دايرين اربعة كبار وبسرعة بالله......!!!!!

اربعة كبار...!!!!
صاح الاستاذ الشرس ابكر
دايراين اربعة كبار من الكنبة الوراء....!!!!
اربعة كبار يا استاذ (ابكر) يا حاقد وانت خير من تعلم بان الكنبة(الوراء) وخط 100 غرب هي مجلس الاشرار والحاقدين
علي الطبقات (النابهة) من الطلاب النضاااااااف البسرحو شعرهم وبستحموا في اليوم ثلاثة مرات..
مرة من الصباح
ومرة لمن يرجعوا من المدرسة
ومرة لمن يجوا ينوموا ويشربوا اللبن وبنوموا بدري..!!!!


ااربعة كبار بسسسسسسس..!!!!
هكذا كان استاذ ابكر يصيح وهو في غاية التشنج
قبل ان يتم الاستاذ كلمة (اربعة) اتي ركضا من الكنبة الوراء (ستة) وليس اربعة
ستة مرة واحدة…!!!!
1- قدوم حجر
2- عباس فرعون
3-عمر مشكلة
4-نادر جكس
5-ادم كورنر
6-ادريس بمبي

اليوم يوم جلدة(ارنوب) ذلك الفاره اللديح العامل لينا فيها(قليل ادب)و منقطها وتفتيحة وشايل لكل العلوم مفاتيحها...!!!
اايييوه الليلة ارنوب حيتجلد وتلكم كانت هي اللحظة التي انتظرها ويتنظرها رواد المساطب الخلفية في (خط 100) غرب وكنبة شكرا الوراء…
هذا السداسي قدم اعمال مشتركة كثيرة في هذه المدرسة وبالتحديد في هذا الفصل الضاج بالجلد والعقوبات التعسفية وايضا كان استاذ ابكر يستعين بهم في الاربعة كبارية في بعض الفصول الاخري التي لا يتواجد فيها طلاب (عضلات تبش) مثل السداسي الرهيب…
ويذكر ان احلامهم الاربعة كبارية ذهبت بهم بعيدا وتخيلوا ذات لحظة من لحظات انسهم بان يتم استدعاهم لعمل( اربعة كبار)في مدرسة البنات المجاورة وكانت هذه الجزئية هي من بنات افكار (نادر جكس) الذي دينه وايمانه هو(الجكس والحنانزم)..!!!ونعود

قدوم حجر في ركضه الذي كانت مسافته 7 امتار ونيف في ذلك الفصل الوسيع المكتظ يريد ان يفشي غليله في ارنوب ذلك الشششاطر ودائما عندما يقف الجميع امام طابور السنة النهائية يهتف مدير المدرسة
االاول ..ارنوب عمر ارنوب
(وهاك يا تصفيق وزغاريد من اخواته الشفتات مثله اللائي كن حريصات في هذا اليوم علي حضور تلكم اللحظات لتحيةارنوب الشفت ولحمايته من شلة الستة التي كانت تفكر في الفتك به ما بين كل الحينة والاخرة)…
وايضا كان (قدوم حجر يريد الانتقام) ورد اعتباره كطيش لهذا الفصل والتمتع بروية هذا الاول الرعديد يرفع زيه وزي اي خروف من طرف ويجلد جلد السنين كما كان يجلدهم (استاذ ابراهيم بتاع الحساب) الذي قيل انه كرهته في هذه الدنيا هو ذلك السادوس اصحاب العضلات التبشية…
وكان يردد يا سعاليك انتو محلكم ما المدرسة دي مع اولاد زي ناس ارنوب..انتو تمشوا الاصلاحية….) يابجم
ا اخافهم كثير وجلدهم زي مليون جلدة ولكن في كل الاحوال لم يسلم منهم فقد اطلقوا عليه في المدرسة (ابراهيم بجم) وصار هذا هو اسم شهرته في ملاعب المدينة وسوقها الوحيد..!!!!!!
هذا ما كان من امر (قدوم حجر) ذلك المجرمان الكبير ورائد (السفات الشنقية) في كل مدارس المدنية وفي فريق (زنقوما) ايضا حيث كان (قدوم حجر) يقيم مع اسرته الفقيرة التي تفككت بفعل عمايل الاب السكرجي وتدني راتب امه (التمرجية)..!!! فوجد في عوالم تلكم الشلة ضالته ووجد ايضا مساحة للقيادة والكلمة المسموعة في زوقانات(البشكة) افي زقاق فريق (زنقوما)

والله يا كيكي النظرية دي ممكن تتعمم على جميع المدارس ..

