مشاكـل ناس الـديـش.. و الـبـولـيــص..في السـودان ..بين المهـنيّـة و التحـرّش..

.
في البدء التحية لكليهما
شرطة السـودان

جيش السودان

المؤسـسـات
الأفراد
الكيانات الوطنية الأصيلة أعني
لا مليشيا الحزب الحاكم الآن و التي تتنكر في زي جيش البلاد
كلاهما على خلاف دائم مع المثقفاتية و رجال السياسة و يسمونهما (المدنيين/الملكية) تحقيرآ و ازدراء
و قد أبدع المدنيون في اختلاق أساليب الهزء من المؤسسة العسكرية في السودان
و بحكم قربي لفترات متباعدة من الفئتين، أي المثقفاتية المدنيين و العسكريين، فإني نويت الونسـة حول الموضوع بلا أدنى تحسس أو مناوشة فوق الآثمة.
إستهلالآ تعلن صورتي في البروفايل و البوست أنني ارتكبت العسكرية زمانآ
و أنني شرطي لا جياشي
و أتمنى ألا أنحاز
و بالبورد كومندانات لا تعلمونهم..الله يعلمهم
نحييهم، مع مراعاة قيام نفر البيادة، و نرجو مشاركتهم

نقيب شرطة (م) الطيب بشير..ما يعادل الآن مقدّم حديث الولادة




نواصــل
.

.

* للبعض غبائن شخصية من ممارسات قام بها الجيش في مناطق كثيرة

نقدّر مشاعرهم

و لكنا لسنا هنا بصدد محاكمة تاريخ سوءات الجيش و إلا كان الأجدر أن نحقق أيضآ في دوافع القرار السياسي وراء (حروباتنا) الوطنية و هذا حديث ما فرغ منه البورد منذ إنشائه و لن يفعل ..لذا نلتمس عفو مظاليم الجيش، و هم كثر، أننا على استعداد لمؤازرتهم في بوستات يفتحونها لذاك الشأن.

** هيييييه .. و للكثيرين غبائن مع الشرطة
التي تقول لافتات أقسامها أنها في خدمة الشعب
و لهؤلاء المظاليم نقول مثلما قلنا في البدء، لا نستطيع أن نحجر عليكم، لكنا نرجو و نلتمس ألا يتحوّل البوسـت لمحاكمة تقصير أداء الشرطة. و بالطبع لن نعدم مؤسسة حكومية بالسودان خالية من النقد و القصور، فافتحوا البوستات لتبيين مواضع العلل و سنسهم فيها أيما إسهام.

*** و يظل رجاؤنا أن يسير البوسـت باتجاه معالجة ما اختزله العنوان من إشكالات بين الجيش و الشرطة، قد تبدو تافهة، لكننا نحسب أنها جديرة بالمرور عليها و عرضها في سولفان من الذكريات لا يؤذي و يشف عما تحته في الآن ذاته.

نواصــل

.

.

يخطيء من يظن أن التجاهل و الإزدراء المتبادل بين العسكريين و المدنيين أمر يسير لا يضرّ بالوطـن. فالجيش في السودان هو المؤسسة السياسية التي يتودّد لها قادتنا المدنيون سرّآ في السابق و علانية في الآونة الأخيرة. إذن هي مؤسسة أخطر من أن نتجاهلها و نتركها هكذا، و لعله من نافلة القول أن دراسـة أثر الجيش السوداني في إدارة البلاد منذ الإستقلال موضوع جدير بدراسات أدق و أعمق من أشكال التناول الصحفي التي تتم حاليّـآ.

و مثلما يؤثر الجيش في إدارة البلاد بشكل مباشر (إنقلابات) أو غير مباشر (حروب بالوكالة عن أحزاب) فإن الشرطة السودانية تلتقي المواطن السوداني في حياته اليومية و تتعامل معه في:
أقسام الشرطة..المباحث..أكشاك بسط الأمن..الحملات..النظام العام
الأمن (حيث يتبع للشرطة في العهود الديمقراطية)
المرور..الترخيص..الحملات..الغرامات
الهجرة..الجنسية..الجوازات..التأشيرات..المطار
الجمارك..السجون..حرس الصيد..

فهل يجدي التهامل؟

و هل يفيد تبادل الإزدراء؟

نواصــل

.

المحترم : الطيب البشير.
لك التحية.
واصل ونحن متابعون وسنحكى معك قصص واقعية عن تعامل الشرطة السودانية مع المواطنين فى الشارع وفى الاقسام.
وبين الجيش والشرطة داخل الخرطوم وخارجها؟!.
مع التحية.

.
مرحبتين العزيز ابوالقاسم ابراهيم الحاج
حبابك
تابع
و احكي
نـوّرونا
لعل أولي الأمر يسمعون/يقرؤون
.

.

* الجيش هو الذي يحارب..إذن فلتبقى ميزانيته مفتوحة
و الجيش هو الأقوى..

** الشرطي هو الذي يتعامل مع الجمهور ..إذن لا داعي لعسكرته مائة بالمائة
يتم تدريسه القانون ليقبض و يطلق سراح الناس على بينة

*** تقع أكثر الخلافات حين يخطيء عسكري جيش في أمر قانوني
تخطي شارة المرور..تمّ قبضه في خمّـارة..كان طرفآ في عراك مع مواطن..
المهم أن وصوله لقسم الشرطة يشعل فتيل الأزمة
و هذه تعتمد على حنكة الجاويش/الضابط المناوب
أحيانآ يعامل الشرطي زميله الجياشي بخلفيات صراع مسبق
و ينتهز الفرصة فيقسـو عليه في عنف قانوني
تقوم الشرطة بالإتصال بالجيش لإستلام الجندي و إحضاره يوم المحاكمة
و أحيانآ تحدث نكات هنا..
تمشي للوحدة التي يتبع لها فيقال إنه في مأمورية بالجنوب
و يتكرر الطلب و تأتي الإجابة ذاتها..و أحيانآ يقال إنه مات هناك
فقط لتحميه وحدته من العقاب
أحيانآ يصل الخبر لملازم في الجيش أن بعض جنوده في حبس الشرطة فيأتي بقوّة تحاصر القسم
و أحيانآ يأتي التهديد باحضار الدبابات
و لعل تاريخ الأمر يرجع للوراء
مسبباته؟
أصـله؟

نواصــل
.

.

التدريب في الكليات و المعاهد العسكرية هو أس الأزمة

يقول التعلمجية الحربيون لطلاب الجيش:

تؤدّى التحيّـة العسكرية لضباط القوات المسلحة. و (تجوز) تأديتها لضباط الشرطة

يقول تعلمجية الشرطة للطلاب في كلية الشرطة:

انتو بتدرسوا القانون..بروفيسرات من الجامعات بيعلموكم..زملانكم بتاعين الحربية بيدرسوا تلاتة حاجات:

أرقـد..عـمّـر..أضــرب

* كان طلاّب الحربية يسمون كلية الشرطة (كليّـة سوسـن)، في إشارة إلى أنها تقبل طالبات شرطيات.

و بالطبع فكرة أن الحرب (رجالة) تسيطر على عقليات الكثيرين في الجيش السوداني رغم تغيّر المفاهيم

و اختلاف فكرة القوّة في العالم و انتشار تجنيد البنات حتى في جيوش المنطقة العربية القريبة

و ما تجربة حرس القذافي ببعيدة عن الأذهان.

** كنا نتحدث بالإنكليزية و الفرنسية في لقاءاتنا مع طلاب الحربية و نستعرض معارفنا، كلّ حسب

تخصصه، و نؤكّـد لهم أن دخول الجامعة مرحلة هامة لا يعادلها دخول الجيش. كانوا يسهبون، في

المقابل، في استعراض معارفهم الحربية في تحدّ واضح لدرايتنا المحدودة بعلوم الحرب و فنون القتال.

حرب التدريب تفرز مهنيين متخاصمين

و الأمر كذلك عند تدريب العساكر

نحن الأفهم..و هم الأرجـل..

و حين تقسم البلد الى (نحن) و (هـم) يخسر الجميع

.

Quote: لعل أولي الأمر يسمعون/يقرؤون

.

شكرى للمرور أخي عمرو محمد

نتمنى أن يسمعوا/يعوا

.

.
الدليل على أن أثر التدريب كبير هو أن الحماس للخلاف يقل كلما كبرت الرتبة

في الأقاليم تجد تعاون و صداقات بين الضباط، إلا من أبى، و أولئك هم المصرّون على الخلاف

*يشكو ضباط الجيش من أنهم يركبون الترحيل حتى رتبة المقدّم، فيما يتم تخصيص سيارات لبعض الملازمين

في الشرطة..يأتي التوضيح من ضباط الشرطة أن السيارة للعمل لا الترحيل، حيث يقتضي العمل مرور

الضابط على الأقسام و المواقع المتباينة، لكن الواقع يؤكد أن تلكم السيارة تستخدم في الخاص أكثر

من استخدامها في العام.

**يشكو ضباط الشرطة من كثرة بدلات ناس الجيش..و فراغهم العريض و عدم انتاجيتهم و كثرة

امتيازاتهم و جودة خدمات مؤسساتهم، و يؤكد ناس الجيش أنها انما تعطى لهم ثمنآ لأرواحهم فيما

لا يقدّم ناس الشرطة، بحسب الجياشة، تضحيات تستحق. الجدير بالذكر أنهم يستثنون قوات الإحتياطي

المركزي لأن تدريبها و أدائها يشابه/يفوق تدريب و عمل الجيش.

.

الاستاذ: الطيب البشير.
لك التحية.
نقد بناء حقيقة , وإظهار للأخطاء ومواضع الخلل من غير تجنى لفظى او معنوى .
معك حتى الاخر , ونعجل مداخلتنا وحكاوينا الى ما بعد الرست!.

مع التحية.

.
مرحبتين أخي الكريم ابوالقاسم ابراهيم الحاج

لا تؤجل مداخلات اليوم الى الغد

تعال ياخي

أنا ما منظم حاجة بالتحديد، ان هي الا خواطر فرضت نفسها

.

.

كان هنالك ميدان في مدينة واد مدني إسمه ميدان الترخيص.

رأى قائد اللواء عشرين أنه يحتاجه فاستعمله

خاطب مدير الشرطة بمدني قادته بالخرطوم فتكونت لجنة وزارية انبثقت منها لجان فرعية متخصصة

و رفعت توصياتها للشؤون القانونية و أعدّت مذكـرة!! في ذاك الأثناء كان قائد اللواء عشرين قد

فرغ من تسوير الميدان و بناء مكاتبه و ثبّـت اللافتة الشهيرة:

(منطقـة عسـكرية..ممنوع الإقتراب و التصوير)

و خلاس


.

Quote: (منطقـة عسـكرية..ممنوع الإقتراب و التصوير)

أها........!

Quote: وخلاس

وبث!!

.

Quote: وبث!!

فـعــلآ يا أبا القاسـم

من وقتها و عنها و طواااااالي

.

تمام سعادتك ..
تسجيل حضور و متابعة .

الموضوع شيق و جديد ..
منتظرك تخلص .. ولي عودة .

ملحوظة : البدلة التيونك شديدة



ــــــــــــــــــــــــ
عميد شرطة ( مفصول )
عماد عبدالله محمد
الدفعة 45

Quote: عميد شرطة ( مفصول ) عماد عبدالله محمد الدفعة 45

شالو الميدان وفصلوكم!!.

يا عينى على الغلب.

.

تماااااام سعادتك

الدفعة (61)..القوة الأصلية 221..الموجود في (الطابور) 121 ..ميّــة نوزيعات!!

سعادتك بتصدّق؟

شكرآ لمرورك ..الأحوال هااااادئة سعادتك..و في الخاطر مقالك الأنيق عن الزول الما عندو انتجاه

و الجملة الإعتراضية عن البندقية الحربية قربينة إس، تلك التي تتكون من حديد و خشب، أي سؤال؟

Quote: ملحوظة : البدلة التيونك شديدة

دة من ذوق سعادتك يا فنان..

و منتظرين عودتك..

.

الطيب العزيز

تحياتي جنابك

والله إني لأحب أن أقرأ كتاباتك جميعها لأنك والإبداع صنوان لا يفترقان

واصل ولنواصل الاستمتاع بنتاج قلمك المبدع

وتقبل تحياتي

ود النيل

.
يا ود النّـيـل يا أصـيـل..أحـب النيل يا جميل

الله يخليك..و يعليك..فوق الدايرك و المابيك

أشكر كلامك اللطـيف يا لطـيف

و نواصــل ع شان تشجيعكم دة

.

.

ناس البوليس عندهم الخدمات..بقوا يعملوا (حركات جيش) لناس الجيش

لمن يجي واحد مسافر يتعبوهو ليك في الجوازات..التأشيرة..و أسئلة بايخة في التحري

الشكلة تقوم

بتاع الجيش بيشعر بالسخف لكن ماهو عارف فنيات القانون و ألاعيبو..بيعصر علي ضراعو

قاموا ناس الجيش، النعمنهم حيكومة، فتحوا قسم جوازات و جابوا بوليص داخل القيادة العامة

يعمل ليهم و لأسرهم كل حاجة..و ما يقدر يفرنب..لووووول

لاحـظ النظرة القاصرة لحل المشاكل!

يعني كدة المشكلة اتحلّـت؟؟

تمامآ مثلما ذهب البشير لمكان الإحتفال بأمدرمان بالهيليكوبتر من القيادة العامة تفاديآ للزحام!

لماذا لا تجرى دراسات حول هذا الموضوع؟

ألا يعتقد المسؤولون في الطرفين أن المشكلة خطيرة؟

أم هي سياسة دفن الرمال!!

في الختام يا سيد عماد و يا أبا القاسـم أنا ليس لدي، الآن، أكثر مما قلت..و إنتو حبابكم قولوا رايكم

أنا هسي الساعة عندي واحدة صباحآ و النعاس حصل..إن شاء الله بكرة كمان بجيكم

تســلموا..

.

Quote: بتاع الجيش بيشعر بالسخف لكن ماهو عارف فنيات القانون و ألاعيبو..بيعصر علي ضراعو قاموا ناس الجيش، النعمنهم حيكومة، فتحوا قسم جوازات و جابوا بوليص داخل القيادة العامة يعمل ليهم و لأسرهم كل حاجة..و ما يقدر يفرنب..لووووول.

والله لعبة القط والفار بس.

جنابوا الطيب بشير
والله الموضوع شيق وجميل
ومشاءالله البدلة فيك بتشهي العسكرية
لكن بيني بينك ناس البوليس ديل مشكلتهم كبيرة (اغلبهم طبعا)
ما عندهم اي ضبط وربط
كدا ما نقاطعك لحدي ما تخلص سردك الجميل وبنرجع ليك

كمندان سابق بالجيش السوداني

دكتور برنجي

.
دكتور برنجي
يا سلااااااام ياخ..بالله طلعت شـوّال؟
نرجع للقاريء لتوضيح سياسة الـName calling التي يتبادلها الطرفان المختصمان

*ناس الجيش بيقولوا للبوليس (خجيجة) في إشارة إلى أن كل قدرات البوليس هي حملات (الكّشّـة) التي تقوم بها سلطات البوليس لستات العرقي و المريسة المفترض لهن هنا اسم خديجة و تتم بهدلته بالدارجي خجيجة للمزيد من السخرية! و المقارنة المضمرة هي أن الجيش يحارب (الأعداء) من (جيوش) (الغزاة).

**الإسـم التاني من الدياشـة لناس البوليص هو (الغـفراء) أي الخـفراء، و فيها الإشارة إلى عمل الشرطة في حراسة البنوك و الأسواق الكبيرة، و هو عمل في الأحياء يقوم به الخفراء و هذا الإسـم فيه استهتار كبير و يغيظ البواليص كثيرآ..

فماذا يقول الشراتي للدياشـة

*الشوّالات..و هي دارجي حبيب لكلمة (جـوّال)..أي كيس كبير من الخيش به عبوة فحم أو قمح! الإشارة اللمّـاحة هنا إلى أن الشوال لا حول له و لا قوة في ما يحمل..يقصدون أنه معبّـأ بلا مجال لأن يفكّـر، أي مشحون بالتوجيه المعنوي و التعليمات و غيره بلا إرادة للتفكير الذي يرى فيه ضابط الجيش عدم ضبط و ربط!

طبعآ كلها تعميمات خاطئة لكنها واااااااااقع

نرجع لحبيبنا دكتور برنجي و هو كمندان يلزمنا الإنضباط في حضرته

تقديري يا سعادتك على الإشادة بالزي العسكري في صورتنا .. و هذا بمثابة ثناء القائد يدخل الملف.

Quote: لكن بيني بينك ناس البوليس ديل مشكلتهم كبيرة (اغلبهم طبعا) ما عندهم اي ضبط وربط

طبعآ النقطة دي براها عاوزة ليها بوسـت
لكن يا سعادتك، و يا باقي الكومندانات، تعالوا نشيلها مع بعض
و بالمناسبة أنا ما عندي خطة للبوست تنتظروها، فأقبلوا مشكورين بإسهاماتكم
أمبارح كنت بكتب نواصل ..نواصـل..لحد محدد
بعد داك عاوزين نواصــــــــــــــل كلنا مع بعض
و أبدوا لينا بي حكاوي الضبط و الربط

.

الزميل : الطيب : تحياتي :
تجربة جديرة بالتسجيل والمتابعة من (مدني تشرطن)!
ارجو ان تواصل :
النقد الذاتي مطلوب
اسرد تفاصيل تجربتك في الشرطةوفيها مايفيد !
نتابع : سياحة ( القلم) و(الميدان) يعني نظري وعملي ( البيان في الميدان)!
اكتب عن التوجيه المعنوي
اكتب عن الاحتياطي المركزي (حماية الشعب ام حماية النظام) !

