Post: #1
Title: للاسف طراجي مسخت علينا اوباما
Author: اساسي
Date: 01-09-2008, 08:23 AM
Parent: #0
بحكم حاجات كتيرة جدا اولها كرها في ال كلينتون وثانيها جزور الرجل الغير (ايرلندية) وثالثها ارتياح انساني مبعثه شكل الرجل القريب لسحنتنا وايضا من الاسباب الرئيسية حبا في التغير فقد مللنا الرؤساء الامريكان الكاوبويات وطالما طمحنا في ان ينبت (دوري NBA لكرة السلة ) احد الرؤساء تغر بهم اعيننا وتطمئن اليهم افئدتنا وكدا يعني بحكم انه العالم كله بقي (محكور في زاوية ) يقوم عليها واحد رباطي فهذا الرباطي كنا نتمناه علي الاقل مننا وفينا يحس قضايانا ويشعر مأسآتنا لا كما العادة في ان يتولي امرنا من يتربص بنا ويجهجه باكتنا .
كل هذه الامآل كانت تداعب اخيلتنا دون ان نبوح بها فما كنا نظن ان زماننا قد اتي اي الزمان الذي يحكم فيه العالم (واحد فيه عرق) او كما يقولها جلابة امريكا . وما ان بدات اخبار اوباما ترزح الي اسمعتنا وشاشات نظرتنا واخبارنا حتى استبشرنا خيرا كثيرا وفتحا كبيرا في ان احد الحزبين الكبيرين قد اختار مرشحه منا وان هذه اولي التجارب التي قد نتوقع منها وان لم يكن الكثير ولكن اولي المحاولات الجادة بعد محاولة عمك الراهب ويني او اي كان اسمه والذي ترشح في ثمانينات القرن الانتهي قريبات دي ولم يفتح الله له ولو طاقة الي البيت الابيض المتوسط النجيلة .
وجاء كما اسلفت اوباما حتي كدنا ان نغني له كما تغني محجوب شريف لنميري :
جيتنا وفيك ملامحنا
بعد يا مايو ما يئسنا
بنرجع ليك توصينا
بنسمع ليك تحدثنا
فرحة من عند انفسنا ونزقا وشوقا واستشرافا الي غد مختلف شوفوا عليكم الله فقط مختلف ولم نقول غد زاهر او غد افضل ولكن كل طموحنا غد مختلف وهي ليست بالاماني العزبة الاتراقص حيالها ولا الاماني الكبيرة ( كبير الفيل, الفيل لاعب في الاهلي . اهلي عطبرة , مدينة النار والدخان وحنك عاضي كدا ) ما علينا .. فاوباما بقي لينا سيف الخلاص الحيخلصنا يا كلو كلو من الدنيا ولا حيخلصنا من من ال كلنتون ومن شايعهم من ال (ايرلندا) الحكمونا من سنة عودة ديجانقو الي كلورادو وحنك الهنود الحمر وكربك كربك الي عهد جكس الرئيس مونيكا
دا كله في اذهاننا ونحن نستبشر خيرا كثيرا وفتحا كبيرا باولي اشراقات الانتخابات وكان لنا ما اردنا وبدأها اوباما داوية كمرجل يغلي وحقق اولى انتصارته في اولى الولايات وحتاهو قرض مع المكلومة مراة الرئيس X المصدومة وهنا اشرأبت اعناقنا وغمرتنا فرحة الاستهلال الداوي بنصر مؤزر .
لنأتي بعد هذا الانتصار الي المنبر لنجد الاخت طراجي قد استولت علي احلامنا وامانيا (بوضع اليد ) عنوة واقتدارا وكان اوباما حق  لها معقولة بس يا طراجي عشان في غفلة من الزمان ضرب عليك الفلاش في السقالة المعلقة دي مع اوباما تودري الراجل ؟؟
شخصيا لا عداوة لي مع طراجي اللهم الا اني اصبحت اتشائم من الموضوعات التي تتبناها فما وضعت ثقلها علي موضوع الا وسحقته وقطعت طاريه من الدنيا ما ان تبنت امرا الا وصار يتيما لا يجد من يكفله ما ان تزعمت امرا الا واصبح مغمورا مدحورا .
