لا يستطيع المسافر عبر نيويورك عبر بصات القريى هاوند أن يتجاهل هذه الصفوف الطويلة الملتوية على بوابات البصات المرقمة ..والتى تتجه الى كل مدن أمريكا تقريبا... ان يتجاهل هذه المرأة السوداء التى تحكى عن أهل بيتها بقلب طيب. يكاد فى كل صف منهم، امرأة سودء متوسطة العمر تحكى عن ما قاله لها ابنها أو ابنتها يوم عيد ميلادها أو يوم الكريسماس أو رأس السنة. ولعلها الصدف التى تجعل فى كل صف رجلا من الشعوب الصفراء يستمع لتلك الحكاية وبنتين بيضاوتان تصغيان السمع من بعيد ...بينما ينادى كماسرة البصات على حلول موعد الرحلة ...
كنت أنا ويسرى ابنتى نحمل امتعتنا الغريبة التى تتضمن آلة الايقاع "جمبيه" وثلاثة سيوف مربوطة فى كيس أخضر وشنطة كبيرة تحتوى على أزياء "عرائس النيل" نزحف فى هذه الصفوف كما يحدث دائما فى رحلاتنا الداخلية ...والتى غالبا وعندما ترانا "المرأة السوداء المتوسطة العمر" تتخلى عن حكايات أسرتها وتلاحقنا بالاسئلة: من أين نحن؟ وماذا نقدم؟ وسرعان ما ينتشر الخبر بين المسافرين ويقرر ثلاثة على الاقل منهم الذهاب الى العرض فى المساء لأنهم سيكونون هناك على كل حال.
هكذا ظلت دعاياتنا تعمل ...وعندما يكون أحد المسافرين حاملا لكمبيوتر متحرك نقول له "شوفنا فى يوتيوب" ...ويتم لنا الاتصال التالى من حادثة عابرة كهذه ...
فقد ظلت فرقتنا تعمل بلا منتج ولا وكيل طوال هذه التسعة أعوام ...ولم تتوقف. على الرغم من تبعثر البنات فى المدن المختلفة ..وقد وصلنا الى قرار التوقف عدة مرات ولكنها ظلت تمضى بالمد الذاتى ...وليس هناك فى العالم من يكون أكثر فرحا من البنات وأنا عندما نلتقى رواء الكواليس فى كل عرض.
وفى هذا العرض الذى تم فى فيلادلفيا كان الوضع مختلفا، فقد كان وكيلنا الذى تحدث عنا فى اجتماع "المكتبة المركزية بفيلادلفيا" هو الصديق صديق عبد الهادى، المكتبة تحتفل سنويا بكتاب مميز. وهذا العام يحتفلون بكتاب The Lost Boys ...ويروى رحلتهم المدهشة ، وهم يعبرون سنين الطفولة واليفاع يتما ومسيا على الاقدام وعبر المعسكرات حتى انتهة بهم السفر الى أمريكا وبدأت مشارب حياتهم تتشكل فى المهجر.
استقبلنا صديق بتلك البشاشة المعهودة فى أهل فيلادلفيا وهم يؤسسون لجالية ومركز سودانى لعشرات السنين ، تبادلنا ذكريات هذا المكان وبعدها بقليل كنا نبحث عن "فندك" ليخاوى الفندك الذى أحمله وذلك لأدخال غنا الفندك على مشهد "الخدامات" الذى هو جزء من رقصاتنا ومشاهدنا أصلا وقد ألهمنى بالفكرة بوست فتحه "كبر" هنا فى المنبر ...ووجتها فكرة مناسبة لأن تغنى البنات بالفندك بدلا من أن أصاحبهن بالايقاع من الخارج كما كان يحدث فى السابق. المهم بحث الفندق أودى بنا الى محل لبنانى كانت رائحة الثوم التى تنبعث من الطعام فيه لا تقاوم ...حملنا الطعام وتوجهنا الى بيت الصديقة "ايثار أبوطه" وضربنا الطعام ضربا عتيا ...وكانت السلفونات التى نحملها تقاطعنا " سيرين وصلت، سارة تسأل من المسرح ، ناهد اصلا فى البلد ، حسن مبارك ومحمد عركى رايحين ...
هذه هى القصة ، محمد عركى ..ابن الفنان ابو عركى ...عزمته على العرض حتى أراه فهو غير انه ابن عركى فهو ابن عفاف الصادق صديقة عمرى وحبيبة قلبى ...ينادينى ماما وانادية حبيبى ...أردت أن أرى عيونه الحلوة ودعوته ليشاركنا العرض، حسن مبارك اصلا واحدا من المؤسسين للفرقة وهو ابن الشاعر مبارك حسن خليفة وتربطه نفس صلة الامومة بماجدة محمد على أم سارة وناهد يناديها ماما وتناديه حبيبى ، فصار منا. التقينا نحن والبنات فى كواليس المسرح وحدث ذلك الصراخ عند اللقيا، وتلك الاحضان والقبلات وبدأنا بسرعة نراجع المكان والبروفات والاضاءة والصوت والتوقيعات والمستندات وما شابه حتى بدأ العرض ..بدأنا بقليل قبل وضول حسن ومحمد عركى، وفى الرقصة الثانية حضر الاثنان...وهللت لهم وهلل لهم الحضور وانتظم العرض، وانتابتنى تلك الحالة من الانسجام والالتزام نحو العمل الفنى تماما كما الوطن الذى نقدم العروض من أجله والLost Boys واياقاعات السودان ورقصاته المختلفة وتسلسلت فقراتنا والصالة فى قمة التواصل معنا ...كل شخص أبدع كما لم يبدع من قبل ...ولكن مفاجأتى كانت محمد عركى، لقد قوطع بالتصفيق ثلاثة مرات، وحكيت لهم عنه وعن أبيه اسطورة الغناء السودانى وزيارته الاولى لأمريكا، لا حظت أن هذا العرض كان هو أول عرض لمحمد عركى على مسرح أمريكى ....
حفاوة السودانيين بنا وكرمهم الجميل وعشاء مها زوجة الخاتم وبيت أيثار المريح الانيق ووقفة أقبال المرضى معنا خلف الكواليس وهى تنظم الدخول والخروج والازياء ...ويسرى بت صديق واقبال التى جاءت لتقابل صديقة عمرها يسرى بنتى وهى تلهث بهما فى منتصف الانشغال ، كل هذه الاشياء التى لا تنسى ...اجتمعت لتكلل هذا الحدث بحلاوة الذكرى ...لكنها أبدا ستظل حادثة اعتلاء محمد عركى لمسرح أمريكى لأول مرة ...
كم أنا فخورة بك يا حمودى يا حبيبى ...وشكرا لك حسن مبارك بأن جعلت لقاءنا ممكنا ...ولا ينحصر فخرى عليك لأنه يمتد لعرائس النيل وهم يقاومن رياح الزمن بالبقاء ..ويقاومن قبح الحروب بالفن الجميل...ويمتد لكل سودانيى فيلادلفيا الذين كانوا سببا فى هذا العرض ونجاحه.
