كموج البحر تتجدد(المركز السوداني للثقافة والحوار يحي الذكرى الثانية عشر لمصطفى بدار السويد)

من كان يسمع مصطفى

صن وهج صوته إنطفى

ومن كان يسمع ماإصطفى

حي بقضيتو وبس وكفى


يقيم المركز السوداني للثقافة والحوار الإنساني بالتعاون مع:

- نادي الخرطوم للإطلاع والمشاهدة

- جمعية الصداقة السودانية السويدية

حفل تأبين الراحل المقيم مصطفى سيد أحمد بمناسبة مرورالذكرى الثانية عشر لرحليه

المكان : دار السويد بالحديقة الدولية

الزمان : 17يناير

السابعة مساء

يحتوي الحفل :

-إضاءة حو ل تجربة الراحل

-شعر


-وغناء

فات الكان بدّينا إحساس بالإلفة

وكان راوينا

فات الباكى جرحنا .. وناسى جروحو

ولافـّى ورانا مدينة .. مدينة

فات الصاحى

ونحنّ نغط .. فى النومة السابعة

طالق حســّو .. ولا حسـّينا

حتـْحـتْ فينا غناهو الطاعم ..

وفات قنعان من خيراً فينا

سلامات يازول يا رائع

سلامات .. عوّافى

سلامات يا خلاصة الخير الفى الناس

وترياق الزمن المتعافى

سلامات يازول يارائع

سلامات عوّافى

نحن معاكم
ولقدام
التحايا لكل الشباب الجميل
معتصم

نهال
يالها من ذكرى وتذكار

Quote: لا المنفى الحزين قادر جدار احزانو يبعدني

أستاذ بدرالدين

هكذا صدح بها مصطفى

فهو باقي فينا

أدروب يا صديق

لنضئ لمصطفى شمعة الخلود

مودتي

نهال

العزيزه

نسعد
حين تبتهجوا بتخليدكم
ذكري صُناع العالم الذى يخص الفرح

أمنياتى لكم بالنجاح




ـــــــــــ
عليك الله تعزمي الشاعر الأديب عثمان البشرى
وإذا ما ليقيتى ليهو درب أشــري لى ..بس

الرائع عبدالله داش

مصطفى ينبض بين كلمات القصيد

في أنات الوطن

وفي شهقات الفرح

مصطفى حي فينا




عثمان بشرى للأسف لم نتواصل معه

لكن لو في إمكان تمدنا بصلة معاه

تكون ما قصرت

مودتي

نهال ....
إزيك صديقتي

سلمي لي عليهو شديد
سلميلي علي غنائه الطاعم النبيل
سلميلي علي صحابي
سلميلي علي عيونك ياصديقة
سلميلي علي مصطفي شديد في اليوم داك

ثم بلغيه :

بأن البلاد لازالت في غيها
وأنشديه أن يقرأ بصوته الرخو الرحيم
فاتحة علي بلاد ماعاد يطربها سوي
الاغنيات الهابطة



بلغيه عني الحب والسلام والتحية



وسلميلي علي عزوز

خضر

ونحن ما بعده أيه نكون

ومن غيره أيه نكون

نتشبث بخطه ولونه

ونقول معاه يا بكرة


نبلغك الحب والسلام

ياصديق

وأنت معانا

الاخت نهال

تحياتي نا عضو في دار السوبد ويسدني ان تستضيف دارنا هذا ااحدث الجميل واحتفاء بذكري الفنان الاجمل الذي اسهدا كثيرا لفنه الملتزم ولازال يبث الامل في دواخلنا قائلا :بكره احلي وهو يسكن في مساماتنا جميعا

ويابورداب ااخرطوم مصطفي جميل ودارنا واسعه حبابكم الف

أستاذ عبدالمنعم عمران

شكراً جميلاً لكم الأخوة في دار السويد

في إنتظارك يوم الخميس

مين سمـّى ترحالك .. غياب!؟

والغيبة بتزيدك .. بها

لو يرتق الحزن .. المصاب

كان بعدك الموت إنتهى

يا أقصى حالات الحضور المشتهى

يا منـْتهى

تعال .. قـرّّحنـا بى دهشة غناك الحى

وحـّىْ من جرحك .. الدامى

وفترْ حيلك

وحـّى من ضُلـّك الرامى

وحملْ شيلك

تموت متل الشدر .. واقف

تموت واقف على حيلك

فيا حليلكْ

يا حليلك بنستنـّاك

على صهوة جياد الريح

بنستنـّاكْ

فى الزمن اللّديح .. القيحْ

بنستنـّاك

على باب الحلم فى غناكْ

بنستنـّاك

رحيلك .. شلهتْ الدنيا ..

