Post: #1
Title: رحلة طير
Author: مازن الجمّال
Date: 02-16-2008, 10:29 AM
الخير في الطير البلعو الريح
الطار في الليل من غير ترويح
............................
كايس لي وطنا كونه فسيح
لي موية وخضرة ونسمة ريح
لي شعبا طيب وقلبه جريح
مجروح في مشاعره ودمه يسيح
ماتت احلامه وحظه الراح
معفوصة بجزم اقداره ارواح
والارض الكانت ليه براح
اندفنت بي دم الأشباح
والكل أصبح املاك سفاح
حكم الأرض الكانتلو براح
والطير فارق احلامه وراح
واصبح في عالم مجهول لاح
|
Post: #2
Title: Re: رحلة طير
Author: مازن الجمّال
Date: 02-16-2008, 10:31 AM
Parent: #1
الطير اتلفّت وين يبدا
والوطن الراح بوراو عدى
وصوت الخوف للصدى رد
......................
الطير اتذكر زمنو الراح
اتذكر اهله وحبه الفاح
اتذكر شلة ونسة فصاح
لمة حبان وبحور افراح
واتذكر امه مع الفجرية
اتوضت صلت ركعة هدية
وجاتو تصحيه بكل حنية
يا طير قوم اتوضا وصلي
واكسب خيرها دي دنيا رثية
وفجاءة اتذكر بطش الظالم
جاهم في ليل منحوس غايم
ضبح اولاد بلده حمايم
وقرض الطاير منو وحايم
وفتّح لعيونه واتلفّت
واوجاعه المرة عليو حفّت
وعيونه عليها دموع جفّت
وانوار الحلم وراو خفّت
وعاودله ضلام الليل وانينه ..
|
Post: #7
Title: Re: رحلة طير
Author: هند محمد
Date: 02-16-2008, 11:38 AM
Parent: #2
سيبو الطير يتخيل ويحلم
أنو الدنيا ربيع ومواسم
أنو الحب إتمدا شراعو
سفينته تصارع موج الباطل
أنو الطيبة أمواجها أتحدت
غمرت أرض الخوف الغاشم
وأنو الخير أتشكل غيمة
غطت شبح الجوع الكافر
سيبو يسافر ويبدأ الرحلة
شان ما يلقى الآرض الخاطر
فيها يغنى وينسى همومو
وبرضو يحقق أحلآم باكر
يبنى العش ويربى صغارو
ينسى هموم الزمن الغابر ..
قدر الطير أخطار الرحلة
قدرو يعيش فى الدنيا مسافر
ليه ما يحلم ينسى الهجرة
ويعيش فى الآرض الفيها براحو
بس .... ياحسرة
قدرو يواجه ظلم الدنيا
وقطرة دمو تسيل بوراهو ..
|
Post: #10
Title: Re: رحلة طير
Author: مازن الجمّال
Date: 02-16-2008, 07:48 PM
Parent: #7
Quote: سيبو يسافر ويبدأ الرحلة
شان ما يلقى الآرض الخاطر |
ديمة مسافر فاقد خطة
سارح في ارض الله مواصل
فاقد للدرب البوصلبو
حد الحلم الوعد الفاصل
وكل ما يشوف الامل الباكر
بلقى سراب دايما متواصل
ويرجع تاني لنفس النقطة
ويجمع خوف تحصيل الحاصل
......................
هند يا صديقتي الجميلة
ذكرتيني بفترة المجاداعات الحلوة ديك
خليك قريبة دايما ويللا نواصل
|
Post: #3
Title: Re: رحلة طير
Author: مازن الجمّال
Date: 02-16-2008, 10:33 AM
Parent: #1
والطير الواجه وش الريح
هلكان وبعافر وجوعه يصيح
.......................
قبّل من دربه قراره صريح
يرجع للغربة بدون ترويح
ودموعه الحارة بدت تنزل
تغسل من قلبه هموم وتريح
وافكار الطير راحت لبعيد
لي وطنا ينزل فيه نزيح
والطير في طريقه لقالو ضريح
والناس حوالينه وكله بصيح
ومعاهم شيخ واقع تسبيح
والطير قرّب عاوز يندل
للصورة الواضحة الليو تكمل
والكل مشغول عنو ومُهمِل
والطير بعيون الدهشة وصل
في الارض إنهار وقليبو وقع
من شاف الجوة ضريحه نزل
الشعب الصابر الموته حصل
واتذكر ارضه وكله أمل ..
|
Post: #4
Title: Re: رحلة طير
Author: مازن الجمّال
Date: 02-16-2008, 10:35 AM
Parent: #1
الطير لملم أحزانه وطار
والجو حولينه غيوم وامطار
.........................
