Post: #1
Title: المركز الثقافي الالماني...المركز الثقافي الفرنسي
Author: Manal Mohamed Ali
Date: 01-11-2008, 11:30 PM
ادين لهما بالاصدقاء ملح الارض
في التسعينات عندما اغلقت الانقاذ كل مراكز الثقافة وتحولت الى مساجد موالية ..احتضن هذان المركزان احلامنا...اشعارنا....لقاء ت الاحبة
ي بعد عام 2000 صار للقهوة الاثيوبية (البنه) والانجيرا بالذقنى في كافتريا الالماني دوراً في الثقافة والحب عندنا
ناس الالماني عندهم طابع وناس الفرنسي عندهم طابع ...الرواد للمركزين بعرفوا الفرق...
مكان للافتنان الجميل بين الاولاد والبنات...تمارس فيه لعبة الغنج الجميل من جميلات بلادي..والامال غير المسقوفة من الشباب..
للمثقفاتية دور في اذكاء الروح الهائمة في المركزين ( لا يوجد احد في المركزين يعترف بأنه من المثقفاتيه مع ان جلهم اجمل وارق وانقى مثقفاتي فيه الدنيا)
طلبة اللغة الالمانية والفرنسية ليس لهم علاقة بالمركز من المحاضرة للشارع ...اما المركز الثقافي فهو ملك لنا....نحن رواد الكافتريا (وبتاعين الرسم والشعر وغابريل ماركيز ومصطفى ياخي ( معاها بريم الشعر) والعشاق
مكان لتداول اخبار الساسة والاحزاب ..وافضل انواع العرقي واخبار الكشات ...مكان تستطيع فيه بنات بلادي تخميس سيجارة مع الشباب دون الخوف من النظام العام
مكان ترمي فيه البنت طرحتها دون خوف من رجل شرطة
شكراً لوجود الخواجات في بلادنا ..فتحت حمايتهم وكافتريات مراكزهم وجدنا بعض متنفس لنا ...
ومشتاقة لجلسة ونسه في الالماني
منال
|
Post: #2
Title: Re: المركز الثقافي الالماني...المركز الثقافي الفرنسي
Author: AMNA MUKHTAR
Date: 01-12-2008, 00:50 AM
Parent: #1
الأخت منال ..سلامات
أعتقد اننى زاملتك فى أحد كورسات اللغة الفرنسية فى المركز الفرنسى فى جامعة الخرطوم فى التسعينات ..
تعرفى لبنى الناير ؟
|
Post: #3
Title: Re: المركز الثقافي الالماني...المركز الثقافي الفرنسي
Author: malamih
Date: 01-12-2008, 07:35 AM
Parent: #2
الأخت الفاضلة منال..
يذكرني حديثك في أيام مضت كانت جميلة حيث كنت أدرس اللغة الألمانية في
معهد جوتة عام 1982 على يد أستاذي الدكتور محمد سليمان و زوجته الدكتورة أخلاص و معهم طاقم التدريس الألماني المستر هايم و فراو ميلر
تحصلت على دبلوم اللغة الألمانية عام 1984 و هو الذي يطلق عليه أل mitile stuffe يعنى الدبلوم المتوسط ,, وكنت ثاني الدفعة,,, و لقد أفادني هذا الدبلوم حينما أبتعثني بنك الخرطوم في دورة تدريبية لدرسدنر بانك في ألمانيا مدينة بامبيرج.. لمدة 3 أشهر ثم قضيت آخر شهر ما بين ماينز و برلين و هامبورج و فرانكفورت...
كان الدكتور ممد سليمان مولعآ بالشاعر الألماني جوتة لذا كان يجعلنا نردد
قصيدته الشهيرة و التي صيغت على قبره حينما توفي:
AUF ALLEN GIBFELN
SPURS DE HOUCH
AUF ALLEN GIPFELS
SPUR DE HOUCH WELDA NOTRA
UM DE AUCH
وترجمتها
على كل رؤوس الجبال هدؤ
و على كل الأشجار هدوء
و على كل العالم هدوء
فأرقد بسلام و هدؤ
لقد مضت فترة ليست بقصيرة منذ ذاك الوقت .. فأرجو من الأخوة الكرام في البورد من الذين يتقنون الألمانية و يعيشون فيها أن يصححوني و يردون النص الصحيح لقصيدة جوتة و التي نحتت على قبره في برلين ..
و أخص بهذه الكلمات أخي نصار و أختي علياء عبد الكريم .. و دمتم
|
Post: #5
Title: Re: المركز الثقافي الالماني...المركز الثقافي الفرنسي
Author: Saifeldin Gibreel
Date: 01-12-2008, 03:27 PM
Parent: #3
Quote: ]وترجمتها
على كل رؤوس الجبال هدؤ
و على كل الأشجار هدوء
و على كل العالم هدوء
فأرقد بسلام و هدؤ
لقد مضت فترة ليست بقصيرة منذ ذاك الوقت .. فأرجو من الأخوة الكرام في البورد من الذين يتقنون الألمانية و يعيشون فيها أن يصححوني و يردون النص الصحيح لقصيدة جوتة و التي نحتت على قبره في برلين ..
و أخص بهذه الكلمات أخي نصار و أختي علياء عبد الكريم .. و دمتم |
الاخ العزيز ملامح... والاخت منال.... الحديث عن جوتة شيق ويطول.. ويرجع بي لايام خوالي ايام الطلب فى تلك المدينة الوادعة التى تسمى قرايسفالد فى الجزء الشرقى من المانيا طبعآ سوف احاول استرجع شوية واترجم ليكم من الالمانى للانجليزى... لحدى ما يجو ناس المانيا... لانى نسيت الالمانى... فلقد درسنا الادب الالمانى فى السنة التحضيرية فى جامعة قرايسفالد فى المانياعلى يد دكتورة قراتس او Fru قراتس.... وكم تعلقنا بهذا الشاعر الفلتة....تأثر جوته بآيات كثيرة من القرآن فقام باقتباسها وإدراجها في أشعاره لذلك تجد الكثير من مقاطعه الشعرية ما بين الاقتباس القرآني وما بين كلامه وهو ما ظهر جلياً في ديوان (الغرب والشرق) ومن أكثر ما تأثر به في القرآن دعاء سيدنا موسى عليه السلام المأثور: (رب اشرح لي صدري ويسر لي أمري واحلل عقدةً من لساني يفقهوا قولي) وكذلك تأثره بفكرة الاستسلام لله التي وردت في سورة البقرة: (بلى من أسلم وجهه لله وهو محسن فله أجره عند ربه ولا خوف عليهم ولا هم يحزنون).
لقد تأثر جوته بالثقافة العربية والإسلامية فهو أول شاعر أوروبي مسيحي قام بالثناء على النبي محمد صلى الله عليه وسلم عبر "أغنية محمد" التي ألفها قبل مماته وهو أول شاعر أوروبي مسيحي قام بتأليف ديوان كامل عن (الغرب والشرق) مُجسدا فيه قيم التسامح والتفاهم والتعايش بين الحضارتين الاسلامية والمسيحية ولم يكن جوته ليصل إلى ذلك إلا بعد اطلاعه وتواصله مع الإسلام والمسلمين فلقد كان احتكاكه بالرواية العربية والشعر العربي ثم المخطوطات القرآنية دافعاً له لكي يكتب مثل هذا الديوان.
أُعجب جوته باالرسول عليه السلام لكونه مزج بين شخصيتين، الشخصية التي أسست الدين الإسلامي، والشخصية التي ربت البشر من حولها إيمانياً وروحياً لم يراه أبداً كاذباً أو شاعراً بل رآه نموذجاً حياً للإنسان المكافح الصابر الذي تعامل مع الدنيا وليس مع السماء فقط.