ورتـّب العالم البى هناك

بنستنـّاك

ونحن على لقاء الخميس

إضاءات حول تجربة الراحل الغنائية :

الهادي جمعة

عبداللطيف عبدالغني (وردي الصغير)

علاء الدين سنهوري

شعر

محجوب شريف

حميد

عثمان بشرى

السر عثمان الطيب

طلال دفع الله


غناء

أبوعرب

عمر مكي

علاء الدين سنهوري

منو قال هو فات

زولاً وهب كل الحياة للأغنيات

منو قال هو فات

ما أظنو زيّك يقولوا فات

يامن وهب كل الحياة للأغنيات

يا من ترك فى قلوبنا أنبل ذكريات

يا من ترك أحلامو فى كل الجهات

وخلّد معانى الروعة بى كل الصفات

ما أظنو زيّك يقولوا فات

يامن وهب كل الحياة للأغنيات

ورحلت ما كان الأوان

رحت وحرقت حشا الغنا

خليتنا لى زمن الهوان

والإرتهان لى خيول حروف الشنشنة

مرثيات عن الراحل المقيم مصطفى سيد أحمد


مرثية الشاعر صلاح حاج سعيد


ما كنت قايل نفسي يوم
أرثيك يا أصدق خليل
أنا كنت بتخيّل أكون قبلك
أسافر غنوة في الوتر الجميل
زي ما عبرت معاك صروف زمن المسافة
وجينا للحزن النبيل
أنا كنت داير الدنيا تمهلنا
ونغني الفرحة لى الزمن الخُرافي .. المستحيل
ورحلت ما كان ده الأوان
رحت وحرقت حشا الغنا
خليتنا لى الزمن الهوان
والإرتهان لى خيول زمان الشنشنة
كل المطارات والمواني
وشفع البلد الفتارى
لسة بارين القطاري
يسألوا الناس عن خبر زولاً
مسطّر إسمو في قلوب العذارى
وفى عيون كل المساكين ... الحيارى
زول بيطلع من نفس طورية ضامة الطين
تكابد طول نهارا
زول بيسكن في عيون أطفال
تأمّل ديمة يديها البشارة
يا خي والله الفرقة حارة
وفقدك أكبر من محيط الدنيا
وأكوانها ... ومدارا
طليتنا زي حلماً جميل
فجأة في غفلة أنسرق
أسطورة تحكي أماني جيل
في حب غناك كان ليهو حق
أديتو في الدنيا الأمل
وريتو كيف في الحق يقيف
من غير وجل أو إنبهار
علمتو بى حس النغم إنو الكلام
لازم يكون واضح كما شمس النهار
صدقك ملاهو حماس .. يقين
بالخير وبالحق .. والنضار والإفتخار
إنو الحبيبة هي الأرض
والتضحيات عشان عيونا هو الفرض
والدنيا ورّاثا الصغار
وعرفنا يا زول قسوة الضنا والتعب
والإرتحال في غفلة الزمن الصعب
وقولة الوداع بالضبط
والسفر الأبيد من غير رجوع
أو غير متاع
وبكت عليك كل الشوارع في المدينة
ناحت عليك كل الفواصل
في الغنيوات الرصينة
وإنكتم نبض الغُنا
جلل سواد حزنك سنا
وإتوشح المنا بالضياع
وكان بدري يا زول الوداع
لا سكة لى درب الرجوع
بعدك أغانيك إلتياع
مسكونة بالأسى .. والخشوع
لكن بريقك ما خبا
أبداً بريقك ما هو ضاع
ساطع كما نور الشعاع
منو قال هو فات
زولاً وهب كل الحياة للأغنيات
منو قال هو فات
ما أظنو زيّك يقولوا فات
يا من وهب كل الحياة للأغنيات
يا من ترك في قلوبنا أنبل ذكريات
يا من ترك أحلامو في كل الجهات
وخلّد معاني الروعة بى كل الصفات
ما أظنو زيّك يقولوا فات
يا من وهب كل الحياة للأغنيات
****
ورحلت ما كان الأوان
رحت وحرقت حشا الغنا
خليتنا لى زمن الهوان
والإرتهان لى خيول حروف الشنشنة

