Post: #1
Title: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-16-2008, 06:43 PM
بت حرام يا زولة ... حلال أختارك قِبلة !
أقترحك بت المقدس معني ! يغشاكي براق الشوق في القُبلة ... أفتتحك جملة
يتباعد حزنك بين قوسين ..... يا بت لا حولاااااا !!
( أتمريمي) هِزِّي النخلة ... ما تفطمي عاشقاً صلي ... مشكلتك دايماً كعبة
مشرّفة زي كلمات قدسية ... وقصايد ضجّت في محراب !!
مجنون يا الفيك صلصال أشياء الداخل باقية مخارج لي جواك ...
وجنك أحمر خدار السبت الجمعة الجامعة الكلمة السامعة... الهمس البصرخ راجي نِداك
نَداك البجرح خاطر الزهرة يقول للقمرة كفاك يا شجرة!!
ما يكتل فاسك فرعاً قايم ما يهرس صفقك فيلاً ظالم ...لا القرد الأعمش و النضارة !
لا أملاً تكتب لا بدراً يقرأ الضي في سنون شافعة... كاشحة البسمة قصيد في الحلة !!
مجنون يا الحاضن نبضك لي شريانك وكل قرآنك !!!
بت حرام يا السخطك انتي حليب أشعاري .. بت (حلام) زي شافعة تمرح بي ( أتاري)
تشوف في حجيلا ( بلي أستيشن)!!
وانا عندي كديسة عقدة أمشي و أجيك ...ما يبقي غياب حضرة صوتك
نغماً فارق سكة طيري حضور وغياب جري وطيران و ( توم آند جيري) !
فاكّة منك ..! جِنّو مِنّو ... عاقلة بي قدر أحتياجك للجنون.. وانا زي مداخلك مافرق!
مسطول بلقِّط في ورق .. لافِّي صينية هواجس ...قاطع أشارة نور شرار... ماخد قرار
أكسر أشارات المرور ... من غيرد دفع رسم العبور... ما دروبنا جد فاطّات سطور!
صامولة حالجة ومشكلة..... هضراب و جنكيزخان جديد ... !
في اللاشعور سراً خفي.... نور كان قطع (جنتيرة) في !! عضلات تِبِش ...تدعم مسيرتي عشان أمش!
أفكار عظيمة مؤسسة ..... في الزريبة لاعبين الصغار .. والبقرة جوة المدرسة!!
يا بت حرام جني الحلال
فطموكي في يوم السماية.... يا منتهي الشوق الحزين
وفصالوا في عامين تمام انا وانتي بس في المنتهي
عاقل مكشكش أشتهي ... في دربوا لي لحظة جنون...
وبت حرام مجلوبة من قافلة حجيج .. زي فوضي في قلب السكون
لو أنتي ميلاد للوعي .....
أنا ممكن أسأل من أكوووون؟؟؟؟؟!!!
|
Post: #2
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-16-2008, 07:16 PM
Parent: #1
.
أوتوجراف..عزاز شامي!
|
Post: #3
Title: Re: حوار بين مجنون و أشياء تخص البت الحرام وبت المقدس !!
Author: تماضر الخنساء حمزه
Date: 01-18-2008, 08:08 AM
Parent: #2
قلنا ليك أقعد ساي
ياولد بطِّل سماحة
لمتين حتسمع انتا ياولد الكلام
|
Post: #4
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-18-2008, 06:30 PM
Parent: #3
خناس
قل أعوذ بشعر الناس
طاعم حساس
مليان بي الليل
في جوفو النيل
رايدنوا خلاس
بجيك صاد
شكرن كتيرن!
|
Post: #5
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-18-2008, 06:35 PM
Parent: #4
أستغماية تضحك الغنماية !!
لما ضروع الفكرة بتنشف .... ولينا تدر الهم العنزة
من قبل محمد نحن نبينا رسالتو خلاص
تبقي عدالة سور قرآننا
شعار في البقرة وفي الأخلاص
أيماننا أساس يمد القرعة علي الكراس
يشحد منو كراسي المدرسة
ويزرع شجرة
وتطعن أبرة
تفحص لينا الدم الوطني
عشان جبريل لمن ينزل
ما ينزل لابس بدلة عسكر ( كسري )
ينزل شايل طبق الكسرة
يكون أيماننا كبير في البقرة
نصلي ونسجد بي الأخلاص
ما صبحنا بطلع بكرة خلاص !!!
.....
نواصل اللأستغماية بنفس درجة وضوح الاشياء
شكرن!
|
Post: #6
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-18-2008, 06:39 PM
Parent: #5
أتوسد ألمك
حلمك علمك .......علمك حلمك
ينزف همك يصرخ دمك
يفور طايوقك ماسكو صداع
يتاورك خوف علي وطن أتباع
حروب وصراع حراق الروح في حلق الفكرة
وشوك الهم في سكة بكرة
نص الحتة حزين
ونص النص مخنوق في حسّو
مشاتر درب الصوت الدغري
يكابس فيه الليل من بدري
شن ودّي العغسكر سوق العيش ؟؟
يفج الكاكي سنابل قمحك
وتصرخ انت تقول معليش!!!!
