Post: #1
Title: خواطر مجنونة ( ناس السجارة اجمعوا هنا سريع )
Author: مازن الجمّال
Date: 02-11-2008, 10:19 PM
Parent: #0
شوية خستكة :
في الليل داك
وفي نفس المكان الكان
بفتفت فيه كل الهم
واسوق أفراح بدل أحزان
أجيبا معاي من الحبان
ودفتر لف من الدكان
واجيب بالباقي منو لبان
واصنقر في الأرض وانجم
ولما ألف بكون فرحان
بكون هيمان
بكون خرمان
أفت الحمرا في الورقة
وأكب من فوقا سر الجان
ولي صباعي الصغير أمدغ
وأطلّع للبذر بحنان
وامسك للوريقة الحلوة
وأبدا ألف بخور الجان
وبلساني المرطب ديمة
ألحسا بالعرض بأمان
وأبرم للطريف الفوق
واشمّها زي حريف إدمان
واختّها في الخشيم المر
سواد شلوفته زي قطران
وكبريتي الملهلبة نارا
أشعل عودا زي بركان
وامرّر للهب بشويش
سجارة الدوكو دايرة حنان
ولنفيس البداية أجر
وألحقو بالتني بجنان
ويتقل راسي زي صخرة
ويبرد حيلي زي تعبان
واحس برجولي زي مافي
وأهبش فيها زي مرضان
وأبدا في دور من السرحان
وواصل في السجارة شراب
واشوف حاجات عجيبة كمان
أشوف غنماية في فستان
ممكيجة في خشيما لبان
ومرة كمان أشوفلي بحر
وفيه حسان بكل ألوان
وضحكات صاخبة منداحة
والكل بي فرح طربان
وأوصل بالسجارة هناك
محل شوشاوتا وازدان
وازغرت بيها زي نسوان
واجرجر للرجول أوقف
واهبش في الارض حفيان
نعالي نسيته وين ختيته
من جيت للمكان خرمان
وأمسك دربي زي برجل
أدوّر في المشي السكران
وأوصل بيتنا دربه أمان
واشيل الجك وفوت للزير
ده ريقي نشف نشاف البان
واقرطع للجكيك كله
وبرضي كمان بكون عطشان
وأفتح للمواسير سيل
وكل دقيقة بمشي كمان
وفي الآخر سريري حنين
يشيلني نعاس ونوم غمران
|
Post: #2
Title: Re: خواطر مجنونة ( ناس السجارة اجمعوا هنا سريع )
Author: ودالعباسية
Date: 02-12-2008, 00:48 AM
Parent: #1
دي لافيها بى كم كرت يا عمك ،،
|
Post: #7
Title: Re: خواطر مجنونة ( ناس السجارة اجمعوا هنا سريع )
Author: مازن الجمّال
Date: 02-13-2008, 10:57 PM
Parent: #2
| Quote: دي لافيها بى كم كرت يا عمك ،، |
عباسية الحنين .. شوق بحر
مساطيل عاوزين يسرقوا خروف جارهم قالوا لي واحد امشي شوفو اذا لقيتو مافي سوقو جيبو
اذا لقيتو في خليه وتعال جاهم راجع بعد شويه قال ليهم مشيت شفتو لقيتو مافي سايقو جايبو رجع مني رجعت اجيبو لقيتو في خليتو جيت
|
Post: #3
Title: Re: خواطر مجنونة ( ناس السجارة اجمعوا هنا سريع )
Author: الرشيد البصيلى
Date: 02-13-2008, 06:48 AM
Parent: #1
اللخو معاها كمونية ولا شنو؟؟؟؟ .....
|
Post: #8
Title: Re: خواطر مجنونة ( ناس السجارة اجمعوا هنا سريع )
Author: مازن الجمّال
Date: 02-13-2008, 11:02 PM
Parent: #3
| Quote: اللخو معاها كمونية ولا شنو؟؟؟؟ ..... |
الرشيد ازيك
ولخوها لخ شديد
..........................
مسطول صحّ مرتو الصباح وقال ليها : اتي ختيتي ليمون في القفص !!؟؟ قالت ليه : لأ ..
قال ليها اذن انا حلبت الطيرة
|
Post: #4
Title: Re: خواطر مجنونة ( ناس السجارة اجمعوا هنا سريع )
Author: Hatim Yousif
Date: 02-13-2008, 08:41 AM
Parent: #1
مازن .... شكيتك علي الله ..
...
...
البسمع الكلام ده يفتكرك مجاور (النيًل - بتشديد الياء) مش ود شاطوط ..!!!!!!
________
عموماً .. أنا زول كيشه جداً في الثقافة ... بس الكتبته ده .. أياً كانت تسميته (شعر ، نثر ، قصة أو حتى حكمة ) حاجة ممتعة جداً ..