والرعد الصاخب الضارب الغيم
اتذكر بيو غضب الجبار
الزار الارض الواسعة نضار
دمر اشجارها وسابها دمار
والطير مسكين هلكو المشوار
خارت قواه من الاسفار
غمض لعيونه وغاص في ظلام
يائس في ليله بدون احلام
والريح اتولت امر الطير
كانتلو وسادة خير وسلام
هبطت بيو في أرضاً واسعة
مفرودة سهول وحدودها ضلام
والطير النايم وحلمه جميل
راقد في غيم ابيض نسّام
وأمه الطيبة الحلوة عيونا
بانتلو في توب ابيض قسام
قالتلو يا طير فتّح عينيك
ده دربك ويل ومخاطره جسام
وفجاءة الغيم أصبح نيران
وحرقت جوف طيرنا الحيران
وانتفض الطير من هول احلامه
وفتح لعيونه وكان في أمان
|
Post: #8
Title: Re: رحلة طير
Author: هند محمد
Date: 02-16-2008, 11:40 AM
Parent: #4
إحساسك همّ الطير الهَاجر
إحساسى التوأم لى إحساسك
وكيف ما نحس بى طول الرحلة
وكيف ما نحلم يلقى مرادو
وزى ماهمنا جبر الخاطر
همنا يوصل لى أحبابو
ينسى همومو ونزف جروحو
ينسى عذاب الزمن الغادر
يوصل أرضاً فيها الطيبة
ونلقى الحب والطير أتلاقو
تبدأ الإلفة .. وينسى الحيرة
ينسى الخوف ويعيش الحاضر
ونسعد انحنا قلوبنا تغنى
ونهدى الحب أحساس وتمنى ..
|
Post: #12
Title: Re: رحلة طير
Author: مازن الجمّال
Date: 02-17-2008, 12:09 PM
Parent: #8
Quote: إحساسك همّ الطير الهَاجر
إحساسى التوأم لى إحساسك
|
الطير محروم من وطنو دوام
والغربة في دمو مرض هدّام
حرقت اعصابو من التفكير
هردت ليو قلبو بخوفا دام
واصبح خواف مرعوب مهزوز
زي المسجون الراجي إعدام
قاعد بس يحلم لو يرجع
لو حتى يعيش بقرار والزام
ويمر اليوم وتفوت ايام
وتموت آمال وتزيد احلام
وده كلو كمان من عمر الطير
وامراض الغربة معاه لِزام
|
Post: #5
Title: Re: رحلة طير
Author: مازن الجمّال
Date: 02-16-2008, 10:38 AM
Parent: #1
الطير فتّح لعيونه وقام
والدنيا صباح ونسيم وغمام
........................
بحلق حولينه وكله ذهول
من حسن المنظر كان بسام
والخضرة عجيبة امامه سهول
وزهور الفل زادتا انسام
وجداول موية خريرا عجيب
مناسبة موسيقى من الأنغام
والطير إحتار من المنظر
معقولة يكون لسة بيحلم !!؟؟
أو إمكن مات في الرحلة الشوم
وفتّح لعيونه في جنة سِلِم
والطير إتلفّت حوله وحام
إمكن يلقالو دليل ينضم
والجنة دي واسعة وخيرها وفير
بس خاوية كمان من زول بنضم
والطير منحوس ..
في الجنة يكوس ..!!
كايس لي شر حظه المنحوس
الجنة يا طير جوها الأشرار
قلبوها دمار والدنيا عبوس
شتتو سكانا واطفالا
برجول الشر الكل مديوس
والفاضل من الجنة يا طير
سموه الكل ( وادي المنحوس )
أطلع يا طير من وادي الشر
وامسك لطريقك وللخير كوس .
|
Post: #6
Title: Re: رحلة طير
Author: هند محمد
Date: 02-16-2008, 11:37 AM
Parent: #1
رحيل الطير أيام وليالى ..