.

Quote: والله لعبة القط والفار بس.

هي كـدة يا أبا القاســم

توم آنــد جـيـري

.

الاخ الطيب بشير التناول شيق
والموضوع في حد ذاته جدير بالاهتمام
رغم انك حاولت تكون محايد لكن برضو عصرت علي الجياشة
نحن كمدنين(ملكية) ما عندنا احتكاك بالجيش اكتر من الانقلاب!!
ودا طبعا بحصل في ساعة واحدة وتستمر الالام.
لكن رجل الشرطة طوالي معانا.
يبدو انه الموضوع كما ذكرت في التدريب.
حتي رجال البوليس يتعاملون مع الناس من زاوية ملكي وغير ملكي
وملكي لاتعني مجرد التفريق البسيط لكنها تعني درجة ادني.هذا
للاسف يقال في التدريب .
لو ما مباشرة بطريقة تبخيس الملكي مقابل غير الملكي.
وفي السودان عادة ماتعمد الجهات المسؤلة!! لخلق مسافة
شاسعة بين الملكي وغيره, وينعدم التفاهم ولا اطن ان هنالك سودانيا
يحس ان الشرطة في خدمته.
الشرطة تحمي المواطن من اللصوص ولا تحمي المواطن من كونه ليس لصا
المسافة بين المتهم والبريء لدي الشرطة اصغر مما يتصور القانون.
هنالك دليل صادر من الصليب الاحمر بعنوان الخدمة والحمايةارجو ان
اطلعت عليه-انا اعلم انك متابع- لكن
ان لم تطلع عليه
ارجو ان تفعل فهو متوفر في موقعهم علي النت وتحدثنا عن مفارقاته مع تجربتك
ونعود

.

صـديقي الأستاذ علي عجب المحامي (الملكي)

مرحبتين حبابك..و فيك ريحة الحبيب محمد شريف العريس

Quote: وملكي لاتعني مجرد التفريق البسيط لكنها تعني درجة ادني.هذا للاسف يقال في التدريب .

ذكّرتنا بي زعلات التـعـلـمـجـيّـة في التدريب و التي تنتهي بمفردة (ملكي) مع زعيق يؤكّـد أنها قمة الإساءة في قائمة المفردات التي يتيحها القانون للتعلمجي! و أعجب يا عجب أنها كانت تغضبنا كثيرآ .. و صـح لسـانك الذي يقولها من العسكريين يعني بها إزدراء المدنيين .. و هي تكثر عند ناس الجيش، بخاطري أنك نبّهتني لإنحياز غير مقصـود للشرطة، أعتذر عنه و أواصـل عاااادي ، لكن ناس الجيش عسكريّتهم زايدة شديد لمن يطلعوا خميس و جمعة من الكلية الحربية بيقولوا (ماشين الملكـيّـة)! يعني المدينة و الناس و كل ما هو غير جيش يتم اختزاله في أنه (الملكية) و في هذا عسكرة زائدة باتفاق جمهور البوليص.
أما خدمة الشرطة للشعب فهي لا تختلف عن قندفة بواب المستشفى الذي قال (كرّهتونا الطّـب) .. و جباة الضرائب الذين يبالغون في إيذاء الناس و الصحفي الذي يكتب عن تغيير بوابة مدرسة ابتدائية في حي شعبي على أنها (إنجاز و إعجاز)!! و المذيع التلفزيوني الذي يكتب تأييد حاميات شندي للإنقلاب و يذيعه بحماس و يكتب من بعده تأييد حامية كوستي و يذيعه بذات الحماس و هو الآن مبسووووووووط..و المحامي لوووووول الذي قرأ للشاكي عريضته فبكى الشاكي و قال (هو بالله أنا مظلوم قدر دة؟؟)..
الناس في السودان عندهم مشكلة فهم أساسية لقضيّـة (الحرفـيّــة) و مفهوم الخدمات (المهنيّـة) ..و أعتذر بجهلي لم أقرأ الكلام الذي قلت عنه بصفحة الصليب الأحمر و ان شاء الله سأفعل..
و حتى لا أبدو كباحث عن عذر للشرطة أحكي ليك عن مفارقات الشعار
المتهم بريء حتى تثبت إدانته
كنّـا نقول (برانا) إن الشرطة تعامل البريء على أنه متّهم حتى يثبت (بنفسه) براءته
و الشرطة يا حبيب في خدمة الشعب لي هسة و لي بكرة..إنت جايي تعلّمنا شغلنا ولاّ شـنو؟


.

خالص التحايا
الطيب بشير
جنابو ازيك

Quote: نقيب شرطة (م) الطيب بشير..ما يعادل الآن مقدّم حديث الولادة

تعرف لو كان الزول عندو نية فى الكاكى ده كان اسى نقيب (بس ديش)..رغم انى بديت فى اجراءت الارونيك..
لكن اخوك زى العسكرى شاربها شراب وماتقول كمان مربى فى الكليه الحربيه ذاتها ..
يازول دفعتى لمن كاتبين اسمى مع اساميهم فى باب السريه الرابعه. .
الجيش والشرطه الشحمه والنار ..
بتذكر من مشاكلهم المشهور واحده فى مدنى –وواحده فى جبل اولياء واحده فى الابيض- وووايك
والغلبه دايما للديش. .
وزى ماقلته ناس الشرطه ديل ملكية ساى. ..
عموما واصل ونحن بنتابع معاك وياريت لو يجو ناسنا ناس الديش ؛قاعدين هنا وبكونو لابدين ليك اعمل حسابك..

والله على الجيش ميرى اشوه ميرى شطه -بتعرف الكلام ده والقاموس حافل ناس الكليه الحربيه ديل كلام والله تقعد جنبهم سنه ماتعرف منو شى . .

.
حبيبنا معتز تروتسـكي
ود الكومندان..كومندان
كيف حالك
قلت لي ديش البورد لابت لي؟..لوووول..حبااااابهم عشرات

Quote: والغلبه دايما للديش

و المصيبة هي تفكير الغالب و المغلوب دة
الغلطان منو؟؟
الحـــــــــــــــــل شـنـو؟؟
أما الجيش غالب دي فهذا لأنو الجيش السوداني غالب في كل مبارياته
لكن للأسـف كلها مع (فرق) محلية..
و من غير ما نقلبها غـم..خلينا نرحّـب بالنقيب جوّاك
طالما متربي في الكلية و متابع أقدمية دفعتك يبقى أكيد جوّاك عسكري زي ما قلت
شكرآ ليك و مراحب

.

جنابو الطيب
والله ذكرتني ايام حلوة خلت
واصل

.

يوم حسـرتي و كشـف غتاي...غير الشـفـيع ماااااا عندي راي
الليل متين يا مولاي..السّـرااااي ..السّـرااااي..السّـرااااي
الجافوا النوم و عقدوا الراي..الليل متين يا مولاي..

حبابك يا شـفيعنا

و هنيئآ لك الذكرى

مثلما يذكّرنا اسمك بالشفيع

و كلّ يبكي ليلاه

شكرآ لك

.

التيونك فى السلك يا منقه
بجيك راجع برواقه

.

شـكــرآ ليك يا ســعـادتـو فارس

يا جماعة فارس دة كان الضابط المناوب في كومندانية أم درمان و زرته بعد صلاة الجمعة و علمت منه بترقيتي لرتبة النقيب، بعد أن تجاوزت حكومة أبو العفين، و التعبير لود العمدة نقلآ عن تعليق السيد الصادق، مجموعة العشرين ضابط في دفعتنا بدون ترقية لسـنة كاملة!! كان تجاوزآ سياسيآ لكنّـا لا ندّعي فيه بطولة بقدر ما هو غباء إستخباراتي من النظام..تراوحت التهم فيه بين ارتياد المنتديات و الصلاة بمسجد الأنصار و حضور الإحتفال بدار الأزهري!
التحية للرائد الكلس فارس موسى و هو يذكّـرني بذاك اليوم.

.

الاخ الطيب بشير
تحية طيبة
موضوع شيق.
ازدراء العسكريين للمدنيين.
ازدراء الجياشة للبواليص
اعتقاد العسكريين انهم فوق القانون
تاريخ المؤسسة العسكرية السودانية ووظيفتها الاساسية فى القمع وحراسة الادارة الاستعمارية
التنافس والصراع بين الجيش والشرطة واجهزة الامن والمخابرات والمليشيات الموازية (الدفاع الشعبى الخ)
عسكرة الحياة المدنية فى السودان
العسكرى فى الوعى الشعبى المدنى
حظوة الضباط فى الجيش وفى الشرطة والتعبير عن الامتياز والحظوة فى غناء البنات على سبيل المثال
المؤسسات العسكرية الاقتصادية والمالية والتجارية (الرغيف والسكر والبترول ايام الازمات!)
ميزات الضباط ولبراليتها الاجتماعية! وحصانتها!

.

مرحبتين حبيبنا عادل
و الله الصور عندك
و الكاب وجيه وجاهة التاريخ
العريف و الجندي ديل ما عندهم ضـبط و ربـط..لكن زي البعرفهم كدة

Quote: حظوة الضباط فى الجيش وفى الشرطة والتعبير عن الامتياز والحظوة فى غناء البنات على سبيل المثال المؤسسات العسكرية الاقتصادية والمالية والتجارية (الرغيف والسكر والبترول ايام الازمات!)

*جيّـاشـة..وووب علي أنا..جيّـاشـة و الجيش نقلوا فتّـاشة

* جاهل صغير و حمامة...الله ليّا..ييوم لبسو الكمامة

*الليلة وين لي وين يا عيني انا..ضابط شرطة يملا العين يا عيني انا
ضابط شرطة يملا العين يا عيني انا..و في كتفو دبّـورتين..يا عيني انا

(دي أظنها قبل الترقية)

*جنابو..حيّاني بي كابو

و الكثير المثير الخطر

Quote: ميزات الضباط ولبراليتها الاجتماعية! وحصانتها!

طبعآ دي بالغت فيها

قصدك الغناء الجماعي باللييييل في العهـود الرسالية؟؟

و ال.... داخلات مارقات على عييييينك يا تاجر

لا و الله ليبرالية مبالغ فيها

تاني مرّة ما تلخبت بين الليبرالية الإجتماعية و الـ.......

دحين ميز الأطباء موش ليبرالي اجتماعي برضو؟ قصدي الليبرالي بالك

تشكر يا حبيب على المساهمة

.

.
الضـبـط و الربـط
كلمتان خفيفتان على اللسـان
و لكنهما في الميزان العسكري تعدلان كل شـيء!
الدلالة المختصرة هي الطاعة و تنفيذ التعليمات و (عدم) النقاش!
الكلام الكتير مافي ليهو داعي..أمنع الفارغ..بااااه..و بااااه هذي هي بقايا صرخة إنتباه التي هي كلمة عسكرية تعني أنك يجب أن تهبّ واقفآ في وضع (إنشحاطي) يفيد أول ما يفيد نهاية الموضوع محل المداولة..و أن تعليمات القائد هي التي يجب أن تسير..طبعآ هناك ألف مخرج للتحايل على التعليمات لكن شرحها يخرجنا من الضبط و الربط
من طرائف الضبط و الربط..أن (رغبة القائد تعليمات)..
بمعنى أن السيد فارس موسى لا يحتاج لأن يقول لي:
(بالأمر قاطعوا بوستات تروتسكي) مثلآ..أنا هنا اخترت معتز لأنو ما بيزعل مني
يكفي قائدي السيد الرائد فارس أن يقول:
ياخ معتز تروتسكي دة مرض..دة بيكتب كيف دة
هنا ينبغي علي أنا و كل من هو دوني رتبة أن يباعدوا بينهم و بين تروتسكي كما باعد الله بين المشرق و المغرب..و يزيد على الإنضباط فقه (الكبكبة) و هو أن يقوم ملازم شليق، مثلآ، بتسطير بوسـت طويل عريض عن رداءة بوستات تروتسكي و كيف أنها لا تساوي الحبر الذي كتبت به الخ الخ..هذا زائد عن الضبط و يدخل في الكبكبة حسب التعريف الصادر من الإحتياطي المركزي عام ألف و تسعماية و شـويّـة في مؤتمر تعريف الأدب العسـكري.
و على ذكر الإحتياطي المركزي
كنا ضيوف عليهم ذات فطور
كان المقدّم المكّـي محمد المكي (الراجل الكلس أب زرد) هو القائد وقتها..هسي بيكون عميد قديم أو لواء..و نحن كنّا (فكّـة) ملازمين أوائل و معانا ملازمين و كام نقيب و رائدين تلاتة..و الفطور تمام و كل شيء موزون..قام الملازم بفردة نجمة وقتها، الرائد القديم الآن أو مقدّم ممكن، شـنّـان الخلـيل، أفهم بوليس على مستوى الوطن العربي و الإفريقي و حوض البحر المتوسط، قام نادى البات مان (السفرجي) و قال ليهو بلهجة آمـرة كما ينبغي لضابط يخاطب عسكري:
وين الجبنة؟..الفول دة عاوز زيادة جبنة
لاحظ القائد المكي أن صوت شنان عالي و أراد أن يداعبه، و كلاهما رجل لطيف
فقال المكي بصوت واضح:
(كما كنت) للجبنة..و تعني إلغاء أمر شنّـان..
هنا همهم شنان بما أضحكنا حتى أفسـد علينا الفطور:
هي الجبنة ذااااتا يا سعادتك أنا بتتعبني
وواصـل بصوت مستسلم:
الدكتور ذاااتو قال لي ما تاكل الجبنة..لكن نحن ما بنعرف مصلحتنا..ياهو بيعرفا السيد القائد..
و استمرّ شنان يؤكد المضار الصحية للجبنة و سرعة التسمّـم حتى انتهى الفطور
و أنا من الضحك ما أكلت أي حاجة
أهـا
دة ضـبط و ربط شديد..
يشبه ناس الإحتياطي المركزي العندهم راي فينا نحن بواليس الرئاسات و المكاتب

.

.

تنتعش الشرطة جدّآ في العهود الديمقراطية
و تزيد كآبتها و بؤسها في الإنقلابات
ذلك أن المسؤول من البلد في الديمقراطية مواطن مدني (زيّـنا )
لكن في الإنقلاب يحكم بداخل القصر دياشي (عدونا)
المفاهيم العدلية تزدهر في العهد الديمقراطي و تؤول مهام الأمن الوطني، إضافة للأمن الجنائي، للبوليس..الحراسات القانونية واضحة و معروفة و يتاح للمتهم مقابلة محاميه و ذويه..و تخضع الحراسات الشرطية القانونية لمرور من كبار الضباط و القضاة و وكلاء النيابة مما يجعل المعاملة الحسنة للمنتظرين أقرب للوضع المثالي..و بالطبع هناك استثناء لكل قاعدة ..و بالمناسبة تسمية حراسات قانونية هنا مقصودة و هي تعني أن أي حبس في غيرها هو حبس غير قانوني لأنه لا يتيح حقوق المحبوس القانونية المتوافرة بالحراسات القانونية الشرطية.
في العهد العسكري..يكون الإنقلابيون خائفين على الكرسي فيشرعوا في تكوين تنظيمات الأمـن المتباينة .. و تتضارب بين بعضها و يعاني المواطن ويلات القبض العشوائي و الحبس غير القانوني و تزدهر بيوت الأشباح..و تتمثل معاناة الشرطة في أن وزير داخليتها يكون دياشي
لاحظ الديمقراطية الأخيرة كان وزير الداخلية سيد أحمد الحسين و الفترة الإنتقالية كان فريق شرطة عباس مدني..شوف هسع ناس الديش:
اللواء فيصل أبوصالح
الزبير محمد صالح
عبدالرحيم محمد حسين
بكري حسن صالح
الطيب سيخة
و هسع جابوا لينا دبّاب الزبير بشير الذي هو في الجيش أجيش من البشير نفسو
و يبقى السؤال
لماذا لا يأتوا لنا ببوليس كوز؟
بس يا ريت واحد أحسـن من عبدالباقي كلاب


.

.


وجدت في الأرشـيف بوســت فيه ونســة بوليس من قبل ســنتين


هل أتاك حديث الجنود ؟



.

