احتاج الي دعمكم بارسال اي مواد بها حكاوي واغاني سودانية للاطفال؛ كما اي مواد تربية الطفل - وخصوصا الطفل السوداني - ؛ وكذلك اي برامج مجانية - شيروير او فري وير - تعليمية للاطفال؛ وكذلك اي لعبات الكترونية للاطفال.
مطلوب ايضا مساهمات الاطفال وخصوصا فيما يتعلق بالرسم؛ الكتابة الادبية؛ الاراء والتعليقات الطريفة؛ الصور المبتكرة؛ الخ الخ ..
الموادمطلوبة في اللغتين العربية والانجليزية؛ واي لفات سودانية اخري؛ وكذلك في اللغات الحية الاخري ..
الاستاذ عادل عبد العاطى اظن الحجات لابنتك . ربنا يحفظها و يخليها ليك اظن انو (انور كنق ) عندو ركن للاطفال فى موقعو . ممكن تشوف فيه شنو . ان شاء الله تلفى حاجه مفيده
عادل ، سلام أظن الكلمة المفقودة هنا هي : كسرة . لأستاذ بشرى الفاضل قصيدة بعنوان هجائيات استخدم فيها اغنية اطفال السودان الشعبية هودنا استخداما بديعا في هجاء نظام الجبهة الاسلامية . الهودنا التي يستغرب الأطفال سماعها بعد ان صمت آذانهم ب أنا ماشي نيالا أووو أنا ماشي هبالة أووو ـ الاستخدام الأخير أيضا لبشرى .
أماندا سألتني لو كنت فرغت من كتابة أغنيتها التي ستشارك بها في هذا الخيط ، اليك بها :
فتحي يا وردة غمضي يا وردة هنا كيس مليان دبابيس هنا شعرة ......... هنا حتة شوكولاتة هنا ابرة وخياطة عشرة عشرين تلاتين أربعين خمسين ستين سبعين تمانين تسعييييييييين ..... مية !
دي من كتابات محجوب شريف تبتبات اغنيات امنيات للاولاد والبنات ارشح ليك الشريط بشده جميل ومعبر وبسيط شديد وقريب للاطفال تاني في شريط كان طلعوه جمعيه حمايه البيئه وفيهو اغاني جميله اتمني تقدر تتحصل عليهم وان شاء الله اتمكن انزل منهم مقاطع
امنيه في الخاطر ويب سايت للطفل السوداني اتمني اقدر عليهو يوما ما
Post: #8 Title: Re: مطلوب:حكايات واغاني للاطفال ومواد ومساهمات اخري Author: Adil Osman Date: 12-04-2004, 10:03 AM Parent: #1
كنت اسمع "مرت جيراننا"تهدهد طفلها قائلة:[لما جابو لى بنية مالت الحيطة عليَا...لما جابو لى ولد اتشدا ضهرى و اتسند]..تذكرتها فى معرض الحديث عن اغانى الاطفال
التعلب فات غير عمي على يا عادل وافتكر الثعلب فات من الفلكلور المصرى اما عم علي فالاغنية هكذا: عمي علي بياع الزيت ساق مرتو وداها البيت غنمايتو مربوطة بخيط وفى البيت عامل زعلان وفى القهوة كاسر فنجان
ابويا سافر مكه جاب لى حتة كعكه والكعكه في الصندوق والصندوق عاوز مفتاح والمفتاح عند النجار والنجار عاوز فلوس والفلوس عند السلطان والسلطان عاوز عروس والعروس عاوزه المنديل والمنديل عند الجهال والجهال عاوزين لبن واللبن عند البقر والبقر عاوز حشيش والحشيش تحت الجبل والجبل عاوز مطر يا الله تنزل المطر ..
الفات الفات وفى ايدينو سبعه لفات والجبه وقعت فى البير وصاحبها واحد خنزير والهون ضرب التلفون وعم على بياع الزيت ساق مرتو وداها البيت وفى البيت عامل زعلان وفى القهوه شارب فنجان طاق طاق طاقيه الليله يوم الماهيه رن رن يا جرس محمد راكب على الفرس
من احجية دار العشير؛ والتي ينقلب فيها محمد الس نسر لانه تنفس اثناء شرابه من القلة في بيت الساحرة؛ ثم كان ياتي لزيارة اخته دار العشير التي اجبرها زوج اختهم الكبري علي العمل كخادمة؛ وهددها الا تخطر اختها بشخصيتها الحقيقية مخافة القتل
محمد : حباب حباب يا دار العشير اختي حالك كيفنو يا دار العشير اختي
دار العشير: حال حال السواد يا محمد اخوي شرابي من قحف جداد يا محمد اخوي واكلي مع الكلاب يا محمد اخوي ونومي فوق كوم رماد يا محمد اخوي حالك كيفنويا محمد اخوي ..