كان للآرض الفيها براحو
آملو يلاقى الضل والراحة
ووطناً يمسح دمع أحزانو
وأرضاً فيها النيل والخضرة
رخية وتصبح زى أوطانو
حلمو زهور ورياض الجنة
شعاع الشمس المنو صباحو
نسيم الليل الدافئ يداعب
خصلات ريشو ونبض أحساسو
غايتو سلام ووئام ومحنه
عالم حب ..الصدق أساسو
شوقو لهمسة وبسمة جميلة
تطفئ النار وتداوى جراحو
أملنا يلاقى الراحة ويوصل
دنيا جميلة يصادف آحلامو ..
|
Post: #9
Title: Re: رحلة طير
Author: هاشم أحمد خلف الله
Date: 02-16-2008, 12:44 PM
Parent: #6
مازن وهند عمل جميل ورائع , متابع ولو لقيت لي فرصة بخش معاكم .
|
Post: #11
Title: Re: رحلة طير
Author: مازن الجمّال
Date: 02-16-2008, 10:26 PM
Parent: #9
| Quote: مازن وهند عمل جميل ورائع , متابع ولو لقيت لي فرصة بخش معاكم |
الزول الجميل هاشم
تواجدك الانيق معانا بالدنيا
وفي انتظارك يا نقي
|
Post: #15
Title: Re: رحلة طير
Author: مازن الجمّال
Date: 02-18-2008, 10:40 AM
Parent: #6
Quote: أملنا يلاقى الراحة ويوصل
دنيا جميلة يصادف آحلامو |
خوف الطير من شيتن تاني
واصبح هاجس بيه مكدّر
هل ما زال الوطن الطيب
زي ما كان عمران ومُخدِر ؟
ولا رجول الشر الغادر
داست كل خيراتو واكتر
طمرت لعيون موية نقية
وحتى الانهار ليها بتهدر
او امكن باعت مجراها
جايز شالا الدودو العسكر
ما بيستبعد طيرنا القصة
كلو مجاز في الدنيا مُقّدر
وكيف لو طيبة اهلو الكانت
مضرب امثأل للكل تسحر
ضاعت واحتلت لمكانا
نزعة شر وحسادة بتكبر
ولسة هواجس فوقا مخاوف
شاغلة البال والطير متحير .
|
Post: #13
Title: Re: رحلة طير
Author: abubakr
Date: 02-17-2008, 12:55 PM
Parent: #1
البنية هند والوليد مازن .. ممكن تواصلو ...
|
Post: #14
Title: Re: رحلة طير
Author: مازن الجمّال
Date: 02-17-2008, 11:04 PM
Parent: #13
| Quote: البنية هند والوليد مازن .. ممكن تواصلو ... |
والدي العزيز
ابو بكر
انا برتاح نفسيا لما ألقاك في بوست من بوستاتي
..................
دي حقيقة ما مجاملة
|
Post: #16
Title: Re: رحلة طير
Author: nadus2000
Date: 02-18-2008, 11:49 AM
Parent: #14
مازن وهند "الترتيب بحكم ملكية البوست"
واصلوا هذا التداعي...النعي،
ومن أحق بنعينا أكثر من وطن أضعناه،
وعدنا نبكي على مشارف قبره...
وأي وطن أضعنا...
"
|
Post: #17
Title: Re: رحلة طير
Author: خالد علي محجوب المنسي
Date: 02-18-2008, 12:15 PM
Parent: #16
جمال يفوق الحسن جملا
مجادعتكم في الطير
واصلو ونحن محلقين طيرا معكم
ما أحلاكما عاشقي الطير
تحياتي ومودتي
مازن وهند
|
Post: #18
Title: Re: رحلة طير
Author: رأفت ميلاد
Date: 02-18-2008, 01:37 PM
Parent: #17
مازن Quote: وكيف لو طيبة اهلو الكانت
مضرب امثأل للكل تسحر
ضاعت واحتلت لمكانا
نزعة شر وحسادة بتكبر
ولسة هواجس فوقا مخاوف
شاغلة البال والطير متحير . |
هند ...
يلا
|
Post: #19
Title: Re: رحلة طير
Author: سارة حمزة
Date: 02-18-2008, 01:58 PM
Parent: #1
هندوية العسل ومازن واصلو
|
Post: #20
Title: Re: رحلة طير
Author: هند محمد
Date: 02-18-2008, 08:13 PM
Parent: #1
الطير إتهدا ولسه مسافر
الريح بتشيل جنحاتو تكابر
بصبر و عزيمة بيقاوم الآمو
يجابه عصف الزمن الغادر
سكة طويلة ملآنة مخاطر
عداها بنور الآمل الحانى
ويفضل . . يعانى ..
