هـذا المـنـبـر ليـس فـيـه قـبـح..بـل كـلّـه روائـع..مالكـم كـيف تـقـرؤون؟؟!!

قرأت بين جنبات البورد أكثر من مرّة شكاة بكثرة السّـوء، و لكنّي لا أراه
أي و الله ..
لم أقرأ مقالآ رديئآ منذ عودتي للمنبر في الأشهر الفائتة
ببسـاطة لأنني لا أنقر حيث يكتب مثيرو الفتنة
مهما (أبدعـوا) في العناوين!
و لا يكفي وقتي حتى لقراءة كل كتابات الرائعين
فمن أين تأتوا بالوقت لقراءة الذين أبدت الأيام رداءتهم؟
و لماذا، أصلآ، تزيدون عدّاد بوستاتهم نقرة؟
جرّبوا الطناش
و ح تكســبوا

Quote: كـيف تـقـرؤون؟؟!!

هذا هو السّـؤال؟
هل تقرأ لصـوفي ناجى بصلاة الحاجة و أنت وهّـابي متشدّد لا تريد نقاشآ؟
هل تعترض على بوستات الكورة و أنت مثقفاتي ختير؟
هل تفتح بوستات الفارغين و عديمي الموضوع (المختومين بالسّـخـف) راجيآ أن يكونوا قد تطوّروا؟
إنّـه عالم النّـت و تعدد الخيارات
اقرأ ما يعجبك و دع الباقي لغيرك فلصحيفة الدار قرّاء أيضآ!!
لا تبتئس
هل نلوم القاهرة لوجود شارع الهرم؟..طيب انت ما كان تمشي الأزهر ولا السيدة زينب؟ حــدّ حاشــك؟



..

Thanks Alot brother Altayeb,

I needed this advice before I dress my name in black!! ...Sana

أبو البشير
سلام كبير

صراحة بوست مدنكل و نصائح ثمينة جدا ..

جرّبوا الطناش
و ح تكســبوا


أحسن نصيحة سمعتها بعد نصيحة عبدالقادر الشايقي لي في عطبرة في ما يخص علاج ( الكوفار ) عقب كل خميس مدنكل

أرقد عافية

.

Quote: أحسن نصيحة سمعتها بعد نصيحة عبدالقادر الشايقي لي في عطبرة في ما يخص علاج ( الكوفار ) عقب كل خميس مدنكل

إذن بيناتنا تلفون
فضـلآ أعطني هذا الدواء، فالخميس عندنا سبت يا رجل
انت يا جلال من حكماء هذا المنبر
منذ قديم الباندويدث
شهادتك لصالح رأيي تجعله يستحق، أنا لا أرقى لنصـح، أستغفر الله، لكن زي ما قالت خالتنا (بت الخـودة):
زمان يقولوا ليك فلان دة محسوبك و انت مجبور عليهو..و فلان دة في عـبّـك لازم تمشـي ليهو..عيلا هسع جانا (الفـتــح) دة و ريّـح النّاس.
خالتنا تنطق كلمة (الفـتــح) بكسـر التّـاء، و تعني بدارجيتنا الحميمة تجاوز و تخطّي كل ما لا يعجب بلا أدنى اكتراث..يسميها (الأشقاء) في شمال الوادي..إشتري دماغك..
تسلم ياجلال يا حبّـوب

..

أهـلآ الأخت الكريمة سـناء
لا أرانا الله إسمك أسودآ..
لك قرّاء يهمّـهم نشاط هذا لإسـم
قد لا تعرفينهم
لكن يهمّـهم وجودك
كوني بألـف خير

إنّـه عالم النّـت و تعدد الخيارات
اقرأ ما يعجبك و دع الباقي لغيرك فلصحيفة الدار قرّاء أيضآ!!
لا تبتئس

شكرا الطيب بشير

Quote: شكرا الطيب بشير

مرحبتينا يا بتنا سلوى
ألـف عفـو و عافـية يا أخـيّـة
مبسـوط أنا الشفتك طيبة

الطيب بشير انت اجدع زول

هذا سودانيز ون لاي و ليس الجنة ون لاين


مجتمع مصغر للسودان


فيصل محمد خليل

لله درك يا جنا


سير يا الطيب بشير

العريس سيف
الرحلة كيف؟
تسلم

تســلم يا ابو خليل يا حـبّــوب
شكرآ ليك
و زي ما قلت، و زي ما قال عزّت الماهري زمان، سودانيز أون لاين أصبحـت وطنآ في زمن اللا وطـن
و البورد ليس الجـنّــة كما تفضّـلت
أنقر في البوست السمح
خلي المهبب يقع في صفحة خمسطاشر

أومّال نحنا بنحبّكم ليه..

