Post: #1
Title: الوطواط (مصاص الدماء) علاج للجلطة
Author: النصرى أمين
Date: 05-23-2010, 04:32 AM
Parent: #0
الوطاويط انواع كتيرة...
نوع بياكل حشرات ونوع بياكل فواكه ..خضروات ..الخ
هناك نوع من الوطاويط يعيش على مص الدماء Vampire Bat
عندما يغرس "انيابه" فى جلد البقرة(مثلا) يقوم بفرز بروتين يخرج
مع لعابه يساعد على انسياب الدم بدلا ان يتجلط ..
العلماء فى جامعة كالقرى يجربون دواء جديد اسمه Desmontaplaise
له خصائص لعاب الوطواط ...
انا ما عارف النوع ده من الوطواط مصاصى الدماء موجود فى السودان ام لا ...
(طبعا فى مصاصى دماء من نوع اخر لكن ما وطاويط)
لو موجود ...سوقو حيبقى حار شديد زى ال gpx
تلقى الجماعة شايلين شباكهم ولابتين فى الضلام ..
التفاصيل هنا
http://calgary.ctv.ca/servlet/an/local/CTVNews/20100521...521/?hub=CalgaryHome
ال ctv بقت لينا مرضة زى سودانيزانلاين
الواحد لازم يفتحها كل يوم
|
Post: #2
Title: Re: الوطواط (مصاص الدماء) علاج للجلطة
Author: Osman Musa
Date: 05-23-2010, 05:30 AM
Parent: #1
النصرى أخوى
يعنى نخلى ال Aspirin ؟
عليك الله هسع صورة الوطواط الجبتو ده
ما بتجيب الجلطة من الخوف ساكت ؟
كدى حاول شوف لينا عدد 2 كونتنر وطواط بسعر كويس .
تحياتى
|
Post: #3
Title: Re: الوطواط (مصاص الدماء) علاج للجلطة
Author: النصرى أمين
Date: 05-23-2010, 05:45 AM
Parent: #2
تعرف يا عثمان ليه انا نيهائئ ما بخاف من الوطواط!!
لانو زمان فى المدرسة الثانوية العامة(بيت المال المتوسطة ) الفصول كلها مليانه
ببيوت الوطاويط ... ومرات كتيرة بنشوف الوطاويط نفسها بالنهار ....
والله فضلاتها عندها ريحة !!
اجارك الله ...
يمكن الريحة دى الخلتنى عمرى ما سفيت صعوط ..
فالتمباك وبراز الوطواط اولاد عم ....(معذرة للسفيفين)
|
Post: #4
Title: Re: الوطواط (مصاص الدماء) علاج للجلطة
Author: النصرى أمين
Date: 05-23-2010, 03:07 PM
Parent: #3
Nearly three-quarters of all strokes occur in
people over the age of 65
The risk of having a stroke more than doubles each
decade after the age of 55.[/B
Stroke is the leading cause of serious
long-term disability in the United States
Stroke is the third leading cause
of death in the United States
وده كمان
Stroke death rates are higher for African
Americans than for whites, even at younger ages
فى كل لحظة او ثانية هناك عضو فى سودانييزانلاين معرض للجلطة
|
Post: #5
Title: Re: الوطواط (مصاص الدماء) علاج للجلطة
Author: النصرى أمين
Date: 05-23-2010, 03:49 PM
Parent: #4
امبارح القريبة دى كنت بتكلم مع زميل لى فى الشغل مغربى
وجات السيرة..قال لى احسن حاجة كل يوم الصباح تاكل oat
قلت لى اسمو شنو بالعربى ..ادانى اسم بالبربرى ..
جرررررريت على الدكان ولحسن الحظ لقيتو رخيص اشتريت شوال
بتلاته دولار ..
اكلت منو هذا الصباح (مع اللبن) ومنتظر النتيجة ...
oat اسمه حسب قوووقل الشوفان (اظن فى توب اسمو قريب من كدة)
الشوفان ده قال بعمل طبقة عازلة ضد البلواى
والله اعلم
|
Post: #6
Title: Re: الوطواط (مصاص الدماء) علاج للجلطة
Author: النصرى أمين
Date: 05-24-2010, 06:20 AM
Parent: #5
الشوفان او ال OAT طعمه زى القمح بس لزج شوية وده بالضبط
ما زكره صاحبى المغربى بانه نسبة للزوجته يعمل كحاجز حول غطاء المعدة..