الطيب إزيك, علك والأسره طيبين

أتذكر, لمن طلعنا مظاهرات طلابيه, سنة 96, وكان حشد رهيب, تقريبا من كل الجامعات في الخرطوم. المهم, سرحنا

ومرحنا وعثنا في الأرض فسادا, إلا ان زنقونا ناسكم زنقة الجقر بعد كبري الخرطوم-أمدرمان, وانت متجه الى

أمدر. فما كان لنا من ثغره إلا السلاح الطبي, بالرغم من وقوف عسكريين مدججين بالسلاح في البوابه, لكن

الغريق بيتعلق بي قشه. المهم, مررنا البوابه بسلام, وحاول ذلك ناس الإحتياط المركزي, لكن ما كان من

العسكريين التابعين الى الجيش, حسب لباسهم, إلا شهر أسلحتهم أمام جمع البوليس والصراخ بـ ساااابت, والتي

مازالت داويه في أذني حتى اليوم, بالرغم من تشككاتي لاحقا, بأنهم حمونا فقط لمجرد سك البوليس لينا




بالمناسبه,

ياخي انحنا عندنا فكره سيئه عن البوليس, وأنا شخصيا باعتقد إنها مجرد مبالغات سودانيه. فأرجو منك محاولة تصحيح الفهم والتقويم

.
مرحبتين بعودتك أخي الكريم عمرو
قلت لي الدياشة فتحوا فرصة للمتظاهرين و عارضوا البوليس!
دي طبعآ مكايدة تاريخية

Quote: ياخي انحنا عندنا فكره سيئه عن البوليس, وأنا شخصيا باعتقد إنها مجرد مبالغات سودانيه. فأرجو منك محاولة تصحيح الفهم والتقويم

هييييييه..جيتني في محل بيوجع
أنا ما عاوز أكون شكارتا دلاكتا..أمها و خالتا
و ما عاوز أظلم ناس البوليس في سبيل الحياد
و ما عاوز أتكلم بتفصيل يفشي أسرار المهنة التي أحـب
شــفت حالتي صعبة كيف
أنا يا أخي الكريم
ظابط..و..ود بوليس..و..جـدّي كان قصّـاص أتــر
يعني من أسرة شرطـيّـة عريقة
لكن الفرق بين زملاء الوالد و عسـاكري..كالفرق بين القوة الشرائية للسيد جنيه السودان سنة خمسين و الدينار السوداني الحالي!!
و من هنا جاءت المفارقة
قال الراوي إن البوليص قد (باظ) يوم أن قال القائد (ضـم في الوسـط)
و لها قصة
كان زمان العمل في الشرطة مجزي..و شروط الخدمة رائعة..كانت الوظائف بالدولة عمومآ محترمة و البوليس خصوصآ كثير الميزات، لذلك كان طبيعيآ أن يتقدم لها أفضل الناس و يتخير منهم رجال المعاينات أفضل المتقدمين، كان المطلوب تقديم صحيفة سوابق جنائية و بحث ميداني يقوم به ناس المباحث عن المتقدم. و مع سوءة الحال و بالتحديد في أواخر عهد سيء الذكر نميري بدأت تظهر في الشرطة نماذج سيئة و صارت المهنة طاردة و لم يعد يتقدم لها رجال محترمون كما في السابق و نافسها الإغتراب فسافر أفضل الشرطيين للخليج.
قيل إن واحدآ من الكومندانات كان محتاجآ لقوة من الشرطة أيام حملات تفريغ العاصمة المعروفة بالكشات، و كان كلما جمع المتقدمين للوظيفة في حوش المباحث و أطلق فيهم عساكر المباحث المحترفين الممتازين وسط طوابير المتقدمين، يستخرجوا من الطابور أكثر من نصفه من النشالين المعروفين و أصحاب السوايق المتباينة. و لما تكرر المشهد و لم يجد سيادتو رجالآ محترمين يرغبون في مهنة بلا ميزات جاء الى الطابور و نظر في النصف الذي أخرجه رجال المباحث و قال قولته الشهيرة:
ضـم في الوســط
بمعنى آخــر
أدخلوها بسلام آمنين
فدخلت للشرطة يومها أرتال من أصحاب السوابق ليقوموا بتنفيذ الكشّـات
لكنهم احتفظوا بوظائفهم حتى بعد ذهاب مهدي مصطفى الهادي و النميري
و صاروا أسماء في حياتنا
نماذج غريبة على هذه المهنة .. يراهم المواطن كل يوم..تطغى أفعالهم السيئة على أفعال الشرطيين الممتازين الآخرين..و لا ينفع معهم الصمت الرسمي! فهم معروفون لدى الجميع..منهم من يبيع العرقي المقبوض معروضات..و منهم من يبيع البلاغات..و منهم من يرتشي في المرور و المخالفات ..و منهم من يسألك عن جيبك المنتفخ و حكاية أنوار الخطرات طافية ليييييه؟ و أمور (اللّـبـط) المعروفة لجماهير الشعب لا يجدي معها صمتنا عنها.
لكن بالمهنة رجال يسدّون عين الشمس شرفآ، و هم الغالبية، لكن فعل الأقلية ينتشر لسـوءته، و بالمهنة رجال تعجبهم التضحيات، ضباطآ و عساكر..أمثال مولانا اللواء شرطة العادل العاجب..و هو حين كان نقيبآ فتح بلاغ ضـد نفسـه لدخوله بالخطأ في طريق اتجاه واحد!! كان خارج السودان و حين عاد كانت إدارة المرور قد قامت بتغيير شارع ما الى اتجاه واحد، فدخل فيه و هو لا يعلم الى أن لاحظ سير العربات كلها باتجاه واحد، فما كان منه الا أن استدار و ذهب لادارة المرور و حكى للشاويش النبطشي و أمره بفتح بلاغ ضد نفسه في أول سابقة من نوعها..حاول البواليس الموجودين تخفيف الأمر على جنابو و أن عذره هو غيابه عن السودان فقال لهم بلهجة آمرة:
الجهل بالقانون لا يعفي من العقوبة
و دفع الغرامة من حر ماله القليل
و مثله قليل
لكنه موجود
تحياتي و نتمنى أن تتحسن شروط الخدمة للبوليس و لكل الخدمة العامة بشقيها المدني و العسكري

.

ود البشير

كيفنَك

مرة مسطَح في قطر متجه من الخرطوم الى عطبرة جانا بوليس وقال إلا ننزل وكان معانا (دياشة) ما

تكلَم معاهم، سألته ليه ما تطلب منهم ينزلوا مثلنا؟

قال لي: ما تتحدث في السياسة ده ما شغلك

.

مرحبتين الأخ الكريم حيدر حسن ميرغني

قلت لي قال ليك ما تتكلم في السياسة؟؟لووووول..
دي سياسة عليا طبعآ..تتعلق بسيادة البلد
أكثر مخالفي القانون هم العساكر من كلا الفريقين أضف لهم ناس الأمن
وضــع مؤســف
لكنه
و
ا
ق
ع

.

جنابو الطيب
بالتأكيد كلية الشرطة كان يصعب لدرجة الاستحالة الدخول إليها لعموم أهل السودان إلا قلة الكل يعرف كيف تدخل وتتخرج منها - لا أدري إن كان ذلك من محاسن أو مساوئ الكلية خصوصا والبوليس عموما - لكن استمر الحال وحتى الآن-؟؟ وهذاقد يشكل عنصرا من عناصر بغض أو كره البعض لهذه الفئة بما فيهم (الديش)
ولو تغيرت معاير وأسس اختيار ضباط الشرطة والجيش بشفافية وتجرد بمعنى الكفاءة بعناها الكبير الواسع ( لا قبلية ولا جهوية) والتأهيل بالتأكيد سينصلح الحال -
أخي الطيب ضابط الشرطة لا يقل دوره في المجتمع من دور السياسي أو الدبلوماسي الناجح - وبالتاكيد لا نقول مثله مثل وكيل النيابة ، والمحامي ، والقاضي ، لأنه بالضرورة جزء لا يتجزأ من هذه المنظومة - ضابط الشرطة يعمل في أدق وأحرج الظروف لكون اعباء وظيفته تنفيذية تلامس السلطات السيادية في كثير من الأمور.
لا ننكر على بعضهم الشفافية والمهنية والإخلاص والتأهيل والتجرد، ولكن لا نستطيع إطلاق القول وتعميمه على الكل -
مع مودتي وحبي
أخوكم
الشفيع

.

مرحبتين يا الشفيع
و ليك التحايا على المرور و الإسـهام

Quote: أخي الطيب ضابط الشرطة لا يقل دوره في المجتمع من دور السياسي أو الدبلوماسي الناجح - وبالتاكيد لا نقول مثله مثل وكيل النيابة ، والمحامي ، والقاضي ، لأنه بالضرورة جزء لا يتجزأ من هذه المنظومة - ضابط الشرطة يعمل في أدق وأحرج الظروف لكون اعباء وظيفته تنفيذية تلامس السلطات السيادية في كثير من الأمور.

و ما قلت غير الحـق يا حبيب
واحد دفعتنا خاطـب إحتفال مدينة بعيد الإستقلال لاختلاف السياسيين في من الذي يصعد المنبر ممثلآ للمدينة؟
واحد دفعتنا عمل صلح مشفوه مع ضباط حدود و زعماء قبائل من دولة جارة لحماية مواطنين سودانيين لم يستشر فيه وزارة الداخلية نفسها خليك من الخارجية أو القصر؟
واحد كومندان وجد نفسه في قرية مطالب بتوليد سيدة لأن الطبيب، و كانا يسكنان معآ، ما كان موجود
و لا حدود لحكايات الصلح الإجتماعي..متشاكل مع مرتو..طاردو أبوهو من البيت..عمو ضربو بي عكاز قام أبوهو طعن عمو..الخ الخ..كلها تنتهي لقسم الشرطة و يبدأ الشرطي ضابطآ أو صف ضابط بالحلول السلمية و التفاوض لأجل الحل conflict resolution قبل تدوين المحضر و بعده و حتى أثناء التقاضي.
نتمنى أن نرى شروط خدمة أفضل و تمييز للمهنة لتجذب الناس التمام زي زمان.

.

جنابو الطيب بشير
سلام ..

بوست ظريف ..
نرجو أن تحدثنا عن المرحوم الفريق ابراهيم أحمد عبدالكريم طبعا أذكي
سوداني ...

نرجو المواصلة في البوست

الاخ الطيب بشير لك التحايا
ولمحمد شريف الذي يعرف كيف يكتشف الاصدقاء
ان ما تكتبه هنا يعبر عن وعي عميق يجب ان تتخطي بهذه المعرفة حدود
الكتابة الصحفية الي نوع اعمق انت اجدر به.
ان ملاحظتك باننا كسودانين لانعرف المهنية في كل المجالات .
هي ملاحظة عميقة , لكني اعتقد ان ما عرفناه في تاريخنا من انضباط مهني في مراحل
اولي لت####ر الدولة السودانية , يجعلني اشك في ان المسالة عدم معرفة بقدر ما توحي بان هنالك تعمد من نوع ما.
مثل ضم الي الوسط, فهي الان اصبحت سمة غالبة ومتعمدة .

.

حبيبنا الصديق علي عجب
أشكرك و أحييك على هذا الكلام الطيب
و نتمنى أن نجد الوقت و الدعم و الحرية الكافية لإجراء دراسات حول الموضوع، و نتركها من بعدنا لأجيال لاحقة تدرس و تحلل و تطبق النتائج دفعآ بالعمل العلمي/الأكاديمي للأمام في بلاد تحل مشاكلها بطريقة ضم في الوســط.

Quote: توحي بان هنالك تعمد من نوع ما.

طبعآ أنا لا أبريء ساستنا و قادتنا الذين تفننوا على مر الدهور في تغييب وعينا و آثروا أن يروا شعبهم أعمى ليسألهم القيادة..زي حكاية أنا ما عاوز أفضل زعيم لكن الجماهير أصرّوا و أنا ما عاوز أخذلهم و ما إلى ذلك من الأقوال الفطيرة..ربما كان الأمر يحدث، كما تفضلت، بتخطيط آثم. إلا أني آثرت ألا أكتب ما يضعني تحت طائلة المحاسبة الأدبية بالوقوع تحت تأثير التفكير بنظرية المؤامرة.

تقديري العميق لك

.

.
مرحبتين يا رضــا

Quote: نرجو أن تحدثنا عن المرحوم الفريق ابراهيم أحمد عبدالكريم طبعا أذكي سوداني ...

الليــلة انت جبت سيرة راجل
يرحمه الله و يحسن اليه
كنت أعرفه قبل دخولي للشرطة ..في تلفزيون السودان مع أستاذنا حمدي بدرالدين
و استمرت العلاقة به في المنتديات و الحيشان بعد تقاعده..كان يرحمه الله عضوآ أساسيآ بمنتدى إشراقة التجاني بحديقته في الخرطوم اتنين..
الحديث عنه يحتاج لبوستات و بوستات
لكني أذكر هنا تحليله لمسألة الذاكرة التي اشتهر بها
فقد كان في اللقاء التلفزيوني يقوم بتسميع أبناء دفعته في الإبتدائي (بالكنبة) و في أي فصل تختاره له..يعني مثلآ تقول ليهو سنة رابعة..يقول ليك الكنبة الأولى فلان الفلاني،باسمه الكامل، و يجلس بجانبه فلان الى أن يكمل الفصل بكامله..و هكذا..و بالطبع دة شيء ما عادي..
قال عن الذاكرة
إنها مسألة اهتمام
و ضرب لنا مثلآ..
قال لو سألت واحد من بيت شعر في معلقة يقول ليك ..أنا ما بحفظ ياخي..راسي كعب..نحن ذاكرتنا صفّاية..لكن في نفس الجلسة تجي حكوة عن الكورة يقوم يحكي ليك تفاصيل هدف في مونديال 1978 و كيف انثنى اللاعـب مراوغآ و ظهرت تحت الفانلة الخارجية أخرى داخلية بلون مختلف عن الشعار و الحارس وقع كيف و بتاع الكاميرا عمل زووووم و المدرب صوفات راسو الشايبات اتطايرن..الخ الخ..قال التفاصـيل دي كلها قاعدة وين؟؟ في الذاكرة التي شكا خرابها..لكن هي، بحسب المرحوم الفريق ابراهيم، مسألة اهتمامات.
و احكي ليك عنو حاجة من المهنة
أذكر أن أحد مدراء الشرطة الذين عملنا معهم (.......) كان يطلب منا في ادارة العلاقات العامة كتابة أسماء اللواءات الكاملة و مناطق عملهم التي جاؤوا منها قبل مؤتمر قادة الشرطة، لكي يتعامل معهم بأسمائهم! لاحظ هو فريق و هؤلاء لواءات، يعني بعدو في الرتبة مباشرة و البيحضروا الإجتماع دة ما بيزيدوا من تلاتين لواء، و هو عاوز مساعدة فيهم..هنا تحسّـر قائدي (.....) على أيام الفريق إبراهيم أحمد عبد الكريم و قال لي بالحرف الواحد:
و الله ..و و الله العظيم كان الفريق إبراهيم أحمد عبدالكريم يعرف عن ظهر قلب كــــــــــــــل ضباط شرطة السودان و يسمّـع أسماءهم الكاملة!
إيش جاب لي جاب
يرحمه الله رحمة واســعة

.

وماذا عن الإر -أو الإير- المضر

جات من وين

وبتعني شنو

.

Quote: وماذا عن الإر -أو الإير- المضر

و الله يا عمرو يطرشني

هل هو مصطلح خاص بمجموعة محددة؟ ..زي الكجر بمعنى بوليس؟

نوّرنا

.

جنابو حيانى بيكابو !!

لك التحية أخى الطيب و الحق يقال انك تطرقت لموضوع
ظريف جدا و المواقف كثيرة و طريفة ...

التحقت بى العمل الشرطى لمدة ثمانية سنوات و كان لى الشرف
ان اكون من ضمن اول دفعة تخرجت و تحمل اشارة شرطة الجمارك
طبعا بعد القرار الجمهورى بضم الجمارك للشرطة الموحدة وهى
جمارك و مطافى و حرس الصيد و غيره من الوحدات فكنا اللبنة
التى قامت على متنها شرطة الجمارك فعملت بمطار الخرطوم لمدة
ليست بالقصيرة , لاحظت ان الوحدات المنضمة تحت لواء الشرطة
مثل أستخبارات الشرطة و المباحث و مكافحة المخدرات تستخف
و تنظر لضباط و جنود الجمارك بأنهم (ملكية) و نسبة لتضارب
السلطات فى مطار الخرطوم او فى المناطق الحدودية ألأخرى
نشبت الكثير من ألأشكاليات و التى لولا وجود العقلاء لكانت
هناك عواقب لا يحمد عقباه و كل جهه تدعى بأن هذه المشكلة هى
من اختصاصها علما بأن الجمارك تقوم بتنفيذ قوانيين الكثير
من الوزارت مثلا كريم ديانا يعتبر محظور وفقا لقانون الصيدلة
و السموم لوزارة الصحة , ومن الوزارات الصناعة و التجارة و
الثروة الحيوانية و النقل و المواصلات الا ان عدم تفهم باقى
وحدات الشرطة و نظرة ألأزدراء و كلمات ألأسخفاف للجمركيين
يخلق فجوة كبيرة فى العمل الشرطى اذا ما تداركت سوف يصعب
حلها مستقبلا ,,,, و الخاسر و الوحيد هو الوطن .

الفولانى

.

