عظماء الشعر السودانى.....عمر الطيب الدوش

....هذا محاولة للتوثيق لعظماء الشعر السودانى..نحاول من خلالها
كشف النقاب عن حياتهم وتجاربهم وشعرهم...وفى البال أنهم شكلوا وجداننا بحلو قصائدهم
وجميل مفرداتهم...وعبروا من خلال الشعر عن معاناتنا معاناتهم...وحاولوا من خلال حروفهم تشكيل
واقع متجاوز لما هو كائن....عمر الطيب الدوش...احد هؤلاء العظماء...واحد الذين شنفوا مسامعنا بقصائد ماوجدت عن فى الاستوطان فى دواخل دواخل ذاكرتنا....وعليه هذا دعوة مجانية ومفتوحة لكل من يعرف شئ عن هذا العبقرى الاثير...........

السيرة الذاتية/
* ولد عمر الطيب الدوش في مدينة شندي1948
* تخرج في معهد الـموسيقي والـمسرح-قسم الـمسرح- عام(1974)وهي اول دفعه تتخرج في الـمعهد ومن زملائه هاشم صديق واسحاق الحلنقي وصلاح الدين الفاضل وناصر الشيخ...وفي قسم الـموسيقي كان محمد وردي وانس العاقب وعثمان مصطفي..وبناديها اتولدت هناك..وكذلك رائعة عصافير الخريف للـمبدع الحلنقي..وهنالك افادة من صلاح الفاضل تقول ان عمر الدوش قد كتب الـمقطع الاول لاغنية عصافير الخريف علي السبورة(..ليه يا عصافير الخريف )ثـم قام الحلنقي وعلي ذات السبورة مجاوبا فكانت هذه الرائعة
* نال دراسات عليا في الـمسرح بأكاديمية براتسلافا للفنون..ماجستير في الفنون الـمسرحية والاخراج(14يونيو..1983)
* اول اغنياته هي اغنية (الود) التي يتغني بها الفنان محمد وردي وقد كتبها في النصف الثاني من الستينات عندما كان طالبا بالثانوي
* عمل معلما بـمدارس الدوش ومحاضرا بالـمعهد العالي للموسيقي والـمسرح

............قـصيدة وطـن....................
وطـــــــــن



حأسأل عن بلد رايح

وافتِّش عن بلد سايح

واسأل عن امانينا

الِّي ما بتدِّينا

صوت صايِح

وأسأل وين مخابينا

إذا جانا الزمن...

لا فِح

واسأل عن بلد مجروح

وعارف الجارحو ليه جارِح

وابكى على بلد ممدوح

وعارف المادحو

ما مادِح

واحْلم بي حلم مسروق

لا هو الليَلهْ

لا امْبارِح

أعلِّق في جناح سَفَري

خطابات لي زمن فجْري

وادْخُل من درِب سرِّي

لِكُلِّ مضاجع الأحزان

واضفِّر من شجر بلدي

بروقاً مارْقَهْ من صدري

حأسأل عن بلد غاطٍ

لحدِّ الليلهْ في الوجْعَهْ

أَنُط فوق سرْجي واتْحزَّم

أقوم من وقْعَةْ

لي وقعًهْ

أخُتْ ايدي البتوجِعْني

على السأم البِراجِعْني

واسأل..

يا وطن يا بيتنا

ليه شوقك مواجِهْني

ليه حُبّك مُجهْجِهني

وليه تاريخ زمن خسران

موكّر لسَّه في شجني؟

حأكْتب لي شجر مقطوع

مسادير

يمْكِن يتْحرك

خطابات لي طِفِل مجْدوع

يقُوم

يجرى

يَقَع

يبْرُك

رسالَهْ لكلِّ قُمْريّه

إذا دم الشقا اتوزّع

على كل البيوت

ما تْرِك

واسأل..

عن وطن رايِح

وادّيكم خبر جارح:

بأنّو جميع جُموع الناس

حيفْضَلوا لا كُراع

لا راس

ونشترى في الدكاكين يوم

مسابِح من دموع الناس

مساحيق من هموم الناس

زَهَج

يتْعَبّا في الأكياس

ونعْلن في المزاد علناً

وترْغي الجوقَهْ والأجراس:

"!نبيع الطِفلَهْ والكرّاس"



واصْرَخ

! ياوطن! يا بيتنا

ليه ما تبقى لينا الساس

قَدُر ما تجري فيك

أفكار...