فقد كان لدينا ايضا 8 كبار ..
- حميدة جيمس ..
- محمد ( ابو تلة ) ..
- الناية ..
- جون كلمنتي ..
- سيف ابو سفة ..
- عباس ريكس ..
- وليد الطويل ..
والثامن راح لي .. لكن متأكد كانوا 8 لانو كان استاذ ( صالح ) بيقسمهم لفريقين .. ومرة الناظر استعان بيهم لما جلد المدرسة كلها ..

وايضا كان لدينا مثل أرنوبكم وهو عصام الفار الذي حملوه كثيراً ..

والله يا عبد الكريم

نفس الفيلم دا خشيناهو و باللوان

كان عندنا واحد مدرس ما عارف حلفاوي



واللا من وين ما عارف المهم نوبي

اسمو محمد نور الزول دا كان فقر فقارة

يضربنا ضرب الفيلا. الكلام في الاولية اما

في الثانوي العام كان عندنا استاذ افقر

من داك اسمو طه حسب الرسول موقف المدرسة

على فت رجل.اما ناس خط 100 غرب الخط الميت

فحدث و لا حرج.كانت لنا ايام.

رائع كتاباتك

Quote: دايرين اربعة كبار وبسرعة بالله......!!!!!

والله يا كيكي خلعتني وقلت يكون ملاسي تاني قام لغلطاتو النحوية والإملائية الكتيرة ديك، وبكري عايز يجلدو.
لكن الحمد لله جات سليمة.

عباس فرعون
كان ثاني الراكضين من كنبة وراء وركضا محموما مشفوعا ايضا برغية جامحة في طقطقة (ارنوب) والمشاركة والاسهام في هذا المولد الذي انتظره طويلا طويلا منذ ذلك اليوم الذي قلبه فيه ارنوب ارضا سلاح واضحك علي الغاشي والداني من رواد (ميدان الكورة الكبيرة في فريق زنقوما في مبارتهم الشهيرة ما بين فريق(اللهب) الذي يلعب له عباس فرعون كباك لفت تخافه كل الاجنجة ولكنه يخاف ذلك الجناح الشفت (ارنوبة) فرفارة وابن لذينة (ارنوبة) في كورته التي ياتي اليها القاصي والنادي ويمارس فيها الترقيص وجديع الباكات ولكنه
تخصص تخصص عميق في محاورة(ركس) محاورة يطرب لها الرواد كثيرا وقد طرد من اثرها (ركس) من مباريات لا ينساها ابدا ..والان اتت الفرصة وتواتت اليه في طبق من ذهب للمشاركة(الاربعة كبارية) في سلخ وجلد (ارنوبة) ود اللذين علي ايادي استاذ ابكر الذي وصفت جلدته في ادني معدلاتها (بحقنة الملاريا) واخريين اكثر مبالغة وصفوها بلسعة العقرب ام ضنب التي ذاقها العديدين في كراكير فريق (زنقوما) الرهيب…..

Quote: والله يا كيكي خلعتني وقلت يكون ملاسي تاني قام لغلطاتو النحوية والإملائية الكتيرة ديك، وبكري عايز يجلدو. لكن الحمد لله جات سليمة.

