هارموني..النيل الأزرق..الشروق..ساهور.. تلفزيون السودان ..أين تجد نفسك ؟

زمان القناة وااااااااااااحدة والوشوش وااااحدة يسرية محمد الحسن وجريدة المساء والفاتح الصباغ ونشرة الأخبار والساعة 8 المسلسل المصري وتجيك المذيعة قبل ربع ساعة تحكي ليك البرنامج كللللو ده إذا ما حكت ليك المسلسل ودعاية كلين وهاهاهاها كلين ..التلفزيون يبدا الساعة تلاتة بي القرأن ونشيد العلم ومسلسل الأطفال ويقفل الساعة 12 بي شخخخخخخخخخخخخخخخخخخخخخخخ..
الواحد كان بيفرح عدييييل لمن يشوف الخطوط الملونة كما قوس قزح وصوت الفنان في الخلفية والغناء شغال تمهيداً لبداية التلفزيون ..
الساعة 4 أولاد الجيران كلللهم يجو يتلموا في البيت البيقعد قداااام ووشو أقبش والجاييكم وبنطلونو مشروط وديك شايلة ليها تسالي ويستملوا منكم التلفزيون عديييل في إنتظار عالم السينما والمسلسل..
أسة الوضع إختلف والشغلانة جابت ليها ديجتال وطبق ورسيفر وشي لبناني وشي يوناني وشي وشويات وشي مشفر..
مع هذا الزخم الإعلامي الفضائي حاول السودان الدخول لقلوب محبيه ومشاهديه عبر فضائيات مختلفة ..
وإن إختلفنا حول المادة المقدمة وإعلامنا العجيب بالرغم من ده كلو تدخل بيت أي مغترب سوداني وتشيل الريموت تجد قناة السودان رقم واحد والنيل الأزرق رقم إتنين(بالرغم من إنها مشفرة) وساهور رقم تلاتة والشروق أربعة وهارموني خمسة ومن ثم باقي القنوات ..
ممكن العكس يكون حاصل بالنسبة لي ناس السودان القاعدين في السودان وتلاقي قناة السودان رقم 257 إن وجدت ولا حياة لباقي القنوات السودانية ..رقم واحد اكشن ورقم إتنين روتانا ورقم تلاتة قناة الألبسيLBC..
ده ما إستفتاء بقدر ما هو فضول لمعرفة الذوق السوداني تجاه قنواته الفضائية ما يقدم وما سيقدم ..
تلفزيون السودان على مر الزمان لم يطوّر نفسه وإن كان يحاول ولكنها النمطية المعهودة ..
الساعة 8 مساء المسلسل ..
الأخبار الساعة 9 (بالقديم طبعاً )..
يوم السبت السهرة لازم تكون كعبة ومملة وغالباً سياسية ..
الخميس لازم تكون سهرة بهجة ..
يوم التلاتاء على حسب ..
تختلف المسميات والبرنامج واحد ..جريدة المساء .من الخرطوم سلام .فترة المنوعات..عزيزي المشاهد.
قبل العيد بي يوم السهرة تكون عن برامج العيد ..
أول يوم في العيد بيكون ماذا تشاهد في ثاني أيام العيد ..
وثاني يوم ماذا تشاهد ثالث أيام العيد ..
وبعد العيد يعيدو ليك برامج العيد ..
وقبل العيد يعيدو ليكم برامج رمضان ..
النيل الأزرق لمن دخلت غيّرت مفاهيم كتيرة في نفسية المشاهد السوداني بالصورة والواضحة والصوت الواضح والديكور الجميل ..
إبتدعت برامج جديدة بأفكار جديدة ووجدت القبول والإستحسان وصارت قبلة الجميع ..
شوية شوية ودخلت في نفس الدوامة إختلاف الأسماء وتشابه البرامج ..