ومن ضمن أعماله حول النبي مُحمد (الدراما المُحمدية) التي قسمها إلى جزءين بعثة النبي وصور معانات تبليغ الرسالة) ومن اللافت للانتباه أنه في نفس اللحظة التي كان يعكف فيها جوته على (الدراما المحمدية) كانت مسرحية (تطرف النبي محمد) لفرونسوا ماري آرويت فولتير آخذت طريقها في الظهور وبلغت حدة غضب جوته حينذاك أنه منع أخته كورينليا من المشاركة في إعادة عرض المسرحية التي ظهرت في عام 1742. كان النبي مُحمد من الشخصيات المحورية التي أوردها جوته في (ديوان الغرب والشرق) وكانت أغنيته (بعثة مُحمد) من الأغاني الجميلة التي كتبها جوته قبل موته و لم يستطع نشرها فى حينها ولكن تم العثور عليها بعد 88 عاماً من وفاته على يد رايندر ماريا رايكليه التي أخرجتها إلى النور في عام 1907
وهذه إحدى أبيات من قصيدة بعثة محمد)
حينما كان يتأمل في الملكوت
جاءه الملاك على عجل
جاء مباشرة بصوت عالٍ ومعه النور
اضطرب الذي كان يعمل تاجراً
فهو لم يقرأ من قبل – وقراءة
كلمة تعني الكثير بالنسبة له
لكن الملاك أشار إليه
وأمره بقراءة ما هو مكتوب
ولم يبال وأمره ثانية: اقرأ
فقرأ، لدرجة أن الملاك انحنى
واستطاع القراءة
واستمع الأمر وبدأ طريقه
&Uber allen Gipfeln ist Ruh
المانى
Über allen Gipfeln
Ist Ruh
In allen Wipfeln
Spürest du
Kaum einen Hauch
Die Vögelein schweigen im Walde
Warte nur balde
Ruhest du auch
انجليزى
On all hilltops
There is peace
In all treetops
You will hear
Hardly a breath
Birds in the woods are silent.
Just wait soon
You too will rest
|
Post: #4
Title: Re: المركز الثقافي الالماني...المركز الثقافي الفرنسي
Author: emad altaib
Date: 01-12-2008, 03:14 PM
Parent: #1
سلام يامنال
والله ذكرتينا ايام كانت جميلة جدا .. كنا نشدَ الرحال الي المركز الفرسي في اسبوعه الثقافي ..علشان نتفرج علي الافلام ..وقتها ماكنا عارفين الشوتايم ولا كانت الشوتايم موجودا اصلا في السودان .. وكرهنا سينما النيل الازرق افلامها كلها هندية وتتحدث عن العداله وعداله اصلا مافي
وشكرا ليك يامنال
|
Post: #6
Title: Re: المركز الثقافي الالماني...المركز الثقافي الفرنسي
Author: ريهان الريح الشاذلي
Date: 01-12-2008, 09:54 PM
Parent: #4
الاخت منال ..تحياتي وخالص الاحترام ...
شكرا كتير انو انتي فتحتي بوست حول موضوع مقلقني وشاغل ذهني وقاعدة اطرحه في كل ونسة ..
عارفة يا منال اشكالية المثقف الاساسية هو فهمه للحرية بصورة مختلة وده يجعلني اكاد اجزم بانو غالبية المثقفين السودانيين لم يستطيعو بعد فهم الدور الطليعي المناط بهم القيام به ، وبالتالي اعنقد انو اطلاق كلمة مثقف ومثقفاتية لاعلاقة لها بكلمة ثقافة وانما هو خطأ في تفسير معني الكلمة ودلالتها، وكلنا قرينا وبنعرف انو المثقف الحقيقي هو من يمتلك القدرة علي التأثير والتأثر بالحراك الاجتماعي من حوله وبالتالي لايستطيع ان ينأي بنفسه بعيدا عن المجتمع واشكالاته ولا ان يعيش بمعزل عن هذا المجتمع .
المثقفين السودانين(او كما يطلقون) وبعد ان طلعت الجبهة الاسلامية عينهم وحاصرت اماكن تجمعاتهم وجدو البراح في بعض المناطق ولكن للاسف لم يساعدهم هذا علي القيام بدورهم الوظيفي تجاه المجتمع ولم تزيد تلكم الاماكن من ثقافتهم وزيادة وعيهم بل اصبحت تلكم الاماكن هي مناطق يمارس فيها المنفصمون من شبابنا المثقف (مجازا) انفصامهم وهي اماكن للوجه الاخر الذي يخجلون جميعهم من مواجهة المجتمع به لخروجهم عن المالوف انا بتخيل انو هم عبارة عن مجموعة من الرافضة الذين يرفضون واقعهم الاجتماعي و الذي لم يسعو ولو بقيد انملة لتغييره للاحسن بل علي العكس لبسو حمي سموها وهم في حالة خلل فكري اللبرالية (واللبرالية منهم براء) .
لا اختلف يا منال ان من حق اي انسان ان يعيش حياته بالصورة التي يريدها طالما انه لم يتعدي علي حرية الاخرين ولكني ادرك تماما ان التغيير المجتمعي نحو الوعي الاكبر لا يتم خبت لزق وانما يتم بشكل تراكمي مدروس مع بعض التواطؤ وان ما يفعله غالبية المثقفين هؤلاء ما هو الا تمرد ورفض يؤدي لا محالة الي خلق فجوة عظيمة بينهم وبين مجتمع يحتاج لهم .
وساواصل ..
|
Post: #7
Title: Re: المركز الثقافي الالماني...المركز الثقافي الفرنسي
Author: ريهان الريح الشاذلي
Date: 01-12-2008, 09:54 PM
Parent: #6
| Quote: مكان للافتنان الجميل بين الاولاد والبنات...تمارس فيه لعبة الغنج الجميل من جميلات بلادي..والامال غير المسقوفة من الشباب.. |
معقولة بس...
| Quote: للمثقفاتية دور في اذكاء الروح الهائمة في المركزين ( لا يوجد احد في المركزين يعترف بأنه من المثقفاتيه مع ان جلهم اجمل وارق وانقى مثقفاتي فيه الدنيا) |
لو كانو كده يبقي نطمئن علي البلد ولكن للاسف بعد 51عاما من الاستقلال ولسة بنمارس الغنج ...
Quote: مكان لتداول اخبار الساسة والاحزاب ..وافضل انواع العرقي واخبار الكشات ...مكان تستطيع فيه بنات بلادي تخميس سيجارة مع الشباب دون الخوف من النظام العام
مكان ترمي فيه البنت طرحتها دون خوف من رجل شرطة |
ده بالظبط القاعد يحصل تترمي الطرح وتتخمس السجاير والناس يحكو عن الكشةوالطرمبة والممنوع المرغوب واشياءهم السرية .. والجميل انو لمن تتجاب سيرة الاحزاب والسياسة (المواضيع الاكثر موضوعية ) تظهر احباطات في الكلام وانتقادات ماجنة ...
الغريبة يا منال انو كل المحبطين البتكلمو ديل عمرهم في العمل السياسي اقصر من حبل الكذب... حتي كلمة احباط دي انا بتخيل انها ما في حتتها لاني( والله اعلم ) بفتكر انو الاحباط ناتج اخفاقات متراكمة يعني ببساطة بحتاج تجربة طويلة شوية ومليانة لكن للاسف المحبطين ديل جزء منهم جرب مرة واحبط والجزءالتاني سمع بتجربةواحباط الاول فأحبط؟؟؟
واييييييييييييق جنس كلام........