-
|
Post: #9
Title: Re: خواطر مجنونة ( ناس السجارة اجمعوا هنا سريع )
Author: مازن الجمّال
Date: 02-13-2008, 11:07 PM
Parent: #4
حاتم يوسف يا قريبي
وودازرق دي بالليل بتنسطل فيها بي الريحة ساي
وبعدين تعال هنا كيشة شنو وثقافة شنو الما بتعرف ليها
كان ما كنت ساكن في المزاد 
..........................
مسطول سأل صاحبه : انت الزيتون عندو رجلين !!؟؟ صاحبه قال ليه : لأ .. قال ليه : معناتو انا اكلت خنفسانة
|
Post: #5
Title: Re: خواطر مجنونة ( ناس السجارة اجمعوا هنا سريع )
Author: haroon diyab
Date: 02-13-2008, 10:20 AM
Parent: #1
مازن
صباح الخير
نفس ....نفسين لاخوك ينوبك ثواب....1
الظاهر علي سطلت من الذكري المنسية.....دي فيها ثواب كمان....؟
انشاء ماتنفعه
هارون دياب
|
Post: #6
Title: Re: خواطر مجنونة ( ناس السجارة اجمعوا هنا سريع )
Author: محمد فرح
Date: 02-13-2008, 11:13 AM
Parent: #5
أخ مازن
سلامات ياحبيب
زمان في مره كبيره سألوها السجاير حرام وللا ماحرام
قلتليهم والله أنا ماعارفه لكن زول السجاره ده طوالي بكون كايس الـ(نار)
حمانا الله وإياك من النار
مؤونة عام من الود
|
Post: #11
Title: Re: خواطر مجنونة ( ناس السجارة اجمعوا هنا سريع )
Author: مازن الجمّال
Date: 02-13-2008, 11:17 PM
Parent: #6
| Quote: قلتليهم والله أنا ماعارفه لكن زول السجاره ده طوالي بكون كايس الـ(نار) |
الزول الجميل محمد ود فرح
ازيك
وزول الشية برضو بكون طوالي كايس للنار
وست الشاي
وبتاع المرطبات
كدي خليك من ديل واسمع دي :
مسطول وقع في السلم مشى للدكتور اداهو مرهم قال ليه امشي امسح مكان الوقعة مشي مسح السلم
...............
ومودة بعمق المحيط
|
Post: #17
Title: Re: خواطر مجنونة ( ناس السجارة اجمعوا هنا سريع )
Author: محمد فرح
Date: 02-14-2008, 09:52 AM
Parent: #11
حبيبنا مازن
سلامات يارائع
النكته طبعاً خرافيه
وبقية النكات كادت أن تخرج مصاريني من بطني
لك التحيه
خلينا نضحك في قفشات المساطيل ونبتعد عن دخان السجارات
كده بنكون في السليم
مؤونة عشرة أعوام من الود
|
Post: #10
Title: Re: خواطر مجنونة ( ناس السجارة اجمعوا هنا سريع )
Author: مازن الجمّال
Date: 02-13-2008, 11:10 PM
Parent: #5
هارون ملك الجنون
تعرف يا منقة سطلة الذكرى اكعب من شراب السجارة
والسجارة من نطاق
وثوابا كبير
........................
مسطول بيسـأل صاحبه
هـا أخبار ابوك شنو؟
وفجـأة اتذكـر انو أبـو صاحبـه مـتوفي
فكمـل الموضوع وقال:اها ولسه برضه فى نفـس القبر ؟
|
Post: #12
Title: Re: خواطر مجنونة ( ناس السجارة اجمعوا هنا سريع )
Author: مازن الجمّال
Date: 02-13-2008, 11:20 PM
Parent: #1
كان الرجل يعمل فى المطار وظيفته مسك المضارب وتحريكها لارشاد الطيار .. تمت ترقيته فأرسل ابنه الى جاره (المسطول ) يدعوه لتناول الكرامة بهذه المناسبة.. جرى الولد وقال للجار : ابوى قال ليك تعال اتغدا معانا .. قال ليه :المناسبه شنو .. قال ليه : ابوى رقوه.. قال ليه : يعنى شنو بقى ينزلها بي سدرو .