***

أمل الأغاني
كلمات: مدني النخلي

شرد الكلام مني وسكت
حس الأغاني الملهمة
لبس النغم ثوب الحداد نزف المقاطع مؤلمة
لمتنا بيك يمين ظروف في ليل رياحو ملتنا هم
أنت الأخو وبرضو الصديق والبينا كان إحساس ودم
للكل فتحت القلب دار .. ومزجت روحك بالنغم
يا حليلو زمناً كان معاك يا حليل جدارنا الأنهزم
روح الرحابة الما بتضيق
يا باهي يا دفق الرحيق
شاقي الدروب الموحشة
فارش عشم وترك طريق
دايس علي الجرح الأليم
في أحلك اللحظات رفيق
يا حليلو أملاً كان معاك
خلانا لى جرحاً عميق
نجم الحروف المرهفة
ضد الذبول والإنطفا
لكنو من بعدك رحل خلانا فات يا مصطفي
يا حليلو شدواً كان معاك
وأمل الأغاني الإنطفأ


***


رحيل اليوتوبيا
مرثية الشاعر محمد طه القدال
في هذي المدينة الفاضلة
لبس الشعراء تيجان غار وهجوا
مع النشيد .. والبوح وغنوا للغُربة المتلتة
في الزمن المكان الروح
وما بين الرماد والنار
فضا الكلمات ومعناهم
بيمرقوا من هطيل النوح ومغناهم
يشقشق للحياة والموت
يغرد للمدائن الفاضلة جواهم
جزاير دوح
قدر يوتوبي
ترحل في مداين الناس ... مدينة
يندلق حسك حداهم
قطرة قطرة تعبي صوتك بى نداهم
مشدود وتر صوتك ربابة
مسنود عليك صوت الغلابة
مفرود من الزمن المفتق والمرتق بالرتابة
مولود مع الجدة المعتقة والمجرتقة بالرحابة
ينسدل من شدوهِ أنشاد المزامير
ينسمع في شجوهِ ترتيل الصحابة
زمن يوتوبي ترحل في العتامير
والمغاسل والغُنى المندلي من شطر السحابة
من عنا الأطفال وأولاد المسادير
السنينهم فوق جوازات العصافير
الحنينهم بحة الليل الطنابير
الحزينهم حزنه في الجوف المطامير
نبلهُ يطلع زي شعاع
لا ولولة لا شيل ندابة
( يا مطر عز الحريق)
( كمّل الناقص وفرضو )
( يا مشاوير الطريق )
شوفي لي حُّميد وأرضو
يا بلد ليلك غريق
طولو زي طولك .. وعرضو
إن ضلامك حر طليق
أو سلامك أهلو قِرضو
آه من هذا السليق
يشتري الراجل وعرضو
الفرج باقيلي ضيق
والصحاح العندي مرضو
كم إديريجاً حليق
شان يعيش بى دقنو برضو
يا مدد قشة غريق
)يا مشاوير الطريق(
)يا وليدات الفريق(
لملموا الصابرين تعالوا
)رقصوا البنوت أعرضوا(
****
يا نخلة المقبول ظلالك
وأصلة الشموس بى حريرة
ومجدولة من طيب شمالك
مروية في عز الجزيرة
من همي همك سمالك
كسر همومي الجبيرة
لحن الوليد الرمالك
مشرق يجبر الكسيرة
طينك مقالد رمالك
تحتك مياهك خريرة
شعرك جريدك حلالك نمة غُناه الضريرة
غنوة بتقرب منالك
رعشة جروفي الخضيرة
غنوة حبيباً شكالك
هجر البنية الأميرة
عند الترابلة القبالك
ضليلة صهد الهجيرة
يا نخلة السلفاب جمالك
في الناس غناوي المسيرة
لو جيدك الفارع بكالك
موّال دموعي العسيرة
أو نيلك السالك أمالك
جيهة المشاوير الحسيرة
أو قلبك المفجوع دنالك
روح الأناشيد المنيرة
شيليلي عِب وأمليلي شالك
من غناويهُ السميرة
شدي من صوتك حبالك
نشفي العرق الدميرة
قولي للجنيات سؤالك
يا نخلة بس متكية مالك ؟
بطنة سبايطك عضيرة ؟
جدلة سبايبك ممالك
محصورة في فد ضفيرة ؟
ولا السلام البدالك
سراب الأماني الكبيرة ؟
لو صبري بيهدم جبالك
شن تبقى غير عيني الهميرة ؟
****
قدر يوتوبي ترحل يا صديق
زمن يوتوبي ترحل في البريق
والمدينة الفاضلة نامت في العتامة
والعتامة تهاتي بالشعر الهيافة
والشعر متغطي بالكلمة السلامة
والسلام متداري في الولد الشليق
والوليد مندسّي في الحرف القيافة
والحروف الوردة تحلم بالرحيق
والحلم يتجاوز المعنى الرهافة
والمعاني تعاند الزمن الرحيل
والزمن يوتوبي يرحل في السحيق
والرحيل يوتوبي
ترحل يا صديق ؟
الرحيل الشفتو للناس العلامة
الرحيل الشفتو للمتلك قيامة


