مشوار السبت///والمذيع المتألق/طارق كبلو..خليك مع الزمن..

بسم الله الرحمن الرحيم
1. وَالْعَصْرِ
2. إِنَّ الإِنسَانَ لَفِي خُسْرٍ
3. إِلاَّ الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ
...................................................صدق الله العظيم
الوقت .والزمن..والمواعيد.وألأنضباط..فى مجتمعنا السودانى..
كلمات نتعامل معها بعفوية.هل فكرنا فيها..؟
هل فكرنا فى الخسائر الناجمة فى عدم ألألتزام بالوقت والمواعيد وألأنضباط فى الزمن؟
متى يزول إنطباع بعض الناس عنا بكلمة مواعيد سودانية .دلالة على عدم ألأنضباط فى الزمن؟
وسائل ألأتصال الحديثة هل عدلت فى تعاملنا مع الوقت بصورة حضارية.مثل إبرام موعد أو ألأعتذار عنه؟
بوست للنقاش وعكس ألأراء وألأفكار لتعم الفائدة..

خالص مودتى مسبقآ لكل ألأعضاء..
إسماعيل محمد احمد عباس..............
..........................................
الوقت كالسيف إن لم تقطعه قطعك.................

حقيقة إستمتعت أمس 1مارس بسهرة رائعة جدآ من تلفزيون السودان القناة الفضائية..بعنوان مشوار السبت قدمها المذيع المتألق طارق كبلو. الذى إختار لها ضيوفا زادت من روعة الحلقة ألقآ....الضيوف هم.ألأستاذ/ القدير الصحفى مصطفى ابوالعزائم.وألأستاذ /ميرغنى أبوشنب..صحفى رياضى..وألأستاذة /إلهام الزبير.ناشطة فى مجال المجتمع المدنى.والدكتور/كمال هاشم.طبيب العيون المعروف.والمبدع/الفنان..عصام محمد نور.....

................................................
إسماعيل محمد احمد عباس..........................
................................................
الوقت كالسيف إن لم تقطعه قطعك...................

الخال أنا كنت مافي متين تعاد ونسعد بيك ياسعاد

مشوار السبت /// والمذيع المتألق /طارق كبلو.. خليك مع الزمن ...

عشان كده الزمن سرق مني هذة المتعه ياسمعه

تعرف أنا بسجل كل مالا أشاهده ولكن تعمل شنو مع العيال يشيلوا ليك الريموت وهاك يادليت مش شي يحير؟

،،،،أبوقصى،،،،

الجميل /أبو قصى..
..................
كيف حالك وأولادك والله طولنا منك.وإشتقنا ليك ..شوف الوقت سرقنا كيف...؟

وبما إنك اول المتداخلين معى رصدت جائزة..وهى ساعة حائط...بس اوصلها ليك كيف...عشان الموضوع مربوط

بالزمن.وإنت كنت الفائز ألآول وصلت فى الوقت المحدد...
.....................................................
عمومآ عايزين نناقش الوقت فى حياتنا بجدية..وهل يمكننا أن نستفيد من وقتنا لآقصى حد؟

وهل يمكن أن يؤثر ذلك إياجبا على حياتنا ألأقتصادية..؟

إسماعيل محمد احمد عباس.............................

بالنسبه للحلقه ولا للوقت يا خال؟؟
الواحد يرد علي ياتو موضوع؟؟
الاتنين كل واحد جدير بالحديث عنو
بالنسبه للسهره فهي ولا شك من اميز السهرات ومعروف عن الاعلامي طارق كبلو التميز


اما بانسبه للوقت فنحنا كسودانيين والحمد لله ماخدنها مجاملات سااااااااااااي

فرفره
اديني الساعه الهديه وتاني بتلقاني قاتس في بوستاتك

يقوليك بجيك الساعة خمسة ولا سته , يا زول سبعة لو ما جيتك , تمانية امش

التحية والود الخال العزيز اسماعيل عباس

والله ياخال من حيث إهدار الوقت نحن أحسن شعب في العالم بنهدر الوقت عربيا وأفريقيا وسوف نعطي أمثله علي ذلك بشئ من التفصيل

وللزمن قيمة تساوي الوقت المعلوم لحياة كل فرد علي هذة الفانية وسوف نسأل يوم العرض في الوقت فيما أفنيناه وما العمر إلا زمان سريع

فالنسارع بالقيمة الزمنية ونأخذ منها المتبقي ونعادل به المنصرم منه .