الأخ الكريم عوض الله الفولانى
التحية و التقدير
كان لي أصحاب في إدارة العلاقات العامة بالجمارك
أذكر منهم المقدم أبو شوك..و كنا نتعامل كإعلام مع المدير ماهل أبو جنة و من بعده المرحوم الدومة و الذي أذكر أنه كان بالتدريب حين كنا طلابآ بالكلية 1991--1992 ..و لكن ما كان مسموحآ لنا لقاءات معهم فهم كومندانات كبار..كنا بنشوفهم في المسجد فقط.
الجمارك محسودة شرطيآ لأنو عندهم قروش كتار و بدلات و عربات و لبس جميل
لكن كمان بيغلطوا في الطابور العسكري كتيييييير جدآ و دة بيجيب التنكيت عليهم
طبعآ هم لم يختاروا الشرطة..و أكثرهم غير مبسوطين من لمعة الدبابير في أكتافهم
الدولة هي التي رأت ذلك و فرضته عليهم
و أحيانآ لا يرون ضرورة للطابور العسكري و هذا يجعل البواليس الباقيين يضحكون من أدائهم، و بتقديري يمثل ذلك ظلم لهم لأن فترة التدريب كانت قصيرة و المدة غير كافية للتشرب بالروح الإنضباطية و الأدب العسكري..و لي ألأف النكات عن (جوطات) ناس الجمارك للطابور و الأدب العسكري بحكيها ليكم بالمهلة بعد فلترة ما يضر منها بأي طرف.
الجمارك تقوم بعمل وطني كبير سواء تبعت للشرطة أو وزارة المالية
و كل تحرّش بها أو إزدراء لا يحيد عن موضوع البوسـت
تمامآ مثل ازدراء الجيش للشرطة و المواطن
و ازدراء الشرطة للمواطن و النظر للجيش كناس بليدين
و احتقار المواطن للعسكريين (من جـم) لا يفرق بين من كان زيه الكاكي مبرقعآ أو صافي لون.
نحن شعب نتباهى بتبادل الإزدراء و الإستخفاف..حتى أن رئيس الوزراء الأسبق قال أمس (الأحزاب الأخرى جنائز) و قيل إنه يعني أن حزبه أكثر حياة!
هل رأيتم زعيم حزب لا يرى حزبه أكثر حياة؟
نحن شعب شديد الفخار بنفسه و حريص على تحقير الغير
و حين يتعلق الأمر بالمهن المختلفة داخل الوطن ..من الخاسر؟
كما تفضلت أنت لا يخسر سوى الوطن الحبيب
لك شكري
رتبتك شنو يا ملكي..

.

والله أنا زاتي ماعارف

لكن سمعتها كم مره من نسوان وشفعهم في الطرمبه - ماتفهمني غلط - لمن تجي كشة البوليس, او توشك على الوصول, يبدأ التهامس, الإر المضر جاي, الإر المضر جا, الإر المضر فات

والغريبه ما حصل سألتهم او حتى نفسي, يعني شنو إر مضر, وليه. صحيح هو من ناحية مضر بالنسبه ليهم, هو مضر


قريت رواية زميلنا أبكر آدم بعنوان " الطريق الى المدن المستحيله" ? أعتقد على ما أذكر, انها مذكوره هناك برضو وبنفس الدلاله

.

العزيز عمرو
مرحبتين
قلت لي كيف؟

Quote: سمعتها كم مره من نسوان وشفعهم في الطرمبه -

بتشمشموا السيليسييون ولا البنزين السيوبر؟
الإر..تكون كلمة خاصة بمجموعة محددة..أول مرة أعرفها
شكلها من مصطلحات البوليص الكتيرة
منها (الكجر)
و منها (النيمتي)
و منها (كندورة)
و عييييييك
كتير
شكرآ لمرورك

.

.

هـواتف و إيميلات من كومندانات غير أعضاء بشأن البوســت

تتراوح بين الإشادة بالبوســت ووصفي بعدم الضـبط و الربـط

على أية حال نرحــب بهم، نحييهم، و لن نذكر الأسماء حسب اتفاقنا معهم

الدنيا على أبواب كشوفات ترقيات و تنقلات في شهر سبعة أظــن

انتو يا سعاداتكم يمنعكم القانون من الكلام

عيلا أنحن ديل ترا مطاليق..

أقعدوا بالخير

.

UP

.

شــكــرآ يا حبيبنا معتز تروتســكي على العفريتة و عتالة البوســت

تســـلم

.

انحنا دايرين نكون في الصوره بس

نفهم الحاصل, نعرف الـ لينا والع لينا

أما أرزاق الناس, فهي بيد الرزاق

وشخصيا, اتمنى السعاده والبسـطه في الرزق لأي دابه خليك من كونو زول

.

مرحبتين أخي عمرو

أنا قصدت انكم شماشة (في الطرمبة)..لو النكتة ما عجبتك أسحبها و اعتذر

و مرحب بيك تاني

.

Quote: تنتعش الشرطة جدّآ في العهود الديمقراطية و تزيد كآبتها و بؤسها في الإنقلابات ذلك أن المسؤول من البلد في الديمقراطية مواطن مدني (زيّـنا ) لكن في الإنقلاب يحكم بداخل القصر دياشي (عدونا)

الاستاذ الاعلامي النقيب معاش الطيب بشير ( دا كلو عملتو متين انت )

تحية طيبة

شكراً على هذه الاضاءة , واظنك قد تجاهلت جزئية مهمة جداً وفريدة من نوعها , ألا وهي

سيطرة فئة معينة من المدنيين على كلتا المؤسستين , الشرطة والجيش , حيث التجاوزات

التي لم( ينزل الله بها من سلطان ) , كان أخير لينا سلطان الجيش والشرطة .

أتمنى اني ما أكون طلعت برا الموضوع , وان لم اكن , فأنا عندي تجربة مريرة تتعلق

بسيطرة المدنيين على الشرطة أتمنى أن أجد لها متسعاً في هذا الخيط إذا ما وجدت منك

السماح .

.

الأسـتاذ الأديب معروف ســنـد بنفســه هنا!!

و الله زارتنا البركات و الجزيرة بحالها

يا أخي أول حاجة شرف عظيم زيارتك لينا في بوسـت العسـاكر الغلبان دة..و الأمر لا يحتاج لاستئذان

الخيط بكل رولته و بكرته تحت أمر قلمك

أما الجماعة التي سيطرت على الجيش و الشرطة فقد فرضت يدها على المالية و الخارجية و (الجاز) و الإعلام

و النشـر و الجامعات و السـوق و المطار ....و عييييييييييك.

بمناسبة الجامعات دخل صديقي اليساري المعروف لمعاينة مساعد تدريس بجامعة الخرطوم مطلع التسعينات..

وجد الجلابيب القصيرة و اللحى و لم يتبين وجه أيّ منهم ..سأله الأكثر تكشيرآ:

إرفع الآذان

قال له صديقي ضاحكآ، هو الآذان وقع متين؟..و أخرج كيس تمباكه on his way out

دي هدية مني أنا ..لكن تعال لينا بالحكاوي بتاعتك

تعال فرّح ليالينا..

.

.
المواقف الوطنية للفريقين

*الشرطة كثيرآ ما رفضت أوامر اطلاق النار على المدنيين..و قد كان هتاف المتظاهرين في أبريل

بوليس الشعب ...ح يحمي الشـعب

*الجيش ..انحاز للشعب في أبريل و حقن دماء كثيرة بذاك القرار

.

جنابو

العفو والله

بالرغم من عدم المعرفه الكافيه بيناتنا, إلا انو تأكد تماما, ما بيناتنا

قصدي وقصدك.

مداخلتي الأخيره كانت موجهه الى

Quote: هـواتف و إيميلات من كومندانات غير أعضاء بشأن البوســت تتراوح بين الإشادة بالبوســت ووصفي بعدم الضـبط و الربـط

.

تســلم يا عمرو يا أخي

و شكري بلا حدود

.

الطيب بشير إت ذاتك ما ملكى!! am just kidding
شوف الملكي ما تدى اى فرقه غير يدخل يدو يبصم!!مقولة دياشه يا تروتسكى!!
واحده من اشهر النكات العسكريه الدياشيه !
مهداه للملكى الكيشه د معتز تروتسكى
عمكم حميدان اشهر تعلمجى فى مصنع الرجال سمع بان احد الطلبه المستجدين (الدفعه الجونيور) قد هرب من الكليه الحربيه بعد تاكدوا من قبولو بكلية الطب بجامعة الخرتوم
فجمع المستجدين لإداره داخليه هى الاشهر و ابتدر الحديث قائلا :
سمعنا إنو اخوكم المستجد الطالب معت ..ز هرب عشان كلية الطب ،اولا بالتبادى خلونى ارتب ليكو الكلالى (جمع كليه) (طبعن التعلمجيه عنهم قواعد لغه ونحو لو سمعم المرحوم البروف عبد الله الطيب لمات غما قبل اوانه ب50 سنه ..)
الكليه الحربي دى ..مصنع الرجال اول كليه فى الترتيب !!
بعدا كلية سوسن ناس ابوخجيجه كلية البوليص !!
بعدتن السجانه ..ابسدادتن زول (اهلنا البقاره بسخروا من السجن بتسميتو باب سداتن زول)
بعد داك ياطلبه حتى بتجى كلية الحكماء دى بسموها شنو ؟؟
الطلبه :الطب!!
عمكم حميدان : متسائلا ومجاوبا فى ان واحد هى كلية الطب دى شنو ذاتها؟؟
الطب دا ما كتابين ! كتاب المرض ..!وكتاب الدواء..!
فتوه اخوكو بسمو شنو ؟؟
الطلبه : معتتتتتتتتتتت.....ز
عمكم حميدان : إدهور ..إدهور ..إدهور ..ك ى ى ى دمن رجع للطب ؟؟
فهمتو على يا عيالى .. مستدركا يا مستجدين !!
العفو يا معتز والعتبى لاصدقائى وصديقاتى النبلاء والنبيلات اطباء وطبيبات بلادى
اشطرنا واذكانى واكثرنا عطاء
والملكى برضو كان دكتور زاتو ما تدى اى رقراق غير يبص...م
الطيب بشير الله يجازى محنك دخلتنا فى لوم مع احلى ناس
ولى عوده بطرائف اخر

.

Quote: الطيب بشير إت ذاتك ما ملكى!!

يا سيادتو فارس أنا ملكي ساي؟؟ أنا و الكمال لله كنت أكبر هوا للدفعة..أنا اتحلقت تلاتاشر صلعة

بالموس في فترة اتناشر شهر!!أنا صاحب أفظع زيارات في الكلية..و الزيارة للطالب العسكري تجلب

المصائب له و لدفعته حسب نظرية تعميم الشر المعروفة..

الزيارة الأشهر كانت في فترة الحبس الأولى..جاءت مذيعتان و مخرج و فني لزيارتي بعربة التلفزيون

بالطبع دخلوهم على المدير طوالي لأنهم ناس التلفزيون..و انبعث أشقاهم و قال للواء:

جينا زيارة للأسـتاذ الطيب بشير..و كان لقبي العسكري (مستجد) لم يبلغ حلم (طالب) بعد

تصادف أن سمع ذلك الطلب ملازم الميدان..و كاد أن يسقط مغشيآ عليه!!

الجدير بالذكر أنه حلق للدفعة كلها صلعة قبل أن يخبرني بأمر الزيارة

الأطرف أنهم حلقوا و لما يعلموا بعد ذنبهم الكبير..و اتهموا ناس التمباك بالكفوة باديء الأمر

لكنني دفعت ثمنها (طابور بطانية) ابن كلب..و الشرح مسؤولية الكومندان الزائر الأول بعدي هنا

تحياتي

.

الاخ القمندان..
في طوق الحمامة شروح اسماعيل الاخشبندى العلامة .
انة قال..
دخل علينا زرياب وهو زعلان..
ولم يستطع ان يتبسط فى شرح الامر لنا في مجلس الخليفة لانة عجلان..
ولم يزد عن انة ذكر كلمة العسس.. وكررها ثلاث..
ففهم الخليفة الحصيف العلامة..
لكننا لم نفهم نحن العامة..
حتى صدور الفرمان بتغير الاسم من عسس الي شر طى..
والمعنى واضح ..
من تأبط شرا..
نواصل سرد واقعة كشة زرياب والدخول الى الخليفة من غير ان يطرق الباب..
وتغيير الاسم من كثرة الاسباب ..
وحكاية حمرة الحكامة..
من كتاب طوق الحمامة..
شروح اسماعيل الاخشبندى العلامة ..

سعادتك الطيب بشير
شكراً على هذا البوست المميز جداً
إستفدت بالمعلومات القيمة واستمتعت بالطرائف

أرجو الأستمرار
ارجو ان يحث هذا البوست اصدقائى فارس ومنتصر بالكتابة

لكم جمبعاً الود

.

ألف مرحب الأخ الكريم عبدالعزيز حسن على

تشـكر يا حبيب على الزيارة و التعليق

و يا ريت فارس و منتصر و معتز و عماد و كل الكومندانات يواصـلوا الكتابة هنا

و أحييك مرة تاني على كلامك السمح و يا ريت نكتب دايمآ حاجة تفيد

يديك العافية

.

.
حبيبنا المخرج الرائع اسماعيل سمعة

Quote: ولم يزد عن انة ذكر كلمة العسس.. وكررها ثلاث..

دي يا حبيب زي نكتة الببغاء (عشّـة الكشّـة)

أما اسماعيل الكاليفورني فهو رجل أدرك الظرف و اللطف في ميز (الكوشـة) الذي كان بجوار السينما

بأم درمان..و هو ميز فيه كثير من الليبرالية الإجتماعية التي تقدّم ذكرها..و فيه غناء جماعي

و حلل يكثر فيها اللحم و البصل و الشطة.

تلتقي بالميز كثير من المعارف .. و تحدث منتصف الليل بعض المعارك مع السيد (نجيب زيادة)..

يا أخي بالله انداح....اندح من الطريق شوية..

.

عبد العزيز ود حسن يا صديقى
السلام والسلام
تعرف يا عزيز دواس العساكر بكلمه بتحسم ! ولو إستعصى الطلقه بتحسمو
الكلام دواسكم إنتو الملكيه.! إنشا الله دوستكم بهناك اخدت ليها ختة نفس
تشتكو دايما من خفنا شفتو خفكم على بعض كيفن تقيل ؟!
بس إبراهيم ومقبوله ما يعرفوا!
لقدام

تخريمه :
بالمناسبه عندى واحده شايقوعسكريه بت ....
لو حكيتا هنا ببيت الحراسه!! وبشاشه بعلى كفالتى !!

لما نتلاقا ذكرنى !

.

Quote: تعرف يا عزيز دواس العساكر بكلمه بتحسم ! ولو إستعصى الطلقه بتحسمو الكلام دواسكم إنتو الملكيه.!

طبعآ الكومندان فارس قاصد الكلمة السحرية (انتباه) التي ورد شرحها أعلاه

لكن دواس الملكية يا فارس فيهو ..أعتقد..و اسمح لي اختلف..و ما تنسى في الحتة دي..

انتو تبدو (نقاشكم) معانا بي (قوم فوق)..تاني ما بيفضل فهم

.

يا جنابو الطيب قصة نظرة الديش الدونية لي ناس البوليص تأتي شيئا بين الارث العسكري القديم باعتبار (التركي ة لا المتورك) لكن الشغلانة نفسها داخل الديش بشكل كبير يعني بتاع المظلات يقول ليك باقي الديش كهن و بولكات امناء و ناس المدرعات بقولوا للدفاع الجوي قلبكم اسود زي كاباتكم اما الاسلحة الفنية من طيران و بحرية فهي مكان دندر البندقجية و المشاة

يعني يا حضرت القصة ما البوليص براهو
كدي خليك من دا

دور لي الجماعة ديل علي ميدان البيادة

و





اثبت!

.

أبوالمعالي حبااااابك
كلامك كلام دياشي حالتو متأخرة نهاااااائي

Quote: بتاع المظلات يقول ليك باقي الديش كهن و بولكات امناء و ناس المدرعات بقولوا للدفاع الجوي قلبكم اسود زي كاباتكم اما الاسلحة الفنية من طيران و بحرية فهي مكان دندر البندقجية و المشاة

التحية لكل الشوالات التي ورد ذكرها ..لا نفرق بين أحد منهم
و ثبتنا طـب يا ابراهيم افندي..الرتبة دحين شنيها؟
زي ما قال اللواء أحمد المرتضى البكري أبو حراز، ربنا يديهو الصحة و العافية للملازم الذي ملأ دفتر الأحوال تعليمات و نسي أن يكتب اسمه و رتبته في الآخر..كتب له سيادة اللواء الظريف
(من أنت يا حلم الصبا....من أنت يا أمل الشباب؟)
فهو من جهة قصد نسيان الملازم لاسمه
و من جهة تانية نظام انت يا دوووووب ملازم و جايطنا مالك؟
دحين يا ابا المعالي (أديني إسمك ولاّ قول لي رافــد)

.

ابوالطب ابدا و الله لا دياشي لا حاجة ( ملكي من الدفعة واحد)
لكن عاشرت الناس دي ردحا من الزمان ابان عملي في مختلف انحاء الوطن

بعدين نحنا ناس الطيران المدني ديل كنا تبع وزارة الدفاع ايام عبدالماجد حامد خليل و الراجل اصر انو لازم نندرش فكان نصيبنا ثلاث اشهر من الدرش المتواصل بمركز التدريب الموحد بجبل الاولياء
طبعا نحن كاكينا كان اغبش فجماعتك سمونا الطلبة العرب و مرة يسمونا توابع

الطيب ود أبواتنا النصاح

مشكور يا زول يا سمح على الإمتاع والمؤانسة والمعرفة
وتناول الموضوع من جهاته كلها، البتجيب الهوا الحار والبتجيب الهمبريب

تعرف يا الطيب
مفردة "ملكى" دى عملت فينى جنس عمايل بعد ما قريتك هنا
والله يا الطيب الليل كله أنا انوح وانونى وأنم

لأنها ذكرتنى واحد من أحلى الناس وأنبل الناس وأشجع الناس

زول فريد متفرد فى كل شى

اخونا وحبيبنا "أبو علامة بخيت الحسن ابو علامة"

من ما نحن شفع كان أمنيته بس يمشى الجيش

واتحققت الأمنية

ونحن أمنياتنا فيهو كلها خابت
لأنه "فات قدامنا" وطبعا دائما الطيبون يذهبون أولا

ابو علامة سنينو كلها قضاها فى الجنوب، فى المحرقة العبثية الغريبة ديك
مافى دواس ما كان فيهو

وفى الآخر يجى يموت جوه مكتب، وبى شنو بى قذيفة قالو طلعت بالغلط

المهم يا زول ما اطلع بيك بره الموضوع

ولو قعدت احكى ليك عن "ابعلامه" ده داير لى مليون سنة

طوالى كان بقول لى الواحد فينا هو يا ملكى، اقعد يا ملكى، سو ده يا ملكى

حمنا معاهو "ميزات" العاصمة كلها

ما كان بفوت ليهو "قعده" من حقاتنا إلا يكون جواها هو النجم المشرق

رغم إنه لا ليهو فى العير ولا فى النفير من بلاوينا الكنا نحن بنسوى فيها
لكين تلقاهو قاعد مستمتع وماسك الجو على حسابه

والله مشتاقين يا ابعلامه

استنانا هناك يا عسكرى يا بديع مع الملائكة

بس اوعى تمش تهابش ليك واحد منهم وتقول ليهو يا "ملكى"

يقوم يقول ليك عليك "جزا" وتقوم تلف حوالين الجنة خمسين مره

عليك الله يا الطيب قول لى "يا ملكى"

عشان القى لى زول تانى زى ابعلامه يقولها لى

معليش يا الطيب طولت عليكم ياخى

بس مخنوق ساى والله بالحسرة

أبو بشير

مشتاقووون

متابعك قراءة
التعليق من السودان
ساكون هناك الأسبوع القادم
تحياتي لام بشير و الأولاد

.

