لجمال حسن سعيد...سمية عبد اللطيف ...و مسرحيي البورد المبدعين...يومكم مبروك

إعجابي بجمال حسن سعيد{حاف كدة} يشبه الشهادة المشروخة لأن مابيننا من صداقة يؤثر بالطبع على رأيي فيه لكن الأستاذة سمية عبداللطيف لا تربطني بها إلا إبتسامات {الحوشاب} حين يلتقون في دروب فتة العدس عند عم خالد بالمسرح أو فول أدروب بالإذاعة أو كافتريا التلفزيون حين تولى إدارتها الفنان عادل الخاص فأضفى عليها ما عرفنا لاحقآ في بلاد الغربة أن إسمه الأعجميCustomer Service
الذين ينعمون بمشاهدة الدراما السودانية يذكرون أدوار الرائعة سمية وهي تقوم بدور السيدة ذات الكلام المقعد و التلقائية التي تسقط كل إدعاءات المثبطين بأن التمثيل السوداني متكلف أو {ظاهر إنو تمثيل} تأتي إبداعاتها تأكيدآ قويآ على أننا نملك المواهب لكن الأسباب أكثر من أن يحصرها بوست واحد من إنسان غير مختص لكنه يملك جرأة تبرئة الممثلين -على الأقل- من أنهم سبب تقصير الدراما السودانية عن المواكبة. راقبوا حركاتها والإيماءGesture و تعبيرات الوجه و إيحاءات همسها {للقطيعة} وإشاراتها أو ما يسمونه بالBody Language
لا يأتيك شك في أن لمساتها هي إضافة للحركة التي رسمها المخرج و الذي لا يحدد للفنان المسرحي أسلوب أدائه بالطبع و هذا ما جعل الأستاذة سمية عبد اللطيف قريبة من قلوب الكثيرين.
جمال حسن سعيد لا يمارس فن الإضحاك فقط لا لا مايقدمه جمال في ظل الوضع السياسي القائم و أشكال إدارات الأجهزة المعنية بالفن و الوضع الإقتصادي و الكتاحة و حرارة الجو و عصير الإحباط الناتج من تفاعل كل ذلك أقول إن عمله المتواصل في ظل هكذا ظروف يستحق من المشاهد تقديرآ خاصآ, بالطبع هناك أكثر من مبدع مسرحي في بلادنا يستحق التحية بمناسبة هذا اليوم و لكنا {إخترنا لكم} فتح شهية أنموذجآ نتوقع أن يزيد عليه المتداخلون أسماء أخرى مثلآ سامية بت العرب و سلوى درويش التي قيل أنها إعتزلت الفن و أرجو أن يخبرني من يعلم أن هذا غير صحيح.
التحية لكل الرواد المسرحيين من توفاه الله منهم و من ينعم بالنجاح في إمتحان الحياة اليومية في السودان مع المحافظة على كونه فنان و تحية خاصة لفرقة الأصدقاء و تحية أكثر خصوصية لمبدعي البورد من المسرحيين:
بدرالدين شنا
إسماعيل محمد الحسن{سمعة}
مريم محمد الطيب
عبداللطيف علي الفكي
تماضر شيخ الدين
منعمشوف
هادية بدرالدين
يحي فضل الله
و التحية مع الأعتذار لكل من تسول له نفسه بالإنتماء للمسرح و سقط إسمه من ذاكرة إنسان لم يدخل {مسرح سوداني} لست سنوات متتاليات من عمره و العزاء في فكرة الإجازة التي بدأت تختمر لعلي أراكم أو أرى من يراكمو.

مسرحيو البورد ومسرحيو السودان..

كل يوم وأنتم أكثر اشراق وأجمل أبناء لذلك الفن الراقي..

نشارككم تلك التهنئة لهم ولكل المشرحيين في السودان
وتشكر عزيزي الطيب علي هذه البادره

تشكر عزيزى الطيب بشير على لمسة الوفاء لجمال حسن سعيد وسمية عبد اللطيف..

وهما من القامات السامقة فى نحيل التمثيل فى السودان..