،،،،أبوقصى ،،،،

يازمن وقف شوية عيد لي لحظات هنية

وبعدها شيل باقي عمري شيل عينيي ...

الأح/ممدوح أبارو
..................
لك التحية
....................
بالنسبه للحلقه ولا للوقت يا خال؟؟
الواحد يرد علي ياتو موضوع؟؟
الاتنين كل واحد جدير بالحديث عنو
بالنسبه للسهره فهي ولا شك من اميز السهرات ومعروف عن الاعلامي طارق كبلو التميز


اما بانسبه للوقت فنحنا كسودانيين والحمد لله ماخدنها مجاملات سااااااااااااي

فرفره
اديني الساعه الهديه وتاني بتلقاني قاتس في بوستاتك
............................................................................
بطل فرفرة ..البرنامج مدخل للتحاور عن الوقت عندنا..........

وأنا بديك ساعتين يا جميل وخليك غاتس فى بوست جارى كمان..وخليك مع الزمن.
مودتى....
إسماعيل محمد احمد عباس............

جارك ياتو؟؟
حقيقه كسير الوقت عندنا هوايه
الواحد يلبس الساعه ومرات تكون واقفه ويتفلصف ويقول ليك دحين اجنا اليوم ما كمل علينا ساي؟؟
وهو يكون ما انجز نص الديوتي حقو (حلوه ديوتي دي؟؟)
المهم الواحد لو قدر ظبط وقتو صاح واثتثمرو ما في حاجه بتفوتو

لك الود يا خال

أنت عارف يا البشير..

كلمة خمسة دقايق بس وأكون عندك دى نحن ماعارفين جبناها من وين..وليه خمسة دقايق ما تكون 6أو7 أو 10 ...
...........................................................................................
يقوليك بجيك الساعة خمسة ولا سته , يا زول سبعة لو ما جيتك , تمانية امش

ولحدى ألآن تلقاهو ما جاء..
.....................................................................
نحن السودانين خاصة والعرب عامة عندنا مشكلة مع الوقت .يصعب علينا ضبطه..

كنا فى ورشة عمل بين الخطوط السعودية وألأميريكان أير لاين..كانت لأورلاندو وشلالات نياجارا وكان لابد ان نلتزم بجدول واضح وكل واحد عندو صورة وبالدقيقة..

ونحن فى أورلاندو ورحلتنا الصباح بدرى..واحد من الجماعة العرب ضرب النوم لحدى ما فكرنا نكسر الباب وفعلآ عن طريق رجل ألأمن المسؤول جا وفتح الباب وصحينا الراجل..ولكن حينما وصلنا المطار كانت الرحلة قد اغلعت وأطرينا غيرنا خط السير عن طريق محطة داخلية أخرى..وحصلت دربكة.كل هذا لعدم ألأنضباط..
شكرآ لمداخلتك...
إسماعيل محمد احمد عباس...........

الأخ العزيز سماعين،،

تحياتي لك وطولت الغياب (صرنا مبطين من بعض ) زي مابقولو اهلنا الطيبين ديل!!

موضوع في غاية الأهمية ،، موضوع فعلا يستاهل ان يناقش بجدية في محاولة
لإستئصاله من مجتمعنا أسوة بجميع العادات الضارة التي تحارب!!

واصل في هذا الدرب ، وبكرة الساعة عشرة و13 دقيقة إن شاء الله (بتوقيت مكة)
حنرفع البوست دا)،،

ألأخ/عبداللطيف

الزول الراقى ولطيف..

مشاغل الدنيا هى الحاجز ..لكن القلوب عامرة بمحبتكم...
.....................................................
واصل في هذا الدرب ، وبكرة الساعة عشرة و13 دقيقة إن شاء الله (بتوقيت مكة)
حنرفع البوست دا)،،
........................................................................
ده إمتحان ...أولى..
أجتازو ونشوفك حا تصل وين....
مودتى............
إسماعيل محمد احمد عباس....................

