في القرفصاء...أم فكو...

يابا.. الحريم.. الحريم..
وحارمن ليه يا ولد..
مو حقهن..؟

في قرفصائه..
أم فكو..
يلتحف فتقة الصوف..
وحده.. ظهره.. في مقدرة أن يتحملها..
وحيد قرفصائه .. التي تشرع الأبواب عن عرش سيف الدولة..
دولته..
وخريف زمانه..
فمنه اليد الواحدة تكفي
فقبضة اليد حول عود الطورية.. تمتد نهارا من أطول أيام الأرض..
والمحراث أين له التفلت..
وكذلك المبراة.. والكارديق..والإسلاج..
هو في ثوبه حول النخل..
ثوبه الفتقة ولا مخيط..
إلتحفه عمراً
ام فكو..
وبها يجلس..

في طولهم يرحلون
بين الجسر الأعلى والجسر الأدنى
أرض المترة وجانب التركيبة..
تتجنب مجيئهم فروع الأشجار
تنحني تحت الأقدام وخطوها
وتتكرر السلامة
ليس كمثل يوم العاصفة
التي تمر في كل حين
من بلاد لبلاد
وهو أكثرهم طولاً
وألصقهم بالفروع
وأقربهم للنخلات
بين يديه وطلعها زمن قريب
وحديث لا يرتاد الأحرف ولا تشرحة الألسنة
لا شيئ بين بين
ام فكو

عزيزي المسافر
تحياتي الي ان تترك الرحيل وتضع عصاة السفر

شوف اخوي
كلام منثور حلو وجميل
واستوقفتني فيه كلمات
رائعات
ذات معاني جميله

في قرفصائه..
أم فكو..
يلتحف فتقة الصوف

القرفصاء وهي الجلسه المحببه للكثيرين ومريحه لهم
ام فكو وهو الذي يجلس ولا يرتدي ملابس داخليه للرجل او سروال
الفتقه وهي قطعة القماش غير المخيوطه
انظر الي معاني هذه الكلمات الان
وكيف اصبح نطقها جارحا

وتحياتي
العوض

أخي العوض المسلمي

أسعدني ان أجد كلماتك في هذه المداولة في شأن وحال عرفته قرانا وريفنا الحبيب
وإضافتك تعبير عن الوجود الذي يحيا في تلك المعاني
نحتاج أن نتلفت قليلا بين تلك الظلال
لنجدهناك حياة تتبادل الأمكنة والأوقات..
وهيا بك ومعك في سانحة الحروف القلال..

نفر يتحدثون بما في نفسهم..
قليل ما هم..
نفر يعملونا بما في نفسهم ..
ذو حظ عظيم من يواكبهم..
دانت لهم نترات الصباح
وتبعتهم ارتخاءات الغروب..
وكاد هديرهما يمتطي النهار
وودهم يقتفي خطوات السهر
مبتدأ كل مدخل
ومخرج كل أمر..
ونبت يفاخر ماء أرضه..
نفر هم آثارة الحياة..
ومنارة تحيا
وحياة مسبحها نور..

جيران..
بالحيل..جيران..
سووها الكبار..الجيرة
ناساً بطنهم غريقة
ونفسهم كبيرة
والبتدخل فيها ما بتمرق
يسوولها لبق
حد ما شافوا ما قالوا
ولا بق
حد ما سمعوا ما سألوا
ولو كان حق
لا شيل حال
لا حسد لا غيرة..
كان ونيت بطولك نيت
ما بشوفوك عورة..
وزولك ده..
كان في يومو ده
ملك..
كان ليهم حوار..
وراحوا البدار
وطالوا القصار..
نطوا وحصحصوا
من جوة الدار شالو الخبار
الفيهو ما هيلوا
ما لهم بيه كان غطاه كان عراه
وزيو فوق حقو..
ما كان بيضارى..
بين وظاهر من الجبل للسارة..

