Post: #1 Title: نسميهو شنو لاعب حريف ولافنان Author: محمد سنى دفع الله Date: 02-22-2008, 05:17 PM
سيبونا من شداد قال فرتكان زعل وزيد دبرس والقانون كان مفروض اكون من السنة الجاية والمحترفين حجبوا القمر والمواطن فقد الموهبة سيبونا من ده كلوا وانداحوا هنا منو الوقفت قدام موهبتو محتار وماعرفت تقول عليهو شنو ؟ لاعب حريف ولافنان ؟ ولا الأتنين سوا !!
Post: #2 Title: Re: نسميهو شنو لاعب حريف ولافنان Author: محمد سنى دفع الله Date: 02-22-2008, 05:24 PM Parent: #1
لاعب لا مـن مدني ولا الخرتوم لاعب حريف وفنان وحاوي اسمو الــطــاهـــر حـــســـيـب
Post: #3 Title: Re: نسميهو شنو لاعب حريف ولافنان Author: محمد على طه الملك Date: 02-22-2008, 05:51 PM Parent: #2
السني الفنان.. بالرغم من أني لم أشاهد لعبه لكن سمعت عنه مبالغات عديل كده .. قالوا الزول ده كان برفع الكوره تقعد علي فنجان قهوة .. طبعا إنت عارف فناجينا كانت قدر شنو؟ أظن لا عب بالقدره الخرافية دي لازم اكون فنان مش مجرد لاعب حريف. ..
Post: #4 Title: Re: نسميهو شنو لاعب حريف ولافنان Author: محمد سنى دفع الله Date: 02-22-2008, 06:05 PM Parent: #3
محمد علي التحية والمحبة انا شفت الفنان الحاوي الطاهر حسيب عندما كنت اعمل في مسرح الثغر وكان لسه بلعب في بعض المبارايات المهمة والحاسمة لاعب فنان وحاوي عدييييل بس خلي اجو ناس بورسودان الجد ناس هارون دياب وشكرا على المرور محبتي مودتي
الأستاذ الرائع /محمد السنى سـلامات لاهذا ولا ذاك الطاهر حسيب ليس لاعب كره فحسب الطاهر ساحر وحاوي وإنسان غير عادى عندى معاهو قصص كتيره أجيك بـ رواقه ودى
والله يا ( السني ) انت قديم خلاص .. انا كنت قايلك دفعة ( عمر الفاروق ) .. بس ما علينا .. نحن طبعا ما حضرنا زمن ( الطاهر حسيب ) عايشين علي ( في ذمة الراوي ) .. و ( الراوي ) بتاعنا قال انه الزول دا كان احرف من ( رونالدينهو ) .. وكانت دايما المقارنة بينه وبين ( جكسا ) .. واتخيل لي كان بلعب في ( حي العرب بورسودان ) ..
قال عبد المحمود يس ابو شريعة او ( درة شندي )
Quote: لعبنا في بورتسودان ضد حي العرب وفزنا «3/صفر» وبعد المباراة جاءني الطاهر حسيب وقال لي: يا عبدالمحمود انا وانت احرف اثنين في السودان فقلت ليهو ليه ما قلت:انت وانا ؟ فرد علىّ لا أنا العب منك.
Post: #12 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 11:08 AM Parent: #6
حميدة مودتي وفرحتي انك جيت بالله انت بعد مساختك انا قايلك قدر عمر الفاروق عمرالفاروق قدامنا بي سنتين ولا خليهم تلاته عشان مازدا بس البحلك مني انك بتعرف صديق الروح عبد المحمود ابوشريعة الأستاذ الخلوق وطبعا ده واحد من سحرة الكرة السودانية مرة ياابوالصحب يادفعه كنا في برنامج المحطة الأهلية بقدم فقرة البريد وجاتني رساله حقيقية من شاب واختو في شندي بقولو انوالبرنامج عسل وجميل لكن فقرة بقدحها انا ولا زميل لي مش عاجباهم وكنا قررنا نقدم الفقرة بي طريقة تانية ومغايرة فقمت قريت الرسالة وهددت صاحب الرسالة انو كيف اقول عن الفقرة بايخة وحالفانو لوكان قدامي الا افرمو واقطعووحاولت اطلع ليهو من التلفزيون والجماعة امسكوا فيني وطلعت فقرة بديعة وراح الزمن ومرة مسافر بالقطر لي حلفا ماشي مصر وطبعا انت عارف انا بخاف من الطيارة موت وصلنا شندي واول مالقطر وقف لقيت ولد قدامي قلت ليهو بترف بيت استاذ عبد المحمود جيبوا لي هوا قول ليهو السني في القطر .شوف السودان ده ضغير كيف جاء عبد المحمود ومعاهو شاب ضاحك الوجه بشوش وقبل ما يسلم على قال لي عليك الله كان ما دشتشتو هسي , منو ؟ ده الكتب ليك الرسالة وعايز تطلع ليهو من التلفزيون .. وضحكنا وبقينا اصحاب من الوقت اك عبد المحمود لعب واخلاق وفنون عنوان لي رياضة نشتهيها تحياتي ليهو الخلوق البديع ولي شباب شندي ودام صفانا
Post: #9 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 10:40 AM Parent: #5
منو ابوالهول الأصلي انت ولا الوراك يــتســـري التحية والأحترام مودتي ومحبتي منتظرينك للحكى عن الساحر والخاوي الفنان الطاهر حسيب وفي نفس الوقت تكتب لينا عن فنانين وسحرة تانيين منتظرين وكلنا شوق دام صفانا
Post: #7 Title: Re: نسميهو شنو لاعب حريف ولافنان Author: haroon diyab Date: 02-23-2008, 06:24 AM Parent: #1
ياسلااااااااااااااااام عليك ياسني انا دائما مقتنع انوا الحاجات الجميلة بتطلع من الاماكن الاجمل...... طاهر حسيب...... اجيك من الاخر ..... اذا كان هذا الرجل من اي جنسية اخري ....او ينتمي الا دولة غير السودان......لخلد قبل سنين.....ولكان الان يمسك بامور كثيرة في دروب الرياضة في بلادنا.... يحركها بفنه الذي طوع به كرة القدم..... باكنباور.... لو تضاعف مستوي باكنباور عشرة مرات لما وصل الي مستوي الطاهر حسيب ...... كرمته المانيا بان جعلته رئيسا للجنة المنظمة لكاس العالم 2006 بالمانيا ...اين طاهر حسيب...؟ ميشيل بلاتيني.... لو لعب بمثل مستواه عشرات السنين لما وصل الي فن الطاهر حسيب الراقي ..... اصبح بلاتيني شخصية نافذة في كل حياة الفرنسيين حتي وصل الي رئاسة الاتحاد الاوربي لكرة القدم .....اين الطاهر حسيب....؟ الملك بيلية....رومنيجة ....لوثر ماتيوس .....حتي جورج ويا وصل لدرجة ترشح لرئاسة الجمهورية في ليبريا .....واسماء كثيرة في دنيا كرة القدم لم تقدم من السحر ماقدمه الفنان الطاهر حسيب ولكن شعوبها ودولها خلدتهم ورعتهم واهتمت بهم وهكذا يكون الوفاء لاهل العطاء والوفاء ...... ولكن نحن ..... الكلام كتييييييييييير في الحتة البعد ....ولكن دي . اخاف ان يتذكروه بعد عمر طويييييييييييييييل ......! ماسمعناه عنه يفوق الوصف ....والقليل الذي شاهدناه في اواخر حياته الرياضية لم ولن نشاهده مرة اخري ......واتحدي ..... وياسني ....ياريييييييييت يتداخل هنا الرقم الصعب الدكتور محمد حسين كسلا من لاعبين الزمن السمح.....وهو شاهد علي ذلك العصر وعلي ابداعات الطاهر حسيب لنسمع مالم نسمعه من قبل . ساحاول جاهدا الحصول علي صور للفنان الخلوق ابن بورسودان الطاهر حسيب . سؤال : هل يعلم احد كيف يعيش الان الطاهر حسيب .......؟ مش قلته ليكم قبل كده ....نحنا شعب مابنكرم زولنا الا بعد مايموت . العمر الطويل لك حبيب السني . ومتع الله نجمنا الكبير الطاهر حسيب بالصحة والعافية. وانا والله معلق ليك في رقيبت البوست ده عدييييييييييييل كده . التحايا هارون دياب
Post: #8 Title: Re: نسميهو شنو لاعب حريف ولافنان Author: nazar hussien Date: 02-23-2008, 07:13 AM Parent: #7
انا غايتو شفت عبدالمحمود ...وفي مباراة بين ساردية والهلال العاصمي...
واكاد اجزم انه كان وحده فريقا كاملا ضد الهلال...من ناحية هو كان احرف من رونالدينو الزمن دا ...ما عندي شك...عبدالمحمود كان يلعب الباص لنفسه
تكون الكورة عنده وامامه اربعة مدافعين...ويلعب الكورة ويمشي يستناها محل ما بترجع...وبدون ان يحاور اي مدافع تلقاه منفرد بالقون...عاد دا شوف عين
اما لما يحاور...شوف عيني دي...شرط لباس المدافع...كرررررررررر... واستاد شندي الهسي دا اتملأ صفافير...
ما كنا نتفرج الا علي عبدالمحمود...
وهناك لاعب آخر صغير في السن اسمه دريد او درير...ما متذكر الاسم.. لعب في شندي...دا كمان احرف من روبينو...تلاقيه ساكينو اربعة مدافعين عتاولة...وكلهم ناوين علي كسر كراعو...تلقاهم فجاءة كلهم متطاقشين ويقنتو في اللاين وهو جنب القون...ويحاور فيه...هذا الولد شفتو جاب قون بي ضهرو بعد ما حاور القون والمدافعين ...وقّبل عكس القون ورفع الكورة ورماها من ضهرو زي رمية شوال العيش عند العتالين...ودخّل مع الكورة اتنين مدافعين في الشبكة...حالا سريع جابو ليهم الاسعاف...
Post: #10 Title: Re: نسميهو شنو لاعب حريف ولافنان Author: azhary awad elkareem Date: 02-23-2008, 11:01 AM Parent: #8
لك ولكل مبدعى بلادى محبتى.. ولكل من مر/ت من هنا مثلها..
Post: #11 Title: Re: نسميهو شنو لاعب حريف ولافنان Author: khaleel Date: 02-23-2008, 11:07 AM Parent: #10
السني
لك مقولة مشهورة
احرف لاعبي الكرة لم يلعبو للهلال والمريخ
احسن الاصوات لم تغني بالاذاعة
والطاهر حسيب كان اسطورة عصره
وهو الذي اكتشف اسامة الثغر ببورتسودان
وفي ناس كتار زي ديل
Post: #19 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 12:49 PM Parent: #10
ازهري لك المحبة والمودة والسجن بعيد عنك والغرامة مالك مقرش ولا عندك فايض ربنا ازيدك من خيرو وارزقك في كل خطوة دام صفانا
Post: #15 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 11:48 AM Parent: #8
نزار مودتي كلامك صدق وشوف عين نحن حتى الان لينا لعيبة موهوبين بس نقول ايه ؟ كلمنا عن درير وين هو الان ومنو الأستفاد من حرفنتو ومزيد من الحكايات عن السحرة واللعيبة الأساطير في بلادي دام صفانا
Post: #14 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 11:21 AM Parent: #7
هارون دياب نلمع ناسنا نحن العارفين قدرهم نذكر الجيل الجديد بي عملاقة لن يتكرروا منتظرك ومعاك صور وحكايا وكلام كتير انا ما بدخل ليك ولابرد عليك الا تعرف الناس منو الطاهر حسيب دام صفانا
Post: #13 Title: Re: نسميهو شنو لاعب حريف ولافنان Author: مازن الجمّال Date: 02-23-2008, 11:14 AM Parent: #1
المبدع محمد السني ازيك
بتذكر ولد من مدني اسمو محمد ( الرزة )
ده كان بيمسك الكورة وبيتحدى الميدان كلو
لو واحد يقدر يقلعا منو .. وفعلا ما كان في زول بيقدر يقلع منو الكورة .
عيبو الوحيد كان نحافة جسمو ( واتخيل لي من لقب الرزة واضح )
الود ده بصراحة انا ما لاقاني زول بيقدر يتحكم في الكروة قدرو .
Post: #16 Title: Re: نسميهو شنو لاعب حريف ولافنان Author: عواطف ادريس اسماعيل Date: 02-23-2008, 11:53 AM Parent: #13
سنسوني !!!
كلاهما في الهم شرق ,,,
وخلصت الليلة ....
Post: #23 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 01:12 PM Parent: #16
انا برضو قلت كده يااختي عواطف لانو فعلا كلنا في الهم شرق وطال ليلنا ومع سحرة فنون الكورة الجد طال ليلنا دام صفانا
Post: #21 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 01:08 PM Parent: #13
مازن الجمال الشاعر الفنان من مدني الجمال حتكون شنو غير عاشق للجمال والمحبة والسلام يامازن رزة براه طبعا انا عايز ناس هارون دياب اعملوا تغطية لي الطاهر حسيب وبعد داك افتح ليهم دروب الأبداع الساحر : احمد عبدالله بابكر سانتو ابراهومه سيد الأسم سيد مصطفى جمال ابداع سحرة بس جاييك ياجمال خليك معانا ودام صفانا
Post: #26 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 01:52 PM Parent: #17
عمى كباسه وممكن تورينا كباسه ده منو ؟ قال ناس الطاهر حسيب حجونا بيهو تلقاك لعبت معاهو الدافوري ونحن ما جايبين خبر لالالاما سمح قال صديق الموج قال نحن لمن كنا بنلعب بالعجلات صديق الموج كان بجكس في حلتنا راجعوا بوستاتتو القديمة ..
Post: #18 Title: Re: نسميهو شنو لاعب حريف ولافنان Author: على عمر على Date: 02-23-2008, 12:21 PM Parent: #1
بنكو دى عشان اب عمه يالسنى..
Post: #28 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 02:11 PM Parent: #18
علي عمر ربنا اتقبل والدكم شهيدا عمنا الأستاذعمر علي وكان فقدا جلل لكثير من رواد مكتبه من فنانيين ومثقفين وادباء اخوي علي ابوعمه ده عمك صديق الموج وله موجة من المعجبين في الرياض خلتي امشي جنبو وانا نكرة عديل لكن قلت ليهو برده ا ليك في مباراة العودة كان في قطر او الحرتوم هسي قلت عمك ابوعمه ورفعت ليهو الضغط والسكري ووجع الركب وامكن اقوم عليهو الضهر وما عندوا ضهر اها عرفتو بعض ولا ازيد في التعربف دام صفانا يابو البيئة ويا ابوعمة
Quote: انا غايتو شفت عبدالمحمود ...وفي مباراة بين ساردية والهلال العاصمي...
واكاد اجزم انه كان وحده فريقا كاملا ضد الهلال...من ناحية هو كان احرف من رونالدينو الزمن دا ...ما عندي شك...عبدالمحمود كان يلعب الباص لنفسه
تكون الكورة عنده وامامه اربعة مدافعين...ويلعب الكورة ويمشي يستناها محل ما بترجع...وبدون ان يحاور اي مدافع تلقاه منفرد بالقون...عاد دا شوف عين
اما لما يحاور...شوف عيني دي...شرط لباس المدافع...كرررررررررر... واستاد شندي الهسي دا اتملأ صفافير...
ما كنا نتفرج الا علي عبدالمحمود...
اخونا الفنان الجميل / محمد السني أنازيك ماشفت الطاهر حسيب ، ولكن سمعت عنو الكثير ولكن ماذكره اخونا ، نزار ـ اعلاه ، حول لاعب الهلال ، عبدالمحمود ، هو عين الحقيقة وشوف عيني ، الراجل شفتو في اكثر من مبارة حتى قبل ان يلتحق بفريق الهلال عندما كان يلعب في فريق الطليعة برابطة الديوم ياخى مرة حضرت ليهو مبارة مع فريق من { العسيلات} بميدان الرابطة وكان عبد المحمود نجم فريق الطليعة وقتها ، الراجل ده عمل عمايل في عرب العسيلات ، لدرجة انه حاور الدفاع كلو بمافيهم حارس المرمى قبل ان يدعها في الشباك بكل هدوء ، بطريقة حيرت الناس ، وجعلت جماهير العسيلات تثار حفيظتهم فنزل احدهم مهتاجا الى الملعب يحمل سكينا، لم تعجبه حرفنة عبدالمحمود وبهدلته لفريقه وو ضع رجله على الكرة وهو ينظر بكبرياء نحو دفاع العسيلات الذي رقد { سلطة } امامه ، فهرول نحو عبد المحمود وهو يرغي ويزبد ، غايتو ربك ستر وقتها فاسرع اولاد حلال نحو المشجع الهائج وتم نزع سكينه و تهدئته .