ممدوح أبارو.
.............
شكلك كدة عايز الساعة..
.......................
جارك ياتو؟؟
.........................
جارى اليمين.أول...........
.............................
تتخيل يا أبارو.................
لو الناس إلتزمت بالمواعيد وإنضبطت..ماهى المكاسب.؟
أولا.كل واحد بجد الخدمة بسهولة إذا كان من طبيب أو من أى جهة اخرى وتميز.
ثانيآ:تمنع من ألأكتظاظ وكل واحد يتبع الصف.وكل واحد يأخذ دوره وبسهولة من غير مشاكل.
ثالثآ:تقلل الجهد..
رابعآ:توفر المال..مثلا.إذا مواعد احد وركبت مواصلات وما حصلتوا لم يلتزم بالمواعيدهناك اكيد ضرر مادى..
مودتى...
إسماعيل محمد احمد عباس..............
...................
تخريمة:
...............
معرفتك مكسب تتخيل؟...

تخريمة:
...............
معرفتك مكسب تتخيل؟...
انت المكسب ولو سمحت لي بي يا خال دي
المهم الوقت زاتو خشم بيوت
في وكت تكون مضايق فيه وما داير زول يناضمك وده بتحس بيه بمشي معسم علي راحتو
ووكت تكون فاضي وداير ليك زول يصاقر ويناقرك وما تلقي
يعني لو انت اثتثمرت الوقت البتكون فيه نفسك كاره ده وصليت ليك ركعتين ومسكت المصحف واتخنقت بكا مش احسن؟؟؟
والوكت البتكون فايق ورايق ده لو مشيت زرت ارحامك ولا شفت لي اوفر تايم اشتغلتو اهو برضو يساعد في المعيشه البقت زي حمة التايفد دي مره تطلع ومره.....
بالنسبه للناس المتزوجين ما زي حلاتنا ديل نا قريعتي الواحد لو قسم وكتو بين شغلو واولادو افيد ولا شنو يا خال؟؟
ما اطول عليكم


فرفره بالدوبيت
اليله الوقت روح فات خلاني هييع
شنو كدي ما عارف ....هييع

الظريف ممدوح أبارو.......
............................
يعني لو انت اثتثمرت الوقت البتكون فيه نفسك كاره ده وصليت ليك ركعتين ومسكت المصحف واتخنقت بكا مش احسن؟؟؟
والوكت البتكون فايق ورايق ده لو مشيت زرت ارحامك ولا شفت لي اوفر تايم اشتغلتو اهو برضو يساعد في المعيشه البقت زي حمة التايفد دي مره تطلع ومره.....
بالنسبه للناس المتزوجين ما زي حلاتنا ديل نا قريعتي الواحد لو قسم وكتو بين شغلو واولادو افيد ولا شنو يا خال؟؟
ما اطول عليكم
........................................................................................
كلامك ده أصاب كبد الحقيقة..
هناك إستثمار للوقت دينى ودنيوى..مثلآ أن تصلى ركعتين أو تصل أحد أرحامك أو تشيع جنازة..

وألأستثمار الدنيوى..أن تستقل وقت فراقك فى الرياضة أو عمل إضافى وما شابه ذلك..وكلو مربوط بالوقت..

كثير من رجال ألأعمال بالرغم من توفير الظروف الحياتية لأسرهم .إلا إنو بعض من أفراد ألأسرة إنحرفوا.

وذلك لعدم تخصيص ألأب وقت من زمنه لتدارس أمورهم والتحدث إليهم..والمادة وحدها لا تصنع السعادة..

بل التوازن فى الحياة..

إسماعيل محمد احمد عباس........................

أخي وصديقي إسماعيل
إهدار الوقت وملازمة هذه الصفة لمجتمعنا السوداني حقائق لا يجادل فيها اثنان ، ولكن بما أن المشكلة زادت وتفاقمت وأصبحت تشكل محورا لكل إخفاقاتنا في الحياة ، إذن لا بد من إيجاد الحلول .
وقد يبدو الحل صعبا في ظل تسارع الزمن الذي نعيش فيه ، وحقيقة أنا شخصيا أعاني من مشكلة التسارع هذه وبشرح بسيط أعترف تماما بأنني أخفقت في الشهور الأخيرة في التوفيق بين الكثير من الأمور مثلا العمل .. لا أجد الوقت الكافي لإنجازه في الوقت المحدد ... المشاركة في المنبر .. ( غلبتني عدييييل كده ) .. العلاقات الإجتماعية ( مقصِر ومتلوم مع الكثيرين ) .. البيت .. ( بدخله الساعة واحده بالليل ) .. والباقي إنت عارفوا ...
مساك جميل يا سمعة ...