Post: #5 Title: Re: قصة متوسطة ... Author: سلمى الشيخ سلامة Date: 01-20-2008, 01:15 PM Parent: #2
هذه قصة فارهة يا صديقتى قصة ابطالها الزمان والمكان وكل من حكيتى عنهم قصة لها من المدلولات ما لها اول هذه المدلولات ان (راس المال )دائما جبان لا يراهن على الفنون قدر رهانه على اشياء اخرى فمنذ ان عرف الفنان السودانى سكة الفنون وراس المال يتوارى فى الصفوف الخلفية لعلك اشرتى الى غياب الممول وهذا حال كل الفنانين فى كل شبر من بلادنا لكم الله وانتم تعملون بلا كلل لتوصيل فكرة احببتموها
انا غايبة من المنبر أجى أتاوق مرات ,اشوف ناس جميلة تكتب كلام سمح، ونا مشاكسة تكتب كلامى "قمح" ...وأنا ما يكون عندى زمن عشان أقول خير ولا غير ..وأقول خلاص الناس حتزعل منى، الناس حتلومنى على عدم التعليق، الناس حتعاملنى بالمثل ....
لكن شوف بالله ؟ انا رميت البوست ده قنعااااااانة ...هههههههههه....وأهو جيت لقيتكم "بين ضبوعى شموع"
شكرا عادل أمين ...وابو جهينة وسلمى الشيخ ...وبركة القصة المتوسطة الجابتكم وما عدمناكم ....
أها يا سلمى ...الف مبروك لى عزة "شفت الفضيحة دى كيف؟؟" وان شا الله ربنا يسعدهم مع بعض....
محمد فنان كبير من ما كان صغير.. متذكره لما كان واقف في مسرح مدرسة الموردة الإبتدائية بعزف و يغني: ماما عفاف الحلوة ماما عفاف الطيبة... يومها صفقنا له بقوة و كنا مأخوذين تماما بالولد الصغير البعزف و يغني في نفس الوقت...
قلت لصاحبي حينها: هسي ده ما زي حيدر بورتسودان
بعدها بسنين طويلة ألتقيته مع غاندي و عماد ببو و باقي الشباب كان وقتها قد نضج و كان قد وقع بهوى الجاز .. الآن أتخيل ماذا بإمكانه أن يفعل بجمهور أمريكي فيه من السود ... سيقتلهم بالخلطة العجيبة بين الخماسي السوداني و معجزات الجاز محمد أسرع من رأيته يحرك أصابعه على البيانو و أصدق من رأيته في السودان يفعل ذلك و هو علاوة على ذلك لطيف و مهذب و وجيه تحياتي ليه أمانة في رقبتك يا تماضر.. ولو أداني الإذن عندي حكاية إسمها حكاية الكريسيدا و صاحب محمد الأسرع منها... بحكيها ليكم.
ده ما ود آسيا أخت عبد الجبار ...اها عبد الجبار ده جارى فى الحلة ..وصاحبى فى المعهد وناس بيتو أهلى "فى الرضاع" وغاندى ده ولدنا عديييل كده ...اسألو كان قال ليك لا تعالى راجع لومنى ...ابو خالد ده المعانا فى المنبر ده خالو ألاسمو ربيع ....ههههههههه شفتنى متبحرة فى الزول ده كيف؟ يازول نحن بس كنا محظوظين أصحابنا كلهم فى السابعة والرابعة بقوا أساطين فى الفن ...انت قايل محجوب شريف ده جار ناس منو؟؟ ما نحن ديل هههههه، وللحزن والأسى جارنا كان بدر الدين عجاج الله يرحمو ويغفر ليه ويحسن اليه ، موتته شقت كبدتى كرررررر كده بى سكين ولسه نزيف حزنو ما وقف....
المهم ده غير ناس محمد الامين وصالح عركى والاستاذ فتح الرحمن عبد العزيز ...وغير وغير ....
أحكى لى قصة الكريسيدا على مسئوليتى ...محمد أنا بقنعو ...ما بخالف رايى
Post: #9 Title: Re: قصة متوسطة ... Author: sanaa gaffer Date: 01-20-2008, 01:47 PM Parent: #1
الاخ تماضر ...
سفيرة الفن السوداني في امريكا ...
تعرفي يا تماضر اجمل شئ هو اصرارك على تعريف العالم ببلدنا عن طريق الفن والابداع السوداني الجميل ...
الناس الهناك دي ما بتعرف عننا غير اننا بلد مجاعة وحروب وموت ودمار ...
وفي ناس ممكن تكون ما سمعت بينا خالص ولمن تقولي من السودان يسالوك بدهشة السودان دة وين ؟؟ ...
معجبة بصمودك وكفاحك ... انت مثال لامراة قوية زي الحديد وناعمة زي الحرير ...
متابعاك من زمان .. من زمن الفور اوول ... بيشدني استغراقك في تفاصيل المجتمع السوداني حتى وانتي بعيدة عنو بالاف الكيلومترات ...
( عرائس النيل ) حلمك الذي تمسكت به برغم الجدل والانقسام بين مع وضد .. حلم سوف يستمر طالما تستمرين في رعايته ...
يا زولة طبعا أصحاب محمد كلهم بخافوا من أبو محمد شديد... الزول ده فنان و كل شئ لكن في تربية محمد ده بس تقول إمام جامع .. المهم محمد ابوهو كان عنده كريسيدا لمن محمد يسوقها و الأستاذ راكب بسوق برررررررراحه و بإحترام شديد لو سايقها براهو لمن نملح معاهو بنقول الشهادتين زي تمانين مرة كده... بطير يا تماضر ما بسوق.. بطير عديييييل كده.. يوم من الأيام في واحد صاحب محمد (مافي داعي لذكر الأسماء ) ساكن في اب روف محمد وصله معاه في السكة في طريقه الى الحتانة الزول صاحب محمد بعد ما نزل من العربية هبش جيبه و اتذكر انو كيس الصعود نساه في الطبلون.. يقال و العهدة على الراوي انه محمد لمن وصل الحتانة كان صاحبه منتظره جمب الباب
يا سناء يا ختى وطى صوتك ما يسمعوك ناس الفور اول، الفوراول انا ما خليتا بس ياهو بى نفس الطريقة دى الهنا دى ..اجى نابلة يوم أكتب بوست ...وفووووووووو تشيلنى الشيمة تانى ما أرسى الا بعد شهرين .. يعنى حسة لسة ناوية امشى جيوبوليتك الجسد واتم كلامى عن منشأ الفرقة والظروف الاوجدتا بديتو يادوووووب السنة الفاتت هم راضيين بى كدى مالك دايرة تلفتى نظرهم يقولو لى بتتأخرى شديد ليه؟؟ ..لكن شكرا كتير على كلامك المشجع ده ...ورايك الجميل فى عرايس النيل و"فينى" (وش متواضع وعيونو زى التساليتين من الخجلة" .....ههههههه تحياتى يا غالية ...
Quote: يقال و العهدة على الراوي انه محمد لمن وصل الحتانة كان صاحبه منتظره جمب الباب
وبعد ده سجمو يا فاضلابى لأنه أبو محمدد احتمال كبير يقرا البوست ......÷÷÷÷÷÷
انا عموما حأتصرف.....بس يدينى ضمانات
Post: #13 Title: Re: قصة متوسطة ... Author: Adil Osman Date: 01-20-2008, 03:13 PM Parent: #1
كتابة جميلة تصلح سيناريو لفيلم قصير يا تماضر. متى كان هذا العرض فى فيلادلفيا؟ هل فكرتى فى كتابة سيرة حياتك ، ما يسمى بالبايوقرافى او الاوتوبيوقرافى؟ لو احتجتى لأى مساعدة أنا مستعد. فى تحرير المادة أو ترجمتها.