لقاء مع وجود فنان ..
الموضوع عن الإيدز ضيوف وفنان ..
الموضوع عن طهور البنات لقاء وفنان ...
الموضوع عن البرامج النووية لإيران ضيوف وفنان..
الموضوع عن تفسير سورة البقرة ضيوف وفنان..
ورغماً عن ذلك تجدنا ملتفين حول القناة مما يؤكد أننا شعب فرايحي يحب الموسيقى والطرب مخلوطاً بكبسولة الثقافة ..
ظهرت قناة هارموني وحاولت أن تجد لنفسها موطأ قدم بتقديم شكل جديد يعتمد على سودنة القناة وتقديم كل ما هو سوداني..
الفكرة كويسة والتنفيذ غلط ..
التكرار أفقد القناة نكهتها وإن كانت ستجد الرواج الكبير بفكرتها المعتمدة على القبل الأربعة وتخاطب الجميع فلكلورياً ..
المواد المقدمة جميلة وإن كان بعضها يصل حد(الهبوط) ولكن تبقى الفكرة في إكتشاف المواهب..
هارموني قناة سودانية مية المية غير مستلبة ثقافياً وإن كانت تحاول من خلال الفيديو كليب تقديم الطابع الأجنبي لبعض الفنانين ..
ظهرت ساهور وهي قناة متخصصة في مدح المصطفى صلى الله عليه وسلم ووجدت الإستحسان في البدء ولكن سرعان ما تضاربت المواقف حول هوية المديح وفقدانه لبريقه وروحانياته في ظل الخلط بين المادح والفنان ..
فرفور يغني الجلابية بيضا مكوية ويمدح قوماك لي مدينتو نسافر ..
عصام يغني يا روعة لو عز اللقاء ويمدح طيبة دار الصوفي..
احمد بورتسودان يغني تقوم بينا العربية تودينا للسادة ويمدح صلواتنا الخمسة ..
عافية حسن المكياج يقول يا غربتي ويا حنين زي عش العصفور وتجي تمدح ليك المصطفى مني ليك سلام..
المديح الكان بي طار بقا بي الأورغن والوقار بقا جبجبة والفنان بقا مادح فاختلط الحابل بالنابل وضاعت الفكرة ..
الشروق ظهرت ووعدت بتقديم كل ما هو جميل وإبتكرت نظام الإحتراف الفضائي وسجلت محترفين مصريين وشوام ودعمتهم بلاعبين محليين ولكن حتى الان في إعتقادي لم تصل حد جذب المشاهد بشقف وإن كانت الشروق قد تميزت بعدم التقليدية بتوفير برامج مخصصة للعيد وواصلت برامجها الإعتيادية ..
في إعتقادي الخاص إنو كل القنوات دي بيتحكم في برامجها الغفير بتاع كل قناة ..
الغفير بيكون قاعد في البوباة بتاعت النيل الأزرق يقوم يشوف ليك فرفور طالع من تقلزيون السودان يقوم يجرّو يجيبو لي ناس النيل الأزرق فيظهر فرفور اليوم في السودان وبكرة في النيل الأزرق..
عمر إحساس يجي طالع من النيل الأزرق يقوم الغفير بتاع ناس هارموني يجرّو من إيدو يدخلوا لي ناس هارموني ويقدم نفس الموضوع ..
غفير ناس ساهور يشوف ليهو فنان جديد طالع من ناس الشروق يجيبو لي ناس ساهور يعلموهو المديح ..
عموماً بين هذا وذاك وبين شروق وهارموني ونيل أزرق وتلفزيون السودان أين تجد نفسك ..
ولمن تتوقع الغلبة ؟
ومن منهم سيسحب البساط إعلامياً ويقدم سوداناً جديداً ؟
وهل من المتوقع أن تصبح إحدى هذه القنوات قبلة للعرب ؟

