آخر الزمن... الشواكيش تطال المغتربين

قال الكاتب الساخر صلاح الدين التوم من الله (كل ما شفت مغترب جاي من المطار
بشنطو، عرفت إنو في واحد حايتشوكش)..
زمان لما الدنيا كان بخيرها ونعيمها وكان المغتربين ليهم شنة ورنة، كان
معظم المشوكشين من الشباب الموجودين داخل السودان، وربما يكون أحدكم ضحية
لأحد المغتربين المفترين الذين كانوا يحرقون قلوب أولاد الناس بريالاتهم
(من ريال) ودنانيرهم ودراهمهم ودولاراتهم.
الناس ترقص وتهيص وتغني وتحتوا قرض في حفلة العريس المغترب، والبنات
يتفشخرن ويغنن (حننوا يا أختو الكبيرة وحننوا وربطوا الحريرة إلخ..)
ولكنهم للأسف لا يعلمون بأنو في زول هناك حالتو تحنن كان عايش قصة حب جميلة
مع العروس وسقط بالضربة القاضية عند حضور المغترب. فكان العاشقون (وكنا نطلق
عليهم اسم حبيب الله)، وحبيب الله هو الشخص العاشق المكسر وما قادر يصل للحبيبة،
كانوا عاشقين وصابرين وسقطوا ضحايا للمغتربين ولكن لم يحس بهم أحد أثناء الشبكة
أو خلال سد المال أو في حفلات عرس المغتربين. يا لنا من أمة قاسية ترقص من أجل
المادة على جماجم أبنائها الذين لا ذنب لهم سوى أنهم حبوا ورادوا. شفتو إلى
أي مدى نحن ساديون؟ نحتفل ونرقص ونبشر مع المعتدين ولا نعبر أو نتضامن مع
المعتدى عليهم؟ ويتساوى في ذلك كل الناس المشركين في العرس، من الذين يحجزون
الفنان ويحجزون الكراسي والصيوانات ويحجزون المتشاكلين في الحفلة، ويحضرون
الخضار والتلج والخرفان ويطبعون الكروت ويوزعونها، وأعظمهم ذنباً أم العروس
وأبوها والمأذون والوكلاء والفنانين (والذين يجهزون لهم العشاء) والذين يقولون
ما زال الليل طفلاً يحبو وكل من يشارك بالرقيص أو التبشير أو التهنئة للعرسان
أو أهليهم، والذين يدفعون الموجب والذين يمسكون الكشف، كل هؤلاء يشتركون مع
العرسان في الجرائم التي استهدفت أبناءنا العاشقين المساكين الذين لم يجدوا
من يطبطب عليهم أو يعزيهم سوى الأغاني الحزينة زي حان الزفاف أنا حالي كيف إن
بوصفوا أو في الليلة ديك أو أبكي النهاية. وصدق من قال للانتصار ألف أب ولكن
الهزيمة يتيمة.
والعروس تكون في الغالب ضحية لسيطرة أسرتها وهي ليس لها ذنب في الشاكوش،
وتكون سارحة في الحفلة مع حبيب القلب الباكي في ركن قصي وهي تتمالك نفسها
حتى لا يفتضح أمرها، وأنا أجد لها العذر فالشاكوش لم يكن من صنعها ولكنه من
صنع أمها التي تبرر فعلتها بأنها (ما عندها بت بلعبوا بيها) وكأن الحب لعب
أو عيب، وصدق من قال (وراء كل شاكوش نسيبة).
وأغلب ضحايا الشواكيش من طلاب الجامعات، فنجدهم يحبون زميلاتهم الجميلات لكنهم
لا يفكرون في عواقب قصص الحب، لأن تجاربهم الحياتية قليلة ولا يتعظون بشواكيش
الأمم السابقة، لأن قلوبهم غضة طرية وأحلامهم وردية مخملية.
ولكن أحر الشواكيش وأعتاها هي التي يتلقاها من يكونوا خاطبين ولم تساعدهم
الظروف لأن يجتمعوا مع خطيباتهم تحت سقف واحد، لأنهم لا يمكن عندها أن ينكروا