حبيبنا جلال داؤود

كيف حالك يا بركة

أنا متابع مع أمين سفرك للسودان

و هو سيسافر من ملواكي قبل زواج بنت أختي بنحو أسبوعين..يعني بااااااع

و هو يقدر؟

تحياتي للأسـرة في الســودان و ان شاء الله معاكم بالتلفون

شكرآ ليك

.

الأخ الطيب (جنابو)

الحديث ممتع ومثير

طبعآ نحن الملكيين أحسن حاجة تعملها تبعد من البولييس
من صغار أمك تقول ليك أوعك تطلع الشارع البوليص بقبضك
(يعنى زى قصة من زمن ما كنا سواسيو)

لكن البوليس كان دايمآ أقرب العسكريين لينا (الجيش والأمن والسجون)
وكت الزنقة نتحامى فيهم
مرة اتزنقنا فى حظر التجول إخترنا نقطة مسؤول منها البوليس وأجارونا فى خيمتهم للصباح
وده فى زمن إبراهيم شمس الدين

والقصص كتيرة

التحية للشرطة السودانية
مع تحياتى

.
مرحبتين الأخ العزيز رأفــت
طبعآ كنت متخيلك تنحاز للجيش
يمكن ع شان الصورة الفي البروفايل
لكن كلامك عن الشرطة و تحيتك ليها جات في السلك..(طبعآ أنا محايد و كدة) لوووول

Quote: مرة اتزنقنا فى حظر التجول إخترنا نقطة مسؤول منها البوليس وأجارونا فى خيمتهم للصباح

و هذا سلوك يشبه البوليس جدآ..هم أكثر العسكريين تعاملآ مع المواطن..و لا ندعي أن التعامل هذا دائمآ مثالي، لكنه يكسب الإلفة بمرور الزمن و يحدث التقارب المطلوب لتعميق التواصل..هذا بحد ذاته مرفوض في الجيش و الأمن..بتاع الجيش يزدري المواطن و الشرطي باعتبارهما غير منضبطين..و بتاع الأمن عاوز زول يكون مسؤول عن (قلب نظام الحكم) و (إثارة الحرب/الكراهية ضـد الدولة)..و بـث..لذا تجد الشرطي في خدمة الشعب..و كما أسلفنا تحتاج هذه الخدمة لتطوير لكنها بالفعل موجودة.
شكرآ ليك يا أمير
.

.

أبوذر يا مطر يا ملكي يا ملائكي

يرحم الله توأم روحك "أبو علامة بخيت الحسن ابو علامة"

ندعـو له لأنه أخوك..و لأنه رفيق الســلاح

و كثيرون هم يا صديقي .. من أخذتهم أخطاء السياسيين في حروب الجيش الداخلية..بين من أشعلها

جهادآ و من وضعها شرط توظيف..و مات الكثير من أولاد الناس..يرحمه الله و قد تقدم علينا..

و يا أبا ذر يا صديقي انت تشرف في أي وقت ..و تاخد البوســت كله براحتك

.

استاذنا فارس
هي نضبط شويه. .
اثبت؛ تمام سعادتك
سعاتك الله لاجاب الزعل..
طبعا التحيه والاوليه للجيش ياجنابو الطيب..
يعنى كما ساى زوق ساى ما كنا اديناك تحية. .
شوف والله رغم انو الجيش مافيهو حليفه..
الزملاء ديل شوفنى احيك يربنونى كيف ويبقى الجيش فعلا ذادو مويه. .
ياسعتو فارس الجيش مافيهو قرايه ماتربنا ساى( طبعا الكلام ده ونحن فى الميز يعنى بعد الغداء كده ونسة بدون تكلفه عشان ماتعمل لى ايقاف..). .
ولا حبس خميس ده ماموت عديل للطالب . .

Quote: أنا اتحلقت تلاتاشر صلعة

الظاهر كنت ملخباتاتى ياسعتو؛(بتقد سلك بتمشى الحيرزاب وعربجي ). .
(بتقد سلك بتمشى الحيرزاب وعربجي ؛بس اوع من الخرييت.)
ديل كما فهِمتيهن خلى سعادتوفارس بعد اذنو طبعا يشرحين ليك. .

سيادتو فارس بتتذكر عمك ابو الريش وبيلو ووو الخ
والميادين – وبلنجه - ونيران . .

وفووووووووووووووق
نقيب طبيب: تروتسكى. .

.

الحبيب معتز تروتسكي ..مرحبتين
ذكرتني موقف جميل بي الكلام دة

Quote: طبعا التحيه والاوليه للجيش ياجنابو الطيب.. يعنى كما ساى زوق ساى ما كنا اديناك تحية

واحـد ملازم في الحرس بتاع القصر الجمهوري لقاني ليك واقف في حوش القصر لابس نقيب شرطة..و هو ماشي باتجاهي بي فردة نجمة مجدوعة في طرف الكتف..لازم يحييني..مافي طريقة زوغة..قام جدع لي تعـظـيم مهبب سريع كدة و هو ماشي..أها أنا ما رديت عليهو..و بعد عشرة دقايق اتلاقينا مع نقيب جيش صاحبنا الاتنين في مكتبو..قاموا اتواكدوا علي ..ليه ما رديت التحية؟؟ انا قلت الحركة العملها دي ما تحية .. دي ممكن تكون أي حاجة الا التحية العسكرية..و قلت للملازم انت يا ظابط ما شايف الكتف دة مليان دبابير لمن عاوز يسيل..النقيب الدياشي انتصر لي زولو..قال لي:
هو ظابط البوليس أصـلآ ما مفروض يكون عندو دبابير..مفروض يركّـبوا ليكم (شـخـوت) زي بتاعة الضباط الإداريين و ضباط المطار..موش هم ضباط برضـو؟؟


.

يا الله يا الطيب ياخي

و الله لولا هذا البوست لما علمت انو ابوذر دا شقيق اخونا الجنب ابو الرجال المرحوم ابوعلامة البخيت رحمه الله .

ابوعلامة صاحب نكتة

الفاو + المافو = 128

الفاو رئاسة الكتيبة 128 الشرقية
المافو معسكر الكتيبة 128 شرق الاستوائية

رحم الله ابوعلامة البخيت

.
مرحبتين حبيبنا ابراهيم عدلان

يرحم الله الفقيد ابوعلامة البخيت

و إيه الدنيا غير..

لـمّـة ناس في خير..

او ســاعة حـزن..

دة الواجب إذن

.

أخونا العزيز إبراهيم عدلان

تحياتى وتقديرى

سعيد الدنيا البكون عرف ابو علامة وضاق حلاوته

Quote: الله لولا هذا البوست لما علمت انو ابوذر دا شقيق اخونا الجنب ابو الرجال المرحوم ابوعلامة البخيت رحمه الله .

أبو علامة أخ وصديق وأكثر من شقيق، تربطنا صلة القربى من جهة الوالدة
ونحن جميعنا من "ودراوه" وهو طبعا نشأ وشب فى "الخوى" فى شمال كردفان بحكم إستقرار والده هناك، وكان يكبرنا بحوالى دفعتين

وكما قلت للعزيز الطيب بشير
فإن أبا علامة يحتاج لمجلدات كيما نوفيه حقه
وصفاً ومديحا

وعزاؤنا أنه الآن مع الله

.

Quote: وكما قلت للعزيز الطيب بشير فإن أبا علامة يحتاج لمجلدات كيما نوفيه حقه وصفاً ومديحا وعزاؤنا أنه الآن مع الله

أبا ذر يا مطر الخير ســلام
يرحم الله أبا علامــة
و يفيدنا جدآ أن يعرف القاريء أن وســط العسـكريين أناس لا تعـوزهم الروعـة
و واضـح أن المرحوم كان مطرآ هو الآخـر..فهل مثله يدخل في حساب المدنيين أن العسكرية محض غباء!
يرحمه الله ..و حسـبه، كما تفضّـلت، أنه استبدل صحبتكم برفقة الباقي..و نحسـبه مع من أحـب..

.

ابو ذر (غفاري القلم)

التحايا و الشوق

زاملت ابو علامة ردحا من الزمان ابان عملي بمطار جوبا و شاركني السكن مدة طويلة كان رحمه الله نعم الصديق و نعم الاخ و شديد الاعتزاز بعسكريته (و بودراوه الحصحاص حلاوه) ( ولو كنت تدري ما الخوي لطويت المسافات طي) ذلك من بديع درره
رحم الله ابا علامة و اللهم انزله في اعلي عليين آمين

.
جوانب مضيئة في القوّتين..و يمكن أن تجسّـر الهـوّة بيننا و المدنيين، ألا و هي أخبار مبدعي القوات النظامية..في كل المجالات..و سنتطرق لها..
مثلما كتبنا عن واحد من أذكياء الشرطة، المرحوم الفريق ابراهيم أحمد عبد الكريم، و سنواصل الحديث عن غيره، نريد كومندانات الجيش أن يكتبوا لنا عن أذكيائهم. يمكننا أن نكتب عن بعضهم مثل المرحوم الخطيب الفلتة اللواء عمر الحاج موسى، أو الشاعر اللواء الركن أبوقرون عبدالله أبوقرون أو الصاغ محمود أبوبكر أو غيرهم فهمو كثر.. لكن عاوزين ناس الديش يحكوا .. قالوا سمح القول في خشيم سيدو..
ابن حلال يفتح الباب

.

الطيب بشير

اسى هنا يقولو ليك استاذ ولا سعادتو ولا الجبيب ولا القريب من القلب ركنا قصيا..
دلوقت ناس الجيش يقولو علي متملق ..فى التملق متملق ناص البوليص ؛معناتها رميت الديش فى الارض. .

Quote: ذكرتني موقف جميل بي الكلام دة النقيب الدياشي انتصر لي زولو..قال لي: هو ظابط البوليس أصـلآ ما مفروض يكون عندو دبابير..مفروض يركّـبوا ليكم (شـخـوت) زي بتاعة الضباط الإداريين و ضباط المطار..موش هم ضباط برضـو؟؟

دى الدرر البقولها ليك ؛او مساخة ناس الديش. .
تعرف سعادتو ده الحاصل يمكن مابين الجيش والبوليس اكعب من هلال مريخ وكمان عنصريه لمن غلط..
قايتو اامل ان تُعالج وياهو نحن نتذكر منها فى شكل قفشات مادايرن ندرشك سعادتو . .
وانت ماقصرت فى سرد وتوضيح لايجاد الحلول لجميع الجوانب المتعلقه بالقوتين وعلاقتهما بالمدينين والخ...

ياخ انت زول عزيز عليناكيف ؛تعرف قدر ما اشوف صورتك بتذكر عصام ؛واحيانا اعمامي. .

سلام سعاتو؛ وممكن ننصرف دلوقت. .

.

يا معتز يا تروتسـكي..
صباحك ســعيد
قلت لي ندرشـك يا سعادتك؟؟..أها سؤال زي دة عيلا يسألوا زول ملكي يا ملكي
هم كمان الدكاترة ديل جيش؟؟ ديل ماااااملكية عدييييييييل
قال ندرشك يا سعادتك..ما هو يا أنا أكون سعادتك فعلآ ..و تحيي بانضباط..يا اما كمان أنا أحدث منك و تدرش و تخلي الباقي..لكن ندرش سعادتك دي شغل ملكية..
و ما عارفين نعمل شنو مع ملكية السلاح الطبي ديل؟؟

Quote: ؛تعرف قدر ما اشوف صورتك بتذكر عصام ؛واحيانا اعمامي.

و الله يا معـتز معـزتك راسخة في الفؤاد ترعاك العـناية..لكن كمان ما تحته خط دة بيودّينا دار العجزة!
عمك لسّـة شباب و عندو حركات ضباط. .you know what I mean

.

الحبيب ابوبشير
اتابع روعة الكتابة
احترامي لك ولضيوفك الكرام
محبتي
محمد علي المشرف مختار

.
حبيبنا و دفعتنا الدكـتور محمد علي المشـرّف
مرحبتين حبابك
و شـكرآ للمتابعة يا ابو الدفاع
قول لي؟
كم مرة عملت للدفعة هوا؟
يوم قبضوا عندك سيجاير..و يومك انت و أشرف كشّـان، الكارثة التاني، شاغلتوا البنات البيسألوا من الضباط..و طار خميسنا بي سببكم..و لمن كنا في المشروع الخلوي في الدروة بتاعة جبيل الطينة دحين انت موش شربت البيبسي بتاع الضـباط و معاك عماد أبو وردة و تاج الدين أب راس و عبداللطيف (العيش التجاري) و ميسرة الملكي؟؟..و التعلمجية دردقونا ساعتين بي سببكم؟؟..
هسي عملت ليك بي اتش دييييييك و عيييييك ..نسيت بلاويييييك دييييك؟؟..
أقرب كونفرنس تجي أمريكا عيلا أطلع المسرح و أقول للمؤتمرين الزول دة ما عندو ضـبـط و ربـط
و الله ليك وحشــة ياخ
تحياتي للحبايب

.

أديبنا الرائع ابوالطيييب
تعرف انا متابع كلامك السمح ده لي كم يوم وخائف اسلم عليك .....لكن انا ما خفيف ولفيف:::
محبتي واحترامي لك

.

دفعتي الكارب..الدكتور الخاتي القول
و لسّــة..عندنا دفعتنا أكـووج وول أكـووج..أطـول دليل في الطابور..برضـو لابت هنا
من أحـلى الناس أكـوج..و هو زول هاديء ما كان عندو مصائب
كلكم ح نفـتّـكم..بداية ب سـتّـات الشاي في برّي ..و مرورآ بالمرأة البدينة في الكلاب البوليسية
و انتهاء بي يوم التخريج و الحلوين الكانوا بيزغردوا ليك...لووووول
أمسـك الخشـب..عارف رقم حسابي كم؟
دقيقة أحكي ليك نكتة (رشـوة) بمناسـبة التلميح دة
طبعآ البوليص (متّهـم) بي انو بياخد رشـوة..و سبق أن أوضـحـت أن بالمهنة ضعفاء نفوس شـوّهـوا الصورة ..و أوضحنا أن (ضـم في الوسـط) أدخلت عساكر هم بالأصـل لصوص محترفين!..و بعد ما أحكي النكتة ح تظهر نكات كتيييييييرة لوووول.
كنت سايق البوكسي المهلهل بتاع البوليس و انا لابس زي مدني
شارع النيل الخرطوم قريب من المنتزه و قبل الكوبري القديم استوقفني (اوتوستوب) عمك عجوز تدل لكنة حديثه على أنه فلاّتي..و رفع العفش في الضهرية و ركب معي بي قدام ..سألتو ماش وين يا عمي..قال..أم بـدّة..و أعطى كل حرف حقّـه و مستحـقّـه و هو ينطقها..قلت ليهو أنا ماشي بيت المال..لكن ممكن أمشي ليك بالأربعين و أنزّلك في صينية التجاني الماحي و من هناك الله يسهل عليك..همهم بما يفيد الموافقة و الحيرة في ذات الآن..و كان يؤانسني و يكثر من ماشاء الله من وقت لآخـر..المهم أنه حين نزل..و قبل أن يأخذ أغراضه من ضهر البوكس..شـمّـر جلابيتو و أخذ يعالج جيب العراقي بما يفيد أنه سيدفع لي نقودآ..قلت ليهو يا عمي لا معليش دي خدمة ساي..قال لي (لأ) بهمزة قطع بائـنة بينونة كبرى..و أردف..لازم ندّيـك...قلت ليهو العربية دي حقّـة الحيكومة يا ابوي و أنا.......كان وقتها قد ملأ يده بقروش السودان الملوّنة و فارغة و قال لي أمسك يا ولدي..
أنا لأني واقف في طرف الصينية و محتل محطة البصات و المظلة.. و الدفارات وراي تعمل رن رن رن رن ..ما عاوزين يضربوا بوري لبوكسي البوليس..قلت ليهو بي شوية انزعاج و حســم:
يا حاج أنا بولـيـس
قام عمك بالواااااضـح قال لي:
آآي يا ولدي ... البوليس ذااااتو ماااا بيشـيل

لوووووول

.

سلام سلام
سلام سلاح..