Quote: تابة جميلة تصلح سيناريو لفيلم قصير يا تماضر. متى كان هذا العرض فى فيلادلفيا؟ هل فكرتى فى كتابة سيرة حياتك ، ما يسمى بالبايوقرافى او الاوتوبيوقرافى؟ لو احتجتى لأى مساعدة أنا مستعد. فى تحرير المادة أو ترجمتها.
شكرا ياعادل على المدح والاطراء على الكتابة
العرض كان يوم 15 يناير يعنى لسه طعمو فى حلوقنا ...
والله انا عندى زى سطاشر مستوى للكتابة عنهم فى حياتى شى مسرح وشى غربة وشى امومة وشى اصحاب وشى شعر وشى زواجات مطرشقة وشى الفرقة والعمل السياسى .. وشى حالة كون المرء امرأة وشى أسرة وشى شغل الله والرسول ده ...وماعارفة كيف ابدا .. لكن عرضك مغرى يمكن ابدأ حسة ..كان الله طلق والغسيل تم ... شكرا ليك كتير
Post: #15 Title: Re: قصة متوسطة ... Author: Ahmed Yousif Abu Harira Date: 01-21-2008, 05:48 AM Parent: #14
*UP*
Post: #16 Title: Re: قصة متوسطة ... Author: هشام المجمر Date: 01-21-2008, 09:10 AM Parent: #1
تماضر
سلام
انت حركاتك دى ما بتبطليها
مرة حكاية ممثلة راحلة.....
ومرة قصة متوسطة
عناوين غاية فى الذكاء وكمان الداخل مبهج جدا
تحياتى لك ولفرقة عرائس النيل وكل مبدعيها من الشباب
Post: #17 Title: Re: قصة متوسطة ... Author: وليد محمد المبارك Date: 01-21-2008, 12:15 PM Parent: #16
Quote: وبعد ده سجمو يا فاضلابى لأنه أبو محمدد احتمال كبير يقرا البوست
دردقتك يا غشيم وحرقت كرت الزول
تماضر ازيك ما حا اقول ليك يا سلالالالالام يا مبدعة بقت كتيره ومسيخة
بس زيدينا مما اعطاك الله
Post: #18 Title: Re: قصة متوسطة ... Author: Adil Osman Date: 01-21-2008, 02:26 PM Parent: #1
Quote: والله انا عندى زى سطاشر مستوى للكتابة عنهم فى حياتى شى مسرح وشى غربة وشى امومة وشى اصحاب وشى شعر وشى زواجات مطرشقة وشى الفرقة والعمل السياسى .. وشى حالة كون المرء امرأة وشى أسرة وشى شغل الله والرسول ده ...وماعارفة كيف ابدا .. لكن عرضك مغرى يمكن ابدأ حسة ..كان الله طلق والغسيل تم ... شكرا ليك كتير
مسرح غربة أمومة أصحاب شعر زواجات مطرشقة الفرقة (عرايس النيل) العمل السياسى كون المرء امرأة الأسرة الشغل
حقو تبدى طوالى يا تماضر. دى عناوين الفصول. تحت كل عنوان اكتبى سطر واحد. والسطر بجيب السطر. والسطور بتبقى صفحة. والصفحات بتبقى كتاب. والكتاب بمشى المطبعة. وبعد داك بترص فى رفوف المكتبات. وبشتروهو القراء والفضوليون والنقاد واجهزة الامن والمخابرات. وأنا بترجمو الى اللغة الانقليزية. وردة لحيويتك. وطاقاتك. فليحفظك المولى عزّ وجلّ.
Post: #19 Title: Re: قصة متوسطة ... Author: Adil Osman Date: 01-21-2008, 06:05 PM Parent: #1
Quote: لا يستطيع المسافر عبر نيويورك عبر بصات القريى هاوند أن يتجاهل هذه الصفوف الطويلة الملتوية على بوابات البصات المرقمة ..والتى تتجه الى كل مدن أمريكا تقريبا... ان يتجاهل هذه المرأة السوداء التى تحكى عن أهل بيتها بقلب طيب. يكاد فى كل صف منهم، امرأة سودء متوسطة العمر تحكى عن ما قاله لها ابنها أو ابنتها يوم عيد ميلادها أو يوم الكريسماس أو رأس السنة. ولعلها الصدف التى تجعل فى كل صف رجلا من الشعوب الصفراء يستمع لتلك الحكاية وبنتين بيضاوتان تصغيان السمع من بعيد ...بينما ينادى كماسرة البصات على حلول موعد الرحلة ...
عارفه مشوايركم للبص والرحله وكل التفاصيل الحيه دي يا طمطم.. جابت معاها ذكريات جميله كتيره.. صوت سيرين وحركة ساره الكثيره وضحكات ناهد ورقصة تصور معاناة "الخدامات" وبعدين ايقاعاتك انتي وتقديمك... بس خساره يا طمطم ما قعدتي في لندن المره الفاتت..زي فرقتك دي عايزه تكون محترفه بالمعني المادي..لأنها من الناحيه الفنيه هي فرقه محترفه حقا..الأحتراف الآخر الذي اقصده.ز يحقق لها دخلها ويمكن من التفرغ أمام تطويرها.. ...........
...........
اما بالنسبه للكتابه عن كل شيء فانها فكره جميله وحتي قبل أن تصلي سن المعاش..وستضيفين لها تجارب أكثر عندما تصلين للتقاعد..حينها ستجلسين علي مقعدك المفضل تنظرين لكتبك الجميله بارتياح لا يخلو من الأعجاب..وتقولي حقو أكتب زياده..
عارفه مشوايركم للبص والرحله وكل التفاصيل الحيه دي يا طمطم.. جابت معاها ذكريات جميله كتيره.. صوت سيرين وحركة ساره الكثيره وضحكات ناهد ورقصة تصور معاناة "الخدامات" وبعدين ايقاعاتك انتي وتقديمك... بس خساره يا طمطم ما قعدتي في لندن المره الفاتت..زي فرقتك دي عايزه تكون محترفه بالمعني المادي..لأنها من الناحيه الفنيه هي فرقه محترفه حقا..الأحتراف الآخر الذي اقصده.ز يحقق لها دخلها ويمكن من التفرغ أمام تطويرها.. ...........
...........
اما بالنسبه للكتابه عن كل شيء فانها فكره جميله وحتي قبل أن تصلي سن المعاش..وستضيفين لها تجارب أكثر عندما تصلين للتقاعد..حينها ستجلسين علي مقعدك المفضل تنظرين لكتبك الجميله بارتياح لا يخلو من الأعجاب..وتقولي حقو أكتب زياده..
والله يا حليلكم يا ناس لندن ..اقصر زيارة فى تاريخ الطيران فى العالم .. انا لما رجعت الشغل يوم الاتنين وقلت ليهم كنت فى لندن ...شبكونى no kidding!!!
انتى ما تشوفى لى مسألة التفرغ دى ..بالمرة وكت اصلك واقعة ليك شديد كده ...