عشان بتجيبوها كِدا، في التنك..

وكل ما قال أبو جهينة (أنا شرحو)

مولانا العقـيد
أهـلآ حبابك
و الله الذي لا إله إلا هو، لو خرجت من بورد بكري دة بمحبتك هذي لكفتنــــــــــــــي ربحآ
و يقول ليك قبح و بتاع..أنا ما شفتو ..يعميني
بقرا للسمحـين و ما ملـحّــق
و كل زول عندو سمحينو براهو
لكن، من ناحية أخرى يا عقيد، كلام أبو جهينة دة انت شرحو؟..حتى نصائح عطبرة؟ ..و الله ما قايلك كدة؟

الرائع الطيب بشير

Quote: اقرأ ما يعجبك و دع الباقي لغيرك فلصحيفة الدار قرّاء أيضآ!! لا تبتئس هل نلوم القاهرة لوجود شارع الهرم؟..طيب انت ما كان تمشي الأزهر ولا السيدة زينب؟ حــدّ حاشــك؟

الف شكر ياحبيب علي هذة النصيحة الغالية....جات في وقتي والله
ارقد عافية ولوك الصبر البص بصل (بكسر الصاد) المحطة ذي ما قال لينا الرائع علي مصطفي زمان
محبتي

ألاخ الكريم الطيب

Quote: لم أقرأ مقالآ رديئآ منذ عودتي للمنبر في الأشهر الفائتة ببسـاطة لأنني لا أنقر حيث يكتب مثيرو الفتنة مهما (أبدعـوا) في العناوين!

هذه وصفه علاجيه كامله من طبيب نفسانى

هل PH.D بتاعتك فى نفس المجال؟

وإن لم تكن.... الرجاء تضمينها فى آخر صفحه ..حتى ولو رسالتك فى الكيمياء....

لك كل التوفيق، اخوك اسامه

.
مرحبتين يا أسامة
و الله ضحّـكتني بالحيييييل

Quote: الرجاء تضمينها فى آخر صفحه ..حتى ولو رسالتك فى الكيمياء....

شكرآ للكلام الجميل
أنا ما في مجال المعالجين المباشرين لكن ما بعيد منهم، بدرس (تحليل و علاج الأزمات)، ان صحّـت ترجمتي للعربيّـة، لكن لازم أشوف طريقة أدخّـل الصفحة الأخيرة دي ..موش كويّـس إنها أعجبتك؟ و إنّـك ضحّـكتني؟..هسع هنا في مشكلة؟..
و الله البورد دة ما شاء الله ونسة و ضحك و ناس حلوين



..

Quote: ارقد عافية ولوك الصبر البص بصل

حبيبنا طبيب الدفعة الكارب
أوما يزال السيجائر يشارك مخرج الحرف و الإبتسام و يحتل يمناك عند السّـلام؟
نحن بننتظر البص و لازم يصـل..سقى الله أيّـامآ عرفنا فيها اللواء المثقّـف علي مصطفى
تسلم يا الحبيب
و ركّـز علي بوستات الحلوين

سلام يابركه

تســلم يا شيخ الجيلي

الطيب ولك من اسمك نصيب فى ظنى وليس كل الظن 00000

لقد سرقتنى افكارى وسلوكى فى هذا المكان

لك ءاجلال الادب والتأدب والاختلاف مهما كان فهو حق كما قال ابن عربى

..

Quote: الطيب ولك من اسمك نصيب

و عليكم بما قلتم يا أمير الدوحة
أهلآ بيك في الخاطـر و البوســت
هل لا تزال تصنع الجمال لا تمل؟
سأظـل أسـرق أفكارك و انتباهك لأنها ماخدة حلاوة روحك
و معك نعلن التأدّب في محراب الجمال
لك الشكر الوافر

.

Quote: فمن أين تأتوا بالوقت لقراءة الذين أبدت الأيام رداءتهم؟ و لماذا، أصلآ، تزيدون عدّاد بوستاتهم نقرة؟

موش صاح يا مولانا؟

Quote: هل نلوم القاهرة لوجود شارع الهرم؟..طيب انت ما كان تمشي الأزهر ولا السيدة زينب؟ حــدّ حاشــك؟

انا اعرف يااخويا !!

حاجة غريبة اوى والله !!


