وصفة سريعة: تود أن تصبح زعيماً.. كبّر العمة وقلّل الذمّة

تعتبر الولايات المتحدة الدولة الكبرى في العالم..
السؤال..
كم عدد الوزراء والمسئولين الدستوريين بتلك الولايات..؟؟
وكم عدد الوزراء والولاة والمعتمدين ووزراء الدولة ووكلاء الوزارات بالسودان والمستشارين والمساعدين بالسودان؟؟؟.

وقفة:
أعلم أن كثيراً من أهل منطقتي أو معارفي أو أهلي ممن ليس لهم مؤهلات علمية ضمن تلك الجوقة (وزراء، ولاة، معتمدين... الخ.. الخ).. هذا الأمر ينطبق على كل السودان وليس حصراً على المنطقة التي أنتمي لها وهي منطقة تعاني من الفقر وإنعدام الخدمات الأساسية.
.
.
بعد فحص دقيق وتحليل .. توصلت لوصفة ربما تكون ناجحة في حال الرغبة لكل من يود أن يصبح وزيراً أو مسئولاً حكومياً رفيع المستوى.. وهي كبّر العمة وقلّل الذمّة.
.
.
هذا البوست، تم تخصيصه للوصفات المشابهة للوصفة المذكورة أعلاه..
%

الحبيب وراق

العمة ما عندي ليها قروش
ومسالة الذمة دي حاره شوية
شوفى لي وصف تانية
تفرح الوليدات بتراب الميري

Quote: بعد فحص دقيق وتحليل .. توصلت لوصفة ربما تكون ناجحة في حال الرغبة لكل من يود أن يصبح وزيراً أو مسئولاً حكومياً رفيع المستوى.. وهي كبّر العمة وقلّل الذمّة.]

كبير العمة ساهل اما تغريق الذمة فهو يختلف من شخص لاخر بمقدار ما يحملـــه هذا الشخص او ذاك من درجة للايمان والتقوى والخوف من الله داخل قلبه .بمعنى ان المظهر لا يعكس ما بالجوهر .

يعني يا وراق خلاص الزي القومي قنعتوا منو ولا شنو

فتك بي عافية ..



ود الباوقة

ود الباوقة
تحياتي.،

Quote: كبير العمة ساهل اما تغريق الذمة فهو يختلف من شخص لاخر بمقدار ما يحملـــه هذا الشخص او ذاك من درجة للايمان والتقوى والخوف من الله داخل قلبه .بمعنى ان المظهر لا يعكس ما بالجوهر .

يا حبيب .. العلاقة عكسية بين تكبير العمة وتقليل الذمة يعني كلما كانت عمتك كبيرة وجلابيتك نضيفة وذمتك قليلة كلما كانت فرص نجاحك أكبر..
.
.
نشوفك في زوايا أخرى من تضاريس الرياض الملتوية..،

الحبيب عمار عبد الله
تحياتي.، ولك شوق

Quote: شوفى لي وصف تانية

طيب خد هذه... طرّق صوتك وخليك لعلاع.. الكلام ما بي قروش.. كله طق حنك .. ولا مش كده..

اسماعيل

Quote: طرّق صوتك وخليك لعلاع.. الكلام ما بي قروش.. كله طق حنك .. ولا مش كده..

يعني زي الصحاف الكذاب بتاع العلوج

في الحالتين كان كسبان

لازال نائم في العسل

الحبيب حيدر
تحياتي.،

Quote: يعني زي الصحاف الكذاب بتاع العلوج في الحالتين كان كسبان لازال نائم في العسل

يقطع ضراعي اليمين لو ما كنت لابد ليك فوق رأي..
.
.
نعم.. لازم تتمسكن حتى تتمكن.. وما بين المسكنة والتمكين مشوار.. يجب إختصاره بتكبير العمة وتقليل الذمة.