زى ما كانت بتقول امى الله يرحمها: كان مت ما تقولو كانت شديدة وبتضحك معانا ...انا ماااااشديدة هههههههه
والله احمد الله لسه اتلتل لكن الزول يموت فى الشغل ما عيب؟ لا كرمونا ناس جهاز الامن مع الكرموهم ولا المشاهدين الكرام قالوا كفاها النريحها
بس نعافر كده لمن نصل القبر ...مافى راحة الا يوم المناحة .....غايتو نحمد الله
عملتى لى شنو على غنية "نحمد الله عليك يالعذاب" ...ما لقيتى لى ليها فنانا باااااتع كدة يغنيها لى؟ اديها معاوية الوكيل ..متأكده حتعجبو ولو قال داير تمومتها تمومتا عندى ...هههه
شكرا ليك يا منى خليتينا نبرطب برة من راسنا ....تعالى تانى
Post: #24 Title: Re: قصة متوسطة ... Author: إيمان أحمد Date: 01-22-2008, 03:33 AM Parent: #23
تماضر سلامات
مشتاقة ليك شوق شديد، ولي حكاويك. أقول شنو؟ ربنا يجعل ليك في كل خطوة (امرأة سوداء) ويفتح أبواب وشبابيك الحب ليك وعرايس النيل. محمد عركي فنان، أتمنى أشوف شغله بعد ما كبر.... بتذكر لقاء تلفزيوني زمااان مع أسرة الفنان أبو عركي في بيتهم، كان بيعزف فيه أورج وبيغني. وأمه ست عظيمة وماساهلة.
أما فيما يخص أحوالي........ فحبوبتي كانت بتقول (الكبدة ممدوغة، والليد مرفوعة)، أها بس أنا دا حالي زااااتو
خارج السياق شكرا على حضورك في بيت البكا بتاعي بي هناك طبعا الميت (أنا وكده) لغاية حسا ما لاقي ليه كفن يلمه ويا فاضلابي طالباك قصيدة نعي ما تاكلني فيها
محبة وسلام إيمان
Post: #25 Title: Re: قصة متوسطة ... Author: Tumadir Date: 01-24-2008, 01:06 AM Parent: #1
Quote: (الكبدة ممدوغة، والليد مرفوعة)
ايمان اللذيذة ...
والله لى ساعة اتأمل فى التعبير ده ..ياخى دى مرة لذيذة بشكل ما عادى ...
طبعا انا أى كلمة بتذكرنى أغنية ...طبعا بقصد الغنا الزمان الكان بنزل على وجاننا زى "حامض الكبريتيك" شحححححح.....حسة الغنا كتر والذكريات بقى مافى ليها زمن ..
نسمع غنية تقول دى بتذكرنى لمن كنت رافعة يدى بطلع فى السراويس من الدولاب ...والغنية دى بتذكرنى لمن ولدى كان ببكى داير يشيلوهو ..ودى لمن كنت مسهية ...ودى لمن جيت فترانة من الشغل ...المهم ذكريات ضحلة كده ...
يازولة تبرى انتى من مدغة الكبدة ...والملام البشاكلوك فيه ناس المنبر هنا ده اتأكدى انه الكلام الصاح وحتثبت ليك الايام زى ما أثبتت لى ...
دردقى دبنقتك بشيش .....وابقى فى العافية ومحبتى لا تخلص ...
Post: #26 Title: Re: قصة متوسطة ... Author: ترهاقا Date: 01-24-2008, 04:35 AM Parent: #25
قلتى لى قصة متوسطة يا طمطم
المتداخلين الكرام ، أنا شهادتي مشروخة فى تماضر ، لذا سأكتفي بالتحية ، ولى قدام
Quote: تماضر شيخ الدين....هل تصدقي إن قاسم نصر.. هو أللنبهني عشان أقرأ(قصة متوسطه).. وطبعاقبل ما أقراها إندهشت بالعنوان!! (قصه متوسطه!!)
وردت عليه تماضر شيخ الدين "فى الحال" قائلة:
انت فى دهشة العنوان ولا فى قاسم نصر النبل بعد طول غياب، سألته أها يا قاسم انت اتزوجت وعندك اولاد وكده؟؟ قال لى لا والله ما اتزوجت ولا عندى أولاد لكن عندى موبايل ....اها بركة فى موبايل قاسم نصر الجابك لى ...وانت كونك ناقد يعنى رأيك شنو فى العنوان من ناحية فنية أدبية...؟؟؟
تعال قول كلامك بصراحة وخلى دهشة القارىء تتحول لى "وعى بالحالة الابداعية" نحن حايمين ساى فى الدنيا دى نبدع بلا نقاد وانتو مدفقين موية نقدكم على الرهاب ...تعال نعمل بيزنيس سوا ...بالعنوان ده رايك شنو؟؟ ....يا حليلكم لي.... ____
وكتب المسافر:
Quote: أها.. وبعدين!!
فما اتلفتت تماضر وقالت له: كراع جادين ...
والبادى أظلم ..... ---------------------------
وعندما مد ود الجيران رأسه من الطاقة وقال لتماضر:
Quote: إنتوا يا تماضُر كُتوا قاعدين تخُتوا السراويس في الدولاب؟!
وعلي كِدة يعني كُتوا قاعدين تخُتوا الهدوم في الفضية ..
مُبالغة إنتي ياخ
فارت تماضر واندلقت ومدت له وجهها من الطاقة حتى تراجع قليلا للخلف وقالت له:
انت ما سمعت بى حاجة اسمها كتشن كابنيت؟؟ انت لسه من زمن الحافلة؟؟
فنكس ود الجيران رأسه ...وشعر بخجل مبالغ فيه وقال: ليتنى لم اضاضيها يوما، ليتنى لم اضاضيها يوما، وسمعته الاغنام فى الزرايب والحمام فى الابراج والجداد فى القفص ...وهو يردد "ليتنى لم أضاضيها ...ليتنى لم أضاضيها ...ورددت الجبال صدى صوته وسمعها الناس كلهم كأنما كانت تقول خلفه: ضاضيها ضيها ها ها ها ههههههههههههههههه
همهمت تماضر بكلمات ناقصة ولسان حالها يقول: وين انتو يا جماعة من ديك وعيك توعدونا بالمهرجانات وما ترسلوا لينا الدعوات وتاكلوا أيام الشارقة ومسرحها السمح براكم؟ ووين بناتك الحلوات وما كانوا صاحباتى مالهم قطعوا الحركة ووين شنو ووين داك وكيف شنو وكيف داك ...
حتى قال محمد سيد احمد ليتها سكتت!!!!!
بين قوسين ازيك يا محمد سيد احمد.
____________________
لكن عندما قال الملك
الفاضلابى ,,,يا فضيحة
سقطت مغشيا عليها ولم تتبين أنه قال أيضا: .. تماضر إزيك وانتى "حكاية" كده
سقطت مغشيا عليها فحملوها فى عربة الاسعاف رغم اكتظاظ الشوارع ..وكانوا يحاولون أرجاعها لحالتها الطبيعية قبل الوصول الى المستشفى ..قسم (الحوادس)....لم يستطيعوا انقاذها رغم المجهود الجبار ...كانت تردد كلمة واحدة لم يتعرف عليها طاقم المستشفى ..وظلت هذه الكلمة مجهولة الاصل للباحثين وعلماء اللسانيات فى السنين القليلة الماضية ، ولم يكن واضحا مالذى تسبب فى وفاتها المباغتة ...
