لكن ما بالغت يا حمد الريح ..!!

..
.
أن يحشد المؤتمر الوطنى 40 الف من كوادره ..
فى استاد الهلال .. لتدشين الحملة الانتخابية
لمرشحه الفريق عمر حسن البشير هذا ..امر طبيعى ومتوقع..

ان يتوافد الالاف من النساء والرجال زرافات ووحدانا
لحضور التدشين فهذا ايضا امر طبيعى ..

ان يتغنى جمال فرفور باغنية (البشير حلال الشبك )
ايضا امر طبيعى حسب انتماء فرفور السياسي كما قيل
او مصالحه الخاصة

ولكن ..
ان يتغنى استاذ وفنان بقامتك باغنية هزيلة الكلمات
وضعيفة الايقاع والموسيقى عن اوكامبو والمحكمة الدولية
لاجل دعم حملة المؤتمر الوطنى فهو الامر الذى يثير الدهشة..
والاستغراب ..!!

_________

حتى وان كنت ضمن مرشحى المؤتمر الوطنى
للقوائم النسبية لولاية الخرطوم ..

اوعي بس تكون من عينة انا بحب عمرو موسى و بكره يهود باراك هههههههههههههههههييييييييييييييييييييه

..
.

Quote: اوعي بس تكون من عينة انا بحب عمرو موسى و بكره يهود باراك

والله لا تقل عنهما ياD

--------------

ارسلها ليك فيديو ولا كاسيت

لالالالالالا ..
الراجل دا من زمان كدا ..

كانوا اجتهدوا هو و عثمان مصطفى و عابدة الشيخ و آخرين في ( خلق ) أغنية انقاذية بديلة للملحمة ؛
لكن وحياتك فشلت و بثوها مرة واحدة بس لضعف الكلمات و اللحن ( المجوبك ) ..

الساقية طبعا وقعت للراجل دا بالصدفة .. و لما غناها ما كان عارف ( الايحاءات ) الفيها ..

..
.

Quote: لالالالالالا .. الراجل دا من زمان كدا ..

بالله يا عبداللطيف
والله دى معلومه جديدة على .. ياخى الزول دا
انا فى الاسنكدرية قبال كم سنة كدا ..
والله غنى ( يا مريا )
قربت اسجد ليهو ومعاى كم نوبية كدا ..

-------------

خسارة والله يا استاذ حمد
ان تتغنى بلا فهم ووعى ..
ولا المام حتى بالايحاءات

سلام يا تبلدينا,,

ليس غريبا ابدا!!

فى زمن المصالح والمكاسب الشخصية, هان على البعض أن يبيعوا ضمائرهم ,,

والساقية لسة مدورة,,


الدفع هناأولا يا صاحب,, عملا بالمقولة القديمة!!

جات على حمد الريح!!!




تحياتى يا صديقى..

..
.
سلام يا صديق ..
طال غيابكـ ..

Quote: ليس غريبا ابدا!! فى زمن المصالح والمكاسب الشخصية, هان على البعض أن يبيعوا ضمائرهم ,,

لا اعتراض على القناعات او المبادئ المستجده
فى زمن المصالح والترضيات ..

ولكن المؤسف استاذ بقامه حمد الريح
ان يتغنى بكلمات ركيكة وسفاسف حروف
وامام 40 الف مشاهد فى نقل حى شاهده الالوف..
وكلها حول اوكامبو ..
دا استخفاف والله بما وصل اليه من مكانه
ومعجبين ..

-----------

الامر الاخر لا ادرى حتما تستمر مادية
جمال فرفور ..؟؟

من يرى الكنجالات ..
وما يلمها بكل السرعات
بيكون دقس مع الفارات
( مثل صيني )

يا تبلدينا

انا من زمان محتار في عمر الطيب الدوش وصلاح احمد ابراهيم

كيف يضيعوا قصائد جميلة زي دي ( الساقية ويا مريا )

تحياتي

Quote: انا من زمان محتار في عمر الطيب الدوش وصلاح احمد ابراهيم كيف يضيعوا قصائد جميلة زي دي ( الساقية ويا مريا )

صح لسانك يا ودالأرباب ، زي ما بيقولوا أهلنا الخلايجة..
ما بالغ يا صالح ، ياهو ده مستواه ومكانو الطبيعي ..