|
Post: #13
Title: Re: خواطر مجنونة ( ناس السجارة اجمعوا هنا سريع )
Author: خالد علي محجوب المنسي
Date: 02-13-2008, 11:34 PM
Parent: #12
الرايق الجميل
مازن الجمّال
تحية طيبة سلااام
بوست بمزاج على نار هبوت
مسطول جابوا لي قندول شديد وقالوا لي أكسروا
بي أتنين حُمر
قال ليهم أنا الشافوا خلو أكسرو حرّم اشربا
إسكتو ساكت أنتو بتلعبو معاي
قالوا يازول والله دا يوديك في داهية
المهم يا سيدي بعد ما شربها حافة ساكت بطنو
ولعت دخل wc طلع مصارينو
وبعد ما أنتهى غسل خشمو وطلع
تحياتي ومودتي يا مازن
|
Post: #14
Title: Re: خواطر مجنونة ( ناس السجارة اجمعوا هنا سريع )
Author: مازن الجمّال
Date: 02-13-2008, 11:47 PM
Parent: #13
خالد يا سكر منقط
ههههههههههههههههههههههه
ات عارف انا قاعد اضحك لحدي هسة
وعليك الله تاني تعال بي جاي طوالي
مسطول سطلتو ليها غبار ومسكوا ناس البوليس فسألو الضابط قال ليهو : انت ساكن وين ..؟
قال ليهو المسطول: ساكن مع اخوي
الضابط قال ليه: واخوك ساكن وين؟
المسطول : ساكن معاي
الضابط أخلاقو جات في نخرينو وكورك في المسطول وقال ليهو :الله يقطعك ويقطع اخوك
أنتوا الاتنين ساكنين وين ؟...
المسطول: ساكنين مع بعض.
.............
شكرا على رسم الابتسامة الحلوة دي
|
Post: #15
Title: Re: خواطر مجنونة ( ناس السجارة اجمعوا هنا سريع )
Author: Mohamed Elbashir
Date: 02-14-2008, 02:02 AM
Parent: #1
سلام مازن
خستكاتك فى السلك و الواحد يادوب عرف ناس السجاره ديل بكون فى العلالى ليه
نديك واحد نكته بمناسبه خستكتك المعبره دى
أتنين من ناس السجاره قاعدين جنب البحر يتصقعو بمزاج شافو من بعيد صندوق مطفح فى المويه واحد فيهم قال للتانى لو عمت و دخلت ليك جوه الصندوق داك بتدينى شنو ؟ التانى مغمض نص عين قال ليهو بديك الصرفه الأولى
تحياتى
محمد على
|
Post: #18
Title: Re: خواطر مجنونة ( ناس السجارة اجمعوا هنا سريع )
Author: مازن الجمّال
Date: 02-14-2008, 03:10 PM
Parent: #15
| Quote: خستكاتك فى السلك و الواحد يادوب عرف ناس السجاره ديل بكون فى العلالى ليه |
محمد البشير ازيك يا سكر
واداه الصرفة الاولى ولا لسة
مسطول مشى معرض للرسم
وقف قدام لوحة وقعد يلحس فيها
سألوه : مالك بتعمل كدا
قال: عايز اتذوق الفن
..............
تحياتي يا محمد
|
Post: #16
Title: Re: خواطر مجنونة ( ناس السجارة اجمعوا هنا سريع )
Author: جعفر سومي
Date: 02-14-2008, 03:58 AM
Parent: #1
الأخ الجمال
تحياتي
جابتنا ريحة الدخانة دي قلنا ناخد لينا نفس معاكم.
هاك دي:
واحد بتاع سيجارة ودايما بضربها جوه الحمام وبعدها طوالي بياخد دش بارد
جارتهم بالحيطة سافرت في الإجازة ورجعت وهو ما عندو خبر
يوم بعد ما دخل الحمام ودور السيجارة سمع صوت جارتهم جات داخلة بتسلم على زوجتو
أخونا طوالي جا طالع من الحمام ملوط ووقع سلام في الولية واعتذارات إنو ما سمع
بخبر رجوعا من السفر وبعد داك رجع الحمام وواصل البرنامج
زوجتو اتحرجت شديد وبعد ما الجارة مشت شاكلتو وقالت ليهو كيف يعني تجي طالع عريان
للمرة والكلام ده عيب منك. المهم صاحبنا اعتذر للمدام وأكد إنو ما حيكرر الحكاية دي تاني
بعد كم يوم كده وبعد ما صاحبنا دخل الحمام وبدا في الترويقة سمع صوت جارتو بتتونس مع زوجتو في الصالون, طوالي بسرعة جا طالع من الحمام ميطي وشبك الجارة والله أنا اسف جدا جدا يعني
قالو المرة الفاتت جيت طالع ليكي بي منظر ما مشرف!!؟
|
Post: #19
Title: Re: خواطر مجنونة ( ناس السجارة اجمعوا هنا سريع )
Author: مازن الجمّال
Date: 02-14-2008, 03:15 PM
Parent: #16
| Quote: جابتنا ريحة الدخانة دي قلنا ناخد لينا نفس معاكم. |
جعفر يا لذيذ
يعني صحبك جا يكحلا نخر عينا
قال ليك تلاتة مساطيل بيتونسو مع بعض, اول واحدقال: انا لو معايا قروش
اشترى امريكا الجنوبية , والثانى : قال وانا لو معايا قروش اشترى امريكا الشمالية ,
التالت قال ليهم: والقال ليكم منو انا ح ابيع
|
|