الان بامكان ان يؤرخ اي شخص لاوباما بما قبل طراجي وما بعد طراجي يعني ممكن تقول بارتياح ( اوباما ق ط ) او (اوباما ب ط) ولتسهل الامور بامكانك اختصارها فترة اوباما الما مثله قط او فترة اوباما لمن بطبط اي بعد تبني طراجي له وتبشيرها له ولحقانه لامات طه بصاروخ طراجي ارض ارض .
لذا اخوتي المدحورين المغمورين استبشروا لهيلاري بفتح كبير ونصر جديد ولتتجندر المتجندرات بعد ان سطت المجنزرات علي اضغاث احلامنا .
يا طراجي يا كُج لحقتي الراجل علي دج *
ــــــــــــــــــــــــــــــ
* فتة (علي دج) وديمقراطية (الكوتش) !!!
|
Post: #2
Title: Re: للاسف طراجي مسخت علينا اوباما
Author: fadlabi
Date: 01-09-2008, 08:36 AM
Parent: #1
شيل شيلتك
الليلة بلحقوك أمات طه
و تحت تحت.. تستاهل .. ناس لسانها داير مكنة حلاقة
|
Post: #3
Title: Re: للاسف طراجي مسخت علينا اوباما
Author: اساسي
Date: 01-09-2008, 08:55 AM
Parent: #2
Quote: شيل شيلتك
الليلة بلحقوك أمات طه |
يا حبيب لا خوف علي ولا انا يحزنون اللهم الا في حالة واحدة انه طراجي تتبنى قضيتي
في الحلة دي اشيل شيلتي واشيل مرتبتي ولحافي كمان
|
Post: #4
Title: Re: للاسف طراجي مسخت علينا اوباما
Author: فيصل نوبي
Date: 01-09-2008, 09:17 AM
Parent: #1
| Quote: وثالثها ارتياح انساني مبعثه شكل الرجل القريب لسحنتنا |
داير تقول انكـ وجيه يعني 
_
مشتاقين يا وغد.
|
Post: #12
Title: Re: للاسف طراجي مسخت علينا اوباما
Author: اساسي
Date: 01-09-2008, 06:02 PM
Parent: #4
Quote: داير تقول انكـ وجيه يعني
_
مشتاقين يا وغد. |
ياخي مشتاغون بتاعة راس قلبك ؟!!
اخوك قريب اسبوع ولا عشرة يوم راقد بي لوز زي الشفع
ولا رنة منك ما طافت علينا
بالنسبة للوجاة ما اتخيل لي في زول عاقل عايز يقول هو وجيه بنسب روحو لي ابو الروس (اوباما )
ياخي الزول دا ما شاء الله راسه تقول لابس خوذة موتر تقول لي وجيه
|
Post: #5
Title: Re: للاسف طراجي مسخت علينا اوباما
Author: Ali Alhalawi
Date: 01-09-2008, 09:40 AM
Parent: #1
لقيتك فقرى جدا يا أساسى
نتمنى لأوباما الفوز .. و ندرك جيّدا أنه لن يغيّر السياسة الأمريكية .. فقط لأنّ فيه ملامحنا .. سياستهم مدقوقة بوتد لا تتغيّر بتغيّر الرؤساء .. سوا أكانوا جمهوريين أو ديمقراطيين .. ماذا فعل لنا الآخران أصحاب ملامحنا .. البت كوندا و الواد باول
