سودانيات في امريكا يستغثن !!!!!

في الولايات المتحدة الامريكيه ظاهره خطيره وسط المجتمعات والاسر السودانيه ... الكثير من الاخوات السودانيات طالبات الطلاق في المحاكم الامريكيه

صرحت لي احداهن ان زوجها لا شغل ولا مشغله ويرفض الخروج للبحث عن العمل وكسلان .. واخت اخري رأيها مختلف من الاولي .. وتري ان عدم خروج زوجها للعمل ما بيهمها وهي سعيده بانها تذهب للعمل كل يوم وتقوم بواجبات بيتها وزوجها ... وواصلت .. انا ما طلبت الطلاق الا بعد انه اصبح زوجها لا يقوم بواجباته المنزليه من نظافه وغسيل ومكوه وغسيل العده علي اكمل وجه

وسيده اخري قالت ان زوجها راجل ما حمش .. وهي عايزه ليها راجل حمش .. ومدمن كمبيوتر ...

الثلاثه اتفقن علي حاجه واحده .. ان يهجرن رجالهن في المضاجع ... وطلبن الطلاق ..

المصيبه اذا حكمت المحكمه بالطلاق ... الحا يقضي شهور العده منو ؟؟؟؟ الزوج ام الزوجه ؟؟؟

الله يكسفكم ...
__________________

حُذفت لاسباب فنية


كيفك يا سمير

Quote: حُذفت لاسباب فنية كيفك يا سمير

عساكم طيبين يا ود الجيران ... والاسباب الفنيه ديه ذكرتني بمقالات استاذنا وعمنا واديبنا الصحفي شوقي البدري ... عنوان احد مقالاته الناريه بتذكر كان اسمو (محن سودانيه) وتناول فيها استاذنا شوقي تقاعس نفر من الرجل السوداني في الولايات المتحده الامريكيه عن القيام بواجباتهم تناول استاذنا شوقي البدري بعض القضايا السودانيه ومحن الرجل السوداني بصوره سلسه ولطيفه وسهله ومهضومه ... وفي سلسه من سلسلات المحن التي كتبها وسردها :

Quote: و من المحن السودانية الامريكية، التي يشارك بعض السودانيين فيها اساتذتهم من اخوة العقيدة الصوماليون، ظاهرة الاحتيال المنظم علي القانون و الالتفاف علي القيم الاجتماعية و الاخلاقية المستقرة. فهناك الالاف المؤلفة من المزورين الذين يزاحمون الفقراء و المعوزين في مكاتب الاعانة الاجتماعية و لا يترددون في تعبئة الطلبات بكل انواع المعلومات الكاذبة و يسلكون كل طريق، مهما بلغت مخاطره، لايهام موظفي الرعاية الانسانية و تضليلهم بصور ووقائع وهمية عن اوضاعهم الحياتية، ثم - و يا للهول - يحرضون اطفالهم و يدربونهم علي الكذب عند الزيارات المفاجئة للاخصائيين الاجتماعيين لمساكنهم بغرض تمرير مزاعم تسهل التزييف كالادعاء بهتانا بان الام مطلقة و انهم لا يعرفون للاب طريقا، فيأتيهم السكن المجاني او شبه المجاني و الشيكات المالية و بطاقات الطعام و الشراب وغيرها من امتيازات الفقراء فيرتع الاب مع ابنائه في نعيم اعانات المعوزين بغير حق مشروع. ثم يأتي يوم تصادف فيه الرجل من هؤلاء المتكذبين في مناسبة اجتماعية فتسمعه يرغي و يزبد في امور الدين و يتبرع بالفتاوي عن ان اظهار الاحتفاء بمناسبات عيد الميلاد و رأس السنة مخالف للشرع و تراه يُكثر من السؤال عن مصدر اللحوم المقدمة في المناسبة و عما اذا كان ذبحها و تجهيزها قد تم وفق احكام الاسلام!

تخريمه بمناسبة الظروف الفنيه : لم تفوت علي استاذنا شوقي رواية الامام ابوحنيفة النعمان الذي نقل عنه الراحل عبدالرحمن الشرقاوي في سفره القيم (أئمة الفقه التسعة) رواية عن اغرب ما رأي الامام في مدينة زارها اذ قال: رأيت رجلا جاوز الثمانين، جعل صناعته و مورد رزقه تعليم القيان و تدريبهن علي الرقص، فكان الرجل يقضي سحابة يومه قائما يقفر ويهز جسده هزا، فاذا جاء وقت الصلاة صلي قاعدا!

والتعديل لانو اخوك العربي طش منو ... والله غالب ...

حُذفت ايضاً لاسباب فنية ..
سوري يا سمير .. ظروفنا جات معاك كِدة
اعفي لينا

اخي سمير
تحياتي
حتي هنا في السودان يزداد الطلب للطلاق يوميا
والاسباب متعدده ولكنها لاتخرج من الاطار الواحد
الغيبه او الهجران

ولكن
وسيده اخري قالت ان زوجها راجل ما حمش .. وهي عايزه ليها راجل حمش
اختنا دي معها الف حق
فالرجل من غير غيره وخشونه فلا تسعد معه الزوجه

وموضوع مثير
من يقضي شهور العده؟
خلي غيري يجاوب

وتحياتي

Quote: ولكن وسيده اخري قالت ان زوجها راجل ما حمش .. وهي عايزه ليها راجل حمش اختنا دي معها الف حق فالرجل من غير غيره وخشونه فلا تسعد معه الزوجه وموضوع مثير من يقضي شهور العده؟ خلي غيري يجاوب

السوداني الاصلي الاصيل المسلمي ...