Quote: وهل من المتوقع أن تصبح إحدى هذه القنوات قبلة للعرب ؟

ود الفاروق الهلالابي
حسع يجوك ناس تراجي ومرتضي جعفر ويقول ليك ليه قبلة للعرب !
مع ان
1) القنوات المذكورة كلها تبث بالعربية ، لا بلغة الهوسا او السواحلي .
2) المشاهد السوداني ليس هو بالمستهدف الوحيد لمعظم هذه القنوات.
ويبقى حق الاختيار سمة هذا العصر ونحن مع كل شيء جميل ومن مختلف القنوات

Quote: الموضوع عن البرامج النووية لإيران ضيوف وفنان.. الموضوع عن تفسير سورة البقرة ضيوف وفنان..

ودكتور...
وأول حرف من اسمه عمر خالد..



_____
لا قيمة للأفكار العبقرية إن لم تنفّذ..

عاوز استفسر

هارموني حقت الجعيلي
النيل الازرق تبع ART
شروق مرتضى (الفاكيها في روحو خريج جامعة الخرطوم) قال حقت المؤتمر الوطني

ساهور دي شايته على وين ؟!

تحت البطانية .. يا اخوي


..

كل سنة وانت طيب

سودانيز اون لاين

الاثارة

المتعة

الشكل

الكوراك

الضحك

الحب

البغضاء

البطاطس باللحمة

البطيخ

سودانيز اون لاين موش حاتأدر تغمّض عينيك !!

ماعندي غير تلفزيون السودان الباقي مشفّر !!

و

فكوني ياخ

Quote: في إعتقادي الخاص إنو كل القنوات دي بيتحكم في برامجها الغفير بتاع كل قناة ..

عيدكم سعيد ...
الفاروق .. Thanx for the tip "الغفير " ... زي وكيل الافوكاتو المصري وفي النهاية بيترافع امام المحاكم بعد ان ينال شهرة واسعة علي انه "دغرم" وبيعمل من "الهوا دوكو "....
ستة واربعين سنة تجربة التلفزيون السوداني ولم ينال خبرة المحترفيين .. وفي بلد كلبنان عمر التلفزيون اصغر بكثير عن السودان والحال في كل بلاد الشام والخليج وشمال افريقيا عدا مصر التي سبقت السودان بكام شهر فقط ...اذن هناك خلل كبير في تعامل السودانيين مع هذه الاداة الاعلامية كمشغل ومدير ومتعامل ومشاهد ....وبالتالي اذا لم تتمكن القناة الرسمية من نيل درجة مقبةلة في الاداء وهي الاطول عمرا وتجربة وكل الذين نراهم في القنوات الجديدة من بي ان والشروق وساهور وهارموني اتو منها او دربو عندها او عند من تخرج منها اذن خلل قومي اعلامي ...لا يكفي الاشارة الي نفر هنا وهناك في قنوات غير سودانية ونال قبولا فالامر ليس هو وانما مقدرة تلك القنوات علي استنباط ما هو فيه او فيهم من امكانات كما هو الحال مع بقية المهن التي تبرز في خارج البلاد ...
سوء الادارة Bad governance الذي لازم كل حكوماتنا وانظمتنا السياسية والادارية خلال العقود الخمس انعكس علي كل محاور الحياة في السودان وسوف لا يستقيم اي عمل او انتاج دون ادارة عليا ناجحة وهنا فالامر كما نراه يسير من سئ الي اسوء .....

مودتي
ابوبكر

أخونا الSunda :
عيدك مبارك ..
أما بخصوص ناس تراجي فأخوك جاهز موية ونور والمنبر ده علمنا الللعب والكضب..
إنت قايل الفرق بين العرب زالغرب شنو ؟
مي ياها النقيطة دي ..
يعني كان جو كوركو تقول ليهم انا قاصد "الغرب" بس الكيبورد بتاعي ما فيهو عربي ..

الفاروق الجميل



كل سنة وانت طيب ..

مختفي مالك ؟

الظاهر مسمار القلوظ كان حارشديددددددددددد ..

وهاك الهدية دي من قناة الله لي

التعدد زياده و تنــوع ليحصــل المتلقى على مــا يريد
ان وجــد !.

و عيد سعيــد ..

وليد المبارك :
يا زول من زمااااااااان ساهور لصّقوها ليك في زوجة على عثمان محمد طه وقالوا حقّتها ..
ناسنا ديل ما بتغلبهم حيلة تب..

تخريمة :
يا نجوان الكلام الكباااااار ده ما بنقدر عليهو أدينا ليها بسييييتة بسييييتة

Quote: لا قيمة للأفكار العبقرية إن لم تنفّذ..

ما قلت ليك حا تجي الكورة ونلقاك بقيت ناقد فني!!



مأأك مُُؤليم يا!!

قناة المسمار كيف؟؟

جابو فيها خروف بيضبحو فيه وكاتبين تشاهد غداً حضرتها؟؟

ورينا رايك!!

