Post: #1 Title: امسخ مقدم برنامج فى تلفزيون السودان Author: النصرى أمين Date: 08-29-2012, 05:39 PM Parent: #0
قبل قليل شاهدت جزء من برنامج اسمه بيننا وبينكم استضاف فيه مقدم البرنامج احد الدكاترة الاخصائيين فى علم الاطفال اسمه دكتور عبدالمطلب وهو طبيب مقيم فى السعودية .......
طوال الحلقة ظل المذيع السمج يقاطع ضيف الحلقة باسئلته الممجوجة السخفيفة....
المهم فى نهاية الحلقة ..مقدم البرنامج سال الضيف تحب تسمع شنو؟ الضيف بكل تهذيب قال ليهو احب اسمع ابوبكر سيداحمد .....
المقدم وبكل برود قال ليها نهدى ليك محمد وردى .....
والله انا من الضحك قربت انفقع ......
مبالغة عديل ...
Post: #2 Title: Re: امسخ مقدم برنامج فى تلفزيون السودان Author: النصرى أمين Date: 08-29-2012, 05:45 PM Parent: #1
نيابة عن جميع مشاهدى تلك الحلقة اقدم اعتذارى للدكتور عبدالمطلب واقول له لقد استمتعت بحديثك الشيق المميز .....
والمرة الجاية لو سالوك داير تسمع شنو ...
قول ليهم داير اسمع مدحة "بريدك ياالبشير"
Post: #3 Title: Re: امسخ مقدم برنامج فى تلفزيون السودان Author: النصرى أمين Date: 08-29-2012, 05:50 PM Parent: #2
وقال ليك مخرج البرنامج داير يعمل حريف وجاب مذيعة تعمل لقاءات خارجية مع ناس عاديين فى الشارع (لقاء مع سواق رقشة ولقاء مع عرسان جداد (بضم الجيم) ... المذيعة اسمها نسرين (ولا شنو كده ماعارف) ..ياخ دى مملة ملل ...وسقيلة سقالة... الحاجة الوحيدة البتتميز بيها هى حسن الخلقة ....
Post: #8 Title: Re: امسخ مقدم برنامج فى تلفزيون السودان Author: Zomrawi Alweli Date: 08-29-2012, 06:35 PM Parent: #3
سقالة يا راجل دي اسقل من السغالة ذكرتني بالسقالة لمن وقعت اثناء بنيان جديد لعمارة واحد من اقاربنا الموسرين
Post: #4 Title: Re: امسخ مقدم برنامج فى تلفزيون السودان Author: عمر الفاروق Date: 08-29-2012, 05:53 PM Parent: #2
يا النصري قبل كم يوم اخونا حميدة مشى يشتري كرسي أطفال للأمورة بتو ..أها بعد شاف الكرسي الفي العرض وكان اسود تقريباً قام قال للهندي خلاص جيب لي من الشكل ده ..أها الهند مشى خطوتين كده قام جاهو راجع لي حميدة وسألو : انا إيش في لون يجيب؟؟ حميدة فكككر كدااا قام قال ليهو خلاص جيب منو لون احمر .. الهندي قال ليهو : هذا طقم كلللو يجي في لون وااااحد بس أسود ..
Post: #5 Title: Re: امسخ مقدم برنامج فى تلفزيون السودان Author: احمد محمد احمد عتيق Date: 08-29-2012, 06:02 PM Parent: #4
يا اخي ..انتو لسع بتشوفو تلفزيون السودان ...
هو معروض للبيع قالوا ..
مع تحياتي ..
Post: #6 Title: Re: امسخ مقدم برنامج فى تلفزيون السودان Author: عوض محمد احمد Date: 08-29-2012, 06:12 PM Parent: #5
غايتو واحد مذيع اسمو ناجى دا عجيب فى المساخة
Post: #7 Title: Re: امسخ مقدم برنامج فى تلفزيون السودان Author: mohmmed said ahmed Date: 08-29-2012, 06:31 PM Parent: #6
واحد بس يا اخ مع موضة العشرة الماشا فى البورد الايام دى ناخد راحتنا ونقول
ناجى حمزة واحد فى قناة امدرمان اسمو عجيب صوتو ضخم سوركتى الزول الجنو شعر جاهلى داك
والقائمة تطول
Post: #9 Title: Re: امسخ مقدم برنامج فى تلفزيون السودان Author: محمد الكامل عبد الحليم Date: 08-29-2012, 06:36 PM Parent: #6
تحية...
بالاضافة الي المعاناة الحقيقية للناس من ظروف الحياة وتزايد وتيرة الغلاء تذداد ايضا وتيرة الثقالة من المذيعيين والضحالة من المذيعات( الكريمات)...ولو كانت هناك لوائح للمظهر العام متضمنة عدم رش البوهية علي الجباه والاحمر علي الشفاه لما استمتع المواطن الغلبان بفقع المرارة من البنات السمحات سماحة جمل الطين...
