحمد Date: 03-17-2008, 03:17 PM Parent: #1
البوست الظريف دا نزينه بمقتطفات من حفل جمعية أبناء الأبيض بالرياض وإحتفائهم بالأستاذ / عصام عيسى رجب بمناسبة إختياره سفيراً للشعر في السودان من قبل برلمان الشعر العالمي ،،
هذه أخي محمود مصطفى هدية لك عصام بشحمه ولحمه وكل ما في المحفل يتسق مع إبداع شاويش وإبداعك في الأختيار ،،
د. جمال أحمد بكراوي ووأعضاء اللجنة التنفيذية يكرمون الأخ / عصام
أوثق وجودي في محفل الشرف هذا وقد شرفني الإخوة في الجمعية بتقديم هذه الفقرة ،
ونحن بدورنا نذكر أستاذنا عصام وكت الكلام يصبح صعب.. والليل يودر في النعاس.. وكت النجم يتلالا زي عقداً بيضوي عليهو ماس.. هذا بالفعل ما عايشناه بصحبة هذا الرجل الأدب الجم وقد زين (صباحنا = أنظر التوقيت بالصور) بروعة أدائه وقبل ذلك بحضوره الأنيق،، == قصرنا معاك أخي محمود؟؟ (I think we are even)إبداع بإبداع!! وتحيات للجميع،،
Post: #10 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: Mahmoud Mustafa Mahmoud Date: 03-17-2008, 04:50 PM Parent: #1
ترهاقا..كيفك؟؟
شكراً للمشاركة الثرية..
Quote: الفاضلة رجاء اخبارك وإنشاءالله صحة وعافية
الفنان شاويش بيغنى من قبل 87 بكتير وبالرغم من الامكانيات الضخمة لكن ظل مغمورا وربما هو السبب لانو ما سّوق نفسه بطريقة صحيحة ، ولو لاحظتى لونيته من لونية ابوعركى ولو غنى ليكى اغنية لابوعركى يحيرك ، لا شك فى إنه فنان مقتدر لكن يشوف القنوات الصحيحة لإظهار هذا الاداء الجميل - ولكم الود - والتحية لصاحب البوست وللفنان احمد ( نحنن بنقول جاويش)
إضافة مفيدة وجميلة خالص والله..
___________ ضريسات:
Quote: الفاضلة رجاء اخبارك وإنشاءالله صحة وعافية
كافتيريا دي هنا؟؟ تووووش.. غايتو الزول لما يكون رايح ليهو زول....
وفي الآخر خاااالص:
Quote: والتحية لصاحب البوست وللفنان احمد ( نحنن بنقول جاويش)
جاويش أظنها هي الصحيحة.. والله أعلم.. إنت في جاويش ولا في إسمك زاااااتو طالعة فيهو مغالطة تاريخية... قالوا الصحيح تهارقا ..شايف المحن دي؟؟ لا ترهاقا ولا تهراقا بل تهارقا..
شكراً جزيلاً والله... وخليك قريب..
Post: #11 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: Mahmoud Mustafa Mahmoud Date: 03-17-2008, 04:56 PM Parent: #1
الأستاذة الرزينة ماجدة عوض خوجلي..
حلت علينا البركة والله... وهذا المدد والتأمل الصوفي العميق..
Quote: لكن الليل عندنا فى السودان مختلف وجميل شديد من السهوله انك تختار فيه نجمه تكون هى رفقيتك طوالى تقدر تحكى ليها عن كل الفى راسك تفتح قلبك ومخك وبدون ماتتكلم هى بتقراهو وبتكون امينة على اسرارك وبتجيك كل يوم فى نفس الميعاد
ويا ليل أبقى لي شاهد..على صادق احترامي لماجدة عوض خوجلي..
أشكر مداخلتك المميزة وإحساسك العالي...
ودمت بخير
Post: #12 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: Mahmoud Mustafa Mahmoud Date: 03-17-2008, 05:29 PM Parent: #1
عصام ود بت جودات..
Quote: يمكن الأغنية الرهيفة دي ومثيلاتها هي محاولة ما لمقاومة القبح والقهر والـ ..... مثلما يقول نزيه أبو عفش:
ندفعُ اليأسَ بالأُغنيات ونداري كآبتَنا بالجميلِ مِن الكلِمات ونُحِبُّ على قدرِ ما نستطيعُ الحياةْ
(ثم) (قبلها)..
