أنا و أخوى عبدالقادر سبيل بالله تعالوا شوفوا البصلى على النبى فينا منو!!

اتنين من العوام بتغالطوا فى موضوع كلو واحد فيهم يقول للتانى صلى على النبى لمن تعبوا نادوا واحد من المارين وحكوا ليهوا الموضوع عشان يشوف منو المفروض يصلى على النبى فيهم!
يعنى الغلطان هو المفروض يصلى!!
عليه افضل الصلاة والتسليم
اها عشان بوست دينج الفتحو ا باسم :
البنوك الاسلامية تصفي عملها في الجنوب
اتحول الى شتائم شخصية وانحرف عن الموضوع!
انا علقت على البوست وقلت

Quote: العقبى لنا! يعنى ما فى حرمنة اسلامية عنكم! نحن لينا الله وعيشة السوق! بالله زول يدينك عشرة مليون وترجعها ليهو عشرة مليون بعد سنتين! دا موش عدم ذوق! جنى

اخونا سبيل كتب

Quote: تتصور يا جني رغم اني مكنجن ايمانك ورغم يقيني بأنو الربا من الكبائر والموبقات ، ومافي لعب كله كله ( فأذنوا بحرب من الله ) ! رغم دا كله لقيت في كماك وجاهة تتصور!!؟ الله يلعنك يا ابليس صحي والله زول يدينك عشرة مليون تحل بيها صرمتك تجي بعد سنتين ترجع له زي ماهي ؟ ولو كان ختاها في واطة فاضية كان جابت ليهو الشفي الفلاني .. ما قلة ذوق؟ واكتر من كدا زول يعطف عليك ويستجيب لطلبك ويدينك عشرة مليون جنيه بدل يشتري بيها واطة في الصالحة مثلا، تقوم انت من وراه تشتري الواطة في أمانة الله، وتنتظر لغاية ما المطار الجديد يقوم عشان تقوم تبيعها بمية مليون وتديه داب العشرة وتقش خشمك؟ وتقول والله الاسلام دا سمح خلاس؟ كيف طيب؟ وحاجة تانية زول يدينك عشرة مليون جنيه لمان كانت العشرة مليون بتشتري حجم معين من السلع والخدمات ( قوة شرائية معينة) وبعداك تنخفض قيمة العملة بفضل التضخم والغلاء؟ تقوم تجي بعد سنتين ترجع ليهو العشرة مليون الهسع؟ الما عندها علاقة بالعشرة اللهفتها؟ معقولة يكون ربنا عايز كدا ؟ فكرت فعلا وتوصلت للآتي _______________ رب اشرح لي صدري