ياسعادتو انت زول ديش بس عندك درر ولا عند الجياشه شغال فينا تُرب ساى. ..
ماقلنا ليكم الجيش مافيهو قراية الا حكاية الطب دى غلبت نعمل شنو..

Quote: لكن كمان ما تحته خط دة بيودّينا دار العجزة! عمك لسّـة شباب و عندو حركات ضباط. .you know what I mean

I know
بس القال عمك عجز منو عمك بس الشغلانه مرقت من نفسو وانت ادرى. .
تقول لى دار العجزه هاك بص ده نومك بس المرعب ده كان ظهر ليك الا تقوم جارى. .




------------------------

وده بذكرك منو ياسعاتو؟

----------------------------------
بعدين شايف الشغلانية و(سعت) شديد وجابت ليها دكاتره كُبار..
برضو تقو لى ملكى انا..

يامواطن. .
وينك يا ( Dr.Mohammed Ali Elmusharaf)
مشتاغون ياسعادتو التانى انت كمان..

------------------

ولمن نعمل خلف در..


استرح..مع ام الكلالى ذاتها. .

.
يا معـتز..هـلا
و الله لو دة عـمّــك..لكن ماااا شباب يتقطّـع
طابور السـيف ..و طابور العصـاية كانوا عقدتي، النعمني ملكي، و كنت جايطهم زي الورد
لكن عمك ما شاء الله شايل السيف زي الأســد
و بالطبع ما كل ضابط ممكن يتقن طابور السيف للدرجة دي
أما صورة الطلاب الحربيين ديل فأقل حاجة انهم ما عندهم ضـبط و ربط، و كويس انك قطعت ريسينهم



لأنو الملكي اللي على اليمين دة رامي (البـيريه) بتاعو في الأرض و فيهو شعار السودان!!دة يستاهل حبس ستة شهور بعد التخرج..و يقعد فيها ينضّـف أسلحة للمستجدين ع شان يفهم عظمة الشعار..
لكن باقي الصور تمام
شكرآ ليك يا رايق

.

.

دحين دة مو الأسـتاذ عبدالمنعم الكـتـيّـابي؟



الصـورة بعيدة و عويناتي مطشّـشـات

كأنّـه هــو

إني لأجـد ريحـه لولا أن تفنّـدون

.

سعاتو الغالى ...
ياجنابو دقق شويه بتعرف ديل طلبه حربين( بيور) ولا؛ لا . .
ماتشرط عينا ياجنابو وتبطح لينا جيش البوليص. .

Quote: دحين دة مو الأسـتاذ عبدالمنعم الكـتـيّـابي؟

ده عماد. .
شكلك فعلا انت حتمشى دار العجزه ابو الطيب
وتانى فووووووووووووووق..

وسلام سلاح ليك جنابو..واصل نحن معاك.

----------------------------
بالمناسبه؛دقيقه الكلام ده

Quote: الله لولا هذا البوست لما علمت انو ابوذر دا شقيق اخونا الجنب ابو الرجال المرحوم ابوعلامة البخيت رحمه الله .

ابوعلامه القاصدنو هنا هو المقدم ابوعلامه التوفى فى بورتسودان؟
يااااااااااااااه
يا استاذ ابوذر
البركه فيكم كان بقى هو ولا غيرو..
لكن فعلا ابوعلامة داك شخص يصعب وصفه...
فاليرحمه الله..

.

الحبيب معتز تروتسـكي
أولآ دة عماد منو؟؟..عماد احمد الطيب ما عندو شـنب قدر دة..و لونو أفتح
تانيآ انت القلت لي ناس الحربية و ام الكلالي..أنا البعرفني بالشوالات شنو
بعدين يا حبوب الصورة مقطوعة ..ما فهمنا حاجة..هم خايفين من شـنو

أجـمـع باك يا ملكي

.

الطيب.. حبابك يا طيب..

كتر خيرك على هذا السرد الممتع..

لكن اول بالتبادي.. بيادة هويدا الجنرال مية المية .. يا حبيب..و زمان كنا قايلنك دياشي..الإ هسع و بعد البوست ده.. صححنا الموقف بتاع هويدا الجنرال.. تماما و اسوة بصحابك بتاعين القصر الجمهوري..
و جبنة صاحبك شنان.. ذكرتني ببت الضابط.. المرقت جنابو من السيك..و حكاوي و حكاوي..
البوليس مؤسسة مهمة جدا.. و برغم من حكايات ( الزبالة).. و دي جات بعدك بكتير.. برضك فيهو ناس كويسين جدا.. و قد تستغرب.. معظم متحري البوليس هم افهم في التحري من أي وكيل نيابة او وكيلة نيابة حديث التخرج..

لكن كلامك هنا كلو ما مرق من الخرطوم و مدني و الضباط.. و ده اسمو التهميش يا حبيب.. وين ناس الأقاليم..و ناس الشرطان و الأزبليطات..؟ و هم من يقوم عليهم كيان البوليس..
بالمناسبة دي زمان قريت دواوين شعر لعوض مالك.. هل بوليس و لا ديش؟
بعدين يا ريت تحدثنا عن الرتب القديمة و ما يعادلها حديثا.. مثل يوزباشي..بكباشي..صاغ.. الخ..
و يا ريت كل ناس المؤسسات التانية يفتحوا لينا بوستات نقد بناء.. النيابة.. القضائية.. الخ

و نشوفكم

كبر

.

أهـلآ الحبيب كـبّـر و صـلّـى و شال نوم عينينا و ما خـلّا
التحية ليك و لهويدا الجنرال..انت لسع متذكر..
قالت ليك (هاك أمشي أكشح الوسخ بتاعك دة)
حديثك عن انحصار البوسـت في الخرطوم صحيح..ذلك أنني لم أتشرف بالعمل خارجها
لكن ممكن أحكي عن زياراتي لميزات ضباط في الأقاليم..و هي كثيرة..و أغـفـلنا العساكر لحد ما لكن جايينهم..و المساهمة مفتوحة للجميع أنا ما بقدر أقول الكلام كله

Quote: معظم متحري البوليس هم افهم في التحري من أي وكيل نيابة او وكيلة نيابة حديث التخرج..

أذكر جدآ عنوان (مانشيت) كبير اخترته للقاء صحفي أجريته مع عبدالرحيم محمد حسين لمن جابوهو وزير داخلية للمرة التانية .. كان العنوان:
تعلّـمت الكثير من الشاويش (النبطشي) في أقسام الشرطة.. أو المناوب/النوباتجي
و أحدث الحوار ضـجّـة في الجيش
الرتب القديمة أنا أذكر منها
أمباشا..عريف..شريطين في الضراع
شاويش..رقيب..تلاتة شرطان
بيجّـاويش..رقيب أول..أربعة شرطان
صـول..مساعد..أزبليطة فاضية و شرطان مذهبة و مقلوبة بنهاية الكم
يوزباشي..ملازم ..نجمة واحدة
ضابط..نقيب..تلاتة نجوم
صاغ..رائد..صقر الجديان و كان زمان تاج الملكة لحدي ما غيروا النميري..ع شان كدة تلقى الناس الكبار يقول ليك تاج و دبورتين دة رتبتو شنو؟؟و يكون بيسألك هسع دي ألفين وأي حاجة
بيكباشي..مقدّم..و هي صقر و نجمة (كانت اذاعة اسرائيل العربية الموجّهـة تقول لحكومة جمال عبدالناصر..حكومة البيكباشي..استهتارآ)
كومندان..عقيد..صقر و نجمتين
أظـن أن هذه فقط هي الرتب التي اشتهرت بالتركية..لأن كلمتي بريجادير و جنرال، و هما عميد و لواء، كلمتين انكليزيتين..فهل كانت تلك الرتب بالإنكليزية لأنها حكر على الخواجات؟..أم أنني أجهل تلك الألقاب بالتركية و بيننا من يعرفها؟..
التحية ليك يا كبر

.

نواصل حكي الدياشة

عمك الصول حسين كبسون ( من علماء علم البيادة - البديولوجي )في مركز التدريب الموحد بجبل الاولياء بدأ من الهجانة و عندو راي في عموم الديش ( فترة قوات الشعب المسلحة) و يحكي انه بكي عند انشاء سلاح الموسيقي ,
عمك طبعا في الجيش من زمن قاشو حبل و ما بحب المسخره و اذكر ايام درشنا بجبل اولياء كان نبطشي في يوم عطلة اظنها شم النسيم و المعسكر عدمان اسم الظابط و اعلي رتبة حسن كبسون قام جمع المعسكر كلو في ميدان البيادة ادارة داخلية 6 ساعات من الفارغه و يا مستجد اقيف زي ما اتعلمت و بلاش موت معاك و مر من خلال سريتنا ( الطيران المدني) و تهلل وجهه و قال ( هلا هلا اولد المصرين البيض اولا المويه البارده اسم ظابط جبنا ليكم تلفتو قلبو الليله نومكم خزاز
و قام صرف كل السرايا ما عدا سريتنا و اليوم داك من الادارة الداخلية لميدان تمام الصباح
ونحنا كان راسنا حجر حلفنا نحدد مدي تحمل عمك فوالله الراجل جري بينا اختراق ضاحية بعد التمام لكن انبسط من السريه و تلفنا قلبو.

حكي لينا في لحظة صفاء عسكري عن الديش ايام زمان و عن الهجانه(دايما فوق)

قال و الله زمان لمن القايد يقول داير مويه ملازم اول بي فصيله بمشي الفوله و باقي الديش بصلي صلاة استسقاء.

تقول لي سوسن

الطيب الطيب.... أستاذنا الأديب
و شيخ الشباب...
الكلام دا فاتنى عديييل ... بجيك برواقة لمن أكمل المداخلات
المليانة دى كلها... و الله عندنا قصص بتاعت شكل(ماحق مدينة)
شكل بوليس و دياشة مناطق عمليات..
المحيرنى الأغنية بتاعت:
أحب الكاكى جملة بوليس و جياشة...
مش همشت ليك الباقيين؟
يعنى أهم عسكرى فى أمريكا بتاع الموية زى ما بقولو
(المطافىء) و (حرس الصيد)
مافى معانا هنا فى المنبر و لا شنو؟
نتم الباقى و نرجع ...
تحياتى للجميع،،

خالص التحايا
حبيبنا الطيب...

Quote: تانيآ انت القلت لي ناس الحربية و ام الكلالي..أنا البعرفني بالشوالات شنو

المكان فى ام الكلالى صاح لكن زى ماقلت ليك ودققته بتعرف انك اكبر ملكى ؛وهو لمن يجى الكلام عن الملكية انتو ياناس البوليص جيشكم المزيود مويه ده تسكتو عليه بث. .
شولاات. .
لوووووووووول
معناها النقيب داك عندو حق (مكلهم ضباط). .

بعدين خوف شنو افو!!!
الصوره دى انا وانا. .


الشى التانى ابو الطيب داير اواصل معاك لكن زى مقلت ليك ربما اغيب لظروف بوريك ليها لاحقا ترقبنى..
بس قبل ما امشى واجى راجع لاحقا؛ مارديتو على كلامى ده..

Quote: بالمناسبه؛دقيقه الكلام ده Quote: الله لولا هذا البوست لما علمت انو ابوذر دا شقيق اخونا الجنب ابو الرجال المرحوم ابوعلامة البخيت رحمه الله . ابوعلامه القاصدنو هنا هو المقدم ابوعلامه التوفى فى بورتسودان؟ يااااااااااااااه يا استاذ ابوذر البركه فيكم كان بقى هو ولا غيرو.. لكن فعلا ابوعلامة داك شخص يصعب وصفه... فاليرحمه الله..

------------------------------
العزيز
Ibrahim Adlan

Quote: عمك الصول حسين كبسون ( من علماء علم البيادة - البديولوجي )في مركز التدريب الموحد بجبل الاولياء بدأ من الهجانة و عندو راي في عموم الديش ( فترة قوات الشعب المسلحة) و يحكي انه بكي عند انشاء سلاح الموسيقي ,

اييييييييك انت فتحت باب يصعب قفله. .
بس بحاول اجيك راجع عزيزنا ولو ماجيت ياريت تحكى عن الجبل والمركز والمظلات وو الخ..

------------------------
عبدالرحمن عزّاز

رجلك حاره. .



التحايا النواضر
فووووووووووووووووق
عشان حضرات الساده الضباط..

.
تروتسـكي كيف حالك
أنحن عسـكريتنا زايدينها فهم تراءى للجياشـة أنه موية يا موية انتا
نحن لو بقينا ناشفين ما ممكن نقدر نشتغل مع المدنيين، و هم كل همنا، انتو مصممين و معبئين للقتل و التدمير فقط...لووووول الربة بدت..
الزول البتسأل منو أحولك لأبي ذر المطر
أثبت يا ميت

.

تحياتى يا معتز

ومثلها للطيب وكل الزملاء هنا


والبركة فى الجميع

فعلا هو أبو علامة الذى توفى نتيجة لحادث فى بورتسودان
وحسبما عرفت، يبدو أن ثمة خلل أو خطأ حدث فى أحدى قطع السلاح
ربما أثناء فحصها أو معاينتها
فانطلقت منها القذيفة وصادف وجود ابو علامة فى مرماها

هى إرادة الخالق ومشيئته التى لا راد لها

وأجدد لكم التحية

.

مرحبتين الحبيب عبد الرحمن عزاز
كيف حالك يا رايق
قلت لي شيخ الشباب؟
مقبولة برضو
شرفتنا و منتظرين مساهماتك

Quote: ... و الله عندنا قصص بتاعت شكل(ماحق مدينة) شكل بوليس و دياشة مناطق عمليات..

يلا يا عمو
نسمع منك
و بنجي للتعقيب بالمهلة
شكرآ ليك

.
ابراهيم عدلان
كيف حالك
و الله كلامك سـمـح
لكن داير تخربو بي سـوسـن
نجي نحكي ليك عن معايشات مع العم سـلـمـة، بكسر السين، ربنا يرحمو ..و العم حسن تيّـة
و ما سمعناه عن (الباترا)..بالمهلة
تحياتي

.

.

1992

المطار

المطر صابي

زي أربعة/خمسة من بتاعين مجلس قيادة الثورة واقفين..الأزبليطات حمر تلمع ..و الكابات مربوطة بي شيء أحمر..و معاهم اللواء الزبير النائب الأول..و منتظرين ضيف مهم للبلاد..و معاهو وفـد..و قال كدة الوفـد وصــل..المستر فلاني الياباني..و القائد فلاني الياباني..و فلتكاني خبير كذا الياباني..و ناس الجيش صـننننننن..واقفين بي دبابيرهم الحمر و أسـكت من سمكة..و البيتكلم زول وااااااحد ..اللواء شرطة الدكتور محمد الأمين البشـرى..ذلك الدنقلاوي البوليس السوسناوي الخطير..و (الرجال) واقفين لم يفتح الله عليهم بكيف الحال بالياباني ..عاد رجال (الياباني) ..درشهم فهمآ و علمآ اللواء شرطة البشرى..و أكّـد أن قوة كلية سـوســن انما هي في هذه العلوم الدولية و ليس (أرقـد، عـمّـر، أضـرب)..و يتخرج ابراهيم ابوالمعالي فرحان بالبيادولوجي!
كما كنت يا ميت

.

ابو البشير

اقيف زي ما اتعلمت

(اشرب بطنك , ربع صدرك و نظرك باصي الساعة اتناشر )

و




اثبت




(ماشي الشغل و جاي)

.
يا وكيل عريف ابراهـيم عـدلان أبوالمعالي..انت اتدربت في الموحّـد جبل أولياء؟

سالناك الرتبة شـنو؟ ما جاوبتنا

طيب تاني نسأل..الدفعة كم؟..اتخرجت سنة كم؟..

ما تطلع (صاحب ضابط) و عارف المصطلحات..ولاّ تربية قشـلاق، زيّـنا، و مهندس/مضيف جوّي و عاوز تقبض الجــو

الأقـدمية وين؟..الرتبة يا طلبـة يا كـهــنة

صـلعـة بالمـوس ..و سبعة في سبعة و شوف حرســك من دفعتك و على الحبس معتادااااااااااا مارش

.

I do read this post daily and I came today looking for it but it was way down..... I’ll keep it up for the weekend till its rightful owner come back
.. I grew up in Buri attending the yearly graduation at the police college with all the fun and flair.......
every time I will be looking forward to one of the fresh graduate to fall during the graduation after standing for long long long hours.. ...

.

يا سـلااااام يا مهاتير يا حبيب..الهي يدّيــك ألف عافية و صحة و روح طيبة
رفعت البوســت من وهـدته..و داومـت على قراءته
أنتم أهـل برّي أحــق الناس بصحبتنا ..ذلك أننا نشرب من تلاجاتكم كلما (قدّينا السلك)، و تعني زحفنا تحت السلك الشائك في خروج غير رسمي, أذكر أنه قي الخروج الرسمي في رمضان، حين يتأخّـر تفتيش و تمام الخروج، أو يأتي الكما كنت، و تعني تغيير التعليمات أو إلغائها، كان يقابلنا الكثيرون من أهل بري ليأخذونا للفطور لأن الوقت قد أزف و لن يكفي لوصولنا لأي مكان، و كثيرآ ما كنا نذهب معهم جبرآ للخواطر و صارت علاقات قوية.
ناس بري هم البيشجعونا لمن نقوم بجري المسافات الأول، و نسمع منهم عبارات الثناء و التكبير و التشجيع و صفافير الشباب..و بالنسبة للكثيرين منّـا كانت بري محطات غرامية شهدنا زيجاتها في بعض الحالات و دموع و أغاني العشـق في بعضها الآخر..طبعآ الكلية و النادي و المستشفى، أهم ثلاث محطات للضباط كلها في بري، و حاليآ فندق الشرطة، لو ما وقع، و الكثير من الإدارات الهامة..المباحث..كلاب الشرطة..الموسيقى..المعامل الجنائية..الترزية..الطلمبة الأشهر..الخيــل..كل هذه الأشياء تربط الضابط ببري حتى بعد التخرج ..
لذا سنظل نحب و نحيي أهـل بري
تســلم أخي
و تحياتي للكومندان الذي وردت سيرته في الماسنجر آخر مرة

.