لكن فى هذا العام وفى مدينة الحتانة ضاحية أم درمان ...استطاع أحد العلماء وهو من سلالة أسرة عركى أن يتعرف على الكلمة ..قال أن تماضر كانت تردد كلمة "سجمو سجمو سجمو ..." وقد ماتت من الضحك
ههههههههههه
Post: #34 Title: Re: قصة متوسطة ... Author: رشا سالم Date: 01-24-2008, 03:51 PM Parent: #33
قصة متوسطة وثانوي وجامعة العزيزة تماضر انقطع تواصلنا من زمان كيف حالك وانت تجابدي لايصالنا في تلك العوالم شكرا كثيرا التحايا عبرك الى صديقي حسن مبارك ( حسن ككو ) لا نسى ذلك اليوم البارد وداع حسن في الموردة شـــــــــارع الفيل لكم جميعا مودتي معتصم
Post: #40 Title: Re: قصة متوسطة ... Author: Tumadir Date: 01-26-2008, 01:53 AM Parent: #35
يا ود الجمام ...الحال تمام ..والحمدلله الذى لا نام لا أكل الطعام ...وسلامك يوصل لى حسن ككو ...كما تصل الكهرباء عبر الاسلاك ...قصرت معاك؟؟
أما عن ما انقطع من التواصل...فهو حال الأيام ...ومالو بعد كده نواصل ...ولا أسكت لنا حسا ولا منع لنا كلام ...
شكرا كثيرا
Post: #37 Title: Re: قصة متوسطة ... Author: wd al geran Date: 01-24-2008, 05:20 PM Parent: #33
Quote: ورددت الجبال صدى صوته وسمعها الناس كلهم كأنما كانت تقول خلفه: ضاضيها ضيها ها ها ها ههههههههههههههههه
بخٍ بخٍ على هاذي الجبال .. فقد صدحت بالحق .. وبعد دا غايتو إلا كان تتوسط ليكي تراجي
Quote: "ود الجيران بصراحة انت منو.؟؟؟"
انا تِمبس هاهاهاها
لا لا احسن خلينا كِدة احلى .. ما ياهو عِندكم خمسين الف نفر معروفين وقاعدين يكتِبوا بي اساميهم الحقيقية هِنا .. لقيتوا شنو يعني؟ ..
تسلمي يا تماضُر مِن كُل شر وإن شا الله دايماً مُتعافية وفايرة ومُندلقة بي زي جِنِس جنِّك اللذيد دا.
ـــــــــــــــــــــــــــــــــــــــــ اعصابك يا رجُل .. كِدة عيب
Post: #41 Title: Re: قصة متوسطة ... Author: Tumadir Date: 01-26-2008, 02:00 AM Parent: #37
والله يا ود الجيران المعرفة ما بتضر ...بس شايفاك كده زى الزول القريب جدا ..يا منى يا من الناس البعرفهم عشان كده حاولت أعرفك ...
لكن لو داير تطمس شخصيتك وتتخبا...الخيار ليك ..نحن الديمقراطية دى ما بنلعب فيها ...بس كنت فاكرة سيد الحوش عنده .."غرار" تانى أنه الناس ما تكتب بالاسماء الحركية "ده أمعانا منى فى الشمار طبعا" ... لك الدعاء الصادق أيضا ...
Post: #36 Title: Re: قصة متوسطة ... Author: Adil Osman Date: 01-24-2008, 05:17 PM Parent: #1
Quote: هذه هى القصة ، محمد عركى ..ابن الفنان ابو عركى ...عزمته على العرض حتى أراه فهو غير انه ابن عركى فهو ابن عفاف الصادق صديقة عمرى وحبيبة قلبى ...ينادينى ماما وانادية حبيبى ...أردت أن أرى عيونه الحلوة ودعوته ليشاركنا العرض، حسن مبارك اصلا واحدا من المؤسسين للفرقة وهو ابن الشاعر مبارك حسن خليفة وتربطه نفس صلة الامومة بماجدة محمد على أم سارة وناهد يناديها ماما وتناديه حبيبى ، فصار منا.
.. ... .انا غايتو مبسوط من القصه .و متكيف من المداخلات .لذا وجب التبليغ . .. .انا فرحان .و صورة محمد عركى كمان .. .
Post: #43 Title: Re: قصة متوسطة ... Author: Tumadir Date: 01-26-2008, 02:10 AM Parent: #38
ابو التاب .....
كيفك الاحاويل يا أخو ....
مشتاقين ...وتيلفونك ما بيك خبور.....
محبتى والاحترام وشكرا على الاعجاب .....
Post: #42 Title: Re: قصة متوسطة ... Author: Tumadir Date: 01-26-2008, 02:06 AM Parent: #36
عادل عثمان لو ما صورك وحاجاتك المرجعية البتجيبا دى البوست كان يكون "عزابى" ساى ...ده تصوير تاج السر الملك؟؟ لأنه أنا بعرف أنه بروفيشنال فى الفوتوقرافى وفنونو ....وشايفة الامضاء ...تصوير بديع والله ...وخلى التصوير شفت الولد ده حنين كيفن.. ؟؟
شكرا على الابهاج
Post: #39 Title: Re: قصة متوسطة ... Author: Tumadir Date: 01-26-2008, 01:42 AM Parent: #1
Quote: تماضر يا بتاعت المضاضة انتي..
انا داخله بوستينك دا عشان الومك ياختي..!
مالك وخبارك ما بتباركي لي بتي؟؟؟؟؟؟؟؟
ولدتها بعد بورة وعقر
يارشوية والله حقك على...انا أول مرة أعرف انك كنت بايرة وعاقر وعرسوك وولدتى ...معليش الغبا اليطقنى ...ويطرشنى الحاجات دى كلها
ويعنى هى أى بت فى الدنيا دى بتبدا كده: بايرة وعاقر ..بعدين بيعرسوها وبتلد فما تشيلى حالك ساى ..الف مبروك فكة البورة والجنا .. وألف مبروك البت الحلوة دى ..تانى الكلمتين ديل ما تجيبى سيرتهم ..عشان بتك يعرسوها قوام وتلد بت حلوة قوام قوام ...........مبرووووووك ومعليش على عدم العرفة.
Post: #44 Title: Re: قصة متوسطة ... Author: wd al geran Date: 01-26-2008, 02:56 AM Parent: #39
Quote: بس شايفاك كده زى الزول القريب جدا ..يا منى يا من الناس البعرفهم
وإنتي الما قريب منِّك منو .. عاملة قلبِك الكبير دا
لا لا ما بتعرفيني يا تُماضر نحنا يا ستي ناس مساكين ساكِت وما عِندنا كبير حظ في زي نوع مواهِبكم المُتعدِدة وظرافتكم الزايدة دي. واهو زي ما شايفة .. بنقابِض عشان نعيش
بس إن شاالله ما نكون عاملين ليكم إزعاج
بالمُناسبة يا تماضُر .. أمس فكرتا اطلُب مِنِك نتواصل عبر الإيميل .. وذلك لأجل التعارُف (ودا طبعاً مِن جانبِك فقط لانو بالنِسبة لي المُعرّف لا يُعرّف) وايضاً لمُناقشة بعض القضايا ذات الإهتمام المُشترك - العالِقة في الساحة.
لكين غيرتا رأئي وذلك خوفاً مِن إنك تتطنقعي عليّ - كما هي عادة الفنانين الكِبار والمشاهير مِن النجوم وكِدة ..