حمد الريح ده منو؟؟؟

حمد الريح من زمن (الساقية) كان معروفا بانتهازيته

وانتهازيته تجلت وقتها في سرقته (للساقية) من الأستاذ وردى.

فأضطر المرحوم الدوش لاعطائها له وتنازل له وردى أيضا

-------------------------

هذا ما سمعته منذ فترة طويلة جدا.

..
.

Quote: حمد الريح ده منو؟؟؟

قامة من قامات محس توتى ديل
لكن للاسف يا صلاح ..

دخل الفن والمحس وتوتى زاتها فى الطوفان

-----------

حليل نحن فوق عزنا قبايل ما بتهزنا
حسي تانى يقول شنو ؟؟

..
.

Quote: كيف يضيعوا قصائد جميلة زي دي ( الساقية ويا مريا )

والله خسارة عليهو روائع زى دى
ويجى يعمل زى العملو الليلة فى الاستاد دا

---------

مؤسف امر السودان وابناء السودان
من شعراء وفنانين وكذا الزعماء

Quote: كيف يضيعوا قصائد جميلة زي دي ( الساقية ويا مريا )

سلوك حمد الريح غير مستغرب..

لكن علاقته بالساقية لها قصة

فالدوش لم يمنح الأغنية لحمد الريح..

منصور (منصفون) هو الذي منح الأغنية لحمد الريح

بعد تلحينها بواسطة ناجي القدسي

بعد شرائه كافة حقوقها..فالدوش حينها كان في السجن

..
.

Quote: من يرى الكنجالات .. وما يلمها بكل السرعات بيكون دقس مع الفارات ( مثل صيني )

صدقت يا عمران


------------

او كما قال الصينيون :)

Quote: او كما قال الصينيون :)

غايتو الصينيين ديل (ترسوا) الحِرف جيّهوا!!

..
.

Quote: سلوك حمد الريح غير مستغرب..

والله يا حسام
انا بالنسبة لى امر مستغرب ..
الاستاذ حمد الريح ..
فى نظرى فنان قدير ..
تغنى باغانى نادرة ومميزة
طوال هذه الفترة كنت اعتبره حريصا
على اختيار الحرف والكلمة واللحن


-----------

صدقنى لا يدهشنى غنى لمن ؟؟
ولكن الذى يدهشنى اكثر غنى ماذا ؟؟

تبلدينا
كيفك

ياخى إنت البالغت

ياخى حمد الريح كان من أول تعيينات المجلس الوطنى والإنقاذ فى بدايتها..

أما أغنية الساقية فقد حكى لى صديق مقرب من أهل الفن أن الدوش بعد خروجه من السجن رفع قضية بواسطة الأستاذ كمال الجزولى..
وقتها حمد الريح لايعرف الدوش شخصيا ولم يلتقيه فى حياته..
وفى داخل المحكمة إدعى أن الدوش أعطاه الموافقة ليغنى الساقية..
فسأله المحامى : هل قابلت الدوش؟
قال نعم..
إذن تعرفه؟ قال نعم
فقال له الدوش موجود فى هذه القاعة؟
قال نعم
قال له أشر عليه فأشر على أحسن واحد مهندم فى قاعة المحكمة والدوش كان لابس جلابية بسيطة مما جعل الحضور ينفجرون بالضحك.