والله حال الكثير اصبح يحنن ... والقلوب اصبحت ميته ... في مره من المرات زرت اخ من الاخوه الكرام وبدون خجله قال للوليه امشي السوبر ماركت جيبي لينا ((( علبة فول)) والله كنت عايز اقول ليهو يا اخونا انتا الفول ده حا تتطفحو كيفن والوليه هي الحا تمشي تشتريهو ليك .... ما بالك لو كانت هي العامله وهو الخامل ..

الكثير من المهيرات طولن رقابنا .. ومنهن الاخت من جنوب الوادي ..آدوي رياك المهاجره للولايات المتحده وابتدت حياتها بالعمل في افلام الكرتون وانتهي بيها المطاف ان تصبح من اشهر واكبر القانونيات في الولايات المتحده ....

تخريمه : زمن اغبر ... ولو ما زمن اغبر اصبح الرجل يفتش في الاجاويد عشان زوجتو ما تطلقو وتخليهو يعيش في البيت ... ..

كسفونا الله يكسفهم ...

Quote: انا ما طلبت الطلاق الا بعد انه اصبح زوجها لا يقوم بواجباته المنزليه من نظافه وغسيل ومكوه وغسيل العده علي اكمل وجه

الدايره تطلقه لانه قاعد طوالى فى الكمبيوتر


دى زوجها عضو فى المنبر العام والاشنو ؟؟؟




السنجك

اخوي ود الحسين ما تكشر لي سنيناتك ديل ... انت قايل حال اخواتنا السودانيات هنا حال اخواتنا السودانيات في دول الخليج ... والله هنا مكافحات يشتغلن ليل نهار والحال وصل بيهن يشتغلن عتاليات وبكرامتن ... لكن المصيبه في اخوانا لينا وصل بيهم الحال يجهزوا البستله ويكسروا الشاف والطلح ...

تخريمه قال عمنا وشاعرنا وابن سوق بانت البار الاستاذ هاشم صديق ...

ناس البيت
هوووي يا ناس.
يا عشمانة.
يا إخلاص.
بنات كلتوم
يا فوزية
كيف حالكن
مشتااااقيين
سلاااام بالكوم
..........
جات سعدية
شايله شمار
معاهو «التُوم»
مشت شهرين
تَنَفِّس بتها
«الخمجانه»
في الخرتوم
........
تمام شهرين
بيوت الحله
لا سمعت خبار
لا شَمار
ولا قرقر ضحك
حلقوم.
ولا طقطق لبان
هيمان
في مُبْخر
بخور تيمان
ولا شالن حريم
فنجان
وسيرة زول
على قدوم.
لا ضحكو الصغار
في حجوة
لا سهروا الكبار
في حكوه
واتمحّن وطار
النوم.
......
نان سعدية
بت جبريل
كان عارفين؟!
رويحة الحِلة
والطلّة.
لا قِدْمت
ولا هِمْلت
لا مسخت
لخلق الله
لا عِرْفَت
بيوت الحله
ليها متيل.
.....
كان غابت
تقول نامت
عيون القمره
أو ترتر
وفات النيل.
.......
هي المشاطه
والحنانه
والدلاّكه
والدبّاره
والشمشاره
والسمساره.
والطهاره
بي موسا
ما خلت
في هذا الشان
لِبت في الحله
شي مطلوق.
......
هي الجهّازه
للعرسان
ما بتقعد عروس
في حُفره
لو سعدية
ما وقدت
طلح دخان.
هي ديمه الراس.
القيدومه.
دق الريحه.
ست الشوره
والطايوق.
مرسال النَقَص
للسوق
عَرَق الهِمّه
للحبان
خبيرة الخُمره
بي ميزان
لو شم العريس
عوسا
تسيل دمعاتو
ويتجرّس
تقول ولّع
عديل بمبان.

والله غالب .... وبرقيه لاستاذنا هاشم صديق .. انتقلت العدوي من سعديه للمواطن حسن سلوكه .. وفي امريكا سعديه لمن تطلع الشغل وتسيب زوجها نايم في بطن البيت بتكتب ليهو مذكره عشان يعمل ليها كورة مديدة حلبه لصاحبتها الولدت وجابو ليها ولد ...

سلامات للكل...
غايتو الراجل الينوم ومرتو تمشي تفتش الرزق للبيت دا اخير يطلقوهو!!
انا شخصيا اسعد كثيرا لما اشوف بت بلدي مهما كان مستواها التعليمي والاجتماعي - اسعد بيها وهي (تساهم) في رفع المستوي المعيشي لي بيتا!!
وفي ذات الوقت يؤلمني تقاعس فئة مقدرة من الازواج بالذات فيما يعرف بدول الرعاية الاجتماعية- عن القيام بمسؤولياتهم ...

but divorce? that is not a good solution

التحية للمراءة العاملة .....والهم نعوذ بك من العجز والكسل ...وغلبة الدين وقهر الرجال!!



دمتم

ابو ياسين

من الموكد هذه صور محزنة ومخجلة