وحاوصل ان دعي الداعي..
|
Post: #8
Title: Re: المركز الثقافي الالماني...المركز الثقافي الفرنسي
Author: عمرو كمال ابراهيم
Date: 01-13-2008, 07:12 AM
Parent: #7
Quote: والجميل انو لمن تتجاب سيرة الاحزاب والسياسة (المواضيع الاكثر موضوعية ) تظهر احباطات في الكلام وانتقادات ماجنة ... [/QUOT
عرفتك قاصدة منو.... شيلى شيلتك
|
Post: #9
Title: Re: المركز الثقافي الالماني...المركز الثقافي الفرنسي
Author: ريهان الريح الشاذلي
Date: 01-13-2008, 08:57 AM
Parent: #8
| Quote: عرفتك قاصدة منو.... شيلى شيلتك |
سلامات ياعمرو ..
|
Post: #10
Title: Re: المركز الثقافي الالماني...المركز الثقافي الفرنسي
Author: عمرو كمال ابراهيم
Date: 01-13-2008, 09:08 AM
Parent: #9
سلامات يا فردة
عارفين... دايما المثقف بينزوى وقت التعثر والسقوط
بتكرار التجارب وتراكم الخبرة والمعرفة يصبح متفاعلا مع ذلك
طيب فى حالنا الراهن.. انا بعتبر التواجد والتواصل ده شكل من اشكل التفاعل الايجابى مع الواقع المرير فى ظل السقوط والتعثر العايشنو
بمعنى، تواصل الشباب ولو اختلفنا على الزمان او المكان او الطريقة، هى حالة ايجابية فى ظل الافراط اللا متناهى لكل معايير ومقاييس الحياة والمجتمع الذى نفترضه
فهل يقبل هؤلاء السقوط.. ام يرتضون مقاومته بذلك؟؟؟
...................
|
Post: #11
Title: Re: المركز الثقافي الالماني...المركز الثقافي الفرنسي
Author: fadlabi
Date: 01-13-2008, 09:11 AM
Parent: #1
الأخت ريهان
هنالك فرق كبير بين المثقف العضوي و هو من تفضلت بتعريف دوره في الحراك الإجتماعي و غير ذلك و هؤلاء هم من كنا نسميهم بالمثقفاتية. و رغم أن التقسيم ليس بهذه الحدة فبداخل كل منا مثقف و مثقفاتي يطفو احدهم أحيانا و يغلب الآخر.. إلا أنها كانت حيلة لتشجيع الثقافة المفيدة و رفض الخاملة.
أعتبر نفسي من مواطني الألماني و الفرنسي قبل خروجي من السودان .. و حديثك عن الإنفصام جانب الصواب .. فالفرق بين حب الحرية و الإنفصام أو الإستلاب كبير. فقد قابلت في الجامعات و في بيوت الناس منفصمين أكثر مما قابلت في الألماني و الفرنسي.. و الحب الذي كان أحداثه تدور في الكافتريا لم يكن مشاريع لممارسة الجنس في زقاق. عندي من الأصدقاء ممن لا زلت على إتصال بهم الآن على الأقل عشرة إنتهت علاقاتهم هناك بزواج سعيد و أثمرت أطفال جميلين. سيدات محترمات كنت ألاقيهم هناك كن يدخن و لم يكن بمقدورنا حتى ملاحظة ذلك.. أليس هذا هو الطبيعي? أنا لا أذكر بالضبط من من أصدقائي الذكور كان يدخن .. و لم أظن عند رؤيتهم يدخنون أنني ربطت تدخينهم بممارسة العهر الرجالي! فلماذا دائما نخلط الأوراق?
أعلم عن التدخين مضاره و لست أدافع عنه هنا و إنما عن حق الناس رجال و نسوان في الإختيار و الحب .. يا ريهان ما أجمل أن تمسك يد من تحب و تهمس لها قصيدة درويش الأخيرة في أذنها ثم تتزوجها و تصنع معها الأحلام .. هذا رأيته بأم عيني يحدث هناك. و حملت بيدي هاتين أطفال من رأيتهم يتقاسمون اللفافة و الأفكار في الفرنسي.
أكيد كباقي السودان هناك الصالح و الطالح .. و لكن أن توصف هذه المراكز بأماكن ممارسة الإنفصام فهذا كذب. رأيت مشاريع ثقافية و كتب و فرق موسيقية و مسرحية تم التخطيط لها هناك. ورش عمل مع فنانين كبار ماتوا و لم يسمع عنهم أحد .. هناك.
شكرا للفرنسي و الألماني و البريطاني .. فقد كانوا و لا زالوا رئة الأحلام.
|
Post: #12
Title: Re: المركز الثقافي الالماني...المركز الثقافي الفرنسي
Author: عمرو كمال ابراهيم
Date: 01-13-2008, 09:42 AM
Parent: #11
| Quote: شكرا للفرنسي و الألماني و البريطاني .. فقد كانوا و لا زالوا رئة الأحلام. |
|
Post: #13
Title: Re: المركز الثقافي الالماني...المركز الثقافي الفرنسي
Author: ريهان الريح الشاذلي
Date: 01-13-2008, 09:50 AM
Parent: #11
الاخ الفاضلابي سلامات
انا مثلك من مرتادي المراكز الثقافية واعلم تماما المشاريع الثقافية التي تدار من هنالك ولكن يا فاضلابي القصة ما قصة انو في اي مكان في الصالح والطالح القصة قصة انو وجود هذا الكم من المثقفين والمثقفاتية في مكان واحد بيخلي الزول متفائل بالناتج لكن للاسف الناتج ما قدر اللمة والتجمعات.
والحاجة الاشد مرارة انو مراكز تجمعات المثقفين تبقي طاردة ويتم تدميرها وتجميد فعالياتها بسبب ممارسات المثقفين ديل زاتهم يعني في الوقت البنتمني انو نقدر نستقطب ليها وننتشل عبرها اكبر كم من الشباب ونحاول نطلعهم من جحر الذاتي لفسحة الموضوعي وفي الوقت البنتمني انو يخرج لينا منها شباب معافي عندو القدرة علي رفع درجة الوعي لمواطنين بسطاء بيطلع لينا شباب منبوذين وافتكر انك قادر تتخيل وضع زول منبوذ بينادي بتغيير اجتماعي .
فكرة الانفصام دي ببساطة بتعني انو الكم الموجود داخل الحتتات دي اغلبيتهم زائفين .
| Quote: سيدات محترمات كنت ألاقيهم هناك كن يدخن و لم يكن بمقدورنا حتى ملاحظة ذلك.. أليس هذا هو الطبيعي? أنا لا أذكر بالضبط من من أصدقائي الذكور كان يدخن .. و لم أظن عند رؤيتهم يدخنون أنني ربطت تدخينهم بممارسة العهر الرجالي! فلماذا دائما نخلط الأوراق? |
لم اربط يوما ممارسة التدخين بالعهر سواء من الرجال او النساء ولكني دوما في توق لاصطياد امراءة تعي حقوقها وبتخيل انو ببساطة لو جاء وفد من مدينة بارا ودخلو اجتماع في الالماني وشاهدو نساء بيدخنو ورجال بيتونسو عن سكرة امبارح وشاب وشابة منزويين في الضلام في ركن قصي وبعد شهرين قامو الشباب بحملة لمكافحة ختان الاناث وتوجهو لي بارا فهل سيكون هنالك من مجيب ؟؟
يعني بساطة الامنيات باختراق حاجز الممنوع راحت في السراب ..
|
Post: #14
Title: Re: المركز الثقافي الالماني...المركز الثقافي الفرنسي
Author: ريهان الريح الشاذلي
Date: 01-13-2008, 10:00 AM
Parent: #13
| Quote: فهل يقبل هؤلاء السقوط.. ام يرتضون مقاومته بذلك؟؟؟ |
مافي اشكال الناس تتلم وتحب وتتونس وتهظر لكن تحافظ برضو علي مظهرها الاجتماعي عشان ما تكون منبوذة وتحافظ علي المتاح و استمرارية تلك المراكز ....
|
Post: #15
Title: Re: المركز الثقافي الالماني...المركز الثقافي الفرنسي
Author: عمرو كمال ابراهيم
Date: 01-13-2008, 10:11 AM
Parent: #14
لا اختلف معك...
مع ملااعاة ، أن لكل مكان زمان خاص به.. تخلق حالة مختلفة عما سواه من أمكنة
.. ما ياهو كده
فاضلابى سلامات... متذكر معرضك الكان فى الأمانى 1997 أو 98
و.... خلاص كفاية كده،، حسه لو كان فى ماسنجر كان رسلت ليك الباقى
لووووووووووول
|
Post: #16
Title: Re: المركز الثقافي الالماني...المركز الثقافي الفرنسي
Author: أحمد أمين
Date: 01-13-2008, 10:50 AM
Parent: #14
| Quote: عشان ما تكون منبوذة |
من منو؟ ياريهان
|
Post: #17
Title: Re: المركز الثقافي الالماني...المركز الثقافي الفرنسي
Author: عمرو كمال ابراهيم
Date: 01-13-2008, 11:07 AM
Parent: #16
احمد امين....