تلك صورة من ماضى الكرة السودانية الجميل.. ياترى هل يذكر عجائز البورد من شاهد هذا المبارة منتصف الستينات أحداثها ؟
Post: #29 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 02:37 PM Parent: #22
نقول شنو ياعمر عمرت دنياك بالسلا والمحبة والنجاحات ياخي صديقي العزيز عبد المحمود كان عبقري وكان بلعب الكرة بي فهم ومتعة ومزاج والله لوكتبنا من الليلة لي نهاية العام لانفيهه خقو تحياتي ليهو وزعلت الراجل دي اصلوا ما حصلت في العالم واحد احاور التيم لمن ازعل الجمهور دي ما حصلت الا عندنا بعدين ما تكونوا فهمتوا الراجل غلط امكن هو قاصد لعيبتو البشتن حالهم عبد المحمود امكن ؟؟؟ دام صفانا
وانت يا صديق الموج تحكي لينا عن طلعت فريد طبعاً هو دفعتك
محمد السني اخوي ذكرتنا الايام الماضية وبيت السجانة والاخوان عباس ابراهيم وعلي الضو ومصطفى الحلاوي يا حليل ايامنا البدرية يوم مباراة الهلال تلقى الطاهر حسيب ماشي كداري في كبري النيل الابيض
والله يا السني لاعبينا ديل بعد ده ما بياكلو عيش مع الشيء الشفناهو في كاس افريقيا خليك من كاس أوروبا والله كاس العالم .. يا لطيف عاوزه ليها جكه وانضباط وغذاء مناسب ونوم بدري وعلاج نفسي وميادين مجهزة ومدربين عندهم علاقة بالتطور الذي تشهده كرة القدم وبعدين روح قتاليه ذي المصريين يومداك
Post: #34 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 04:42 PM Parent: #25
محمد عبد الجليل الولد الفنان ليك وحشة لكن قريب بأذن الرحمن نبل الشوق ونشوفك سعدنا بي صورتك في حفل الدكتورة عفاف حمد النيل نحن عشان كده بنتكلم عن لعيبة زمان ومازمام شديد بنقول في البوست ده انو اي واحد منا شاف ليهو لاعب فلته وأثر فيهو ولا شاف لعيبة كانو ليهم طريقة لعب مغاير وما شفنا زيو لعيبة تركوا بصمة واضحة وممكن مايكونوا في فريقنا البنشجعوا ليك المودة وواصل معانا ودام صفانا
Post: #33 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 04:37 PM Parent: #24
حمزاوي يا فنان السلام والمودة ليك وحشة وربنا اديك العافية والصحة ياخوي تعبنا من تجني صديق الموج الواحد بفكر اسيب الموقع ده واشوف ليهو اي موقع شبابي اناسب سننا ياخي الموج ده مفروض اتكلم لينا عن مؤسسي الرياضة في السودان من خواجات عطبرة لي عند لعيبة كلية غردون التذكارية وياحليل ايام المعهد والهم فاضي والدنيا حلوة زي كورة الطاهر حسييبب دام صفانا
Post: #30 Title: Re: نسميهو شنو لاعب حريف ولافنان Author: معتصم دفع الله Date: 02-23-2008, 02:58 PM Parent: #1
Quote: وطبعا انت عارف انا بخاف من الطيارة موت
الكلام دا زي السمعته قبل كده
السني ود أبوي ازيك ياخ ومشتاقووون .. زمن الطاهر دا ما حضرناه لكن سمعنا بيهو كتير .. وقد حكى لي عنه الكابتن والمدرب بابكر عبدالله فقد زامله في نفس الفترة وهم أولاد منطقة واحدة وكان لي شرف التدريب على يديه أعني المدرب بابكر .. للأسف معظم لاعبينا العمالقة تركوا الكورة ودروبها وهجروها بدون رجعة وقليل منهم من سلك التدريب ومشاركات خجولة في إدارات الأندية والسبب معروف ..
هذا البوست إحتفائية بالطاهر حسيب وذاك الجيل الجميل ..
Post: #36 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 04:49 PM Parent: #30
معتصم اخوي ليك المودة ورفيق صباك والغربة تمبس المابعرف في الكورة اي حاجة لسه بخاف من الطيارة وجاييكم بالواطة عدييل والكورة واطة ياخوي البوست ده ما مكرس لي لاعب واحد والحكاية دي لقطا الفنان الهلالابي عمرالفاروق وتوش دخل لينا بي سحرة جدد وده فهم البوست عايزين كل واحد اتكلم غن السحرة الطرحناهم هنا واضيف عليهم لك المودة والمحبة دام صفانا
Post: #31 Title: Re: نسميهو شنو لاعب حريف ولافنان Author: عمر الفاروق Date: 02-23-2008, 03:59 PM Parent: #1
خالو السنّي : ياااااااااااااااااااااااي لكن ما بتباااااااالغ !!! إنت طلعت قديم خووووووووووووواااااالص خووووواااالص!! انا لحدّي فايز نصر الدين كانوا بيحكوا لي عنو حكاوي . هيثم مصطفى بتذكر كورتو طشاش طشاش !! نحن جيل : هيييييييي ..هيييييييي ..مرحااااااااا ماااااااااجد هييييييي..هييييييي..كابتن ماجد !!!
الطاهر حسيب وحسب ما يحكي لنا الرواة إنو كان منقطتها عديييييييل .. لكن نحن يا السني في زمنّا ده وما حكوهو لينا لكن شوفناهو بكل تأكيد كان اللاعب الخلوق أسمة ريحان الشهير بي "سكسك".. سكسك كان من شدة ما حريف لمن كان مرات بيلعب معانا بي الجزمة الكعب عالي حقت البنات وما بيقع والكنترول زي التقول لابس اديداس !! معانا دي ما تقيف عندها كتير انا قاصد بيها لمن كانوا بيجيبوهو لينا في المهرجانات نتفرج فيهو .. أذكر في مرة من المرات إستاعن بيهو الأستاذ محمد الشيخ مدني الوزير الحالي وأستاذ الرياضيات التخصص ليشرح للطلاب الإستاتيكا والدينمايكا .. سكسك كان بيطبقها في الكورة ..
سنة سبعة وثمانين عمري طلاطاشر سنة اول مرة امشي مع الوالد (عليه الرحمة )استاد الخرطوم كانت مباراة بين المريخ والتحرير . الزمن داك كان بيلعب سكسك في التحرير اليوم داك التحرير شتتها للمريخ اتنين صفر احرز الهدفين سكسك الكلام دا ليهو الان عشرين سنة للان متذكر المناظر الجدعها سكس في لعيبة المريخ ياخي الزول حريف وفنان ومنقطها وزارعها واي حاجة
بعد داك حضرت كم مهرجان كدا كانو بيجيبوا فيهم فايز نصر الدين الود كان حريف بس ما بحصل سكسك
Post: #38 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 05:05 PM Parent: #32
قلت لي سنة كم وتمانين كنت وين ؟؟ في الروضة ياجماعة دي شيبكة شنو الوقعنا فيها !! يا اساسي يا اخوي شوف فريق الناشيئين وين قوم كدة كمان قال شاف سكسك والله الا في عقد سكسك قال لامودتي ولا دام صفانا
Post: #37 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 05:01 PM Parent: #31
ايوة ياسيد خاااالو عمر الفاروق قلت لي كيف انتوا من زمن كاااابتن مــاجــد ياااي لكن برضو مسامحك لانو فاهم وبتعرف كيف تثري المواضيع وتحوله لي الإيجابي البوست دع احتفاء بي كل السحرة وكل واحد ليهو ساحر فنان عارف الطاهر حسيب كان تمرينو بقيف قدام اي بص وادخل الكورة بالشباك بتاع البص تنزاه من البص الف مرة بدخله بي نفس الطريقة كان في السوق اتحدوا في التحكم على الكورة بقوم بلعب ليهم بي اي شء مدور ليمونه برتقالة وبحطها محل ما عازين اما الساحر سكسك مرة المريخ لاعب ما فريق من جوبا اظن كتور جوبا ولمن سكسك اكون لاعب بندخل نتفرج في سكسك وسكسك في المباراة دي بالذات بدع حاور ليك قلب الدفاع وكان لابس فنيلة رقم 15 تخيل بجروووووب وارجع ووب والمدافع بحاول الف بي سرعه من شدة اللفه بقينا نقرا الفنيلة مرة 15 ومرة 51 ووووووب راحع ليك فترت من المحاورة
Post: #35 Title: Re: نسميهو شنو لاعب حريف ولافنان Author: عمر الفاروق Date: 02-23-2008, 04:42 PM Parent: #1
تعرف يا أساسي سكسك ده سنة 80-81 جاب ليهو قون في ليفربول في استاد الخرطوم يومها لعب منتخب الخرطوم ضد ليفربول وانتهت المباراة 1-1 سكسك جاب قون بديع من غمزة ابو الرايقة وكده .. مع إحترامنا لكل أهرامنا الرياضية قدامى وجدد حريفين ومعلّمين ومع كل الإحترام للطاهر حسيب كمان لكن يا جماعة سكسك ده جاب ليهو قوون في البنزرتي أو الأفريقي التونسي والله لو جابو الجن الأحمر زاتو ما بيجيبو .. قون كده من نوع السهل الممتنع داك ... حاجة كده بي بوز الجزمة ووسط غابة مدافعين .. أححححححححححححي منك يا سكسك كم تمنيتك في الهلال ..
Post: #39 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 05:18 PM Parent: #35
وتاني ااااااااحيييي ياعمر الفاروق كلنا اتمنينا سكسك في الهلال لكن تقول شنو ياخوي كده شوف لينا السحرة وين ؟؟ السحرة دام صفانا
يوم الاربعاء بنحضر في سهرة من الامس انا والمدام . قاموا جابو ليكم الاسكتش بتاع الكورة انت ومصطفي احمد الخليفة في التعليق الاذاعي وموسي الامير وامير وعبدالمنعم في الاستماع للكورة شبكت الجماعة مربعات وتشخت الميدان شخيت من النص وتاني شخيتين في كل مربع وجوطة كدا قسمت بيها الميدان اها ما علينا الحلقة دى انا بتذكرها لمن اتذاعت سنة 85 وبي حساباتك انا الزمن داك كنت في المهد صبيا اها ما علينا اللذيذ في الموضوع انه المدام ما مقتنعه انه انا من سنة خمسة وتمانين متذكر الاسكتش دا بالتفاصيل لحدي جردل الموية الاتكب في الرادي مع التاكيد انه من شفته الزمن داك ما شفته الا يوم الاربع الفات اها المهم في الموضوع ما مسالة الاعمار _البيد الله_ المهم هو الذاكرة النضيفة فسكسك لمن شفته يا السني الزمن داك بقيت متابعه لحدي ما انتقل للمريخ العظيم وياما دخلت مباريات فيها سكسك لاعبا اساسيا في المريخ لكن مشكلتك انت من اصحاب الكهف والرغيم ما مشكلتي انا دا ود امبارح
ياخي انا بتكلم علي عشرين سنة لي ورا تقول لي روضة ــــــــــ ودام صفاك انت وود الفاروق ان شاء الله يدوم لحدي ما يبقي بروة
ياخي عندك اعمال انا متذكرهاكويس منها المسلسل الاشتغلت فيهو (بلف) في حافلة والحنك بتاع هاشم صديق وكلام كتير يا اريت القي طريقة ادردش معاك فيهو
ـــ (بلف) كمساري بلغة التزعينات
Post: #41 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 05:37 PM Parent: #40
والله يا اساسي ماشي بروفة وبجيك نص الليل قلت لي كيف يدوم لمن ابقى بروة والله ضحكت لمن دوبت من المودة قال لمن زوجتو استغربت كيف متذكر ياخي انا برضو استغربت الا تكون طفل عبقري ؟ اساسي بجيك بعد البروفة امنتك البوست ده بالله استكتب لينا الناس عن السحرة الشوفتهم دام صفانا جد جد محبة وسلام
Post: #49 Title: Re: نسميهو شنو لاعب حريف ولافنان Author: محمد سنى دفع الله Date: 02-24-2008, 06:41 AM Parent: #44
ياسر عبد القادر وانا لوماكنت صاحب جعفر الا كان افرتقونا بالبونبان الفرتق مباراة اهلي مدني مع الهلال ولا كان اجوبولينا القوات الخاصة عشان تفصل بينا بالله شوف ده انا الكيك انا الجرو خلو انا المدافع العملوني شارع وخلوني بقيت قاعد كنب مــابـفرز اها رايك شنو شوف لينا لاعب سحرك وخلاك تتكلم براك والبوست بتاعك المخستك دخلتو عشان تامن انا مع شداد شوف لينا واحد من لاعيبة عطبرة فلته ودام صفانا
Post: #45 Title: Re: نسميهو شنو لاعب حريف ولافنان Author: محمد سنى دفع الله Date: 02-23-2008, 10:23 PM Parent: #42
اقول ليك دور لينا البوست تقول لي واقف براك مداخلة واحدة طيب كان تكتب فوق وترفع البوست منتظرك الصباح دام صفانا
Post: #46 Title: Re: نسميهو شنو لاعب حريف ولافنان Author: محمد عثمان Date: 02-23-2008, 10:36 PM Parent: #1
الجميل محمد السنى..
الطااهر حسيب لاعب فلتة لن يتكرر ابدا سمعنا عنه الكثير من الحكااوى.. لم يستمر مع الهلال كثيرا بعد انتقاله اليه من فريق الثغر بورتسودان للقصة المعروفة و هى ان المرحوم كيشو الحقه بالعمل فى مصنع البيرة الامر الذى تسبب فى عدم استقراره و مواصلته مع فريق الهلال,, من اللعيبة المهرة ايضا من مدينة الثغر اللاعب الفنان حجو الذى ايضا انتقل الى هلال العااصمة و لكنه لم يستمر كثيرا.. و هناكك ايضا اللاعب كبرى من فريق حى العرب الذى انتقل الى هلال العااصمة و كانت القصة المشهورة التى قام فيها فريق حى العرب بتسجيل العونى كمكايدة لفريق الهلال و ذلك فى اياام ابراهيم عبده عندما كان رئيسا لفريق حى العرب..
لللاعب الطااهر حسيب قصص و مقالب كثيرة مع الحكام و اللعيبة و ذلك لاستقلاله لمهارته و تحكمه الرهيب فى الكرة..بجيك صاادى باالكثير من الحكاايات..
يديك العاافية...
Post: #50 Title: Re: نسميهو شنو لاعب حريف ولافنان Author: محمد سنى دفع الله Date: 02-24-2008, 07:48 AM Parent: #46
محمد عثمان مودتي ومنتظرنك بالحكايات والمقالب وطبعا واحدة من الأشياء المحزنة انو في لعيبة كثر انتهوا بي صورة مأســاوية لي ظروف خارجة عن ارادتهم ودي سوف يتم ليها نقاش وعايزنك تكلمنا عن لاعبك المفضل ويديك العافية ودام صفانا
Post: #47 Title: Re: نسميهو شنو لاعب حريف ولافنان Author: كمال سالم Date: 02-23-2008, 11:14 PM Parent: #1
السنى ,, كيفنك ,,
أول حاجه أوعـك تغالط ليك زول فى المنبر ده عـن الاعمار , لانو المنبر ده فيهو أزيد من خمسه ألف بوردابى , ماشفنا منهم زول جابوه فى برنامج من الامس . يعنى صديق الموج جاملك , هو قاصد جدو بدل عمو , ياخى معقول , الحلقــه الفاتت مــن برنامج من الامس جابوا فيها ابراهيم العبادى وعبد الرحمن الريح وناس ميرغنى المامون وأحمد حسن جمعه , يعنى ناس دفعتك كلهم اتوكلوا, الله يرحمهم , وانـت لسـه حايم بجـاى مـع ناس كمـال سـالم وعمـر الفاروق وامنه عبد الكريم ودينا خالد , الناس الماشافوا غير ناس هيثم مصطفى وأبوتريكه وزيدان والعجـب ,, جاى تحجينا بزمـن ناس الطاهر حسيب ومنزول , تحـت تحـت سمعت قالوا عمر الجزلى أتصـل بيك عشان يسجل معاك أسماء فى حياتنا , اعمل حسابك برنامجو ده قالوا فى السودان سموه أسماء فى مماتنا . ( أنشاء الله بعد خرف ).
فزلكـــه : ــــــــــــــ شايفك أنت ومعاك بعض الهلالاب عايزين تجيروا الموضوع للهلال ,, مع احترامى الكبير للموهبه الفذه الطاهر حسيب والموهبه الاسطوره جكسـا والفنان الفلته محمد حسين كسلا , الا اننى وبالصوت العالى أقول لكم جميعا أن حواء السودان لم تلد لاعبا سودانيا حتى الان فـى قامة وموهبة الدكتور كمال عبد الوهاب .
Post: #48 Title: Re: نسميهو شنو لاعب حريف ولافنان Author: جمال السنوسي Date: 02-23-2008, 11:58 PM Parent: #47
ود السني مراحب
يا خوي والله احرف من الشداد ده مافي
يلعب براهو زي ماداير
يسجل يمنع يرسل فرق قومية للمشاركة فقط وما تجيب اي قون
يدرب الهلال في 87 ويقف ضد هلال 2008
ماسك امر الكورة في البلد من سنين ولي سنين قادمة
هسه باله شداد ده فرقو شنو من قادة الاحزاب
ما هو برضوا قائد الكورة نحن المجهول يعني جا بانتخابات نعم ولكن العندو القلم بصحح لي روحو كويس
ومافي زول بقدر يقول ليهو زح
هسه يشيلوهو بقرار وزاري يقومو ناس الفيفا يجمدوا نشاط السودان
ياخي ما يجمدوهو نحن عندنا نشاط كروي
نحن عندنامشاكل وغتاتة وكراهية عمى لي بعض
عشان كده نوع لاعبين زي ناس الطاهر حسيب ديل مليانين في البلد بس ما بظهروا في الفرق الكبيرة عشان ما يفقدوا روحهم ويمرضوا ساكت
غايتو زمان كنا بنقول لللاعب بعد ما يجلط في الميدان 0 كورتك فكت - هسه نحن بنقول بالفم العريض يا ناس الكورة ادارتكم فكت
جمال
Post: #51 Title: Re: نسميهو شنو لاعب حريف ولافنان Author: حسن طه محمد Date: 02-24-2008, 08:47 AM Parent: #48
ود السني الحبيب
سلام معطر وانا عارفك بتحب العطور الباريسية
ويا أخي انت بطلع العمالقة ديل من وين عشان تنكد علينا بعد الشوفناه في غانا.
بعدين يا خي ما تدي فرصة لناس هيثم مصطفي اقصد كمال سالم.