حدوث الشاكوش أو ينكروا علاقة الحب، وكثيراً ما كنت أنصح أصدقائي وأبناء أهلي
بألا يخطبوا وأن يصلحوا ورقهم فوق وينتظروا الخمسين، لأن النزول بخرب الورق
وبعرج بالواحد في مرات كثيرة. والذين لا يرتبطون بعلاقة خطوبة يمكن لهم أن ينكروا الشاكوش مبررين بأسباب واهية مثل، خلافنا خلاف كبير في وجهات النظر، أو أن موقفها السياسي موقف ضبابي أو تأكدت أنها لا تصلح لي كزوجة ويمكن أن نبقى أصدقاء
أصدقاء يا ضلالي؟) أوأحسن لينا نفترق ونحن على البر قبل أن تقع الفاس على
الراس أو غيرها من المكنات التي لا تقنع طفل صغير.
وكان الآباء والأمهات عندنا يتخوفون من المغتربين على أبنائهم لأنهم يخطفون منهم
البنات العليهن العين، مرة في واحد عندو أخوهو غنيان شديد وعندو بت جميلة خالص،
سمع تحت تحت إنو ود فلان الفلاني جاي بعد أيام وحايخطب بت أخوهو فنادى ولدو وقال
ليهو يا ولدي نعرس ليك بت عمك قبل يعرسها واحد غريب فرض الولد بحجة إنو بت عمو
دي زي أختو وهو ما بحبها، فأخد الأب يقنع في الولد والولد يرفض في ثبات وأخيراً
حاول أن يجبره على الزواج فكان يقول ليهو: حبها والولد يردد زي سيدنا بلال:
والله ما أحبها والله ما أحبها والله ما أحبها، وفي النهاية أبوهو اقتنع وخلاهو وبعد
أيام جاء المغترب وتزوج البت، فنجى الله الابن ووقع الشاكوش في الأب.
وعندنا صاحبنا هلالابي زينا كده تقدم لخطبة جارتنا فقبل أبوها وأمها ورفضت
حبوبتها المرأة المسيطرة صاحبة الكلمة النافذة وقالت بحزم لأهل الولد
(بتنا عاوزة تقرا) وبعد شهرين جاء واحد مغترب تقدم لنفس البت وتزوجها دون
أن تكمل البت تعليمها، وعللت حبوبتها ذلك (بأن الموت والحياة ما معروفة
وعازوة أحضر جديد بت بتي) .. منتهى الاستهبال والتلاعب على القانون.
ولكن الله لن يضيع عباده الصابرين وهو يمهل ولا يهمل، فللمحليين رب يحميهم،
فقد انقلب أخيراً السحر على السحرة وشرب المغتربون من نفس الكأس، فقد ظهرت
عدة حالات انفلونزا المغتربين في أماكن كثيرة من أنحاء السودان، وتعرض مغتربون
كثيرون لشواكيش حادة وحارة، والسبب أن الاغتراب أصبح مجازفة خطيرة جد ربما
لا تجتازها، وكثيرون ساءت ظروفهم في دول اغترابهم لأسباب كثيرة لا يتسع المجال
لذكرها، وشاكوش المغتربين ربما يدفع بصاحبه إلى أحضان الجماعات الإسلامية
المتطرفة أو البقاء طويلاً خارج السودان مدعياً بأنه لن يرجع إلى السودان إلا
بعد زوال هذا النظام الشمولي البغيض أو الإقامة في السعودية لمدة طويلة بحجة
أنه عاوز يجاور (وده خاص بناس معاذ حسن)..
أكتب هذا الكلام وأنا حزين لجاري وقريبي المغترب الذي تعرض لشاكوش قوي لم يرجع
بعده للسودان رغم مضي أكثر من تسع سنوات، فقد أحب بنت عمه وخطبها وكان على مرمى
شهر من الزواج ولكنه تعرض لمؤامرة أبعدت عنه حبيبته التي ظل يهيم بها وينفق عليها، وفي النهاية تزوجت أقرب الناس إليه وتركته مكسور القلب والجناح ولم يستطع بعد ذلك
من تجاوز أزمته المؤلمة والمؤسفة، نسأل الله أن يثبته ويقويه ويعيده إلا أهله.