دعنى اهدى الصديقة تحية زروق..موجة عطر بقدر ما اعطت واوفت ..لهذا البلد..السودان..وهى فى غربتها فى كندا تعانى الوحدة وعدم الوفاء..

خناس يا فرح
لك القيام
و حرف عتاب لكندا
و لتحية ألف تحية من سبعة حروف
دو * ري * مي * فا * صول * لا * سي
بإضافة ال دو الغليد تبقى تمانية
نصوغ منها أحلى لحن وفاء و عرفان
تحية
ل
تحية

*العزيزة رجاء
والتهنئة ليك و انت في طليعة المهتمين بالفن و الفنانيين.

**الحبوب موصلي
قلت لي

Quote: نشارككم تلك التهنئة لهم ولكل المشرحيين في السودان

إن شينك عندنا سينآ يا سندسي يا رائع

اخونا الطيب

التحايا لكل المسرحيين السودانيين بجميع اجيالهم

والشكر لك اخي الكريم

والله الموفق

اظن من كتر السين في السندسيه الشين جات ناطه

أبو السعود
مرحبآ
معك نكرر
إنما الأمم الأخلاق
و المسرح يعطينا أمة
ما أحوجنا

لك الشكر ياخي الطيب. ولكم الشكر اخوتي الفنانون والمبدعون. لكم الحب اصدقائي المتابعون....

العزيز وليد صفوت
تحياتي و تقديري
التحية لجمهور المسرح الذي يقتطع ثمن التذكرة ليساهم في دفع المسيرة و إلى الأمام.

UP

مسرحيو البورد ومسرحيو السودان..

كل يوم وأنتم أكثر اشراق وأجمل أبناء لذلك الفن الراقي..

رجاء شكرآ لرفع البوست و معه معنويات المسرحيين و شخصي {الضعيف}.
*
كل زول عندو فهم براهو للمسرح
لكن عاجبني الريفي الذي جاءه صديقه و قال له:
الليلة القرية فيها مسرحية
فقال له بصدق بالغ :مسرحية دي شنو؟
قال {العارف} ببراءةالدنيا كلها: ياخي حاجة زي العملها لينا الفاضل سعيد لمن جانا زماااان تتذكر؟
من هنا أحيي الأستاذ الفاضل سعيد على تعريفه للقروي البسيط بفكرة ما هو المسرح من الأساس ليتسنى للأجيال التالية من المبدعين إمكانية أن تعرض و تبدع.
حقيقة المسرحاب اللي بيستحقوا التحية كتيرين لكن لسة يوم العيد ما جا, كل يوم نسلم علي جزء.

التحية لكل العاملين/ات بالعمل المسرحي في بلادي.

رجالا و نساء و هم/ن يبدعون/ن في مناخات قمعية خانقة. يسقونا رحيق البسمة و الفكرة و هم/ن يعانون من شظف العيش ،البيروقراطية، والتهميش.
و تحية خاصة الى النساء المسرحيات ببلادي و هن يعطين بقوة و صبر و ايمان بالقضية بالرغم من قسوة السياط الاجتماعية.
تحية خاصة الى الرائعتين تماضر و مريم.

و تحية ندية الى الفنان المبدع جمال حسن سعيد فكم أدهشنا بابداعه و أضحكنا بحسه الفني الساخر بالذات في الأمسيات الرمضانية.

أيواااا يا أستاذة ندى
الله يخليك

Quote: و تحية خاصة الى النساء المسرحيات ببلادي و هن يعطين بقوة و صبر و ايمان بالقضية بالرغم من قسوة السياط الاجتماعية.

هنا مربط الفرس
معاناة أخرى لا يقاسيها المسرحيون و كان طبيعيآ أن تنتبهي لها أنت بعد أن تجاوزتها أنا بحكم التعود على الإمتياز الموروث فجاء تركيزي على المشاكل السياسية, أعترف بجهلي و أحيي إضاءة لازمة وواعية في ذات الآن بتحديد أدق للجانب الإجتماعي.
معك أحيي المبدعات و هن يقدمن الروائع رغم {إجتهاد} واضعي الحواجز.

الحبيب الطيب بشير:
لك كل التحايا ولكل المبدعين والمسرحيين/ت ..
ودمت...