Post: #53 Title: Re: نسميهو شنو لاعب حريف ولافنان Author: محمد سنى دفع الله Date: 02-24-2008, 10:33 AM Parent: #48
جمال السنوسي القيافة الفنان مالك فاتح نار في الميدان يا حميدان الظاهر عليك فاض بيك ياخوي العلم اهم شئ ولو مافي قوانين واضحة وبرنامج نتقدم كيف ياخي البركة في شداد رجعنا لي افريقيا بعد 32 سنة سنة جمال سيبك من كلام السياسة وورينا الساحر البهرك وخلاك تقول ياسلام يافنان منتظرينك دام صفانا
Post: #52 Title: Re: نسميهو شنو لاعب حريف ولافنان Author: محمد سنى دفع الله Date: 02-24-2008, 08:58 AM Parent: #47
كمال سالم نبدا من الفزلكه خلينا من العمر وكده لانو ماعايزين احراج نحن لمن قرينا في روضة الحي انت معروف كنت بتربط لينا في الخور وبتشيل مننا قروش الفطور وحق جريدتنا الصباحية دي حاجة معروفة انك كنت رباط وما بتمشي معانا الروضة ولا الخلوة الجنب زريبة الحطب ونحن كنا صوعار وكنا بحاف من الكلاب والبوليس وزريبة الحطب وكمال الشفت العرفناهو فيما بعد بي كمال سالم ماتخليني اطلع القوله وافتحةوادفق العصير بعدين في زول ماسكك ما تكتب عن كمال عبد الوهاب كمال الدكتور الأسم سالم ده شعر ولا شنو ؟؟ البوست ده اساسا اتفتح عشان كل واحد اتكلم عن ساحر شافو \ والله كمال عبد الوهاب ساحر عدييل كنا بنستمتع بي لعبو نجي المباراة خايفين ونتمنى كمال اكون عندو ملاريا عشان اقعد كنب نلقاهو لاعب ضدنا اول عشرة دقايق دعابالخير عشان ما اجيب فينا قونبعد عشرين دقيقةبنكون ساكتين من الدهشة ومرة مرة بنقرب نشجعوا هو وبشارة وكمال بني وبشرى وهبةياخي ذكرتنا ومن الجمال انت يا كمال الشفت لعيبة زمان ديل اصلو مابتجيهم ملاريا واله الواحد لوعندوشنوداك العب مرة قالوا ليك ودالشايقي كان في معسكر الفريق القومي وما لاقي طريقة ادخل خانتو وهم في الفندق كان في لاعب حاهو صداع فمر الجرسون وشايل حبة صداع وبفتش على الكابتنالعندوصداع وقع في ود الشايقي قال الجرسون : الكابتن العندو صداع رد عليهوود الشايقي وكان سريع البديهة لالالايا اخوي انا عندي وجع خانة هههههههههههه
Post: #54 Title: Re: نسميهو شنو لاعب حريف ولافنان Author: عمر الفاروق Date: 02-24-2008, 11:08 AM Parent: #1
خالو السنّي (عجبتني الحركة دي): تعرف يا سني نحن عندنا عقدة ماضي وإن كان فعلاً للماضي إشراقات لكن بنتجاهل ما عارف عمداً أم سهواً إبداعات الجيل الحالي .. كندورة أو هاشم تية كرتون هو واحد من أحرف لاعبين العصر الحديث وبرضو ما لقى حظو إعلامياً او خلينا نقول الناس ما تابعتو بي صورة دقيقة .. في مباراة للهلال والزهرة وفي اللاين (خط رمية التماس) كندورة ده حاور مدافع الزهرة تقريبا كان إسمو توفيق والله يا السني لمن الزول جاهو شد في ضهرو لحظة المحاورة وشالوهو المستشفى وهو مسمّر في مكانو الضهر لافي والكرعين في الواطــة والراس متجه ناحية رمية التماس ..
عيسى صباح الخير حاور لاعبي باترونغ الكنجولي وزي ما قال عيسى نفسو بعد حاورت لاعب الوسط والمدافع الأول والمدافع التاني والحارس قبّلت وسألت الرشيد بدوي عبيد : اها يا الرشيد أجيبا ؟؟؟
دحدوح لاعب المريخ كن من اللاعبين البيحاوروك في فنجان ويكفيه فخراً إنو اللاعب الوحيد القعّد طارق احمد ادم في الواطــة .. ولو سألت طارق قلت ليهو بتخاف من منو بيقول ليك دحدووووووووووح..
هيثم السعودي لاعب الموردة والهلال واحد من امهر المنقطين للكورة يعمل فيها اي شي ..
Post: #55 Title: Re: نسميهو شنو لاعب حريف ولافنان Author: معتصم الطاهر Date: 02-24-2008, 11:52 AM Parent: #1
حتى الآن لم نر صورة هنا لحسيب ؟ دا
مش ظلم ؟
Post: #56 Title: Re: نسميهو شنو لاعب حريف ولافنان Author: محمد سنى دفع الله Date: 02-24-2008, 04:24 PM Parent: #55
حسن طه المعلم وينك يا ابوالزوق العطور الباريسية بترد الروح واجمل روح روح الورد على الشربات انت عارف اخوك كورنجي لمن غلط ولو لعبت كان ناس كتيرة اترفت وما ظهرت لكن تقول شنو تحويل المسار ونقطة التحول تغير حياتك في لحظة سوف نأتي لي لعيبة من جيل عمر الفاروق وصديق الموج
يعني اولاد الليلة فيهم سجرة وبنجيهم شكرا على المرور ومنتظرين لعبية بحري السحرة الفنانين بحري ولادة
Post: #60 Title: Re: نسميهو شنو لاعب حريف ولافنان Author: كمال علي الزين Date: 02-24-2008, 04:43 PM Parent: #56
السني .. يافنان .. بوست مايطلع إلا من (فنان) حقيقي ..
في ود أمدرماني كده إسمو (معاوية أشول) .. ده مالعب للهلال ولا المريخ ..
ده أحرف زول شفتو ..
لكن .. حا أحكي ليك عن (برعي القانون) و(عيسى صباح الخير) , و(سكسك) ..
يا ( عمر الفاروق ) .. في لاعب ( مريخابي ) زول وجبه كدا .. كان ساكن ( الحارة السادسة ) .. زول ( حريف ) لمن غلط .. ما متذكر اسمه منو ..!! قبل المريخ كان بيلعب في فريق ( شيكان ) بتاع ناس ( خالد روس ) في رابطة ( الوادي ) ..
.. ..
الزول دا يا ( السني ) صاحب اخو ( عبد المنعم ) .. وقاعد طوالي في بيتهم ..!
.. ..
من النوادر ( الكروية ) .. كان جارنا لاعب المريخ ( سليمان عبد القادر ) .. وكان عنده اخوه اسمه ( حسن اب صندوق ) .. وحسب رواية ( اب صندوق ) .. قال انه ناس ( المريخ ) كانوا دايرين يسجلوه هو .. بس ( سليمان ) سرق ( الشورت ) بتاعه .. وقال ليهو ( عمتك ماتت وماشين الحاج يوسف ) .. صاحبك ( ششت البكا ) وسليمان لعب الكورة الكان حاضرنها ناس ( المريخ ) وتم تسجيله .. من اليوم داك ( حسن ) لملم ( عدة الكورة ) في ( صندوق ) .. وكل ما تجيب ليهو سيرة ( سليمان والمريخ ) بمشي يجيب ليك ( الصندوق ) ..
Post: #67 Title: Re: نسميهو شنو لاعب حريف ولافنان Author: محمد سنى دفع الله Date: 02-24-2008, 10:44 PM Parent: #62
انت قاصد عادل امين عادل امين كان حريف ووجيه ودايما ضاحك وزول كلو فهم مرات لمن المريخ اكون لاعب مع النيل ولا الزهرة ولا الموردة بنكون مرتاحين الهلال ما طرف بنمشي نتفرح في ناس عادل امين وسكسك ده لو انت قاصد عادل يا Humida بعدين الزول انت متابعو من الروضة نسيت اسمو ولا عايز تقهر عمر الفاروق وتجيب ليهو الضغط غايتو الغتاته عندك لكن ابوصندوق بالغ ,, مرة في عرس حارس المريخ كان حاضرو الهادي نصر الدين اظرف ظرفاء امدرمان والناس فبي رقصة العروس قامت الجماهير كوركت زي الكورة لمن تدق في العراضة الهادي قال ليهم في شنو؟ قالوا ليهو العروس جابت قوون قال ليهم الهادي : اوع العريس اقول غرشا ليهو سليمان دام صفانا
Post: #63 Title: Re: نسميهو شنو لاعب حريف ولافنان Author: جمال السنوسي Date: 02-24-2008, 06:05 PM Parent: #61
يا ود السني
انت ما سمعت بي هاشم عزالدين - أهلي الخرطوم
يا زول الزول ده كان احرف لاعب نص في زمنه - زمن ناس الاهلي متخصصين في المريخ بأهداف حيدر - مشكلته الوحيدة انه بيلعب في خانة النقر في المنتخب عشان كده طوالي جالس احتياطي برغم مشاركاته ضمن المنتخب القومي
ونحن استمتعنا بيهو زيادة عن الناس لانه جارنا وبيناتنا بيت واحد بس وتمارين ومباريات العصرية ياما شفنا فن راقي وجميل
هاشم ده اول زول انا شفتوا بنزل الكورة زي طريقة زين الدين زيدان الكورة ماشة صاروخ بالله يستلمها براحة وتنزل قدامه زي الشرك
هاشم كان لاعب نص فنان بس ما عنده حظ وما لعب في الهلال او المريخ عشان يشتهر زي الباقيين
0 بعدين الزول ده اهلوا من شندي وكان لمن يمشي شندي بتمرن مع عبد المحمود ساردية بعملوا الاثنين فنون عجيبة وغريبة
أنت ماعارف أنو أنا بعد الهلال الكبير بشجع الامل عطبرة
بتعرف الامل ولعيبتو...ولا مابتعرف؟
بتعرف جماهير الامل ...ولا ماكلموك؟
حصل جيت الموردة عطبرة ولا ما جيت؟
ااي صااح انا ماسكنت الموردة لكن شقيت مقابرها
أنت ماسمعت بي محمد عمر المصري مدرب المريخ الفات لما جاء عطبرة يلاعب الامل حصل ليهو شنو؟؟؟
لما سمع بي كواريك مشجعين الامل في استاد عطبرة الساعة تمانية صباح وهو ماقام من النوم لسة في
سريرو في استراحة عطبرة...لقوهو عملها في نفسو وأنقد فيهو اسهال لمن رجعوهو الخرتوم بي ليلو
أفووووووووووو
تقول لي شنو وتقول لي منو
وداير ليك لاعب كمان من عطبرة
كدي النبدا ليك من وراء
انت ما سمعت بي زغبير
ولا حامد بريمة
والطيب سند كمان قالوا من عطبرة
ولحدي الفنان سيدا ..هيثم مصطفي
كفاك ولا ازيدك
وكان جيتنا متشمر
كمان احمل البتجيك
هيييييييييييييييييييييع
وبعد دا كلو
أرقد عافية
Post: #65 Title: Re: نسميهو شنو لاعب حريف ولافنان Author: محمد عبدالرحمن Date: 02-24-2008, 08:56 PM Parent: #64
ياالسنى تحياتى ...
حريف عند السودانيين زول محاور جيد وبلعب بالكعب وحركات بهلوانية كدا تخلى الجمهور يتصايح ..زى دا مرات مابكون مفيد للتيم يمتعك بس لكن مابقدر يخدم تيمو بالحاجات دى ..افضل نموذج بالمواصفات دى هو فائز نصرالدين لاعب الهلال السابق ..ولكن حريف بمعنى انو يقدر يوظف موهبتو لصالح فريقو اعتقد انو هيثم مصطفى يتفوق على كل اللاعبين الشاهدتهم وحتى هلال 87 مافيهو لاعب افضل من هيثم مصطفى ..والواحد مابقدر ينسى مقدرات الريح مصطفى ووالى الدين محمد عبدالله اميز مهاجمين مروا على الكره السودانية فى الثمانينات والتسعينات ...
Post: #66 Title: Re: نسميهو شنو لاعب حريف ولافنان Author: محمد سنى دفع الله Date: 02-24-2008, 10:24 PM Parent: #65
كمال الزين جيت ارد قريت كلامك قفلت النت وقفلت معاي عدييل ومشيت البروفة وجيت راجع قافلة معاي لسه ياخي عارف معظم لعيبتنا وفنانين ماتوا مغصة ودي عايزة ليها بوست تاني غير ده لكن شجن وحزن كبير الكلام القلتو ده عشان كده فتحنا البوست ده مخصوص عشان نلمع ناس انطفى لونم عشان نضوي نجوم خبى بريقها عشان نلفت الناس لي حكاياتهم ليك المودة وابعد عنك الأحزان الكرين الرحمن دام صفانا
Post: #70 Title: Re: نسميهو شنو لاعب حريف ولافنان Author: محمد سنى دفع الله Date: 02-25-2008, 06:29 AM Parent: #64
ياسر عبد القادر مرة خشينا الأمل والمريخ دووري زي ما بنطقوها ناس عطبرة وطبعا الأمل بلبس ازرق وأصفر قلت للجماعة نحن حنشجع الأزرق في الأمل وفعلا اليوم داك لاينسى الدنيا طين ومطر وموية تخوض فيها للركب والحكم دخل المباراة ومافي طريقة عشان يلغيها الجمهور دخل ال‘ستاد من الصباح وتعال شوف ياكورة تحت المطر والدنيا طين والجمهور ده لمن اقول ههههههههووووو والكورة قدر ما اشوتوها ناس المريخ تششششششيك تقيف في محلها والمريخ اتهزم وطلعنا فرحانيين فرحانيين شنو كوركنا لمن صوتنا بح تقول مولود في عطبرة ودام صفانا كلم جعفر سعيد قول ليهو اليوم داك نام كيف وبحكي ليك اول يوم امشي ازور جعفر في بيتهم
Post: #68 Title: Re: نسميهو شنو لاعب حريف ولافنان Author: محمد سنى دفع الله Date: 02-24-2008, 10:49 PM Parent: #63
هاشم عزالدين مساه الرحمن بالف خير وعبدالمحمود الفن كلوا وبجيك راجع ليهم تاني ياخي ياجماعة حصلونا بالصور معقول اللعيبة دول كلهم ما عندهم صور جمال الستوسي ياخي ذكرتنا ناس اجمل منهم مافي هاشم وعبد المحمود مساك الرحمن بالخير والجمال دام صفانا
Post: #69 Title: Re: نسميهو شنو لاعب حريف ولافنان Author: أبوذر بابكر Date: 02-25-2008, 06:05 AM Parent: #1
محمد يا سنى
صباحاتك شهد وسعد
كيف بالله
فى كورة السودان، أنا "تغريبا" واقف فى زمن ناس على قاقارين وكمال عبد الوهاب وما قبلهم
أما ما بعدهم فكله عندى "صابون بدرة" ساى
مش بقولو على على العرب إنه كل شى عندهم صابون
الطاهر ده سمعنا بيهو سمع لكين ما حصل شفناهو بلعب وسمعنا عن فنه وإبداعاته
وده كله يا السنى تكريس لمفهوم إنه كرة القدم بتتلعب بالراس مش بالكرعين
ودى مشكلتنا الأساسية والرئيسية حاليا
ولا شنو يا عمر الفاروق
بالمناسبة عمر الفاروق ده واحد من أحسن الناس البفهمو فى الكورة هنا وبحللوها بطريقة صحيحة جدا
من الناس الما اخدو فرصتهم فى الشهرة يا السنى
زول حريف فعلا وفنان وخلاق إسمه "الباقر" وأظن إنه لقبه كان الأستاذ
كان بلعب فى أهلى مدنى وأنا شفته واستمتعت بيه فى السبعينات
ايام أحمد الشهاوى وسنطة ومحمد حمورى
الشهاوى وحمورى طبعا أولاد بيت واحد فى العشير
كدى عليكم الله شوفو لينا حكاية "لعب الكورة بالراس" دى
على الأقل يمكن نصل الدور التانى فى كاس الأمم الجاية
Post: #72 Title: Re: نسميهو شنو لاعب حريف ولافنان Author: أبوالزفت Date: 02-25-2008, 07:07 AM Parent: #1
Post: #73 Title: Re: نسميهو شنو لاعب حريف ولافنان Author: حسن طه محمد Date: 02-25-2008, 07:47 AM Parent: #72
ود السني الحبيب
لا استطيع ارفض ليك طلب وساكتب عن بحري الكورة
منطلق الكورة في السودان كما هو معلوم بذأ من بحري
منذ فرق استاك ( التحرير حاليا) وسلاطين ( الاتحاد حاليا ).
ومنذ ذاك العهد القديم كانت بحري زاخرة
بحري كما تعلم صديقي كانت تفرخ اللعيبة وام درمان توظف
بحري جاء منها الأفذاذ السد العالي ( سليمان فارس ) زرقان ، الجاك عجب ، الزين قديم ، نجم الدين ،جيمس ، جلال النور ، القرود ، علي سعيد، عوض كوكا، صلاح دفع الله ، علي وعبد القادر صيام ، الدولي أخوان مرورا بأحمد آدم ، جعفر عبد الرازق هينو ، سكسك حافظ ، شيخ الدين كباشي، عبده الشيخ فيصل العجب وغيرهم كثيرون كثيرون وجميعهم لعبوا بالمنتخب القومي أيام مجده.
من أشهر الروابط علي مستوي العاصمة كانت رابطة الشعبية بحري .
هذه الرابطة جمعت من الفرق واللاعبين مما كانوا يشار اليهم بالبنان .
حتي في التمارين تجد ملعب الشعبية مليان
وبه من الجمهور الظريف ما ينافس جمهور دار الرياضة ام درمان .
تخرج من هذه الرابطة لاعبون أفذاذ من بينهم الشهيران عبده الشيخ وشيخ الدين كباشي ومحمد حجار ( جحر ) ومانقستو .
الحلقة القادمة يا السني عن محمد حجار ( جحر ) المظلوم كرويا .
والي لقاء .
Post: #74 Title: Re: نسميهو شنو لاعب حريف ولافنان Author: محمد سنى دفع الله Date: 02-25-2008, 08:37 AM Parent: #73
محمد عبد الرحمن التحيات النواضر يااخوي انت بديت مع ناس هيثم مصطفى جاهل وصغير وتعال انت مختفي وين معانا في الدوحة ولا في دبي ولا لندن المهم واصل المشاركة معانا وادهشنا بي سحرتكم الجدد دام صفانا
Post: #75 Title: Re: نسميهو شنو لاعب حريف ولافنان Author: محمد سنى دفع الله Date: 02-25-2008, 08:51 AM Parent: #74
ابوذر ياخوي الليلة بردت قلبي عدييل يا ابوذر كنت في مدني ولا من مدني كلو عسل عندنا عارف حبنا لهذه المدينة المليانه جمال ابوذر محبة من غير حدود \ واقف براك مع قاقارين ياخي انت مرتاد فضاء من زمنا بعيد ولمن تشوف كورة تشوف الشهاوي وحموري وسنطه العملاق يعني انت شوفت الكورة الجميلة والسريعة والقوية عشان كدة كتاباتك فيها كل النبل والفن والجمال ودام صفانا
Post: #78 Title: Re: نسميهو شنو لاعب حريف ولافنان Author: أبوذر بابكر Date: 02-25-2008, 09:06 AM Parent: #75
كيفك يا السنى
مدنى دى ما ياها السودان كله
أنا 50% من مدنى وعشت الطفولة والصبا كله فيها
أهلنا فى بانت
جيران سوق بانت وميدان بانت ومدرسة الدايات العريقة
وباقيهم فى الزاوية القصاد المدرسة الصناعية من ناحية الغرب
Post: #76 Title: Re: نسميهو شنو لاعب حريف ولافنان Author: فيصل عباس Date: 02-25-2008, 09:00 AM Parent: #1
ياخي والله انت زاتك حريف جدا وزول جميل جدا ولي الطيش كمان طالما انك بتكتب عن هؤلاء الذين اضافوا دون شرط او قيد
اكتبهم يالسني ربنا يكتبا ليك في ميزان حسناتك
Post: #77 Title: Re: نسميهو شنو لاعب حريف ولافنان Author: محمد سنى دفع الله Date: 02-25-2008, 09:04 AM Parent: #76
أبو الزفت ياأخي ابوالزفت زاتو منو ده ونمرة عشرة عشرة بلا كشرة \دام صفانا والتحيات الحلوة ليك مودتي
Post: #80 Title: Re: نسميهو شنو لاعب حريف ولافنان Author: حسن طه محمد Date: 02-25-2008, 10:03 AM Parent: #77
أخي ود السني
قبل ما أجيك مع محمد حقار ( المشهور ب جحر )
أحكي ليك قصة أخونا محمد موسي محمد نور المعانا في الدوحة وحكايته مع الكورة.
