Post: #1 Title: شوفي الزمن يا يمه ساقني بعيد خلاص♫♪♫♫♪♫ Author: النصرى أمين Date: 05-03-2010, 03:24 AM Parent: #0
صفية بدوى سليمان كركساوى
Post: #2 Title: Re: شوفي الزمن يا يمه ساقني بعيد خلاص♫♪♫♫♪♫ Author: محمد الجزولي Date: 05-03-2010, 05:25 AM Parent: #1
الله يعدلها عليك يانصري زي ماعدّلتو لي صباحي في -الصين - دي ..
ولك إمتناني الصافي
Post: #3 Title: Re: شوفي الزمن يا يمه ساقني بعيد خلاص♫♪♫♫♪♫ Author: إسماعيل حميم Date: 05-03-2010, 11:09 AM Parent: #2
النصري يا حبيب
رد الله غربتك بطل الجرسة يآاخي . . حاسي بيك والله لا قادر تجي ولا قادر تقعد هناك
رحم الله جميع الأمهات الاحياء منهم والاموت
صادق الود إسماعيل حميم
.
Post: #4 Title: Re: شوفي الزمن يا يمه ساقني بعيد خلاص♫♪♫♫♪♫ Author: النصرى أمين Date: 05-03-2010, 06:12 PM Parent: #3
سلام يا محمد الجزولى .. لمن وصلت امريكا كانت تسالنى(رحمة الله عليها) ياود امى انت كويس؟ بلدكم دى قالو خطرة خلاص .. كنت ارد عليها يا حاجة البلد تمام ومافى خطورة الساعة ستة مساء برجع البيت وما بطلع منو تانى .. كنت اقول ذلك وانا سايق تاكسى بالليل ومعرض للموت فى كل لحظة ..(تعرضت مرة واحدة للنهب المسلح) كنت اتكلم معها بالتلفون بعد منتصف الليل وانا اتلفت يمين شمال خوفا من تجار المخدرات والمومسات و فى اخطر المناطق فى نيويورك (42nd ave midtown manhattan قبل ان يتم تنظيف المنطقة فى منتصف التسعينيات ...
كنت اكذب عليها (وماتعودت ذلك) لكنها الظروف ورافة بها ..
اهديك الاغنية الحنينة دى(زكريات الطفوله) بمناسبة عيد الام
Post: #5 Title: Re: شوفي الزمن يا يمه ساقني بعيد خلاص♫♪♫♫♪♫ Author: النصرى أمين Date: 05-03-2010, 06:33 PM Parent: #4
كيفك يا اسماعيل؟ ربنا يرحمها حاجة صفية .. كانت امراة صبورة ..لا ازكر اننى شاهدتها فى حالة غضب عارم ... اظنها اخدت الخصال دى من والدها رحمة الله عليه بدوى كركساوى كان راجل بسيط جدا ..حافظ للقران .. بعد ان تعرض لحادث لم يستطيع المشى لاكثر من 20 عام .. اكثر من 20 سنة يااسماعيل وحاجة صفية واقفة فى خدمته (فهو بنته الوحيدة) بعد ان تقدم به العمر ..قامت بتسكينه معنا فى البيت .. كانت تقوم بخدمته بصورة شخصية .. كنا (او على الاقل انا ) نتجنب الاكل معه لان مكان ماكله هو نفسه مكان قضاء حاجته.. شفت الكعوبية دى كيف ... لكنه الجهل وعدم الدراية بمعانى الوفاء والعرفان ... لو كانت على قيد الحياة لكنت على استعداد لحملها على كتفى والطواف بها حول العالم ..
Post: #6 Title: Re: شوفي الزمن يا يمه ساقني بعيد خلاص♫♪♫♫♪♫ Author: Sidgi mattar Date: 05-03-2010, 08:24 PM Parent: #5
Quote: لو كانت على قيد الحياة لكنت على استعداد لحملها على كتفى والطواف بها حول العالم ..
