Post: #1
Title: هلال/مريخ هى فقط لعبة ..فلا تحملوها اكثر من طاقتها!
Author: النصرى أمين
Date: 11-18-2010, 01:41 AM
عندما جاءتنى تلك الرسالة القصيرة(من تويتر) التى تخبرنى ان الهلال خسر
ضربات الجزاء ضد الصفاقسى ..دارت الدنيا بى لعدة ثوان وشعرت
بضيق والم فظيعين وبدت لى فى (تلك الثوانى) ان الدنيا مظلمة وتعيسة....
بعدها بدقائق بدات افكر لماذا (وفوق كم) العذاب ده؟
الرياضة (وتشجيع الرياضة بالتحديد) غرضها الاساسى التسلية والترفيه..
فيا هلالاب ويا مريخاب..
لا تخرجو مباراة الغد اكثر من انها منافسة شريفة غرضها الترفيه والتسلية
اذا خسر فريقك غدا يمكنك ان تحزن لعدة دقائق بعدها تزكر ان الامر لا يستحق
اكثر من ذلك ...
وختاما
اظن ان الفرصة مواتية للهلال ان يمسح بالمريخ الارض وينتفش ريشه ويظعمطه....
|
Post: #2
Title: Re: هلال/مريخ هى فقط لعبة ..فلا تحملوها اكثر من طاقتها!
Author: Hamid Elsawi
Date: 11-18-2010, 11:56 AM
Parent: #1
العزيز النصري
كلامك في الاول متوازن و كلام عَقُل
| Quote: الرياضة (وتشجيع الرياضة بالتحديد) غرضها الاساسى التسلية والترفيه.. |
كلام زول عاقل
Quote: اذا خسر فريقك غدا يمكنك ان تحزن لعدة دقائق بعدها تزكر ان الامر لا يستحق
اكثر من ذلك ... |
كلام زول روحه الرياضية عالية جداً ... و نظرته عميقة و تستحق الاحترام
| Quote: اظن ان الفرصة مواتية للهلال ان يمسح بالمريخ الارض وينتفش ريشه ويظعمطه.... |
كلام زول منفَعِل و الكلام الفوق تقول ما قاله
و المشكلة في مُداخلة واحدة ... تناغض غريب
احتمال تكون جِرسة ... من المباراة و توتر مشروع .... اتمني ذلك.
اذا كان غير كِده نحجز ليك عند طبيب نفسي للعِلاج
بالمناسبة انا هلالابي علي السكين
|
Post: #3
Title: Re: هلال/مريخ هى فقط لعبة ..فلا تحملوها اكثر من طاقتها!
Author: النصرى أمين
Date: 11-21-2010, 00:17 AM
Parent: #2
سلام يا حامد
ياخى خيبت ظنى ..وحالتى كنت مفتكر خريجى الخرطوم (زمان) يلقطوها طايرة lol..
انا قصدت الجزء الاخير من المداخلة يكون بشكله الاستفذاذى ده ...
وغرضى انو مهما كانت درجة المكاواة والمناقرة بين الهلال والمريخ
مفروض الواحد ما يديها اكبر من حجمها الحقيقى ...
يعنى لو الجملة دى كتبها مريخابى مفروض ما تاثر فينى انا الهلالابى
لدرجة اكره الزول الكاتبها وادخل معاهو فى ملاسنات ..
الرياضة فى الاخر هى رياضة .. تنفيس و ترويح ليس الا ,,,,
اهو الهلال غلب المريخ ....فى داعى بعض المريخاب يدخلو فى حالة اكتئاب
ونفسيات ..... ونفس الشئ لو انهزم الهلال ..
مفروض كل هلالابى ومريخابى متعصب ومتشنج يفكر شوية ويراجع نفسه
فوق كم ؟
ولشنو حرقان الاعصاب والتنشنة ....
الزمن ده فيهو ما يكفى لتبويظ الاعصاب وصناعة العكننة
فى داعى الواحد يفتح جبهة جديدة من مافى !
مافى شئ بستحق ومفروض يعيدو حساباتهم ..
|
Post: #4
Title: Re: هلال/مريخ هى فقط لعبة ..فلا تحملوها اكثر من طاقتها!
Author: النصرى أمين
Date: 11-22-2010, 01:43 PM
Parent: #3
نرفع البوست مرة اخرى لنزكر المتشنجين من الجانبين
انو يختو الرحمن فى قلبهم ...
هلال مريخ هى لل fun ليس الا ...
ولا تستحق ان يفقد الانسان حياته من اجلها....
هذه المرة سنضع المريخ فى صفيحة ونملاها موية ونختها
فى منقد فيهو جمر احمر ساخن ..بعد داك نطلع الجدادة من الصفيحة
حيث يتم نتف الريش بسهولة ..
بعد نهاية السلق .. نحمرها ..ونبدا ناكل الاجنحة كفتح شهية
|
Post: #5
Title: Re: هلال/مريخ هى فقط لعبة ..فلا تحملوها اكثر من طاقتها!
Author: النصرى أمين
Date: 11-23-2010, 06:04 PM
Parent: #4
لماذا ترفع ضغطك؟ وعشان شنو كل هذا الاكتئاب؟
هى فقط مباراة كرة قدم ليس الا ..
فلنستمتع بها ..
اذا فزنا فرحنا
واذا خسرنا لم نفرح ...
حليل المريخ...
بقى حمام ميت...
|
Post: #6
Title: Re: هلال/مريخ هى فقط لعبة ..فلا تحملوها اكثر من طاقتها!
Author: النصرى أمين
Date: 11-23-2010, 08:11 PM
Parent: #5
مبروك للمريخ ..
ويا هلالاب اتزكرو انها كورة لا غير ولا تستحق اكثر
من ذلك ..
|
Post: #7
Title: Re: هلال/مريخ هى فقط لعبة ..فلا تحملوها اكثر من طاقتها!
Author: محمد الامين احمد
Date: 11-23-2010, 08:34 PM
Parent: #6
فوق فوق مريخنا فوووووووووووووووووووووووووووووق
قلت لى ميت ... كااااااااااااااااااااااك الميت دفن الحى فى بيتو ... عفوا عفوا قصدى فى حفرتو
و يا حبيب الما بتستحق دى انتو ساكينها 80 سنه ... اقفلوها و اقلوبها مطعم احسن
هنو يا هنو يا البكيت الصغار و خليتهم جنو
راجى يا راجى يا بكيت الصغار و خليتهم يتلوو
|
Post: #8
Title: Re: هلال/مريخ هى فقط لعبة ..فلا تحملوها اكثر من طاقتها!
Author: النصرى أمين
Date: 11-23-2010, 09:00 PM
Parent: #7
والله يا محمد انا قعدت ساعتين قدام الكمبيوتر بشاهد
فى الكورة لمن عيونى زقللت ..
لمن انتهت دخلت المطبخ وعملت لى شية مكربة من بقايا العيد
ضربت الشية وشربت كباية شاى حمراء وحسى ماشى اديها نومة الضهرية....
شفت كيف فهمنا لهلال مريخ اتغير......
انااعتبرت الهلال انهزم لا اكثر ولا اقل
ولن امرض روحى حزنا على الهزيمة ......
نفس الشئ لو انتصر الهلال ....
حاضرب الشية و اشرب الشاى و اديها نومة وبعد داك الله كريم
|
|