في ذات يوم كثير الثقالة عديم النسيم شحيح الابتسام توفر لي مواجهة الشاشة البلورية واخذت اعد مرات تكرار كلمة( من خلال) لاحدي الكريمات الي ان شعرت بما يسمي التنويم المغنطيسي جراء الثقالة الفايته الحد...كل ذلك (من خلال )الشاشة الدمورية اقصد البلورية حماكم الله من سجعها ورجع صداها ورجم مشاهديها بال..ثقالة..
احد المذيعين ابتدر اللقاء باسما شاكرا الضيف مخطئا في اسمه مكررا الخطأ في نهاية البرنامج رغم التصحيح...علما بان الضيف كان (ثقيل برضو)...علي شاكلة امين حسين عمر ...
Post: #10 Title: Re: امسخ مقدم برنامج فى تلفزيون السودان Author: النصرى أمين Date: 08-29-2012, 06:39 PM Parent: #6
سلام عمر والله الهندى بتاع الكراسى زى ينفع مذيع عندنا....
ياخ الناس ديل ما بعرفو حاجة اسمها ذوق؟
حتى لو مافى ذوق ...مافى نافوخ....
ما بعرفو الصاح من الغلط .....
لو ده كله مافى ..
ما بعرفو اكرام الضيف..
Post: #11 Title: Re: امسخ مقدم برنامج فى تلفزيون السودان Author: النصرى أمين Date: 08-29-2012, 06:44 PM Parent: #10
نصيحة اخوية يا زمراوى لاتشاهد تلفزيون السودان وانت تشرب شيشة.... شفطة شفطتين وتمشى التوج .....
ياخ انا قائم من النوم ولسه البساتم كلها قافلة قعدت اضحك من الموقف لمن استغربت من روحى ....
اما عن المذيعة فتعيينها قائم على الشكل فقط .....
Post: #12 Title: Re: امسخ مقدم برنامج فى تلفزيون السودان Author: النصرى أمين Date: 08-29-2012, 06:50 PM Parent: #11
نعمل شنو يا عتيق .... دى القناة السودانية الوحيدة البتصلنا فى كندا (ملح) مرات مرات عندها حاجات كويسة ... واهو فى الاخر ضل قناة سودانية ولا ضل حيطة
Post: #13 Title: Re: امسخ مقدم برنامج فى تلفزيون السودان Author: مهدي صلاح Date: 08-29-2012, 06:54 PM Parent: #11
لأ وطالعين لينا الايام دي في حركة سقيلة سقالة لامن غلط - حقوق احلال القاف بدلا عن الغين في سقيل سقالة محفوظةلمن نجر العبارة - الحركة هي انهم بيقاطعوا الضيوف بمنتهى عدم الذوق ... نظام انو المذيع عايز يفرض شخصيتو ويمتلك زمام المبادرة والانكى اول ما محور من المحاور كدة يسلك والمستضاف ينداح والمشاهد يندمج حينها يجيك هادم الملذات المذيع عشان يقاطع الضيف ويطلع فاصل
Post: #14 Title: Re: امسخ مقدم برنامج فى تلفزيون السودان Author: عبدالمطلب محمد عبدالرسول Date: 08-29-2012, 07:12 PM Parent: #13
فعلا في مذيعين ثقيلين ومملين جدا مرة في مذيع في قناة ام درمان كان بيسأل واحدة وقال ليها: هل لديك عداوات مع بعض الناس؟ فأجابت بنعم قال ليها : ممكن تقولي اسماءهم بالله العظيم ده مذيع ولا وكيل نيابة
Post: #15 Title: Re: امسخ مقدم برنامج فى تلفزيون السودان Author: Dr. Ahmed Amin Date: 08-29-2012, 07:36 PM Parent: #14
تلفزيون السودان هو جزء من الأزمة الكبرى التي تعم الخدمة المدنية والحكومية في السودان ولا ينفصل عنها ...
التعينات بالتزكية وليس بالكفاءة ..
في مذيعة في قناة ام درمان غايتو بس حسبنا الله ونعم الوكيل ..
لا تستطيع أن تتابعها لمدة 30 ثانية الا أن تودع مرارتك نهااااائي ..
حركة في العيون والوجه عجيييييب .. وأظن المخرج من نفس الشكل كونه موافق على تعابيرها
شكرا النصــري ..