اخونا جدو كما يحلو لنا ان نناديه الكورة في كوم وهو في كوم عمره ما لعب كورة حتي كورة الشراب
حسنتو الوحيدة انو بيشجع الهلال وبيموت فيه.
في بحري الثانوية كانت هناك مباراة بين فرقتين أ و ب
في فريق حارس مرماه الأصلي غاب والجماعة احتارو
لقو اخونا جدو وقالو ليه تعالي اقيف لينا قون
يا خوانا انا في حياتي ما لعبت كورة
بس انت تقيف ونحن المدافعين حنسدها ليك
صاحبنا وقف بين الخشبتين شاتو ليه كورة من نص الملعب ومن شدة ضعفها وصلته بعد سد روح امكن بعد 10 دقائق
اخونا علي قول ناس الكورة " بيضها "
الحمد لله الكورة ما كانت بين الخشبتين
المباراة انتهت بالتعادل
وقرروا ضربات جزاء
هل تصدق ود موسي يصد الخمس ضربات كما لو كان سبت دودو
بعد نهاية المباراة حمل علي الأكتاف كما لو كان اسماعيل الأزهري
وان شاء الله يا السني تقابلو ويحكي ليك القصة بحذافيرها
بالمناسبة هو بيعرفك وهل يخفي القمر
مع تحياتنا.
Post: #85 Title: Re: نسميهو شنو لاعب حريف ولافنان Author: محمد سنى دفع الله Date: 02-25-2008, 10:36 PM Parent: #80
حسن طه الزول الظريف زولك جدو ده بالغ طيب لو كان لعب ليهو تمرين ولا تمريينين كان غلب الجماعة عدييل ودي ذكرتني المرحوم الفنان سامي عزالدين وكان في بداية حياتو الكروية حارس مرمى رائع وممتاز لعب في فريق سانتوس والذي تحول الى نجوم الدرجة وبعدين فريق النجوم وحكاية تحولوا الى مهاجم معروفة انو في احدى المبارايات مسك الكورة من القون و( جبد) ليك كل من قابلوا لمن وصل مرمى الخصم ومن يومه ما رجع لي ورا واصبح احد اهم لعيبة عصره له الرحمة والمغفرة ولسامي اخ لعب في اتحاد مدني كان لاعبا فذ ايضا هو محمد عزالدين له الرحمة والمغفرة لكل لعيبتنا جميل المنى
Post: #81 Title: Re: نسميهو شنو لاعب حريف ولافنان Author: محمد المرتضى حامد Date: 02-25-2008, 10:11 AM Parent: #77
Quote: وجاتني رساله حقيقية من شاب واختو في شندي
يا زعيم طابت لحظاتك ( بتوقيت قرينتش). كلامك اللي فوق دا بيعني إنكم كنتم لاعبين علينا برسائل كتبتوها إنتو. عارف ، آآي خليت الموضوع ومسكت في السفاسف. في لاعبين سمعنا عنهم ناس عزالدين الأصَلَه والطاهر حسيب وربما كانوا من الحرفا ولكنهم لم يعمروا كثيرا ، لكن يا استاذي مشاهداتنا للأشرطة القديمة في دار الرياضة أمدرمان لاتقول أن كثيرا من أهل الصيت كانوا من السَحَرَه، يعني واحد فيهم بيشتغل زي مارادونا وميسّي أولاد الأرجنتين أصحاب الكرامات الكرويه ..مافي.
أعود لكلام كمال سالم عن كمال عبدالوهاب والإسم كمان سالم واقول كمال عبدالوهاب دا السوداني الوحيد اللي بيعمل في الكوره الدايرو هو والمادايرو السني الهلالابي، دا كان المريخاب بيغنّوا ليهو: (كِلِّي) الأنطون حرام مادام ارى القون يحين .. في الزاويه البعيده فوق زغبير الرهيف. تحايا يا عزيز,
Post: #83 Title: Re: نسميهو شنو لاعب حريف ولافنان Author: محمد سنى دفع الله Date: 02-25-2008, 11:52 AM Parent: #76
فيصل عباس الشاعر والأديب الكرونجي لك الشكر للكلمات الرقيقة ومعانا وونسه للصباح مع لعيبة سحرونا بي ابداعاتهم ومودتي ودام صفانا
Post: #82 Title: Re: نسميهو شنو لاعب حريف ولافنان Author: haroon diyab Date: 02-25-2008, 10:32 AM Parent: #1
الحبيب السني مساء الخير
شفته ياماااااااان ....لمن تكتب عن الجمال.....اها البوست المامتوقع ده عامل جنس شغل بره المنبر.....وجنس ايميلات عشان الصور ....وناس بورسودان حتي الان لم يردوا. سأواصل المحاولات حتي احضار الصور .....والكابتن ابراهيم سيد احمد لديه مخزون من الذاكرة عن حياة هذا اللاعب الذي فاق عصره اتمني ان يتحفنا بها ....وهنا عندك . كدي زح لي شويه . تخريمه : انا سمعت انوا كان في لاعب نجاااااااااااااضه عدييييييييل كده ....ياربي ده منوا .....؟
لنتواصل هارون دياب
Post: #84 Title: Re: نسميهو شنو لاعب حريف ولافنان Author: كمال علي الزين Date: 02-25-2008, 12:00 PM Parent: #82
السني يافنان
(سكسك) ده ساحر (وحات الليل ده)
مرة في دوري الجاليات في الدوحة لاعبين ضد الجالية المصرية
سكسك شايل الكورة بضقل بيها بالراس والمدافع المصري جاري وراهو
وبكورك : (إخرب بيتك يازول)
Post: #86 Title: Re: نسميهو شنو لاعب حريف ولافنان Author: يسرى معتصم Date: 02-26-2008, 03:01 AM Parent: #84
الأستاذ/ محمد السنى السلام عليكم ورحمة الله وبركاته نمرة عشرة دا أخى وصديق عمرى وزميلى من الروضة وحتى الجامعة.... والذى لم نفترق يومآ حتى غربتى ( ملعون أبو الغربه)... هاشم كجر أبو عليل سليل الطاهر حسيب وأسأل الطاهر حسيب وعبدالمحمود شكرآ أبو الزفت ويييييين عماد الخير لاعباالهلال وصاحب جريدة المشاهير
Post: #87 Title: Re: نسميهو شنو لاعب حريف ولافنان Author: محمد سنى دفع الله Date: 02-26-2008, 07:01 AM Parent: #86
محمد المرتضى جعفر نعم الرسالة كانت حقيقية انا بتكلم عن برنامجنا محطة التلفزيون الأهلية عملنا فقرة عن بريد المعجبين على شكل برامج بايخة كانت وقتها تفبرك الرسائل عشان الرنامج يتكتب عنو انو برنامج ناجح وجماهيري وطبعا في الوقت داك كان في متابعة للبرامج وبتتعمل دراسات فييد باك ــ للبرامج حتى يتم تطويرها ــ تخيل !! عشان كده كتبت الجملة ,,لكن انت بتاع مشاكل وانا ما فاضي ليك لانو انت الظاهر ياحاسد يا بغران وعايز تبوظلي البوست بتاعي يا زعلان عشان انا مسكين وما بتاع شدايد وهلاللابي ومع شداد محمد المرتضى قالوا كنت في مصر موقفة على فد رجل اما بخصوص الكباتن الزمان الصورتم كاميرا السينما زمان الأفلام عفى عليها الزمن وما كاملة لكن ظاهر عندهم رقشة لكن في لعيبة والله يامرتضى عندهم راي مش في ماردونا في كل من حاور او ابتكر لعبة من الدبل كيك لي الشوت على الطاير انت رايح بعيد ليه انت شوفتني انا بلعب كورة قسما جزما لو كنت تابعت الكورة نجوم كتيرة ما كان جابوها الفريق القومي وكانوا لي هسي لافين بي بره واولهم النقر مصطفى دام صفانا
Post: #91 Title: Re: نسميهو شنو لاعب حريف ولافنان Author: محمد سنى دفع الله Date: 02-26-2008, 09:05 AM Parent: #86
Post: #90 Title: Re: نسميهو شنو لاعب حريف ولافنان Author: محمد سنى دفع الله Date: 02-26-2008, 08:05 AM Parent: #84
الزول الأنيق كمال الزين الراجل الزين الكورة دي حضرناها وكان الفريق به مجموعة مميزة منهم الطيب الدويم ووليم وويتا ورياض ياخي اليوم داك اسامه سكسك عمل للباك بتاعو فلايت وقطايع وفي النهايبة طلع الباك وهو مبسوط وبضحك من عمايل سكسك دام صفانا
Post: #89 Title: Re: نسميهو شنو لاعب حريف ولافنان Author: محمد سنى دفع الله Date: 02-26-2008, 07:19 AM Parent: #82
هارون دياب
منتظرين الصور وين ؟؟
Post: #88 Title: Re: نسميهو شنو لاعب حريف ولافنان Author: عبدالله كع Date: 02-26-2008, 07:06 AM Parent: #1
الوزل الظريف يااستاذي ممكن يكون حريف؟؟؟؟
كع كان يجيداللعب في كل الخانات
انت عارف يا استاذ السني الزول الحريف الفنان نسميهو منو
وبصراحه شديد (عبدالله كع) بس ماكان جادي
اسال عنو ناس الامتداد
Post: #92 Title: Re: نسميهو شنو لاعب حريف ولافنان Author: محمد المرتضى حامد Date: 02-26-2008, 09:15 AM Parent: #88
حبيبنا سني، مرتضى جعفر دا جاتو المصائب وإيدو في خشمو لكن مافي مشكله الزول وأخوانو كلهم أصحابي بيمشّوها. طبعا أنا حاسدك وبغرانك في البوست الدبل كيك في الزاويه البعيده دا، حقيقه قالوا محمدسني دا لو واصل الكوره كان سجّل مع ريال مدريد لكن بيني بينك الريال القطري أحسن.
إهداء خاص يا عزيزنا شان تشوف الموهبه الأصليه منذ الطفولة،
Post: #93 Title: Re: نسميهو شنو لاعب حريف ولافنان Author: محمد سنى دفع الله Date: 02-26-2008, 11:13 AM Parent: #88
انا مصدقك ياكع لانو في رعيبة كتار لظروف دراسة تحويل مسار ما لعبو واهو عرفنا كع منهم يلا كع لينا هنا واكسر ركبع كع والبوست بوستك دام صفانا
Post: #94 Title: Re: نسميهو شنو لاعب حريف ولافنان Author: محمد سنى دفع الله Date: 02-26-2008, 11:29 AM Parent: #93
شكرا جزيلا محمد المرتضى جعفر على الهدية الحلوة والفن الراقي والكورة والتحكم المدهش طبعا دة لاعب مثير للجدل وقسم الناس بينو وبين بيليه فنان حريف شفت لكن عندي ما بحصل بيليه لانو بيليه ابدع حاجات ما كانت موجودة قبلو لكن تعال نتكلم عن ناس مهمين هم الشهروا اللعيبة المعلن ـ نعم المعلن عندنا معلن من اجمل المعلقين على المبارايات الأهلي . الإتحاد الإتحاد . الأهلي بقلب الفريقين عشان ما ازعل زول من المشجعين ويطلق على اللعيبة اجمل الألقاب مرة في مهرجان كان بذيع في الجوائز احسن لاعب احسن مهاجم احسن مدافع لمن كمل الجوائز ودار الرياضة بعد الجوطة والتصفيق مع صنة الناس اد ليك المايك نفخة وقال : احسن مذيع رياضي الـــــقــــــطـــــر وضجت الدار بالتصفيق والضحك المتواصل يلا كمان كل واحد اكلمنا عن المعلقين الصنعوا نجوم من خلال تعليقاتهم والألقاب الأطلقوها عليهم من الخزين الى القطر دام صفانا
Post: #95 Title: Re: نسميهو شنو لاعب حريف ولافنان Author: محمد سنى دفع الله Date: 02-26-2008, 11:47 AM Parent: #94
ياجماعة وين العاملين منقطينها والكورة عندهم تجري مع الدم واتفسوها مع صبا ريح نجد وين العاملين فيها تيلي سانتانا وديجانقو لايرحم وين الكانوا بفرحو بي الشوارع البفتتحها المهاجمين وليس المحافظين وين البشوتو ضفاري وبقشو المهاجمين بالجوز وين انتوا
Post: #96 Title: Re: نسميهو شنو لاعب حريف ولافنان Author: محمد المرتضى حامد Date: 02-26-2008, 12:08 PM Parent: #94
أعتقد أنه لايوجد في تاريخ كرة القدم من يعلق على المباريات في السودان خير من جماهير دار الرياضه أمدرمان على ايام عبدالوهاب الجعفري وكاك والسر السفيه وباجوري وناس (مِلِح). لكن طه حمدتو (مربعات) وعلي الحسن مالك لا يدانيهما أحد ومنذ اعتزالهما ، عليهما الرحمة ، لم نتابع مذيعا من أمثال (كسافه سكانيه) في وسط الملعب و( جمله تكتيكية) و( جات فوق الغايم). غايتو نعمل شنو يا استاذ سني كان لازم نرفعا (كورنل).
Post: #97 Title: Re: نسميهو شنو لاعب حريف ولافنان Author: محمد سنى دفع الله Date: 02-26-2008, 01:22 PM Parent: #96
كورنل عدييل غايتو بتاع حركات زيك ما قابلت قريب كورنل لكن ذكرت اجمل معلقينا ونحن زاملنا في اأذاعة المعلق علي الحسن مالك وهو معروف عنو الظرف والسخرية وصاحب نكته وسرعة بديهه مودتي ودام صفانا
Post: #98 Title: Re: نسميهو شنو لاعب حريف ولافنان Author: حسن طه محمد Date: 02-26-2008, 02:28 PM Parent: #97
محمد المرتضي حامد
مشكور شدييييييييد علي اللقطة الفنانة
دخلتني في مشكلة مع نفسي
هل اتابع بوست حبيبنا ود السني ام اتفرج علي لقطات الداهية الارجنتيني ؟
الاجابة منتظلرة منكم الاتنين .
أما أبناء أم درمان وبحري طه حمدتو وعلي الحسن مالك - رحمة الله عليهما - فقد كانا - في اعتقادي - من ملوك مذيعي كرة القدم العالميين.
ولهما يرجع الفضل في حب السودانيين للكورة ولا مش كدا ؟؟
ود السني
لهسه ما وريتنا خانتك في الملعب كان شنو !
Post: #99 Title: Re: نسميهو شنو لاعب حريف ولافنان Author: محمد المرتضى حامد Date: 02-26-2008, 10:38 PM Parent: #98
Quote: لهسه ما وريتنا خانتك في الملعب كان شنو !
مش الراجل الفنان ده؟ يا حسن ، هسه حايجي يقول ليك أنا خانتي كانت جناح ( Gulfair ) وكده، وفي واحد صاحبي كان لعاب لكن خانتو ظروفو.
Post: #100 Title: Re: نسميهو شنو لاعب حريف ولافنان Author: محمد سنى دفع الله Date: 02-26-2008, 11:10 PM Parent: #99
; ; كضبا كاضب انقروا لسه انا لعبت انقروا قال جناح ! تخيل كنت بلعب نص متقدم والنص هو الغتسص حجرنا كنت دايما بشيل معاي حجر كل ما تحصل لي مصيبة اغتص حجري وارجع صاغ سليم كان عندنا جار اسمو سالم وكان صاغ برضو
Post: #113 Title: Re: نسميهو شنو لاعب حريف ولافنان Author: رأفت ميلاد Date: 02-27-2008, 09:35 AM Parent: #100
السنى حبيبنا مشتاقين .. ياخى خلونا فى الطاهر حسيب ناس بورتسودان وينم .. أنور كينج ومحمد عثمان .. وكتار
الطاهر حسيب مرتبط بطفولتى وكان بلعب معانا البلى .. عندنا لعبة إسمها "أبو دبة" بعملوا كوم وكل لا عب بحزر يضع بليتين فى أعلى الكوم بحيث يكون "مقنطر" .. بلعبوها عدد غير محدد .. مرات يصل عدد البلى الى ستين سبعين .. "تنيش" من الشخيت بقوة .. البلية التى تضربها يجب أن تخرج من خلف خط آخر من الجهة المعاكسة بحو أربعة أمتار .. والفوز تأخذ كل البلى فى "اللين" .. كان عندما يقبل علينا طاهر حسيب نعدو إليه وكل يطلب منه أن يلعب دوره .. وكنا أولاد ديم مدينة لدينا عنده معزة شديدة .. خاصة لتصدينا لأولاد سكة حديد المشاكسين الذين "يزفوه" عندما يكون مخمورآ .. يلقط "الضراب" بضربة واحد يصيب البلية بقوة يسكن محلها وتطير الى خارج الخط الآخر كأنها نظرية هندسية مدروسة .. ضربة فنانة يشهق لها الجميع .. يحسبها الأطفال فوز عام ويهجمون على "اللين" وكل يملك ما يلتقطه .. يكون الطاهر حسيب الأبعد ولكنه يكون الأسبق رغم إنه لا يعدو .. ويحوز على النصيب الأكبر ليقسمه على الأطفال الضعفاء وصغار السن ..
