حبيبنا شيخ عبدالله عقيد (راجل النصيحة) ألـف أهـلآ بك ثانيآ في سودانيز أون لاين..

.
اعتكف محمبكآ
و عاد متورّدآ
حبيبنا شيخ عبدالله عقيد (راجل النصيحة)
مرحبتين
و
طـوّل بالك
.

سلامت يامولانا..

حبابو مرحب شيخ عقيد..
زولآ كريمآ بشوش..
كان من أول المرحبين بى هنا..
بطيب حديثه وحلو أمنياته,,
له أمثالها أضعافآ,
وود بود ومحبة بأكثر منها...

مخرج:
أطلعت على مداخلات عديدة لشيخ عقيد هنا,
ويبدو أننا سنختلف حول بعض الأمور لاحقآ..
مرحبآ بالإختلاف مع شيخ عقيد,
وله المحبه

.
مرحبتين يا شيخ الجيلي
أصبحــت طيّـب؟
و كيف أخبار حلّـة هاشـم كرّار؟
و صحة الأهـل..و العسل صوفيا؟
يا حبيب أدخل على عبدالله عقيد ببطينك الأيمن و لا تخشى
هو رجل نبيل..مثلك
فقط أنت تقف على يسار الحق و هو على يمينه
لكنكما متفقان في الوطن ..
و أهمية أن يتكافأ شرف الوسـيلة مع نبل الغاية
أما بعــد..
فلتختلف الطّـرق..
فالقادرية و السمانية و النقشبندية تتباين أورادهم لكن حب المصطفى يقارب بين طرقعات مسابحهم
لا أخشى عليكما من النقاش
بل..
عدمــه
ود عقيد..
يعجبني ما تيسّـر من شخصيته..
تعال نحرقه ليفوح عطره الجميل في هذا المنبر
أنا موافق، إنابة عنه، على صهر ذهبه فلا تبتئس..
شكرآ لترحيبك بعودته..

.

**********

الطيب الطيب
انا سعيد جدا ..
بانك دائما ما تعطينا درسآ في خوة الكاب..
والتى فاتت الباب ..
وتعدت الحدود ..
فها انت دائمآ فاتح صدرك تسقبل هواء نقيا ..
فاذا ما سرت النشوة فيا ..
اتداعى واغنى ..
محل النجمة عصفورة .. تحلق جنب نافورة ..





***********

.

حبيبنا المخرج الرائع اسماعيل محمد الحسن..سمعة
شكرآ لمرورك من هنا و تحية الإخـاء الذي يجمعني بالعزيز عبدالله عقيد
و هي خوة كاب و فكر و فن و دوبيت و كثير مما تبديه الأيام

Quote: محل النجمة عصفورة .. تحلق جنب نافورة ..

و للمرّة التانية جنّنـت الصـورة جـن
و الببغاء حـطّ على مكان النجمة بمزاج
لا أعرف ان كان مكان الطلقة سيسـع توقيع الإتفاق بدارفور أم لا
لكنني أحلم للأهل بصـيف آمــن
تحياتي ليك...
.

بالمناسبة يامولانا
عنوانك أضحكنى جدآ..
(شيخ عبد الله عقيد راجل النصيحه)..

فى قريتنا كانت هناك إمراة مشهورة بالدجل ولها طرائف
وعمائل عجيبه,
الزولة دى إسمها النصيحة

.

Quote: (شيخ عبد الله عقيد راجل النصيحه).. فى قريتنا كانت هناك إمراة مشهورة بالدجل ولها طرائف وعمائل عجيبه, الزولة دى إسمها النصيحة

يا الجيلي انت يلقوك للمضـرّة..
عاوز تجيب لينا مشاكل مع ميسـز عقيد ولاّ شـنو؟
طيب بلاش راجل النصيحه ..نخليها مباشرة زول نصيحة
الكارثة الجيلي؟..آوت..
.

مرحبتين حباب ود عقيد

****

الودود ... الرهيف ...العفيف ..
الترقية جاياك ..جاياك ..
كما تقول ست الودع .. محمداك ..
دعنا نعلم الحقيقة علشان مايفطوك في الترقية ..
يعنى هل عبداللة عقيد ...
ولاالعقيد عبداللة ...



**********

ود البشير حبابك وحباب الأرباب ود عقيد
وين الزول دة مسجل غياب ؟

عل المانع خير ،،

دوما بألف خير

.
العزيز بكري اسماعيل
مراحب و هــلا
و الله مولانا عقيد دة استأذن و غاب
عيلا البارح شفت ليهو رد هنا و لاّ ردّين
فقلت أكابسوا ع شان يعلن نهاية العطلة
الزي العقيد دة عطلتو ما مفروض تطول
نتمنى رجعتو
شكرآ ليك

.