برضو قال لى انو الشوفان بيقوم كنبات طفيلى مع القمح ....
قوووقل قالت عن الشوفان انه بساعد فى السيطرة على الكلوسترول
وصاحبى المغربى بيقول ان لو اكلتو يوميا مع الفطور فوزنك حينزل
خلال اسابيع ...قووقل تاكد صحة كلام زميلى المغربى ...
على كل
اليوم الاول مع الشوفان مر واستهلاك الطعام انخفض للنص ...
وربنا ما يحوجنا لوطاويط ..
|
Post: #7
Title: Re: الوطواط (مصاص الدماء) علاج للجلطة
Author: النصرى أمين
Date: 05-24-2010, 06:37 AM
Parent: #6
انا اكتر سودانى بتجنب يمشى لدكاترة ..
ما بمشى الدكتور الا اصل مرحلة الدردقة على الارض ..
غير ذلك big NO
لفترة طويلة جدا لمن العيال يحتاجو يمشى للدكتور بحاول
ازوق واتجنب المشى لانو الدكتورة عندى احساس انها لابته لى ..
مرة اضطريت امشى مع واحد من الشفع ..
الدكتورة لمن شافتنى ..طوالى خلت الشفع ومسكت فينى.. على
نظام ""قبضتك"" وطوالى فحوصات ورسلتنى كل عيادات الدنيا
شى رسم قلب ..شئ فحوصات دم ..بول...ضغط..كلاوى..نظر..سمع..
تلاته يوم وانا ازازى بين العيادات وعلى يقين لمن تطلع الفحوصات
الدكتورة حتنادينى وتقعد تقول ما تاكل لحمة ..ابعد من السكر ...
خفف من الرغيف ..اتريض ..اتمشى ..خفف وزنك .. قابلنى كل تلاته شهور
ما عارف الحصل شنو..
وليه اتجاهلتنى بعد داك ..
الكلام ده قبل اكتر من 5 سنين ....
ومعظم العدة اتدهورت حالتها خالص ..
لذلك شوفان ..شفون .. جن احمر..وطاويط
كلو بجربو ونحاولو ...
فوش المدفع ليس مثل الخطوط الخلفية ..
|
Post: #8
Title: Re: الوطواط (مصاص الدماء) علاج للجلطة
Author: النصرى أمين
Date: 05-25-2010, 04:52 AM
Parent: #7
انا_طبعا_ ما عارف الفرق بين السكتة القلبية والذبحة والجلطة وهل هم كلهم
شئ واحد ولا لا ...
لكن بعرف الا Stroke لانها كتيرة جدا جدا..وعادى جدا الواحد يسمع ان فلان
جاتو استروك
فى نظرى ....المشكلة ما فى الجلطة نفسها ...المشكلة(لو الزول طلع منها) فى الوضع
بعدها وكيف الواحد يتاقلم على حالته المرضية ويتكيف حسب دواعى الظروف ....
|
Post: #9
Title: Re: الوطواط (مصاص الدماء) علاج للجلطة
Author: munswor almophtah
Date: 05-25-2010, 07:50 AM
Parent: #8
قلت أبو الرقيع يا النصرى
معناها العناكب محتكره الشغلانه
منصور
|
Post: #10
Title: Re: الوطواط (مصاص الدماء) علاج للجلطة
Author: النصرى أمين
Date: 05-25-2010, 04:25 PM
Parent: #9
العناكب بتجيب القروش يا منصور
لكن الوطاويط بتجيب العافية ......
اقعد لاوز لى كده لمن تكجنى
|
Post: #11
Title: Re: الوطواط (مصاص الدماء) علاج للجلطة
Author: امير عبدالدائم
Date: 05-25-2010, 06:08 PM
Parent: #10
اخونا النصرى
سوال صغير كدة
البقنع ابو الرقيع دة عشان يعضيك شنو
والضمان شنو انو ابوالرقيع يفكك بعد ما يمصك امكن الشئ دة ما عندوا حاسة شبع ويقعد يرضعك لمن يكملك
طبعا الكلام دة على حسب معرفتى بابو الرقيع لانو بيجى للزول وهو نايم ويقعد يقرطع فيك لمن تلقى نفسك بقيت ابيض تب
|
Post: #12
Title: Re: الوطواط (مصاص الدماء) علاج للجلطة
Author: النصرى أمين
Date: 05-25-2010, 06:24 PM
Parent: #11
سلام يا امير
مرحب بيك فى البورد
الفكرة انو الناس "تشرك" لابورقيع ده فى الضلام وتقبضو
حى يرزق وتعمل مزرعة تربيهو فيها ....