سأعود لأسلوبه فى اللعب وقصصه وطرائفه داخل وخارج الملعب ..
الليلة الله يحلكم منى ساكت ..
مودتى
Post: #116 Title: Re: نسميهو شنو لاعب حريف ولافنان Author: محمد سنى دفع الله Date: 02-27-2008, 10:14 AM Parent: #113
رأفت ميلاد صاحبنا في السنين البيضاء ايام سودان البخاته لك المودة والمحبة سافرت في السودان كلوا وكل حتة بقت حقتكم لكن نحن دايما بنأكد انك مننا من مدني ما علينا المهم ذكرياتك والطاهر حسيب وبابكر سانتو والفاضل سانتو وكمال عبد الوهاب وكل السحرة مودتي دام صفانا
Post: #154 Title: Re: نسميهو شنو لاعب حريف ولافنان Author: محمد سنى دفع الله Date: 03-11-2008, 09:53 PM Parent: #126
ياسر السيد !!!!!!!!!!!!!! ........ ؟؟؟؟؟؟؟؟؟؟؟؟؟؟ !!!!!!!...
Post: #127 Title: Re: نسميهو شنو لاعب حريف ولافنان Author: دكتور محمد حسين كسلا Date: 03-01-2008, 10:41 AM Parent: #100
أخى العزيز السنى والله ليك وحشة..تذكر آخر مرة اتلاقينا وين ؟ أنا غايتو متذكر.. بوست شيق ومدعاة للمداخلات المفيدة.. والله اترددت كتير قبل المشاركة بعد ما قريت كلام الأخ كمال على الزين..والصورة المأساويه الوصف بيها بعض المشاهد الحاصله عندنا من تراجيديا هذا الزمان..لكن حرضنى الأخ هارون دياب فها أنا أستجيب.. طبعا أنا أفتخر بأننى شاهدت الطاهر حسيب فى مجده..بل وتربطنى به علاقة شخصية أخوية عميقه لأنه ابن نادى الثغر ببورتسودان وهو أول ناد أراه فى حياتى و لأن بورتسودان هى مسقط رأسى ومرتع صباى..! الطاهر كانسان ساخر لأبعد الحدود ويمتاز بسرعة بديهة وحب للنكته ..لسوء حظه أبصر النور فى بلاد لا تعرف للعبقرية قيمه..ولو أنه ولد وعاش فى امريكا اللاتينيه مثلا بعبقريته الكروية الفذه تلك ،لما ذكر أباطرة لعبة كرة القدم فى العالم وأكرر فى العالم ،على مر الأزمان دون أن يكون هو على رأس القائمه..! منذ طفولتى شاهدته كلاعب (يضقل) بالليمون والبرتقال فى سوق الخضار ب(ديم المدينه) وهو الحى الذى نشأت فيه أنا أيضا..شاهدته يستجيب لطلب الصغار مشاركتهم اللعب فى حوارى الحى..ويدخل فى كافة أنواع التحدى مع الكبار فى طرق السيطره على أى شيئ مستدير سواء كان كرة أو ما شابهها.. أكرمنى الله أيضا بالاشتراك معه ضمن فريق الثغر فى مباراة ودية بين نادى الثغر وفريق عاصمى زائرلبورتسودان وذلك فى مقتبل حياتى الكروية وقبل أن أصيب من الشهرة شيئا.. لن أسهب فى وصف أحاسيسى آنذاك فقد أفردت مساحة خاصه للطاهر فى كتابى "محطات فى حياتى" ، وهو على وشك الصدور وفيه أسرد مسيرتى فى الحياه مع تركيز أكبر على الجوانب الرياضية بالطبع.. الطاهر حسيب هو أحد (مراجعى) الخاصة ان صح التعبير ، فى كرة القدم وهو أحد أساتذتى الخصوصيين، ان شئت لأننى تعلمت من أمثال الطاهر حسيب وجكسا وبابكر سانتو ولولاهم ، ولولا غيرهم ممن زاملونى وشاركونى فى مختلف الفرق داخليا وخارجيا ، لولاهم جميعا ما صرت كسلا.. مع كل والود والتقدير لكم جميعا..
Post: #129 Title: Re: نسميهو شنو لاعب حريف ولافنان Author: كمال علي الزين Date: 03-01-2008, 12:21 PM Parent: #127
Quote: والله اترددت كتير قبل المشاركة بعد ما قريت كلام الأخ كمال على الزين..والصورة المأساويه الوصف بيها بعض المشاهد الحاصله عندنا من تراجيديا هذا الزمان
د. محمد حسين (كسلا).. سلامات
حقيقة أأسف على مداخلتي التي بدت بعيدة عن جو البوست المرح
وهو شئ من روح السني الفنان
إلا أنني فعلاً كرهت كرة القدم بعد أن رأيت ما آل إليه
حال من أسعدونا وأمتعونا وصارو مواضيعاً للحديث ومفخرتنا
حين يفاخر الناس بمستوى كرتهم الآن , ونحن لا نجد إلا هذا الماضي
الجميل الذي صنعه من ندوس عليهم بأقدامنا الآن
كتبت مرة لصحيفة المشاهد مقالاً بعنوان :
(ماذا لو كان هذا وهماً) , أي أن كل هذه الأمجاد لم تكن
وأن هؤلاء الأفذاذ لم يكونوا سوى جزءاً من البطولات التي نجيد صناعتها (خيالاً)
وإن لم يكونوا كذلك , فلماذا نقسو عليهم , بينما (لعيبة اليوم البجلوها واقفة)
يتقاضون الملايين ..؟
دام صفاكم ياالسني ..
Post: #148 Title: Re: نسميهو شنو لاعب حريف ولافنان Author: نادر الفضلى Date: 03-11-2008, 05:15 AM Parent: #100
مكرر
Post: #162 Title: Re: نسميهو شنو لاعب حريف ولافنان Author: Azhari Nurelhuda Date: 03-13-2008, 10:08 AM Parent: #100
النسي باصحي لامسات
تعرف لو ما بتعرف عبدالله (كريشنقا) لاعب أشبال الدويم الأسطورة.... تكون عندك مشكلة في الكورة........
Post: #163 Title: Re: نسميهو شنو لاعب حريف ولافنان Author: محمد سنى دفع الله Date: 03-13-2008, 10:29 AM Parent: #100
تصدق ياصاحبي الصدوق وابوالصحب اقول ليك حاجة عجيبة كريشنقا الفنان الرفيع الذزق منو الكان بلعب معاه ثنائي وزول راقي وحريف وساحر تصدق خالي عبد الكريم تعرفوا كده اندهش وتعال لينا تلقانا نحن يانا نحن
يا ود أمشي كده ده..... يعني داير تقنعني إنه... عبدالكريم محمد إبرهيم (كرمة) أشوت زول في الدويم و البقدد الشباك خالك يالسني والزمن ده كله و أنا ما أعرف يا ود روح..... يا أخي ديل كلهم أصحابي و أحبابي من عمك ود إبراهيم دكتورنا العظيم الكان بدينا راحة من حصة المذاكرة لمن كنا في الدويم الريفية الوسطى... و عبدالكريم و عباس (قوباع) و المهندس سيف و فتحي و (إسا) ده كمان دفعتي و نديدي باليوم.....ياخي دي مبالغة ديل أهلي يالسني....ياخي بكيتني عديل ياخي.... يا حق إنه أنا أقول البت سوسن أخت السني دي بتشبه لي زول في الدويم....
تعرف يالسني الثلاثي عبدالله وعبدالماجد و عبدالكريم خالك.... ديل أخطر من سطر كورة في تاريخ الدويم....ديل إتكتبت عنهم قصايد و إتلحنت و إتغنت في الدويم و ناس الأشبال القدام كلهم حافظين الغنا ده......
الله يجازي محنك..... وديتني لركن عزيز و غالي من الزمن يسكن الروح.....يالسني و ذكرتني نكت إبراهيم (خريستو) عن (فيسبة) ود إبراهيم البيضاء و التي كانت ترعى في نجايل مستشفى الدويم دون حسيب أو رقيب.......
و لو إنت حريف وريني نمرة (الفيسبا)البيضاء حقت جدك ود إبراهيم كم....
مش معقول يالسني مش معقول...........
Post: #168 Title: Re: نسميهو شنو لاعب حريف ولافنان Author: محمد سنى دفع الله Date: 03-13-2008, 03:32 PM Parent: #167
ازهري نحن اساسا من القطينة يعني الوالد والولدة من القطينة وانت عارف ناس النيل الأبيض كلهم اهل ولينا في الدويم مجموعة وفيهم المتزوج مننا وقعد معانا في مدني وفيهم مسك خط الجنوب وشرق وغرب ولكن اهم حاجة اتهم العب ناس كريمو وكريشنقا ياود اهلي
بعد الإطلاح على قوانين و لوائح و أسس هيئة تماسيح بحر أبيض العليا... قررت الهيئة منح السيد/
محمد السني دفع الله
وسام التمساح من الدرجة الأولى و أنعمت عليه بتأشيرة دخول لمدينة الدويم سارية المغعول على مر الزمان و العصور... و أيضا منحه عضوية مسرحي نادي العمال و نادي الصبيان و العضوية الفخرية لجمعية مسرحي بخت الرضا...أول جمعية مسرحية سودانية.......
صدر تحت المرسوم الأول من قوانين بحر أبيض الدويم تمساح لسنة 1908
Post: #101 Title: Re: نسميهو شنو لاعب حريف ولافنان Author: Alfarwq Date: 02-27-2008, 03:08 AM Parent: #1
كما ذكر يسري رقم عشرة من احرف و ا فضل لاعب وسط شاهدته في حياتي. هاشم كجر لاعب المرغني كسلا و امدوم لاعب من طراز فريد فنان لم يسعفه الحظ للعب في الهلال او المريخ. افضل لاعب وسط في عصره و ما اظن في لاعب زي لحدي اليوم.
شاهدته يلعب كورة طائرة ايضا, زول مشاء الله موهوب جدا.
اذا كان في جهات ترعى المواهب في السودان كان هشام كجر يلعب في برشلونة او الريال
Post: #102 Title: Re: نسميهو شنو لاعب حريف ولافنان Author: Osman Musa Date: 02-27-2008, 03:37 AM Parent: #101
استاذ السنى سلامات عندى صاحبى عندو كارو قال لى يازول عبدالمحمود لما قشط القون التانى داك على بالحرام مان واعى . اها مرق من الاستاد ومشيت ساكت , يازول نسيت الكارو . ها ها ها الكترابه التقد نعال الشيطان ... عبدالمحمود حريف وفنان وطيب جدا
له التحيه
Post: #103 Title: Re: نسميهو شنو لاعب حريف ولافنان Author: حسن طه محمد Date: 02-27-2008, 05:50 AM Parent: #102
السني الحبيب
انا ما عارف ليه متخيلك دايما انت كنت بتلعب جناح طائر
وعامل كدا زي صديق محمد احمد تمسك الكورة من النص ما تفكها الا في الكورنر برفعة علي المقاس
اخوي حامد ( وحاسميك حامد بس لانه محمد المرتضي حامد اسم طويل عايز وقت لكتابته ) استاذ السني فشلك وقال كان بيلعب نص متقدم ( حلوة متقدم دي ) يذكر الواحد بجكسا.
السني ... قالو الموية بتكضب الغطاس
أهه من هو أشهر لاعب نص متقدم مر علي الملاعب السودانية ؟؟
Post: #104 Title: Re: نسميهو شنو لاعب حريف ولافنان Author: حسن طه محمد Date: 02-27-2008, 05:58 AM Parent: #103
السني مبروك الصفحة التانية وعقبال الالف
Post: #105 Title: Re: نسميهو شنو لاعب حريف ولافنان Author: حسن طه محمد Date: 02-27-2008, 06:23 AM Parent: #103
السني مبروك الصفحة التانية وعقبال الالف
Post: #111 Title: Re: نسميهو شنو لاعب حريف ولافنان Author: محمد سنى دفع الله Date: 02-27-2008, 08:10 AM Parent: #103
شوف يا عم حسن كل جيل فيهو لاعب نص فلتة قبل ما نذكر بعضهم اقول صديق محمد احمد كان مع العمالقة فريق الهلال بتاع مستر استاروستا المدرب الذي عرف كيف يصنع تيم خطير واهل فريقنا القومي لنيل بطولة افريقيا عارف نحن في مدني كان في احمد عبدالله الحريف في الإتحاد وسيد مصطفى من الأهلي وابرهومة الكبير اهلي الخرطوم كان فيهو سعد الفن كل تيم كان فيهو لاعب نص عظمة لكن احسن واحد ده تقولو لينا انت وانا متأكد بكون ساحر
Post: #107 Title: Re: نسميهو شنو لاعب حريف ولافنان Author: Hisham Osman Date: 02-27-2008, 06:25 AM Parent: #102
لك التحايا كما سبقني بعض الزملاء,يظل هاشم كجر ابوعلي درة الشرق
واحدامن ابدع واميز المواهب الكروية ماضياوحاضرا وقيل مستقبلا ايضا.في عام2000وكنت حينها طالب طب وكنت جالس خلف الجهاز الفني لفريق الهلال العاصمي في مباراته الشهيرة مع الميرغني باستاد كسلا والتي خسرها الهلال 2/0بعد تلاعب كجر بلاعبي الهلال فردا فردا ,وكان اول زول اتعلمتافيهو التنفس الاصطناعى ATLS هو خالد جوليت مدافع الهلال بعدما كجر غربلو ليك لحدي مااصطدم بياسر رحمة .مشكلة كجر الوحيدة كانت ضعف التكوين الجسماني ولولا ذلك جديرا باعرق اندية العالم
Post: #110 Title: Re: نسميهو شنو لاعب حريف ولافنان Author: محمد سنى دفع الله Date: 02-27-2008, 07:16 AM Parent: #102
عثمان موسى مرة عندنا صديقنا نسى ولدو و رجع البيت بعد حرق العمه لمن رقص مع القون القون جا القون جا لمن المرا سألتو وين الولد قال ليها اووووب نسيتو !!!!
Post: #106 Title: Re: نسميهو شنو لاعب حريف ولافنان Author: haroon diyab Date: 02-27-2008, 06:23 AM Parent: #1
حسن طه صباح الخير
Quote: السني مبروك الصفحة التانية وعقبال الالف
وحاتك ياحسن طه الطاهر حسيب ده يستأهل منبر لحاله . بس نحنا واعود واكرر بندفن مواهبنا وهي علي قيد الحياة ..... سؤال يفرض نفسه : كيف يكون احساس اي واحد في هرم السلطة الرياضية في البلد ....لما يعرف انوا في نجوم عطروا تاريخ الرياضة في السودان لايستطيعون ان يوفروا لاسرهم وجبة غداء واحدة ....وهو باسم الرياضة الماعندو علاقة بيها يكتنز الذهب والفضة ويتطأول علي البنيان .....؟ ارحموا من في الارض يرحمكم من في السماء . التحايا هارون دياب
Post: #108 Title: Re: نسميهو شنو لاعب حريف ولافنان Author: محمد سنى دفع الله Date: 02-27-2008, 06:51 AM Parent: #106
Post: #109 Title: Re: نسميهو شنو لاعب حريف ولافنان Author: عمر الفاروق Date: 02-27-2008, 07:05 AM Parent: #1
معليش يا جماعة نرخم بيكم عالمياً شوية لأنو كلام محمد المرتضى ده عجبني.. المقارنة الأكثر ضجة هي المقارنة ما بين مارادونا وبيليه وانا وبكل صراحة شايف ماف مقارنة بين الإتنين والناس البتحب البرازيل ما تزعل مني .. لكن وبكل صراحة اللاعب الذي لم ياتي العالم بمثيله ولا أظن أنه سيأتي هو اللاعب ديجو ارماندو مارادونا .. ماردونا ظهر في فترة كانت كرة القدم فيها في القمة وكان اللاعبون فيها وصلوا من النضج الرياضي ما لم يكن في السابق ولا في الوقت الحالي .. بعكس بيلية الذي كان يلعب في زمن التكدس الكروي و ال11 لاعب متكومين في حتة واحدة .. وزمن المدافعين مرصوصين بي الصف ورا بعض وبيلية يقيس ده ويبيض لي ده زي التمثيل تمثيل.. بينما ماردونا جاء في زمن العنفي الدفاعي والضرب والخشونة والتكتيك .. ماردونا كان يمثل فريق بأكمله ويمكن لماردونا أن يلعب هو الحارس فقط ضد أي فريق وكل ما سجل الفريق الاخر هدف فانا أضمن لكم ان مردونا يمكن ان يعادل النتيجة .. بكل صراحة إن كانت هنالك لقطة سحرية تفوق فيها بيلية على ماردونا وعلى كل لاعبين العالم فهي بدون شك اللقطة التي يموه فيها بيلية لحارس المرمى بجسمه ويقفز تاركاٍ الكرة تمر ليلحق بها من الجهة الأخرى ويلعبها في المرمى وتمر جوار القائم كواحدة من أجمل اللقطات التي تمنيتها هدفا.. ماردونا لديه أشهر لقطة في العالم ونال جائزتها مصور في كأس العالم 86 تقريبا واللقطة يظهر فيها مادونا محاطاً ب 10 لاعبين من البلجيك !! 10 بالتمام والكمال !!! ماردونا غير أنه لاعب مهاري فهو لاعب قوي الجسمان ومقاتل وغيور وربما تفوق عليه بيلية في الجانب الأخلاقي لكن زي ما بيقولوا نحن ما عايزين ننناسبو دي كورة وماف حاجة إسمها سلوك واخلاق رياضية وحركات الجيش ديك
الأستفتاء العالمي الذي تم قبل سنوات فاز فيه ماردونا وبأغلبية كبيرة لإختيار افضل لاعب في العالم بين ماردونا وبيلية ..
