ديك العدة والشقليب

دي فريقه كدي يعني للمقيله
اتكنها شجرة ود ابارو وتحتا هبًّاب وتحتو حقة مانعه
وهناك في ابريق مجدوع وفروه لفحا الهوا
وديك غلب صاحبو بلحيل كدي نشوف قصتو؟؟


قالوا ديك العدة كان نهروه بكسرها وكان خلوه بكسرها؟؟
اها ده ما أخير منو عتود الدلالية؟؟
وده قصتو كمان قصه ! قالوا الدلالية (بائعه العدة وفي رواية أخري الملايات والهدوم)عندها عتود تاعب الجماعة تعب السنين الليل كلو يدغي(يكورك)وحيرانا عزابه مابدورو الإزعاج (ناس دخان)اها يا سيدي العزابه قالواأحسن نشتريه من المره دي ونقيل بيه بدل هرك هرك دي المهم ضبحوه جدعوا الجلد بي فوق،ربك رب الخير يجي واحد من الدراويش يشيل الجلد ويشد منو نوبه وفي روايه طار وقعد يزكر ويدق الليل كلو دق دددادق!!!
يعني لا حي يريح لا ميت يريح.

ونواصــــــــــــــــــل



ـــــــــــــــ
ما تمشو الجنا مشي يقبض الديك للغدا

اها...........
الديك طار فرررر ورك في راكوبة حاج احمدالشقليب

والاسم اصلو جا من الشقليب ضل العنقريب
ذي الصبي أب عتمه دخان الكتمه
لانو كان راجل لا بهش لا بنش يعني بندق في بحر ودعاية في كباية (دي حديثه شويه)
المهم الديك طلع في راس الراكوبه وحلف بالتميتو وتحيهو ما ينزل !!!!!!!!!!!
والشقليب شايل بسطونتو وحالف إلا يخلي ريشو كوم!!!!
والجنا متحربس وطالع في الحيطه وقال يا ديكو يا بلاش............

*يا ولد انزل البتجي من السما تحملا الواطه
*ما بنزل يعني في شان مااديتني ليه يابا زقت منو؟؟ جلدا ما جلدك جر فيه الشوك؟؟ وجحا قال بعد مرقت من بطن امي إنشا الله تنسد موصاح يابا؟؟
*يا ولد بطل لماضه وانزل انا الشقليب ما هاميني علا الفضايح ما بدورا

الموهاميك منو ؟ علي بالطلاق امرق عليكم انت وولدك ده علا خلي كرعيكم لي فوق
نواصـــــل

ابوي انا داير ديكي وانت والشقليب انشا الله تلعبو شبطت
ياولد الديك لا حق الرقدو اللنفقدو ما تجنن بي ديكك ده بشتريلك غيرو
لا لا الا هو بس
*انا متيمن اللجيني جوه كان انت كان ولدك علا يشوف شوف اما خمج
*يا زول احيرم نفسك انا ساكتلك في شان ماك زولا كبير
............
(الديك يكوكع بطريقه دراميه ويقفز داخل الراكوبه)
*كمان جيت لي يومك اليله بنجمك
*ياراجل هوي اوع تضربو بتكسر لي عدتي
*كلميه يا حاجه بخيته ده ما ديك العده الكان نهروه بكسرا وكان خلوه بكسرا؟؟
..................
.................
..............
بعد يقبضو الديك ادوني خبر عشان احضر الحله( وجه مقرقر)

عمناالشقليب شخصية غريبه يجمع ما بين الشهامة والخباثة والتهور وعدم المبالاه في وقت واحد؟؟؟!!!!
حتقولو لي كيف؟؟ كدي نشوف

قالو(والقول لي انا) جمبو بتاع دكان مغرقو ديون من سكر شاي الصباح لي لبن العشا

يوم رسل ولدو لي جاز من الدكان:
*ياولد قوم جيب لينا حبيبة جاز من مقطوع الطاري ده،بس ما تقول ليه دين إلا بعد يديك

*ياخ ما بمش هو اي حاجة انا؟؟

*يعني تمش امك ؟ قوم امش يمشمش شترك

الشافع ما نقناق يمش ويطنطن ويلولح في اللمبة (الفانوس)

*ابوي قال ليك ادينا جاز بالحاضر

*وين قروشك ياالفالح؟؟

*بديك بس انت عبي اول

الشافع ما مسخوت ذي ابوه بعد ضمن الجاز في لمبتو تب قال ليه

*القروش بعد الصرف

*الصرف الصحي يا ولد جيب القيامة دي هنا يقطعك ويقطع أبوك في ساعه واحده

*ابو حسي سعلك كما ساي؟؟

*يسعلك الشديد جيب القطر ده هنا
سيد الدكان ما مسكين يمسك اللمبة بي زعل لامن جازا يتجلفق ويفرقا في الصفيحة

*انت وابوك شوفوها عن غافل اها ولعو سمح

ذولك المسكين قيل روحو كسبان والجنا يضحك لحدي ما وصل البيت
* جبتها يالمبروك؟؟ ادها امك التولعها بي باقي الجاز الفي القيطان ده كان يصبحنا للصباح...................