تسلم يا اخى النصرى وربنا يرحمها ويغفر لها وربنا يوفقك يسهل ليك بقدر وفائك هذا
اكثر من الدعاء لها وما تنسى التصدق على روحها الطاهره
مودتى
Post: #7 Title: Re: شوفي الزمن يا يمه ساقني بعيد خلاص♫♪♫♫♪♫ Author: عبير خيرى Date: 05-03-2010, 10:22 PM Parent: #1
. شوفي الزمن يا يمة ساقني بعيد خلاص جرعني كاس دردرني واتغربت واتعذبت يا يمة وريني الخلاص
يا يمة يا نور الصباح وكتين يطل يا يمة يا بدري البشع دايماً بهل يا يمة يا فيض الحنان الما كمل وا شري يا زينوبة ولدك في دروب الشوق قتل محروم من الحب والمحنة وراك هبل
يا يمة يا نغما حنين بالشوق يجن وأفكاري فيهو بيرتعن ودمعة شاري بينزلن بذكرك يا يمة في الدغش النسايمو يهبهبن قايمي الصباح متكفلتي وشايلة الحليلة على المراح جبتي اللبن لي بي انشراح والساعة ديك يا دابو ديكنا بدا الصياح والطير صغارو يغردن
بتذكرك يا يمة في ساعة الهجير صالاكي نار الدوكي عست لنا الفطير رشيتي قلتي بجوهو خير بتذكرك يا بسمة الطفل الغدير وقت الخلوق ترقد تنوم أسهر براي أرعى النجوم والشوق يلف جنحينو بي فوق لي يحوم وأحلف بي اسمك في الخيال طيفك كمان بي فوقو جال اتمنى لو لحظات يدوم لكني فجأة ألقاهو زال
يا يمة يا بحر المودة وكت يفيض يا يمة يا شعلة أمل زادت وميض يا يمة يا عنقود كلام منضوم غليد بتذكرك يا يمة وقت الناس يجونا من البلد ناعم ترابها على بسيماتكم رقد ريحة التمر فوق الهدوم دول الخضار خالص لبد والشوق أوانو بيشتعل كان ظني فيهو يكون خمد بتذكرك يا يمة عند ناس قالوا قايمين البلد رصو الهديمات عدلو ركبو اللواري وقبلوا خلوني وحدي بلا أنيس كيف انفرادي اتحملو شالوا السلام انا مني ليك يا يمة ساعة يوصلوا ويقولو ليك شفناهو في بلد الأمان يا يمة رسلي لي عفوك ينجيني من جور الزمان
Post: #8 Title: Re: شوفي الزمن يا يمه ساقني بعيد خلاص♫♪♫♫♪♫ Author: إسماعيل حميم Date: 05-03-2010, 10:43 PM Parent: #7
عبير يا عبير شكراً كتير على النص الكامل
إسماعيل حميم
.
Post: #9 Title: Re: شوفي الزمن يا يمه ساقني بعيد خلاص♫♪♫♫♪♫ Author: عبد العزيز عبدالكريم نهار Date: 05-03-2010, 10:46 PM Parent: #7
النصري والله رغم البعاد فالشوق يحطم المسافات ,,, مشتاقين يا اخي وكتر خير بكري اللي جمعنا بعد 22 عاما ... we will never forget Khartoum poly technic , nafkhoo , Alnagar واعتقد الصورة الموجودة في بروفايلك تخص الدفعة مبارك شمبول طارق حسيب نبيل عوض المرحوم امين يةسف احمد محمود الصائغ لطفي
Post: #10 Title: Re: شوفي الزمن يا يمه ساقني بعيد خلاص♫♪♫♫♪♫ Author: النصرى أمين Date: 05-04-2010, 03:10 AM Parent: #9
شكرا يا عبير على ايراد النص كاملا لحظة وفاء لزينب (والدة شاعر النص) ووالدتى وكل الامهات ..
Post: #11 Title: Re: شوفي الزمن يا يمه ساقني بعيد خلاص♫♪♫♫♪♫ Author: النصرى أمين Date: 05-04-2010, 03:21 AM Parent: #10
سلام يا عبدالعزيز الف دشليون حمدلله على سلامة الظهور فى البورد.. هل تصدق انو انا براى من الاضافية البعافر فى البورد ده كل الباقيين يظهرو ويختفو ..اخرهم الزبير الذى اختفى فى ظروف غامضة..
الصورة دى فى عام 1983 يعنى نحن كنا برالمة ولم يظهر بعد ناس شمبول ولطفى وعلى التلب و المرحوم امين...
احمد محمود دفعتنا بس ما ظاهر فى الصورة (غالبو بكون بشترى ليمون للجكس وقتها)
فى الصورة حامد شاش ومصطفى برش حسين الشين عادل بشارة محمد محمود (ابشنبات) عصام كاو مهلب وخلف الله وكمال وفخرالدين حسن عوض (معانا فى البورد لكن مافاضى من مطاردة السيد محمد الميرغنى) ايضا الشاذلى واسامة ومرتضى ساتى محمد كمال وخلف الله الصورة عمرها 28 سنة هل تصدق ذلك ؟ عندى فيديو بتاع استقبال دفعة 1985 فى مسرح امبدة والفنان شرحبيل احمد الفيديو ده حانزله يوم الايام وحتشوف العجب ...
Post: #12 Title: Re: شوفي الزمن يا يمه ساقني بعيد خلاص♫♪♫♫♪♫ Author: النصرى أمين Date: 05-09-2010, 03:07 PM Parent: #11
الاحد 9 مايو .... ارفع السلامة الان واتصل عليها واسالها عن صحتها واطلب عفوها ورضاها واذا كانت قريبة منك اذهب الى السوق واشترى ليها هدية صغيرة ومعبرة
فلنفعل ذلك اليوم فنحن شعب لا يعرف (ولا يريد) ان يعبر عن عواطفه ...