فيا فقرى جدا .. و أنت أبو بنية .. يتوجب عليك دعم مدام كلنتون تضامنا مع الجندر .. و لأنك معكوس تراجى .. كما فعلت مع الهلال .. ستفوّز ولدنا
بالمناسبة .. آخر ما وصلنى من أخبار تقول أن إسمه "باراك حسين أوباما" .. و أصله من الحضارمة الذين هاجروا من اليمن لكينيا .. يعنى هو جلابى كينى .. و أظن أن تراجى لو سمعت بهذا ستغيّر دعمها له و تكتفى بمغازلة هيلارى كلازمة جندرية
| Quote: اني اصبحت اتشائم من الموضوعات التي تتبناها فما وضعت ثقلها علي موضوع الا وسحقته وقطعت طاريه من الدنيا ما ان تبنت امرا الا وصار يتيما لا يجد من يكفله ما ان تزعمت امرا الا واصبح مغمورا مدحورا . |
باالله إتوسط لينا عند تراجى و خليها تركّز على عمر البشير فى الأنتخابات الجاية
|
Post: #13
Title: Re: للاسف طراجي مسخت علينا اوباما
Author: اساسي
Date: 01-09-2008, 06:06 PM
Parent: #5
| Quote: فيا فقرى جدا .. و أنت أبو بنية .. يتوجب عليك دعم مدام كلنتون تضامنا مع الجندر .. و لأنك معكوس تراجى .. كما فعلت مع الهلال .. ستفوّز ولدنا |
يعني يا غتيت داير تقول علي كج بالكرباوي والله غتاتك دي يا الحلاوي ليها يوم
| Quote: بالمناسبة .. آخر ما وصلنى من أخبار تقول أن إسمه "باراك حسين أوباما" .. و أصله من الحضارمة الذين هاجروا من اليمن لكينيا .. يعنى هو جلابى كينى .. و أظن أن تراجى لو سمعت بهذا ستغيّر دعمها له و تكتفى بمغازلة هيلارى كلازمة جندرية |
وحات الخوة لو كلامك دا اتاكد لي تراجي الا تجيها صدمة جلابة داير ما يدور ربنا يجيب العواقب سليمة بس ويطلع الزول عرق افارقة نضيف
| Quote: باالله إتوسط لينا عند تراجى و خليها تركّز على عمر البشير فى الأنتخابات الجاية |
انا خايف تلغى الانتخابات لو اتبنت البشير ويبدوا لينا من يوم 30/6/1989 والضحك شرطنا
مشتاغين يا لذيذ
|
Post: #6
Title: Re: للاسف طراجي مسخت علينا اوباما
Author: ناذر محمد الخليفة
Date: 01-09-2008, 11:01 AM
Parent: #1
كيفك يا أصاصي ..
Quote: اللهم الا اني اصبحت اتشائم من الموضوعات التي تتبناها فما وضعت ثقلها علي موضوع الا وسحقته وقطعت طاريه من الدنيا ما ان تبنت امرا الا وصار يتيما لا يجد من يكفله ما ان تزعمت امرا الا واصبح مغمورا مدحورا .
|
وعشان أنحن ناس ما بنراهن على الحصان الخاسر ، قررنا دعم حملة هيلاري الإنتخابية بعن أن ثبت لنا أن أوباما (حجرو غطس) !!