حان الزفاف
حان الزفاف أنا حالي كيفن بوصفو
يا ريت هواك ليْ ما انقسم ولا قلبي ريدك نزّفو
قالوا البعيش الدنيا ياما تشوّفو
تشقيهو بفرقة عزيز بالحسرة ريقو تنشّفو
وإن شاء الله ما يحصل فراق لقلوب بعد إتولفو
********
بس قولي ليْ أنساك كيف وأنا قلبي ريدك محنو
أبحر سنين في كون هواك والليلة فاقد مأمنو
وأنا من زمان عارف البكون وقليبي كنت بيقنو
والليلة يوم حان الزفاف أنا حالي مين ما حننو
ولو ده الحصاد من كل ريد ناس قيس صحيح اتجننو
********
جوني الصحاب أنا قالوا ليْ شافوها في توب الزفاف
شافوا الدموع واتحسروا والشوق غمام في عيونها طاف
مش عاد حرام ساكن الضفاف ينشرّ في عمر الجفاف
طول عمري بزرع في الورود وحصادي شوك آخر المطاف..

آهـ آهـ دنيا دنيا؟؟؟؟؟؟؟؟؟؟؟؟؟؟؟؟؟

Quote: آهـ آهـ دنيا دنيا؟؟؟؟؟؟؟؟؟؟؟؟؟؟؟؟؟

أه وستين آه
يظهر زمنكم فات وغنايكم مات يا هاشم

Quote: أه وستين آه يظهر زمنكم فات وغنايكم مات يا هاشم

يا زول انتا قايل انا بقيت شاعر من شنو؟؟
ما من شاكوش مع اني كنت في الثانوي العام
مدرسة حلويات سعد الفي اركويت دي شوفتها ؟؟

Quote: يا زول انتا قايل انا بقيت شاعر من شنو؟؟ ما من شاكوش مع اني كنت في الثانوي العام مدرسة حلويات سعد الفي اركويت دي شوفتها ؟؟

يا هاشم بكده شعرك بكون شعر واقعي وصادق
وإنت بتكتب مما تشعر، وحب من الثانوي العام
يعتبر حب مزمن ما بتنفع فيهو أه وأحييي..
لكن أنا رأيي في المسألة دي بوافق المثل القائل
(شاكوش في الراس أخير من مرض حامد)
وكتلوك ولا جوك جوك
وتتعدد الأسباب والشاكوش واحد..

الاخ نصر الدين
امتعنتنا بموضوعك الشيق و اللطيف ..
و رغم حالة الاغتراب التى نعانى منها إلا اننا فى الاصل كنا هناك .. و طالنا ما طال (كل ابنى ادم) .. و غنينا
فى الليله ديك
.. و غنينا بخاف ..
و سهرنا الليل و كملناه
.. و يا هو حال الدنيا

Quote: طول عمري بزرع في الورود وحصادي شوك آخر المطاف..

Quote: الاخ نصر الدين امتعنتنا بموضوعك الشيق و اللطيف .. و رغم حالة الاغتراب التى نعانى منها إلا اننا فى الاصل كنا هناك .. و طالنا ما طال (كل ابنى ادم) .. و غنينا فى الليله ديك .. و غنينا بخاف .. و سهرنا الليل و كملناه .. و يا هو حال الدنيا

الأخ العزيز أسعد الريف

أشكرك يا سيدي على المجاملة اللطيفة والمرور الكريم.
مرات الشاكوش بكون نتيجة حتمية لعلاقة غير ناضجة، أو بمقاييس
الواقع، لن يكتب لها النجاح ولكن يجد الإنسان نفسه متورطاً فيها
بسبب الاندفاع أو قلة التجربة أو رومانسية الشباب، لكنها بالتأكيد
ستكون تجربة تسهم في خلق وعيك وإدراكك بالأمور الحياتية من حولك..
الأقوان والشواكيش والموت أقدار لا مناص منها (حكمة حديثة)..

يستاهلوا اكثر من كده فقد دمروا نفسيات الشباب والموظفين

Quote: يستاهلوا اكثر من كده فقد دمروا نفسيات الشباب والموظفين

يا العوض يا اخوي حيلك شوية على المغتربين، يلقوها منك ولما من
ناس الضرائب، يا اخي ارحموا عزيز قومٍ ذل.
بس ما تكون من ضحايا الهجمات المرتدة بتاعة المغتربين وعشان
كده زهجان منهم وبتدعى عليهم بالشاكوش وعدم القروش؟.
يا حاسدين غرامنا ويا قاصدين خصامنا
شوفوا غيري وغير حبيبي …
حبيبي حبيبـــــــــــــــــــي ..

يا نص(ر)الدين
لو ما كنتا مكمل نص الدين
كان قلنا طالك ماطال قيس و المحلق من شواكيش....
صاحبك ده قول ليهو باخ هي ذاتا شينة و عويرة


















زمان كنا بنعزي المشوكشين كده!!!