أخى الجميل/عادل جبارة..
.........................
لك منى التحية.............
..........................
وقد يبدو الحل صعبا في ظل تسارع الزمن الذي نعيش فيه ، وحقيقة أنا شخصيا أعاني من مشكلة التسارع هذه وبشرح بسيط أعترف تماما بأنني أخفقت في الشهور الأخيرة في التوفيق بين الكثير من الأمور مثلا العمل .. لا أجد الوقت الكافي لإنجازه في الوقت المحدد ... المشاركة في المنبر .. ( غلبتني عدييييل كده ) .. العلاقات الإجتماعية ( مقصِر ومتلوم مع الكثيرين ) .. البيت .. ( بدخله الساعة واحده بالليل ) .. والباقي إنت عارفوا ...
مساك جميل يا سمعة ...
..........................................................................................
هنا تبدآ المشكلة إذا رأيت أن الحل صعبآ..والزمن ليس متسارعآ كما نزعم جميعآ..الزمن هو الزمن اليوم 24ساعة مما قمنا ما زاد وما نقص..بل زادت إحتياجاتنا وزادت المسئولية ولم نكن نخطط لها التخطيط السليم....ولا تنسى بأن أيضآ كلما تقدم بنا العمر كلما قلت قدراتنا..فيجب علينا أن نكون
علو وعى كامل بكل معطيات الحياة وأن لانناكف أنفسنا ونتحمل تبعيات أمور إجتماعية على حساب انفسنا.
يجب علينا أن ننظم وقتنا تنظيم جيد وندخل حقوق أسرتنا فيه ونسقط الباقى وننفذه بدقة.وإعطاء ألأمور أولوياتها حسب ألأهمية..

أنت شخصيآ يا أخ عادل أعلم جيدآ أنك سوف لاتعانى كثيرآ لآنك تحترم قراراتك..وأنك قادر وبحمدالله على السيطرة على ألأمور بحنكة..فقط تنظيم الوقت ..
شكرآ على المرور..والوقت لايسرقك وضع فى الحسبان تذاكر ألأولاد..
مودتى..
إسماعيل محمد احمد عباس..........

انت عارف يا سمعة مشكلة الزمن دي مسألة مهمة جدا ولو كل الشعب السوداني
بداء في تطبيقا كل امورنا بتمشي صاح يعني الانضباط هو اساس كل شئ .
تخيل مديرنا خواجة بريطاني لمن تقول ليهو إنشاء الله يقول ليك
لا ما تقول كده قول حاضر لانو بكل اسف كلمة إنشاء الله إرتبطت بمعني
تمشية الحال ولي عودة اخري يا سمعة .

ألحبيب/هاشم
.............
تخيل مديرنا خواجة بريطاني لمن تقول ليهو إنشاء الله يقول ليك
لا ما تقول كده قول حاضر لانو بكل اسف كلمة إنشاء الله إرتبطت بمعني
تمشية الحال ولي عودة اخري يا سمعة .
...............................................................
نحن المسلمين يفترض أن نكون أكثر صدقآ فى أمورنا..إن شاء الله تدعم بالعمل الصادق..

والمشيئة كلها من الله ولكن لابد ان نقرن ذلك بالنية والعمل...
..............................................................................
شكرآ على مرورك الجميل ..
..............................................................................
إسماعيل محمد احمد عباس......................................................

المحترم اسماعيل عباس..
شاهدت الجزء الأخير من الحلقة وكان كافيا جدا للاستمتاع بما قدم.. ، وبرغم أننا أكثر من يضيع الوقت واهدارا له.. انما هناك البنغال.. فانهم أفضل من يضيع الزمن.. ولا يهتم به.. وهم منافس قوي لنا في مسألةاهدارالوقت..
تحياتي أخي الكريم..وهلم جرا..

ألأخ/صلاح الفكى
...............
السلام عليكم...
وشكرآ على مرورك الجميل..
........................
انما هناك البنغال.. فانهم أفضل من يضيع الزمن.. ولا يهتم به.. وهم منافس قوي لنا في مسألةاهدارالوقت..
..................................................................................
ليس هناك مجال تنافس فى ألأشياء السلبية..ولكل الشعوب إيجابيات وسلبيات..وبما أننا ألآن والحمدلله

نواكب عولمة وتقانة جديدة ونهضة ..ماذا ترانا فاعلين أمام هذا كله؟

لابد ان نغير من طريقتنا..وسلوكياتنا..ومظهرنا..لعكس الصورة الجميلة لمجتمعنا السودانى..