اها كل يوم يومين نجيب ليهو بقرة(بعدما نجوعو لمن يدوخ من الجوع)
يقوم يبدا "يقرطع" فى البقرة ..
نقوم نتدخل نحن ومحل الجرح المفتوح نشيل
الدم ونستخلص منو المادة المطلوبة ونعبيها فى قزازات(بعد اضافات الموية عشان تكتر)
ونبيعها ....
دى الفكرة باختصار مع حجب التفاصيل منعا للمنافسين....
بالجد كده..
قوووقل تقول انو ابورقيع يفضل الحيوانات الاليفة مثل الابقار والماعز على
الحيوانات المتوحشة (اسود نمور ثعالب)
بعدين ده كلام شنو
Quote: طبعا الكلام دة على حسب معرفتى بابو الرقيع لانو بيجى للزول
وهو نايم ويقعد يقرطع فيك لمن تلقى نفسك بقيت ابيض تب |
ابورقيع يمص دماء البشر كمان؟
دى قايتو قوووقل ما عارفا ....
|
Post: #13
Title: Re: الوطواط (مصاص الدماء) علاج للجلطة
Author: عبدالعزيز الفاضلابى
Date: 05-25-2010, 06:54 PM
Parent: #12
والله انتو الذ ناس
|
Post: #14
Title: Re: الوطواط (مصاص الدماء) علاج للجلطة
Author: إسماعيل حميم
Date: 05-25-2010, 10:44 PM
Parent: #13
عم النصري سلامات
Quote: لانو زمان فى المدرسة الثانوية العامة(بيت المال المتوسطة ) الفصول كلها مليانه
ببيوت الوطاويط ... ومرات كتيرة بنشوف الوطاويط نفسها بالنهار ....
والله فضلاتها عندها ريحة !!
اجارك الله ... |
حيث كان يعيش الوطواط ما بين سقف الزنك المصمم في شكل هرمي "جملون"
وبين " التلقييم الخشبي" ما يعرف بالسقف المستعار حالياً
دحين انت كنت معاي في نفس مجموعة النظافة الإسبوعية للفصل
والله يا النصري ريحة الوطواط دي من إزعاجها مرات
بتذكرها من غير سبب . . يا أخ دي خلف الله عديييييل ..
صادق الود
إسماعيل حميم
.
|
Post: #15
Title: Re: الوطواط (مصاص الدماء) علاج للجلطة
Author: smart_ana2001
Date: 05-25-2010, 11:05 PM
Parent: #14
سلامات اخونا النصرى...
العلبة دى بتاكلنى شهرين و تمنها حوالى 3 دولار.
الصباح تكب كباية شوفان* مع كباية لبن فى الماكرويف لمدة 2 دقيقة.
لو بتاع مزاجات (ذى) ممكن تخت فيه حبة ملح (فتفوته) او اى فاكهة ذى موز او فراولة او حتى زبيب (بناتى).
______________________
*التوب (او القماش اللى منو التوب) اسمه "شفون" و ليس شوفان!
|
Post: #16
Title: Re: الوطواط (مصاص الدماء) علاج للجلطة
Author: النصرى أمين
Date: 05-26-2010, 02:13 AM
Parent: #15
سلام فاضلابى
شكلك قفلت على فكرة مزرعة ابورقيع دى
منك خوف ..
|
Post: #17
Title: Re: الوطواط (مصاص الدماء) علاج للجلطة
Author: النصرى أمين
Date: 05-26-2010, 02:33 AM
Parent: #16
اسماعيل يا دفعة
يازول مجموعة نظافة شنو الانا كنت مشترك فيها ..
ياخى دى حقتو انتو ..الطلبة المثالين ...
انا كنت عامل low profile ايام المدرسة تماما زى
حالى فى المنبر ده ..فى حالى شديد ما بلاوز لزول وما فى زول بلاوز لى ..