***

سلامات يا زول يا رائع
مرثية الشاعر أزهري محمد علي

مدخل أول:
لمتين مِتْيمِّم شَطْر النيل
مُتوقِّي اليابسه ووْاَرد
متوكِّي الغُنيه عصا موسى
بِتْهِش في غيم الإلفة الشارد
مهدودة القُدرة وفترانة
حَرداَن الضُل البارد
بِتْوجِّل لى يوسف في البِير
يطْلَع من بَطن البير المارد!
مَدْخل ثاني:
فات الكان بدّينا إحساس بالإلفه
وكان راوينا
فات الباكي جَرِحنا وناسي جُرحو
ولافّي ورانا مدينه.. مدينه
فات الصاحي ونحن نَغِطْ
في النومه السابعة
طالِق حِسِّو ولا حسيِّنا
حَتْحَتْ فينا غُناه الطاعِم
وفَاتْ قنعانْ من خيراً فينا
سلاماتْ يا زول يا رائع
سلاماتْ وعواّفي!
سلاماتْ يا خُلاصة الخير الفي الناس
وترياق الزمن المُتْعافي
سلاماتْ يا زول يا رائع
سلاماتْ وعَوَّافي
مُحاصَرْ فِيكْ
بسأل عن سكّه تطلِّع مِنَّك
أو سِكّه تودِّي عليكْ
بسأل عن مَخرج منّك وليكْ
زي نَهْر بينْبعُ
وما لاقي مَصَبْ
بِتْمدّد عِشقَكْ من أقصى ضواحي الروح
لي أقصى نواحي القلبْ
يتْكثّف بِسِعةْ إطلاق الرّب
وأنا كنتَ بفلِّي القَلْب بسيرتَكْ
سمِّيتك حلاّب الغيم
من ضَرْع الجَدبْ
وظنيتَك مارستَ الفِعل السرِّي
وحَفّظت فحولة النيل
أيام الخِصب
ولمحتَك وأنتَ بِتتْمشّى
وترقّص في حَمَامَكْ
على حُمّة إيقاع الحرب
وتْكَلْكِلْ جِلد الكلمة الحافَّه
لَحبيبه بتفتَح مَجَرى الغُنا في الدَّم
وتَفلِّس بيان القلب
فيا بنوت الشارع الطاعِم
قُومَن كَبْ!
قومَن للما قَصَّر
في غُناكنْ ضُمَّه
ولا إتْلوّم بِوراَكَنْ تبْ!
ولو تَبْقَى السِكّه الماشة طشاش
ما بتبقى السكة الجايه ضهَب
وسلاماتْ يا زول يا رائع.
البارح عصفورتكْ
ركَّتْ في البال
رقَصَتْ
وأدَتْ عصفور الريد شبَّال
وطارتْ من قولة كَرْ
ما الزول النَهرَ العصفورة
بِحرِّض في كِلاب الحّر
لابسنى وداخِل في اللَحم الحي
راصد كلّ البِسْأل عَنْ حالي
حرَّش ضُلّي عليَّ
ونتّف زَغب الخاطرة التَّخْطُر على بالي
ومَنَع العصفورة تَحومْ
إستْجوّب كل الناس البِجُو في النوم
ما تْقومْ
يا زول يا رائع ومهمومْ
يا مضيّع ضَيْ عيني وراكْ
واقف
حاحاي للنوم.