افعلو ذلك اليوم اعزائئ فسوف ياتى يوم تندمون فيه انكم لم تفعلو
Post: #13 Title: Re: شوفي الزمن يا يمه ساقني بعيد خلاص♫♪♫♫♪♫ Author: عبدالمجيد الكونت Date: 05-09-2010, 04:25 PM Parent: #12
سلام ليك يا النصري
وتحية ليك ولي اماتنا كلهن
Post: #14 Title: Re: شوفي الزمن يا يمه ساقني بعيد خلاص♫♪♫♫♪♫ Author: الامين موسى البشاري Date: 05-09-2010, 04:33 PM Parent: #13
النصـــــري أمين الله يفتحها عليك دنيا وأخـــرى يا رب ويرد غربتنا دي والله.. ويرجعنا لي امهاتنا بالســـــلامة يا رب
Post: #15 Title: Re: شوفي الزمن يا يمه ساقني بعيد خلاص♫♪♫♫♪♫ Author: بدر الدين اسحاق احمد Date: 05-09-2010, 04:49 PM Parent: #14
ادفع كنوز الدنيا كلها وانال حظوة مثــل مـا للاخرين بالتمتع باغلى الحبائب
عليها الف رحمــة وبركة وسلام ...
ده باب من ابواب رحمة ربنــا من حرمــه فقد حرم كل خيرا كثيرا ..
Quote: ارفع السلامة الان واتصل عليها واسالها عن صحتها واطلب عفوها ورضاها واذا كانت قريبة منك اذهب الى السوق واشترى ليها هدية صغيرة ومعبرة
النصرى ما تبالغ ما كل الناس قدر جرعاتك ده..
Post: #16 Title: Re: شوفي الزمن يا يمه ساقني بعيد خلاص♫♪♫♫♪♫ Author: النصرى أمين Date: 05-10-2010, 00:52 AM Parent: #15
لا حولا .... الاخ صدقى مطر ... ياخ والله اسف شديد... لم اتعمد ان اتجاهل مداخلتك .. ما عارف حصل لى شنو ولم ارد عليك ليه.. مع اننى قرات المداخلة فى نفس اليوم ... مرة تانية معليش وده درس لينا... الزول تانى شوية يعمل حسابو ويراجع مداخلات الاعضاء حتى يرد عليها بطريقة مناسبة ..
شكرا على كلماتك الطيبة وربنا يرحمنا والدينا ووالدى كل المومنين
Post: #17 Title: Re: شوفي الزمن يا يمه ساقني بعيد خلاص♫♪♫♫♪♫ Author: النصرى أمين Date: 05-10-2010, 01:15 AM Parent: #16
الاخ عبدالمجيد الكونت شكرا للفيديو المعبر خاصة منظر الجماعة القاعدين فى البرش..
والدتى الله يرحمها كان لها شلوخ مثل شلوخ السيده الفاضلة الظاهرة فى الفيديو ... او كما يظهر فى جزء الصورة ادناه ..
Post: #18 Title: Re: شوفي الزمن يا يمه ساقني بعيد خلاص♫♪♫♫♪♫ Author: النصرى أمين Date: 05-10-2010, 01:19 AM Parent: #17
الاخ الامين
Quote: النصـــــري أمين الله يفتحها عليك دنيا وأخـــرى يا رب
Post: #19 Title: Re: شوفي الزمن يا يمه ساقني بعيد خلاص♫♪♫♫♪♫ Author: النصرى أمين Date: 05-10-2010, 01:29 AM Parent: #18
يابدرالدين كيفنك؟
Quote: النصرى ما تبالغ ما كل الناس قدر جرعاتك ده..
فى ناس كتار ما منتبهين للكنز العندهم ومعتبرينو تحصيل حاصل .. وماحيعرفو قيمتو الا يفقدوه ...
الام يا بدرالدين اغلى حاجة فى الدنيا وماكتير عليها لو الواحد شوية طلع من الاسلوب بتاعو(الجامد المتحجر) واشترى ليها هدية صغيرة تعبيرا عن الشكر والعرفان.. يعنى مثلا شريط مدائح تحبها ...راديو صغير لسماع الاخبار ..محفظة جديدة.. زهور ...اى حاجة ياخ اى حاجة ...
بعدين تعرف المشكلة شنو يا بدرالدين فى ناس بتفترض انها طالما قامت بالواجب من تحويل وارسال مصاريف خلاص ماقصرت ...وكونو والدتهم ما محتاجة حاجة دورهم انتهى وينسو الجانب الروحى من الموضوع ....
ملحوظة لى فترة ما عملت bold لشئ كتبته لكننى الان اشعر باهمية الكلام
Post: #20 Title: Re: شوفي الزمن يا يمه ساقني بعيد خلاص♫♪♫♫♪♫ Author: عبد العزيز عبدالكريم نهار Date: 06-18-2010, 09:36 PM Parent: #11
Quote: وين الفيديو يا النصري ... منتظرين الذكريات يا حبيب