تخريمة :
الحلو ابو ذر:
Quote: بالمناسبة عمر الفاروق ده واحد من أحسن الناس البفهمو فى الكورة هنا وبحللوها بطريقة صحيحة جدا
غايتو بعد كلامي الفوق ده بتغير كلامك ده
Post: #112 Title: Re: نسميهو شنو لاعب حريف ولافنان Author: أبوذر بابكر Date: 02-27-2008, 08:19 AM Parent: #109
Quote: الحلو ابو ذر:
Quote: بالمناسبة عمر الفاروق ده واحد من أحسن الناس البفهمو فى الكورة هنا وبحللوها بطريقة صحيحة جدا
غايتو بعد كلامي الفوق ده بتغير كلامك ده
بالعكس والله يا فاروق
كده دعمت لى كلامى فيك
إنت زول فارز الشى تب زى ما بقول أهلنا
مارادونا زول ما عادى أبدا
وأنا قاعد أقول للناس إنه أقرب زول لى مارادوناهو يوهان كرويف
وأقرب زول لى بيليه يمكن يكون أوزيبيو البرتغالى
وتحايا للسنى والرفقة الأعزاء
Post: #114 Title: Re: نسميهو شنو لاعب حريف ولافنان Author: رأفت ميلاد Date: 02-27-2008, 09:40 AM Parent: #112
السنى حبيبنا مشتاقين .. ياخى خلونا فى الطاهر حسيب ناس بورتسودان وينم .. أنور كينج ومحمد عثمان .. وكتار
الطاهر حسيب مرتبط بطفولتى وكان بلعب معانا البلى .. عندنا لعبة إسمها "أبو دبة" بعملوا كوم وكل لا عب بحزر يضع بليتين فى أعلى الكوم بحيث يكون "مقنطر" .. بلعبوها عدد غير محدد .. مرات يصل عدد البلى الى ستين سبعين .. "تنيش" من الشخيت بقوة .. البلية التى تضربها يجب أن تخرج من خلف خط آخر من الجهة المعاكسة بحو أربعة أمتار .. والفوز تأخذ كل البلى فى "اللين" .. كان عندما يقبل علينا طاهر حسيب نعدو إليه وكل يطلب منه أن يلعب دوره .. وكنا أولاد ديم مدينة لدينا عنده معزة شديدة .. خاصة لتصدينا لأولاد سكة حديد المشاكسين الذين "يزفوه" عندما يكون مخمورآ .. يلقط "الضراب" بضربة واحد يصيب البلية بقوة يسكن محلها وتطير الى خارج الخط الآخر كأنها نظرية هندسية مدروسة .. ضربة فنانة يشهق لها الجميع .. يحسبها الأطفال فوز عام ويهجمون على "اللين" وكل يملك ما يلتقطه .. يكون الطاهر حسيب الأبعد ولكنه يكون الأسبق رغم إنه لا يعدو .. ويحوز على النصيب الأكبر ليقسمه على الأطفال الضعفاء وصغار السن ..
سأعود لأسلوبه فى اللعب وقصصه وطرائفه داخل وخارج الملعب ..
الليلة الله يحلكم منى ساكت ..
مودتى
معليش يا السنى .. مداختى إتعلقت فوق .. وقلت أستمر من هنا
Post: #117 Title: Re: نسميهو شنو لاعب حريف ولافنان Author: محمد سنى دفع الله Date: 02-27-2008, 10:17 AM Parent: #114
وانا برضو رديت ليك فوق اسفي وفرحتي بيك لذيذة واصل حديث الذكريات
Post: #115 Title: Re: نسميهو شنو لاعب حريف ولافنان Author: حسن طه محمد Date: 02-27-2008, 09:53 AM Parent: #112
والله يا هارون اخوي كلامك صاح مية المية بعد القراناه وسمعناه عن هذا الفنان الكبير وللأسف لم اشاهد كورته. سؤال يفرض نفسه : كيف يكون احساس اي واحد في هرم السلطة الرياضية في البلد ....لما يعرف انوا في نجوم عطروا تاريخ الرياضة في السودان لايستطيعون ان
برضو كلامك صاح مية المية لانهم حتي ما فاضين عشان يعرفو .
انا شخصيا أعرف لاعب فنان من أبناء الحي مثل الفريق القومي وكان من أشهر اللاعبين واسمه كان كل يوم في الجرايد والآن عاطل عن العمل رغم محاولاته الكتيرة للحصول عليه .
Post: #119 Title: Re: نسميهو شنو لاعب حريف ولافنان Author: محمد المرتضى حامد Date: 02-27-2008, 10:44 AM Parent: #115
عمر الفاروق، شاهدت الكثير من الأفلام عن بيليه في السنوات الماضية وكان في قمة مجده عندما حازت البرازيل كأس جول ريميه للأبد وكان هو الكأس الأشهر كما قيل لنا ووقتها كان فريق البرازيل يضم كارلوس البرتو وتستاو وجيرسون وجاييرزينهو ( جادالله بتاع البرازيل) وريفلينو وبعد ذلك بمدة تم إنتاج فيلم سمى ( العالم تحت أقدامهم The World at Their Feet) ، الفيلم دا كانت صفوفو في سينما أمدرمان ونهايتا المحطه الوسطى (لزوم المبالغه) ، وبالفعل كنا من المعجبين ببيليه وكأنه من أولاد ودنوباوي أو المسالمه، لكن رغم أن الفيلم المذكور فيه الكثير من اللقطات البديعة التي جاءت بالحركه البطيئة إلا أن ما جاء به الخرافي دييجو ارماندو مارادونا في 1982 و1986عمل شياطين عديل كده ، هذا المارادونا نسيج وحده ويرجع له الفضل في إعادة جمال كأس العالم إلى الواجهة بعد أن أصبح ماسخا ( كما يقال) بين 1970 وحتى 1978 ايام ناس كمبس. يااستاذ سني ، واحد صاحبي إسمو يحيي بشرى لما شاف ناس كاريكا (الأصلي) بيلعبوا الباص للخلف دون أن يلتفتوا له ويصل للشخص المطلوب ، قال لي الناس ديل زي العندهم مرايات جنب ، أها لما مؤخرا شاف الفاول الشهير بتاع روبرتو كارلوس في فرنسا والكوره لفَّت من (الحيطه) ثم عدلت مسارها ودخلت قون قال إنو الكوره دي يا سايِقا سوَاق يا راكِبا جان.
عليك الله شوف الكروز توماهوك دا كيف،
Post: #118 Title: Re: نسميهو شنو لاعب حريف ولافنان Author: عمر سعد Date: 02-27-2008, 10:22 AM Parent: #1
Quote: ويييييين عماد الخير لاعباالهلال
عماد الخير الا ن مهاجر فى السويد واصبح سويديا وهو مذيع فى تلفزيون السويد بيقدم برامج متنوعة وبرامج مسابقات
وهو كان من احرف لعيبة الهلال وخاصة حين كان يلعب بنادى قلب الاسد
Post: #120 Title: Re: نسميهو شنو لاعب حريف ولافنان Author: محمد سنى دفع الله Date: 02-27-2008, 11:08 AM Parent: #118
صحيح ماردونا ظهر في وقت كل الناس كانوا يملكون المهارات الازمة وتدربوا على حركات صعبة وسهلة عن طريق التدريب والتعليم ولكن ما اتحدث عنه هو ان بيليه ابتكر حركات لم تكن موجوده مثل الضربة الخلفية ( الدبل كيك )) المحاورة بأشكال متعددة فط الكرة والحقها من الجانب الأخر التمويه بالجسد والإتجاه بالجسم الى جهة مباشرة ولعب الكرة في الجهة الأخرى غير المتوقعة بيليه صنع شكل واسلوب وطريقة تقنية طورها النجوم من بعده اتفق معاك ياعمر الفاروق انو ماردونا ظهر في وقت صعب والكباتن بقو منقطينها وحافظين كل لمسة ماردونا اضاف للعبة الكثير ..والأتنين كانوا ملهمين لفرقهم ولزملائهم والأتنين كان عندهم حدس اشبهه ما يكون بالحاسة السادسة المتفوقةمن صغرهماحساسهم بالتفوق والتفرد كان ساكن كل زرة من كيانهم . ماردونا وقع فريسة طموحه ومافيا كرة القدم وبيليه استفاد من طموحه في التغلب على كل المصاعب ليعلم نفسه ويتقن اكثر من خمسة لغات يستفيد من العولمة في نشر صورة مثالية له وتسويق نفسه كملهم لعشاق المستديرة ودعم القضايا الإنسانية ومشاريع الأطفال .. لكن عايز اقول ليك حاجة مهمة جدا ياعمر الفاروق عليك بالكتابه للجرايد السودانية بصورةمنتظمة عن الرياضة في العالم والمملكة والسودان بتكلم معاك جد جد جد جد جد دام صفانا
هذا ما قاله بابكر سانتو عن طاهر حسيب في لقاء له مع جريدة الصحافة
- يقال أنك أفضل لاعب سوداني ، والبعض الأخر يقارن بينك وبين جكسا : طبعاً هذا شعور جميل من الذين يطلقون على ذلك ، أما فيما يخص المقارنة بيني وبين اللاعب جكسا ، جكسا لاعب موهب وفنان ، وهو صديق عزيز بالنسبة لي وكل إجازتي عندما أكون في السودان كنت بسجل زيارة لبعض اللاعبين والأصدقاء بالعاصمة . فكل لاعب له المهارات والفنيات التي يمتاز بها فالمقارنة بين لاعب وآخر لا تقدر تحكم عليها بالنظر للاعب في الميدان فقط ، هناك أشياء يمتاز فيها اللاعب جكسا ، واشياء أخرى يمتاز بها اللاعب بابكر سانتو . فكل لاعب له مفهومه وفنياته ومهاراته ، بهذه المناسبة فانني اري ان افضل لاعب في السودان هو الفذ والذي اثري الكرة واعتبره الافضل في تاريخ كورة القدم السوداني وهو اللاعب (الطاهر حسيب) .
Post: #125 Title: Re: نسميهو شنو لاعب حريف ولافنان Author: محمد سنى دفع الله Date: 02-28-2008, 08:51 AM Parent: #121
ياجماعة صورة لي بابكر سساانتو الطاهر حسيب كمال عبد الوهاب بعدين الباقيين دام صفاكم
Post: #122 Title: Re: نسميهو شنو لاعب حريف ولافنان Author: عمر الفاروق Date: 02-27-2008, 04:43 PM Parent: #1
كل الأخوة المتداخلين : تحياتي وإحترامي .. طيب كلامكم ده كلو جميل وحلو بس كمان يا ريت من خلال البوست ده نطلع بي حاجة مهمة ونسأل نفسنا سؤال مهم: ما هو مقياس الحرفنة والفن في كرة القدم ؟ هل هو فن المراوغة والتحكم في الكرة ؟ هل هو فن إحراز الأهداف والسيطرة على الكرة أكثر وقت ممكن ؟
أخونا وحبيبنا أبو ذر أثار نقطة مهمة شديد مرت مرور الكرام لمن قال : الكورة في الراس مش في الكرعين !!!!
بالتالي عايزنكم تدونا صورة واضحة للحرفنة .. وانا متأكد من صعوبة إيجاد تعريف واضح بالتالي ستنتفي حينها حكاية فلان كان أحرف زول في السودان !! في حلّتنا وأكاد أجزم في معظم(الحلل) بيكون في ناس حريفين للحد البعيد لكن حدّها ميدان الحلّة الصغيير وتحدّي البيبسي يوم الجمعة لمجرد المتعة واللمة الحلوة مع الشباب لينفض الثامر وبكرة تلقاهو بيكابس في المواصلات ويجاري خلف المعايش.. الأمثلة في السودان كتيييرة ولا أعتقد إنها تقتصر على تسمية لاعب محدد لأنو كمان في النهاية التحديد ده بيكون بناء على مزاجية المشاهدإضافة للجانب النفسي والميول في مرات للشعار وفي مرات في التعصب لإبن المنطقة وفي مرات على حسب المزاج .. انا متأكد إنو اي واحد ممكن يكون عندو شخص في راسو وشايف إنو ده أحرف زول (وأفنّ ) واحد.. الرشيد المهدية مثلاً كان بيخت الكورة في راس خط ال18 ويبدا يشوت الكورة في العراضة أيام كانت مشختة أسود وأبيض فيبدأ من أسفل لأعلى يضرب الكورة في الأسود أبيض أسودأبيض أسود أبيض لحدي فوق وبعدين يرجع بالعكس أبيض أسود أبيض أسود .. فايز نصر الدين يقال إنو سبب شطبو من الهلال إنو طارق أحمد ادم قال الزول ده كرهو التمارين لأنو بيقلب ليك طارق ده زي الماحصل شي في التمرين !!! باكمبا لمن كان في مجدو حكى لي إنهم لمن سجلوا جدد في المريخ وكعادة اللاعبين القدامى ماف زول لعب ليهم باص وبقوا لافين هو وسكسك في الميدان ساي (كان تسجيلهم في نفس الوقت) فقال لي ناديت سكسك وقلت ليهو الناس ديل ما شغالين بينا ونحن ناس جداد وانت يا سكسك زول مهذب وصعلقة الكورة دي ما بتعرفا فتعال نقل أدبنا عليهم بي الكورة دي .. وحلف لي إنهم كانوا بيمسكوا الكورة الإتنين من القون للقون وما بيلعبوا باص لي أي زول لحدي ما الناس إقتنعت بيهم ومن يومها وهم في التشكيل..
البوست كبير وما قريتو كلو لكن زى ما قلت ليك حأستمر فى سيرة الطاهر حسيب
قصص ناس سانتو وطرائفه مع المرحوم زراع إلا تفتح لينا بوست جديد بحكى ليك عن سنطة .. وعمار .. وحمورى .. وغيرم كتير خاصة حضرنا بعثة منتخب الجزيرة للصين وكان من أقرب أصدقائنا السر بدوى ..
يُحكى أُستبعدمن الفريق القومى مرتين لإصتدامه مع المدرب الصارم "أستاروتا"
اول مرة رأى أمين زكى يدخن داخل المعسكر بإذن خاص .. أشعل سيجارة ورفض إطفائها .. ورفض كل الأجاويد فتم إستبعاده .. أُعيد بعد مدة منتصرآ على المدرب .. فصارت بينهما حساسية فتم إستبعاده مرة أخرى .. من طرائفه مع أستاروستا .. كان ينفذ ضربة ثابتة مع الفريق على المرمى .. عندما جاء دور الطاهر حسيب .. نفذها بطريقة مغايرة جدآ وأحرز منها هدف رائع .. غضب أستاروستا وأمره بتنفيذ الضربة بالطريقة التى يريدها .. قال له الطاهر حسيب "أعمل بتاعتى أعمل بتاعتك"
كان قبل المباريات تفرض عليه رقابة مثل الإعتقال لكى يحضر المباراة بلياقة كاملة .. وكان الخصوم يعملون المستحيل لإنفكاكه .. يحكى أن أحدهم حاول تعطيله يصدمه بسيارته فى إحدى الأحياء لإقصائه من إحدى المباريات الهامة .. ولكن الطاهر حسيب قفز برشاقة وجلس على مقدمة العربة بدون أى أذى ..
رأيته فى إحدى المباريات برفقة خالى وهو لاعب سابق بفريق الإتحاد وصار رئيسه .. كان الطاهر حسيب لا يعدو كثيرآ .. يتجول فى الملعب بخطوات سريعة ويتواجد دائمآ فى المكان الصحيح .. يكون مراقبآ من إثنان أو ثلاثه .. ينفك من حصارهم بجذبهم خارج أماكن الحماية فيضطروا الى تركه .. وأى فرصة تصل له الكرة يكون المرمى مهدد .. يراوغ بطريقة غير متوقعة .. ويهدف أيضآ بدون توقع .. فى ضربة عالية مشتركة .. لفت نظرى خالى مشيرآ للطاهر حسيب قائلآ "شوف الطاهر ده بعرف الكوره كيف" .. كان يسير فى إتجاه مغاير من مسار الكرة التى قفز إليها عاليآ لاعبان .. إرتطمت الكرة بينهما وطارت رأسآ تحت قدم الطاهر حسيب الذى كان ينتظرها .. غير مسارها بخفة داخل المرمى تحت ذهول الجميع ..
أحيانآ تأتى الى بورتسودان سفن عابرة .. ولكنها تمكث بالميناء فترات تصل الى أسبوعين أو ثلاثة للصيانة أو لأعطال .. بعض السفن بها إمكانيات جيدة .. وبأذن من السلطات يقيمون ليالى غنائية أو معارض أو مدن ملاهى يتكسبون منها لمصاريف إقامتهم .. كانت توجد سفن مصرية وأقاموا ملاهى .. هذه الإشياء تجد إقبال جيد من أهل بورتسودان كنوع من التغير .. من الألعاب يومها توجد منضدة كبيرة حولها حلبة من الحبال تبعد حوالى مترين من المنضضدة المغطية بعلب سجاير الروثمان .. من الخارج يرمى الشخص مبلغ "قرش" .. إذا إستقر على سطح العلبة يمكن إمتلاكها .. كانت من الصعوبة فى شيئ والناس تحاول والمصريين يحصدون فى القروش .. حضر الطاهر حسيب فنادى عليه الجميع بحرارة بأنه الوحيد الذى سيهزم المصريين .. إلتف الناس حوله وتجمهر المصريين لرؤية اللاعب الجديد الذى عليه هذه الهالة .. أخذ الطاهر حسيب قرشآوقذف به حلزونيآ بحيث يحدث صوت .. ولم يستقر القرش لا على الأرض ولا على المنضدة .. وهو يردد عبارات إستعجاب "الله .. راح فين .. الحاصل إيه" وهو يرمى القرش تلو القرش .. وأصبح المصريين يبحثون فى الأرض .. وأتوا ببطارية رغم الأنوار وبحثوا بأيديهم فى التراب .. والقروش تنهمر محدثة رنين فى الهواء ..
إتضح أخيرآ إنه قرش واحد .. يقذفه الطاهر حسيب خلفه ويتلقفه بيده الأخرى ويعيده لليمنى برشاقة لم يلحظها أحد
Post: #124 Title: Re: نسميهو شنو لاعب حريف ولافنان Author: حسن طه محمد Date: 02-28-2008, 08:05 AM Parent: #123
أحبتي
نرجع للاعب محمد حقار ( جـــــــــــــحـــــــــــــر )
جحر من أبناء الشعبية بحري
لعب برابطة الشعبية المشهورة وكان الملعب يمتلئ بالجمهور .
الرابطة كانت تضم لاعبين افذاذ مثل جحر ومانقستو وبحضور عبده الشيخ وشيخ الدين كباشي.
كان جحر أكثرهم متعة في اللعب .
كان مهاجم من الطراز الفريد يذكرك ببيليه وبالمناسبة له شبه شديد في شكله لبيليه.
كان ملفتا للنظر بشكل كبير في طريقة لعبه ومراوغته وأهدافه.