الطيب وبشير فى نفس ذات اللحظة ؟!!

حقا لم يكن اسمك هذا محض صدفة ايها الرجل الطيب الذى بشّرنا بان الفرح والجمال مقيم بين ظهرانينا لمن اراده !!


مليون تحية !

مرحبتين يا نادية و ألـف شـكـر
تسلمي يا نادية لحديثك الطيب عن الطيب
انتو (بـأه) بتوع القاهرة و عارفين الخيارات المتاحة
البورد بتاعنا دة هو الآخر زي ام الدنيا
كل زول بهواه .. و لا ننزعـج حين نرى الغـث، هذا أحـد ملامح الميديا الجديدة و علينا أن نحتمل لسـعات النحـل في سبيل الشهـد..

**

الطيب الحبيب ..
لقد جاء عند مطلع ردكم على حكيم البورد..
ابوجهينة..
وهو يتحدث عن الكوفار ..
ذلك الوجع الحار..

Quote: فضـلآ أعطني هذا الدواء، فالخميس عندنا سبت يا رجل ..

فاظنه قد اختلط عليك الورق..
انى اقول لك..
لقد دقست ..
وذلك ما منك ..
ولكن من العليك ..
انها الجمعة عندنا هنا ..
واورد لك هنا بعضا من فضل الجمعة ..
الجمعة كلها افضال ..
يقولون ان اعز اللة بشرا.. صار خميسهم جمعة..
يعنى سراى يقيمون ليلة الخميس حتى مطلع الفجر ..
شمس يوم الجمعة ..
او كما قال..
والجمعة صديقي الطيب من الايام الطيبات ..
الجمعة هي يوم الجمع ..
وهى من الايام المقدسة عند جميع المسلمين..
سنة او شيعة..
حسب طرقهم واحزابهم وأئمتهم..
ويقول الفرنجة..
فراى ديه هبى ديه..Friday Happy Day
وكنت اظنك قد عملت تكاسيا مثلنا فجر حياتك الامريكية..
وعرفت عداد ليلة الجمعة.
واسال عنها سائقي تاكسي شيكاغو ..
والجمعة مباركة ..
فيها تحلق الشعور..
وتقضى فيها الامور ..
ويبلس فيها الجديد..
والنظيف كيوم العيد..
فهى عيد عند اهل الشرائع..
جعل اللة ايامكم كلها اعيادا ..
ودمتم لذا لزم التنويه..
فلك العزر اذا اختلطت عليك الامور..
فقد علمت سعادتك ..
وفي ذلك فليتنافس المتنافسون..

**

.

Quote: وكنت اظنك قد عملت تكاسيا مثلنا فجر حياتك الامريكية.. وعرفت عداد ليلة الجمعة. واسال عنها سائقي تاكسي شيكاغو ..

حليل أيامو يا سمعة
كانت أيام الكاش و الكشيش و الفرح بالبخشيش
الأمريكان البيض بيدفعوا بسخاء..الأوربيين و السـود و الآسيويين جلود بيدفعوا الميتر زي ما الله خلقو.. و لكل قاعدة شواذ..سهرة الجمعة سمحة في الداون تاون لأنو الجماعة ما بيمشوا مشوار بعيد و بالتالي بتوفر زمن ..توصّـل المبتهجين من بار لي بار..دقيقتين في الشارع ..ثمن المشوار عشرة دولار و البقشيش عشرة دولار..مرّات الساعة بتعمل سبعين تمانين دولار..
أظني ركّزت على السبت لأنو الأحد عطلة ..الزول بيرجع الجمعة من الشغل تعبان بينوم ..و السهرة الحلوة سبت يا حبيب..و تنوم الأحد ليييييي الضهر دة لو ما اتصل بيك زول ما عارف فرق التوقيت و جهجهك بالأسئلة العجيبة بتاعة: بالله الساعة عندكم تمانية صباحآ؟؟ لاحححححولا نحن بنشرب في شاي الغدا!!
مخرجنا الحبيب
جرّب السبت تلقى الأحــد
علي ضمانتي
.

شوف ياباشا (تعادل جنابو عندنا )

Quote: كانت أيام الكاش و الكشيش و الفرح بالبخشيش

هو انا مااعرفش الكشيش !!

بس اتهيألى سمعت بالكاش (الله يرحم ايام الميرى اللى ان فاتك اتمرمق فى ترابو ..اه والله يااخويا)!!


بس الاخير ده اسمو البقشيش وممكن الباشيش ..لكن البخشيش دى يطرشنى ماسمعتهاش ابل كده !!