Post: #16 Title: Re: ضل القناة السودانية ولا ضل حيطة Author: adil amin Date: 08-29-2012, 08:00 PM Parent: #15
وانا كمان يا النصري بتابع حاجة واحدة بس في الفضائيات الثامنية صلاة الجمعة مع الكاروري...عشان اعرف السودان وصل سنة 2012 ولى لسه في سنة 15 هجرية
وحب الناس مذاهب وضل الكاروري ولا ضل حيطة...
Post: #17 Title: Re: ضل القناة السودانية ولا ضل حيطة Author: د.محمد بابكر Date: 08-29-2012, 08:49 PM Parent: #16
انت يا النصرى ماشفت حماميزو والكرفته حقتو فى العيد ده? ياخ ده زول ابداع...
Post: #18 Title: Re: ضل القناة السودانية ولا ضل حيطة Author: Kamal Karrar Date: 08-29-2012, 09:03 PM Parent: #17
يا جماعة في واحد فيكم شاف اللقاء مع الإعلامي اللامع
حسن عبد الوهاب.. أظن ثاني أيام العيد...
كان معاه مقدم على النقيض باهت اللون والمعنى...
(سغيل سغالة) مبالغة...
مقاطع درجة يخس... يستعرض ما حفظه من شعر ..
في مقام ليس مقامه... ما عارف أقول شنو...
وأخيرا بيقول لحسن عبد الوهاب أنت شهادتك في مجروحة..
ولما حسن قال ليهو ليه؟.. قال ليهو لأنك صديقي
وكان رد فعل حسن عبد الوهاب... عدم استلطاف أو تعجب من
صداقة الشافع الذي ربما لم يقابله إلا عند إجراء المقابلة...
يعني ناس حافظين كم من التعبيرات عايزين يستخدموها كيفما أتفق..
أرحمونا بعد ما وريتونا...وورمتونا...
Post: #19 Title: Re: ضل القناة السودانية ولا ضل حيطة Author: عاطف رميتي Date: 08-29-2012, 11:56 PM Parent: #18
سلام يالاحبة
برضو ياشباب في حاجة اسمها فاصل لو بدلوها لينا قرآن بدل الغنا والكلام الفاضي دا كان حال البلد انعدل
Post: #20 Title: Re: امسخ مقدم برنامج فى تلفزيون السودان Author: د.محمد بابكر Date: 08-30-2012, 00:33 AM Parent: #1
الدكتور اسمو عبدالحكم يانصرى ده حسب كلام مقدم البرنامج لكن لو طلعت انت بتعرفه والمذيع مصر على اسم قاطعه من راسه يكون اتلوم مع الدكتور شديد وما فى شي بعيد على الله... اليست مدعاة للتامل ان افضل برنامج فى تلفزيون السودان اسمه ( من الامس)???!!!
Post: #21 Title: Re: امسخ مقدم برنامج فى تلفزيون السودان Author: سلمى الشيخ سلامة Date: 08-30-2012, 01:18 AM Parent: #20
رحمة الله على ليلى المغربى وسهام المغربى وهيام المغربى ورجاء حسن حامد رحمة الله على عبد الرحمن احمد وكمال محمد الطيب وعبد الوهاب احمد صالح اما الاسماء الاخيرة دى فهى كانت لاساتذة فى التدريب يتم تدريب المذيع / المذيعة فى الاذاعة اولا ثم منها الى التلفزيون وكانت تلك محاضرات فى القراءة والمشاهدة والاطلاع يسالون المذيع / المذيعة سؤال "نكير " لا تفوتهم شاردة او واردة فى امر التدريب فكل الشابات يومها اللاتى خرجن الى الشاشة فى التفزيون جئن من الاذاعة اولا لان "النفاج كان فاتحا بين الجهازين " ومن الاذاعة خرج حسن محمد دوكة ، طارق كبلو ، عوض ابراهيم عوض ، شادية عبد الله ، نايلة ميرغنى العمرابى وغيرهم من الاسماء التى تريح الروح "لانى ما بشوف تلفزيون اتصور ان هذه الاسماء انقرضت ولم يعد لها من حضور
بعدين يا اصحاب التلفزيون ضاربالصخة الاللشديد القوى ، كورة مثلا وبث
وعلى ذكر الاستاذ حسن عبد الوهاب ما زالت فى ذاكرتى حواراته مع الشاعر نزار قبانى قبل الف عام كما قال صديقنا صلاح حسن احمد وسهراته ايام كان التلفزيون "ابيض واسود " فى منتصف السبعينات وكم كان يسعدنا الطيب محمد الطيب بصوره الشعبية وحمدى بولاد بتحت الاضواء ومتوكل كمال وحمدى بدرالدين بسهراتهم التى ما تزال فى الذاكرة رحم الله التلفزيون الذى كان مديره فى تلك الايام يقوم بصيانة اجهزته تماما وهو مهندس للاسف نسيت اسمه يومها كان التلفزيون قبلتنا ، لكنه الان "خارج اطوار حياتنا بلا شك " شكرا يانصر امين واتمنى انك ما زعلان منى او حاجة بالشكل دا "دى عبارة اشتهر بها استاذى الفاتح الطاهر عميد معهد الموسيقى والمسرح فى ذات عام "