يا مْستّف رئةَ الدنيا شهيق
ومُشحتِف روح الخرطوم
كيف حال يا أبوي
كيف حال يا خال
وتعالْ!
إتْفَضَّل على باحة بيتنا الطّيب
ماعون الأطفال
ضمدَّ جراحاتك تعالْ!
من ضلامَاتكْ تعالْ!
من حافة البرزخ تعالْ!
من شرفةْ الملكوت تعالْ!
أدّينا هينين من صبرُ
السكة أبعد من مَشيِكْ
والجرح أعمق من حدود الإحتمالْ
السابله والأطفال هِناك
قداَّمك المشوار طويل
والريح وراك
كل البيوتْ
إتشرَّفت لى طَلْعَتَكْ
والوَنَسه ما كِمْلَت معاك
القَرقراب والقهْقَهه
مَينْ سمّى ترحابك غياب! ؟
والغيبه بتْزيدك بَهَا
لو يرِتق الحُزن المَصَابْ
كان بَعدك الموت إنتهى
يا أقصى حالات الحضور المُشتهى
يا مُنْتَهَى!
تعال قرِّحنا بس دهشة غُناك الحَي
وحَّيْ من جُرحك الدامي!
وفَتَر حيلَكْ
وحيّ من ضُلّك الرامي!
وحِمِل شيلَكْ
تموت مِتْل الشدر واقف
تموت واقف على حيلَكْ
فيا حْليلَكْ
يا حْليلَك .. بِنستنَّاكْ
على صهوة جياد الريحْ
بنِستنَّاكَ!
في الزمن اللديح القِيحْ
على باب الحلم في غُناكْ
بِنِستنَّاك!
رحيلك شَلْهَت الدنيا:
ورتّب العالم البهِنَاك
بَستْنّاك!
وأنا تاني وراك َشِنْ لاحِقْ ؟
دَهَسَتْني في بُعْدَك
حِدوَ الخوف
الداخله عليّك بالسَاحِقْ
أدِّيني القُدْره التمْنَحني
بِحجمْمَكْ سعةَ الشوف
لو أقدر أطِلْ من شاهق
لو أقْدر ألوّح لعيونك
تَلْمَحنِي
وأنا ضَعفي أمامك فاضحني
سامحني!
ما قدرت أطولَكْ
سامحني!
شُفتَكْ من وجع طَالع
على برزخ ملتقى النيلين
كنتَ هناكَ وحّيدك
وكل الناس أتنين .. أتنين
براك واقف
في حدْ السيف
براك الما وقف بينْ... بينْ
تغازل حلمك الفارع
فَتح بابين على الملكوتْ
تَسَلِّم على حضرة جلال الموتْ
وتفتح في الأرِض نفّاج
إذا امتلأ الفراغ بالصوت
فيا باطن الأديم أفتح
براحات الحنين مُشْرَعْ
وأَنْدَهْ لي مُدن شاخت
أنْدَه لأطلال القُرى الراحت
بيوتْ في بيوتْ
تَمْرُق من شِبر مَسَرح
مدن فاضله
وعالم باتساع الحُلْم
بقامةَ يشتهي التابوت
فما لَفَظَ البحر يُونِس
ولا أنسدّت
شهِية الحوتْ ... ويا زول يا رائع تمشي
بالحسره وتموت ؟
وسلاماتْ يازول يا رائع