..
.
سلام يا د. بله

Quote: تبلدينا كيفك ياخى إنت البالغت

والله بالغ هو ..!!
معقولة زول يغنى كلمات زى الساقية ومريا كلمات واداء بالطريقة الرائعة التى اعرفها ..
يجى ينطط بكلمات شنو كدا اوكامبو يومك جا ؟؟
أغنية يا ماريا
الـســاقــيــــة
كلمات الشاعر عمر الطيب الدوش
غناء الفنان حمد الريح
الحان ناجي القدسي
السّاقيَه لِسّه مدوِّرَه
صوت القواديس والمياه
طلعتْ
مشتْ
متحدِّرَه
مـدَّ البصر
لف الظلام
حول الجداول أسْوِرَه
نعْسَان خضارهْا الانْتَكَى
وَرَمـى الغُصون
متْكسِّرَهْ
مَـدَّ الخـيـال
غنّتْ مُـدن
رقَصَت مـدن نامتْ مُـدُن
عاشت ليالي مُخدّرَهْ
والساقيَه طاحونة الأنين
طول الليالي
مدوِّرَةْ
تحت الهجير
تحت الظلام
تحت المطر
الساقيه لازم تستمر
***
الساقيه لسَّه مدوِّرَه
وأحمد ورا التيران يَخُب
أسيان يفكِّر مُنْغَلِب
ما بين بُكا الساقيه الهِناك
ما بين طُفوله بِتِنْتَحِب
في اللِّي ماشين المدارس
في المصاريف
في الكُتُب
في اللِّي ضاق عنّو المكان
وهسَّه سافَر
واغتَرَب
لِمُدُن بعيدَه تنوم وتصْحى
على مخدَّات الطَرَب
والساقيَه طاحونْةَ الأنين
طول الليالي بتِنْتَحِب

تحت الظلام
تحت المطر
عز الشتا
الساقيَه ثانيَه تقيف تكون
آمال عريضَه مُشَتَّتَه
واكباد صغيره مفتّتَه
تحت الظلام عِز الشِتَا
أحمد حكى
وسَّد الراس الضُراع
والشوف
نواحي النيل تَكَا
وصّاني أبُوي
الموج بيْهدم كُل رخوَه
على الجروف
شِد الضراع
زي المراكبي مع الشراع
لازِم تعرفو الظلم جاي
من وين عليكْ
وافتَح عينيكْ
على زهور الغابَه والأدغال
على الأطفال
وعشان يكون الحقِّ ليكْ
تَعْبُر بحور
تَهْدِم جبال
الحق هو هو النضال
والحق في ساحة مجْزرَه
والنصر للفاس
والرجال
ولي سواقي مدوِّرَه..

Quote: أما أغنية الساقية فقد حكى لى صديق مقرب من أهل الفن أن الدوش بعد خروجه من السجن رفع قضية بواسطة الأستاذ كمال الجزولى.. وقتها حمد الريح لايعرف الدوش شخصيا ولم يلتقيه فى حياته.. وفى داخل المحكمة إدعى أن الدوش أعطاه الموافقة ليغنى الساقية.. فسأله المحامى : هل قابلت الدوش؟ قال نعم.. إذن تعرفه؟ قال نعم فقال له الدوش موجود فى هذه القاعة؟ قال نعم قال له أشر عليه فأشر على أحسن واحد مهندم فى قاعة المحكمة والدوش كان لابس جلابية بسيطة مما جعل الحضور ينفجرون بالضحك.

----------

كدا ما كويس يا استاذ حمد..

بعد الانتفاضة فى ابريل
كان بيفتخر انو لم يغنى للنميرى
وسالو المزيع غير الساقية عندو شنو
قال اغنية طير الرهو
سلطات نميرى مفتكراها عاطفية
لكن اصلها سياسية وكتبها المرحوم اسماعيل حسن
فى الشريف حسين الهندى
عندما قابلو فى الحج
كل هذه الرموز النضالية
ويرجع يغنى للانقاذ
الحكاية اتضح انها مصالح
وحتى شاعر الساقية سلم على حمد الريح فى مناسبة بمساخة
ولما لاحظ ذلك شخص افتكر محمد وردى
قال ليه سلمت عليه كدا ليه
الشاعر رد وقال:
انا ذاتى ما اعطيته الساقية
هو براهو نط فيها

Quote: ان يتغنى استاذ وفنان بقامتك

عمري ما شعرت ( باستذة ) الزول ده ...