Post: #22 Title: Re: امسخ مقدم برنامج فى تلفزيون السودان Author: مصطفى توفيق Date: 08-30-2012, 05:50 AM Parent: #21
لسه بالله تلفزيون السودان فيهو مذيعين ؟ اغلب المذيعين فى تلفزيون السودان بيشتغلوا من غير نفس ومجبروين عشان المرتب فقط وليس من اجل فن تقديم البرامج باضافة الى انهم غير مؤهلين اما المذيعات فدخلوهم الى التلفزيون حسب الشكل والترضيات والواسطة التلفزيون الذى اصبح فيه اصحاب الخبرات مهمشين حسب رؤية مدير التلفزيون وشلته ، بالصدفة سألت عن احد المخرجين اين اختفى ولماذا اصبح لا يظهر اسمه فى البرامج والسهرات فعلمت ان مدير التلفزيون قد نقله الى الى قسم الديكور حيث اصبح رئيسا لقسم الديكور احسن حاجة انى طيلةشهر رمضان والعيد لم اشاهد قناة السودان نهائى
Post: #23 Title: Re: امسخ مقدم برنامج فى تلفزيون السودان Author: صديق الموج Date: 08-30-2012, 06:41 AM Parent: #22
النصرى ازيك انا مضحكنى التنويه الكاتبنه فى الشريط قناة النيل الازرق: نسبة للتشويش المتعمد التى تتعرض له فضائية السودان ارجو متابعة القناة على التردد علماً ان المشوشة الباقه الفيها القناة انتو البشوشكم منو يا مشوهين . انا غايتو ولا مشيت فتشتها والله على اما اقول شهيد، عشان كده انت بتقصد المذيع منو؟؟ نشوف بنعرفه، ياخى زمان انت قاعد فى الحوش التانى اهلك يقولو ليك وطى ضو البيت ده شوية او حمدى بدر الين مستضيف منو؟ او على صوت حمدى بولاد ده شوية وحاتك انا مرات بقعد فى القناة من تمسى لى اخر الليل لا بعرف المقدمين لا الضيوف الانقاذ دى تقول استوردت ليها ناس .. مسؤول من الخير يا النصرى انت السودان ده مافيه شعراء غير نضال حسن الحاج وروضة الحاج والتجانى حاج موسى واسحق الجلنقى؟ مجرد سؤال برىء جداً،،،
Post: #25 Title: Re: امسخ مقدم برنامج فى تلفزيون السودان Author: Azhari Nurelhuda Date: 08-30-2012, 06:54 AM
والعجب بتاع بطاقة يوقع عليها وكنت ضيف عزيز علينا والأبيض في الخريف.....
Post: #24 Title: Re: امسخ مقدم برنامج فى تلفزيون السودان Author: محمد مصطفي مجذوب Date: 08-30-2012, 06:49 AM Parent: #22
حرام حكاية امسخ ده ... لانو المساخ كتار وكل واحد امسخ من التاني
النصيحة انا اخير لي المساخ من واحدين طاعمين !!!!!!!
ده كلو كوم .. والدعايات كوم
انا شخصيا .. في دعايات بتجيب لي ضيق نفس والباقيات زي ناس ... زيت الطيب ... ويا بنات ........ ديل سببو لي قرحة عديل كدي الله يبني فوقكم حيطة
Post: #26 Title: Re: امسخ مقدم برنامج فى تلفزيون السودان Author: haroon diyab Date: 08-30-2012, 06:55 AM Parent: #24
Quote: نضال حسن الحاج وروضة الحاج والتجانى حاج موسى واسحق الجلنقى؟ مجرد سؤال برىء جداً،،،
2
Post: #27 Title: Re: امسخ مقدم برنامج فى تلفزيون السودان Author: الحاج حمد الحاج Date: 08-30-2012, 07:11 AM Parent: #26
********************************************************************************** مسؤول من الخير يا النصرى انت السودان ده مافيه شعراء غير نضال حسن الحاج وروضة الحاج والتجانى حاج موسى واسحق الجلنقى؟ مجرد سؤال برىء جداً،،، ********************************************************************************** و السؤال الأكثر براءة: لماذا تجد ود الجبل كلما تفتح النيل الأزرق؟
Post: #28 Title: Re: امسخ مقدم برنامج فى تلفزيون السودان Author: النصرى أمين Date: 08-30-2012, 07:46 AM Parent: #27
يا اخوانا والله ماشاء الله... يسعدنى مروركم جميعا واحد واحد واحد .... لو حاولت اعمل مداخلة ورد لكل واحد حابقى ليكم ممل جدا واحتمال عنصر المجاملة يغلب على الردود .... الشئ المؤكد انو الناس لسه قلبها على تلفزيونا القومى رغم كل شئ.....