(( هيييي يا ملكية كلك قوم فوق وبطل الورجغة))

الاخ الطيب

البوست جميل وشيق جدا ... وما قدرت ارفع عيوني إلا خلَصتو

يكفي انو ذكرًتنا بالعم حميدان وما ادراك ما حميدان والذي اذكر له مقولته الشهيرة في

ميدان البيادة(( لغاية الآن ما لاقاني طالب حازم لازم متأثر بالكلام ومحافظ على مستوى نفسو ))

ويكفي انك ذكرتنا بالمقدم ابو علامة رحمه الله والذي علمنا في الكلية الحربية وكنا حينها دفعة اكاديمية ندرس في جامعة الخرطوم والكلية الحربية, فكان ( يشحطنا إدارة داخلية بعد عودتنا من الجامعة ويقول (( جامعة شنو البتقروها ... العسكري لازم يكون غليد وبليد))

اما مشاكل الجيش والبوليس فحدث ولا حرج واشاطرك الراي أنها تكتسب بالرضاعة اثناء التدريب سواء للضباط والعساكر , اذكر في الكلية الحربية عندما يرتكب احد خطأ ما
يبادرك التعلمجي بمقولة (( شغلك زي ناس كليةسوسن )) او (( شغل ناس ست فلة ))؟؟

وهذه المشاكل دائما ما تحدث بين ضباط الصف والعساكر من الجانبين ولأسباب بعيدة جدا عن المهنية.

معظم خدمتي في الجيش كانت في ( الدائرة الكبيرة للسودان ) يعني يا( ملكية) في الحدود والنقاط الخارجية , وفي هذه المناطق عاشرنا ضباط وصف ضباط من الشرطةبمختلف فروعها ولا أذكرهم الا بالخير وبطيب المعشر ... وفعلا كانت أحيانا تحدث مشاكل بين العساكر بسبب اشياء مثل الشكر وغيره , إلا اننا كنا نتعاون في حلها وبسرعة .


حقيقة البوست جميل واذا لقينا الوقت سنحاول إخراج ما في جعبتنا ..


واحسن ليك يا الطيب تنضبط لانو أهم ثلاثة حاجات في العسكرية الضبط والربط !!ً!



اكيد شكري ......

.

مرحبتين محـارب
أهـلاااااان و ألف سهـلآ يا أخي الكريم
أنا سـعيد انو البوسـت أعجبك
ومعك نترحم على الفقيد أبو علامة و نحيي ذكرى المعلمين جميعآ

Quote: أهم ثلاثة حاجات في العسكرية الضبط والربط !!ً!

طبعآ حكاوي الضبط و الربط ما ح تخلص
أنا منتظر الكومندانات الوعدوا بالعودة للحكاوي
انت برضـو تجربتك في الأقاليم مهمة، على الأقل تقنع لينا الصديق محمد كبّر لأنو قال نحن محصورين في الخراتيم..و كلامو حتى الآن صحيح لأن ضباط و عساكر الأقاليم لم يكتبوا لنا شيئآ.
و شـكرآ تاني لمرورك و الإســهام

.

up again through sunday

ابو الطيب
سلام كميات
كما قال حميدان الكليه الحربيه احسن كليه في الكلالي وبعدها كلية الطب
ومن حكمه
كلامي دا بتعرفوهو ساعة هبوب كرست
والابره توزن الفاس


ومحارب دا يا ملخبت معاي يا انا ملخبت معاهو
الهم ارحم الشهيد ابوعلامه البخيت الحسن

Quote: (( هيييي يا ملكية كلك قوم فوق وبطل الورجغة)) الاخ الطيب البوست جميل وشيق جدا ... وما قدرت ارفع عيوني إلا خلَصتو يكفي انو ذكرًتنا بالعم حميدان وما ادراك ما حميدان والذي اذكر له مقولته الشهيرة في ميدان البيادة(( لغاية الآن ما لاقاني طالب حازم لازم متأثر بالكلام ومحافظ على مستوى نفسو )) ويكفي انك ذكرتنا بالمقدم ابو علامة رحمه الله والذي علمنا في الكلية الحربية وكنا حينها دفعة اكاديمية ندرس في جامعة الخرطوم والكلية الحربية, فكان ( يشحطنا إدارة داخلية بعد عودتنا من الجامعة ويقول (( جامعة شنو البتقروها ... العسكري لازم يكون غليد وبليد)) اما مشاكل الجيش والبوليس فحدث ولا حرج واشاطرك الراي أنها تكتسب بالرضاعة اثناء التدريب سواء للضباط والعساكر , اذكر في الكلية الحربية عندما يرتكب احد خطأ ما يبادرك التعلمجي بمقولة (( شغلك زي ناس كليةسوسن )) او (( شغل ناس ست فلة ))؟؟ وهذه المشاكل دائما ما تحدث بين ضباط الصف والعساكر من الجانبين ولأسباب بعيدة جدا عن المهنية. معظم خدمتي في الجيش كانت في ( الدائرة الكبيرة للسودان ) يعني يا( ملكية) في الحدود والنقاط الخارجية , وفي هذه المناطق عاشرنا ضباط وصف ضباط من الشرطةبمختلف فروعها ولا أذكرهم الا بالخير وبطيب المعشر ... وفعلا كانت أحيانا تحدث مشاكل بين العساكر بسبب اشياء مثل الشكر وغيره , إلا اننا كنا نتعاون في حلها وبسرعة . حقيقة البوست جميل واذا لقينا الوقت سنحاول إخراج ما في جعبتنا .. واحسن ليك يا الطيب تنضبط لانو أهم ثلاثة حاجات في العسكرية الضبط والربط !!ً! اكيد شكري ......

.

شـكرآ تاني أخي مهاتير

الحبيب زول ساكت أهـلآ بيك

و المحارب ما ملخبت..

تشابه عليك المحاربون؟؟

التحية ليكم

.

.
ميزانية الجيش مفتوحة
و حلايب محتلّـة
و شابكننا ..صرفنا الإستعداد..و قروش الإستعداد
لمن يستعد جيش البلاد؟
و مــــن يحــارب؟!!
المقولة المنسـوبة للدكتور منصــور خالد:
إن الجيش السوداني متخصص في الحروب الداخلية و تقتيل أهـلـه فقط!
إشارة تجريمية إلى أن جيش البلاد (الوطني) لم يخض حربآ خارجية منذ عهد السودنة..لكنه حارب الجنوبيين و الغرابة و الشراقة..لكنه ظل يعمل ذلك، دائمآ، بتوجيهات من ساسة مدنيين..بعضهم الآن في المعارضة و أكثرهم هم حكام الإنقاذ..
فمن نعاتب؟
الجيش (الخامّـيها) و بتراجل على البوليس و المواطنين؟
أم الساسة الملكية الذين يحركونه بالريموت كونترول حتى في بعض العهود العسكرية و التي نستثني منها الفريق ابراهيم عبود لأنه لم يترك ثغرة في الجيش ليدخل منها مدنيون مثل ما فعل النميري و يفعل الآن البشير و صحبه؟
السؤال للحوار لا الزعـيـق
و الكلام الصـعـب لازم يتقال ع شان المشـكـلات الصـعـبة تتعالج

.

الاستاذ الطيب بشير

شكراً لك على هذه الحفاوة , مع اني انا لا أديب ولا حاجة

كفاني عن رواية القصة ما حدث لاخونا عمر التاج النجيب

ولكن باختصار , حدث أن تم القبض على و أخ آخر اسمه عبد الاله محمد الريح بواسطة أشخاص ( ملتحين) , هؤلاء الاشخاص قاموا بتسليمنا لمجموعة من أفراد الشرطة واظنها شرطة (العمليات) , سلمونا لهم (كوديعة) والى حين , وفعلاً ناس الشرطة قالوا ليهم مافي مشكلة خلوهم (نسخنهم ليكم شوية) , وفعلا تم تسخيننا بواسطة أخوانا ناس البوليس إلى أن تم استردادنا بواسطة أخوانا الملكية , وبصفتك انسان يعيش الآن في أمريكا يمكنك أن تتخيل فداحة هذا الأمر , يعني اتخيل ناس ساكت في الشارع يقبضوا زول ويقولوا لي ناس البوليس امسكوا لينا الزول دا شوية وبعد كدا يجوا ياخدوهوا منهم .

وحتى لا اتهم بالكذب , فقد تم توثيق هذه الحادثة في مؤتمر صحفي عقد بمكتب الاستاذ غازي سليمان في الثلاثين من سبتمبر سنة 98 .

.

مرحبتين أســتاذ معروف سـند

Quote: شكراً لك على هذه الحفاوة , مع اني انا لا أديب ولا حاجة

أهلنا المتصوفة بيقولوا..الزول لمن يقول ليك أنا ما شيخ..دة أقبض فيهو قوي..
تجدني شديد الغبطة بعودتك هذي..و أنت عندنـا أديب تنبيء كل كلماته عن قيمته

Quote: حدث أن تم القبض على و أخ آخر اسمه عبد الاله محمد الريح بواسطة أشخاص ( ملتحين) , هؤلاء الاشخاص قاموا بتسليمنا لمجموعة من أفراد الشرطة واظنها شرطة (العمليات) , سلمونا لهم (كوديعة)

أنت أدرى بالمصيبة التي أنشبت أظفارها في بلادنا الحبيبة..
قالوا الترابي دخل بنك فيصل و قال لمديره جيب لي مستندات الديون التي تخص حسين خوجلي..جاء بها الرجل للشيخ الذي كان وقتها الرجل الأول..أمسكها ثم قام بتمزيقها، دون أن ينظر فيها، و قال للمدير:
حســيـن دة ولدنا...ماقي زول يسألو
سأفترض أنا صحة الرواية رغم أنها سماعية و أسقط الزمن امكانية عنعنتها
لكن تخيل شكل الإدارة هنا!
مثل هذا الموقف يمكن تعميمه ببساطة على كل مؤسسات الدولة
الذي حدث معكم أسوأ لأن الحق الذي ضاع هو كرامة إنسـان، و أيّ إنسـان، و تمرّغـت سمعة مؤسسة عريقة كالشرطة..كيف يتلقى البوليس تعليمات من مدنيين مهما طالت لحاهم؟؟!! و يتحفظ على أشخاص بدون أمر قبض..أهم شيء للمقبوض هو أن يتم تدوين إسمه في دفتر القبض، ذلك أن الضابط يراجع دفتر القبض عشرات المرات في اليوم الواحد..و يراه وكيل النيابة و القاضي..لكن العسكري لمن يسوق زول القسم و يدخلوا مكتب غير مكتب الشاويش النبطشي المعروف..بيكون في حاجة غلط..أهو زي موضـوع الملتحــين الملكية ديل..
الذي حدث معكما أمر مؤســف و خطأ..و فـيه ضـياع لقيـم عـدلـيّـة أصـيلة
لكن نسبة مشاركة البوليس فيه ضعيفة تندرج في إطار القهر العام
ليس محاولة لتبرئة البوليس لكن الجو النفسي السائد هو الذي أضاع تلكم الحقوق السـامية ..و إلا قل لي لماذا بل كيف يتسنى لمواطن أن يقبض/يوقف مواطنآ آخــر؟؟

.

Quote: سأفترض أنا صحة الرواية رغم أنها سماعية و أسقط الزمن امكانية عنعنتها لكن تخيل شكل الإدارة هنا!

الاستاذ الطيب بشير

شكراً لك


وأقول أن هذه الرواية ليست سماعية , فأنا لم اسمعها من أحد

.
مرحبتين الأسـتاذ معروف

Quote: وأقول أن هذه الرواية ليست سماعية , فأنا لم اسمعها من أحد

إذن كيف تسنّى لك أن (تقول)

.

Quote: إذن كيف تسنّى لك أن (تقول

الاستاذ الطيب بشير


أقول لأنو ببساطة حصلت لي

ومن الناس من يقول حاجة سمع بيها ومنهم من يقول حاجة حصلت ليهو

وأقول التي استخدمتها هي لازمة من لوازم السيد الصادق المهدي أعجبتني واحببت

أن أستخدمها هنا .

.

الأسـتاذ معروف ســنـد
واضـح أن هنالك خلط رهـيب
حين اقتبست أنت الكلام و كتبت أن الرواية ليست سماعية، لأنك لم تسمعها، حسبتك تمزح، في إشارة الى أنني كتبتها كتابة و لم أنطقها لتكون سماعية..لذا جاء تعليقي على كلمة (أقول) و أنت تكتب لنا..
أما الرواية التي أشرت لها أنا فهي ليست روايتك
و دعني أقتبس لك الفقرة بكاملها للتوضيح
و يا ريت تقراني تاني

Quote: أنت أدرى بالمصيبة التي أنشبت أظفارها في بلادنا الحبيبة.. قالوا الترابي دخل بنك فيصل و قال لمديره جيب لي مستندات الديون التي تخص حسين خوجلي..جاء بها الرجل للشيخ الذي كان وقتها الرجل الأول..أمسكها ثم قام بتمزيقها، دون أن ينظر فيها، و قال للمدير: حســيـن دة ولدنا...ماقي زول يسألوسأفترض أنا صحة الرواية رغم أنها سماعية و أسقط الزمن امكانية عنعنتها لكن تخيل شكل الإدارة هنا! مثل هذا الموقف يمكن تعميمه ببساطة على كل مؤسسات الدولة الذي حدث معكم أسوأ لأن الحق الذي ضاع هو كرامة إنسـان

حسبت أنني أوضـحــت أن الرواية ضعيفة العنعنة هي رواية الترابي و مدير البنك..و اعتذرت لك و للقاريء بأن الزمن أسقط أسماء رواتها
و بعد داك
بدأت الرد على موضوعك بسطر جديد بقولي (الذي حدث معكما...........)
و بفهمي أن الرواية تتحدث عن آخر موقف مذكور و هو الترابي/مدير البنك..
ألا هـل أوضـحــت؟

.

Quote: واضـح أن هنالك خلط رهـيب حين اقتبست أنت الكلام و كتبت أن الرواية ليست سماعية، لأنك لم تسمعها، حسبتك تمزح، في إشارة الى أنني كتبتها كتابة و لم أنطقها لتكون سماعية..لذا جاء تعليقي على كلمة (أقول) و أنت تكتب لنا..

الطيب (انا خوك اتّا )


يا زول أنا سويت لي فضيحة كبيرة

وأنا مدين لك باعتذار شديد

.

لا و الله يا الحبّـوب لاك شـبه الفضـايح

و لا لازمك اعتذار

أظنني كتبت عن الرواية بونسـة لم تلتزم الفصحى فتاه المعنى

لا عـلــيـك..

الأهــم أنك بقيت معنا كلّ هذا الوقــت

شـكـرآ لـك

.

تشترك قوتي الجيش و الشرطة في الارث الموسيقي العسكري و في ادب ( الجلالات) حيث وضعت عسكرية ساندهيرز بصماتها الواضحة في المارش السوداني الذي هو في اصله (جلالة خطوة معتادة) كما في شلكاوي واحد و شلكاوي اثنين و مارش ود الشريف و معظم المارشات .

و قد كان لمساهمات الرعيل الاول في القوتين ( العم احمد مرجان من الجيش و العم عبدالقادر من البوليس ) الدور الاكبر في تبويب و تنويت المارش السوداني مع الفنان الموسيفار اسماعيل عبدالمعين.

اترك ادب الجلالات لجنابو الطيب ( ناس الاعلام و التوجيه المعنوي ) لالقاء مزيدا من الضوء علي هذا الادب العسكري.

موسيقي القرب الاسكوتلاندية ذات الحضور القوي في موسيقي البوليس تمثل دلالة المشرب الواحد للقوتين .

ميدان البياده بعرين الابطال

.
مرحبتين يا زول ساكت و عارف الحاصـل إعـلاء لقيمة الصـمت

تذكّـرنا ميداننا الأحمـر..في كلية الشرطة..و هو مكان بتتزلّـط فيهو ركـب الزاحفين و يدّل خط الدم على مكان زحفهم..يا حليل زمان..و الميدان الأخضـر المنجّـل دة كان محل الترطيبة و الخيل و التمارين الرياضية الأخرى..
شكرآ لك
.

.

كلام جميل يا ابراهـيم عـدلان يا حبوب

أشهر الجلالات هي التي عرفت طريقها للتلفزيون في بدايات الانقاذ و برنامج الجيش في التلفزيون

(الواسطة خربت دولة بقى سمبلا)..و المعروف أن العساكر يحرّفون الكلم عن موضعه، فهناك النسخة غير المهذّبة للأبيات

اليوم دة ما جا؟ اليوم دة ما جا؟
و الإشارة فيه ليوم الدّواس و الحرب
و يخاطب (العدو) بأنهم شوية عيال/صبيان فرّوا من القتال

يا عيال يا عيال فزّيتو..السونكي ركـب فزّيتو..السونكي ركـب فزّيتو.

و على ذلك قس

كثير من الجلالات عانت من النسخة الثانية و التي غالبآ ما تشتهر رغم (التأصـيل القيصري)..