يزيدوا الحَبْس والحُرّاس

قَدُر ما تجري فيكْ الخيل

تَدُوس الهيبَهْ

والإحساس

واسأل

يا وطن رايح

اذا كل القبور دَخَلت

بيوت الناس

بلا اسئذان

بلا صلوات

بلا أكفان



جريمَهْ اسائل الدّفَان؟

حريمَهْ طَلَب تَمَن قبري

من البايع في أيِّ مكان؟

واقولكَ يا وطن

رايح

واقولك يا وطن

آمر

سلام النّفْسِ ما كافر

ولا كافر

ولا كافر

.............خطـــــــــــابات فى حمى الوطن...........



فتَحتَ جوابك الأوّل

لقيتَك لسَّه يا وطني

بتكتب بالعَمار والدم

ولسَّه بتسْكَر أمدرمان

على الشارع...

وتتْكوّم

وتمْرُق من صَدُر مسلْول

نهودهْا

تَدُوسن العربات

ترضِّع فى الكلاب

مشنوقَهْ من عينيهَا

في الساحات

وتضْحَك في زمن مسموم

ولسَّه بترقُد الخرطوم

تبيع أوراكْها للماشين

تَطِل من فوق عماراتهْا

وتَلِز اطفالهْا في النيلين

وترجع للرُقاد تاني

اشوفك في جواب تاني

مشيتْ اتمشَّى فوق همكََ

وصلْني جوابك التاني

يحيض الغيم على سطوركَ

يقطِّر من سماكْ دمّك

بشوف في جوابك التانى

مُدُن مبنيّةْ متكيّهْ

بتمْرُق من شبابيكا

عيون برموشَهْ مطفيَّهْ

شَرَك لي كُلِّ قُمريَّهْ

وأماني كتيرَهْ مخصيَّهْ

شوارع بالنهار والليل

مدبّسَهْ بالحراميَّهْ

معلّقَهْ في صدور الناس

كلاب اسنانْها

مبريّهْ

على مرِّ السنين تحْسب

شهور أيامها عِبريّهْ

مشيتْ اتمشَّى فوق همّك

وصلْني جوابك

الدمّك

رقدتَ على البحر غنيتْ

مليت احزاني بالأمواج

جرحْتَ الدنيا بالدوبيت

جريت لي ساحَة الشُهداء

لقيتُم لا وطن لا بيت

دخلتَ منازِل الأُمّات

وطلّيتْ لي شقاء الاخوات

مرقتَ كأني زولاً مات

لقيتْ أطفالي في الشارع

بيجروا على أمل واقِع

رقدْتَ على البحر غنّيت

واتذكرت َاهَلَن لي

ساكنين في سجن كوبر

مليتْ أفراحي بالأمواج

وشدّيت الرحال قُمْتَ

لحدِّ الليلَهْ

ما عُدْتَ

شبابيك فتَّحَتْ أبواب

وأبواب فتَّحَت حارات

وكنتَ معاكَ يا وطني

على حُمّى الجواب الفات

صحيتْ ولقيتَك الشارع

وكِتْ تِتْمايل النخلات

ضُلّك

على أيامك الجايات

وفي جوابك الرابع

لقيت الناس على الشارع

وصوتَك من كهفوف طالِع

كَوارِيك للسماء السابع

كواريك للسماء السابع

!كواريك للسماء السابع

................ســــــؤال ؟............



جِيتْ أسألِك

يا طفلَة الألم الرضيع

تدِّينى خاطْرِك شان أضيع

فى شوق موزّع فى الزحام

يا عذاب الريح للخيام

يا صهيل كَسر اللِّجام



يا خِتَام قبل البدايَهْ

يا بدايّهْ بدون خِتَام

جيتْ أسألِك مين علّمِك

إنّو الزمن فى مرَّهْ ناقِص

ومرّهْ تــــــام

جيت أسألك

الشوق مكتّف فى الطريق

والخوف مداخل للفريق

جيت أسألِك

مين علّمِك لُغة الزهور

مين علمك غضب الحريق

وانت باحَهْ

وانت واحًهْ

وانتِ ذاتِك سكَّة الزول للمضيق



فارْدَهَ السواعد

للزوابع والمطر

للْهَم يَولْوِل للشّجر



عايز أسألِك

مين علّمِك



!لَمّ السلامــَهْ مع الخــطــر

اتابع ..
الدوش كان مُـلهماً ..