***

واحد جميل
سيد أحمد الحردلو

تاني قام واحد جميل في بلدنا ... ماتْ
وكان بغني للمساكين .. والمسولتين .. والحفاتْ
وكان بغنى للمنافى .. والعصافير .. والرعاتْ
وكان بغنى لى بلد في الحلم ... جاي .. أغنياتْ
وكان بطنبر .. وكان بدوبي .. للحياةْ
تاني قام واحد ملك ... روّح .. وفاتْ
وكان ملك في الريد ... وإنسان في الصفاتْ
وكان مهاجر في دموع كل البكاتْ
وكان وتر مشدود ... ومسكون دندناتْ
وكان "عليه سلام " تقول ما زول حياةْ
يا مصطفى .....
فاكر الجماعة الكانوا ساكنّك دوام
من منفى لى منفى
ومن عود ... لى سفرْ
فاكر العصافير المسافرات دون جواز
فاكر اللى داجّين في المطرْ
عبدالرحيم ... وهلم جرْ
فاكر القطر
فاكر النخيل .. فاكر الحراز
الليلة كانوا جميع هناك
قسماً يمين .. كان الجميع باكين عليك
كان المطار فارش عليك
كان الجميع مشتاق إليك
يا سلام عليك
لمّان تكون زولاً عزيزْ
عنْ ناس عزازْ
****
يعني كان لازم تفوتْ
والحزن مشرور في البيوتْ
والدنيا مازال فيها حوتْ
وفيها لسع .. عنكبوتْ !!
وتخلّي أوتارك سكوتْ
ولسه عندنا ريد جديدْ
ولسه عندنا ليك قصيدْ
يعني كان لازم تفوتْ
وتخلي هذا الحب يموتْ !

مرثية بشرى الفاضل

رطبت بالنّداوة
وغلالة الروح
سنوات الجفاف الأولى
فرقص الشعر على ناصيات الـقـوافي
في هذا العهد الكالح
عهد الصرير ...
ولف الذقون على الضحك
****
برج الغناء العالي أنت
وأنت النسيم يتردد..
يا حلو يا مستطاب
رحلت وكنت على باب الدخول
فنهض بديارنا ذلك المأتم الجمعي
ذلك الحزن .. ذلك الإنشداه
ذلك الذهول
وكانـت أشد القبائل جسارة في لقياك
وأنت عائدُ إلى الوطن ...
قبيلة الصبايا ..
ينضحن نضارةً وعافية
في زمان نقص الغذاء ...
صبايا من الحسن الصافي
كأنما جبلن من طينة أخرى
وقفنْ سداً بديعاً .. حازماً
في وجه سرقة عبيرك
بغية سكبه في الساحة الكالحة ... الغبراء
في طريق مدني ... إنبثقت عن ذاكرة الأغاني
غابةُ من المحبين
في إستفتاء مع الأغنية المشبعة
وضد سلخ جلد الأغاني
وحشوه بالغثاء
النهر أنت
ورؤا ك ... تسير الأنهار
نغمُ منك أو همهمة
فيقفز عاطف مثل درويش
من المجهول إلى الصدارة
قم .. قال صنوك الشاعر..
يا طرير الشباب
غني لنا ... غني
من عبقري الرباب
أنشودة الجن
قم يا جميل بثينة
وأشهد هذا الوله
بما أمتعت به الناس
وضوأت ليالي القرى ... والأمدان
يدلقون عليها العسس والعسف ... والأسف
فتغسلها بآهة مرسلة إليك ... حُبلى بالفرح
منذ مطلع القرن عبر كرومة ... ووردى
وصادح تلو صادح
فتـنمّي فيها التشبيب بحب الوطن
وشهقة الشعر ... وإنــدلاق الصليل
مصطفى
يا مصطفى
النهر ..... أنت
فولاذ الرقة
برج الغناء العالي ..
والنـسيم