صالح حبيبنا

والله انا استغربت

الناس الغنو لي نميري زمان ما غنو كلام زي ده

حقيقة لا كلمات لا لحن

( حتى الصوت فارق والموسيقى فرقت كم مرة)


إلا تكون دعاية انتخابية لترشيح حمد الريح في الولاية

والله حمد الريح زول طيبان خلاص ..ماكان عارف الساقية بتعني شنو ولا طير الرهو ولا حتي أوكامبو دا ...الزول دا لو بقي مع (طيورو الكتيرة ) الغني ليها كان أحسن ليه من المرمطة الخاشي فيها دي ...الزول دا مرة تحس بيه كده أنو (ولي ) وجاء الغناء دا صدفة والمصيبة بأن الكثير من الشعراء حاولوا أن يمرروا شعاراتهم السياسية عبر حمد الريح (لانو مغفل نافع ) يعني حتي شاعر أغنية (حليلو الراحوا ) طبعا كان قاصد بيها وادي حلفا والهجرة وعبود والظلم بس لقي ليك حمد الريح دا ماناقش أي حاجة قال ليه غني الأغنية دي وناس الأمن لو الاغنية كانت من نصيب وردي لاذاقوه شر الهوان ولكن حمد الريح (لابيجدع ولابيجيب حجارة (وخلوه ينوح فوق النخل فوق النخل )...بس ناس الانقاذ ديل بالغوا حتي في دي قالوا لابد (من الأستغلال )....

إت يا تبلدينا وين فنانين البشير الزمان ناس شنان وقيقم خلاص فكوهم ولا شبعو ولا الحاصل شنو ؟

Quote: ان يتغنى استاذ وفنان بقامتك باغنية هزيلة الكلمات وضعيفة الايقاع والموسيقى عن اوكامبو والمحكمة الدولية لاجل دعم حملة المؤتمر الوطنى فهو الامر الذى يثير الدهشة.. والاستغراب ..!!

و الله حيلتكم كملت و ليلكم حيطول..
من قبل قلتم جون قرنق طبال و بيطبل للانقاذ ! طبعاً بعدما عملتوه ملهم أفريقيا و منقذ السودان .. لكن لما قال الحقيقة و أقر بأن هنالك تنمية في نيو سايت طوالي قلبتوا عليهو و قلتو بيطبل للانقاذ .. شيزوفرينيا!!!!

محمد وردي .. المناضل الجسور و فنان أفريقيا الأول ووووو ، و عندما دخل القصر الجمهوري و استنكر قرار محكمة الجنايات الدولية قلبتوا و قلتوا الراجل خاين و قبض فلوس وووو برضه شيزوفرينيا !

حمد الريح قبل يومين كان نقيب الفنانين و نال الدكتوراة من جامعة الامام المهدي و تهليل و اشادة لعنان السما!
و اليوم سبحان الله أصبح هزيل و باهت عشان الراجا اختار طريقوا مع المؤتمر الوطني.

منتهى التزمت و عدم احترام حرية الآخر
منتهى التناقض ...

معقولة بس يا استاذ هاشم
احترام الآخر مرة واحدة كده
يعنى اساسا هو فى آخر , من جانبك يعنى انت شايف انو فى ناس تانين غير ناس الأنقاذ فى السودان ؟؟!!
انا شخصيا , بعد مسيرة واحد وعشرين سنة انقاذية منفردة والآخر البتقول عليهو ده منفى ومغيب
منفى ومغيب شنو
مسجون ومكتول ومكبل ومنشول
تلقى الأنقاذ نفسها راجعة للمربع الأول الأنقلبت عليهو
وتلقى نفسها محتاجة للزول الغنى الساقية وطير الرهو , يرجع يغنى ليها المسخ المشوه بتاع امبارح ده
ومشوه دى , راجعة لتصنيف وتقييم غنائى بحت , ده فى الأول
خليك من تصنيف وتقييم السياسة
حمد الريح بأعتباره (آخر ) بالنسبىة لغير الأنقاذيين
هل بتعتقد انو ممكن يكون عنده (قيمة ما ) اضافية اكثر من الأأنقاذيين المالين البلد
ولكنه انتقص من (قيمته ) الفنية ولا شك
دون ان يخصم ذلك من قيمة ورصيد اى (آخر تانى )
واحد وعشرين سنة انفراد ونفى للآخر (ده)
وفى النهاية
تتوكأ الأنقاذ على على عصا (جماهير الهلال والمريخ )
باعتبارهما اكبر حزبين سودانيين
وكل هذا لا يكفيها
فتتوكأ على رصيد فنان زى حمد الريح
فلا يضيف للأنقاذ شيئا , بينما تسحب الأنقاذ من رصيده الغنائى والفنى
بالله عليك الله شوفوا تشويه الأنقاذ ده وصل لى وين ؟؟؟؟!!!!!
 