مودتى..
إسماعيل محمد احمد عباس.........

ألأخ/بكرى عبداللطيف
.....................
خالص مودتى...............
..........................
واصل في هذا الدرب ، وبكرة الساعة عشرة و13 دقيقة إن شاء الله (بتوقيت مكة)
حنرفع البوست دا)،،
........................................................................
وتظل بكرة الساة عشرة و13دقيقة فى إنتظارك بدون تاريخ لتنجح فى إمتحان الجلسة الثانية للأتزام

بالزمن والمواعيد..ولكن النسيان سيظل شماعتنا التى نعلق عليها كل هفوات الفشل..

مودتى...................
وعشان خاطرك بديك فرصة ثانى ..
إسماعيل محمد أحمد عباس...........................

الخال انا غايتو(دي غايتو براها حسي الصايم يجي يقول حقوق الملكيه وشنو ما بعرف)
ما اديتك مواعيد
حسي الزمن الانا ضيعتو في تعليقي علي (غايتو ) ما كان كتب بوست كامل؟؟
عشان تعرف أنو نحنا ناس مجاملات سااااي
نهايتو
الزمن محسوب من عمرنا ولو الواحد جد اخد ليه قعد مع روحو في ضهر ترعه إلا السنبر المعاه ولا شاف ليه نيمة كبييييره وجدع ليه هباب تحتا وقعد راجع نفسو وحاسبا؟
كان انصلحنا وما كان حواشاتنا بارن بي سبب الكوتشينة والجبنة ؟هييي كمان جابولن شراب شيشة؟؟
انا حسي عندي مشوار بس بجي صادي

ــــــــــــــــــــــــــ

ماوعدت صاح؟؟

سمعه كيفك واخبارك وزمنك كيف ........
اولا السهرة جميلة ورائعة وشدتنى حتى النهاية ...بس زمنها ما كان مظبوط متأخر شديد ونحن ناس مدارس .
نحن السودنيين لم نهتم كثيرا بالوقت واهميته والمواعيد عندنا غير مظبوطة اطلاقا فى كل شى مثلا
نكون حددنا بداية حفلنا التاسعة يتأخر ساعتين على اقل تقدير الساوند ماوصل الفنان ضل الطريق وغيرها من الاعزار الغير مبررة
مثل اخر نكون حددنا لبداية اجتماع هام العاشرة وزمن الاجتماع ساعة يبدأ الاجتماع بعد ساعة من زمنه المحددويستمر ساعتين ونصف بزيادة ساعة ونصف وهذا حدث لى خلال هذا الاسبوع .
اتمنى من الاجيال القادمة من ابنائنا ان تتعلم الانضباط فى زمنها لان الوقت غالى ويجب الا نهدره ونهتم به .
لك شكرى الجزيل ياحبيب وفعلا موضوع شيق وجدير بالاهتمام فعلا .

ألأخ/الظريف مهدى الصادق..
لك التحية ولأم الصادق وبقية ألأسرة الكريمة..
.............................................
ليه جيت متأخر؟
................................................
ولا بتدلل علينا..عشان عارفنا بنعزك..............
...................................................
سمعه كيفك واخبارك وزمنك كيف ........
اولا السهرة جميلة ورائعة وشدتنى حتى النهاية ...بس زمنها ما كان مظبوط متأخر شديد ونحن ناس مدارس .
نحن السودنيين لم نهتم كثيرا بالوقت واهميته والمواعيد عندنا غير مظبوطة اطلاقا فى كل شى مثلا
........................................................................................
الحمدلله ألقيت شخص شاركنى هذه الحلقة المميزة..والله يا مهدى لحدى 3ونصف أنا مساهر..زمن الواحد ما حضر برامج هادفة بالشكل ده..يجب علينا أن نراعى عملية الوقت فى حياتنا..حتى نستطيع أن نغير أشياء كثيرة...
..........................
خالص مودتى..وشكرآ لطلتك الجميلة..
إسماعيل محمد احمد عباس.......................