مسافة الشوق

فى رسالة لمصطفى سيد احمد في ذكراه الحاديه عشر

مرثيه جديده من الاستاذ مدني يوسف النخلي


عصفور صداح
عشقك افنان
تختصر الهم ريشة و الوان
مسكون ابداع انت الفنان
قسمت الليل و الساعة رحيل
اتكى جنبى التعب الجواى
زاملنى الهم و الغربة وراى
ميلت عليك ..
فى لمحة مشيت نعنعت الشاى
عن برد الليل .. و الناس
و الغربة الساكنة الروح
شديت وترك
غنيت مجروح
كلماتك توقد فى الخاطر
شمعات الذكرى المطفية
قسمت الليل و الساعة رحيل
تندة شمس تمرق من
ضفة نيلية ..
و اتدفقوا العمال البخلصو النية
اتبادلو التغريد
انسام و قمرية
ياشاتل الاحساس
انغام و حنية
قلبك بلم الناس
مرسى و حميمية
شريت الغيمة القبلية
على حزن المدن المنسية
و حسن النية ما كفاك
حسن النية لو كفاك
ماهزيت ضفيرة الروح
على الوطن الصبح منفاك
و لا اتراخيت..
صعب تتنحى عن مبداك
و لا اتواريت ..
خجل بكيت عيون الوردة
فى مغناك.
فيا وجع الدماير قوم
شقى ومهموم
شوف النيل .. رماك منديل
على شوق ضفتو الفاقداك
محير فيك ..
محير فيك و حتى الان
نفضت من الاسف روحى
مشيت لو قلبى يتناسى
اندهلك هوايد الليل
وكت الشوق يهد الحيل
تطل من نجمة وناسة
تبارى النيل عشق و هديل
حروفنا تدغدغ احساسا
تجى و ملهوف
تعاين بالبصيرة تشوف
وجيه العالم المخطوف
تصد مأسوف ..
تفوت مأسوف على
القلب النضر بالناس
مسافة الشوق
وراك لا هينة لا بتتقاس
فلا زهر الغنا الواثق
دفق بعدك شذى الانفاس
و لا قادر رحيح الزيف
يغطى مساحة الاحساس
و لازال مقعدك فى الروح
ملاذ و رذاذ

جبين مطرح
ندى الذكرى العطورا تفوح
مردم شال سحابك فال
مرقت من العصب و الشوف
مكان ماطاف غناك اطياف
يهدم فى قلاع الخوف
تسو عوسك
كلاما نى مردو النار
و فى الزمن الكتر قبحو
طغو الاشرار
كروش وتجار
مغول و تتار
و ناديناك ..
ناديناك و قدمناك
سنا السيف المرق بتار
هديناك للبلد مسدار
و عمدناك وليدا البار
وودرناك ..
ودرناك رمتنا الخيل
سبونا الجونا قرمانين
وراك بكت الغمامة السيل
وجفت نضرة الياسمين
وراك خربانة يا ابوالسيد
وكترو الادعو التفنين
كتار الموجة ركبوها
مع السخف الحصل عايمين
وضيعناك ..
ضيعناك و محزونين
مجروحين و مستائين
و مكلومين ..
بلد بى حالة مكلومة
تحنس فى ظروفا ابت
لئيمة ومادة قدومة
وضيعناك ..
و لا زال الحلم محظور
و لسة الضحكة مكتومة
على مد البصر حلال
تعانى الحال ومأزومة
على مد البصر أطفال
تعيسة شقية محرومة
على مد الكلام مفجوع
حديثك عن بنات الحور
وشوقك لسواقى تدور
تشر العافية فى ا
تخدر فى البلاد البور
وسويت الاغانى زهور
وفريت القوافى طيور
وفت.. لقينا جف النيل
جف النيل و طفت الريح
سنا القنديل ..
محل مانميل اسانا يميل
شبعنا غبن ..
فرحنا إستمرأ التأجيل
مطرنا الكان سحابو هميل
نسانا و غاب هجرنا عديل
كبر جرح الفجيعة نزيف
وفقدنا وراكا ست الجيل.
فقدنا وراك ست الجيل.
ورحلت يامشرور ندى
مالى البراحات و الندى
يامجرتق اللون بالغنا
يالبلبل الصداح شدا
ياحليلو شدوا كان معاك
صحا الازاهر فرهدا
ياحليلا ايام الصفا
و أمل الاغانى الانطفا

نجم الحروف المرهفة
ضد الذبول و الانطفاء
الليلة من بعدك أفل
خلافات يامصطفى
خلافات يامصطفى


mahdy alamin

شكراً جميلا لمرورك البهي

نهال

الكائن الخلوى
الوريف العريس عثمان البشرى دا تلفونو
وإذا ما رنْ معاك تانى أدينى خبر

00249924558780

تحاتى له وللجميع

عبدالله داش

شكراً جميلاً

عثمان البشرى

وصلناه

ونحن على موعد معه الليلة

لنطوف في ذكرى الراحل المقيم مصطفى سيد أحمد