شكرن كتيرن!
_________________
|
Post: #7
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-18-2008, 06:40 PM
Parent: #6
خربشة كدايس الانتظار أتوهطت حزني المرير
وانا في الأخير
بوقِّع علي صمت الزمن ختم الهتــاف!... قول ما بخاف
حالاً يبشتن أفكار المطر
يجرح خواطر الغيم نزيف... من غير تسيل دمعة خريف...
تتضاري من نيل المناديل و الجداول والهطول
لكن تعالي يا ثروت كدة نتفق علي صرخة واحدة!!
يا هم بعيد .... يا فال سمح
أغشي الصحاري بساط قمح.... الكسررررررررررة ما بتحتاج شرِح!
القصة ما حصة عصُر ... القصة كيف يمشي الفقُر
من بيتنا ويجينا الرغيف!
ثمح؟؟؟؟
لكن كدي تعالي نقول لي فلانة
أظنوا قرش حسك كلاماً ني شرق منوا
شرق حزنك غروب لي معني كايسنوا
غروب و شروق شموس صبحك في نص الليل ... تناغض يبقي كيفنوا؟؟؟
ومرق منوا ............. صراخاً شقّ صمت الليل
وخلي النيل يغالب شكُّوا بي ظنُّوا !!!
نواصل الأستغماية....
بنفس مقدار درجة لولبة المـُكر في مصارين النص!
شكرن كتيرن!
|
Post: #8
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-18-2008, 06:46 PM
Parent: #7
عارفة ياقصة!
انتي شدة ما دافية
انا بعتبرك أصلاً ؟؟؟
يا فلانة البرتكانة ... دافية زي عز السخانة...
زي الحمم البركانية... وانا بالنية
بعتبرك أصلاً بطانية!!
أحساسك وانتي براك زي عود كبريت بولع مرة وبتواري
انا عايزك قانون يشرح لي جمرك كيف يتوحّد في الكانون!
كيف يتفاعل في النيران
ما يمرق شيشك بي شيشك من شملة خادم تتوهط حفرة دخان
وانا بالنية بعتبرك اصلاً بطانية
يا فلانة يا الفهمت انو النَّو و الزِّيف ... زي دقسة حضنك في حصة جغرافيا
في غربة نفَسِك كيف يلقي العافية ؟
في عز الموج في عز الريح طلّت دافية
تتوحد مع زفرة زول مأسور في قلب البركان
في نص الشهب البركانية ...
وانا بالنية
بعتبرك أصلاً بطانية !!!
شكرن
نواصل الأستغماية السندسية بنفس درجة الدفء في البطانية!
كتيرن!
|
Post: #9
Title: Re: حوار بين مجنون و أشياء تخص البت الحرام وبت المقدس !!
Author: هاشم أحمد خلف الله
Date: 01-18-2008, 09:50 PM
Parent: #8
حبيب نورة والله سعيد بطلتك من جديد يلا واصل جنك
اصلنا اليومين ديل بردانين شديد لا بطانية نفعت
ولا حفرة دخان ولعت .
|
Post: #10
Title: Re: حوار بين مجنون و أشياء تخص البت الحرام وبت المقدس !!
Author: Abdel Aati
Date: 01-18-2008, 10:16 PM
Parent: #9
حبيب نوره وحبيبنا سلام
يا زول زارنا النبي وحمدلا على السلامة ..
|
Post: #12
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-19-2008, 03:56 PM
Parent: #10
استاذ عبد العاطي
شكرا علي المرور اللطيف
فيك الخير يا أخوي
شكرن كتيرن!
|
Post: #11
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-19-2008, 03:44 PM
Parent: #9
هشومي
عارف انا حالياً ما عندي أيي فكرة
كدي اصبر لي لمدة سجارتين وكباية شاي حمرا
وبجيك صاد
شكرن كتيرن!
|
Post: #13
Title: Re: حوار بين مجنون و أشياء تخص البت الحرام وبت المقدس !!
Author: ابو جهينة
Date: 01-20-2008, 07:38 AM
Parent: #11
حبيب الكل
ياخي سلمت يمناك و سلمتْ بنات أفكارك و أولادها و أهلها
| Quote: مجنون يا الفيك صلصال أشياء الداخل باقية مخارج لي جواك |
أنظروا إلى تركيبة هذه الجملة ...
ميكانيكا لغوية
هندسة بيانية ( الفيك + الداخل + مخارج + جواك ) = ماكينة منزلقة بتروس من المعاني
و الله يا حبيبنا إنت زول شاهق الكتابة دون أي مبالغة ...
و نحن سعداء لأننا نقرؤك رغم ( بخلك )
كن بخير
|
Post: #19
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-20-2008, 04:32 PM
Parent: #13
أبو جهينة
ما بقدر أوصف ليك
قدر شنو انا بفرح لمن اشوف توقيعك هنا
وشاكر ليك أطرائك الجميل
دة من ذوقك يا عظيم
شكرن كتيرن!
|
Post: #14
Title: Re: حوار بين مجنون و أشياء تخص البت الحرام وبت المقدس !!