و الحديث ذو شجون و لنا عودة..

.

ابو البشير
سلامات

البوست دا من يوم ولدوه وانا
أعاين فيهو و(استمتع)
وامشي واجيهو راجع

انوي الدخول
وادق الخلف..
والسبب كلو مخافة الملامة من (الكمندانات)
لأنو لازم ادي التحية.. بس صاحب الاقدمية هنا (بوليس)!!
ولو حييت بوليس صباحي اصبح..

الآن جاء الحل ودخل جنابو زول ساكت
أسسسسسسسسسسسسسسسبِت
أدي التحية يا بوليس
بلاش موت معاك
دا سعادتو يا ملكي
حيي وبعدين اسأل..

جنابو الطيب
والله وبالله بوست متعة وروعة
ومازلنا ننتظر الكثير..

محبكم
نمرة 2006619
وكيل امباشي ود عقيد

.

لأنّـك في الديش ركّـبوا ليك شريطين..عندنا نحن نعملك (عقيد) ياعقيد
هسّـع دوبيت سااااي كدة ما بتوصـل رائد؟!
بعدين زول ساكت دة أظنو في الإستخبارات ..دخل بي جلاّبيتو ساي..ما قال أي حاجة..الرتبة؟؟
أخوي الحبيب عبدالله عقيد كيف حالك؟
و الله ليك وحشـة..
زول زيّـك لازم يكون فيهو عيب..لو ما ديّـاشي كان طلعوا وراك شـيعة ..يدخلون بحبك النار
لكن كويّـس الفيك اتعرفـت..بركة البوست العجبك التحية طايري..
أحكي ليك السبب الخـلاّ عساكر الخدمة في رئاسة الوزارة قايلينّـي مجنون لي هسّـع
جيت يوم سايق البوكسي الحزين و تعريفة ما عندي..استوقفتني امرأة جائعة فلعـنت رجولتي و دبابيري و اعتذرت لها..و بعد ما قفّـلت العربية و نزلت جاءني أفضل عساكري يشكو الفقر و الفاقة فوعدته خيرآ و طلبت مهلة و ازداد حنقي..أهـا دخلت البوابة بكل ذاك الضجر ..فانبعث أشقاهم بالنداء المعروف ..إإإيييينتباه..و حيّـا..
تسمع أخوك بي زهـج..كماااااكنت
و نفضـت يدي بكل فوضى مدنيّـة ممكنة..و كوركتا:
غاشيننّا بتعظيم السلام و نحن مفلّسين؟ .. بلا سلام بلا زفت..تعليمات يا رقيب تاني مافي زول يحييني أبدآ...مفهوم؟؟..
قالوا خلفي مفهوم سعادتك..و سمعتهم يتضاحكون و بدا لي أنهم أشاروا بأيديهم لعلامة الجنون بالرأس..و لم تمض سوى دقائق و سـرت اشاعة جنون سيادتو (بتاع التلفزيون) ..و كنت أقدّم التفسير تلو التفسير لزملائي و رؤسائي..بعضهم ضاحك و أكثرهم غاضـب ..و انتهت الحكاية بمرتب شهر حافز لسبب ابتدعـه قائدي اللواء الطيب عبدالرحمن مختار أرجل راجل بعد رحـيل سيدنا علي بن أبي طالب.

.

محمد على المشرف !؟؟
لكن الب..ى..إتش..دى ..ما رجعتك ملكى تانى
فعلا النسيان أفة الإنضباط!
إزيك يا مواطن .

إذا كنت احد المشرفاب الاخرين نعتذر

البوليس ود البوليس فارس موسى

.
الكومندان فارس موسى

مرحبتين ..
أبدا ليك بالمشرّف قبل ما أقول الجيت ليهو
هو دفعتنا البيطراني المدخّـن الضحـوك ..الذي يحب من دنيانا العطر و الكوتشينة بنادي الشرطة و النسـاء في كل مكان!! يعيش الآن في هولندا حيث تعاني منه إحدى الجامعات .. و هو زائد طارق زائد عمر سابل زائد أكووج وول أكووج مجموعة توزيعات الدفعة 61 في (الشغيغة) هولندا..
تانيآ سعادتك
جاء طلب للحكي عن ميزات الضبّـاط
و لأني ناوي أبدأ بالميز بتاع ســنـجـة 1990 قلت يعني من باب الضـبط و الربـط..أقوم أستشير سعادتك..عاوز تقول حاجة و لا أبدأ أناااااا؟

.

البوليس أبو بكالريوس
تابعت يوم السبت الماضي باستمتاع شديد حفل تخريج أول دفعة من ضباط الشرطة تحمل درجة البكالريوس من جامعة الرباط الوطني، ولم يكن لي بين الخريجين محمد او فاطمة، أي انني لم أكن أعرف من بينهم أحدا، ولكن ما شدني الى الحفل هو إدراكي ان تلك الدفعة جمعت بين دراسة القانون والعلوم العسكرية اللازمة لرجل الأمن، وتلك طفرة نوعية في مسيرة سلك الشرطة السودانية ذي السجل المشرف، والأمر الآخر هو أنني أحب الطوابير والتشكيلات العسكرية ذات الطابع الاستعراضي، وأموت في المارشات العسكرية، والمارش المفضل عندي هو "شلكاوي" والذي تقول كلماته التي وضعها جنود عابثون: وي وي شاويش كنجي..أمشي قولا ترجاني كا.... وبقية الكلام يوقع القائل في جريمة عقوبتها تعزيرية!! والكنجي هو ذو الصلة بالرقم اربعة، وفي حفل التخريج ذاك لم يعطنا المذيع الداخلي فرصة الاستمتاع بموسيقى فرقة الشرطة ذات الصيت الرائع، والتي كنا نسير خلفها عدة كيلومترات عندما كانت تخرج في زفة المولد، فقد ظل ذلك المذيع يردد شعرا مفرداته "جعلىة"، وكان حريا به ان يحدث المشاهدين عن محتوى البرامج الدراسية التي خضع لها الخريجون، وماذا يميزهم عن الدفعات التي تخرجت على يد السر الباترا ورهطه الكرام (بالمناسبة فان عددا كبيرا من ضباط الشرطة الخليجيين من خريجي كلية البوليس في بري يتحدثون باعتزاز عن المدة التي قضوها هناك رغم ما عانوه من ويلات بسبب التدريب القاسي والصارم، ويتكلمون عن السر الباترا بعبارات من قبيل: صنع منا رجالاً)، والباترا لعلم الكثيرين كان مدربا بكلية الشرطة السودانية لسنوات طويلة، وكان مشهودا له بالحزم والشدة اللازمتين لإعداد ضباط ذوي أعواد قوية، وكان فوق ذلك محبوبا، وسمعت به وسمع به ابناء جيلنا لأن دفعات متلاحقة من ضباط الشرطة كانوا يتحدثون عنه وكأنه "مؤسسة" قائمة بذاتها،.. ورغم أنني نشأت على الخوف من البوليس، لأن ذلك جزء من تربيتنا بحيث يصور الأهل الشرطي والطبيب على أنهما من أعمدة محور الشر: تقعد ساكت وللا أنادي ليك البوليس!! تسكت وللا أوديك للدكتور!! رغم ذلك فان المعايشة أثبتت لي ان ضباط الشرطة هم أقرب أهل القوات النظامية الى عامة الشعب، وضابط الشرطة "مُقرَّم" بالضرورة، لأن طبيعة عمله تحتم علىه التعامل مع أولاد الناس وأولاد "الذين".. والتجربة تمنحه فراسة يعرف بها من هو المستهبل ومن هو الساذج ومن هو البلطجي المحترف مهما كان مظهره محترما!!

وكما في كثير من بلدان العالم فقد راجت في السودان لسنوات طوال نكات تصور عساكر الجيش على أنهم "أغبياء"، بل وصار الاستهبال يعرف ب" حركات الجيش"، ونسي مروجو النكات عن غباء "الدياشة/ الجياشة" أنهم، أي الجياشة، هم أنفسهم الذين زاملونا في المدارس والحي، ومن خلال هؤلاء الزملاء تكتشف لاحقا أنهم ليسوا فقط لا يقلون عني وعنك ذكاء، بل تفوقوا علىنا، لأن الجيوش عادة هي الأكثر مواكبة للتطورات الفنية والتقنية، والعسكريون بالضرورة مطلعون على ثقافات وعقائد عسكرية مختلفة، بحيث صار استخدام قطعة سلاح عادية يتطلب درجة من الإلمام بعلم الفيزياء،.. وربما كانت تهمة الغباء تلك بسبب استخدام العسكريين لعبارات عبثية من شاكلة "قيام راقدا"، وهو الأمر بأن تنبطح أرضا، ولكن كيف يكون الراقد قائما او القائم راقدا؟ وخلال فترة التدريب العسكري الذي كان الزاميا عندما كنا في المرحلة الثانوية، كنا نفطس من الضحك عندما يقف امامنا التعلمجي وهو يقول: الدرس الأول من دروس البندقية.. دي بندقية!! كنا من فرط غرورنا نتعجب لأن الرجل يتكلم عن "بديهيات" ولم يدر بخواطرنا ان أهم عنصر في التعلىم هو ان يتم تعريفك بالشيء الذي أنت بصدد دراسة عناصره ومكوناته!! ولأختصر هذه النقطة في عبارة مكثفة أذكر القراء بما سبق أن أوردته في هذه الزاوية حول المظاهرات التي كانت تخرج منددة بجعفر نميري: نحن الطلبة سلاحنا الطوب لن يحكمنا طيش حنتوب!! ولكن طيش حنتوب المزعوم أثبت أنه أذكى من أوائل حنتوب وأساتذة الجامعات وطابور طويل من المثقفين وحكمنا 16 عاما حسوما، صار خلالها أهل السودان كأنهم أعجاز نخل خاوية من المسغبة والوهن.

وأعود فأقول ان ضباط وجنود الشرطة هم أقرب العسكريين الى قلبي، ربما لأننا نخالطهم ونتعامل معهم بشكل شبه يومي، ومن ثم فإنني أتمنى لو يعامل رجال الشرطة أسوة بالقضاة من حيث جعل شروط خدمتهم جاذبة ومميزة وغير طاردة،.. فكيف نأتمن الشرطي على أموالنا وأرواحنا وأعراضنا وهو مشلهت ومشتت الفكر وجل تركيزه في توفير شاي الصباح وحق الملاح!! لا نريد شرطيا من النوع الذي تقدم للزواج بفتاة شايقية، وكانت أم الفتاة تدرك ان جاراتها وصويحباتها يعرفون ان راتب الشرطي كحيان، فقالت عن العريس: بوليس عِللي مستفيد، وعللي بلهجة الشايقية تعني "إلا"، تريد ان تقول انه شرطي ولكنه يستغل منصبه و"يستفيد".. أقول هذا وليس من بين أقاربي من يعمل في سلك الشرطة، في حين ان هناك الآلاف من رجال الشرطة الذين يعملون لحساب أقاربي وأقاربك!.. على كل حال مبروك للدفعة 56 المميزة التي تستحق "كادرا" مميزا، وعسى ان يكون هذا الكادر فاتحة لتحسين شروط خدمة كافة رجال الشرطة الذين لم يوفروا لنا فقط الأمن قدر استطاعتهم ولكن أنجبوا طائفة من المبدعين في كافة المجالات!
نقلا عن الرائع ابوالجعافر ( الرأي العام)

.
أهــلآ إبراهيم عـدلان
و الله ياخ جعفر عباس دة زول كتّـاب ..و بينو و بينو إيميلات من تلاتة أربعة سنين، لكن الليلة مقالو الجبتو دة زاد الإعجاب بلّـة!..جميل بحق خبر البوليس أبو بكالوريوس دة..لأن زملاءنا بتاعين القانون كانوا أوائل الدفعة، و كانوا أفضل منا في التحري، و الذي يدرس القانون لأربع سنين خير من الذي يجوبكه في عام مثلما فعلنا.
أعجبني حديثه عن المعلّـم الباترا:

Quote: والباترا لعلم الكثيرين كان مدربا بكلية الشرطة السودانية لسنوات طويلة، وكان مشهودا له بالحزم والشدة اللازمتين لإعداد ضباط ذوي أعواد قوية، وكان فوق ذلك محبوبا، وسمعت به وسمع به ابناء جيلنا لأن دفعات متلاحقة من ضباط الشرطة كانوا يتحدثون عنه وكأنه "مؤسسة" قائمة بذاتها،..

و هو كذلك
نسيج وحده..مؤسسة قائمة بذاتها
و أن الوفاء له خارج خدود الوطـن الظالم، و ستبقى سيرته لأجيال لاحقة. من طرائفه المقولة الشهيرة:
سببين بيحبسوا الظبّـاط..العربات..و البنات!
و طبعآ، بلا تفصيل تلك منطقة مخالفات..عربيتي و عربيتك..و ما إليه!
أما مذيع الشرطة ..وريثي..فقد بالغ..لقد كنا نترك مساحات للنداء القوي:
حرس الشرااااااااف..على اليمين..يمين ميل ..معتادآآآآآآآ مارش...و التي تنطلق بعدها أجمل موسيقى الخطوة المعتادة في علم و عالم البيادة..و كان التنسيق بيننا و موسيقى الشرطة يتم في البروفات..من المهم أن يستمتع الناس بالموسيقى..و كما تفضّـل أبو الجعافر فلموسيقى الشرطة تاريخ و وهج، و قد سبق أن تحدث أبو المعالي عن مزيكة القرب و طلاوتها..و الله كنت أترك لها مجالآ..و كنت أستحث الوزير على تحفيزهم..لكن، و لات ثمة فخر، خلف من بعدنا خلف أضاعوا روعة الطابور بالشعر الجعلي!!

.

اخي الحبيب ابو البشير
لك التحية
ملكية وعسكرية
قلت لي امباشي بي مكنة عقيد؟! لووول
هسي لو ما (الميري) انتهى كان في امباشي بيتكلم
مع نقيب زي سعادتك بي الطريقة دي؟؟
كنت دائما أروي نكتة الـ وكيل عريف الذي سأله الجنود
عن صوت (السارينا) من يكون في هذا الموكب يا ترى؟
فقال ليهم: دا لازم يكون مسؤول كبير.. من شاويش ولي فوق..

نحن ياخي من شاويش ولي فوق دا كلو عندنا كمندان
فما بالك بـ (العقرب).. والعقرب وصف لدبابير النقيب
المتراصة بجوار بعضها البعض
وربما ينطبق على نقيب الجيش أكثر لـ (صفرة) دبابيره
وفي العادة يكون النقيب هو حجر الزاوية في توقيع العقوبات
وإصدار الأوامر.. لذا يحلو لضباط الصف وصفه بالعقرب.

أعجبني كلام جعفر عباس عن البوليس والجيش معا
وحديثه عن التدريب والتعلمجية.. وطريقتهم في إطاء (الدروس)
فهو على حق .. وقد علمت ذلك عندما عملت لفترة في مجال
التدريب والتنمية البشرية.. واطلعت على أساسيات هذا العلم الرهيب.
وكنت كلما ازددت اطلاعا.. ازداد إعجابا بأساليب التدريب في القوات
النظامية، فهم يقوقمون بتطبيق القواعد (كما يقول الكتاب).
فالتعريف بالبديهيات، ووسائل بناء الشخصية وزرع الثقة في النفس
وزرع روح الجماعية والقيادة والانقياد إلى جانب (الفارغ) كما يسمونه
من وصف بالكهنة والكذا والكذا.. وإجبار المتدرب على الاستماع لكلام
يعلم قائله أنه ليس له أي معنى.. كل هذا وغيره الكثير.. من وسائل
التأهيل النفسي والجسدي لا يعرف قيمته إلا من تعرض له وجربه..

لك خالص مودتي

الفارس الكمندان الفارس
تحياتي واشواقي....والضابط الاسموا الطيب ده ما عندو انضباط ما بكلم كمندانو انو في كمندانات حلوين ذي ناس فارس هنا.....كدي راجع المسنجر.
معزتي

هوى ياناس هوى..البوست دا محلو فوق.....وبرضو من الشعب الف تحية لرجال الشرطة السودانية

الاخ الطيب بشير

و الله يا اخوى انا راى فى ناس الجيش و البوليص السودانى ده اصلو ما بيتغير.

الناس ديل كده بس مرتزقة و شغالين عشان القروش و الواحد فيهم يمكن يقتل اموا ذاتها عاشان كده انا نايم لى فوق راى انو الناس ديل كلهم نكشهم الشارع و نبدأ سيه جديد.

يعنى الجيش و البوليس القومو لينا الاستعمار ده حقو نمسحوا عديل كده و نشوف لينا حاجة جديدة يمكن تنفع.

مع تحياتى

طالب

مواصلة لحديث الرتب القديمة



ورد في كتاب رحلة الي اعالي النيل الابيض 1840 لكاتبه البكباشي سليم قبطان ان:-

الاورطة هي الكلمة التركية المقابلة لكلمة BATATALIAN الانجليزية و هي تشكيل عسكري يساوي ما يسمي حاليا الكتيبة اما الآلاي فهو اللواء و يتكون من ثلاث كتائب و كتيبة دعم في الجيوش المعاصرة و كل اورطة تتكون من سبعة ضباط هم الجورباجي و هو اركان حرب القائد و اوضه باشي لم اجد لها مطابق ووكيل خرج و تعادلها ضابط امداد و بايراقدار وهو ضابط الاستخبارات و حامل العلم و رئيس الطهاة و رئيس السقاة و القائمقام و هو قائد الكتيبة.