|
Post: #16
Title: Re: للاسف طراجي مسخت علينا اوباما
Author: اساسي
Date: 01-09-2008, 06:12 PM
Parent: #8
وين يا طامبا يا حبيبنا
| Quote: نا زمان كان عندي صورة مع محمد علي كلاي .. لما جا يفتح مسجد النيلين .. |
وانا اقول كلاي دا بتراجف من اليوم داك ماله؟
|
Post: #15
Title: Re: للاسف طراجي مسخت علينا اوباما
Author: اساسي
Date: 01-09-2008, 06:08 PM
Parent: #6
| Quote: وعشان أنحن ناس ما بنراهن على الحصان الخاسر ، قررنا دعم حملة هيلاري الإنتخابية بعن أن ثبت لنا أن أوباما (حجرو غطس) !! |
ما غطس وبس دا غتس لي جنا جناه يا نازر
احفاده تاني ما يترشحوا لي اتحاد المدارس
|
Post: #7
Title: Re: للاسف طراجي مسخت علينا اوباما
Author: Maawya Hussein
Date: 01-09-2008, 12:00 PM
Parent: #1
| Quote: بس يا طراجي عشان في غفلة من الزمان ضرب عليك الفلاش في السقالة المعلقة دي مع اوباما تودري الراجل ؟؟ |
|
Post: #9
Title: Re: للاسف طراجي مسخت علينا اوباما
Author: Tragie Mustafa
Date: 01-09-2008, 01:00 PM
Parent: #7
اوباما بغنى عن المناصيرين ضعيفين الهمه مثلك يا اساسي.
وعارف البجيب الجلاء لاوباما انتو ما تراجي..ولو بس بتعرف في السياسة الكنديه
كان عرفت حبايب تراجي وين وحياتك كل الناصرناهم فازوا و الحمد لله.
شوفت المرأة الفي صورة معاي دي الجابها لك تمبس يازول دي اشتغلت ليها وسقطت
ورجعت اشتغلت ليها سنة ثانيه متطوعه لحد ما نجحت.
فيازول خت الرحمن في قلبك..اوبما ده عارف كان فاز فاز وكان ما فاز برضوا فاز.....
نحن كسود مغيمين في بلاد اغلبيتها بيضاء....كونه يتاح لرجل اسود زي اوباما
كل هذا الزمن في الاعالم الغربي...في نظرنا هذا نصر.....فان يتاح للرجل ابراز
نفسه ككفأه سوداء وتسويق افكاره وطريقته في الاداء هذا في حد نفسه نصر.
والنضال يعرف سياسة النفس الطويل
على مستوى منبرك نوع الحوار ده نفسه فائدة
بدلا عن هلال مريخ وحلل المحشي واعياد الميلاد.
ان ننتقل من محليتنا لمناقشة الساسية الامريكيه هذا نصر
وان نحرك شهية اخوتنا المقيمن بالولايات المتحدة من امثال الصاوي
والخير وكستاوي وسف جبريل ...و القائمه طويله ممن كتبوا هنا
واضافوا لنا الكثير عن السياسية الامريكيه هذا في حد نفسه تغيير ايجابي كبير.
اما ان نصل مرحلة ان يكتب لنا اساسي مقال كامل عن اوباما فهذه طفرة نحسد عليها
الهدف ليس اوباما
ولا العلاقة الصورة
الهدف العنصريه
وهذا البورد احد قلاعها
وجيد هذا الانتقال الايجابي لمناصرة الناس الفيها عرق برضوا.
بوست هذا لا اعتبره هزيمة ولا شيئ اعتبره مؤشر نجاح آخر لي وهي مقدرتي لتحريككم
ولو غصبا عنك للمواضيع محور اهتمامي ولا املك الا ان اقول كلام يا عوض دكام
وفوق كمان لاجل اوباما.
|
Post: #10
Title: Re: للاسف طراجي مسخت علينا اوباما
Author: tmbis
Date: 01-09-2008, 01:09 PM
Parent: #9
Quote: لتحريككم
ولو غصبا عنك للمواضيع محور اهتمامي |
.. يعني بقيتي بتعالجي بالصدمة عن بعد إنت ذاتك ..؟
بقيتي زيك وزي بشاشا وزي هشام ظــااطو ؟؟
طيب ما تجيبي البطارية بتاعتك ..
