Post: #1
Title: عـاجل ..دكتــور حنجرة ممتاز فى الريض
Author: abuguta
Date: 02-13-2008, 06:08 AM
اخوتى
تحيات النضال
والعافية المستديمة
مئذ قدومى من السودان وانا اعانى من بحة فى صوتى فاتجهت لدكتورمصرى فى احدى مستشفيات الرياض
فزادالطين بلل,اعطانى ادوية زادت البحة بحات ورخت الحبال الصوتيةفتركتها ,,واستخدمت جميع الادوية الشعبية,,من كركدى وشراب دافىء ومن يوم خروج السودان من البطولة وانا صائم عن الكلام,,لكن الصوت لم يتحسن,,اخيرا بجرب فى العسل مع الماء الدافىء,,لم ارى مفعوله بعد,,,
لو فيكم من يعرف دكتور انف واذن وحنجرة ممتاز فى الرياض اسعفونى به,,
ودامت عليكم نعمة الصحة العافية
|
Post: #2
Title: Re: عـاجل ..دكتــور حنجرة ممتاز فى الريض
Author: حمزاوي
Date: 02-13-2008, 06:29 AM
Parent: #1
اخي ابوقوته
مسكاقمي
سلامتك وما تشوف شر
شرك مقسم فوق الدقشم
بخصوص طلبك
اتصل بالاخ احمد حنين
اخونا احمد حنين خبير في الحبال الصوتية
|
Post: #4
Title: Re: عـاجل ..دكتــور حنجرة ممتاز فى الريض
Author: abuguta
Date: 02-13-2008, 07:11 AM
Parent: #2
| Quote: اخونا احمد حنين خبير في الحبال الصوتية |
عمو حمزة
كنت بنشجع فى ساح العاج فغلبوها, لكن تانى مصداقا لكلام حبوبتى
ما بشجع ناس جاين من الجزيرة واهل عوض
هههههها
ادينى تلفون حنين ربما سماع صوته يكفى
كم اشتاق للوصول لهذه الشخصية لكن ساكن بعيد
حاسى انو زول ابن وطن وحامل هموم الشعب,,وممكن يالج صوتى
شكرا
|
Post: #3
Title: Re: عـاجل ..دكتــور حنجرة ممتاز فى الريض
Author: اسعد الريفى
Date: 02-13-2008, 06:42 AM
Parent: #1
الاخ ابوقوته
صباح الخير
مستشفى دله-الرياض
د. حامد محمدين
كبير استشارى الانف و الاذن و الحنجرة
رجل سودانى أصيل و شهم
و يمكنك الاتصال بى اذا رغبت
|
Post: #5
Title: Re: عـاجل ..دكتــور حنجرة ممتاز فى الريض
Author: abuguta
Date: 02-13-2008, 07:15 AM
Parent: #3
اسعد الريفى
اشكرك على المساعدة
وانشاء الله اليوم ازروه,ومادام اختصاصى وسودانى
بالمناسبة متابع لبوستاتك,,,,روعة روعة روعة
لكن عادة بكتفى باخذ الرحيق من غير ان يرانى احد
لك الود
|
Post: #6
Title: Re: عـاجل ..دكتــور حنجرة ممتاز فى الريض
Author: Mayada
Date: 02-13-2008, 07:25 AM
Parent: #1
صباح الخير يا ابوقوتة...
اولا الف سلامة عليك...
في دكتور حمدين الفي دلة دة وتاني في دكتور اسمو حاجة كدة المسلط في مستشفى سليمان الحبيب...
وربنا يديك الصحة انشالله...