وبصراحة (بالاضافة لكل الحالات والامثلة اعلاه) ان حالة التلفزيون مزرية والاداء المهنى شبه معدوم ...
اديكم مثال ...اثناء البرنامج المذيع السقيل "رشانا" باغنية عن نهر النيل,,, الاغنية من انتاج جهاز الامن تحت غطاء حاجة اسمها وحدة تنفيذ السدود .....
انتاج الاغنية كان سئ جدا لدرجة ان اسماء المشاركين فيها (مؤدى وملحن الخ) لم تظهر للمشاهد بسبب الشريط الاخبارى والدعائى الغليظ الذى يغطى جزء كبير من اسفل الشاشة .... معقول منتج الاغنية ما انتبه للحاجة دى وبدلا من كتابة الاسماء فى الاسفل يكتبها فى اعلى او منتصف الشاشة ...... مافائدة اى كتابة فى الشاشة لا يستطيع المشاهد رؤيتها,,, وده دليل ان العاملين فى انتاج البرامج دى امكانياتهم محدودة جدا .....
------- ياسلمى ...زعل شنو.... ابدا والله .....معليش اذا بدرت منى حاجة ..اصلو اخوك مدودى وما بجمع شديد.. ومرات بكون برة الشبكة ......
---------
ان شاء الله نرد ليكم واحد واحد والفورة مليون
Post: #30 Title: Re: امسخ مقدم برنامج فى تلفزيون السودان Author: خال فاطمة Date: 08-30-2012, 08:46 AM Parent: #28
Quote: انت يا النصرى ماشفت حماميزو والكرفته حقتو فى العيد ده? ياخ ده زول ابداع...
Post: #29 Title: Re: امسخ مقدم برنامج فى تلفزيون السودان Author: محمد مختار جعفر Date: 08-30-2012, 08:18 AM Parent: #27
ياجماعة أحمدو ربكم وزيدوه حمداً ، وكرروا الشكر لله تعالى بعد ما فارق التليفزيون رجل تعرفونه كان مديره، ويقال كان له عداوة مع السمحات ..!! وبعد أن فارقه ، عادت الوجوه النضرة والجمال السوداني الأنثوى بكل قوة، عدد مقدر من المذيعات ، جمال فى جمال وحسن هندام ومكياج بدرجة ( قف ) ... أما الملكةالإذاعية الإبداعية والثقافة المتميزة ، فالحديث فيها يطول ويأخذ منحى آخر .... بمعنى كدى أختارو .؟ السماحة أم الثقافة .، ومن جمعت الإثين منهن قليل ، ويتضح ذلك من البرامج الحوارية الثقافية بالذات .. وفتكم بعافية .. .. . . من جماعة التليفزيون في عهده السمح ، ( أبيض وأسود )
Post: #31 Title: Re: امسخ مقدم برنامج فى تلفزيون السودان Author: اسماعيل عبد الله محمد Date: 08-30-2012, 11:44 AM Parent: #29
ألأخ ألنصرى أمين ...سلام... موضوع جميل ...
برأيى أفضل و اكثر مقدمى البرامج الذين مروا على تلفزيون السودان خفة فى الدم و سلامة فى الذوق ورشاقة فى الأداء هو عوض ابراهيم عوض
وكمان فى واحد مراسل لقناة الشروق على ما أظن فى جوبا أسمه عادل فارس ..يا سلااااااام ..الزول ده يستاهل يكون مقدم برامج ترفيهية ومنوعات .
Post: #32 Title: Re: امسخ مقدم برنامج فى تلفزيون السودان Author: jini Date: 08-30-2012, 01:12 PM Parent: #31
Quote: سعيدين بوجودك فاصل ونواصل السهرة تمضى الى خواتيمها كنت ضيفا عزيز علينا! بالله ما حاجة تفقع المرارة جنى سعيدين بوجودك فاصل ونواصل السهرة تمضى الى خواتيمها كنت ضيفا عزيز علينا! بالله ما حاجة تفقع المرارة جنى
زمان الواحد لمن يفشل فى المدرسة بودوهو المنطقة الظاهر هسة بودوهم التلفزيون جنى
Post: #33 Title: Re: امسخ مقدم برنامج فى تلفزيون السودان Author: jini Date: 08-30-2012, 01:17 PM Parent: #32
Quote: انت يا النصرى ماشفت حماميزو والكرفته حقتو فى العيد ده? ياخ ده زول ابداع...