|
Post: #11
Title: Re: للاسف طراجي مسخت علينا اوباما
Author: ناذر محمد الخليفة
Date: 01-09-2008, 02:24 PM
Parent: #1
wrong delivery
|
Post: #14
Title: Re: للاسف طراجي مسخت علينا اوباما
Author: العوض المسلمي
Date: 01-09-2008, 06:07 PM
Parent: #1
راي واحد وما بتغير
كان حكمنا بوش ولا كلنتون
رايس ولا كارلوس
كلهم واحد لافرق بين احمد وحاج احمد
|
Post: #17
Title: Re: للاسف طراجي مسخت علينا اوباما
Author: mohamed osman bakry
Date: 01-09-2008, 06:34 PM
Parent: #14
| Quote: وعشان أنحن ناس ما بنراهن على الحصان الخاسر |
و الحصان الركبوك ليهو زماااان داك,
كان حصان فاكوم?
|
Post: #18
Title: Re: للاسف طراجي مسخت علينا اوباما
Author: farda
Date: 01-09-2008, 07:18 PM
Parent: #1
 واقف "باراك" والهم عصف...؟
..
..
..
|
Post: #19
Title: Re: للاسف طراجي مسخت علينا اوباما
Author: ناذر محمد الخليفة
Date: 01-09-2008, 10:05 PM
Parent: #1
محمد عثمان بكري ...
Quote: و الحصان الركبوك ليهو زماااان داك,
كان حصان فاكوم? |
داك حصان ركبتو وأنا (براي سويتا في نفسي)
|
Post: #20
Title: Re: للاسف طراجي مسخت علينا اوباما
Author: mohamed osman bakry
Date: 01-10-2008, 00:36 AM
Parent: #19
| Quote: داك حصان ركبتو وأنا (براي سويتا في نفسي) |
|
Post: #21
Title: Re: للاسف طراجي مسخت علينا اوباما
Author: AMNA MUKHTAR
Date: 01-10-2008, 01:39 AM
Parent: #1
أساسى ..الأساسى..
غتست وين يا زول ..مشتاغون..
شنو فتحت لى بوست طويل عريض وزغت منو
سلامتك من اللوز..انشاء الله عدوينك..
الهدف العنصريه
وهذا البورد احد قلاعها
وجيد هذا الانتقال الايجابي لمناصرة الناس الفيها عرق برضوا.
شفت ( طراجى) اشتغلتكم كيف
|
Post: #22
Title: Re: للاسف طراجي مسخت علينا اوباما
Author: Tragie Mustafa
Date: 01-10-2008, 02:30 AM
Parent: #21
خلاص يا ناذر وعشان سواد عيونك قررت اغطس حجر هيلاري كلينتون ذاتها؟؟؟
Quote:
وعشان أنحن ناس ما بنراهن على الحصان الخاسر ، قررنا دعم حملة هيلاري الإنتخابية
بعن أن ثبت لنا أن أوباما (حجرو غطس) !! |
هيلاري....هيلاري......هيلاري......
|
Post: #23
Title: Re: للاسف طراجي مسخت علينا اوباما
Author: Rawia
Date: 01-10-2008, 02:46 AM
Parent: #22
ياجماعة صورة فردة انا ماظاهرة لي
وصراحة انا بنتظر مداخلاته بالسنين لتميزها
زول يقول لي فيها شنو
اساسي بوستيك دا ماحصل
|
Post: #24
Title: Re: للاسف طراجي مسخت علينا اوباما
Author: HAYDER GASIM
Date: 01-10-2008, 04:50 AM
Parent: #23
العزيز ... أساسي ... تسلم,
تجدون أدناه إحدى مساهماتي المتواضه,
ولما نشرتها من قبل فى بوست إفترعته
الأخت تراجي ... وعلى أمل أن يكون فى
{ التعميم } ... الفائدة المرجوة.
مع جزيل شكري ... ولاطف تقديري
شكرا تراجي ... وأسفي لحضور متأخر,
ملاحظة أولي ... العنوان أكثر إثارة
من الحادثة ... فكنت قايل إنو فى
فضيحة بطابع أخلاقي ... وقلت يا ربي
هيلاري عملت شنو فى { جسدها } أو أي سر
عظيم أفشت به من حزمة { شمارها } فى هذه
الأيام الحاملة لسيرتها ... وبإضطراد.