.
يا سمعة يا الحبيب
مولانا عبدالله دة (حبيب مدني).. دي زي (نجيب زيادة)..عبدالله دة عقيد خيل
أنا مهتم بيهو ع شان بريدو ساي
لا أقدمية له ترعبني و لا هو عقيد جيش فلا يرعبك الإسم
انما هو مثل (مقدّم القوم) في الطريقة لازم يمشي الخدمة الإلزامية لو كان شاب!
عبدالله عقيد اسم ..زي الطيب مثلآ..يعني أنا ما أشاكل زول؟
لووووول
منتظرين الترقيات منك يا جميل.

.

الطيب
شيخي الـ للرباعة مهيل..
الزول
السمح بلحيل

شفت يا ابو البشير الغناي دا اختصر موضوعنا كيف؟

الرباعة معناها الرفاق والأصحاب والاخوان.. صاح؟
ومع ذكل وصفه بأنه (مهيل).. يعني واسع البال
له قدرة على تحملهم..
إذا، صحبة الرباعة وتحملهم ليس أمرا سهلا.. ليس
إلا لاختلاف مشارب التفكير وطريقة قياس الأمور..

ادخلني نداءك في امرا ضيق..
زي ما بقولو (دخلت في ضفوري)
أستحي عندما أطرب
وأطرب مثل غيري لحسن التذكر والثناء
وأطرب لهذا الشعور من رجل مثلك..

هذا
وقد رأيت شيخ الجيلي يتحفز
طالبا منازلة
أتحراها كما تتحراها نبيلة
فحباب شيخ الجيلي
ويقيني أن نصف رأيي عنده
وعندك
وعند الأخ سمعة الذي
ذكرني قوله ((فاذا ما سرت النشوة فيا ..))
بأبيات لصلاح
وصلاح قال:
يا ذكي العود بالمطرقة الشماء والفأس تشظى
وبنيران لها ألف لسان قد تلظى..
وأنت قلت:
"تعال نحرقه ليفوح عطره الجميل في هذا المنبر
أنا موافق، إنابة عنه، على صهر ذهبه فلا تبتئس.."
وهو مقام إطراء وإن صحبته نار هي (برد وسلام)
على ود عقيد.

الشكر للجيلي وسمعةوخالد يوسف وبكري اسماعيل
والشكر لك اخي الطيب
"شيخي السمح زوقو
شيخي العالي منطوقو
الطير في السما ميت علي شوقو
والحوت في البحر سالك الطريق فوقو"

ولكم خالص تقديري

.

Quote: "شيخي السمح زوقو شيخي العالي منطوقو الطير في السما ميت علي شوقو والحوت في البحر سالك الطريق فوقو"

لووووول..اللهم انفعنا بي جاهو
و ارض عنّـو
و عنّـا

و يبقى بياضنا جيتك صـاد
و صاحبي الجيلي بالمرصاد
تفرض سـين.. هو يفرض صاد
و تبقى الندوة أحلى حصاد

..

تسـتاهـل كل خير يا مولانا

شكرآ لحسـن ظنك بأخـيك

و الله يقدّرنا على الرباعة

و نشــوفـك..

.

ابو البشير
حياك الله


أضحكتني حكاية (راجل النصيحة)

وراجل النصيحة يا سمعة
اخير من راجل المجنونة
ولا شنو؟ يا بتاع
كاتب الطاحونة؟


بالمناسبة
انت الجيلي دا
من جماعة محمود ولّا شيوعي ساكت؟؟

.
مولانا العقيد
بديت اللعب الخشـن؟

Quote: وراجل النصيحة يا سمعة اخير من راجل المجنونة ولا شنو؟ يا بتاع كاتب الطاحونة؟

زي بعضـو برضـو
تمّ حفظ البلاغ لحداثة خروج المتهم من سجن الدنيا بالعودة لرحاب البورد
كوووو..محكمة..

Quote: بالمناسبة انت الجيلي دا من جماعة محمود ولّا شيوعي ساكت؟؟

أنا بخلّـي الجيلي يرد عليك برااااهو
لكن ..أنا عارف انو جنى صوفية و قاري قرآن في سـغرتو
أصابته فلادفستك بالطرطـشـة و المسخة و شيء من سـفـه قليل..(لا أضمن السلامة لمن يردّد ما قلت)
الباشمهندس الجيلي أخطر من أن يتبع محمودآ أو نقد..لكنه قاريء فوق الجيد..ينتهي الى شنو..آآآبعرفو


.

