قصـــيدة حــب للوطــــــــن

قصيده حب للوطن, تفتقت بها عبقريه الشاعره الاستاذه اسيا سيكينجا بمناسبه استقلال السودان
والقصيده ذات كلمات بسيطه ولكنها معبره داعيه للوحده والتعايش السلمي بين ابناء الوطن
وقد نشرت بجريده الدوحه القطريه في عدد اليوم الثلاثاء 1/1/2008
_________________________________________________________

ليك يا وطن غالي الثمن روحي فدا
صلوا وكفى ع المصطفى ذاك الحبيب
شيلوها سين غنوها لام ختوها ميم
طير يا حمام طوف بالبلاد حي الغرب
بلغ سلام ناس الشرق
أسمع كمان ناس الشمال لحن الجنوب
لا للحرب لا للشتات لن نفترق
شعبا جميل فيك يا وطن عزة وشموخ
طول السنين عبر الزمن
شعبا عصي ما بينهزم
بين الشعوب سيد السماح قايد الرسن
عالي الذكاء علم حروف خير الدرس ساعة المحن
شايل تقيل جبل الهموم ما كل يوم
حو العيون خاتيك در
خاتي العشم فيك يا وطن
بلد أمان لي شعب حر
يعرف يمد حبل الصبر يعرف كمان حد الصبر
عبر العصور شعبا جسور ساعة يثور لا يخافلو بوت لا يهاب رصاص
لا حرامي ليل عكر مزاج أحلاموديك
شعبا عظيم ذاك الهمام ما بينحني
قلبو الحنين دايما عليك
ليك يا وطن إبناً وفي داير رضاك كايس عفوك
ذاك الجسور الروح تهون يهديها ليك
علشان تكون سامي المقام عزة وكفى
في الساعة ديك يرقد قفى ويحلم كتير
لا زول دخيل عبر الحدود
لازيل عميل داخل الحدود
حلمو الجميل وطنا وهيط يسع الجميع ما أجملو
الكل حر ما بينا سيد والكل يكون
ضد البخونك يا وطن
والعيش وفير ما عيش كفاف
عيشة هنا والكل سعيد
والكل صحيح مافيش مرض
حتى إن مرض يلقى الدوا
ويحلم كمان لما الصغير يصحا الصباح يلقى الحليب
همة ونشاط بهجة وحبور مشوار فرح للمدرسة
ساعة الفطور وسط الفصول مطعم جميل
لا دفع كاش لابوي يقول اخر الشهر بنجيبها ليك
لا جيب كتاب لا قلم رصاص مخزن كبير والمكتبة
كل المعلرف والعلوم ينهل كتير يتعلى فوق
يشعل شموع- تشرق شموس ضي النهار
عافية صباحك وضل ضحاك يبقولنا توب
وقت العصر وتحت سماك نتباهى بيك
نمشي ونجري
وليبك شليل تحت القمر نتحاجي بيك
يجمعنا شي
ما هو حبك يا وطن
ما هو حبك يا وطن
_______________________________________

التحيه للاستاذه اسيا عوض سيكينجا

الأخ عمر بوب كل عام وانت والأهل و الوطن بألف خير
ومشكور علي الإختيار الموفق والتحية عبرك للإستاذة آسيا سيكينجا.