ملاحظة ثانية ... يحبذ المستشارون العاقلون
الخطاب المكتوب على المرتجل ... لأن فى الكتابة
توقيع أفضل وأشمل ... خاصة لمن يتولون مسئولية
قومية مباشرة ... أو من يتهيأؤون لها. مع ملاحظة
أن هذا { التقليد } ليس خصما على الحوار المباشر
والغير مكتوب بالضرورة .
ملاحظة ثالثة ... إستمعت لأوباما فى أحاديث طلقة وبلا
كتابة ... فكان فى تقديري من الأعظمين, كما إستمعت
كذلك إلى هيلاري وهي تمتلك من كفاءة الخطاب العفوي
والمرتجل ما جعلها { تكسب } نيو هامشير ... فهل تعلمي
أن هذه المرأة أطاحت بالتوقعات الأكاديمية والمنتهية إلى
أدراج الإعلام عبر آخر خطاباتها العفوية والمباشرة للناس
... وقبل سويعات من { براميري نيو هامشير } ؟ وذلك عبر
خطاب إستعطافي مباشر ... يعتقد المحللون اليوم أنه السبب
فى إنعطاف الناس { خاصة النساء } لها يوم الإنتخابات, وفيما
أدي لتغيير غير معهود فى عالم التوقعات السياسية الشمال
أمريكية.
يظل ذهني مفتوحا لكل الإحتمالات التي تستوجبها ضرورات ومآلات
الصراع فى هذه الإنتخابات الأمريكية ... وكما قلت فى البوست
الذي أفردته من قبل وهو يحمل كل سيماء { التنبوء } السياسي
الرامي لفوز أوباما فى نيو هامشير ... أنني لست سعيدا بصراع
يحمل فى جوهره عقابيل أن تفوز إمراة أو أن يسقط {ملون} فى
رحلة الذهاب إلى البيت الأبيض ... أو العكس ... فعلام الضيق؟
ومتى ترشح ملون فى قامة أوباما ومتي ترشحت إمراة ومن حيث الأصل؟
للعقل طريق ... ربما يمكن من الجمع بين هذه الإختيارات, وتحويل
مجراها من الصراع إلى التوافق ... فما قيل فى معرض هذا البوست
وفي غيره لصحيح لجهة عدم { أهلية } المجتمع الأمريكي الراهن لقبول
لرئيس { ملون } ... كما أنه ينخض لجهة أن يكون الرئيس إمرأة,
فما رأي الناس فى صيغة تدخل إمراة بيضاء ونائب ملون لها إلى البيت
الأبيض ... دفعة واحدة؟ { راجعوا بالله مداخلة الموصولي فى هذا الصدد }
فحينها تستوفي منصة الرئاسة الأمريكية معرضا جديدا, بإحلال إمراة
لمقام تم إحتجازه تاريخيا للرجال, كما أن وجود باراما نائبا
لهيلاري كلينتون سوف يغنية عن ضعوفاته الراهنة والمتحولقة على
{ الخبرة } فليس ثمة خبرة أعظم من أن تكون نائبا لرئيس أمريكا
ومشاركا متقدما فى صنع ما يخص أمريكا { والعالم } من قرارات, ثم أن
هذه المعادلة تتيح الزمن المطلوب معنويا لتهيئة المجتمع الأمريكي
لتغيير أجهزة راداره وإستقباله التقليديين , أو هنا الإجابة الموضوعية
على ذلك السؤال السيار هذه الأيام, والذي مؤداه أن هل أمريكا جاهزة
لإنتخاب رئيس غير أبيض؟
مع ذلك فسوف أظل أرعى المعركة الإنتخابية الراهنة من معسكر أوباما
ولما لا أزال أراه الأعظم إفتهاما ونزوعا خيرا وبرنامجا ديمقراطيا
وإنسانيا ... وهذا يتوافق موضوعيا مع آفاق دانية فى خيالي السياسي
والمراهنة على { تغيير } أمريكا ومن داخلها وبمبادرة أبنائها الصالحين
وفي إطار منهجها الديمقراطي ... أكثر من الرغائب المضادة والساعية نحو
معاداتها وتدميرها... وتلك الزفرات التي تعلمون.