الأخ الكريم إيهاب الطيب
و بمناسبة جيتك
نهنيء فرقة الهدى المسرحية
الأساتذة
عبدالغفور محمد نور
مهدي سراج
صديق مساعد و بنته وزوجته
عثمان خالد السراج
عثمان أب شيبة
و المجموعة

الطيب بشير
أرجانى تب آزول
جايك صادى وبصورى

في انتظااااااااااارك يا حبيبي
ترراارم
رايح أرعاك بي حناااااني
ترراراراررم

فوق

اﻻخ الطيب
كان المسرح عمرى الذي اضاعة بهرج التلفاز٠٠٠انه ابو الفنون ٠٠ضاع عمرى
-------------------------
واستقص شافتهم واقطع سلالتهم
واعصف بطينتهم ياخالق الطين
------------------------

العزيز سمعه
ها أنت تعود مبتسمآ ومزودة كرافتتين
و منعمشوف قال بجيب الصور و بيرجع
ننتظر

الطيب بشير، سلامات، والله من شفتك أونلاين قعدت أكابس فى الإسكانر
باقى عاضى ليهو يومين .. الصور المعاى بالجد شحمانات .. جمال حسن سعيد طبعاً دفعتى فى المعهد، أحبه شاعراً وممثلاً ولكن فقط فى مشاريع التخرج
ذات الطابع التجريبى وليس فى الحيشان. مثَّل جمال فى هذه المشاريع وإرتكب أدوار معقدة وكان مقنعاً وممتعاً فى آن واحد .. على سبيل المثال لا الحصر: الشيخ إسماعيل صاحب الربابة إخراج مجدى النور ودور غُوبيش (فرس النهر) فى مسرحية السيِّد فى المنفى تأليف وإخراج عاطف خيرى .. المهم هذا الإنسان يشهد له تأريخ المعهد بأدوار مجيدة تجعلنى لا أعير إنتباهاً لما يقدمه من دراما تلفزيونية لا تخلو من طابعاً تجارياً .. شكراً الطيب مجدداً، وحتماً ح أنزل الصور

خليت عنوان في الرملة
الهوا لومسح الجملة
أتري بتلقيو في حلمة
في شاطي النيل النعسان
تلقيني بغسل فرحان
وجداني قميصو الشربان
ـــــ
دي يا شوف من شعر حبيبنا جمال حسن سعيد
له التحية في يومكم
و لكل المبدعين
أبناء أب الفنون

وكما وعدت يا صديقى، أخيراً إسركن الإسكانر معاى لأعرض لك هذه الصور النادرة

صورة نادرة جداً لدفعتنا ونحن فى السنة الأولى فى العام 1988


جمال حسن سعيد، السر محجوب، أديب أحمد حسن، المرحوم عادل تنقو


الجالسون بالاضافة للذين ذكرتهم فى الصورة الأعلى صلاح محمد عبدالرحيم(سينما سينما)
وقاسم أحمد والواقفون من اليمين أميرة أحمد ومحمد حسن صالحين ومحمد المجتبى موسى. طبعاً الصورتان الأخيرتان كانتا خلال بروفات مشاريع تخرج دفعتنا فى اواسط العام 1995. أرجو لك يا صديقى ولزوار البوست تصفح ممتع

يا سلااااااام يا منعمشوف
عامل إسمك زي كلام ناس الديش الزمان {قائمقام و أركانحرب} و الملصقهن شنو أنا ما عارف؟
صور مبالغ فيها
*نترحم على العزيز تنقو فقد كان صديقآ و حميمآ إلتقيناه ألف مرة و أعجبنا مليون مرة’ يرحمه الله.

*نسأل العدل المجرد للأستاذ صلاح محمد عبدالرحيم {سينما سينما} الذي لعب عليه التلافزة لعبة في منتهى الخسة و نطمع أن يعود له البرنامج مع الديمقراطية و نحييه في يومكم.

*السر محجوب و عبادي قرايبنا بالمصاهرة لهما تحية أهل خاصة.