بت باتاتات
جارة اماتو
عندها مقالة فيهو
وفي الفاتو

ويا قولها
الزول السو
داخل مارق بفلاليصو
لا بمد ايدو في النفير
لا بحفر البير
لا بشيل القربة
ويرش التربة
شن طلالتو
من غير
قولة الضكير
لو كان فوير

وغيرها وغيرها كتير القالوا
الشافوه ما دسوه
وزادوا وعبوا وكالوا
والزول في حالو
مجرجر توبو
ومحكر دوبو

خليها مقالاتهم
أسياد القول معروفين..
العارفنو
قولهم فيه حسد
والجهال
قولهم فيه عواهن..
الحساد شايفنو وارث ومورث..
حدادي مدادي
ودارا خضراء وعامرة..
وضوها بارق..
وكلها حركة داخل ومارق..
وحولها يحسدوا الزول على ظلو
يقولو عريض..
والجهال ناس قفرو جديد..
لا حضروا الساس لا دق القيد..
ما بعرفوه..
عرقاً دائم
وصيفا غائم

عليكـ الله تواصل يا مسافر

هيجت الزكريات ياخي

عنقود
تحضنه أفرع العنب
وتهواه اشجار التين والرمان..
مثلك..
يسافر بين مملكة سبأ
وممالك النبي سليمان..
يا أنت
يا أخدر..

..

عزيزي جدا المسافر

تحياتي و مشتاقين بالحيل

Quote: خليها مقالاتهم أسياد القول معروفين.. العارفنو قولهم فيه حسد والجهال قولهم فيه عواهن.. الحساد شايفنو وارث ومورث.. حدادي مدادي ودارا خضراء وعامرة.. وضوها بارق.. وكلها حركة داخل ومارق.. وحولها يحسدوا الزول على ظلو يقولو عريض.. والجهال ناس قفرو جديد.. لا حضروا الساس لا دق القيد.. ما بعرفوه.. عرقاً دائم وصيفا غائم

تسلم ... كلام مليان و مترع

باجهينة
الأديب أليف القرطاس والقلم..
تحية معبرة..
وتقدير كبير..
لوجودكم في هذه الساحة..

وأقول..
بت باتاتات القول مو هيلها..
ولا في الحسبة..
هي واخواتها وعولهن الفرعو وبرعوا
في دار باشمال اتوسعو ضرعوا
وفي قد الرهيفة اتنازعوا وقلعوا
إلا أبو فتقة
ما وصلوه محل ما جدعوا
وما بطولوه مكان ما طلعوا..
وزنه عشرة
وعشرة في عشرة لتاسع جد ..

وجدهم لما بين طرف الدروة..
كان دارع فوق ظهرو فروة..
لا شبرية ولا توكاب..
لا بقجة معقودة بعروة..
ولموه أجداد أبو فتقة..
أسياد الخير الحق وعتقة..
وفي حواهم تب ما بضع
حق العشرة
في الخير والشر
قدامي وتب ما قصر..
لكن في عولو اتلمو سراري..
وزادو عليهم شوية تبع..
وناساً بانو كدي بالضروة
وعينك سرك
في سوق الناس
بيعة وشروة..
وفي الحيف الشال براقو
بتطول الإيدي تمد الكروة..

لا محرية ولا مدرية
ولا في البال
البطن العائبة تربي رجال
والصلب الخائبة تصون أجيال
سلالة ناس
زول وراء زول
هقال في هقال
وفعائل شينة ما بتتقال

بينهم بين
بين يوم واتنين
وليل وصباحو
الزينين راحو
"أتوسدو التقيلة إنشاء الله ثابت أجرهم"
"راحو الخيار وفضلو البذار"
والدنيا صيف وراء صيف..
لا سحابة شالت
لا بحراً طلع في القيف
ومراقين الزاد براها السوس

وكل جديد
يوم وراء يوم
يصبح عادة..
وشفنا بلاد تزح وتروح من تحت أسيادة
وتخاف زي غيرك
يوماً ساحق
وغير المحقة ما عندك
تقول يا مروة
ووارث الرخوة ما بسندك
وتعود الصيحة..
ما ميتة بتسمع
جاتك رادة
ويبين الكوك عند المخاضة..

والدنيا أم قدود..
تجر التقيلة ولامة
وفي بحر الشيمة
تتلكأ سفن المشاعر
وتحوز السبق الملامة..
وفي باب دخولها بتسألك
كل شيئ عليك
ماهو لك..
يلا أرجع بالسلامة..
ولا أتبع من هلك..