سلامات
|
Post: #18
Title: Re: المركز الثقافي الالماني...المركز الثقافي الفرنسي
Author: emad altaib
Date: 01-13-2008, 11:18 AM
Parent: #1
|
Post: #19
Title: Re: المركز الثقافي الالماني...المركز الثقافي الفرنسي
Author: emad altaib
Date: 01-13-2008, 11:19 AM
Parent: #1
Quote: مكان تستطيع فيه بنات بلادي تخميس سيجارة مع الشباب دون الخوف من النظام العام
|
العزيزه منال
لمن الواحد يجيء للمركز الثقافي الفرنسي في السنه سبعه مرات . ويصادف حبيبته مخمسه كرسي مع واحد تاني الحدث ده حقيقي لواحد صديقي وحتي البنت زميله لي وبدون ذكر اسماء السؤال ده ياتو نوع من الثقافه وياتو من السياسه ؟؟؟
ولك كل الود
|
Post: #20
Title: Re: المركز الثقافي الالماني...المركز الثقافي الفرنسي
Author: ريهان الريح الشاذلي
Date: 01-13-2008, 12:19 PM
Parent: #19
سلامات احمد امين
منبوذين من المجتمع السوداني الذي يعمل غالبيتهم في مجالاته المدنية .
| Quote: السؤال ده ياتو نوع من الثقافه وياتو من السياسه ؟؟؟ |
|
Post: #21
Title: Re: المركز الثقافي الالماني...المركز الثقافي الفرنسي
Author: محمد فرح
Date: 01-13-2008, 12:29 PM
Parent: #20
Quote: مكان لتداول اخبار الساسة والاحزاب ..وافضل انواع العرقي واخبار الكشات ...مكان تستطيع فيه بنات بلادي تخميس سيجارة مع الشباب دون الخوف من النظام العام
مكان ترمي فيه البنت طرحتها دون خوف من رجل شرطة |
شكراً ياأخت منال لهذه المعلومات الجيده التي ستفيد كثيرين سوف لن يقبلوا إطلاقاً ان تذهب (حرائرهم) بعد اليوم لمثل هذه المراكز .
|
Post: #22
Title: Re: المركز الثقافي الالماني...المركز الثقافي الفرنسي
Author: أحمد أمين
Date: 01-13-2008, 12:32 PM
Parent: #21
المجتمع؟
السودانى؟
اشرحى شويه ياتو مجتمع وياتو سودانى عشان نفهم؟
|
Post: #23
Title: Re: المركز الثقافي الالماني...المركز الثقافي الفرنسي
Author: ريهان الريح الشاذلي
Date: 01-13-2008, 12:36 PM
Parent: #21
| Quote: شكراً ياأخت منال لهذه المعلومات الجيده التي ستفيد كثيرين سوف لن يقبلوا إطلاقاً ان تذهب (حرائرهم) بعد اليوم لمثل هذه المراكز . |
حرائرهم ؟؟؟
بالمناسبة يا زول السجارة دي لو الواحدة عاوزة تشربها ماالا تشربها في المراكز الثقافية وما اكثر دورات المياه في بلدي...
|
Post: #25
Title: Re: المركز الثقافي الالماني...المركز الثقافي الفرنسي
Author: محمد أحمد محمود
Date: 01-13-2008, 12:53 PM
Parent: #23
استاذه منال ياخ ان كان ثمة دور للمراكز الثقافيه في زمن العولمه ام قطب واحد دي فهو تعليم اللغه بكل فروعهاودي قرايه امدق كما تعلمي اما ماتفضلت بيهو ده فلم اجد له محل من الاعراب يعني القصه (تكيل)وقعاد ضلله وكده فهمونا؟؟!!! ولا خانك التعبير ولاشنو ؟؟ والله يامنال لو سمعتي كلام الببكيك فكلامك ده بأمتياز يستحق قول اهلنا زي طق العصا في الركب
اما هذه
| Quote: شكراً لوجود الخواجات في بلادنا ..فتحت حمايتهم وكافتريات مراكزهم وجدنا بعض متنفس لنا ... |
فثالثة الاثافي ...
المهم يازوله الناس ترخي جسمها تخلي البنسلين يمشي كدي اعيدي البصر كرتين بس.
|
Post: #26
Title: Re: المركز الثقافي الالماني...المركز الثقافي الفرنسي
Author: محمد فرح
Date: 01-13-2008, 12:56 PM
Parent: #23
| Quote: بالمناسبة يا زول السجارة دي لو الواحدة عاوزة تشربها ماالا تشربها في المراكز الثقافية وما اكثر دورات المياه في بلدي... |
بالرغم من بشاعة فكرة أن تدخن فتاه فربما يكون مقبولاً أن تدخن فتاه في خلوه ولكن الغير مقبول إطلاقاً ان (تخمس) فتاه سيجاره من صديقها .
بت زي دي ممكن تتوقعي منها أي حاجه
وثقي تماماً إنو صديقها اللي خمس ليها السيجاره ده حتى لو كان عامل فيها (تقدمي) فهو لن يقبل إطلاقاً أن يتزوج فتاه خمست معه في سيجاره واحده .
|
Post: #24
Title: Re: المركز الثقافي الالماني...المركز الثقافي الفرنسي
Author: emad altaib
Date: 01-13-2008, 12:40 PM
Parent: #20
الاخت ريهان الريح
لك كل الود
الاحباط ناتج من احباط قيم المجتمع الجميله بكل معانيها ومضموناتها عندنا ينحرف معيار الانحطاط للمفاهيم العامه والشخيصة...ولا احب ان يكون عليها رقيب او امنجي وهذا بدايه تعريج الانحراف ..بل يكون عقلنا الجمعي يحفظ علي الذاكره نقاءها... صديقي هذا الذي اتحدث عنه اصر علي لازم اليوم نمشيء المركز الفرنسي وكان اول يوم ووعدته بعد صلاة المغرب نمشي رفض قبل الصلاه ونصلي في المركز .. ونحن علي منعطف الطريق لاحظ هو انو البنتين والولدين متشابكي الايدي واحده منهم حبيبته وقد صدق وحاول اقناعي بالرجوع رفضت منه الاقتراح .. برر لي انو ما عاوز يدخلها في حرج وهي كمان حره ماان توضانا وصلينا وتوجهنا الي قاعة السينما في الطابق العلوي وتفاجاء بتخميسه في الكرسي بالرغم من وجود كراسي متوفره وجاء سؤالي
السؤال ده ياتو نوع من الثقافه وياتو نوع من السياسه ؟؟؟
ولك كل الود الاخت ريهان
|
Post: #27
Title: Re: المركز الثقافي الالماني...المركز الثقافي الفرنسي
Author: نجوان
Date: 01-13-2008, 01:01 PM
Parent: #24
| Quote: مكان تستطيع فيه بنات بلادي تخميس سيجارة مع الشباب |
يا عظمتك يا السجائر في بلدي!
يعني التدخين شئ مرتبط بالثقافة .. الحرية وانتزاع الحقوق!
لا وكمان تخميستها..
زيادة الطين بلة .. بباكتيريا وجراثيم من الزميل..
______
مالبورو .. طريقك المضمون لسرطان الرئة
وامراض القلب والشرايين..
_____
معليش أخت منال..
احنا متأخرين.. أقل شئ كدة مية سنة في بعض المفاهيم..
|
Post: #29
Title: Re: المركز الثقافي الالماني...المركز الثقافي الفرنسي
Author: منتصر ابراهيم الزين
Date: 01-13-2008, 01:04 PM
Parent: #24
اتمنى ان اوفق فى حصر مداخلتى فى نقاط تجيب على موضوع (المثاقفة )المطروح
واضح انوالموضوع جميل ينضح بود وعشم ذكرى جميلة حميمة ,كما العديد شركاء المراكز دى
لديهم ملاحظات ومفاهيم حولها وبادعاء القشرة احيانا و(المفارقة )تقع المصيبة
اوالاختلاف .يعنى بهدؤكدة تعالو نجاوب على من هو المثقف ؟
بعيدا عن التعريف الصارم لمفهوم المثقف .فقط بقياس مستوى التفاعل مع قضايا(الثقافة )
وموضوعة تبنى الموقف كمثقف ...
| Quote: مكان لتداول اخبار الساسة والاحزاب ..وافضل انواع العرقي واخبار الكشات ...مكان تستطيع فيه بنات بلادي تخميس سيجارة مع الشباب |
فقط دى الملاحظة وقمة موقف المثقف المعروف انو يكون (شفت ومقطعها)
|
Post: #28
Title: Re: المركز الثقافي الالماني...المركز الثقافي الفرنسي
Author: fadlabi
Date: 01-13-2008, 01:03 PM
Parent: #1
| Quote: وثقي تماماً إنو صديقها اللي خمس ليها السيجاره ده حتى لو كان عامل فيها (تقدمي) فهو لن يقبل إطلاقاً أن يتزوج فتاه خمست معه في سيجاره واحده . |
كضبا كاضب!