وعموماً يا ستي اكان ما بيناتنا طنقعة يا هو دا الإيميل
Post: #45 Title: Re: قصة متوسطة ... Author: Adil Osman Date: 01-26-2008, 10:20 AM Parent: #1
Quote: وفى هذا العرض الذى تم فى فيلادلفيا كان الوضع مختلفا، فقد كان وكيلنا الذى تحدث عنا فى اجتماع "المكتبة المركزية بفيلادلفيا" هو الصديق صديق عبد الهادى، المكتبة تحتفل سنويا بكتاب مميز. وهذا العام يحتفلون بكتاب The Lost Boys ...ويروى رحلتهم المدهشة ، وهم يعبرون سنين الطفولة واليفاع يتما ومسيا على الاقدام وعبر المعسكرات حتى انتهة بهم السفر الى أمريكا وبدأت مشارب حياتهم تتشكل فى المهجر.
Post: #46 Title: Re: قصة متوسطة ... Author: فرح Date: 01-26-2008, 11:11 AM Parent: #45
تماضر سلام كل ماياتى الكلام عن السفر وعن البصات والمحطات الاخيره لاانسى اخينا بيتر بان سيد البص اطراه بالخير و لا ارى فرقا بينه وبين الضو سواق بص الوحده امدرمان وقريتى المغموره على منحنى النيل غربا والسفر والموت واحد وان اختلفت المحطات الاخيره هارفورد ولا بوسطن امدرمان لا السوق الشعبى قرى هاووووو ما نهاتن ولا غيره وانا الراحل فى الليل وحيدا ضائعا منفردا موده وسلام خاص لصديقى الحنون حسن مبارك وللاخت ست البنات عائشه شيخ الدين
Post: #47 Title: Re: قصة متوسطة ... Author: Hussein Mallasi Date: 01-26-2008, 11:27 AM Parent: #46
Quote: الزول ده فنان و كل شئ لكن في تربية محمد ده بس تقول إمام جامع ..
ما دا الفن ذاتو
Post: #48 Title: Re: قصة متوسطة ... Author: Suad I. Ahmed Date: 01-26-2008, 01:32 PM Parent: #1
المبدعة الرائعة تماضر تدهشني دائما.. هي انسانة موهوبة بكل ما تحمل هذه الكلمة من معاني ازداد إعجابي بخا بعد أن قابلتها لفترة وجيزة في سان فرانسسكو وتلمست مدى عمق مشاعرها الانسانية تجاه كل الناس وتابعت قدراتها الابداعية وهمتها في إتقان ما تقدم.. واحتفيت بتكوين عرائس النيل ومثابرتها دون دعم من أي جهة استطاعت إلهام الشابات للتمارين والاستمرار للتجويد وما من قضية هي لم تستجب للدعوات للمشاركة فيها وضمنها تكبد مشاق السفر للندن تضامنا مع النوبيين في مآسي الغرق الجديد. رغم تكرارها أن زيجاتها فشلت ولكنها لم تربي أطفالها على الحقد بل جعلت منهم سودانيين أسويا نفسيا ومميزين أكاديميا.. لك تحيات من الأعماق يا تماضر وتمنياتي لك بالعمر والعافية واستدامة مواهبك الأدبية والفنية وخليك على اتصال.. ماما سعاد الخرطوم في 26يناير2008 ممكن ترسلي عنوانك البريدسي الحالي لأنه العندي لا يعمل عشان عندي حاجات عايزة أرسلها
كل ما أجد سانحة وأفتح البوست أسمع العاقب محمد الحسن يقول: اتدللى ...الاغنية التى أنزلها عادل أمين لتجميل البوست ..وهو مشكور عليها فقد أكتشفت أنها جميلة ومنسية مثل أكثر الاإانى السودانية، عندما أسمغها أقول مازحة ("اتدلل على شنو؟؟ وهى الهموم دى بتخلينا نتدلل؟؟ أو بالدارجة القحة: المدللالا شنو؟ ) ولكن بدخولك هنا وشهادتك انت يا أم الثائرات ورائدة الذكيات ...حق لى أن "اتدلل" على كيفى بعد ده ...هذه هى جائزة نوبل التى ينتظرها العظماء قد نلتها بدون ضجيج ولا صخب. أحبتتك كثيرا عند ذلك اللقاء وما زلت على العهد ..قلت لك سأعمل بصدق من أجل الناس ...وما زلت على العهد ..الفتيات اللاتى يصدحبننى فى هذا النضال ملهمات أيضا ...ومنهن ابنتى ...وها هى يسرى بنت الاربعطاشر بدأت تتزيا بالقضية وبالوطن وظهرت عليها علامات الذكاء المبكر ونشرت الكلمة بيم صويحباتها واساتذتها كما فعلت سيرين ...شكرا لك على هذا الاطراء الجميل، وحزنت جدا أننى لم أقابلك فى لندن ونحن فى نفس المناسبة ...
فى بوست مجاور كتب ابوبكر سيداحمد ما معناه "ما بحلها الا الغنا والرقيص" وقد نويت أن أنقل له هذه الرابط حتى أقول له "هذا ما عنيناه وما ظللنا نردده فى عروضنا: Being different is being beautiful, Dancing is believing
لكن كلام القصير ما بنسمع ...الفنون هى التى تقرب الوجدان وتتعرف على مفردات الشعور، وهذا مبدأ ...ظللنا ننتهجه ...
كنت أستمع الى رحلة المناضل الاسود الامريكى مارثن لوثر كنج ..وقد قاد ملايين الثوار السود الى ساحة الكونقرس ليغيروا وجه الكرة الارضية وهو يردد "I have a dream"..... يستصغر الناس الادب والفن ويعتبرونه "نضال كيبورد ، أو تهويمات فارغة " ولكن التاريخ أثبت عكس ذلك والحياة ماضية ...لن يتغير ما لزم تغييره ان لم يتبناه الفن ...
شكرا حبيبتى عليك ..شكرا عليك.
فرح ...زى خميتك كده صاح؟؟ ...مع انه موضوع السفر بالبيتر بان ده ذو شجون ...وبيتر بان ده ياهو حقنا هنا فى نيوانقلاند وبادى من بلدنا ..."شفتنا بنتبنى بلاد الناس كيف ونعلمها حقتنا؟؟" لك الاحترام والود وسأبلغ عشة تحياتك .....عشة عندها أجمل تلاته أطفال ( باسل وأيسر وروان) وهم مشكلين خطر جميل جديد على وجه حياتنا الحالية ...وخصوصا جات عليهم علوية بت رشا ...موباااااالغة .....
Post: #64 Title: Re: قصة متوسطة ... Author: Suad I. Ahmed Date: 01-29-2008, 03:20 PM Parent: #49
تماضر العزيزة شكرا على الكلمات الطيبات لاني ما قلت الا ما اشعر به حقيقة في دواخلي وامنيتي ان تواصلي عطائك الفني ويبقى شغلك الاساسي بدل اكل العيش البعيد عن الفن لان الموهوبين قلة وانت منهم..
انا ما كنت في لندن لكن كنت بتكلم عن تسجيل الفيديو الرسلوه لي بس مع اعمق التحايا ماما سعاد الخرطوم في29يناير2008
Post: #50 Title: Re: قصة متوسطة ... Author: الملك Date: 01-26-2008, 09:22 PM Parent: #1
تماضر .. "كل سنة وست العرائس,,طيبة وعقبال الشمعة المائة"
.. ..