صدقت يل وراق

دعنى احكى لك حكاية واحد من بلدنا


انه لم يكمل تعليمه الثانوى وكان فى الابتدائى متأخرا دائما ، ترك التعليم وعمل فى مهنة والده وهى الجزاره ، يتميز ببسطة فى الجسم ووجاهه شكليه باديه للعيان ، ويتميز بالكذب ن يستطيع ان يؤلف لك قصه كامله كأنها حقيقه ، له قريب مسؤول كبير فى زمن نميرى وكان صديقا للنميرى وكان عندما يذهب اليه فى الخرطوم يأتى بقصص عجيبه عن لقاؤه لنميرى وسؤال نميرى عنه الدائم ، وكان يقلد خطب نميرى وكلامه عمل بعد ذلك فى مهنة اخوه الكبير وهو تصليح الراديوهات والتلفزيونات وكان لا يفقه شيئا فيها ولكنه كان يقوم باللازم ، عمل فتره فى التمثيل وكان من يلاقيه يقول له انا مخرج فى التلفزيون ، ثم فجأة دخل فى هذا العهد فى دورة تصوف كان يحمل الرايه امام بيتهم ويحوقل ويبسمل بدون مناسبه ، ثم فى هذا العهد دخل مع ناس الذكر والذاكرين وكان يقول انه يعرف الترابى شخصيا ويلاقيه ويعرف وصال المهدى زوجته ويحاول ان يتوسط للناس ، يقابل المحافظ بلبس فخم جلابيه وعمه وعصايه فى يده ، ثم فجأة تزوج الزوجه الثانيه وللحق حضر زواجه رسميين كثار ، ثم صار شخصا مرموقا ى هيئة الذكر والذاكرين وصار يدخل المطار حتى قرب الطائره ويخرج الشخص الذى يريده من هناك دون اجراءات تذكر ، ذهبت فى اجازتى الماضيه وقابلته فى منابة ، حضر بقربى وسألنى عن احوالى وقال لى لماذا لا تحضر ى فى مركز المؤتمر الوطنى ، قال لى انا مكتبى هناك وقلت له ماذا تعمل قال انا نائب الشؤون الاجتماعيه فى المؤتمر الوطنى ، وبعد ذلك عرفت انه قد اعطى منزلا مرموقا فى الخرطوم ويسكن فيه ومعه زوجتيه ، ولقد طلق قبلها احدى الزوجتين وتزوج بأخرى صغيره فى السن وخريجة جامعة الخرطوم ، وبعد الاحيان يسافر فى سفرت خارجيه ويحضر ، باديه عليه آثار النعمه وجمال الهندام .

ما هو رأيك ؟

الأخ ود الزين
تحياتي.،

Quote: ما هو رأيك ؟

عاد رأي شنو مع زولك دا.. والله دا فنان وفات الفنان ذاته..
.
.
برجع ليك بعد شوية .. أحكي ليك نماذج من الذين أعرفهم.،

الاخ اسماعيل

اها الجنس الاخر يعمل شنو

عشان يحظى بالوزارة

يكبر ربطة الرأس ويقصر الفستان

والله دائما كدة حقوقنا مهضومه ،،،

فتك بعافية ،،،

Quote: يكبر ربطة الرأس ويقصر الفستان

والله يا خالدة سبقتيني.. كنت عايزة اسال نفس السؤال ده..
خلاص خلي وراق يباصر لينا طريقة..
يخيل لي طريقته ح تكون قائمة على اننا نفك غطاء الراس وونصيف الفستان ..
الله يستر..

أبو السباع أخوي
خوفتني بالعنوان .. والله أصلو أنا الأيام دي قايم في حكاية الجلابية والعمة دي جديد ما كنت بلبسها ، لكين يشهد الله ما عشان موضوع الزعامة والذمة بتاعتك دي عندي سبب براااااي ح أوريك ليهو بعدين

قواسيب مودتي كما يقول أبو الحسين !!!

الطريقة الأولى (باللفة):

انضم لحزب في أقصى البسار، ثم بعد فترة أعلن انفصالك وأعلن انضمامك لأقصى اليمين، وألف كتابا في تجربتك السياسية: يجيبوك طوالي في برنامج ((أسماء في حياتنا)) وهو للشخصيات (المبرزة) في حياتنا.


الطريق الأقرب من ذلك (التمرد: مقعد مضمون على الأقل.. مستشارية):
كوَّن حركة مسلحة إنفصالية متمردة .. واضمن لك خلال سنة واحدة (من التفاوض في منتجع ما) مقعدا في حكومة الإنقاذ العسكرية. (ليس بالضرورة أن تجيد استعمال السلاح! لكن من الضروري أن تجيد استخدام اللوبي والإعلام). وأن تجيد السكوت بعد أن تضمن مقعدك.


أما الطريق (المباشر) فهو:
أن تطبل للإنقاذ.

وهذه صعبة وتحتاج أن تكون زول "غير طبيعي" أو تكون ما (زول)!

ابن عمي سلام عليك

والله موضوعك في السلك . انت عارف حاليا الزعامة عند اهلنا السودانيين اصبحت عندك كم؟. عشان كده الزمم ضاعت

يوجد في دبي حي يسمى الجميرا الايجار فيه بالشئ الفلاني . ماعليك الا ان تذهب الى احد شركات التمليك في ذلك الحي لتعرف كميه السودانيين الذين (يمتلكون ) بيوت بملاين الدولارات . دي يااخوي قروش الاعتمادات البنكيه ال من غير ضمانات ( يعني قرض بالملايين وبالواسطة فقط )

حبيبنا الزعامة الاسميه انتهت

Quote: الطريقة الأولى (باللفة): انضم لحزب في أقصى البسار، ثم بعد فترة أعلن انفصالك وأعلن انضمامك لأقصى اليمين، وألف كتابا في تجربتك السياسية: يجيبوك طوالي في برنامج ((أسماء في حياتنا)) وهو للشخصيات (المبرزة) في حياتنا.