عندي صديق كان يخمس السجارة مع صديقته في الفرنسي الآن عندهم بنت و ولد .. و يعيشان في وئام و نجاح منقطع النظير
القصة ما في الفرنسي ولا في السجارة القصة في الفرق بين الواعي و محترم و الما واعي ولا محترم.
|
Post: #31
Title: Re: المركز الثقافي الالماني...المركز الثقافي الفرنسي
Author: محمد فرح
Date: 01-13-2008, 01:33 PM
Parent: #28
| Quote: القصة ما في الفرنسي ولا في السجارة القصة في الفرق بين الواعي و محترم و الما واعي ولا محترم. |
إن شاءالله يقدروا يربو الأولاد كويس بس
بس حتة الواعي ومحترم دي مافهمتك قاصد بيها شنو
الغريب إنو بعض الحمقى مفتكرين إنو الـ(صعلقة) وقلة الأدب هي الثقافه ووعي .
ودي وبدون خجله تجي تشكر هذه المراكز فقط لأنها تستطيع أن تخلع طرحتها بداخل المركز وتخمس السيجاره وترتشف العرقي مع أصدقائها .
كان كده نحمد الله إنو المجتمع السوداني لسه ماإتثقف .
|
Post: #36
Title: Re: المركز الثقافي الالماني...المركز الثقافي الفرنسي
Author: fadlabi
Date: 01-13-2008, 03:22 PM
Parent: #31
في زول بسجر عشان عاوز يسجر و عارف مضارو و ده خياره
و في زول بسجر عشان يثبت إنه صعلوق
و في زول بسجر عشان صاحبو بسجر
و في زول بسجر و يدخلك في ضفورك من شدة أدبه و كرمه و حسن أخلاقه
و في زول ما بسجر لكن أخلاقه زي الطين
بين ديل كلهم بتلقى قصدي في الفرق بين الواعي و محترم و ما واعي ولا محترم
|
Post: #32
Title: Re: المركز الثقافي الالماني...المركز الثقافي الفرنسي
Author: ريهان الريح الشاذلي
Date: 01-13-2008, 01:39 PM
Parent: #28
احمد الامين سلامات تاني
ممكن ارد علي اسئلتك بانو المجتمع هو عبارة عن مجموعة من الافراد تعيش معا ويربط بينها علاقات ثقافية و.....الخ التعريف وبرضو ممكن اجاوبك انو السوداني هو عبارة عن صفة لكلمة مجتمع دلالتها في الجملة تمييز المجتمع بانه مجتمع الدولة السودانية الخ...
ويكون ردي شافي كافي ...
لكن ما حارد عليك كده ...
حاقول ليك اني بعني مجتمع سوداني يحمل العديد من القيم والعادات التي سادت ثم بادت ولا زال يحملها ويحاكم بها سلوك افراده يعني ببساطة مجتمع شين ولازم تغييره مجتمع ينظر للمرأة من وجهة نظر حرائرية ومجتمع افراده يمارسون كافة اشكال التمييز من عرقي وديني ...
طيب..بعداك التغيير زي ما قلت لا يهطل فجاءة ولكن هو تغيير تراكمي يعني رواد التغيير ديل لازم يكونو مقبولين عشان التغيير يؤتي اكله ما كفاية انهم يكونو متعلمين وقارين كم كتاب المهم انهم يكونو واعين بانو العملية دي صعبة لانها بتغير في الادراك والسلوك .
انا مابحاكم ناس علي سلوكهم وما كان ينبغي لي ، لكن بحاكمهم علي انو باستطاعتهم القيام بالفعل الايجابي تجاه المجتمع السوداني
|
Post: #33
Title: Re: المركز الثقافي الالماني...المركز الثقافي الفرنسي
Author: منتصر ابراهيم الزين
Date: 01-13-2008, 01:43 PM
Parent: #28
الموضوع طويل ودربو صعب عشان نتفق وماينحرف موضوع البوست ,تعالو نتناقش حول القيمة
القاعد يضيفها المثقف بشكلو المعروف فى المركزين .قد نكون فى حاجة الى تلمس ابعاد مساهمتو
وتفاعلو الحقيقى بعيدا عن تلبس(الشخصية القرةليهااو قراها فى رواية)اوالحاجة لان يكون مثقف
من اجل اشياءبسيطةفقط الرفض فالرفض .
المواقف دى اشبه تماما بموقف المنظم سياسيا فى احزاب الخرطوم او احزاب المركزاوممارسة السياسة بافق الخرطوم وهى ذاكرة ووعى المعروف اختزالا بالمثقف السودانى والكاتب السودانى والزعيم السودانى .مااثق به تماما هو غياب الامانة فى حالة عدم التصالح والتمزق السائدفى وجدان المقهور
طالما سعى الى تبنى مواقف وسلوكيات هى بعيدة عن تكون من موقف حرية او اختيار عن رضى وهى موقف مثقف ومثقفة الجامعات السودانية والمراكز الثقافية .
هاكم حكاية المثقفة السكرانة فى جامعة الخرطوم ........
واخرى فى( اتنى )لومشيت من دربك دة بتلقاها
|
Post: #30
Title: Re: المركز الثقافي الالماني...المركز الثقافي الفرنسي
Author: ملكة سبأ
Date: 01-13-2008, 01:23 PM
Parent: #1
| Quote: ولا خانك التعبير ولاشنو ؟؟ |
انا برضو قل كدا
|
Post: #34
Title: Re: المركز الثقافي الالماني...المركز الثقافي الفرنسي
Author: أحمد أمين
Date: 01-13-2008, 02:52 PM
Parent: #30
ريهان،
فكما نحن فى السودان لنا ثقافات مختلفة واديان مختلفة، فالبضرورة لنا قييم ومعايير اخلاقية مختلفة، فمحاولة تلبيس مفهوم اخلاقى (بتاع *السمسار) على انها الاخلاق السودانية فهذا لايقبله احد.
محاولة ترسيم حدود السودانيين (جغرافيا) بمعايير اخلاقية قننت لها وفرضتها بالقوة ( اقلية سياسية واجتماعية وفكرية، وثقافية لا توجد لديها شرعية سياسية (مافى زول أنتخبهم) وفرضت نفسها على كل الشعب السودانى بمختلف معايرهم الاخلاقية بالقوة- ممثلة فى العصابة الحاكمة) أمر لا يقبله منطق وتجافيه حقائق الاشياء.
ام فيما يخص اللامبالة السياسية(رغم انه امر غير مقبول) فهذا أمر طبيعى يحدث فى كل المجتمعات التى بها أنظمة شمولية، ويمكن هذا يفسر إنزواء المبدعين (المثقفين) داخل السودان وإيثارهم الإبتعاد عن كل ما قد يضعهم فى مواجهة مع المجتمع الشمولى أو السلطة القمعية. فهذه هجره داخلية تماثل هجرة الملايين الخارجية.
و لو تمرد شباب على أمر مفروض بالقوة، فهى فى تقديرى حالة من حالات العصيان المدنى وتحدى للسلطة التى لا تملك شرعية سوى فوهة البندقية.
-----------------------------------------
*
أخلاق السمسار:
(الكذب، دفن الرأس فى الرمال، عدم الالتزام بالمواعيد، التضخيم، المكابرة، الخداع، بيع الذمم، الواسطة، المحاباة، الثراء الحرام، الاستثناء من القانون، الاحتيال، النصب، المتاجرة فى حياة ورزق الناس). هذه الافة الاجتماعية هى التى تسطير على المشهد الاخلاقى الاجتماعى فى شمال السودان.