Quote: والمحبة لا شك لي الجميل شاويش والشاعر الجميل / محمد نجيب محمد علي، لولا أن تراوغني الذاكرة
أدامك الله.. جمالاً جميلاً..وشعراً رصيناً ..ونقداً وفناً .. أيها القارئ الجميل قبل أن تكون شاعراً وأديباً وسفيرا..
بركة الجبت لينا رابط الحفظ.. بتاع الإذاعة .. لكن الطريقة دي أنا بعرفها بالمناسبة... في طريقة تانية كدي بالحيل قاسية علي.. بعرفوا ليها الأولاد الشواطين ديل... والله الواحد لما يكتب ليك Save @ PC لما تدي ربك العجب..
Post: #13 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: Mahmoud Mustafa Mahmoud Date: 03-17-2008, 05:42 PM Parent: #1
قال العالم الموسيقي السوداني الأصيل يوسف الموصلي :
Quote: احمد شاويش فنان جميل من الزمن الجميل هو دفعة الفنان ابو عركي البخيت التي تخرجت عام 1978 من معهد الموسيقي والمسرح مع كثير من المبدعين من بينهم الراحل المقيم خليل اسماعيل كان من الناشطين في مركز شباب السجانة ونادي الخرطوم جنوب بدآ مقلدا لابوعركي البخيت آو بالاصح مغنيا لاغنيات ابو عركي نسبة لتقارب الاصوات بينهما ولكن سرعان ماشق طريق التفرد بعد ان عمل بالاذاعة السودانية حينما بدآت الاذاعة تستوعب خريجي المعهد احييه من هنا واسجل اعجابي معكم لانه ضرب للمقلدين مثلا في كيفية الخروج الي رحابة التفرد
ولكن محمد مفتاح الفيتوري قال:
Quote: لم يتركوا لك ما تقول...
يا محمود
ثم قال آخر.. وهو يوسف الموصلي حبيبنا وزميلنا بالبورد..
Quote: ويا محمود مصطفي محمود رجوية دي ماتدلعوها: ساكتD لازم تعرف الحقيقة
نحن بندلعها.. وإنتو يا شيخ يوسف علمونا كلنا ... والله نقعد ليكم في وطاة الله دي..
Post: #14 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: Mahmoud Mustafa Mahmoud Date: 03-17-2008, 05:50 PM Parent: #1
العزيز علي عجب..
Quote: اضم صوتي لكل من يقول ويريد ان يقول
ان الفنان جاويش فنان مرهف
ومؤدي يجيد التطريب وانتقاء الحديث العذب
اتمني له دوم الصحة والابداع
حبابك مليون وحباب ضمة صوتك إلى هذه الأصوات.. وكلك ذوق..
دمت أخاً جميلاً..
Post: #15 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: Mahmoud Mustafa Mahmoud Date: 03-17-2008, 06:02 PM Parent: #1
أخونا عبد اللطيف بكري أحمد..
Quote: البوست الظريف دا نزينه بمقتطفات من حفل جمعية أبناء الأبيض بالرياض وإحتفائهم بالأستاذ / عصام عيسى رجب بمناسبة إختياره سفيراً للشعر في السودان من قبل برلمان الشعر العالمي ،،
هذه أخي محمود مصطفى هدية لك عصام بشحمه ولحمه وكل ما في المحفل يتسق مع إبداع شاويش وإبداعك في الأختيار ،،
والله الهدية عندكم لكن... هدية ظبطت لينا البوست لما قال بس.. وإنت حضورك زاتو زينة سواء في الحفل أو هنا في هذا البوست..
Quote: قصرنا معاك أخي محمود؟؟ (I think we are even)إبداع بإبداع!! وتحيات للجميع،،
والله حاشا.. أبداً ما قصرتوا معانا.. and I even think we are NOT even..that isn't fair لأن إبداعكم أجمل وأكرم..صورة وحضور وصوت..
أدامكم الله وفعلاً الواحد سعيد بوجودك هنا..
Post: #16 Title: Re: رائعة أحمد شاويش - بتذكرك وكت الكلام يصبح صعب - الدهشة حاضرة ومتجددة Author: النصرى أمين Date: 03-17-2008, 06:06 PM Parent: #1
الاخ محمود
اول مره اعرف ان صاحب الاغنيه ليس ابوعركى مع انى سمعت الاغنيه اكثر من مره ..
ازكر وانا طفل صغير(اوشافع يافع) ....كنت لا استطيع ان افرز محمد وردى من عبدالرحمن عبدالله
..