ابو البشير
لك التحية

كاتب الطاحونة أعجبتني جدا
وظللت أتابع الردود عليها
ولكني لم أدخل في معمعتها
لأنى أخشى الدخول في متاهات النقد
سلبا وإيجابا
ولكنها حفزتني إلى العودة إلى تناول (القصة)
القصيرة..
كنت مولعا بالقصة القصيرة
لفترة من الزمن اقنعت نفسي بأني كاتب قصة
ثم داهمتني شرور (الواقع) والكون (المكعوج)
الذي لن تعدله قصة ولا قصيدة
واكتفيت بعوس العصيدة
الخشنة وغليدة

تعرف
في أيام (وقفتي) دي..
عندي موقع إلكتروني مكعكع كدي قلت أصلحو
وحاولت ادخل فيهو بعض (القصائد)..
ما لقيت غير بعض القصائد التي (نجرتها)
هنا في المنبر..
الباقي كلو راح .. ما بعرفو راح وين..
مفروض اقدم ليك دعوة لزيارة الموقع
بس بخاف..
ما يكون قدر المقام
خليهو شوية يمكن يتصلح
ونديك عنوانو

شيخ الجيلي ..
سؤالي مقتبس من نكتة قديمة..
حيث يروون أن أحدهم سأل الرجل عن اللون السياسي لولده..
فقال:
"يا زول دا ولد جبهجي من جماعة محمود محمد طه شيوعي ساكت".
هي مجرد مزحة

لك وله التقدير

.

حبيبنا العقيد
سلام تاني

Quote: كاتب الطاحونة أعجبتني جدا وظللت أتابع الردود عليها

ألف شكر ليك على اللطف
و نواصل في الطواحين
يا ريت تدينا عنوان الموقع
لا تخش شيئآ
نحن ندخلك بإعجاب مسبق فلا تبتئس
يلا سلام

.

سلامات يامولانا

Quote: و كيف أخبار حلّـة هاشـم كرّار؟ و صحة الأهـل..و العسل صوفيا؟

ياجنابو دى حلة عجيبة..تعرف أنا إلا أجيك فى ميامى وأشدها ليك عشان تأمين, طبعآ الحقوق محفوظة لى هاشم والشكر للباش الجميل كريم..
صوفيا بخير وجميعهم يقرؤنك السلام والمحبة,
ولاذالت فرحة بكل الهدايا التى تلقتها فى عيد ميلادها بعد أن أكملت ثلاثة أعوام من الفوضى (ووجع الراس) والجمال..

ومرحبتين تانى بشيخ عقيد..ونقول ليهو,
ياشيخ منور ,

Quote: سؤالي مقتبس من نكتة قديمة.. حيث يروون أن أحدهم سأل الرجل عن اللون السياسي لولده.. فقال: "يا زول دا ولد جبهجي من جماعة محمود محمد طه شيوعي ساكت".

والله الواحد لسه ماحصل المرحلة دى,
لكن قطع شك كان حصلتها بطفشكم كلكم من المكان دا..

Quote: تمّ حفظ البلاغ لحداثة خروج المتهم من سجن الدنيا بالعودة لرحاب البورد

حلوة الجملة يامرهف أضحكتنى كثيرا
التحية لك ولودعقيد

.
أخي الكريم عبد المنعم عمر عثمان
مرحب بيك و أهـلآ

Quote: حلوة الجملة يامرهف أضحكتنى كثيرا التحية لك ولودعقيد

و أنا سـعيد انك مبسـوط
ان شا الله تسـلم
مرحب بالعائد عائد..ود عقيد
.

التحية لك أخي الطيب
والتحية للباشمهندس عبد المنعم ود حبوبة

Quote: أضحكتنى كثيرا

الطيب زول سمِح يا عبد المنعم..
والبيجي منو كلو سمِح
ويزداد سماحة كلما أسعد الآخرين
إلى درحة (إضحاكهم كثيرا).

أضحك الله سنك
وزادك سعادة



بالمناسبة يا الطيب
لقد صدق حدسي، واتضح أن غيبتي كانت صائبة
وسببها وجيه..
فقد ذقت مرارة (الحذف) لأول مرة اليوم
حيث تم حذف البوست الوحيد الذي كتبته بعد العودة
وهذا ما كنت أخشاه.. وقررت بسببه التوقف.
فتلاطم الأحداث وهيجانها هذه الأيام يؤثر ويؤدي إلى التوتر
الذي قد يؤدي إلى فقدان بوصلة الاعتدال والتروي.
فإما الانحساب، أو التغاضي عما يحدث
وأحمد لك أنك لا زلت تحتفظ بقدرة على التوازن
فقد قرأت لك عدة (معالجات) لأخطاء في عدة بوستات
كفتني شر التدخل، وهدأت من روعي..
أرجو أن نخرج بالسلامة من هذه الموجة العاتية
وألا تؤدي بي (الشتارة) إلى ما لا أريد

ولك مودتي

.
حبيبنا ود عقيد
حبابك
شفت ولدك في الخور
و عـزّ علي
كثيرآ..
لعلمي بحسـن نواياك فوق البنفسجـية
تعال نواصــل المحاولات
وحده لا يفشل ذاك الذي لا يحاول..
فلا تدع رغبة السلامة تصبح دافعآ للخمول
أنا سعيد أنك رأيت (معالجات) مني ترضيك..
لكن هناك شتارات تمّ شطبها أيضآ
و هكذا الدنيا
خليتك طيّب
.