كل ما يفكر قرب يوصل
يلقى السكة إتمدت تانى
بس برغم عذاب الرحلة
مصرّ ما يحقق هدفو السامى
وزى ما بنحلم نلقى منانا
بيحلم يلقى الوطن الحانى
طير يا طير وأتحدى الظلمة
شان ما يجيك الصبح أمانى
شان ترتاح فى دنيا جميلة
آمان .. ما تحس بظلم الجانى
دنيا سلام تتنعم خيرها
تداوى نزيف الجرح الدامى ..
|
Post: #21
Title: Re: رحلة طير
Author: هند محمد
Date: 02-19-2008, 06:13 AM
Parent: #1
الاعزاء
شاعرنا هاشم
عمنا ابوبكر
نادوس
خالد على محجوب المنسى
رأفت ميلاد
والعزيزة سارة حمزة ..
بعون الله نحاول المواصلة ..أشكر اللطف والتشجيع الجميل والمؤازرة ..
شكراً جميلاً ..
|
Post: #22
Title: Re: رحلة طير
Author: مازن الجمّال
Date: 02-19-2008, 12:22 PM
Parent: #1
احبابي
نادوس
خالد
رأفت
سارة
حلاوة زول جميل قربك
بيخلق ليك وطن تاني
ينسيك الهموم والخوف
وينسج ليك فرح هاني
.....................
صدقوني لو قلت ليكم .. حضوركم قمة سعادتي
وخليكم قريبين مني دايما عليكم الله
|
Post: #23
Title: Re: رحلة طير
Author: خالد علي محجوب المنسي
Date: 02-19-2008, 12:33 PM
Parent: #22
Quote: حلاوة زول جميل قربك
بيخلق ليك وطن تاني
ينسيك الهموم والخوف
وينسج ليك فرح هاني |
نحنَ جنبكم ياالحنان سو إت وهندوية النم
قولوا البسر البال ويزيل الألم والهم
هادي قعدا ومازاحين وفي البساط ننجم
الزول بي أخو والناس دوام في الجمال تتلم
خالد
|
Post: #25
Title: Re: رحلة طير
Author: مازن الجمّال
Date: 02-19-2008, 01:32 PM
Parent: #23
Quote: نحنَ جنبكم ياالحنان سو إت وهندوية النم
قولوا البسر البال ويزيل الألم والهم
|
خالد الداوم في البال
ساكن قليبي جمال
زارع السعادة وجود
يا النسمة قولك فال
يا زول حنين موفور
انا بيك بدورلي وصال
|
Post: #24
Title: Re: رحلة طير
Author: مازن الجمّال
Date: 02-19-2008, 01:16 PM
Parent: #1
Quote: دنيا سلام تتنعم خيرها
تداوى نزيف الجرح الدامى |
جرح الطير جرحاً متعمق
والدم النازف أطنان
والجوع شتت نظرو الباقي
والخوف كاتل قلبو هوان
ونرجع للسبب الكان أول
يوم الطير هاجر حزنان
لما الشر صادر احلامه
وخرّب ليو عشو الطربان
ولما الطير حاول بيقاوم
وضاق تعذيب بي كل ألوان
وساد الظالم الأسود حالِك
ونور الحق واقف حيران
يا تاريخ سجّل ما تنسى
عمايلك في الطير الهلكان
ولسة بقاوم كيف دايراه
يعالج جرحَا شاب أزمان
|
Post: #26
Title: Re: رحلة طير
Author: مازن الجمّال
Date: 02-24-2008, 01:18 PM
Parent: #1
غريب يا طير
بتحلم لسة مستني ؟
معشم في حلم باكر
وراجي تطولو متمني ؟
حلم باعك قبض تمنك
ولسة ببيع ومستغني
حلم منعول دفر غادي
وخيّب كل أمل بادي
فضل كابوس
وليل منحوس
مرق في ضلو كل سادي
..............
|
Post: #27
Title: Re: رحلة طير
Author: مازن الجمّال
Date: 03-02-2008, 07:59 PM
Parent: #1
***
|
|