الحاجة الوحيدة البتزكرها وممكن تلمح اننى كنت طفل مشاغب ..
انا وزهير عوض الفنان (وكان يسكن فى شارع كبرى شمبات قصاد مدرسة بيت المال الابتدائية)
كنا عاملين فريق بتاع جيش ..
زهير بشيل كراع كرسى مكسور ويقيف فى نص الفصل وهو يحمل رشاش وانا ابدا اضرب على
الدرج بطريقة سريعة زى عازف بنقز ماهر ... عندها يبدا زملائنا الدخول للفصل و
يسمعون صوت الجى ام سى (الرشاش) يبدو يتساقطون كما فى الافلام ...
نبدا انا وزهير بالصراخ علامه الانتصار..
الايام ديك كل جمعة كان فى انقلاب ..
عليك الله ما زاكرة حديدية ...
ياخ انا بتزكر مرة من المرات واحد من الوطاويط دى وقع على الارض ..التفينا
حوله والله والله لن انسى ابدا منظر جسمه الذى يرتعش ويرجف بطريقة غريبة ...
منظره يشبه الفار اكثر من انه طائر (وماهو بطائر)
برضو بتزكر مرة كان فى مباراة فى كرة القدم ..فريق فيهو اسامه سكسك
والفريق التانى فيهو عادل الفار.. انا احرزت هدفين ..لكن كنت متكل
جنب القون المباراة كلها ..
|
Post: #18
Title: Re: الوطواط (مصاص الدماء) علاج للجلطة
Author: النصرى أمين
Date: 05-26-2010, 02:45 AM
Parent: #17
والله يا اسمارت الشوفان ده حيرنى عديل كده ..
كلها تلاته يوم بس وفعلا شعرت بالتغيير فى عمليه
الهضم و regularity (ما عارف دى يشرحوها كيف)
ياخ ده فيهو كمية من الالياف مبالغة .....
زمان اخدت فترة بستخدم فيها ميتاميسل ..
لكن الليلة امنت ليك بالشوفان ده ....
بعدين طعمه ..not bad at all
صاحبى المغربى قال لو واصلت فيهو كم شهر وزنك حينزل
|
Post: #19
Title: Re: الوطواط (مصاص الدماء) علاج للجلطة
Author: Tragie Mustafa
Date: 05-26-2010, 03:53 AM
Parent: #18
جايباهوا وغالبني اقبل بيه يالنصري
| Quote: صاحبى المغربى قال لو واصلت فيهو كم شهر وزنك حينزل |
الا كلامك شجعني!
شكرا لكم وفي ميزان حسناتكم.
|
Post: #20
Title: Re: الوطواط (مصاص الدماء) علاج للجلطة
Author: النصرى أمين
Date: 05-26-2010, 09:35 PM
Parent: #19
سلام يا تراجى...
والله امنت عديل بالشى ده ...
تلقيهو فى السوبر استور او فوود بيزك فى محل ال
bulk ..يمكنك تعبئته بنفسك فى الاكياس ..غالبا السعر ما حيتعدى دولارين تلاته ...
اعتقد فى نوعين تلاته منو ..انا اخترت ال oat quick حسب وصية المغربى ....
طريقة الاستعمال ..
كباية صغيرة فيها لبن دافى (او ساخن) تختى فيهو خمسة سته
معالق صغيرة بتاعت شوفان oat ومعلقة سكر (او عسل... او زى ماقالت اسمارت فواكه)
زى السيريال بالضبط ...
جربى ..والتزمى بيهو ..
وحتدعى لينا ....
نسيت برضو اقول ان نفس زولى المغربى قال لى لمن تمشى البقالة اشترى
معاك جزور جنزبيل ginger roots وبدا يوصف لى كيف استعملها ..لكنى
ماكنت مركز ..بالى كلو فى الشوفان ..
اشتريت الجنزبيل ..
اهو مرمى فى المطبخ ما عارف اعمل بيهو شنو ..
|
Post: #21
Title: Re: الوطواط (مصاص الدماء) علاج للجلطة
Author: smart_ana2001
Date: 05-26-2010, 11:45 PM
Parent: #20
| Quote: الهضم و regularity (ما عارف دى يشرحوها كيف) |
لازم تشرب معاه موية كتيرة( 8 كبابى فى اليوم) او ح يجيك امساك يفهمك حاجه.
|
Post: #22
Title: Re: الوطواط (مصاص الدماء) علاج للجلطة
Author: النصرى أمين
Date: 05-27-2010, 03:43 PM
Parent: #21
الغريبة يا اسمارت ..انو العكس هو الحصل لى ..