ست البنيــــــــــــات
|
Post: #8
Title: Re: عـاجل ..دكتــور حنجرة ممتاز فى الريض
Author: abuguta
Date: 02-13-2008, 07:35 AM
Parent: #6
| Quote: في دكتور حمدين الفي دلة دة وتاني في دكتور اسمو حاجة كدة المسلط في مستشفى سليمان الحبيب... |
ست البنات,,,,
سلام بصوت مبحوح
دكتور دلة دا ممكن تامينى يشملو,,لكن المسلط سوف يتسلط على محفظتى
سليمان الحبيب اقرب مستشفى لموقع العمل,,,
لكن انا موظف صغير فى شركة صغيرة ,,بطاقة تامينى درجتهاB
نشكرك على المساعدة والطلة والشوفة
ودمتى
|
Post: #7
Title: Re: عـاجل ..دكتــور حنجرة ممتاز فى الريض
Author: حمزاوي
Date: 02-13-2008, 07:29 AM
Parent: #1
ابوقوته اخوي
معليش انا اتصلت علي اخينا احمد حنين قال مافاضي الايام دي مشغول خالص وقال ليك ممكن تستخدم الاشارات ولغة العيون لحدي ما يسمح ظروفه
ما تقول لي كدا انت كنت بتشجع في ناس كوت ديفوار ودروبكا وسلمون كالون والله دول مش يقطع الحبال الصوتية دول يقطعوا الحبل السري ظاااااااااطو
|
Post: #9
Title: Re: عـاجل ..دكتــور حنجرة ممتاز فى الريض
Author: abuguta
Date: 02-13-2008, 07:50 AM
Parent: #7
| Quote: ما تقول لي كدا انت كنت بتشجع في ناس كوت ديفوار ودروبكا وسلمون كالون والله دول مش يقطع الحبال الصوتية دول يقطعوا الحبل السري ظاااااااااطو |
هع,,,
انت عاد ناس ايتو ومازدا الكبير الله يقطع لسانو
ياخى
اللاعب الاهبل رقم 23
وخوف المعترفين
ومازدا الكبير
وخروج سونق الصغير
وتعثر العجوز الشين
سبب نصر المصرييين
ودمت
|
Post: #10
Title: Re: عـاجل ..دكتــور حنجرة ممتاز فى الريض
Author: أبوذر بابكر
Date: 02-13-2008, 08:13 AM
Parent: #1
سلامتك يا ابوحميد
وما تشوف لا شر لا أذى
تعرف من كترة المرض والوجع
أنا ذاتى بقيت إستشارى
عايز أقول ليك شنو، اسمع كلامى ده كويس
نفس الأعراض دى بدت عندى قبل حوالى سنة ونص
‘حساس بإلتهاب فى الحنجرة وبحة مزعجة جدا
بدون ما يكون فى الأعراض المعروفة بتاعة القحة أو النزلة العادية
مرات صوتى بختفى تماما
قمت مشيت لأخصائى حنجرة ممتاز جدا، بروفيسر فى الحاجات دى
وكانت المفاجأة
قال لى ياخ إنت ما عندك شى فى الحلق إطلاقا
المشكلة كلها عندك فى المعدة
إلتهاب فى فم المعدة وفى مخرجها برضو يعنى لما تجى مارقة على الإثنى عشر
الشغلانة دى كلها بتسبب زيادة شديدة فى إفرازات وأحماض وسوائل المعدة، وبحصل إرتخاء فى الصمام الفاصل بين المريئ والمعدة، وبحصل شى إسمه إرتجاع المريئ
عشان كده الأحماض بتطلع وتصل لحدى الحبال الصوتية وتعمل فيها إلتهاب
وفعلا طلع كلامه صاح
مشيت لأخصائى باطنية وعملت منظار وفعلا كلام الأخصائى بتاع الحنجرة طلع صحيح
إن شاء الله يا ابوقوتة
كلامى أنا ده ما يطلع صحيح
ويطلع عندك عشراقة ساى
إنت المهم حاول إتأكد من الشغلانة دى كويس
لأنه إلتهاب المريئ ده سبحان الله ما بكون فيهو ألم شديد ظاهر
وحتى طلوع الأحماض المعوية لى فوق إنت ما طوالى بتحس بيهو
وحتى لو طلع ده
أصلك ما تخاف
علاجه ساهل وبسيط وفى يدك
وألف سلامة ليك
|
Post: #12
Title: Re: عـاجل ..دكتــور حنجرة ممتاز فى الريض
Author: abuguta
Date: 02-13-2008, 08:25 AM
Parent: #10
Quote: بدون ما يكون فى الأعراض المعروفة بتاعة القحة أو النزلة العادية
مرات صوتى بختفى تماما |
الاخ ابو امنة
كدا اثبت هنالك علاقة بين الشعر والطب,,هى الاحساس فى كل
انت شخصت حالتى تماما,,حتى الدكتور الاول ادانى حبوب حموضة وسالنى هل عندك احماض قلت ليه ايوة
يس انا اتجاهلت كلامو,,وما استخدمتها,,لذا ما زال الصوت مبحوح,,
مافى اى الم ولا وجع فى الحنجرة,,,
لذا شكلى حارجع لحبوب المعدة مرة تانية
شكرا ليك كتير
|