محمد: حالي حال السرور يا دار العشير اختي بشرب من سبعة بحور يا دار العشير اختي وباكل من عجوة كردفان يا دار العشير اختي ونومي فوق قوز رمال يا دار العشير اختي حالك كيفنو يا دار العشير اختي ..
الاخ عادل نحن خمسه اخوان و بنت واحده و هي اصغرنا وهي صغيره كان ابوي يغني لها هذه الاغنيه يا فطوم صنقر فوق عشان يشوف .... يشوف القوم قوم منو..... قوم عدلان يا عدلان سل السيف ختو فوق الكتيف جر الدم شالني بنات العم ختني في الابريق الابريق بلا حجبات انط البير بلا عتبات
الأخ عادل، كلامك عن العنف فى الكلمـات وضـرورة إعادة الكتابـة مهـم جـدا.. فطبعـا ما مفروض تكون أى فرصــة لذكـر دم وسيـف وكتل لأطفال يفـع. ليس هـذا فحسب، وإنما أقتـرح إعادة توطين هـذا القصص والأحاجى، localization حتى يفهمـا أطفال المغتـربين الذين ولدوا وينشـأون فى المهجـر.. أقتـرح تكوين لجنـة لحصـر ومراجعـة وتقويـم هـذا الكم الهائل من أدب الأطفال، والذى فى الطـريق، ثم تصل هـذه اللجنـة إلى إعادة صياغـة ما يحتاج إلى المراجعـة من هـذه المادة. كما أقتـرح أن يضم المشــروع كل الثقافـات واللغات فى الســودان، وإلا فسيكـون من الصعب علينـا أن نسميـه بثقافـة الطفل (الســودانى)
Post: #33 Title: Re: مطلوب:حكايات واغاني للاطفال ومواد ومساهمات اخري Author: محمد صالح علي Date: 12-04-2004, 03:39 PM Parent: #32
و الفات الفات أعتقد أنها أصلها مصري فالمصريين يقولون التعلب فات فات وفي ديلو سبعة لفات
ولعدم وجود مفردة التعلب (الثعلب ) ومفردة ديل (ضنب ) عندنا... تحولت الي الفات الفات وفي إيدينو سبعة لفات وهي كما كتبتها وانجا بإضافة والعسكر واقف طابور
لك الود
Post: #36 Title: Re: مطلوب:حكايات واغاني للاطفال ومواد ومساهمات اخري Author: محمد صالح علي Date: 12-04-2004, 03:57 PM Parent: #33
يا ود أم سكيكة يا بياع الويكة دنقر قش كرعيكا من آثار الويكة شن سموك يا بنية سموني القمرية مين ربوك يا بنية ربوني الشايقية عسكر الطابتية
لها لحن شجي
هنا لي أصدقاء (أطفال) جنوبيين لهم أغاني جميلة وحميمة أغلبها بلغة الدينكا
كنت قد بدات عمل التغييرات في الحكاوي عندما كنت احكيها لاولاد اخواتي في عطبرة؛ حيث كنت اشذبها من الالفاظ العنيفة والمعاني السلبية؛وكان هذا كله يتم "اد هوك" هكذا؛ الامر الذي كان يعرضني لمساءلات شديدة اذا ما حكيت القصة بطريقة اخري اواستخدمت كلمات ا اخري من قبل الاطفال؛ اصحاب الذاكرة الخرافية..
كا ن ذلك في زمن غبر؛وقد حاولت في التسعينات ان اسجل ما اذكره من حكاوي ؛ ولكن ضاع الكراس الذي كنت سجلت فيه عددا من الحاكوي؛ ولذلك اسال اليوم عن مؤلفات عبدالله الطيب وجمال محمد احمد علي اساس ان نبني عليها ونعيد صياغتها ..
اذكر في الثمانينات اني قرات مقالا رائعا - ربما كان رسالة - للراحل محمد المهدي المجذوب عن ادب الاطفال؛ اعتقدانه نشر فى جريدة الايام .. يهمني جدا لوكان بحوزة احدالاعضاء او العضوات ان يرسله/ ترسله الي ..