مما اضطريت skip it اليوم ..
الظاهر الواحد المكنه خفت وموزونه على الفول بالدكوة ..
اى حاجة تانية بتلخبت الحسابات ...
انا بتسائل ..محصول زى ده مفيد جدا جدا ..خاصة لناس السودان
والاسهالات قارضاهم قرض ..ليه ما بزرعوهو مع القمح ..
هو نبات _حسب كلامى زولى المغربى_ طفيلى ينمو حيث زراعة القمح
ولانه السودان بلد تنجح فيهو الطفيلية فانا بتوقع نجاح باهر للمحصول
لو الناس جربت زراعته فى نفس حقول القمح ...
شوال واحد بتاع بزور شوفان يدخل السودان وتانى الناس تبقى فى البتخارجهم منو..
اها فى البوست ده طلعنا بمشروعين ناجحين
الاول مزرعة ابوالرقيع
الثانى زراعة الشوفان فى السودان (الاقليم الشمالى..اذا ماغيرو الاسم)
|
Post: #23
Title: Re: الوطواط (مصاص الدماء) علاج للجلطة
Author: إسماعيل حميم
Date: 05-30-2010, 11:41 PM
Parent: #17
النصري يا حبيب
حكاويك تسربت إلى اعماق الذاكرة ونفضت عنها غبار الماضي
معظم دفعة بيت المال الثانوية العامة إنتقل لمدرسة المؤتمر الثانوية
وعدد قليل إنتقل إلى مدرسة الأهلية الثانوية أمدرمان أذكر منهم
أشرف بكار
أسامة سكسك
محمد عبدالله (مويه)
المرحوم/ عباس حبيب الله
بشير عمر بشير
جمال عبدالمتعال
مصطفي يحي عباس (من مدرسة ود نوباوي) *
تخريمة:
بتتذكر ود المرضي
___
* تتكون مدرسة بيت المال من نهرين شمال وجنوب
نسبة لاعمال تجديد مدرسة ود نوباوي تم إستقبال
نهرين بمدرسة بيت المال بإسم شرق وغرب
صادق الود
إسماعيل حميم
.
|
Post: #24
Title: Re: الوطواط (مصاص الدماء) علاج للجلطة
Author: النصرى أمين
Date: 05-31-2010, 02:26 AM
Parent: #23
سلام يا دفعة
| Quote: المرحوم/ عباس حبيب الله |
انا شوية ملخبت فى الحتة دى ..
كان معانا فى احدى المراحل (عام ولا عالى ..مامتزكر)
طالب كان لقبه عباس باعو ...وكان يمثل فى جنة الاطفال
هل هى نفس الشخصية ?
لو ماهو ..خلينى امسح الكلام قبلما نتسبب فى سوء فهم ..
هو فى زول بنسى احمد مختار المرضى(اسم ثلاثى كمان عشان تااااااامنو)
كان كارثة ماشة برجلين قبلما يروق وربنا يهديه ..
هل تزكر قصته مع استاذ احمد صديق (اظنه احد قادة الحزب الشيوعى فى السودان) لمن جلده
20 سوط وجا يردد بيت الشعر ....اذا رائت انياب احمد صديق بارزة فلاتظنن ان
احمد يبتسم ....
المرضى كان استاذ فى علم الترديف ..يستخدم كل الكتب خاصة كتاب الانجليزى
الصغيرونى داك ..man and the pan
كان بارع فى التمثيل عند الجلد يتظاهر بالالم عند كل سوط والفصل
كله يعلم انه مردف ..فقط من صوت السوط لمن يضرب الكراس تحت الرداء ...
يا حميم لو تابعتنى بودر بيك ..