خصوصاً في برنامج الضبح

وفي المطرب علاء الدين

حبيبنا عمر الفاروق .. والله كدا أخير ليك

ربنا رحمك من سخف الكورة وعوارتها

بالنسبة لي انا .. انا شايف إنو الشروق

هي الأميز في الساحة لإنو التقنية المستخدمة

عالية جداً وتضاهي أرقى القنوات العربية والعالمية

وفي رأيي انها القناة الوحيدة القادرة على سحب البساط

مت تحت بقية القنوات العربية والعالمية

تخريمة :

أكتر برنامج بكيفني يا ود الفاروق .. من سيربح المسمااار

عمر الفاروق تحياتي وكل عام وانت بألف خير مقال مميز بالجد وتحليل قمة في البساطة والعفوية
أنا اجد نفسي في القناة السودانية في أخبارها الرسمية فقط وبعض من سهراتها
النيل الأزرق في الجراءة في تقديم الجديد والمسكوت عنه في البيت السوداني
ساهور بعض المدحات فقط
هارموني لن تستمر طويلاً (التكرار الممل للسهرات والاغاني والمدائح واللقاءات)
الشروق شمس السودان التي لا تغيب كما يقولون لديها القدرة على اكتساح جميع القنوات السودانية خلال الفترة القادمة واستمالة من لديهم القدرة على الابداع والتميز من الكوادر الإعلامية الموجودة في القنوات المحلية، أجد نفسي بعض الشيء منحاز للجديد الشروق الاخبار الطازجة والمراسلين المنتشرين في جميع الولايات السهرات حتى الآن سهرات سوركتي هي المميزة والتي تظي بالشعبية المفرطة الشروق مرت منها برنامج إجتماعي تكافلي إعاني بحت ما زال الطيب عبد الماجد خارج الفورمة حتى تاريخه سوركتي ومحمد موسى ماسكين الجو

الشفت قلت لي ساهور تبع منو دي ما تبعكم يافردة يعني عائزة درس عصر ما سوداتل

الحنين أحمد :

Quote: تحت البطانية .. يا اخوي .. كل سنة وانت طيب

وانت طيب اخوي..
وانت الصادق ما تحت البطانية راجي إتصال من الشباب عشان وروني مكان وزمان لمة بورداب الرياض في العيد ..
اخر عهدي بيهم بعد الإجتماع يوم الوقفة ..
أها حددوهو؟

ندى العنبر

Quote: سودانيز اون لاين موش حاتأدر تغمّض عينيك !!

المشكلة سودانيز تلفزيون مش حاتأدر تفتّح عينيك ..

تخريمة :
خليهم يجيبوا لينا زي سلاف فاخورجي وياسمين عبد العزيز وشوفي كان نغمض عينينا..

الأخ ابوبكر:
عيدك مبارك ..

Quote: ستة واربعين سنة تجربة التلفزيون السوداني ولم ينال خبرة المحترفيين .. وفي بلد كلبنان عمر التلفزيون اصغر بكثير عن السودان والحال في كل بلاد الشام والخليج وشمال افريقيا عدا مصر التي سبقت السودان بكام شهر فقط ...اذن هناك خلل كبير في تعامل السودانيين مع هذه الاداة الاعلامية كمشغل ومدير ومتعامل ومشاهد ...

زمااااان ناس الخليج هنا كانوا بيضحكوا في لغة الشوام لبنانيين وسوريين وعاملنهم تريقة ..
أسة المثقف والمثقفة والراقي والراقية عايزين يتكلموا لبناني والسبب هو الغزو الثقافي الإعلامي التلفزيوني عبر قناتي المستقبل وال LBC ومن ثم البقية أتت..
فهل إستفاد التلفزيون السوداني طيلة هذه ال46 عام ليغزو العالم بلغته ونسمع كويتية مثلاً تحاكي كلام سلوان وإماراتي يحاكي كلام حمزة عوض الله ؟
إلعامنا لم نستقله الإستقلال الأمثل مع العم بأننا نسمع دوماً بإسطوانة الكادر السوداني كادر مؤهل وعالمي ..والكارثة الأكبر تبقى في أن مخرج قال لي بأن الكاميرات في التلفزيون السوداني هي من أخر الإصدارات !!!
أها المشكلة وين الكادر في والإمكانيات في وبعد كده الصورة ركيكة والصوت كعب !!!

.



ممكن أهدي؟

تاني تجي الحلة؟

ما قلنا ليكم ما تمسكوا المرفعين من أضنينوا قلتوا أنحنا نوبة ونسينا الهوبا.

شابكننا "الخلعة" و"هجمة مريخية على لاعبي هلال برشلونة" "ويا مساكين"

هو مين مسك مين بالمناسبة؟

واعلام المريخ وحمار البطيخ..

أقول ليك نادي تمبس يمسك المرفعين بدلك وزوغ.