واحد اتنين سرجي مرجي انت حكيم ولا تمرجي انا حكيم بداوي الناس من الحمي ووجع الراس العيان اديو حقنه والمسكين اديو لقمه جيت ازورك يا نبي لكن بلدك بعيده فيها حمد وحميده حميده ولدت ولد سمتو عبد الصمد مشتو علي المشايه وغنت ليو يا جنايا
طبعا بعد تعديل المقطع الاخير لانو بقول ختفت راسو الحدايه معقوله بس دي والله انا ما انوم خلي شافع لوول
محمد صالح تحياتي لك ونوسه ..وسلوي دي عندها باقي بلقاهو ان شاء الله لانها عاجباني
احرضك بشده شديده علي ان تحاول تكتب نقلا عن اصدقائك الصغار اغانيهم بلغتهم الاصليه
لما كنت صغيرة... بلعب في التراب ماما لبستني... الجزمة و الشراب مشيت للافندي... اداني كتاب قال لي أكتبي عربي... كتبت ليه حساب و المزيكة تضرب... تن تن تن و الكشافة تكشف... كش كش كش آكل إيه... آكل عجوة أشرب إيه... أشرب قهوة أضحك كيف... ها ها هااا أبكي كيف.... إييييييي
لما كنت صغيرة... بلعب في التراب ماما لبستني... الجزمة و الشراب مشيت للافندي... اداني كتاب قال لي أكتبي عربي... كتبت ليه حساب اداني كف ..دردقني في التراب ..
انا من المهمومين بثقافه الطفل انا افيدك بانى املك كتاب الاحاجىالسودانيه او بالاصح انا ويحى فضل الله مناصفه ساحاول انزال بعض نصوصهه هنا وادلك على شريط فيديو قمنا بعمله فى ورشه خاصه بثقافه الطفل فىالمنظمه السودانيه لحقوق الانسان فى القاهره موجده فى منزل الدكتورحموده فتح الرحمن فى ميتشجان نسخه منه واخرى بمنزل دكتور صلاح الذين بفرجينيا وهناك ثلاث كتب اطفال من تاليف الناقد المسرحى عبد الله الشهير بكارلوس فى ارزونا يمكن ان نمدك بمعلومه منه قريبا فى هذا البوست واعرف انه من قرائه
كتاب الاحاجي السودانية اذا امكن ان تقومي بطبع ما تيسر ؛ وتصوير الباقي وارساله الي عنوانيب البريدي الملحق بالبروفايل؛ او تصويره بالاسكانر وارساله عبر البريد الالكتروني ..
ساحاول ان اتصل بالاستاذ صلاح الزين في فرجينيا للحصول علي نسخة من الشريط؛ رغم انو ممكن يكون زعلان مني؛ لاني مقصر معاهو
Quote: لما كنت صغيرة... بلعب في التراب ماما لبستني... الجزمة و الشراب مشيت للافندي... اداني كتاب قال لي أكتبي عربي... كتبت ليه حساب اداني كف ..دردقني في التراب ..
والله يا عادل النسخة بتاعتك دي اول مرة اسمع بيها لكن ضحكتني شديد
لا ازال اذكر في المتوسطة في اول ايامي بها؛ ان اصبت بكف درقدني بين الادراج؛وليس ذلك لاني كتبت حساب بدل عربي؛ بل فقط لاني دندنت بلحن وانا افتح الدرج لاستخراج كتاب؛ الامر الذي عده استاذ نصر الدين - هكذا كان اسمو - جحرما عظيما؛ يستحق كف من النوع ابو كديس ..
طبعا حنبكت لكن ما عملت حاجة؛ لكين قومت الدنيا وما قعدتها بعد داك لمن كنت في الثانوي؛ لمن استاذ جاهل ادا ياسر ود اختي كف؛ وحلفت الا اديهو كف وربطت ليهو جنب المدرسة؛ وهاك يا تحانيس وتدخلات من الاساتذة الكبار الكانوا درسوني انا ايضا ؛ لحدي ما خليت الحماقة لكن بعد وعد منهم انوعمرو ما ينضرب كف تاني ..