Post: #37 Title: Re: امسخ مقدم برنامج فى تلفزيون السودان Author: محمد علي شقدي Date: 08-30-2012, 05:18 PM Parent: #35
ياخونا ممكن نهدي للدكتور اثنين في واحد والتحيه للزعيم وردي وللصديق ابوبكر سيد احمد
Post: #39 Title: Re: امسخ مقدم برنامج فى تلفزيون السودان Author: النصرى أمين Date: 08-30-2012, 05:32 PM Parent: #37
الجمال شئ نسبى...هنا فى الغرب المراة الجميلة هى النحيفة الكملانا من لحم الدنيا,,,, معظم نجوم المجتمع هنا لو مشو السودان لوقفن فيهن حبوباتنا يسالوهن ان كانن عيانات,,,,
عندنا هنا فى كالقرى مقدمة اخبار السادسة كلما اشوفها احن عليها من الضعفة والنحافة ..... عبارة عن هيكل عظمى .....مقدمة النشرة الجوية من اصول اسيوية فهى عادية شوية ...
فى السودان العكس .....
احتمال صدفة كل مذيعات تلفزيون السودان لونهم فاتح ووجوهم جميلة وغير ضعيفات ,,,,
احتمال صدفة ....
لكننى اشك فى انها صدفة ......
اتمنى ارى مذيعة واحدة فقط ....خدرا ...ملامحها افريقية.... عادية فى الحجم ...مقبولة من ناحية جمال الوش,,,, لا تتكلف .... ولا تعطش الجيم ...تتكلم لغتنا السودانية البسيطة .....
واحدة بس ..... تفك النحس عن برامج التلفزيون ...
Post: #40 Title: Re: امسخ مقدم برنامج فى تلفزيون السودان Author: jini Date: 08-30-2012, 06:45 PM Parent: #39
فى نهاية سبعينات القرن الماضى وبداية الثمانينات تمشى دار الفنانين عشان داير فنان لعريس قريبكم مغترب تسال من وردى ولا ابو اللمين يقولوا ليك محجوزين لكن فك عثمان حسين وابراهيم عوض وصلاح بن البادية وزيدان ابراهيم وعركى وعبدالعزيز المبارك والجابرى وابوداؤود واحمد المصطفى وصلاح مصطفى وثنائى العاصمة واللحو وتانى تسعين فنان! ياخ السودان دا كان بلد عظيم تمشى تتفرج فى كورة هلال مريخ تلقى فى الميدان عشرين عبقرى! ااااااخ يا بلد جنى
Post: #41 Title: Re: امسخ مقدم برنامج فى تلفزيون السودان Author: مهدي صلاح Date: 08-30-2012, 06:49 PM Parent: #1
التحية لكم استاذ النصري ولكل المتواجدين المذيعات عندنا نسخ مملة من بعض ... بيقلدوا بعض في كل حاجة ... في الشكل وفي الاداء بيرددوا نفس المفردات .... مذيعنّنا ايضا ليسوا استثناء في ذلك ..بتشابهو كلهم أظرف حاجة حكاية موبايل الضيف اللي بيرن على الهوا ..آخر مرة حصلت امبارح في النيل الازرق... قبل فترة طويلة مستضيفين واحدة من عامة الناس فيها طيبة وبساطة حبوباتنا وامهاتنا السودانيات ... جوالها رن على الهوا فقامت وبعفوية ردت وقالت لمن في الطرف الاخر : انا في التلفزيون ... بعدين بضرب ليكم فـ(حدجتها) المذيعة بنظرة انا لمّن حنيت عليها .... المذيعة كانت الجات داخلة محمولة على محفة في يوم زفافها .. ايوة اذكرتا اسمها : رشا الرشيد كل الزمن اللي بلقاهو لمتابعة التلفزيون انا مخصصو لمتابعة القنوات السودانية اذاعة وتلفزيون ... جزء من بينا وبينكم سبب ليك ضيق وانزعاج والفضل لأسلوب المذيع فلك أن تتخيل حالة الاحشاء عندى مع اختياري للتعايش الدائم مع القنوات السودانية..غايتو المرارة انفقعت بدري الاذاعة لا تقل بؤسا مع استثناءات زي حقيبة الفن وفي سهرة رائعة يوم الاحد باسم منازل القمر تقدمها روضة الحاج بثقافتها وتمكنها من ناصية اللغة تتمكن من استنطاق ضيوفها والبرنامج مليان لكن المشكلة مرات بيجوا ضيوف (سقيلين) ..آخر حلقة ضيف منازل القمر الممثل محمد شريف علي كان سقيل خاصة لما أصر انو يكون كلامو كلو بالفصحى على العموم اذا بث اذاعة ام درمان بيصلكم في كالجاري يا استاذ النصري نصيحتي تتابعها فهي – اي اذاعة امدرمان- أرأف قليلا بالمرارة من صنوها التلفزيون ... الان وفي هذه اللحظة انا قاعد اسمع برنامج ربوع السودان