ـــــــــــــــــــــــــــ
لو في مفردات ما واضحه ارجو الاستعانه بي العم ود المنسي
او الجد ود شيقوق

مرحبا بك ممدوح ابارو

استمتعت بهذا السرد الجميل

واصل

Quote: استمتعت بهذا السرد الجميل

طلت هي الجميله استاذي

ممدوح

حضور

Quote: حضور

يآآآآآآه اخيراَ مازن؟؟
استنيتك كتير ابن مدينتي المرهف

أها؟؟

Quote: أها؟؟

ــــــــــــــــ

مرحب بيك

Quote: أها؟؟
يا سيدى اللمنتى ليك الديك لى التعترو
دخل على حاجة الصبر القلا صبورا من عرس راجلا
.......جاها خبر السواد و اللواد بى عرس الدابى
وهى فوق الدوكة تجر فى طرقاتا.
الخبر جاها جبنة مقبوض خلاها لزت نعلاتا واقود. و لى شقاوتة
ديك الهنا جاء جارى عشان اندس فى التكل
انت يالصبر اخمشى الديك بدل المعراكه
هى تمسح فى الدوكه و الديك يسوى
كاك كااك كاااااااااااااااااك
قالت كدى حاجه الصبر المى صابره لولحت راسا و هزت مسايرا
و قالت للديك :
كاك ما كاك
ياكا المعراك

____
القاموس تحت الكرويته

ود أبارو ازي الحال
ياخي عمك تشابه عليه البقر
كدي براحة اشرح لي في كم شخصية في المولد دا
(انا بعد و كان غلطان ثبتني)
- الشقليب
- الجنا سيد الديك - طالع في الراكوبة
- ولد الشقليب
- في ولية بتنبح بي جوة
- ناهيك عن العزابة و ست العتود و الدرويش و سيد الدكان ديل خليهم اسي

لو الحساب صاح و ريني ولد الشقليب - الجاب الجاز - دوره شنو في فلم الديك؟

عموما ونسة جدا ممتعة و

ود البشري مرحب بيك ومرورك جد اسعدني
طبعاَ انا زول مبتدئ ومحتاج تقويمكم قبل تقييمكم لكم الود

Quote: (انا بعد و كان غلطان ثبتني)

Quote: - الشقليب

ياسيدي هو اصل الحكاية وهو وديك العده شبيهان في في الضرر وعدم المنفعة
والجعجعه في الفاضي

Quote: - الجنا سيد الديك - طالع في الراكوبة

الجنا سيد الديك (هو الخاسر في كل الحالات لو الشقليب ضرب الديك ولا ابوه قبض الديك )
وهو طالع في الحيطه والطالع في الراكوبة الديك

Quote: ولد الشقليب

ود ابوه يعني طالع زيو (لو بتزكر انو مقلب بتاع الدكان وشال منو الجاز الفي القيطان الولعو بيه للصباح دون مقابل

Quote: - في ولية بتنبح بي جوة

قصدك مرة الشقليب ؟؟ خايفه علي عدتها(وده الجا منو المثل)

Quote: - ناهيك عن العزابة و ست العتود و الدرويش و سيد الدكان ديل خليهم اسي

قصة العزابة وست العتود جات َ في تفسير معني ديك العده (وانا ضربت بيها مثل لو تزكر)
سيد الدكان هو الشرب المقلب

Quote: لو الحساب صاح و ريني ولد الشقليب - الجاب الجاز - دوره شنو في فلم الديك؟

دورو كان مع بتاع الدكان حالياَ ودورو ما إكتمل ولا السرد إكتمل

Quote: عموما ونسة جدا ممتعة

المتعة اكتملت بمداخلتك الثره

Quote:

شكراَ ليك علي التقويم الزي سيساعدني كثيرا في المستقبل

قلنا بعد ما الديك تلب جوه الراكوبة وإتحكر في عنقريب العده العاملنو نشافه والواطة مشت علي ليل والجنا جاب الجاز وجا قالو صباحاتو ُبيض (بضم الباء والياء)
اها دغشاَ بدري الديك قام يكوكع والشقليب شخيرو جايب آخر الحلة ....
براحة الشافع ود الشقليب ما مسخوت؟ قام شال لية جك موية صاقط من التيبار
وقال كدي كشح بيه الديك ! الكتمة الياها ومسكو من جنحاتو وعدل
علي السوق باعو وقبض قريشاتو في إيدو وجاراجع ذي الما عمل حاجة
لقي الناس يا دوب يشربو في الشاي.
الزول الاشتري الديك ما صدق ضحو وعمل منو حلة مدنكلة
وجدع الريش في الكوشة
الولد جار الشقليب سيد الديك جاي بالشارع لقي ريش ديكو المابقباه !
انعمنو موسمو بي بُوهيه حمرا والديك اسود......

*قطع شك ده ديكي زاتو ..... ( وفرر طارت دمعة من عينو)

جا راجع حاضن الريش وإتفن جمب باب الشقليب وقعد يغني :

يالضبحت الديك أنا عن ياسين بشكيك
بليلو النجضو واكلوه
******
جابولنا الخبر في السوق
قالولنا الشقليب محروق
في دعوة ديكنا ده المسروق
بليلو النجضو واكلوه
****
يا فقرا ما تهتمو
عند اب عشه تنلمو
جميع من أكلو بي دمو
تصيبوالراعية في فمو *
بليلو اتلنجضو وأكلوه


ــــــــــــــــ
الراعية الجزام او البرص