طريقته في المراوغة فريدة . يراوغك في سنتمتر يا السني .
يراوغك في جحر ويبدو عشان كدا لقب ب جحر .
قليل الكلام كثير الأهداف . كان من المفترض ان يلعب للهلال او المريخ ولكن كسبته الموردة مع زميله مانقستو.
هنا اتضح مكر الكورة
اتفق عليهما بقية لاعبي الموردة القدامي
حرموهما من الباصات حتي في التمارين
وبرغم ذلك أصبحا من الاساسيين
لمسكنته وطيبته لم ينال حظه من الشهرة.
لا أبالغ بشهادة من شاهدوه بان مكانه كان من الممكن ان يكون في اي فريق برازيلي .
ولكن ..........جحر كان من المظاليم .
ونواصل يا السني مع تحياتي للجميع
Post: #128 Title: Re: نسميهو شنو لاعب حريف ولافنان Author: طلحة عبدالله Date: 03-01-2008, 11:03 AM Parent: #1
الدكتور العزيز واللاعب الفذ والكوتش الاعز كسلا .. لك كل التحيات والإحترامات والاشواق .. قلت :
Quote: لأن بورتسودان هى مسقط رأسى ومرتع صباى..!
السؤال الأول : يعني بعد ما شاب ودوهو كسلا واللا شنو حكاية كسلا دي بلاي ..؟ السؤال التاني : راجع متين السودان عشان تعمل لينا أكاديمية كرة قدم هناك ...؟ السؤال التالت : لشنو ما شفناك ماسك ليك فريق من الدوري الإماراتي وانت أقدر وأجدر علي ذلك ..؟ السؤال الاخير : وانت عامل كيف يا كوتش وأهلك وأسرتك والجميع ..؟ قبل الخروج : شكرا للفنان القدير محمد سني دفع الله .. قمم لاقت قمم ..
Post: #130 Title: Re: نسميهو شنو لاعب حريف ولافنان Author: كمال علي الزين Date: 03-08-2008, 10:13 AM Parent: #128
Quote: شكرا للفنان القدير محمد سني دفع الله ..
السني يافنان .. إنتا شفتا مداخلة أخونا (طلحة) دي
وقفلت باب البوست وجريت ..
دام صفاكم ياخينا ..
لكن أرجع ..
منتظرين ..
Post: #131 Title: Re: نسميهو شنو لاعب حريف ولافنان Author: محمد سنى دفع الله Date: 03-08-2008, 11:11 AM Parent: #130
كمال الزين طلحة البولع نيران الحماسة كل الناس الحلوة والله يا كيمو طبعا بقى في اتنين كيمو كمال سالم وكمال الزين ود الزين برضو في اتنين ودالزين شوف ياكمال الزين انا طنشت من البوست من قضية سناء وقلت يرجع مع يوم النساء العالمي والقلوب شواهد لقيت البوست مرفوع بي طلحة وكيمو الزين لك الشكر والمودة وبرجع ليكم مع لاعب فنان كان في مدني يطرب ويمتع اسمو عولما او علمه اكتبوها بالطريقة البتريحكم لكن كان معلم عولما الكبير سيد الإسم لعب مع الفلتة سيد مصطفى دام صفاكم
Post: #132 Title: Re: نسميهو شنو لاعب حريف ولافنان Author: عبدالكريم الامين احمد Date: 03-08-2008, 08:21 PM Parent: #131
ياخ ده البوست او بلاش كورنجية وحرفة كبار وولعتوا فينا جمر التيوة والسني لاعب ماتش كبير واحي عمر الفاروق... واللاعب الحريف حريف... عندما زار احدي الفرق الخرطومية ( الاهلي )مدينة جوبا وبزيه الاحمر الفاقع (الذي ليس بفقاعة حمر ةالصهيانة) كان بينهم زول حريف حرفنة تحير سعد زكريا فن وكورة ليها ضل الباص بطلع بالمسطرة وفي المحل الصاح تثبيت بوين وين(الصدر- العضل- وامتصاص 0جب للكورة وهي في مختلف السرعات بظهر الرجل) محاورة وباصات بالكعب كما اوصي اهل الامازون بلعبها.. وباكورد اربعة لساتك فوققققق الزول داك لعاب يااااخي......
رجل اخر يسمي جمال زكريا ويلقب بجمال (بكسا) لاحقا ترك المكلية جوبا وذهب الي اهالي السكورتا في بورتسودان ده كمان كورة تاني ما شفتها قريبات دي الا عند روماريو...
السني ياااخ الحريف حريف بجيك تاني عشان اونسك عن 1-كزرزر احسن راس حربة في العالم.. ثم الاسطوري شومبي والاخير لو اتيح له الذهاب الي الهلال والمريخ لرايتم عجبا في فن الباص الطالع صاح وهو(اسكرو) والكورة في الراس مافي الكراس..
Post: #133 Title: Re: نسميهو شنو لاعب حريف ولافنان Author: محمد سنى دفع الله Date: 03-09-2008, 07:38 AM Parent: #132
محمد حسين كسلا الفنان الدكتور الف تحية حب طبعا متذكر ودي حاجة بتتنسي التقينا والصحفية الرائعة في الأمارات وكنا انا وهي نضع احلامنا في عمل فيلم عنك فيلم وثائقي وانت تستاهل وبالمناسبة بأذن الرحمن سوف اصل خلال هذا الشهر الى الشارقة للمشاركة في ايام الشارقة المسرحية اتمنى ان نلتقي ونتواصل جميل ان تكون انجزت كتابك الأول وهذا جهد خرافي لأننا ثقافتنا تعتمد المشافهة فعلا نحن ناس ونسة ساكت شفاهيين حتى الطيش لابد من الكتابة والمراجع للأجيال القادمة وهذا الكتاب لابد ان تتبعه بكتب اخرى كتب عن نظريتك عن الأهداف والأخطاء الستة كتب عن اولا\د دفعتك كتب عن علاقتك بنجوم السودان كتب عن الطب الرياضي انت اهل لذالك ودايما بقول في طفولتنا بتتنمى الموهبة وانت في طفولتك وبداية الشباب شوفت عباقرة واتجاوزتهم يكفي انكم لعبت مع الطاهر حسيب عارف يادكتور هناك كثير من لعيبة الكرة كانوا عباقرة ولكن الزهد السوداني والتواضع الخيبان مش التواضع الإيجابي بخليهم ما يعرفوا كيف يقدموا انفسهم ولا يستفيدوا من وضعهم وفي نهاية الأمر بكونوا عايشين على هامش التاريخ بدون مال ولا بيت ولا مستقبل عايشين على الذكريات والحنين ويحصل الضياع يا الواحد اتلهى في الشراب يا الواحد قفل البيت عليهو واتوحد يعصره الألم وتتطحنه النكبات ويسحقه الإحباط لابد من عمل لهولاء يادكتور وشكرا على المرور محبة وسلام
Post: #134 Title: Re: نسميهو شنو لاعب حريف ولافنان Author: حسن طه محمد Date: 03-09-2008, 10:31 AM Parent: #133
الفنان الدكتور كسلا
انشودة كرة القدم السودانية
التي تغني بها الجميع
لكم عاطر التحايا
وأخي وصديقي السني بعد رجوعك ان شاء الله ومقابلتكم للدكتور كسلا عايزين نشوف بوست من الوزن الثقيل عن اللاعب الفنان كسلا.
والشكر موصول مقدما لكم .
Post: #135 Title: Re: نسميهو شنو لاعب حريف ولافنان Author: محمد المرتضى حامد Date: 03-09-2008, 11:25 AM Parent: #134
تحايا لأخي العزيز هاشم عجيب طبيب الناس الحالي وطبيب الكوره السابق. والله يا حسن، لا أدري ماالعلاقة بين الحرفَنَه الشديده والإعتزال المبكر.
Post: #136 Title: Re: نسميهو شنو لاعب حريف ولافنان Author: حسن طه محمد Date: 03-09-2008, 02:50 PM Parent: #135
عزيزي العزيز محمدالمرتضي
في اعتقادي أن العلاقة بين الحرفنة والاعتزال المبكر
أن اللاعب الحريف الفنان بيلعب ليمتع نفسه ويمتع الجماهير ودا الهدف الأول والأوحد.
لا ماديات ولا غيره بل يدفع منجيبه ويركب المواصلات العامة لذلك.
أما حاليا فالمال هو الهدف الأول
وحتي حريف هذا الزمن بسبب المال يحاول أن يستمر أطول مدة في الملاعب وهنا تأتي الكارثة.
ولا ايه رأيك ؟
Post: #137 Title: Re: نسميهو شنو لاعب حريف ولافنان Author: محمد سنى دفع الله Date: 03-10-2008, 06:42 AM Parent: #132
Post: #138 Title: Re: نسميهو شنو لاعب حريف ولافنان Author: كمال علي الزين Date: 03-10-2008, 07:54 AM Parent: #137
(*)
السني يافنان
صباح الخير
(كمال عبدالوهاب) ده سموني عليهو
رغم أنني ولدت يوم (مباراة جوبا مالك عليا)
وصاحب الهدف كان (سامي عزالدين) عليه الرحمة
وكانو حايسموني (سامي) لكن جلت
قبلنا بي كمال دي على مضض
أنا شفتا سامي بلعب كتير
لكن ماشفتا (كمال بلعب)
بالله .. كمال ده قالو كان معزبكم يا السني ..
(آآآه إتذكرتا .. إنتا ود متين يالسني)
أكيد ماشفتو ..
(ده عشان لو المدام جنبك) ماتقول غشوها
وأدوها واحد من سنة يك ..
(لكن بيني وبينك .. كمال كيف) ؟؟
Post: #142 Title: Re: نسميهو شنو لاعب حريف ولافنان Author: محمد سنى دفع الله Date: 03-10-2008, 12:29 PM Parent: #138
انداح يا كمال يادكتور بالله سموك على الدكتور جعفر سعيد الريح الفنان والممثل والسينارست الخطير عندو ولدو سماه وليد وهومريخابي اجيهو وليد طاشين وتعال شوف الجرسة كلما اتغلبو اقول عايز اجيب خروف واغير اسم الولد اها نحن عاجبنا اسمك كده اعمل سمايةعليك الخروف ونحن علينا اللهط دام الصفا
Post: #139 Title: Re: نسميهو شنو لاعب حريف ولافنان Author: عبدالله كع Date: 03-10-2008, 08:11 AM Parent: #1
سلام في 3
الاستاذ محمد السني لفيت وجيت لقتك لسه ما عرفته تسميهو شنو
حريف ولا فنان بالرغم من اني قلته ليك (كع) هو الحريف الفنان
Quote: المقارنة الأكثر ضجة هي المقارنة ما بين مارادونا وبيليه وانا وبكل صراحة شايف ماف مقارنة بين الإتنين
الحبيب عمر الفاروق انا معاك .
Post: #140 Title: Re: نسميهو شنو لاعب حريف ولافنان Author: محمد سنى دفع الله Date: 03-10-2008, 09:38 AM Parent: #139
طلحة ياطلحة يا بتاع المشاكل كسلا لعب فيها ونال تسميتها ومدني لعب فيها وحبب خلق الرحمن فيهو والهلال لعب فيهو والعالم كلو سمع بيهو طلحة كده انقل لينا مباريات الأسبوع ورينا نجومنا الجديدة دام صفانا
Post: #141 Title: Re: نسميهو شنو لاعب حريف ولافنان Author: حسن طه محمد Date: 03-10-2008, 09:42 AM Parent: #140
Quote: طلحة ياطلحة يا بتاع المشاكل كسلا لعب فيها ونال تسميتها ومدني لعب فيها وحبب خلق الرحمن فيهو والهلال لعب فيهو والعالم كلو سمع بيهو طلحة كده انقل لينا مباريات الأسبوع ورينا نجومنا الجديدة دام صفانا
يومك فل يا السنى بالله كسلا زاتو معانا ونحن نفتى .. أدينا لكزة ياخى وطلع كمان من أولاد ديم مدينة
مشكلتى مع محمد حسين كسلا كبيرة خلاس أنا مريخابى بالميلاد طبعآ .. فى مدرجات المريخاب لما كسلا يعمل حركاتو العجيبة الواحد بنسى نفسو وإديها جفلة ولا كوراكة .. وعينك ما تشوف النور .. وقميصك الأصفر اللابسو يبقى طراحة تاكسى .. إلا يطلعنك كرعيك
مرحب بالعظيم الفنان محمد حسين كسلا
Post: #144 Title: Re: نسميهو شنو لاعب حريف ولافنان Author: عامر تيتاوى Date: 03-10-2008, 01:44 PM Parent: #143
ياجعفر وياجعفر طبعا ده يالسنى ما جعفر سعيد الريح وانما جعفر عبد الرازق احرف جناح يمين فى زمن ما ومن شدة ماكان بلخبت الباكات ويعمل ليهم وجع ركب كان المريخاب لما جفر سجل فى الهلال بلعبوا ليهو كمال عبد الغنى ويشتغل معاهو جمال ابو عنجة ( مساعد مخرج ) بس عشان يطلعوا منو الكورة فى الاوت وجعفر الملكوج ده ارتكب جريمة نكراء فى حق مدافع اهلى مدنى عصام دياب فى مبارة فى كاس السودان زمان امام الهلال ولما كان جعفر مدى ضهرو لعصام دياب وبيتراقص يميمن وشمال كان اخونا عصام عامل زى التلفون الهزاز فى التربيزة لما جعفر لف اللفة اياها باتجاه قون اهلى مدنى عصام بقى زى العربية الاوبيل لما تكسر ركبة ورقد رقدة واحدة فى الواطة واظنوا تانى مادقاها مع انو كان حريف لكن جعفر ما كان بيرحم
تحياتى للدكتور واللاعب الفذ محمد حسين كسلا الذى جاءت به الاقدار يوما ليسكن لبعض الوقت بجوارنا فى امتداد الدرجة الثالثة بالخرطوم فى بيت الراحل البدرى الهادى ابرز اقطاب الهلال فى السبعينات والثمانينات وفى تلك الايام تم تسجيل كسلا فى الهلال بدلا عن المريخ فهل يتذكر الدكتور تلك الايام
Post: #145 Title: Re: نسميهو شنو لاعب حريف ولافنان Author: محمد سنى دفع الله Date: 03-10-2008, 09:18 PM Parent: #139
كع ما تقوم هسي تديك كع لمن تقول كع النقارنة عندنا ما واردة كلوا في الفن الكروي جمال كع ارمي التعشيقا وقوم كوع في حتة فيها ضول دام صفانا
Post: #146 Title: Re: نسميهو شنو لاعب حريف ولافنان Author: محمد سنى دفع الله Date: 03-10-2008, 09:18 PM Parent: #139
كع ما تقوم هسي تديك كع لمن تقول كع النقارنة عندنا ما واردة كلوا في الفن الكروي جمال كع ارمي التعشيقا وقوم كوع في حتة فيها ضول دام صفانا
Post: #147 Title: Re: نسميهو شنو لاعب حريف ولافنان Author: مامون أحمد إبراهيم Date: 03-10-2008, 11:19 PM Parent: #146
Quote: (لكن بيني وبينك .. كمال كيف) ؟؟
دى مابتتحكى ياكمال ! وكوره زى دى مابتتشاف تانى إلا كان فى الجنه !
أوإمكن إكتشفو تكنولوجيا تجمع اللقطات والصور من الماضى التليد !عشان تشوف ياكمال كيف كان كمال بستلم الكوره من الهوا زى الكأنها ملصقه بى لصقه ويرسلها للشبك فى الحِته العايزها بالضبط , وتكون ماشافت الواطه ! ده كلو فى جزء من الثانيه ! وكان مغالتنى أسأل ناس نيل مدنى ! ..... لا وبعدين أقول حاجه ياكمال أهو ده السنى سامعنى , رونالدينهو العامل ليكم لخمه هسى ده , شويه كده ويكون كمال ! أما جكسا وما أدراك ما جكسا ! ده عباره عن مزيج من إتنين عاملين ضجه كانو فى العالم ده ! ماردونا وزين الدين زيدان ! تجمعم الإتنين يدوك جكسا ! تضربم فى واحد يدوك الدحيش بعدين لعلمك , جكسا بتفوق على ماردونا بالعطائر ! وعلى زيدان بالباص البياكل النجيله لما تسمع صوتو وهو ماشى فيها زى صوت الدبيب فى الحشيش , لما تسمع هسيسو إِِِِِِِِِِِِِِِِِِِِِشششششششششششش ماشى زى صوت السيل ! ومرات زى الضل الدخل القش وما قال كش ! .... ياخى شفت ليك زول بطير بى رجلينو الإتنين ؟!!! أنا شفتو ! ده كان جكسا ! وكان كان لى كسلا المعانا هسى دى وبسمع فى كلامى ده أسأل منو الإمارات الجنبنا دى , ومن سانتو وبشاره وفوزى المرضى وحمورى ... ياسيد لحد الآن فى لاعب فى الإمارات إسمو كسلا ! وبعدين ياكمال إنت ماشى بعيد ليه ! ماهو أنا معاك هنا .. حدد يوم وتعال كان ما ضقلت ليك بالعصايه ما أكون أنا ودالعباسيه المرق منها جكسا ده ! علماً بأنو أنا كنت لاعب درجه واطه ساكت , وماسمعو بى غير ناس حلتنا, وناس الضب وقاسم ومصطفى النقر فى ودنوباوى الأميريه !
السنى , كده حتغرينا وتخلينا نتكلم عن الماضى الجميل ! مالك علينا ياخى !ماتخليهامستوره , لأنو فى ناس ما حيصدقونا !
لكن ما مشكله المابصدق يجيب كورتو ويجى .
وبى خرفنا ده حيكون فى كلام !