كالقري دي لاقتني امس في موضوع منشور في مجلة جدة وهي مجلة تصدرها امانة جدة ... بحسب المجلة هذه المدينة الكندية اختيرت كواحدة من انظف عشرة مدن في العالم حتى بالامارة قالو فيها نهرين القوس والكوع bow & elbow... ما يقوم واحد يقرا انظف عشرة دي ويقوم يفتح بوست لأنضف عشرة اعضاء
Post: #42 Title: Re: امسخ مقدم برنامج فى تلفزيون السودان Author: احمد الامين احمد Date: 08-30-2012, 07:00 PM Parent: #41
Post: #43 Title: Re: امسخ مقدم برنامج فى تلفزيون السودان Author: احمد الامين احمد Date: 08-30-2012, 07:02 PM Parent: #42
Quote: رحم الله التلفزيون الذى كان مديره فى تلك الايام يقوم بصيانة اجهزته تماما وهو مهندس للاسف نسيت اسمه
إسمه حسن عبدالرحمن
Post: #44 Title: Re: امسخ مقدم برنامج فى تلفزيون السودان Author: خال فاطمة Date: 08-31-2012, 06:01 AM Parent: #43
اقع الاذاعة ياالنصري
بتجي بالرسيفر
بشغلها للصباح
لا تشوف شجر مكان ولا صمغ
Post: #45 Title: Re: امسخ مقدم برنامج فى تلفزيون السودان Author: النصرى أمين Date: 08-31-2012, 05:37 PM Parent: #44
فى رمضان كنت بحضر فى الفجائية السودان ...ظهرت فى الشاشة لوحة تقول حان الان موعد صلاة الفجر ...وفعلا الاذان بدا ....انا شعرت فى حاجة غلط قلت لزوجتى الساعة كم دلوقت فى السودان ...قالت لى حوالى ستة مساء.... طيب كيف صلاة الصبح .... قالت لى هم غلطانين.... المهم وفجعتا وبدون مقدمات الاذان انقطع ...... بسم الله .....الاذان على حسب فهمى ما بقيف ..... شالو اللقطة وجابو لوحة جديدة مكتوب عليها حان الان موعد صلاة المغرب ..... وبدا الاذان من اول وجديد بالله عليكم دى امة؟ الاخطاء بتحصل فى كل مكان ...لكن التعامل السريع معاها هو المهم....
Post: #46 Title: Re: امسخ مقدم برنامج فى تلفزيون السودان Author: النصرى أمين Date: 08-31-2012, 05:42 PM Parent: #45
فى حاجة تانية سقيلة ودمها تقيل عملها المذيع مع دكتور عبدالحكم (انا غلطان يادكتور الاسم فعلا عبدالحكم) ..... المذيع فتح موضوع شيق وسؤال جميل عن القراءة والاطلاع .... دكتور عبدالحكم ذاته اتكيف من السؤال وبدا يرد انه يحب قراءة الكتب التاريخية وانو فى الاونه الاخيرة قرأ كتابين واحد عن ذو القرنين والتانى عن ياجوج وماجوج وقبلما يوضح لينا مختصر للكتابين و دور النشر تدخل المذيع السقيل وغير الموضوع ,,,,,
الله لا كسبك ماتخلى الزول يتم كلامه .... يا مضر ...
Post: #47 Title: Re: امسخ مقدم برنامج فى تلفزيون السودان Author: النصرى أمين Date: 08-31-2012, 05:50 PM Parent: #46
لابد ندى المخرج فى راسه برضو... ضيف الحلقة اخصائى فى علم الاطفال ..... الموضوع طرح مسالة الانجاب واهميتها.... المذيع السقيل طلع من هدومه لمن قال ان الفنان غنى "ربى ما تحرم بيت الاطفال" والله العظيم لمن سمعت كلمات الاغنية دى بديت اردد فيها من الاعجاب ...وفى سرى بقول يارب يا كريم المخرج يفطن للحاجة دى ويدينا ان شاء مقطعين من الاغنية الرائعة دى .... ها عشم ابليس ... لا المذيع ولا المخرج وصلو للمرحلة البتخليهم يعرفو المشاهد داير شنو !!!
هم فى وادى والمشاهد فى وادى .....