السمسار له منابره وتمثلها جريدة الدار، وحكايات والخ من الصحف الصفراء التى تنتج فى الخرطوم لملاحقة (تصرفات الناس الخاصه جدا- ده سكران، ده بدخن، بنت و ولد........الخ) حتى يلهى الناس عن تلوثه الاخلاقى الذى اضر بالجميع وافقر الملايين.
دينه: الدجل والشعوذة.
|
Post: #35
Title: Re: المركز الثقافي الالماني...المركز الثقافي الفرنسي
Author: اينانا
Date: 01-13-2008, 03:02 PM
Parent: #1
العزيزة ريهام و الفاضلابي:
انا ماشايفة في بعد في الرأي بينكم في انو ضعف دور المثقف في بلادي و انغلاقه في بيئات المراكز الثقافية.. لكن دا ما بيقلل من إحترامنا ليهو كفرد حاول يوم يقدم للبلد و احبط و لقي كافتيريا ممكن ينفس فيها بعض مما يؤمن به..
يعني بي بساطة التثقيف ما مرتبط بي انك بتخمس السجاير مع بت وللا لأ.. أو العكس اذا كنتي بت..
بيجي بعد دا دور المركز الثقافي في التثقيف و دور المتلقين.. بتلقي بعض الناس بيجوا المراكز زي ما قالت الاخت منال للمناقشة في الاوضاع المختلفة بدأ من أشهر غناية هي منو لحدي الاوضاع الاقتصادية المتأزمة للبلد وما بننسي دور البرامج الثقافية البتقيمها المراكز الثقافية البتلقي اول الحضور فيها الناس الاتكلمت عنهم.. وزي ما قال الفاضلابي أي وسط فيه الصالح و الطالح.. في مجموعة بتستفيد من المراكز الثقافية والحرية و التفهم المتاح فيها لحاجات اذا ناقشتهم فيها ما حيعرفوا يردوا ليك انو هم بيعملوا كدا ليه..
انا معاكي في انو مفروض دور الشباب السوداني مفروض يكون أقوي من كدا.. و المثقفين بالتحديد منتظرين منهم دور اكبر.. و زي ما قال فاضلابي ياما انجبت الاماكن نجاحات اذا كان علي مستويات ثقافية او اجتماعية او فنية.. يبقي كالعادة انو كيف تقدر تستفيد من الايجابيات للمراكز الثقافية و تقلص من عيوبها بإفتراض الوعي الموجود عندنا و عند المثقفين..
إيمان خليفة..
|
Post: #40
Title: Re: المركز الثقافي الالماني...المركز الثقافي الفرنسي
Author: fadlabi
Date: 01-13-2008, 04:33 PM
Parent: #35
إيمان خليفة..
شكرا على تقريب وجهات النظر
|
Post: #37
Title: Re: المركز الثقافي الالماني...المركز الثقافي الفرنسي
Author: شرف الدين آدم إسماعيل
Date: 01-13-2008, 03:51 PM
Parent: #1
الاستاذة/ منال
تحية طيبة
دور المراكز الثقافية معروف ومعلوم للجميع يقصد من خلاله الترويج ونشر تقافة الدولة المعنية سواء كانت فرنسا او المانيا او غيرهما وان كان الفرنسيون والالمان يهدفون للترويج للغاتهم رغم انهم غير محتاجين لكن المفيد هو عمل واجهة للوصول للاخر من خلال المثقف.
وقيس على ذلك , درست اللغة الفرنسية وكذلك اشقائي المهم في الفترة الزمنية التي كنت ادرس فيها من عام 1994 -2000 كان الرواد في المركز الثقافي الفرنسي من الجنسين ومن مختلف الاعمار والمجالات العملية والجنسيات الافريقية والاوربية وكان الاحترام والمتبادل هو السمة السائدة وكان بالمنسبة مكان للصلاة للمصلين رغم ضيق المساحة
المهم انو كان المركز معني بالثقافة ويشارك به فنانين من السودان ومن الخارج والعملية كانت ثقافية بصورة واضحة
كون هنالك سلوكيات تبدر من البعض فهذا مردود الى من يسلك ذلكم السلوك لكن المركز الثقافي الفرنسي هو في الاول والاخير لا يحجر علي سلوكيات الناس وذلك وفق منظوره الخاص .
|
Post: #38
Title: Re: المركز الثقافي الالماني...المركز الثقافي الفرنسي
Author: Deng
Date: 01-13-2008, 04:24 PM
Parent: #1
الاخت منال.
أنا لم أكن من مرتادي المركز الثقافي الفرنسي أو معهد جوته من قبل، ولكن في زيارتي الاخيرة للسودان أتيحت لي الفرصة للذهاب الى معهد جوته كثيرا وتعرفت به على مجموعة من الاخوة والاخوات الرائعين فعلا. وطبعا مع وجود نظام متسلط مثل نظام الانقاذ فمن الطبيعي أن تقل أو تنعدم مثل هذا المراكز الهامة في السودان. شكرا لكي كثيرا يا منال. وبالمناسبة كنت أتمنى أن أقابلك في السودان ولكن يبدوا لي بأنك لم تكوني موجودة في الخرطوم في تلك الفترة.
دينق.
|
Post: #39
Title: Re: المركز الثقافي الالماني...المركز الثقافي الفرنسي
Author: fadlabi
Date: 01-13-2008, 04:30 PM
Parent: #1
Quote: وقيس على ذلك , درست اللغة الفرنسية وكذلك اشقائي المهم في الفترة الزمنية التي كنت ادرس فيها من عام 1994 -2000 كان الرواد في المركز الثقافي الفرنسي من الجنسين ومن مختلف الاعمار والمجالات العملية والجنسيات الافريقية والاوربية وكان الاحترام والمتبادل هو السمة السائدة وكان بالمنسبة مكان للصلاة للمصلين رغم ضيق المساحة
المهم انو كان المركز معني بالثقافة ويشارك به فنانين من السودان ومن الخارج والعملية كانت ثقافية بصورة واضحة
كون هنالك سلوكيات تبدر من البعض فهذا مردود الى من يسلك ذلكم السلوك لكن المركز الثقافي الفرنسي هو في الاول والاخير لا يحجر علي سلوكيات الناس وذلك وفق منظوره الخاص . |
لا فض فوك يا شرف
في هذه المراكز قرأت الشعر مع أصدقاء هم أعلام الشعر في السودان الآن ...
نجلاء التوم و بهنس و عفيفي و عزف و غنى معنا السودانيون و ماجيك ميوزك باند هناك شاركت في ورش عمل مع فنانين بقامة عمر خيري و زار معارضي فنانين بقامة شبرين و ألتقيت أصدقاء لا زلت أشد إليهم الرحال في غربتي هذه .. هناك التقيت بشوف و الجمام و صادقت الصافي مهدي و ببو و غاندي و منعم شو و محمد عركي و محمود..
|
Post: #41
Title: Re: المركز الثقافي الالماني...المركز الثقافي الفرنسي
Author: رأفت ميلاد
Date: 01-13-2008, 05:12 PM
Parent: #39
منال محمد على مشت وييين
هل ده المقصود من البوست .. ولا غياب بالصدفة ؟؟؟!!
تعرفى يا منال على زمانا .. المراكز دى كانت محدودة على فئتين من لناس ..
أولهم شباب طالب "بريستيدج" إجتماعى .. رايح المكتبة جايى من "الهول"
وكان أشهرهم "البريتش كاونسل"
الفئة التانية كانت الفئة "المتخوجنة" أو الفعلآ خليط "خواجات" بالزواج
أما نحن كان عندنا منافز تانية .. وما أكثرها لم تلهينا من دراسة الأدب الإنجليزى والإنفتاخ على العالم .. وما أكثر النوادى ..
مهما كانت مقاصدك يا منال .. مبطنة بالإنتقاد أو المدح ..