هلا يا شماسي
ووينك انت ياخي ما تظهر الا مع سيرة الكبع والاربع كبار
(انت الظاهر عليك كنت من الاربعون الكبار)
ملاسي خلاص ذهب مع الريح وتم ختمه بالشمع الاحمر منذ (حادثة كراع العنقريب)
واي لولوة منو مابنادي ليهو اربعة كبار
ده انا يا صحبي بقلوا (بررررراي)

Quote: واللا من وين ما عارف المهم نوبي اسمو محمد نور الزول دا كان فقر فقارة يضربنا ضرب الفيلا. الكلام في الاولية اما في الثانوي العام كان عندنا استاذ افقر من داك اسمو طه حسب الرسول موقف المدرسة على فت رجل.اما ناس خط 100 غرب الخط الميت فحدث و لا حرج.كانت لنا ايام.

هلا يا فيصل ومرحب بيك في كرنفال سيرة الجلد والكبع والاربع الكبار
والاستاذ الكان بجلد بكون مشهور ولو لقيتو في الشارع بتفكو ليهو
لو شفتوا في بيت بكاء بتتخارج وتشوف ليك دبارة...
والحمد الله يا فيصل الربنا ما وقعنا في محمد نور بتاعكم ده
ده كان جننا جن قبورة
وفعلا يا لها ما ايام لها ايقاع (علي قولة زولنا العواليق ابو عمية كبيرة داك)

Quote: فقد كان لدينا ايضا 8 كبار .. - حميدة جيمس .. - محمد ( ابو تلة ) .. - الناية .. - جون كلمنتي .. - سيف ابو سفة .. - عباس ريكس .. - وليد الطويل ..

هلا يا معتصم علي التاخير في الرد
لانو اخوك جازف البوست ده كرباوي كده في الاستراحة بتاعة الشغل
وفعلا هذه الاسامي موجودة في كل المدارس وبنفس المواصفات
وتمانية كبار ديل لو لقاهم (استاذ ابكر) يجلد بيهم بلد كاملة مش مدرسة بس
وكل الود
وكن بالجوار يحلو الجلد

عمرمشكلة
وعندما سمع بنغمته المميزة اربعة كبار كابس في جريته المحمومة تلك عدة ادراج في الطريق وكان اكثرهم اصرارا وحماسا الي الوصول الي منصة (الرفع) فقد كان عمر مشكلة ما عنده قشة مرة فجل همه هو (وجود مشكلة) ولابد من وجودهم وخلقها حتي ولو من عدم..واشتهر في اروقة فريق زنقوما(بعمر مشكلة) وقيل انه ان لم يجدها فانه قادرا علي افتالعها مع ظله والغريب في الامر ان (مشكلة) وارنوب يلعبون في فريق واحد في دوري تلكم المدينة ولكن هذه الرفقة وذكريات النصر والاقوان الارنبوية لا تشفع له عند مشكلة(الذي كان لسان حاله كل قرد ياكل ناروووو)…
والمهم والاهم هي (العكة) واللخبطة قد اتت علي طبق من ذهب وبايادي استاذ ابكر وصيحته الشهيرة(اربعة كبارررررررررر)…..

اربعة كبار من كم ؟؟
رابعه ولا سادسه
ولا وين
وليه ما معاهم خامس ارقد تحت بالجلابية
والله جمس حقد
اها واصل النشوف اخره

Quote: اربعة كبار من كم ؟؟ رابعه ولا سادسه ولا وين وليه ما معاهم خامس ارقد تحت بالجلابية والله جمس حقد اها واصل النشوف اخره

هلا يا ريس
وبالله شوف لينا اربعة كبار ومكان ومن طرف
اصلوا ناس عباس فرعون ونادر جكس وشلة مية غرب دي
بقت ما شايفة شغلها...
وارنوب الليلة يحلو الله من استاذ ابكر الحاقد ده

وريني الأطلس قاعد وين ؟
كل سنه وإنت طيب..