Author: مجاهد عبد الرحمن
Date: 01-20-2008, 09:10 AM
Parent: #9
الحبيب هاشم تحيات
في هذه اللحظة
أكتر حاجة ممكن تتقال
هاشم فك آخرو
قال إبراهيم ناجي يوماً
(ليت لو تقضي الليالي لشتيتٍ بإجتماع)
ونحن نقول ربك يجمع الشمل
أتاريه الهضربة دي ما من الشتا
الله يطولك ياروح
مودة كتيرة
|
Post: #20
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-20-2008, 04:39 PM
Parent: #14
مجاهد عبد الرحمن
كيفنك؟
Quote: أكتر حاجة ممكن تتقال
هاشم فك آخرو |
هو هاشم دة وااااالي ما فاكي آخرو
يعني جديدة عليه!!
شكرن كتيرن!
|
Post: #18
Title: Re: حوار بين مجنون و أشياء تخص البت الحرام وبت المقدس !!
Author: الرشيد البصيلى
Date: 01-20-2008, 04:24 PM
Parent: #9
Quote: حبيب نورة والله سعيد بطلتك من جديد يلا واصل جنك
اصلنا اليومين ديل بردانين شديد لا بطانية نفعت
ولا حفرة دخان ولعت . |
يا هاشم يا خوى قول بسم الله .... كلامك دا هسى تبقى فى " دا حار و دا ما بتكوى بيهو" وفى كل الحالات كلامك دا معناهو انتا أمام خيارين ... يا حفرة الدخان تولع ... يا حفرة الدخان تولع تانى ,, لانو البلد باردة بلحيل ......
|
Post: #21
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-20-2008, 04:47 PM
Parent: #18
الرشيد البصيلي
هههههههههههههههه
| Quote: حفرة الدخان تولع ... يا حفرة الدخان تولع تانى |
غايتو
الزول دة ما أديتوا أيي فرصة يتصل بي صديق!
يحلها الشربكة
شكرن كتيرن!
|
Post: #27
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 02-24-2008, 07:25 PM
Parent: #9
عدنا
|
Post: #15
Title: Re: حوار بين مجنون و أشياء تخص البت الحرام وبت المقدس !!
Author: محمَّد زين الشفيع أحمد
Date: 01-20-2008, 11:52 AM
Parent: #1
الأخ – الأُستاذ / حبيبُ نورة ..
رَجُلٌ ماتعُ الدَّهْشَةِ ، لطيفُ
المُفْرَدة ،
وحرفُكَ عميقُ الجمالِ ،
غائرُ المعنى جدَّاً ..
فلكَ احترامي كُلُّهْ ..
أخوك / محمَّد زين ...
|
Post: #22
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-20-2008, 04:50 PM
Parent: #15
محمد زين
| Quote: الأُستاذ / حبيبُ نورة |
عليك الله الأستاذية دي ما كتيرة شوية؟
عموماً ربنا يجبر بي خاطرك
فيك الخير
شكرن كتيرن!
|
Post: #16
Title: Re: حوار بين مجنون و أشياء تخص البت الحرام وبت المقدس !!
Author: خالدة البدوي
Date: 01-20-2008, 12:01 PM
Parent: #1
حبيب نورة
رائعة دي الادتك الاحساس ده ،،
Quote: أحساسك وانتي براك زي عود كبريت بولع مرة وبتواري
انا عايزك قانون يشرح لي جمرك كيف يتوحّد في الكانون! |
دمت ،،
|
Post: #23
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-20-2008, 04:56 PM
Parent: #16
خالدة البدوي
والأروع من دة كلو
مرورك اللطيف دة
ربنا يديك الفي مرادك
شكرن كتيرن!
|
Post: #17
Title: Re: حوار بين مجنون و أشياء تخص البت الحرام وبت المقدس !!
Author: Sidig Rahama Elnour
Date: 01-20-2008, 12:28 PM
Parent: #1
يا ود يا مسخوت
زي غيمة محل ماتودينا هبوب إبداعك بنصب
ومحل مانلقي مرافي حروفك بنكب ...
ومحل مايسوقنا الشوق بنروح إن شاء الله الجب ...
ودائماً تفضل أنتا الحب ...
شكرن جزيلن
|
Post: #24
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-20-2008, 05:02 PM
Parent: #17
يا مسخوت
بسم الله
| Quote: ودائماً تفضل أنتا الحب |
انشاء الله ربنا يخليك لي
وتدوم المحبة
بركة من صلي وقال يا الله
وانا كمان بحيك يا جميل
شكرن كتيرن!
|
Post: #25
Title: Re: حوار بين مجنون و أشياء تخص البت الحرام وبت المقدس !!
Author: حبيب نورة
Date: 01-23-2008, 05:05 PM
Parent: #24
عودة!
|
|