جايب سيرتها ليه الاغنية دى اذا ما عندك مقدرة ليها
Post: #48 Title: Re: امسخ مقدم برنامج فى تلفزيون السودان Author: النصرى أمين Date: 08-31-2012, 05:56 PM Parent: #47
الظاهر الجمعة مافيها شدر ياخال فاطنة
شاهدت حلقة كاملة من برنامج شنو كده القلم تقديم عبدالوهاب هلاوى استضاف فيها الاستاذ ميرغنى البكرى.... تقييمى ليها 90% اهم شء انها ما مملة ...حديث ميرغنى البكرى ممتع وذاكرته حديد... عجبتنى قصته عن الخبر الكاذب الذى نشره عن وفاة الفنان حواء الطقطاقة وكيف لم تشتكيه لانها شافت بعينها ماذا يكتب عنها فى حالة وفاتها...
Post: #49 Title: Re: امسخ مقدم برنامج فى تلفزيون السودان Author: النصرى أمين Date: 08-31-2012, 06:09 PM Parent: #48
اتاكدت تماما ان تلفزيوننا يخلو من المبدعين وهاكم الدليل افتحو التلفزيون الان وانتظر شوية ....حيعرضو فقرة سريعة عن التنمية وارضنا الطاهرة (وباقى الدجل بتاعهم) اول الفقرة تبدا ...على الصوت ,,,وامشى على المطبخ ,,,, الموسيقية التصويرية المصاحبة للفقرة التثقيفية هى موسيقى شبيهة للموسيقى التشويقية لافلام جيمس بوند و توم كروز .....
يعنى وانت بتسمع فى الموسيقية التصويرية يتخيل ليك ان التلفزيون يعرض مشهد من فيلم Mission: Impossible او جيمس بوند وهم يصارعون الخونة من على هليوكبتر تطير على ارتفاع منخفض
وليس مزارع مسكين شايلو طورية
عالم متخلفة تماما....
Post: #50 Title: Re: امسخ مقدم برنامج فى تلفزيون السودان Author: مهدي صلاح Date: 08-31-2012, 06:41 PM Parent: #1
Quote: اقع الاذاعة ياالنصري
نصيحتي تاخد باقتراح خال فاطنة .. مع التلفزيون المرارة في حالة انفقاع دايم ... تلتئم ثم سرعان ما تلبث تنفقع وهكذا دواليك لكن مع اذاعة ام درمان الوضع أهون بالاضافة لاذاعة امدرمان هناك البيت السوداني وهي ذات ايقاع اخف من امدرمان مع مساحة اكبر للاغاني وبرامج المنوعات لكن اذاعة البيت السوداني ما اظنها توصلكم ، اذا نحنا في السعودية القريبة وقدر ما عملت scan ما قدرت التقطها لحدي ما جبت تكنشن - الكلمة الاخيرة دي متعوب عليها ما جات بالساهل- جبت فني فلبيني نزّل لي الاذاعة دي ولحدي حسي لما اطلب معلومات عنها في خانة اسم القمر مكتوب (unknown) اما احلى التسجيلات القديمة لأشهر الاغاني السودانية فهي متاحة عبر اذاعة وادي النيل لكن للاسف ومن شهور انقطع البث الفضائي لهذه الاذاعة
سبب التعديل نسيت ما اختم المداخة: هي بطاقة يوقع عليها العبدلله
Post: #51 Title: Re: امسخ مقدم برنامج فى تلفزيون السودان Author: النصرى أمين Date: 09-02-2012, 07:27 PM Parent: #50
واضح يا اخوانا انى ما حاقدر ارد على كل المداخلات فى البوست وحتى لو قدرت مافى زول حيقراها لانو البوست مشى الصفحة الثالثة وفقد بريقه.....
الاخ مهدى شكرا جزيلا على حضورك المميز... كالقرى هى رابع المدن الكندية من حيث عدد السكان لكنها اغناهم لانها عاصمة صناعة النفط فى العالم .... هى نظيفة جدا جدا وشعبها مهذب وعمدتها مسلم يتبع للمذهب الاسماعيلى (الشيعى)
كالقرى بالنسبة للسعودية زى جدة بالنسبة للسودانيين ينظرون اليها بعيون الامل...
------
بالنسبة لفقع المرارة ...انا محصن تماما من اشعاع القناة السودانية لان فترة مشاهدتى لاتتعدى النصف ساعة فى اليوم ..حاجة اشبه با hit and run وبصراحة بالرغم من المرض والتعكير الذى تمارسه القناة علينا الا انى اشعر بلذة التعذيب ...ده موش اسمه السادية .....
لو الاذاعة السودانية او اى اذاعة سودانية متوفر على الجوال الموصل بالانترنت ادونا خبر