أعتقد إنهما المنفز الوحيد للشباب الآن .. من هذا الكبت ومصادرة حتى الأحلام
تحياتى
|
Post: #43
Title: Re: المركز الثقافي الالماني...المركز الثقافي الفرنسي
Author: عمرو كمال ابراهيم
Date: 01-13-2008, 05:53 PM
Parent: #41
Quote: أعتقد إنهما المنفز الوحيد للشباب الآن .. من هذا الكبت ومصادرة حتى الأحلام
|
بل هى الطريق الذى حفظ لنا فى سنوات الظلمة إرثا من الإبداع لربما ذهب ادراج الرياح لولا لطف السماء
ونتاجه ظهر فى الزمن الحالى ومقدموه يتقدمون الصفوف بثبات حاملين ذخيرتهم المعرفية
|
Post: #42
Title: Re: المركز الثقافي الالماني...المركز الثقافي الفرنسي
Author: عمرو كمال ابراهيم
Date: 01-13-2008, 05:39 PM
Parent: #39
Quote: فاضلابى سلامات... متذكر معرضك الكان فى الأمانى 1997 أو 98
|
يعنى زى فاضلابى وغيره من الفنانين
وقبل عشرة حداشر سنة
والمشروع الحضارى والجوطة وزحمة الراٍس دى... كان ممكن يحتوى الناس ديل ويسلعدهم منو غير المراكز الثقافية؟
وكان ممكن وين للمتلقى يتابع ويتعرف على هذه العوالم غير هناك؟؟
وكان ممكن وين نحضر حفلات الفنانين السودانين والتبادل الثقافى فى ذلك الوقت المظلمغير تلك المراكز؟؟
يعنىباختصار.. ده عالم زى غيره من العوالم الاخرى بخيره وشره
طيبه وخبيثه
سوء وحسن المسلك
وهى خيارات للجميع ظالما يقبل كل الآخر
|
Post: #44
Title: Re: المركز الثقافي الالماني...المركز الثقافي الفرنسي
Author: Manal Mohamed Ali
Date: 01-13-2008, 07:55 PM
Parent: #42
سادتي..سيداتي
شكراً على المداخلة والتعليق..
نمرة واحد: اعتذر منكم جميعاً فليس لي كثيراً في المثاقفة ودور المثقف فلم ادعي يوماً باني مثقفه وليس لي اسهامات نظرية تساعدني في هذا الصدد عشان كده ما حا اقدر ارد عليكم في شان المثقف السوداني ....لكن عاوزه اقول انني بالمراكز الثقافية قابلت اجمل وانقى واحسن ناس انا عرفتهم في بلادي ..مزيج جميل بنات واولاد ..واحبهم جداً ومنهم واليهم انتمي ....
الكلام بتاع انعزال المثقف والرؤية النرجسية المتقوقعة والبعد المتجاوز للواقع ..والفاشية والبرغماتيه ..انا ما عندي الفصاحة دي كلها ..لكن عاوزه اقول انه في ابداعات جميلة في المراكز الثقافية ولو صبرتوا على كنت حا ابدأ احكي عنها لكن ..ردمتوني بالكلام الكبار ده
البوست ده فتحته لخواطر واشياء انا اراها جميلة وحقيقية وبريئة وواقعية تحدث في بلادي واردت ان اسردها هنا ..واحن اليها فهي من ذاك الواقع ...
خلوني احكي براحتى عن حاجات سمحه في بلادي ..قبل موجة التكفير والتطهير ..والكتابات البعيده عن واقعنا ....
كلام نسوان ..(بت الشاذلي ريهام الرفيعة ....موضوع الغنج ده انا ما شايفه انه كعب...انها لعبة حواء الفطرية الازلية ..وصدقيني هي لا تنقص من مكانة المراة الاجتماعية ...ولا تحسب على الحركة النسوية )..محبتي لك
صعبتوها علي يا شباب ..خايفة احكي ليكم عن حزب النساء في المركز الفرنسي ...تقلبوها ثقافة تاني
عشان كده حا احكي ليكم/ن عن الحزن في بلادي
مودتي
منال
|
Post: #45
Title: Re: المركز الثقافي الالماني...المركز الثقافي الفرنسي
Author: emad altaib
Date: 01-13-2008, 08:09 PM
Parent: #1
العزيزه منال
ياسيدتي احكي واسردي كل ما يحلو لك من افراحك في المراكز ... وحزن بلادي... وسامحينا اذامداخلتنا كنتي بتشوفيها غلط
وكلنا اذان صاغيه ... يلا احكي
ولك كل الود والعتبي لك حتي ترضي
|
Post: #46
Title: Re: المركز الثقافي الالماني...المركز الثقافي الفرنسي
Author: ريهان الريح الشاذلي
Date: 01-13-2008, 08:57 PM
Parent: #45
| Quote: خلوني احكي براحتى عن حاجات سمحه في بلادي ..قبل موجة التكفير والتطهير ..والكتابات البعيده عن واقعنا .... |
سلامات منال .. اعتذر لكي عن طول المداخلات لكن زي ما قلت في البداية دي نقة كبيرة في راسي مؤرقاني وبالمناسبة برضو مدهشاني (انا بالضبط كده مندهشة) وللاسف بحشرها اينما حللت ..
لكي الود وواصلي ..
لكن ما اوعدك اني حاتوقف عن النظر لنصف الكوب الفارغ ..
|
Post: #47
Title: Re: المركز الثقافي الالماني...المركز الثقافي الفرنسي
Author: AMNA MUKHTAR
Date: 01-13-2008, 09:51 PM
Parent: #1
والله يا منال مشاء الله..
بوستك جاب زباين حلوين..
واصلى وأحكى..كلنا آذان صاغية..
يا جماعة أنا منال دى بعد ما عرفته هى منو..
بقول ليكم انها أبعد ما يكون عن النوع السلبى.
العزيزة ريهان..أنا غايتو حاسة ( بالضبط) سبب ثورتك دى على ( المثقفين الجدد) ..حيث اننى كثيرا ما واجهت فى السودان
ومن قبل مرتادى هذه المراكز بالذات من المثقفاتية أو ( أدعياء الثقافة) كسير مقاديف لا ليهو أول ولا آخر..
فالبعض منهم ( يمجد) السلبية ..والبعض يظن أن دور المثقف ينحصر فقط فى القشور..مثل التنافس فى القشرة بالمصطلحات
وحمل الحقائب المليانة كتب والتجول بها..وبريم الشعر..والقذارة فى المظهر والملبس ..والجكيس ..ألخ
و منهم من يعتقد ان دور المثقف ماهو الا دور تمثيلى ..وما عليهم الا أتقان أداء هذا الدور...فقط لاغير..
أحيييييييييا..
|
Post: #49
Title: Re: المركز الثقافي الالماني...المركز الثقافي الفرنسي
Author: AMNA MUKHTAR
Date: 01-13-2008, 11:03 PM
Parent: #1
| Quote: أطالب شرطة أمن المجتمع بضبط مراكز الثقافة (الألماني والفرنسي) |
لا حول ولا قوة الا بالله...!!
خلاص تميت الناقصة يا محمد فرح؟!
|
Post: #50
Title: Re: المركز الثقافي الالماني...المركز الثقافي الفرنسي
Author: Manal Mohamed Ali
Date: 01-15-2008, 06:06 PM
Parent: #49
اها بعد اذنكم...
جلست مع صديقاتي ذات يوم كنا اربعة طالبات في جامعة الخرطوم في ركن في المركز الفرنسي وصرنا نمارس هوايتنا المفضلة في قراءة الشعر ...وبما انني من الذين ليس لهم رؤية شعرية او منهجية نقدية والكلام الصعب داك والذي كانت تجيده احدى صديقاتي ..المهم قرات قصيدة لاحد شعراء الحداثة السودانيين والتي وجدتها في جريدة يومية
القصيدة كانت من نوع ..انفتاح القلب على اللاذوردي ..انعتاق الامل من طموح الفكرة... طالع مارق مني ..عصب مشدود فيني..امرق امرق ..ود ال.....
نقطه سطر جديد...