Quote: وريني الأطلس قاعد وين ؟ كل سنه وإنت طيب

هلا يا محمد
وكل سنة وانت طيب وكل الود
ودي مدرسة بتاعة مهمشين يا محمد فيها اطلس واحددددد وقاعد عند السيد المدير شخصيا
وعامل عليهو تدابير امنية وبديهو للاستاذ يمشي يوريهو للطلاب في الفصل
ويجيبو راجع صرة في خيط لحتتو في الدرج الخسوسي بتاع سي المدير

كرمة

الاربعة الكبار يمتازون دوما بقلة الادب

وبعملوا (دوقاري ) في الباب

وبقلعوا قروش الاولاد وبياكلوا فطورهم وبعلموهم التمباك

وبرضو الاربعة النشاط ديل بشيلوا العنقريب للمقابر بسرعة

قاتل الله الاربعة

غريبه انت مامع الاربعه ديل

Quote: غريبه انت مامع الاربعه ديل

هلا يا محمد طيب
طبعا انت قاصد الوريف خليل (مش كده)

Quote: وبعملوا (دوقاري ) في الباب

هلا ياخلي وحبابك
ودوقاري ده هي الكفوة الجابت (ادريس بمبي) للستة ديل
انتظر شوف لمن يجي دورو في الاحداث عشان تشوف سيرة الودقاري الجدجد

نادر جكس
طبعا ضروري ومهم ومتوقع ان يكون اول المفحطين صوب هذا (الجلد ) فهو من الكبار الكبار في هذه المدرسة وله شهرة مميزة كفتي مدلل وجكساوي من النوع الخطير ولذا لم يندهش الجميع عندما وقع منه (سلسه) الذي يلبسه لبسة كرباوية خوفا من (الهبايب) التي يتوقعها ان تهب عليه ما بين لحظة والتانية..
وله دافع اخر في جلدة (ارنوب) فانها (توحة) شقيقة ارنوب الخلاصية التي هام بها وجدا وتكسر فيها
كسيرة جعلته (لا ينوم ذاااتو) الا انها طقعت له طقيعة معتبرة وقامت في احدي المرات بكسره كسيرة ليها ضل شهدت لها كل المدارس فصار 0(نادر جكس) بلا وش ومن اليوم ديك (ختاها) لال ارنوب في حنانه وصار يتربص لحظات الانتقام..
التي انبري اليها مهرولا بشعره المجزوز وليس محلوق (جزة) بت لذينة وبنطلونه الدسيس او كما كان يوصفه في الية عمله الجكسية التي كانت تعتمد علي الحنك السنين والتمكن من الجلكسة حتي تسري وتشيل
في الجكسوية ..ثم ياتي ليحكي لاصدقائه في شلة الستة الكبار فيما صار في امر تلكم الصيدة الداقسة,,[/BLUE]

الحمد لله فى المدارس عندنا ماكانوا بدقونا زيكم
لكن نحكى ليك اطرف دقه فى الثانوى العام
يوم كان فى زواج ناس اهلنا فى الابيض
غبنا نحنا تلاته
منى خوجلى وهدى محمد بشير الفكى
جينا المدرسة من الصباح المدير نادانا
مولانا عبد القادر عليه الرحمة
سال منى
ـ ماجيتى ام مالك ؟
ـ ما كان عرس اختى يا مولانا
ـ اها رقصتى ؟
ـ كيف ماارقص مش عرس اختى؟
ـ امشى عفيت منك
ـ هدى بت محمد بشير ، مالك غايبة امس ؟
ـ كان عرس اخوى
ـ رقصتى ؟
ـ الله كيف يا مولانا
ـ امشى عفيت منك
وجاء دورى
ـ بت الناظر مالك امس ؟(اللقب ناتج من ان ولدى كان ناظر محطة الابيض )
ـ ما كنا فى عرس اولاد عمنا
ـ رقصتى ؟
ـ لا يا مولانا
بغته انهال على بالضرب ، من النوع المبرح ، اى مكان فى جسدى كان عرضة للضرب
وهو بين كل ضربة يقول
ـ ما رقصتى ؟ ليه ؟ اول بعرسوكن كيف كان مارقصتن فى الحفلة ؟
وبالجد ما كنت عارفة اضحك ولا ابكى ؟
شكرا ليك يا كيكى على الحكى الجميل
ولك حبى الابدى

Quote: ـ ما رقصتى ؟ ليه ؟ اول بعرسوكن كيف كان مارقصتن فى الحفلة ؟ وبالجد ما كنت عارفة اضحك ولا ابكى ؟

هلا يا سلمي
وديمة غامرانا بالحكي اللطيف
واستاذكم ده الذ زول ومتصالح مع الحياة وعارف من وين بتجي القصص
والاعجاب والعروض..
وانتي كدي تعالي الما برقصك شنو يا سلمي مادام فردك (حتو قرض)..!!!