اسمعي كلامي يا عروسـة (لا أدري هل يا الدلعا دي كويسة ولاّ كعبة؟ )
البخشيش تبدو و كأنها كلمة تركية لوجود حرف الخاء و قد كانوا معجبين بالخاء ظهرت في كلمات تحمل نهايتها (خـانة) و هي كثيرة، كان الباشوات هم الأتراك و بتوع استانبول و الدولة العثمانية، و لا يبدو أن للكلمة أصل عربي. لكن الكشيش نجرة خاصتي اقتطعتها من الكاش لزوم السجعة كعادة خطباء العرب في الزمان السابق.
بمناسبة الكلام المصري ما هي (البرمبة) و لماذا سبعها نافش ريشو؟..أنا أعرف مواضع إستعمال المثل لكني لا أعرف ماذا تعني المفردة.
شكرآ ليك يا ستي هانم .

******
الطيب بشير

يقول الرواة ..
السبت اخضر..
ويسمى عند الاعاجم سبت الساحرات..
وفى بلاد السودان من الاسماء المحببة..
سبت ..وخميس.. وجمعة ..
سبت دودو..
قد نال حظا من الشهرة ..
-وهو حارس نادى الهلال -
عندنا لم ينلة سبت اخر ..
الا سبت عثمان ذلك الفنان ..
والذي قال في اغنيتة .. حليمة..
حليمة ولا قلقلية اذا آذآية ديسكو ..
والديسكو معروف لدى الفرنجة..
وانهم يقضون ليل السبت في الديسكو..
والديسكو وهو تلك الوسيقى المنبعثة من جهاز خطير يحت الجير..
ويجبرك علي الرقص ..
الرقص حتا..
وقد جاء عندنا عندما تسخن الراقصة..
او الراقص رقصا ..
ان يصيح الجمع..
الذى يحيط بحلقة الرقص حتيه..
حتيه.....
ماتفضلى فيهو شئ..
وكل شى للة ..
بلاشك ..
والجير في مدينتى نيالا..
التى ينعق فيها البوم..
حى من الاحياء الحبيبة للنفس ..
اللة يطراه بالخير..
فقد اصبح معسكرا للنزوح ..
وكان مغنى المدينة..
في ذلك الزمان النضير..
يقول في بنات الجير بشوف حسنك فريد ..
...........
........
والخميس صفقة ورقيص..
ولعل ذلك الخميس هو ما ارتكزت الية..
في انة يعادل السبت عند الاعاجم..
لذلك ارتبط بالرقص والديسكو..
جرّبوا الطناش ..
وح تكســبوا..
ولاتنسوا ان السبت هو عيد اليهود..
وان الطيب ود سيخة في ايام مجده .
اراد ان يعيد للسبت مجدة ..
فحظينا ايام من العطالة المقنعة..
حتى وز الية بعض من اوتوا العلم..
بانه عيد لليهود..
الكفار حطب النار ..
فتركة الي غير رجعة..
بذا لزم التنويه
ومافيش حد احسن من حد..
اللهم هل بلغت اللهم فاشهد ..

*******

كن جميلاً

ترى البورد جميلا

Quote: كن جميلاً ترى البورد جميلا

أو
كما قال
هشام

Quote: ان يصيح الجمع.. الذى يحيط بحلقة الرقص حتيه.. حتيه..... ماتفضلى فيهو شئ..

هلا يا سـمـعــة
التجديد هو سـمـة الحياة
أغنية البنات الشهيرة هذه الأيام تقول:
حتّـيهو حتّـي الشـرا
أقلبيهو قلـبو البـلا
و تدور الراقصـة حول كفلها، المعني بالحتيت و القلّـيب، دورتين كاملتين
و يردّد الحضور النّـســائي
قلـبو..قلـبو..قلـبو..قلـبو..قلـبو..
و خلّـيك مع الزمـن
تحيّـاتي للدي جي هشــام

Quote: جرّبوا الطناش و ح تكســبوا

الأخ الطيب بشير

تعرف انا عملت بنصيحتك دى من زمان وخليت الما بعجبنى
وخليت الرد حتى البطاردنى فى بوستاتى محاولا الاثارة وخلق مشكلة ما

مرحبتين مولانا قرشــو
و تكسب زمنك و صحّـتك..صاح؟
خليهم يقلبوا الـ..واط..ــة
و يشوفوا التحتها
بعيد عن دماغك
شكرآ لمرورك و التعليق

Quote: هل تعترض على بوستات الكورة و أنت مثقفاتي ختير؟

الطيب بشير الكورة كم اقصد السلام عليكم.