كان فى واحد تانى برضو كارثة اسمو كباشى !!
|
Post: #25
Title: Re: الوطواط (مصاص الدماء) علاج للجلطة
Author: إسماعيل حميم
Date: 06-02-2010, 05:36 PM
Parent: #24
النصري يا دفعة يا عجوز
المرحوم عباس حبيب الله
من أولاد بيت المال كان ساكن على شارع الكبري
-بالقرب من منزل الدبلوماسي خالد عباس -
عليه الف رحمة نور توفي ونحن في الأهلية الثانوية
الزميل عباس محمد باعو من أولاد حي البوستة كان يمثل ضمن
فرقة جحا في دور بريقع احياناً سألت عنه قبل فترة عرفت انه بقى شيخ كبير
ود المرضي كان حكاية براهو
تتذكر قصته مع الأستاذ عبدالسلام ورش القميص بالحبر السائل
الآن على ما أعتقد هو أستاذ في أحدى الجامعات السودانية
وهو من خريجي الهند
كان واصلت كدا حا تغير مجرى البوست
بيت المال دي دايرة ليها بوست خاص
كل الود
إسماعل حميم
.
|
Post: #26
Title: Re: الوطواط (مصاص الدماء) علاج للجلطة
Author: النصرى أمين
Date: 06-02-2010, 08:00 PM
Parent: #25
يا دفعة
| Quote: كان واصلت كدا حا تغير مجرى البوست |
اغير ليك حنانو ..
دى واحدة من ميزات البورد ..انك تفعل ما تشاء ببوستاتك...
ولا يهمك ...
واصل ..واحتمال بعض من قراء البورد دفعتنا فى بيت المال المتوسطة
1975 حتى التخرج 1978
اها نواصل ...
شخصية تانية بتزكرها كويس جدا جدا وما اظن انساها ...
محمد حسن ..كان يسكن الملازمين ...قصاد ميدان السور فى الكورنر الجنوبى الغربى ..
كان لقبه محمد قسايا ....على جدته الداية المشهورة فى بداية القرن العشرين
تعرف ليه بتزكر محمد قسايا ده لقرابة الثلاثين عام ...
لم اره فيها ولم اسمع عنه اطلاقا ...
اتزكره جيدا بسبب ولعه وعشقه وغرامه للطحنية ...
نعم الطحنية .....
الطحنية بتاعت السمسم والسكر ...
محمد قسايا كان مستعد ان يتكلم عن الطحنية لساعات وساعات وساعات
لا يكل و لا يمل ....
كان يحكى لنا عن الطحنية بالسمنه والطحنية بالجبنة والطحنية بالفول .....
كنت استمع اليه واذهب البيت بحثا عن الطحنية وسعيا لذلك السر الغامض
الذى يجعل محمد حسن قسايا يتوه بها غراما....
ملحوظة ....
فطرت قبل شوية بفول وبيض وطحنية
الشخصية الجاية
النصرى احمد على النصرى (الحلوف)
|
Post: #27
Title: Re: الوطواط (مصاص الدماء) علاج للجلطة
Author: إسماعيل حميم
Date: 06-04-2010, 00:01 AM
Parent: #26
Quote: اغير ليك حنانو ..
دى واحدة من ميزات البورد ..انك تفعل ما تشاء ببوستاتك...
ولا يهمك ... |
يا زول قبلنا
أهااا قبل الحلوف
أرجع ليك لي محمد الحسن "قسايا"
فقط سقط سهواً من الذاكرة فهو من مجموعة الأهلية السابقة الذكر
بالمناسبة هو قريب محمد ؟؟ البدوي المبارك " دفعة بيت المال" وإبن أخ الدكتور والمؤلف
صاحب مسرحية ومسلسل الدهباية – علي البدوي المبارك
أخر مرة إلتقيته قبل أكثر من عشرة أعوام !!!
أما النصري أحمد على مستقر في السعودية - الرياض – والتواصل بيننا مستمر
نلتقي دوماً في إجازته السنويه وتربطنا علاقة نسب.
كل الود
إسماعل حميم
.
|
Post: #28
Title: Re: الوطواط (مصاص الدماء) علاج للجلطة
Author: إسماعيل حميم
Date: 06-08-2010, 05:26 PM
Parent: #27
وين يا شاب
ساكي الشوفان
إسماعل حميم
|
Post: #29
Title: Re: الوطواط (مصاص الدماء) علاج للجلطة
Author: عبد العزيز عبدالكريم نهار
Date: 06-08-2010, 09:25 PM
عليك الله يا النصري من الشوفان بتاعك ده رسل شوية لمبارك شمبول
|
|