*صورة الجالسين و خلفيتهم المسرح الوااااسع دة أظنو لمن كان جيران سك العملة وشارع الغابة و خلف ميدان المولد /السجانة صاح؟ و هل المعهد لا يزال هناك؟ و هل المقر دائم؟
لكن الصورة بتاعة الدفعة كلها يبقى لي في شمبات الأراضي لأنو المروحة اليتيمة دي ما بتشبه تصميم ديكور قصر الشباب و الأطفال و لا ضيق المقر بتاع عمارة المقرن و مرة تانية صحي؟

*ختامآ تحية ليك و لي إسكانرك اللي اتسركن معاناو تحية للمسرح و لكل المسرحيين.

الطيب بشير، والله ماشاءالله عينك نجيضة تب آزول
الملاحظات القلتها دى كلها صحيحة .. مازال المعهد
بالقرب من سكة العملة وهو المقر الدائم حتى إشعار آخر

صلاح سينما سينما بخير تزوج وله طفل، يعمل بمنظمة العمل الطوعى الدولية بصنعاء ولكنه متواجد الآن بالخرطوم بعد إجلاءهم قبل الحرب على العراق ... حكى لى عن تجربتة مع زبانية النظام بتلفزيون الهنا

عمو السر كما يحلو لنا أن نسميه يحتل مكانا كبيرا فى قلبى هذا الرجل العصامى .. تصدق لقد كان مقبولا فى اول دفعة فى المعهد ولكن لظرفه الاسرى لم يبدأ دراسته تلك الايام وعندما تفرغ للدراسة كان لابد ان يدخل المعهد بشهادة سودانية فإمتحن وحصل عليها ودخل المعهد الحلم .. رجل بهذا التصميم لا تملك إلا أن تحترمه .. له التحايا النواضر منى فى هذا اليوم ولكل الدفعه .. سأحاول الكيب الحديث عنهم واحدا واحدا فى بوستك المجيد هذا

التحية ....لوالدى الاستاذ محمد شريف علي ..
.....................
.............
shereef
..............................
اللهم لا تفتنى في دينى ...
اللهم انك خلقت الخيروالشر،وجعلت لكل واحد منهماعاملا يعمل به فاجعلنى من خيرالقسمين ...
اللهم عفوك ونصرك ...

البوست وناسو سلامات
بالله يا شريف والدك محمدشريف علي
يا سلاام ياخي
التحيه ليهو ولكل المسرحيين في السودان

ويا منعم شوف صور جميله
ممكن طلب??

الطيب بشير مضايقاك في اعجابك بجمال حسن سعيد شديييد
والعجب سميه عبد اللطيف
وشكرا

*العزيز منعمشوف
تبارك الذي خلق
و الله حركت البوست و الشوق و الريد
لك التحيات الكتار

*الأخ شريف
معك نحيي الأستاذ محمد شريف علي مدير المسرح القومي و نحيي في شخصه المسرح و صباح النعمة سراج النور و ست الشاي و تخاميس البرنجي و عبدالوهاب محمد أحمد وكل المبدعين.

*الكريمة توما
ما أحلى أن نتزاحم في حب السامية أبدآ سمية عبد اللطيف ونستبق في مضمار الجمال المسرحي, الحسن الفني و السعيد بوجودك في البوست.

الطيب...الطيب


نشاركك التحية لكل اؤلئك العمالقة..الذين...اجبرونا منذ الصغر...علي ترك البهائم ترعي...لنلحق بهم في خلاصة الدهب الاصلو ما بتغير...وفي الرادي...الذي كان هو مسرحنا...يوم لا مسرح الا هنا ام درمان....فالتحية لهم كلهم بدءا من خالد ابو الروس وانتهاءا بآخر مسرحي ...لبس عدة الشغل...

Quote: سلوى درويش

فعلا اعتذلت...التمثيل وتوجهت الي الانتاج والاخراج...حسب ما سمعته عن اخوها...صابر درويش...