فاصل اول
جينتيني وجانى النورس والاطفال
جيتيني وجاني ...المابعرفه داك شنو
انتهيت من قراءة القصيدة الصعبة ديك ..نظرت الى صديقاتي وجدتهن في انبهار مما قرأت... قالت احداهن انها قصيدة جميلة مرصوفة بشكل احساسي بديع..قلت لها يا زوله انا قريت القصيدة دي من تحت لفوق..بديت بالسطر الاخير...
رصعتني واحدة .وانبرت صديقتي الناقدة لتجد تاويلات في الفتلوجيا والمنطلوجيا والذي منه لتلك القصيدة...
نسيت ان اقول ان صديقتي الناقدة الان في بلاد العم سام ونسيت النقد ..والتاويلات ومنشغلة بتأويلات اخرى في الحياة الصعبة هناك .
ياجماعة والله انا فتحت البوست ده للونسة وسرد ذكرياتي في السودان ..لكن في زول غريب اسمه محمد فرح لقى فرصة في البوست بتاعي ده ..الله يشفيه
لكن لو في زول بيعرفه يكلموا ان زمن شرطة النظام العام انتهى..الزول ده لسع عايش في شهر عسل الانقاذ ..صحي النوم يا ابوحميد..ناموسيتك كحلي زي مابقولوا اخوانا المصريين..بعدين ياخوي انت ماعارف ان المراكز دي تحت حماية سفاراتها..
بالمناسبة المرة الجاية حا احكي عن صديقي التشكيلي الجميل الصامت وكيف عشقت صمته تلك الفتاة الصاخبة..
لكم كل الحب والجمال
منال
|
Post: #51
Title: Re: المركز الثقافي الالماني...المركز الثقافي الفرنسي
Author: مصطفي سري
Date: 01-15-2008, 07:01 PM
Parent: #50
منال محمد علي ، ازيك
اختفيتي وابو جقادو كمان ...
انا كنت متابع للبوست في الحكوة السمحة ، ومركزي الثقافة الالماني والفرنسي - شايف البريطاني
غير محسوب مع انه اقدم المراكز الثقافية - المهم القصد من تلك المراكز - ادامها الله علينافي
بلادنا - القصد هو التبادل الثقافي وفتح افاق التعاون بين الشعوب وفرص لنشر الثقافة ، ونعلم
ان عددا من مبدعينا وجدوا منح للسفر والتعرف على العديد من فنون وثقافة الدول التي كانت
لديها مراكز ثقافية ، كان هناك المركز الثقافي الروسي والامريكي - الظاهر قد دنا عذابهما
على يد محمد فرح الفرحان شديد مرشد شرطة امن المجتمع - ونعرف ان الاسابيع الثقافية
مثل اسبوع الفيلم الاوربي - قبلها كان كل مركز يعمل اسبوع فيلم لدولته وبعد الوحدة الاوربية
اصبحت اسبوعا للفيلم - وتعرفنا على الفنون التشيكيلية لفنانيين من تلك الدول ، وتعلم
العديد من الشباب لغات تلك الدول والان لديهم اسهامات سواء في داخل او خارج السودان .
المركز الثقافي الروسي كان من المراكز المميزة ايضاً وكانت اصدارات دور نشرها باللغة العربية
من دار التقدم وغيرها تاتي الينا بالكتب وذلك حتى نهاية الثمانينات قبل انهيار المعسكر
الاشتراكي ، وقرانا كتب تشيخوف وتلوستوي وبوشكين وغيرهم من افذاذ الادب الروسي وكانت
كتب المركز رخيصة تكاد تكون مجانية - علمت انو ناس الانقاذ سطو على ما تبقى من كتب
لوقف التمدد الشيوعي !
وما يثار الان في البوست من قصص عن سيجارة وتخميسة هي موجودة في المجتمع السوداني
في الجامعات وغيرها ولا تثريب في ذلك ، مجتمعنا انفتح ونعرف انو النساء من خالاتنا
وحبوباتنا وحتى الفتيات دخن السيجارة هل المشكلة لانهن نساء ، شفنا في بيوتنا
السودانية التدخين من الجنسين ما المشكلة ، اعتقد ان الحديث عن ان ذلك عيب والباسه
شكلا اجتماعيا بانه ليس من قيمنا لا يعدو ان يكون محض استهبال درج من يضعون انفسهم
في مقام الواعظين يقولونه ، وامثال هؤلاء رفضوا خروج المراة للعلم - الان اين هي-
ورفضوا للشباب لبس البنطلون - الان شافوا اللبس الماخمج - اذن جماعة مرشد شرطة
امن المجتمع والذي فعلوه في سنوات التيه والتتار لم يفلحوا في اقتلاع كل ما هو
انساني ...
منال شكرا وواصلي الحكي ... سنتذكر شباب حلوين زي ناس الجريفاوي- قرمبوز - وماو
والصادق الرضي واسلام زين العابدين ... ونخمس معاهم السيجارة - ديل رجال يا مرشد امن
المجتمع عشان ما تكشنا كمان ...
|
Post: #52
Title: Re: المركز الثقافي الالماني...المركز الثقافي الفرنسي
Author: malamih
Date: 01-20-2008, 05:33 AM
Parent: #51
uber
up up nick name
|
Post: #53
Title: Re: المركز الثقافي الالماني...المركز الثقافي الفرنسي
Author: أبو ساندرا
Date: 01-20-2008, 06:52 AM
Parent: #1
شكرآ يا منال على البوست الرائع
وأرجو أن تستمري في البوست كما خططتي
تتونسي وتتذكري وتلاحظي وتشتاقي وتنقدي بلطافتك المعهودة
ووعيك الثاقب
وأرجو أن تواصل ريهان نقدها الشفيف
ولا أعتقد أن ماتفعله ريهان يضير هدف منال من البوست
بل يضيف اليه ويثريه ويغنيه
لو إستمريتن ومعكن المتداخلين في جو منال وهمة ريهان فإنني أرشح هذا البوست للصدارة
كبوست متميز جدآ
يتناول فيما يتناول:
- الوسائل التعويضية التي لجأ اليها الشباب في ظل سطوة الجبهة الإسلامية وعنفها
- الحكايات والونسات والدروس والتجارب
- أزمة الشباب المثقف وحالة الإنفصام ، في المركز بحالة وفي الواقع في الحي وفي العمل بحالة مغايرة
- حاجات ريهان
... الخ
|
Post: #54
Title: Re: المركز الثقافي الالماني...المركز الثقافي الفرنسي
Author: Sidig Rahama Elnour
Date: 01-20-2008, 09:23 AM
Parent: #1
Quote: جلست مع صديقاتي ذات يوم كنا اربعة طالبات في جامعة الخرطوم في ركن في المركز الفرنسي وصرنا نمارس هوايتنا المفضلة في قراءة الشعر ...وبما انني من الذين ليس لهم رؤية شعرية او منهجية نقدية والكلام الصعب داك والذي كانت تجيده احدى صديقاتي ..المهم قرات قصيدة لاحد شعراء الحداثة السودانيين والتي وجدتها في جريدة يومية
القصيدة كانت من نوع ..انفتاح القلب على اللاذوردي ..انعتاق الامل من طموح الفكرة... طالع مارق مني ..عصب مشدود فيني..امرق امرق ..ود ال.....
نقطه سطر جديد...
فاصل اول
جينتيني وجانى النورس والاطفال
جيتيني وجاني ...المابعرفه داك شنو
انتهيت من قراءة القصيدة الصعبة ديك ..نظرت الى صديقاتي وجدتهن في انبهار مما قرأت... قالت احداهن انها قصيدة جميلة مرصوفة بشكل احساسي بديع..قلت لها يا زوله انا قريت القصيدة دي من تحت لفوق..بديت بالسطر الاخير...
رصعتني واحدة .وانبرت صديقتي الناقدة لتجد تاويلات في الفتلوجيا والمنطلوجيا والذي منه لتلك القصيدة...
نسيت ان اقول ان صديقتي الناقدة الان في بلاد العم سام ونسيت النقد ..والتاويلات ومنشغلة بتأويلات اخرى في الحياة الصعبة هناك .
ياجماعة والله انا فتحت البوست ده للونسة وسرد ذكرياتي في السودان |
يا منال عرفتك قاصدة منو يا شعنونة !! 
|
|
|