|
Post: #25
Title: Re: للاسف طراجي مسخت علينا اوباما
Author: يوسف الولى
Date: 01-10-2008, 05:04 AM
Parent: #1
| Quote: شوفت المرأة الفي صورة معاي دي الجابها لك تمبس |
هو بالله واحد من الجمبك ديل امراه
طيب .. ياتو ناحيه شمالك ولا يمينك
|
Post: #26
Title: Re: للاسف طراجي مسخت علينا اوباما
Author: ناذر محمد الخليفة
Date: 01-10-2008, 05:12 AM
Parent: #25
نسأل الله السلامة ..!!!
|
Post: #27
Title: Re: للاسف طراجي مسخت علينا اوباما
Author: abuguta
Date: 01-10-2008, 05:58 AM
Parent: #26
على الطلاق يااساسى
انا كنت فاكر الزول دا حازم ولدها
لانى ايامها كنت شايل هم السفر وهدايا ناس ابقوتة
بالله تراه طلع زعيم,,,زى زعامتى التى طلعت فشوش
كنت بحلم س يحصل انقلاب فى العيد,,ومع نزول الطبارة التى تحملنى
وبما انو بعرف كوبيوتر وبس بزعم الحكاية
لكن زول هبب لى ساكت مافى,,وفاركت صورة مع تراجى
لا انقلاب حصل ولا نزفية كتلت ليها زول
مشتاقين ياساسى
ناس بروى قالو لى ما عندنا زول بالاسم دا
اظنك جلابى برضك
|
Post: #28
Title: Re: للاسف طراجي مسخت علينا اوباما
Author: hamid brgo
Date: 01-10-2008, 07:40 AM
Parent: #27
غايتو الود دا لو سقط يمين تراجي دي الا تشوف ليها محل غير منبرنا- و ده اخر كلامي
ــــــــــــــــــــــــــــــــــــــــــــــــ
لا اظن ان المسألة بهذه البساطة الغارقة في المحلية
دعوة للجميع لقراءة هذا المقال على بي بي سي
Taking the electorate for granted
http://news.bbc.co.uk/2/hi/americas/7179342.stm
|
Post: #29
Title: Re: للاسف طراجي مسخت علينا اوباما
Author: اساسي
Date: 01-22-2008, 08:03 AM
Parent: #28
ما قلت ليكم بتكجو !!
ساعود باذن الله
|
Post: #30
Title: Re: للاسف طراجي مسخت علينا اوباما
Author: ملكة سبأ
Date: 01-22-2008, 08:50 AM
Parent: #1
| Quote: انا كنت فاكر الزول دا حازم ولدها |
والله ضحكتني يا ابقوتة
يعرفوكم هلالابي من اهل العوض كيفن 
|
Post: #31
Title: Re: للاسف طراجي مسخت علينا اوباما
Author: Maawya Hussein
Date: 01-22-2008, 11:01 AM
Parent: #1
الناس ديل برضو حا يكونو قشروا بي الصور دي
|
Post: #32
Title: Re: للاسف طراجي مسخت علينا اوباما
Author: فدوى الشريف
Date: 01-22-2008, 01:24 PM
Parent: #1
ط:
| Quote: وحياتك كل الناصرناهم فازوا و الحمد لله. |
|
Post: #33
Title: Re: للاسف طراجي مسخت علينا اوباما
Author: Tragie Mustafa
Date: 01-27-2008, 08:33 PM
Parent: #1
ساوث كارولينا كيف يا شباب؟؟!!
|
|