عشان ما انسى,,,الليلة يوم 26
Post: #51 Title: Re: قصة متوسطة ... Author: صديق عبد الهادي Date: 01-26-2008, 10:27 PM Parent: #1
الاستاذة تماضر تحية وسلام
كدي قبل ما نشكرك و نشكر اولئك الشباب تقومي تكلميني عن فكرة القصة "المتوسطة" و اجئ و القاها "كبري" اخواتها من القصص!!! الكلام في هذا البوست داير ليهو قعاد براحة و تأمل... نحن لسه في "الزنة" و "لفة المروحة" الخليتينا فيها ديك و لكن بعد ساعة نحن في طريقنا الي لقاء الاستاذ "ابو عركي " في نيو جرسي عشان نشم عبير الوطن و عشان نسترق السمع الي "صوت طاغور المغني" ليروي طمأنا ببعض من "عصير" "برتقالة" "ود المكي" اشعر خلق الله "السودانيين"....
لكن عادل عثمان دا رجل فنان بمعنى الكلمة...و الله اظن ناس مكتبة فلادلفيا ما عندهم الصورة الجابها في البوست دا...التحية ليهو..
و نعــــــــــود،
صديق.
Post: #52 Title: Re: قصة متوسطة ... Author: Tumadir Date: 01-27-2008, 01:42 AM Parent: #51
Quote: "كل سنة وست العرائس,,طيبة وعقبال الشمعة المائة"
.. ..
عشان ما انسى,,,الليلة يوم 26
شكرا يا ناجى على التذكر والوفاء ....وهادى شمعة لى "ست العرائس والبنات" ....سيرين
Post: #53 Title: Re: قصة متوسطة ... Author: Tumadir Date: 01-27-2008, 01:46 AM Parent: #51
صديق ...
أن شا الله عركى ينفعكم ...وينزل فى حشا سمعكم بردا وسلاما ...يجمل شجونكم ويسمح مضمونكم ...
أديه التحية ....
حفلا مفيدا وسعيا حميدا ...
Post: #54 Title: Re: قصة متوسطة ... Author: Tragie Mustafa Date: 01-27-2008, 01:55 AM Parent: #53
تماضر السمحه انا جيت بس ابارك لك فوز اوباما اليوم لم اتمكن من قراءة بوستك الاكيد مميز كعادتك الا قولي للشباب كتاكيتك الف مبروك فوز اوباما في ساوث كارولينا.
ايوه يا تراجى ..مبروك فوز اوباما فى ساوث كارولينا ..كان أغلبية ضخمة وحدث عظيم ..."شعرة جلدى كلبت"
Post: #56 Title: Re: قصة متوسطة ... Author: Adil Osman Date: 01-27-2008, 01:56 PM Parent: #1
Quote: استقبلنا صديق بتلك البشاشة المعهودة فى أهل فيلادلفيا وهم يؤسسون لجالية ومركز سودانى لعشرات السنين ، تبادلنا ذكريات هذا المكان وبعدها بقليل كنا نبحث عن "فندك" ليخاوى الفندك الذى أحمله وذلك لأدخال غنا الفندك على مشهد "الخدامات" الذى هو جزء من رقصاتنا ومشاهدنا أصلا وقد ألهمنى بالفكرة بوست فتحه "كبر" هنا فى المنبر ...ووجتها فكرة مناسبة لأن تغنى البنات بالفندك بدلا من أن أصاحبهن بالايقاع من الخارج كما كان يحدث فى السابق.
اهى دى اللنك بتاعة بوست كبر يا عادل عثمان ..الألهمنى بفكرة الفندك ...ده زى أكنواجمنت كده وحقوق مؤلف وكده ....
لك الشكر يا كبر ..وأتمنى أنك تشوف البوست ده وتعرف الحقيقة ....
Post: #60 Title: Re: قصة متوسطة ... Author: عبد المنعم ابراهيم الحاج Date: 01-27-2008, 07:59 PM Parent: #57
"يامرحال مراح الفن بكان مسدارنا ما اتمحن"...أو كما قال الراحل علي ود أحمد ..أحد مؤسسي وشعراء السيسبانة ... خضرة ورويانة زي كتابتك دي..مفندكة زي خبز الغنى الغنوه زمان..تخلي الواحد هسة يمشي يحجز في القرى هاوند ويسافر محل يسافر..سلام توماضور..
عبد المتعم يا غزير ...غزير يعنى باغين وما تفتكرها غلطة مطبعية ...كل ما أقرا ليك كلمتين أحس بالغزرة دى وتذكرنى مفردات منسية ...
حقيقة ...
شكرا لك ولوجودك هنا ...
Post: #58 Title: Re: قصة متوسطة ... Author: صديق عبد الهادي Date: 01-27-2008, 07:19 PM Parent: #1
اختنا تماضر سلام
ابو عركي ابدع و بزيادة...دا زول مسكون بالوطن، لا في شيخاً بمسكو و لا في فكياً بداويهو، لا اعتقد ان هناك من له المقدرة ليصف اداء ابو عركي الليلة الفائتة في مدينة نورث بيرقن بولاية نيو جرسي. تنظيم الحفل كان بمهنية عالية ، و اعتقد ان ناس جرسي وضعوا تحدي حقيقي امام كل من سيستضيف الفنان ابو عركي و الفرقة المصاحبة له. الموسيقيون كانوا في القمة ، و علي حد قول الصديق "فائز مليجي"انو هم ذاتم ما عارفين عملوا كدا كيف...كانت موسيقى جد جد ما في كلام...ميرغني الزين..ود العاقب...ود مليجي و محمدابوعركي...كان حفلاً جميلاً.
Post: #62 Title: Re: قصة متوسطة ... Author: Mohamed Elgadi Date: 01-28-2008, 01:03 AM Parent: #61
Quote: حفاوة السودانيين بنا وكرمهم الجميل وعشاء مها زوجة الخاتم وبيت أيثار المريح الانيق ووقفة أقبال المرضى معنا خلف الكواليس وهى تنظم الدخول والخروج والازياء ...ويسرى بت صديق واقبال التى جاءت لتقابل صديقة عمرها يسرى بنتى وهى تلهث بهما فى منتصف الانشغال ، كل هذه الاشياء التى لا تنسى ...اجتمعت لتكلل هذا الحدث بحلاوة الذكرى
ustaza/Ithar Abu Taha, one of the first Sudanese lawyers to be certified to work in the US...She was the only Sudanese Judge to participate in the International Tribunal for Sudan that indicted, and tried Omer al-Bashir in NYC last year. more on ustaza/Ithar is found here: http://www.judgmentongenocide.com/participants.html
من إبداعات ألفنان أبوعركى وإبنه محمد ود/عفاف الصادق..إبن فنان وفنانة...
وأنتى وإبداعاتك الفنية وعرائس النيل.....وتذكرت ذهابى للأذاعة وأنا طفل 68 و 69 كنا نسجل فى ر كن ألأطفال الذى كان يقدمه عمنا مختار((((((أستاذ عبدالعزيز)))))...وكانت حبوبة كلتوم حينها وكانت تتغير كثيرآ وصادفنا ألأستاذة/سعاد أبوعاقلة الله يديها الصحة والعافية...وأستاذنا إسماعيل خورشيد الله يرحمه كنا نجى معاه برجلينا إلى العرضة...وكنتى من ألشخصيات المختزلة فى رأسى..إسم رنان..