Post: #13
Title: Re: عـاجل ..دكتــور حنجرة ممتاز فى الريض
Author: أبوذر بابكر
Date: 02-13-2008, 08:34 AM
Parent: #12
| Quote: لذا شكلى حارجع لحبوب المعدة مرة تانية |
يا أحمد
مش ترجع وبس
إنت لازم تواصل فى الحبوب لمدة شهر بإنتظام على الأقل
وتوقف القهوة والشاى تماما، خاصة الصباح قبل الأكل
وتوقف كل البهارات والدهون فى فترة العلاج
وبإذن واحد أحد حتبقى تمام التمام
لو عايز تشتغل "أذان" ممكن بعد داك
ولو ده كله ما جاب نتيجة كويسة
أعمل فحص لجرثومة المعدة
وهو فحص ساهل جدا عن طريق فحص الدم
وأنا بنصحك تستعمل حبوب إسمها
Nexium
هى صحيح غالية جدا جدا لكين ناجعة جدا جدا جدا
ما تهمل الموضوع ده
وأسأل مجرب ولا تسأل طبيب
|
Post: #11
Title: Re: عـاجل ..دكتــور حنجرة ممتاز فى الريض
Author: الناظر
Date: 02-13-2008, 08:24 AM
Parent: #1
اخونا احمد صديق سلامات كمان سلامتك و جميع موظفى اول نت كرامتك بس انت لما سافرت السودان كنت لا تعانى من اى شى الظاهر اكلت حاجة غلط او شربت حاجة كدة او نمت فى حوش كبير ما فية باب لنو و حسب علمى انو فى ابوقوتة مافى ابواب . انت بس راجع نفسك بعدين شوف الدكتور و احتمال بعد البونص الحال و الصوت يستعدل و الله المستعان
|
Post: #14
Title: Re: عـاجل ..دكتــور حنجرة ممتاز فى الريض
Author: abuguta
Date: 02-13-2008, 08:51 AM
Parent: #11
| Quote: احتمال بعد البونص الحال و الصوت يستعدل و الله المستعان |
ابو مكى
لو حلقى انتظر البونص شكل البحة حتطول,,,ياخى اول نت مئذ دخولها فى بطن شركة الاتصالات
ما بقى عندها امان,,,وبعدين المرة قاعدة تقراء بوستاتى من ابقوتة تقوم تقول عاوزة دهب,,
| Quote: اكلت حاجة غلط او شربت حاجة كدة او نمت فى حوش كبير ما فية باب لنو و حسب علمى انو فى ابوقوتة مافى ابواب |
ياخى انت من زمن الناس بتنوم فى الصقيعة,,,بيوت كلها بقت دشوشة بمعدل للبيت دشين,,,,
نحن عندنا 4 دشوشة,,,البقالة والصالون,,,وتكل امى,,,,واخوى قال دكة بقراتو تحت برج سودا تيل,,وقال الراعى لو ما ركبو ليه دش حيفوت لناس عندهم امتيازات احسن مننا,,صدقنى ياصديق
الراعى كان مغترب 4 سنوات فى عرعر من اولاد الجزيرة بحر,بسمع اخبار يومى صباح مساء,,
عندو غرفة فيها كل مستلزمات العولمة,,راديو , مسجل, تلفزيون ملون, رسيفر بكرت عندو كرت جزيرة,,
وكمان قال لى ما عندك كرت art زايد,,,قمت ضحكت فى سرى,,
هنالك راعى قشاش ,,ودا شغلو براه,,عاوز افرد ليه بوست لوحدو ..المهم فى الامر دا راتبو الشهرى
6 مليون جنيه سودانى,,,,كيف دى عاوزة ليها شرح
ودمت
|
Post: #15
Title: Re: عـاجل ..دكتــور حنجرة ممتاز فى الريض
Author: الناظر
Date: 02-13-2008, 09:27 AM
Parent: #1
| Quote: وبعدين المرة قاعدة تقراء بوستاتى من ابقوتة تقوم تقول عاوزة دهب,, |
يا ابوقوتة حرام عليك هى المرة ما عارفة عندك بونص و الله بالمناسبة انا مرتى بتسال عن الكوميشن اكثر منى و بتحاول تاخذ المعلومة من ود مامون و حسبت عدد الغوائش و السلسل.Quote: تلفزيون ملون, رسيفر بكرت عندو كرت جزيرة,,
وكمان قال لى ما عندك كرت art زايد,,,قمت ضحكت فى سرى,,
|
احمد صديق و الله الراعى دى لو اعطيتو كرت ART كان ترك مشاهده التلفيون لنو كان شاف فريقنا او جنايزنا فى غانا, و خلية على الجزيرة يشوف حاجة كويس الدورى الاسبانى و بعض الدوريات التى تسعد القلب و تجلى النظر .
|
Post: #16
Title: Re: عـاجل ..دكتــور حنجرة ممتاز فى الريض
Author: ابو عثمان
Date: 02-13-2008, 09:35 AM
Parent: #1
ابوقوته
سلامتك وربنا يواليك بالعافية
انا خايف بحتك دي تكون جاتك من يوم الضباح ايداهو في نهائي كأس السودان
الف سلامة
تحياتي
|
|