وماتنسوا فايوة عمسيب ورابحة محمود ونادية بابكر وسامية وكل خريجي وخريجات المسرح والحيشان التلاته واحي المخرجين منهم والنقاد والقابلة عارضين في الوطن وشكرا الطيب بشير على هذا الاهتمام بالمسرحيين

التحية لكل رفقاء الدرب من المسرحيين والموسيقين والذى قضيت
معهم امتع ايامى حياتى لدرجة إننا حتى فى العطلات السنوية
برضو كنا بنكون موجودين فى المعهد

والتحية الخاصة إلى صديقى العزيز جمال حسن سعيد، ونتمنى له عودة تانية إلى لوس انجلوس حيث قضينا وقتا ممتعا ما زال فى الذاكرة
ولك الشكر اخ الطيب على هذا الوفاء .

*العزيز nazar hussien
شكرآ على تعميق جرحي بتأكيد حقيقة إعتزال سلوى درويش للتمثيل
أتمنى أن تجد نفسها في الإخراج و الإنتاج.

*الأستاذة عشة بت فاطنة
علمينا يا قماري
أن للمخطيء بعض عذر
علمينا أن نهتم بالحدث/الموضوع و ننسى الذاتي
هل تعلم عزيزي القاريء أنني {نسيت} تحية الأستاذة عشة بت فاطنة ضمن من أشرت لهم/ن في البوست الأول من البورداب! فتجاوزت عن ذلك بسماح سمح و جاءت هنا و شكرتني!!
أمسحيها لي في فهمي المجوبك دة
و لك أعذب تحية

*ترهاقا
يا مليكناالمفدى
إلتقينا أخرى في جمال و مرة في الموصلي و دائمآ نتعانق بشوق بس سيبك من الراجل اللي من إنديكم دة عشان القصة تتم!!!

*وللمسرحيين ألف تحية في يومهم و في كل صباح

قبل مغيب شمس عطلة الأسبوع
أود تحية المسرحيين كآخر تحايل لرفع بوست إحتفائنا بهم

حاشاك الجوباك
تحيةكمان لبت حبيب الله

تسلمي
و معاك نحيي
الأخت تماضر حبيب الله
و يا مسرحيي البورد و شعوبه المبدعة تاني نسينا زول/ة؟
سنة حلوة

أهل المسرح
آباء الإبداع
سؤال؟
حكى لي صديق أن هناك مسرحي في ود مدني رأى التجار في السوق منشغلين عن المسرح فأقام لهم عرض مسرحي على ظهر عربة كارو و ظلت {الخشبة} تتجول في السوق بفكرة أن المسرح يجب أن يذهب لمن لا يأتي للمسرح!!له التحية
علا هو منو؟

ترهاقا--- تحية خاصة

يعني يا سمعه أنا قلت الزول دة جاب الإجابة تجي تسلم علي ترهاقا صاحب وردي في بوستي؟
زي بعضو برضو
المهم يا ترهاقا و سمعه
و يا مبدعي البورد عمومآ و أهل المسرح خصوصآ من هو الزول بتاع مدني اللي كان بيعرض في {الكارو} وسط السوق؟
ما مسابقة و لا فيها جايزة لكن دايرين نديهو سطرين .
و بمناسبة{ تحية} المبدعين نكرر سلام الفنانة تماضر شيخ الدين و نساهم بإرساله للأستاذة تحية زروق المبدعة التي قدمت للشعب السوداني ما تستحق عليه التكريم لا النسيان.
لا نملك إلا أن نحيي أطيب تحية.

لجمال حسن سعيد ولجمالك إنت أيها الرائع الطيب البشير ولسمية ولكل المبدعين سلاااااااااام
عندما ذكرت قصة القروي الذي لا يعرف مفردة مسرحية تذكرت أحد أقربائي عندما وجد الضبائح والحفلة واللمة سأل في شنو؟؟؟
قالوا ليهو دي كرامة التخريج بتاعت بدرالدين
لولح راسو شمال ويمين (ومعاها حركة بي الخشم) وقال ليهم هي (المحاكاة) بسووا ليها تخريج؟؟؟
وها أنت أيها الكثيف الرائع تفرد لها بوستاً وتذبح لها حرفاً له خوار
لك التحية أيها الصديق
ملحوظة
حاولت أجيك بي خسم المسنجر لقيت الباب متكول بي عود ولا أدري السبب
أحبك ياخي كتييييييييييييييييير