أخوك ود الجار شيلتو (يعني مغترب)

Quote: زول انتا قايل انا بقيت شاعر من شنو؟؟ ما من شاكوش مع اني كنت في الثانوي العام

الله يمغس المغسونا إنشاءالله ..... ولا مافي داعي


هاشم كانت أيام منيلة بستة وستين نيلة


جهل من الآباء والأمهات وأخطاء ما زالت كثير من الأسر تعاني من

تبعاتها ومركز الزلزال هو ذلك الشاكوش أبو شنطة سامسونايت .



تحياتي




واسبه[/

Bتخريمة مفيدة :

درس تعلمته من ذلك الشاكوش جعلني صديقا مقربا لبناتي
ما أنا أبو البنات ومعاهم وين ما رست مراكبهم .

Quote: جهل من الآباء والأمهات وأخطاء ما زالت كثير من الأسر تعاني من تبعاتها ومركز الزلزال هو ذلك الشاكوش أبو شنطة سامسونايت .

للأسف الشديد يا صلاح أغلب زيجات المغتربين كانت بطريقة مهينة جداً
ولا تحترم كرامة أو مشاعر البنات.
إنسان جيبو مليان يخطب ويجس في بنات الناس وكأنه يود شراء
خروف وليس شريكة عمر ولا تراعى في ذلك أبسط مقومات الزواج
الناجح..

Quote: درس تعلمته من ذلك الشاكوش جعلني صديقا مقربا لبناتي ما أنا أبو البنات ومعاهم وين ما رست مراكبهم .

ربنا يخلي ليك البنات ويخيل ليهن..

Quote: يا نص(ر)الدين لو ما كنتا مكمل نص الدين كان قلنا طالك ماطال قيس و المحلق من شواكيش.... صاحبك ده قول ليهو باخ هي ذاتا شينة و عويرة

قيس والمحلق بيني وبينهم الشيخ الجعلي يا القردابي
وإن شاء الله الشواكيش لا يضوقها عدو لا صليح..
وصاحبي المذكور هنا زول مايستاهل والله
راجل مقنع كاشفات وقشاش دموع الببكن
لكن المؤمن مصاب..
الشاكوش ده أنا كنت بتمناهو لود الجار عودو
الراجل بتاع المشاكل..
لكن زي ما بقولوا كل واحد بياخد نصيبو

ألأخ/نصرالدين...


والله قريتو لى آخر حرف..جميل متعتنا...

أنا ما مته لكن المقابر شقيته......

لك الحمد يا منعم...

لكن هاشم الفى راسو دى ما شكوش ده ساطور ما شايفين كلامو كتر(بضم الكاف)..

مودتى..إسماعيل محمد أحمد عباس...

Quote: ربنا يخلي ليك البنات ويخيل ليهن..

تسلم أخوي نصر الدين ربي ينصرك دوما




صلاح واسبه

العزيز نصر الدين
تحياتي
وفعلا هبشت وجع خرافي
وما احدثه وقتها الاغتراب من زلزال اجتماعي
لكن سبحان الله كان في احيان كثيره يذوق المغترب من نفس الكاس.
فيرجعها لانه ما قادر يعمل ليها اقامة,وتلقى صاحبتنا بعد نعنشت
وفرهدت بزيارة بلاد الخليج وفرحانه بدهبا وعطورها وهديماتها
تحس بالحنين لباع حان الزفاف داك,وتقوم تكوسه في اول اجازة.

في نوع قبل بالعلاقه الغير مشروعه من باب الانتقام
وفي نوع لانه لسه بيحبها

وتلقاها بتقول له يا اخي انا الزول ده ما بحبه
تعال اطلق ونعرس
وللاسف الغالبيه بتقول لها لا يازوله ربنا يسهل عليك مافي داعي.
وفي دواخله تلقاه بيقول دي صياعه وضايعه وبركه الما عرستها
اتاريها في اول سانحه ممكن تخون زوجها!!


وتلقاها رجعت اتلمت وقررت الصبر على نصيبها
وصاحبنا المغترب الساذج فاكر نفسه نال فاطمة المسحه
وماعارف فاطمة المسحه مسحت بيه الارض على طريقتها الخاصه.



هنا لو تأملنا في اكثر من ضحيه.
اول الضحايا هو المغترب و ثقفاة المجتمع العلمته انه ممكن يختار اي انثى
فقط لانه يملك الاموال!!