تحياتي عادل عبد العاطي بالنسبة لكتاب الأحاجي السودانية للدكتور عبد الله الطيب عندي نسخة منه ممكن اصورها وارسلها ليك على صندوق بريد اذا ما عندك مانع تدلني على صندوق بريدك
وكمان في نسخة من رسالة ماجستير بعنوان ( أغاني المهد في السودان ) للأستاذة لبني عبد المنعم المبارك هي أذنت بنشرها وانا بديت طباعتها ممكن ارسل ليك نسخ عبر ديسك بس دي حتأخد زمن لغاية ما اتم طباعتها
كاف نون زين كنز كنز كنز دخلي ايدك جوه يا فيفي تر را را وانتي استني وراها اقيفي ترا ريرا را ده الكنز مليان بعرائس يمسحو هم البائس فيهو اسود ونمور وافيال ترا را را فيهو حكاوي عن الاطفال ترا را را را فيهو زرافه و فيهو لطافه وفيهو الارنب ذوق و قيافه
شعر حسن امين وهي مقدمه لمسلسل اطفال تلفزيوني ولها لحن جميل ساحاول ايجاداها كامله
يحكى ان اسدا كان يملك رؤوس من الماشيه كثيرة, كما كان للضبع قطيع من الماشيه * ولكن الاسد لم يحافظ على ثروته فبدا ياكل منها واحدة بعد الاخرى حتى لم يتبقى الا ثور واحد وعلى العكس من الاسد كان الضبع يحافظ على ماشيته ويرعاها* وفى يوم من الايام ولد للضبع عجلا جميلا فاغتاظ الاسد من ذلك وتملكته الرغبه فى الاستيلاء على العجل الوليد من بقرة الضبع فدبر مكيدة حاول ان يجعلها بشكل قانونى حيث دعىجميع حيوانات الغابه لاجتماع هام وعاجل . حضرت كل الحيوانات ملبيه الدعوة حيث خاطبها قائلا ( يا ايها الحضور اسمحوا لى ان اتقدم اليكم بالشكوى ضد الضبع الذى اغتصب منى العجل الوليد الذى ولده ثورى ) اندهش الحضور وانعقد لسانهم ! وكان الكل فى حيرة , كيف لثور ان يلد? ولكن لا اد يجرؤ لى سؤال الاسد او الحديث عن الامر فاكتفى الجميع بالصمت خوفا من المصير المحتوم الذى سيلقاه وبينما همفى هذه الحالة المحيرة , مر الارنب من على البعد مهرولا وحاملا جرة ما الارنب كان على علم بما يحدث فرفض الانتظار بحـجه ان الامر لايعنيه وليس لديه وقت لانه مشغول بجلب الماء من النهر فسأله الاسد (ماذ ستفعل بالماء?) فرد الارنب بان ابيه قد انجب له اخا بالامس ويحتاج ان يستحم فسأله الاسد متعجب
(كيف لابيك ان يلد وهو ذكرا?) فاجابه الارنب (مثلما ولد ثورك) , فحجل الاسد وقام بطب القضية ورفع الجلسة
عــادل سلامات .. مشروع جميل جدا .. دي الاغنية القالت عليها تومــا .. لقيته بالصدفه معاي بحاول اتحصل علي الشريط .. وانزل باقي الاعمال الفيهو بشكل يمكن بيها تحويلو لي اي امتداد آخر ....
Post: #73 Title: Re: مطلوب:حكايات واغاني للاطفال ومواد ومساهمات اخري Author: معتصم دفع الله Date: 12-07-2004, 02:34 AM Parent: #72
العزيز عادل عبدالعاطي
جميل جداً أن تتطرق لهذا الموضوع الهام والشيق .. فأولادنا يحتاجون لمثل هذه الحكاوى والألعاب .. وكنا نظن أنها قد إندثرت ..
هناك تجربة ثرة للأخ معتصم الجعيلي في إنتاج أعمال ومسلسلات للأطفال .. كان أخرها فوزه بالجائزة الأولى لمهرجان سينما الأطفال بتونس .. ولكن إعلامنا لا يسلط الضوء على مثل هذه الأعمال المقدرة والرائعة .. ووعدت الأخ معتصم بأن أنزل له بعض الأعمال التي قام بإنتاجها هنا ..
لك خالص تحياتي وتقديري ..
Post: #74 Title: Re: مطلوب:حكايات واغاني للاطفال ومواد ومساهمات اخري Author: سماح سيد ادريس Date: 12-07-2004, 06:44 AM Parent: #73
هنالك أغنية باللغة النوبية... تغنيها الجدات للأطفال ليناموا.... تغنيها رشا شيخ الدين الان لم أستطع الوصول اليها فهل من معين؟؟؟؟
أستاذ عادل المرة الجاية بجيك بي حدوتة صغنونة بس خليني أجيب لي كباية شاي حمرا وسجارة بي أيي لون اللون مو لون الله.... ومن هسة لقيت ليها اسم ح تكون أحمد غايب لكن التفاصيل شكلها كيف !! الله اعلم!!!! دة بتعلّق علي شغل الكباية والسجارة
ويا ام احمد دقي المحلب احمد غايب في الركايب جانا كلب عيونو حمر سنونو صفر حلب الناقة الفي الشناقة والفوطة المخروطة خرطا الفار بي سنونو سنون الدود الدود الدود