وانا كتبت الاتى

Quote: ان جيت للحق يا جاد الحق! ايه رايك واحد متزوج واحدة سنة 60 ودفع ليه مهر 50 جنيه ومؤخر صداق 5 جنيه وكافحت وشقت معاهو العمر وطلقها سنة 1995 ودفع ليه مؤخر الصداق 5 جنيه على الجزمة القديمة وعلى دائر المليم الجنيه ينطح الجنيه! موش زول حقانى وابرا ذمته! تعرف يا ود سبيل انا من صغير ما بعرف الدوقما وراسى دا ما عملوا لى لبس العمة بس! لو اى انسان عنده علاقة بالتجارة الدولية الملاحة والتامين وبعرف البنوك كويس وبعرف الكونسرتيوم والملتيناشونالز كومبانيز والبورصات بعرف انه فى نهاية اليوم زى مابقولوا الخواجات: at the end of the day القروش دى بتكب فى جيوب اليهود ومؤسسات امبريالية يعنى اعداءك كمسلم ! يعنى لمن ترفض فائدة من بنك بحجة انها ربا حتى لو عامل فيها اسلامى حيكون بنك مراسل correspondent bank لبنوك ربوية كما يسميها بحجة انها ربا معناها انت بتدعم مؤسسات يهودية او معادية لك! يعنى بتخدمهم مثلا فى حاجة بتدفعها انت يا بتاع الديناران (الذهب والفضة) اسمها ال currency adjustment factor ) caf ) معامل فرق تحويل العملة بتحوله رسوم اضافية اذا اتعاملت بعملتك المحلية او الدولار كراعك فوق راسك يعنى اديك مثالاذا انت مصدر سعودى لصناعة بلدك مثلا سلعة راتنج صناعى بوزن 20 طن الى دولة اخرى لنقل مثلا جمهورية ايران الاسلامية عشان ما تمشى بعيد .ستدفع مبلغ 900 دولار امريكى كاجور شحن مضاف اليها 14 % معامل تحويل العملة القلناهو اضافة الى معامل ظبط المحروقات بسموهو BAF Bunkering adjustment factor يعنى حوالى 100 دولار امريكى لكل 20 طن وغالبا ما تتزود السفينة بديزل بسعر منخفض من السعودية عند الابحار من ميناء جدة ومن يناء بندر عباس الايرانى عند الوصول ولعلمك معامل ظبط العملة لا يدفعه اهل الين واليورو والاسترلينى والدولار والكرونة والجلدر والمارك والدولار ناس العملات المحترمة! يعنى بندفعوا نحن ناس هى لله! اول هذه الزيادات التعسفية تمثل زيادة تكلفة انتاج مما تعتبر معوق handicap لدولنا كمنافس فى انشطة التصدير فى العالم وتبقينا كدول مستهلكة ومصدرة للمواد الخام فى احسن الحالات وتانيا اكل لاموالنا بالباطل على عينك يا تاجر ! نرجع لكونسورتيوم Consortium حق الملاك المتضامنين والملاك لشركات البواخر من هم ! ميرسك لاينز اكبر خط فى العالم مملوك للدينمارك الفايكنج اعظم الامم البحرية (من يسبون سيدنا رسول الله) والذين قاطعنا الجبنة والزبدة ولم نقاطع الانسولين الذين هم صانعوه والملاك لعلامته التجارية عشان لو قاطعناهو بنموت وما بنقدر نتزوج مثنى وثلاث ورباع! ولم نقاطع الشحن على ميرسك اكبر خط فى العالم عشان الرز لو انعدم بنموت ولو متنا ما حنقدر نتزوج الى آخر الاسطوانة! اعلب شركات الملاحة والتامين واعادة التامين شركاء اوربيين وامريكان ويهود وقليل من اهل كوريا وتايوان واليابان! يعنى القروش البندفعه فى اللوجيستك من اكبر العائادات فى العالم بمشى لى امبرياليين ويهود! يعنى بندفع ليهم فرق اسعار محروقات وفرق اسعار عملة! اضف الى ان عوائد بترول الدول الاسلامية لاننا ما عندنا مقدرة عقلية على استثمارها نقوم ياداعها كرهينة حسن نية فى بنوك الغرب وامريكا ولمن تكتر يقوموا يبيعوا لينا بيها سلاح متخلف بعشرة سنوات عن التقنية الحالية المعاصرة بشرط ان نتعهد بعدم استخدامه ضد اسرائيل والمصالح الغربية ونتعهد ايضا باستعماله ضد بعضنا البعض! دول الخليج وليبيا والجزائر مجتمعة اشترت اسلحة بمبلغ 76 مليار دولار امريكى غير العراق طبعا وغير ما اشترته من طيارات مدنية فوق طاقتنا وحاجاتنا! كم صرفت هذه الدول فى مجال التعليم والصحة والتنمية لاشئ Peanut ! فقط لارضاءهم! يعنى الحسبة كلها تلقاها انو نحن بننضرب فى راسنا بى جزمتنا! نقوم نودع ملياراتنا فى بنوكهم بعد دا ونقول ليهم ما دايرين ربا! يا سبيل اخوى انت زعلان منى ساكت! انا زاتى زعلان من نفسى! لأنو فى حاجات انا كاتمها فى نفسى وحنانى ما بقولها! عشان ما تجاهدوا فوقى! اديك مثال! واحد اخونا معترض انا مشترى جوال غالىليه وبلوتوث غالى ليه ودا كله اسراف وتبذير والاسراف مذموم! الجوال موديل قديم ممكن 3310 او تلاتين حشرة بمشى الحال وكدة! بلاش من اقول ليهو انو انا شغال فى السوق ودا جزء من الريستيج الجوال النظارة اللبس الساعة العطر ولو شايل جوالك دا موش ما يدونى شغل يمكن السلام ما يردوهو لى! لكن بجيك للاسراف والتبذير تخيل انهما تجدد عفش بيتك وما تغير عربيتك وموما تشترى ملابس جديدة وهكذا ....الخ! كيف ينتعش الاقتصاد كيف يجد الاخرين وظائف بل كيحافظ القدامى على وظائفهم بل كيف نحافظ على الأمن والسلم الدا خلى والدولى بالحد من الجرائم والارهاب! اها يا سبيل جنس كلامى دا بتلقاهو فى الراتب التقراهو صباح ومساء! بالمناسبة انا علقت فى البوست حقك بتاع احداث كينيا ! قريتو! لان الموضوع يخص دينج ايضا! جنى

يلا تعالوا كملوا المشوار
جنى

واحدة جارتنا سافرت لمصر للعلاج وإتصادفنا هناك قبل خمسة سنوات وعندما نقصت مصاريفهم عن تكلفة العلاج لجأت لي لسلفة وتمكنت من تدبير ألف دولار سلفة لها
لما رجعت السودان ماطلت في دفع المبلغ وبعد تعب بدأت تدفع مية دولار كل سنة وكل سنة الدولار نازل ولحدي الآن باقي لي عليها 200دولار
الشيئ المؤسف إنها بتسدد لي بالدولار قالت زي ما إستلمتهم بالدولار مع العلم أيامها كان الدولار أكتر من الفين وخمسمية جنيه بالقديم ومعظم المبلغ إتسدد والدولار أقل من 210 الف جنيه بالقديم