ثاني الضحايا البنت نفسها العلمها المجتمع انها ممكن تكون سلعة تشترى وتباع
وانها ممكن تهب نفسها لرجل لا تحبه فتعلمت الدعارة المقننه بواسطة المجتمع
فليس اخطر على الاخلاق من ان تروض المرأة نفسها على
قبول ممارسة الجنس بلا حب!!لان هذا سيقود لقبول فكرة الدعارة مستقبلا.

ثالث الضحايا الشاب الفقير الضحو بيه لفقره,وكيف تحول لمجرم ومنتهك اعراض بعد
ان اتفق المجتمع على الغدر به.

والخلاصه اننا مجتمع يستحق الاشفاق فقط.
لاننا نتفنن في ايذاء انفسنا.

Quote: هنا لو تأملنا في اكثر من ضحيه. اول الضحايا هو المغترب و ثقفاة المجتمع العلمته انه ممكن يختار اي انثى فقط لانه يملك الاموال!! ثاني الضحايا البنت نفسها العلمها المجتمع انها ممكن تكون سلعة تشترى وتباع وانها ممكن تهب نفسها لرجل لا تحبه فتعلمت الدعارة المقننه بواسطة المجتمع فليس اخطر على الاخلاق من ان تروض المرأة نفسها على قبول ممارسة الجنس بلا حب!!لان هذا سيقود لقبول فكرة الدعارة مستقبلا. ثالث الضحايا الشاب الفقير الضحو بيه لفقره,وكيف تحول لمجرم ومنتهك اعراض بعد ان اتفق المجتمع على الغدر به. والخلاصه اننا مجتمع يستحق الاشفاق فقط. لاننا نتفنن في ايذاء انفسنا.

لك عاطر التحايا العزيزة تراجي
لعلك دخلت إلى عمق الموضوع ومآلاته وأنت تتسلحين بخبرة
حياتية كبيرة قضيت معظمها خارج السودان لذلك كانت الأمثلة
عندك جاهزة والضحايا كثرين فجاءت مشاركتك عميقة وتناولك
يحوي الكثير من الإفرازات للزواج التجاري ، زواج تبادل المصالح
المشتركة وزواج المناولة، بنت شابة جميلة مقابل حفنة من المال
والمصاغ والوعود السراب، دون أن يكون هناك أدنى معرفة أو عاطفة
مشتركة تجمع صاحبي الأمر الحقيقيين.
يرى الأهل أن تزويج بنتهم لإنسان غني سيعود عليهم وعليها بالمنفعة
والخير وهم لا يعلمون شيئاً عن العريس اللقطة، لا يعلمون أخلاقه
أو وضعه أو تصرفاته في بلاد الاغتراب، وهم أصلاً لا يريدون أن يعرفوا.
وفي النهاية تكون العروس هي الضحية وتظل العلاقة بين الزوجين علاقة مادية
بحتة، إذا أخل أي من الطرفين بشرط من شروطها تكون الطامة الكبرى،
لذلك تشعر الزوجة بالرتابة وتتمنى لو أنها رضيت بصاحبنا بتاع
حان الزفاف، وتبدأ مرحلة التمرد والخيانة والكذب واستغلال الفرص
حتى يحدث ما لا يحمد عقباه في نهاية الأمر..
نتمنى أن يفكر الأهل في بناتهن وفي مشاعرهن ولا يستجيبوا للماديات
حتى لا يكونوا قد ارتكبوا جريمة نكراء في حقهن..
أقدر وأثمن مشاركتك العميقة وتناولك الهادف..
نسأل الله أن يحمينا ويحمي أسرنا ويوفق الجميع..
ولك الشكر الجزيل..

Quote: تسلم أخوي نصر الدين ربي ينصرك دوما

ربنا يوفقك ويعينك على تنشئة الأميرات الحلوات
وإن شاء الله ربنا يوعدنا بأمورة جميلة..
فالبنات بقولوا حنينات أكتر من الأولاد

Quote: والله قريتو لى آخر حرف..جميل متعتنا... أنا ما مته لكن المقابر شقيته...... لك الحمد يا منعم... لكن هاشم الفى راسو دى ما شكوش ده ساطور ما شايفين كلامو كتر(بضم الكاف)..

تحياتي يا أخ إسماعيل
مشكور يا سيدي على المتابعة وأنا سعيد باستمتاعك بالموضوع..
ونحمد الله أن كتب لك النجاة ووقاك من الشواكيش
والظاهر على هاشم إنو استفاد من الشواكيش استفادة إيجابية
فطلع لينا درر غوالي لأن المعاناة تولد الإبداع كما يقولون..