تماضر شيخ الدين....
قلتى:حفاوة السودانيين بنا وكرمهم الجميل وعشاء مها زوجة الخاتم وبيت أيثار المريح الانيق ووقفة أقبال المرضى معنا خلف الكواليس وهى تنظم الدخول والخروج والازياء ...ويسرى بت صديق واقبال التى جاءت لتقابل صديقة عمرها يسرى بنتى وهى تلهث بهما فى منتصف الانشغال ، كل هذه الاشياء التى لا تنسى ...اجتمعت لتكلل هذا الحدث بحلاوة الذكرى ...لكنها أبدا ستظل حادثة اعتلاء محمد عركى لمسرح أمريكى لأول مرة ... السودانيون فى كل بلاد ألأرض كرماء..... أسأل سؤالين؟ هل مها زوجة الخاتم صديق؟ هل ممكن ترسلى لى على البريد أللأكترونى ت/أبوعركى البخيت ؟(موجود فى البروفايل) وأريد معلومات عن ألأستاذة/سعاد ابوعاقلة تلك المراءة التى شكلت شئيآ فى وجدانى أيام الطفولة.. مودتى.... إسماعيل محمد احمد عباس..........
وتذكرت ذهابى للأذاعة وأنا طفل 68 و 69 كنا نسجل فى ر كن ألأطفال الذى كان يقدمه عمنا مختار((((((أستاذ عبدالعزيز)))))...وكانت حبوبة كلتوم حينها وكانت تتغير كثيرآ وصادفنا ألأستاذة/سعاد أبوعاقلة الله يديها الصحة والعافية...وأستاذنا إسماعيل خورشيد الله يرحمه كنا نجى معاه برجلينا إلى العرضة...وكنتى من ألشخصيات المختزلة فى رأسى..إسم رنان
عاد يا ود أمى أقول ليك شنو ..الزمن البتتكلم عنو ده نحن تلفزيون ما كان عندنا
صاح الدنيا لفت وخلت أستاذ عبد العزيز يكون دفعتنا فى المعهد لكن أسألو قول ليه تماضر قدرك لوا لحم سدرك؟؟ هههههه
يا حليلهم كلهم ووالله أنا وسعاد أبو عاقلة لسوء الطالع أصلو ما اشتركنا فى عمل مع بعض لكن أكن لهم جميعا كثير من الاحترام والتوقير ..وأفخر بأقدامهم وحضورهم الذى مهد لنا الطريق من بعد ...
نستأذن أستاذ عركى أول قبلما أديك تلفونو ...وهو الحقيقة الشايل موبايل اصلا محمد ما عركى ...وسأبلغه لك التحية وعفاف الصادق ايضا ستكون عضو بالمنبر قريبا ...
لك المعزة على مداخلتك "الحنينة" .....
Post: #66 Title: Re: قصة متوسطة ... Author: Raja Date: 01-29-2008, 09:45 PM Parent: #1
تماضر يا حبيبة..
سلام كبير ليك ولعرايس النيل..
أتذكر كم أسعدتموننا في فيينا..
ودي وإشتياقي
Post: #67 Title: Re: قصة متوسطة ... Author: ismeil abbas Date: 01-30-2008, 10:11 AM Parent: #1
فوق
Post: #68 Title: Re: قصة متوسطة ... Author: ismeil abbas Date: 01-30-2008, 10:11 AM Parent: #1
فوق
Post: #74 Title: Re: قصة متوسطة ... Author: ismeil abbas Date: 01-30-2008, 03:44 PM Parent: #1
ألأخت/تماضر
عاد يا ود أمى أقول ليك شنو ..الزمن البتتكلم عنو ده نحن تلفزيون ما كان عندنا
صاح الدنيا لفت وخلت أستاذ عبد العزيز يكون دفعتنا فى المعهد لكن أسألو قول ليه تماضر قدرك لوا لحم سدرك؟؟ هههههه
ما تخافى إنتى ما قدر ديل....الله يمتعك بالصحة ويمتعهم..
طلبت ت/أبوعركى لتعزيته فى والده الله يرحمه..وفتشت عليه عند إبن خالته حسين بابكر جادالله فى المدينة بالمملكة العربية السعودية... وهو متزوج بنت خالى وفقط لتأدية الواجب...
Post: #77 Title: Re: قصة متوسطة ... Author: wd al geran Date: 01-31-2008, 09:33 AM Parent: #1
عِندك حق طبعاً يا تماضُر - بعد حشود المحبة المُجتمعة عِندك دي - تعملي لي فيها "ووبي قولبيرغ" وتسفهيني ..
كويس يا زولة .. بخُتّها ليكي .. ونتلاقى قِدام .. و ساعتا يا ستي ما تلومي إلا نفسِك ..
اها النقول ليكي كمان .. انا العرض المُقدمو ليكي فوق دا زعلة كِدة سحبتو .. وبعد دا كان رسلتي لي موداتِك ذاتا بالدي اتش ال ما ح اشتغِل بيكي .. خلي الإيميل ..
إنتوا قايلين نفسكم براكم مُهمين يعني؟ .. نحنا ذااتنا مُهمين وروحنا دي عزيزة علينا .. وكبيرنا الله بس ..
اها وكيةً فيكي كدة ح اقوم استغِل (بوسطينك) الناجح دا .. واعمل مُحاولة تسويق إجتماعي لي نفسي .. واشتهِر علي حِسِّك .. هو معقولة الزول يِطلع مِنكم ساكِت كِدة؟
اسمعوا يا احِبة .. الإميل الفوق دا مرق مِن يدّي تب .. واصبح بعد دا ملكية عامة .. وبناءاً عليه .. كُل من يأنس في نفسه الكفاءة اللازمة له مُطلق الحُرية في إستغلاله الإستغلال الامثل والتصرُّف فيه كما يجب ..
Post: #89 Title: Re: قصة متوسطة ... Author: wd al geran Date: 02-13-2008, 03:33 AM Parent: #88
Quote: يا سلاااااام..
وتاني يا سلااااام
والسلام..
بدري علينا يا ياسر .. لسة بدري علينا ..
ويحليلو الاستاذ محمود الراح ساكت ..
Post: #90 Title: Re: قصة متوسطة ... Author: احمد العربي Date: 02-13-2008, 04:45 AM Parent: #89
برضو كانت بتحكي وكنا منتبهين ومتابعين بس ما كنا بتين بيض كنا حداشر ونوباويه وانا جاييك واتحكر في ضلك ده يا ظليله
Post: #91 Title: Re: قصة متوسطة ... Author: Adil Osman Date: 02-21-2008, 05:25 PM Parent: #1
بمناسبة الفندك والتراث المحيط به فى السودان وفى افريقيا، الرئيس الامريكى اخد ليهو سحبة فى زيارته الاخيرة للقارة الافريقية ممكن يا تماضر تطلبو الفندك ده من سفيركم فى الدولة الافريقية. اظنها غانا أو بنين
الصورة منقولة من جريدة الرأى العام السودانية الصادرة صباح اليوم فى الخرطوم
Post: #92 Title: Re: قصة متوسطة ... Author: wd al geran Date: 03-05-2008, 07:29 PM Parent: #1