الحبيب العوض الطيب..
تحياتي
الطريقة دي صارت غير مجدية.. دي كانت زماااااااان.. زمن أخونا أبو نضارات.. لكن الوقت دا لازم تكبر العمة وتقلل الذمة.. أو الإحتماء بالقبيلة والجهة.

Quote: أما الطريق (المباشر) فهو: أن تطبل للإنقاذ. وهذه صعبة وتحتاج أن تكون زول "غير طبيعي" أو تكون ما (زول)!

دي يا حبيب .. أسهل طريقة وأضمن طريقة كذلك فهي مجربة..

Quote: خوفتني بالعنوان .. والله أصلو أنا الأيام دي قايم في حكاية الجلابية والعمة دي جديد ما كنت بلبسها ، لكين يشهد الله ما عشان موضوع الزعامة والذمة بتاعتك دي عندي سبب براااااي ح أوريك ليهو بعدين

حبيبنا عادل جبارة
تحياتي.،
شايفك الأيام الماضية مركز على الجلابية البيضاء ومكوية والعمة الكبيرة ولكني أعلم أن ذمتك وافية ولا مدخل للسوء فيها..
ناس العمم القاصدنهم يا عادل إنت براك عارفهم وشايفهم وشايف عمايلهم.. قول معاي... اللهم طير حجرهم كما طيروا حجر الشعب السوداني لسنوات عددا.

Quote: والله يا خالدة سبقتيني.. كنت عايزة اسال نفس السؤال ده.. خلاص خلي وراق يباصر لينا طريقة.. يخيل لي طريقته ح تكون قائمة على اننا نفك غطاء الراس وونصيف الفستان ..

الأخت العزيزة حليمة..
تحياتي.،
يا أختاه مالك عليّ أنت وأختك خالدة من صباح الرحمن.. ما قلنا وصفة بنات حواء دي لسه ما جيناها.. زوغة مش كده..

Quote: الله يستر

الله يستر.. ويهون القواسي..

خالدة العزيزة..
سلام.،

Quote: اها الجنس الاخر يعمل شنو عشان يحظى بالوزارة يكبر ربطة الرأس ويقصر الفستان والله دائما كدة حقوقنا مهضومه ،،، فتك بعافية ،،،

والله وصفة خاصة لبنات حواء دي ما فكرتها فيها وأنا أصلاً ما داير أفكر فيها لأنها بتجيب لي الهواء.. وخايف أقول وصفة واحدة عن أخواتنا الوزيرات تقول الزول دا قاصدني عديل... والله ياخالدة أمس القريبة دي سمعت قصة واحدة وزيرة ولائية.. بس بقت وزيرة كيف ما تسأليني.. الله بيني وبين المشاكل..

اسماعيل ( الزعيم )
مسكاقمي
عدنا والعود احمد
يا ود امي كان شفتهم
عمايمهم كبيرة وبيضاء ونضيفه تلمع سااااي
جلاليبهم بيضاء مكويه ترهج سااااي
والشال علي الرقبة نازلة حتى البطن ( بس الكرشة منفوخة التقول بياكلو مع عمايا )
المركوب جلد نمر ( الايطالي ما عايزنو بيقولو عليه اجنبي ما ماشه مع التوجه الحضاري )
عرباتهم ليلي علوي ومظللة تظليلة حادة ( تظليلة حادة وانا لي شلاقتي قمت سألتهم يعني ايه تظليلة حادة واحد منهم رد علي وكنت حاكتب الرد بس خايف من بكري ابوبكر )
نساوينهم ( المرا ) التقول بيصنعوها براهم ولا عندهم مصنع جمال ورشاقة وهيبة والغريبة ماخدين حتى الرابعة ( يعني مكملين السنة ) والاربعة مولعات نار ذي عرباتهم اخر موديل (اقصد المرا مش العربية لان العربية بيغيروها مع بداية كل سنة) ومن الطرائف البيحكوها هاالايام بيقولوا ولد واحد من الكيزان مشى لابوه يوم اجازة راس السنة الهجرية وقال ليه يا بابا اشتري لي العربية الجديدة ( السنة دي بداية السنة الميلادية والهجرية كانوا قريبين بينهم شهر واحد بس ) الاب قال ليه يا ولدي انا حسع قبل شهر مش اشتريت ليك عربية جديدة الولد قال يابابا السنة الجديدة جات ويا بابا انت قاعد تشتري لي في بداية كل سنة عربية جديدة على حسب الموديل الاب قال يا ولدي اجازة اليوم دا عشان السنة الهجرية هجرة الرسول صلي الله عليه وسلم من مكة المكرمة الي المدينة المنورة رد الولد وقال يا بابا الرسول مش هاجر بعربية جديدة طيب جيب لي انا كمان عربية جديدة ( شباب الانقاذ والتوجه الحضاري )
ويا الحبيب لو عايز تاخذ الوصفة وتود ان تكون زعيماً ابدأ بالمقلوب يعني ابدأ بالمرا وكتر منهن يعني نفذ مثني ورباع ولازم اخر موديل

Quote: اخر موديل

خالكم جا...