ولا تزال جموع الستة الجائعة والمتلهفة للمشاركة في جلد (ارنوب) تتقاطر كلا بدوافعه وبقج بايتة
ورغبة اكيدة في الطقطقة التاريخية للشفت ارنوب حتي يعم الخبر الفيافي وكراكير فريق (زنقوما)
حيث ليالي الطرب والجكسوس النابحة ناس(حنان حبة) (ورقية جلكسة) ولابد من قبض بعد الاجواء
واشاعة الشمار وانو الليلة (زولكم العاملين ليهو توم وشمار) اطقطق طقطيقة (بيلو)...ز
وطقطقية بيلو هذه قصة مشهور تترد في بين قدامي عتاولة (فريق زنقوما) فقد قيل ان بيلو هذا كان فتي جميل المحيا
وعذب اللسان وكل جكسوية تمارس حق الله بق الله معاهو يفتنها بالجلسكة وتشيل فيها مكنة طوالي..
وقد لوحظ ساعتها بان قد خرت الجميع واستحوذ علي كل (السلطة والثروة الجكسية) (موتمر وطني بس)
فقام الكلام ده ما عجب شباب الحي الذين قرروا بان يلبدوا له في كمين ابن لذينة في احد كراكير وخجانين الحي
ليضرب ضرب غرائب الابل ويفعلوا به افعالا لاتليق وانت كتبت يعطيها بكري ابوبكر هذا (******) الكود....!!!!

ويطل قادمنا الخامس الي منصة (الاربع الكبار)
عمر ادم كورنر
او في مقولة اخري ادومة..وادومة في جريته الشهيرة وهو الذي اشتهر كا ابو (كرنك) لم تعيقه الاعاقةالظاهرة في رجليه من الركض ومحاولة لحاق السوق الجلدي حتي ينال هذا الشرف الذي يصر عليه اصرار عجيب ومضحك وان تلاحظ وفي كثير من المرات بان الاستاذ قد قام ابعاده من التشكيلة الاساسية في (الرفع الرباعي) الا انه يصر في كل مرة من المرات للوصول الي المنصة قبل الاخريين
ليس لديه دافع او بقج غبائن تجاه(ارنوب) بل هي محاولات اثبات الذات والاهلية باداء مهام المدرسة الجسام في عصر استاذ ابكر الذي اشتهر بخاصية (الضرب الرباعي)..
وبينما ما يزال استاذ ابكر فاغرا فمه في هذه الهجمة الشرسة المحمومة من خط مية غرب والفصل يعج بصمت قبور
وارنوب الشفت يلاحظ لهذا المارثون بعين قوية وقلب اسد وغموض لم يكن الجميع لحظتها يتوقع ان يكون من بين الراكضين المهرولين (ادريس بمبي)..!!!!!
ادريس بمبي لا حول ولا قوة الا بالله
ولد كعب بل يمكن ان تقول بانه راجل كعب والوحيد الذي يمتلك (شنب) له ضلا بين الجموع الطلابية تلك
وايضا عرف عنه النزوع للوحدة وفرز العيشة وايضا عرفت عنه نزعات(كعبة) ذات علاقة بالمثلية واراد ان يروج لها بين هولا الابرياء الا ان (عمرةمشكلة) كان هو المتصدي له دوما وبجانب سمعته الردئية في زقاقات فريق (زنقوما) المختصة بشوون الرجال الكعبين خلاص
تف عليك يا (بمبي) يا وسخان ..!!!
كانت هذه هي التونة التي يستقبله به الجميع في ترحاله وحضوره المتاخر الي ساعات الفصل...
واكتمل الحضور وتمام الستة الاشرار في انتظار اختيارهم في هذه الرفعة المميزة الشهيرة...