Quote: واحدة جارتنا سافرت لمصر للعلاج وإتصادفنا هناك قبل خمسة سنوات وعندما نقصت مصاريفهم عن تكلفة العلاج لجأت لي لسلفة وتمكنت من تدبير ألف دولار سلفة لها لما رجعت السودان ماطلت في دفع المبلغ وبعد تعب بدأت تدفع مية دولار كل سنة وكل سنة الدولار نازل ولحدي الآن باقي لي عليها 200دولار الشيئ المؤسف إنها بتسدد لي بالدولار قالت زي ما إستلمتهم بالدولار مع العلم أيامها كان الدولار أكتر من الفين وخمسمية جنيه بالقديم ومعظم المبلغ إتسدد والدولار أقل من 210 الف جنيه بالقديم

اذا كان ذا معسر فنظرة الى ميسرة!
عشان انتى تبقى ذا معسرة وتتبادلن المواقع!
يا الفالحة كنت تمشى معاها الصايغ وتشترى دهب بالف دولار وتسلفيهو ليها وبعدين ترجعوا ليك دهب بنفس الوزن والعيار!
عشان بيتها يتخرب!
جنى

أبو الجنون والفنون

سلام حتى مطلع الفجر

كدي في البداية اللهم صل وسلم وبارك على سيد ولد آدم سيدي أنا محمد بن عبد الله وعلى آله وصحبه ومن والاه ، ومن تبعهم بإحسان إلى يوم الدين . آميييييين
تانياً الاتنين صلو بينا على الحبيب وعداكم ذم . غايتو كان ماني محتاج لي نظارة ود سبيل دا متفق معاك وما شايف في كلامو أي شناكل .
ورأيكم دا وجيه أفتى به عدد من الشفوت وعلى رأس الشفت الليل مصر سيد طنطاوي وإن فتح الباب على مصراعيه وحلل ربا البنوك عديييييل كدا . الشغلانة بتدورلها قعدة كاااااربة من أهل الشرع والاقتصاد من أهل الوجعة والاختصاص يقعدوا الكلام في علبو لأنه دا حار ودا ما بنكوي بيهو . والعاقبة عندكم في المسرات . والتسوي كريت في انجمينا، تلقى في سجمنا ووووب علينا . والله يكضب الشينة .

تحياتي

Quote: أبو الجنون والفنون سلام حتى مطلع الفجر

سلام يا سنجا!
ليك وحشة!
الما داير الربا حقو نحن جاهزين على سنجة عشرة!
جنى
تلفزة خارجية
وين اخونا تبلدينا!
جنى

يا جني.

شايفك اليوم متضرر من بوستاتي.

لكن معليش يا حبيب كلو يهون في سبيل السودان.

أما كيزان البورد ديل غير العين الحمرة مافي شغلة تانية بتنفع معاهم.

لازم تكون ضاغط الكوز ضغط شديد لو فكيت الكوز ح يطير يضربك في عينك وبعدين تبقى زي الصادق المهدي.



دينق.

جنى أخوي..
والله أنا من اكثر الناس اعجابا بكتاباتك.. لأنها تصب في كبد الحقيقة..


دينق أخوي..
لا وانت الصادق.. لو فكيت الكوز.. حتدفق الموية .. وتتبهدل ملابسك..

اللهم صلي وسلم علي سيدنا محمد وعلي اهله وصحبه وسلم

اها اخي جني
انا كمان صليت علي خير خلق الله

Quote: يا جني. شايفك اليوم متضرر من بوستاتي. لكن معليش يا حبيب كلو يهون في سبيل السودان.

سودان أويييييييييييييييييييييي
مليون ميل مربع عدا ونقدا بالسنتى والملى الى ان ياتى جيل يعيش اللديمقراطية بمثل الزخم الامريكى الذى تعيشه اليوم!
جنى

قبل شهر حضرت فيلم كارتوني في youTube عن قصة نشأة البنوك، راسي كان خمير في موضوع الربا ده، ما كنت قادرة أستوعبه، وكنت ولازلت وحأفضل باخده من البنك على حساب التوفير بتاعي... لكن الفيلم الكرتوني ده وراني الدرب عديل، وحسيت إنه فعلاً المسائل بعيده عن بعضها.. يعني المال البتتدينه من البنك الليله، بعد ثلاثة شهور بتكون قيمة الشرائيه اتغيرت...

الفيلم الكرتوني موجود في هذا الرابط.. استمتعوا وشكرا لـ YahoZato...

Money as debt

http://video.google.ca/videoplay?docid=-905047436258345...=t100_can&plindex=30


بنت الحسين