Post: #149 Title: Re: نسميهو شنو لاعب حريف ولافنان Author: نادر الفضلى Date: 03-11-2008, 05:46 AM Parent: #147
الفنان الحريف السنى تحياتى بوست شيق بتاع فنان حريف مستخرجاً ذكريات مخزونه عن مبدعى الكوره
إجابه على السؤال عنوان البوست فى رأى اللاعب الحريف هو الموهوب المتحكم فى الكورة. والفنان الذى يوظف موهبته وعقله للعب الإيجابى وهو الذى يمكن أن نطلق عليه لعاب من أشهر الحرفاء الفنانيين اللاعبين دكتور كمال عبد الوهاب وكان الهتاف المحبب للمريخاب كمال لعاب يا هلالاب (بجى راجع لكمال)
لم أحظ بمشاهده الطاهر حسيب (الشغلانه جابت ليها حساب عمر) وكذلك لم أحظ بمشاهده القانون برعى أحمد البشير ولكن سمعنا تميزه فى تطويع الكوره بالقدمين والرأس لقب بالقانون على آلة القانون فى الموسيقى العربيه
سمعت ايضأ بواحد حريف جداً إسمه كمال سينا لعب بالمريخ لم يعمر طويلاً فى الملاعب
من الحرفاء الذين حظيت بمشاهدتهم: كمال عبد الوهاب، جكسا، بشاره، بشرى، عز الدين الدحيش كمال بنى، عبد القادر مرجان (قدوره)، السر كاوندا، كسلا بابكر سانتو، الفاضل سانتو، محمدعبد الصادق سانتو الخرطوم، جاد الله، عمار خالد، يوسف مرحوم، نجم الدين حسن، أسامه التجانى، يوسف أبوصلعة، حسبو الكبير، عادل أمين، سامى عز الدين .....
* وهاشم عز الدين الصادق (يا السنى قلته بتجيهو راجع .. منتظرين) أها هاشم لو لعب بالهلال أو المريخ كان حيكون من أشهر وأعظم من لعبوا كوره فى السودان!
ما ننسى حراس المرمى: سبت دودو، عبد العزيز عبد الله، النور عبد القادر، الطيب سند، حامد بريمة
Post: #150 Title: Re: نسميهو شنو لاعب حريف ولافنان Author: حسن طه محمد Date: 03-11-2008, 08:07 AM Parent: #149
الفنان جد السني
بوست خفيف الدم شغلني بصراحة شديدة ومداخلات أخونا مرتضي بيخليك تفكر اكتر من مرة .
ايه رايك تدينا شوية من نكات الملاعب.
ودام صفانا يا سيد الاسم .
Post: #153 Title: Re: نسميهو شنو لاعب حريف ولافنان Author: محمد سنى دفع الله Date: 03-11-2008, 09:50 PM Parent: #149
نادر الفضلي التحية والتقدير ولك جزيل الشكر على الدعم الغير محدود بمروورك هنا وانت في البلاد البعيدة ومن زمن والمنى ان التقيك حدثني عنك الفنان الراحل المقيم هاشم ميرغني حينما زاركم وقدم فنه الساحر لكم جاء مبهورا وحزينا في نفس الوقت من العقول المحترفة السودانية في الغربة والتي هاجرت لتستقر في البلاد البعيدة شكرا لك نادر اخي والمنى ان نلتقي ومنتظرين حكاباتك مع لعيبتك المفضلين وسحرة مودتي ودام صفانا
Post: #152 Title: Re: نسميهو شنو لاعب حريف ولافنان Author: محمد سنى دفع الله Date: 03-11-2008, 10:06 AM Parent: #147
مأمون ياقريبي العباسية وميدان الربيع تفتح جكسا وسطوع كمال عبد الوهاب ليك حق تكون كتاباتك بها كل الجمال ده وانت الشوفت الجمال في ابدع صورو ليك المحبة وتتداعى احكي لينا عن كمال عبد الوهاب وعن جكسا ولعبية نادي الربيع زمان دام صفانا
Post: #151 Title: Re: نسميهو شنو لاعب حريف ولافنان Author: عمر الفاروق Date: 03-11-2008, 09:57 AM Parent: #1
Quote: ايه رايك تدينا شوية من نكات الملاعب.
من النكات المشهورة والتي ربما قيلت في لاعب المريخ جاد الله (ربما لاعب اخر) إنو جاد الله كان كتير الجلوس في دكة الإحتياطي فقام طرح لي الباقين في كبنة إحتياطي إنو لو أي لاعب من الأساسيين أصيب والمدرب قال لي واحد من الإحتياطي يدخل فلازم نرفض عشان تاني ما يعملوا لينا كده ويرمونا في الاحتياطي.. وقد كان ففي مباراة للمريخ وفريق اخر اصيب احد اللاعبين فقام المدرب قال لي اللاعب الأول يا فلان قووم سخّن .. قال ليهو والله يا كوتش ما قادر حاسّي إنو كراعي مضروبة .. قال لي البعدو يا فلان قوم سخّن .. فقال ليهو والله يا كوتش بطني طامّة ما قادر.. قال للبعدو طيب قوم إنت .. قال ليهو يا كوتش ما عايز ألعب.. فقال لي جاد الله قوم يا جاد الله سخّن .. فررررررررررر جاد الله قام جاري ليك على اللاين وعمل الأحماء وجا للإحتياطي وقال ليهم ما معناه: والله يا فارات انا كان قعدت رجيتكم لي يوم الدين تاني ما أدقها ويقال من يومها وهو لاعب أساسي ..
موقف طريف حصل مع لاعب الهلال ياسر أبو ورقة وبعض الشباب من لاعبي هلال مريخ موردة ويقال إنو كانوا في دورة سداسيات في حي العمدة (احد احياء امدرمان) وكان من بين اللاعبين تقريباً اللاعب محمود العطا وهو لاعب الموردة .. المباراة النهائية كانت ضد فريق من النوبة عضلاتهم تبش والواحد لو دفرك يرميك هنااااااااك .. جماعتنا خافوا وقالوا والله الناس ديل لا بنغلبهم ولا حاجة وكمان حا يدقونا .. ود العطا قال ليهم يا شباب ما مشكلة انا بتصرف .. فعلاً مشى ليك للفريق التاني ونضم معاهم شويتين وجا راجع .. لمن ختوا الكورة في دائرة السنتر عشان تتلعب أول ما الحكم صفّر توووشك ود العطا شال الكورة وتووووفك شاتا في القون والمباراة إنتهت بعد داك بالهدف الواحد ده وشالو الكاس .. في الحافلة ناس ابورقة سألوهو قالوا ليهو إنت قبيل قلت للناس ديل شنو ؟ قال ليهم والله بس قلت ليهم يا شباب الحكم لمن يصفّر في دقيقة حداد على روح فقيد الرياضة(قطع إسم من راسو) فعشان كده ماف زول يتحرك
Post: #155 Title: Re: نسميهو شنو لاعب حريف ولافنان Author: محمد سنى دفع الله Date: 03-11-2008, 09:58 PM Parent: #151
حسن طه عمرالفاروق انا شاكر ليكم اهتمامكم المتواصل ولكن لانريد ان نبعد عن هدف هذا البوست عن الاعب الفنان وحريف وساحر بـــس عشان كده حأفتح بوست جديد بهذه الفكرة الظريفة لنتبادل فيه طرائف المجنونة البوست اسمو يا سامي ..لالالا
Post: #156 Title: Re: نسميهو شنو لاعب حريف ولافنان Author: محمد سنى دفع الله Date: 03-12-2008, 10:07 AM Parent: #155
واحد من الأدهشونا بكورته العجيبة وقفشاته الازعة وطرائفه الساخرة عامر عبده ساحر كورة بديع الحركة بالكرة يطوعها ويروضها ويتحكم فيها كأنها مربوطة بخيط لعب في مدني والخرطوم وفي الفريق القومي في زمن كان الاعب يبحث عن خانةليستقر فيها فلا يجد مكانا له بين العمالقة عامر كان لاعبي المفضل
Post: #157 Title: Re: نسميهو شنو لاعب حريف ولافنان Author: نادر الفضلى Date: 03-12-2008, 10:24 AM Parent: #155
Quote: نادر الفضلي التحية والتقدير ولك جزيل الشكر على الدعم الغير محدود بمروورك هنا وانت في البلاد البعيدة ومن زمن والمنى ان التقيك حدثني عنك الفنان الراحل المقيم هاشم ميرغني حينما زاركم وقدم فنه الساحر لكم جاء مبهورا وحزينا في نفس الوقت من العقول المحترفة السودانية في الغربة والتي هاجرت لتستقر في البلاد البعيدة شكرا لك نادر اخي والمنى ان نلتقي
يا سلام يا السنى ياخى ما بقول ليك ذكرتنى بالعزيز هاشم ميرغنى لأنه حاضر دائماً و محفور فى الذاكرة ولكن ورود سيرته يبعث أطناناً من السعاده والحزن أسعد بإسترجاع شريط لا نهائى من معايشه وتفاعل وجدانى بإبداعه الفنى الفريد منذ زمن بعيد وما زلت! وأسعد وأنا أسبح فى ذكريات ذلك الإنسان الرائع الشفيف صاحب القلب الكبير الملىء بالمحبه والصدق والوفاء أسعد بإجترار ذكريات أيام لن تتكرر عشناها مع هاشم ليست فقط إستمتاعاً بفنه الغنائى ولكن أيضاً بحلو معشره وحديثه وشخصيته التى تدخل قلبك مثل أغانيه. وأحزن وما زلت حزيناُ أشد الحزن على فقده يرحمه الله. وما قمت به من حفاوة للمرحوم هاشم عند زيارته لأمريكا أعتبره شىء لا يذكر امام فنه الراقى الذى هو جزء من ثوابت فى حياتى تصاحبنى منذ عهد الصبا!
عذراً إن خرجت عن موضوع البوست ولكنها خواطر أبت إلا أن تخرج و لربطها بالبوست فهاشم ميرغنى حريف وفنان إلى حد الإعجاز حريف أدب وشعر، وعزف على العود، وتلحين، وتطريب، و تعامل وونسه
أخى السنى أتمنى كما إلتقينا عبر هاشم وعبر هذا البورد أن نلتقى يوماً و مصير الحى بلاقى الحى
ولك ودى وتقديرى
Post: #161 Title: Re: نسميهو شنو لاعب حريف ولافنان Author: محمد سنى دفع الله Date: 03-12-2008, 02:48 PM Parent: #157
شكرا نادر والتحية موصولة الى كل معجبي الفنان الراحل هاشم ميرغني لك الود وكل الموضوع فن في فن تحية ومودة دائمة ربما نلتقي دعواتك
Post: #158 Title: Re: نسميهو شنو لاعب حريف ولافنان Author: عمر الفاروق Date: 03-12-2008, 10:31 AM Parent: #1
من اللاعبين الموهوبين والذين لم نتمكن من مشاهدته كثيراً ربما للعبه للمريخ اللاعب إبراهومة المسعودية الشهير بي " الديسكو" ..
أكثر اللاعبين شهرة ولم نلحق بهم إلا في أواخر مجدهم هم الثنائي حمد والديبة .. أتوقع أن الكثيرين شاهدوهم عن قرب فليتهم يحكون لنا عنهم .. صراحة الديبة الذي أشاهده يتحدث في برنامج عالم الرياضة تشعر أنه كان لاعب " عنقالي " وبتاع مشاكل ولكن الحقيقة تقول إن لاعب حريف وبتاع مشاكل..
Post: #159 Title: Re: نسميهو شنو لاعب حريف ولافنان Author: محمد سنى دفع الله Date: 03-12-2008, 12:30 PM Parent: #158
عمر الفاروق مالك بتلخبط ابراهومة الديسكو بتاع بحري الاعب الحريف لعب في الهلال وابرهومة المسعودية لعب في المريخ وسموه على بتاعنا بتاع فريق اللهبة ما تلخبط الدبسكو كان ممتع وحريف ولاعب عندوباصات بالملي اما الديبة ده شيطان الكورة بسوق الكورة زي المعاه عفريت كان فعلا شقي ونجاااضة بنجض الإدارة وبوقف شعرها قروون قروون لكن كان دايما على حق وبالمناسبة الشيطنة والشقاوة جزء من التكتيك البتبعو كثير من المدربين وبقودوا بيه الحرب النفسية على الفريق الخصم شكرا عمر الفاروق وحنكون شفالين كده مرة هنا ومرة هناك غب يوست الطرايف لقيتني كيف ؟؟؟
Post: #160 Title: Re: نسميهو شنو لاعب حريف ولافنان Author: محمد سنى دفع الله Date: 03-12-2008, 01:18 PM Parent: #159
تيتو تيتاوي ليك المودة كيفك يا ابوالرياضة عايزين الخكايات بالله غربل لينا حكايات مهضومة وبعدين ما تنسى فتحنا لينا بوست للطرائف الرياضية اسمو ياسامي لالالالا اختار لينا كم طرفة ظريفة وابعثه لينا هناك منتظرين
Post: #164 Title: Re: نسميهو شنو لاعب حريف ولافنان Author: محمد سنى دفع الله Date: 03-13-2008, 10:32 AM Parent: #160
ياجماعة كان في مداخلة هنا بتاعة الفنان الموسيقي ازهر صاحبي راحت وين ردينا عليها وراحت وين ؟؟؟؟
Post: #165 Title: Re: نسميهو شنو لاعب حريف ولافنان Author: محمد سنى دفع الله Date: 03-13-2008, 10:51 AM Parent: #164
برد عليك ياصاحبي الفنان ازهري الموسيقي الفنان والواحد لمن اكون فنان بحب اللعيبة الفنانانيين كريشنقا متعة الأنظار كان لاعب فلته لكن لو تتذكر يا ازهري كريشنقا كان معاهو لاعب حريف وخلوق وفنان ساحر بكونوا الأتنين ثنائي اسمو عبد الكريم اها عبد الكريم ده في الحسبة خالنا يازول لقيتني كيف انا الكورة دي ما بصاقعني فيها الا عمر الفاروق وقليل من النفر حلوة ؟؟؟
Post: #166 Title: Re: نسميهو شنو لاعب حريف ولافنان Author: محمد سنى دفع الله Date: 03-13-2008, 10:56 AM Parent: #165
ياجماعة في مداخله كانت للعم ابوساندرا برضو اختفت شنو الحكاية عين ولا هكر ولا في زول حاسدنا في البوست ىالسمح ده ولا ده فايروس انطلق فينا كده حنديها صنه ونشوف
Post: #170 Title: Re: نسميهو شنو لاعب حريف ولافنان Author: محمد سنى دفع الله Date: 03-14-2008, 06:04 AM Parent: #166
ازهري ياقريبي لك التحايا العطرة والمودة النقية كان كتبت ليك لكن ردودي بتضيع في الهوا ومش عارف ايه الحاصل وكل كتاباتك بتكون برة البوست اسمك بجيني بالأحمر موجود على البوست لكن جوة بكون اخر مداخلة حاجة تانية ارد عليك تاني قلت ليك ناس ابونا والماما اتولدوا واتربوا في الفطينةوزي ما حوها من زمنا بعيد مهاجرين محصلين المهدي برضو سافروا منها لي بلاد الدنيا القريبة والبعيدة ومن ضمنها الدويم لينا اهل ماشاء الله الدويم هذه المدينة المنارة لك محبتي لمن نشوف مداخلاتك دي بتمشي وين ؟؟
Post: #171 Title: Re: نسميهو شنو لاعب حريف ولافنان Author: محمد سنى دفع الله Date: 03-14-2008, 06:14 AM Parent: #170
ازهري صديقي وصاحبي اللدود وقريبي الحنين البكاي عارف الظاهر الكبر حصل كلنا بقينا بكاييين دابز لقيت مداخلاتك فوق الوداها فوق شنو ؟ ما عارف ..؟؟ ياخي انا موافق علة التكريم ودخول الدويم وهذا الوسام على صدري والكلام ده قريب بأذن اللخ اتفقنا انا والأخ الفنان التشكيلي صديقي العزيز هيثم الطيب انا نمشي الدويم سوا لاسباب كتيرة وجميلة والكلام ده في الصيف الجاي دعواتك يلا كلمنا عن لعيبة تانية انت ذكرت عبدالله وعبد الماجد عايزين لاعيبة تانية كانو سجرة تيوة لك المودة تمساح النيل تعال ليه الوسام من ستة 1908 ؟؟؟؟؟؟ منتظرك ولعيبتك الفنانيين
Post: #172 Title: Re: نسميهو شنو لاعب حريف ولافنان Author: محمد سنى دفع الله Date: 03-14-2008, 01:02 PM Parent: #171
مدني الكرة والفن والأدب الثقافة والموسيقى العجب اها كان فيها فريق مدني كلها تتفرج فيهو اسمو العمالقة كان يرتدي قمصان بضاء وخضراء به مجموعة من اللعيبة اصبحوا فيما بعد من اشهر اللعيبة على مستوى السودان يا ناس مدني بتتذكروا العمالقة العمالقة العمالقة
Post: #173 Title: Re: نسميهو شنو لاعب حريف ولافنان Author: محمد سنى دفع الله Date: 03-14-2008, 02:38 PM Parent: #172
العمالقة الكان فيهم الأسيد ومحمد يماني وقلة العمالقة كات جمهور مدني بتابع مبارياتهم زي مباريات الدوري المكان البلعبوا فيهو تلقا الناس زحمة زي الفي اهلي اتحاد لمن تمد راسك تعاين تلقاهم العمالقة
Post: #174 Title: Re: نسميهو شنو لاعب حريف ولافنان Author: محمد سنى دفع الله Date: 03-14-2008, 10:47 PM Parent: #173
له الرحمة والمغفرة لاعب سطر اسمه بأحرف من نور معلم واسطى ابدع في الميادين الخضراء واطرب كل الجمهور اسعدهم بفنه وعلمه وادبه وجمهورنا فنان لايطلق الأسماء الا لمن يستحقها اطلقوا عليه الفن صفة لفنه الذي نشره في الملاعب سموه ســـــعــــد الــــفـــن لاعب فنان وحريف لاتنسوا هذا الأسم ســــعــد الـــفــن له الرحمة والمغفرة بقدر ما اعطى الملاعب من فنه
Post: #175 Title: Re: نسميهو شنو لاعب حريف ولافنان Author: محمد سنى دفع الله Date: 03-16-2008, 05:54 AM Parent: #174
لاعب فنان وساخر ولو لعب بصورة جادة كان له مكانة كبيرة يعرفون طريقته من شاهده وهويتفنن بالكورة كان يدخل الميدان في كامل اناقته اول من ارتدى طقم الكورة بلون واحد والكطدارة كان يفصلها بلون الطقم يعني كدارة سودا عليها ثلاثة خطوطبلون الطقم ولو ضربتو ووقع الله قال بي قولك التفت عليك ومن لسانو الساخر :: ما تلعب لعب نضيف هي كورة ولا مصارعة لاعب عليه الرحمة والمغفرة لاعب فنان وسريع البديهة كان اسمو زراع ...