Quote: معقولة بس يا استاذ هاشم احترام الآخر مرة واحدة كده

نعم ! و هذه واضحة وضوح الشمس .. و هذه ليست أول مرة و لن تكون الأخيرة!
و لقد أوردت الأدلة من جون قرنق و محمد وردي.. نفس هذا السيناريو حدث من قبل

البعض يتغنى بالرأي الآخر و احترامه و لكنه سرعان ما ينقلب على عقبيه و يستنكر خيارات الناس لأنها لم تتوافق معه.

نفهم من كلامك ان عدم احترام (الآخر ) مستهجن عندك
من لا يحترم (الآخر ) عندك اتى بفعل شائن مستوجب لعدم الأحترام بالضرورة
وانت اوردت امثلة لكلام عن وردى وآخرين
ماذا اذن عن سياسيين سودانيين كثر
هم ليس آخر كما تظن
ولكنهم خيار شعب سودانى كامل
اتوا وتسلموا دست الحكم بخيار الشعب واختياره الحر
فنط (واحد ) من الآخرين البتقول عليهم
وحنث بقسمه , وكذب على كل الشعب , مستعينا بمن كان عرابهم مطبقين لمقولة امشى انا للسجن حبيسا وانت للقصر ريئسا
ومضى فى عدم احترامه لالآخر وخياراته ابعد مما تظن
ابعد بكثير من نقد فنى لأغنية , او حتى انتقاد خيارات تبدو سياسية للوهلة الأولى
ووصل بغيه الى القتل والتنكيل والفصل والتشريد
ما قولك فى فعل هذا الآخر
طالما انك ترفع راية احترام الآخر التى اتفق معك فى رفعها عالية وفوق الجميع
ولكنى لاافهم رفعها مرة
وتمريغها فى التراب مرات أخر
احترام الآخر يا صديقى
كل لا يقبل التجزئة
اذا كان ميزان عدلنا هو (القسطاس المستقيم )
الا ان يكون ميزانا معيبا قائما على (الهوى والمصالح )
عندها
لكم قسطاسكم , ولنا ميزاننا الذى نرفعه بنفس المستوى , كل الوقت

الأخ تبلدينا
لا غرابة في الأمر فهو من تكرم وسرق اسم الفنانين ليدخل ممثلا لهم في برلمان اللا إسلامين بالتعيين
الدوش بريء من حمد براءة الإنقاذ من شريعة الله تعالى في الدنيا والسماء .
تحياتي
الشفيع ابراهيم

يا جماعة

حمد الريح من يومو مايل للاخوان المسلمين

عقب انتفاضة مارس ابريل فى الانتخابات ده كان موقفو

تغنى باغنيات جميلة ؟ نعم لانه وجد فى زمن الجميل من الغنا

لكن هو شخصيا ده موضوع تانى خالص

انا شخصيا لم اكن احب غناهو حتى عندما تغنى بالساقية

Quote: ولكن .. ان يتغنى استاذ وفنان بقامتك باغنية هزيلة الكلمات وضعيفة الايقاع والموسيقى عن اوكامبو والمحكمة الدولية لاجل دعم حملة المؤتمر الوطنى فهو الامر الذى يثير الدهشة.. والاستغراب ..!!

تبلدينا

محمود للشعبية وحمد الريح للوطني ، ياربي نانسي عجاج وين؟؟؟؟
سبحان الذي اسرى بالمؤتمر الوطني من (قيقم) الي (حمد الريح)






اوكامبو دا مش كرتواتحرق

..
.
أوردت صحيفىة الرائد
فى ملحقها امس ابيات من كلمات الاغنية
مع اشارة بائة لهذا البوست الا اننى للاسف
ولظروف قاهرة كنت بعيد من التكنلوجيا حتى
اتمكن من مسح الخبر وانزاله هنا..

---------

الغريب انها اوردت بيت شعر وردت فيه كلمة لاهاى
وتجاهلت بيت ورد فيه اسم اوكامبو ..!!