Post: #1
Title: البنريدو بنولع ليو اللمبة.. و الما بنريدو بنحرش ليو الكلبة
Author: almulaomar
Date: 02-02-2008, 09:11 AM
هذه الرسالة وصلتني على الإيميل وأحببت أن أشارككم فيها وأن تكون مدخل لحوار إن شئتم
==
والرَدَحِى لمن لا يعرفونه هو طريقة من الطرق الكثيرة التى تستخدمها النسوان فى حروبهن و نزاعاتهن .. وتعتمد أساساً على إستخدام فنون اللغة من سجع و طباق ومقابلة لإعطاء الكلمات معنىً أكثر قوة وهذه الكلمات بدورها منتقاة بعناية من قِبل الرادحة لتؤكد علو مكانتها أو لِتحط من قدر رادحة أخرى وهو ما يجعله ضرباً من ضروب الفنون تشتهر به الرادحات و يتميزن به عن باقى النسوان البجم اللآتى لا يستطعن الدفاع عن أنفسهن و للحقيقة فخلال تجوالى فى العديد من البلدان -عربها و عجمها- لم أجد شعباً له هذه الممارسة أو حتى مثلها من حيث الـ(flow) أو الـ(freestyle) إلا فى مصر فهى موجودة لكنها ليست بنفس الجودة .
أذكر فيما أذكر قديماً أنه كانت تسكن فى حىّ قريب من حيّنا رادحة من فطاحل الرادحات وفوق كونها كذلك فقد كانت كثيرة الجثة سميكة الجلد وافرة اللحم كثيفة العظم واسعة الحلقوم كبيرة البلعوم لها جنازير صوتية بدلاً من الحبال الصوتية وكانت هذه المرأة (فتوة) النساء فى ذلك الحى فكثيراً ما يلجأن لها لتأخذ بثأرهن بيد أنها كثيراً ما تنفجر إذا شاغلتها إحداهن بكبر حجمها ف(تغُز) إحدى يديها فى وسطها والأخرى ملوحةً بالمفراكة فتردح مفتخرةً :
ما تقيفى فى الزلط و تتكلمى غلط
نحن نححححححححححححححمد الله الغدا ضأن.. و التحلية برتكان...
العشا حمام و التحلية شمّام .....و مليانيييييييييييين يا إنتى ...
لا كوع يقد الوسادة لا ساق يضبح الجدادة ...نحن تربية بيت و فرش موكيت....
....هيييييههههيييييييييى..
حليلكم إنتو يا ناس الإشلاق يا الما سمعتو بى السيريلاك ....
نببببببببرة و نستبرة و ما نسكن جبرة...
بششششششتنة و الناس متمحنة ...
أوع من كدا و الدنيا شتا ...
هيييييييييييييييييييييييى ...
لا كرعيننا رقاق و لا مولودين فى زقاق ..
أولاد عوااااااااايل و عندنا فايل ....
ولدونا فى الإمتداد و حبّينا فى البلاط ..
نححححححححححححمدو..... البنريدو بنولع ليو اللمبة.. و الما بنريدو بنحرش ليو الكلبة !!
عشان كدا أعملى لاين و أقيفى بهايند.... و أفهميها... أعملى شخيط و اقيفى بعيد ..
سجم و كمان عدم فهم ؟!!
هييييييييييييييييى و تااانى هييييييييييييى و تانى و تانى هيييييييييييييييييى....
ما تكبى الريحة و تعملى تفتيحة و تخلينا نقيف ليك فى طرف المعلقة و نوريك الصعلقة .....
كان جبل طلعناو و كان عسل لحسناو ..
هووووووووووووى.... تنبزينى أنا يا كرور يا وسخ الخور !!
يا تربيزة الجزارة يا اللامّة الوسخ و الزفارة !!
بطااااااااطس و مستوى غااااااتس ....
هييييييييييييييييييى
أخير ليييييك فتحى عينك قدر الريال و خلّى أضانك قدر العقال ...
ما تخلينى أدق الصفايح و أطلع الفضايح وأسمع الما سامع
يا قفه بلا قرعات يا عفنة حمارنا المات
يا مرة يا مجنونة يا شبه حجر الطاحونة ...يا ليمونة و عاملة فرعونة !!!
هيييييهييييييييييييييييييييييي ....
غادى غادى الجزام بعادى .
يا الككوية يا أم جضوماً موية
الشمس ضربتك و الرجال أبتك
==
والله في واحده في حلتنا ينطبق عليها بيت الردحي أعلاه وعاوزه يوم تغلط معاي ساكت عشان أقول ليها الكلام ده
|
Post: #2
Title: Re: البنريدو بنولع ليو اللمبة.. و الما بنريدو بنحرش ليو الكلبة
Author: العوض المسلمي
Date: 02-02-2008, 09:22 AM
Parent: #1
نعم الملا عمر
تحياتي
نعم عادات تستمر ولا تنقضي
تلك موروثات تجدها يوميا
وبوسيله متشابه
ونحن الدايرنو نقطعوا الظلط
والكارهنوا بنوصف ليه غلط
وسلامي
|
Post: #3
Title: Re: البنريدو بنولع ليو اللمبة.. و الما بنريدو بنحرش ليو الكلبة
Author: بابكر التوم
Date: 02-02-2008, 12:31 PM
Parent: #2
الملا عمر
تحياتى
دق جرس صاح الصاح 
| Quote: ولدونا فى الإمتداد و حبّينا فى البلاط |
حاش الامتداد من الزولة دى نحنا شكنا ارقى من كداالقصد
امكن الامتداد غرب الزلط سابقا(العشش)
مع مودتى
|
|