في ناس كتار معترضين على بوستات الكورة...

ليه!! والله انا ماعارف!!

وفي ناس كتار انا منهم معترضين على بوستات السياسة !!

لكن في دي انا احتمال اكون عارف!!

انا عن نفسي ولمحدودية معرفتي بالسياسة ولشدة كراهيتي للسياسة والسياسيين وهو في نظر الكثيرين منحى سلبي وهروب من الواقع وما إلى ذلك من (حديث منابر النقاش) لكنه بصراحة موقف كثير من شعوب العالم التي اعيتها الحيلة وسئمت من انتظار الفرج!! فكان متنفسها الوحيد في الرياضة بغض النظر عن مستواها!!

لذلك حصرت نفسي في بوستات الرياضة(في هذا المنبر) ومايخطه يراع كتاب كبار مثال: عضو البورد(ابو جهينة) وبعض الاخوة الاقاضل ومع ذلك لم نسلم من الهجوم فإذا انتفت عنا صفة السياسة وممارستها نعتنا اخرين ب(الجلابة) يعني في النهاية الذنب راكبنا غصباً عننا!!

نسوي شنو؟؟

كلامك في محلو (اقرأ مايحلو لك ويتوافق مع مذاجك وذوقك ولا تفرض مذاجك على الاخرين(وللجميع الحرية في إنتقاء مايريدون) فانا اقصد المكتبة كل صباح واشتري كل الصحف الرياضية تقريباً ولا امتعض من بقية الصحف والكتب الموجودة سياسية كانت ام غير ذلك(ولا حق لي في ان اخبر صاحب المكتبة ان يوقف بيع المطبوعات السياسية والمطبوعات غير الرياضية!!(وهو امر بديهي)

وكما ذكرت او المحت في موضوعك السبب الرئيس للقبح هو الترويج له بالردود او مجرد القراءة وترك انطباع برواج الموضوع!!

والحل بسيط (انا شخصياً في كثير من المواضيع بضقل بالكورة قبل الموضوع وامررها من فوقه دون ان تلمسة رجلي او الكورة) يعني افصل ليه جلابية ولا اترك له فرصة الاحتكاك بي تجنباً للفاولات.

عموماً بعد الهضربة دي انا مقتنع بان اصحاب بوستات الكورة اقل الناس ضرراً!!

و ماعندي ليك غير نكتة الراجل السكاه كلب قبل شمال يمين اي حجر يحاول يشيلو يلقاه غاطس في ا########## لمن زهج قال تربطو الحجار وتفكو الكلاب!!

مرحبتين أخي الكريم سامى عبد الوهاب مكى

Quote: فإذا انتفت عنا صفة السياسة وممارستها نعتنا اخرين ب(الجلابة)

و الله يا سامي التعميم دة بيزعّلني كيف..و الغريبة المهمّشين .. بيتعاملوا معانا على اننا مرفّهين!! بس شيل الصبر لحدي ما نعلمهم واحدة واحدة انو نحن جلابة مهمشين..
بالنسبة للرياضة
أدق دليل على اختلاف أمزجة الناس بخاطري هو تعليق صديقين أيّام كنت مذيعآ تحت التمرين، كان المرحوم علي الحسن مالك يتيح الفرصة للمذيعين الجدد لأن برنامجه يحتاج لقراءة كثيرة، كنت بقول لأصحابي أسمعوني الساعة تلاتة إلا ربع في الرادي..قال صديقي عوض حضرة من شمبات:
أنا لازم أستحمى و أغيّر قبل عالم الرياضة، ع شان أرقد و أستمخ مع الموسيقى و استمع لكل حرف في هذا البرنامج الهام.
أما صديقي د/ عبداللطيف سعيد فقال إنّـه يحرص على إطفاء الراديو فور سـماع موسيقى بداية برنامج عالم الرياضـة ياضة ياضة ياضة!!
و لك أن تقارن بين الموقفين
للرياضة جمهورها و عشاقها
و ..أعداءها
و للسياسة، مثلما تفضلت أنت، جمهور و أعداء
كذلك الثقافة
إذن كل زول بي تخصّـصـو
إحرص على ما ينفعك و اسـتعن بالله
إذن البورد يرضي الجميع
طيب قومة النفس في شنو؟
شكرآ على نكتة الحجارة المربوطة و اعمل حسابك ما يفكّـوا فيك كلاب الخلاف الانترنتي