جريدة "الرأى العام":- لمن يجى الامر لقروش البترول ما تكلفتونا ساى!

لانى فاضى وجاهز بالكالكوليتر ...


قريت اخبار تقارير عائد صادرات البترول فى عدة جرائد
استوقفتنى طريقة تعامل صحيفة الراى العام مع الارقام



اليكم الخبر كما جاء لديهم

(263.82) مليون دولار عائد النفط لشهر مارس وفبراير
الخرطوم: عبد الرؤوف عوض
بلغت جملة عائدات النفط لشهري فبراير ومارس (263.82) مليون دولار،
وبلغت تحويلات حكومة الجنوب (85.33) مليون جنيه من صافي عائدات الصادر والخامات المستخدمة في المصافي.
وسجلت عائدات صادرات البترول لشهر مارس (90) مليون دولار،
فيما بلغ لشهر فبراير (57.45) مليون دولار صافي العائدات،
وبلغت جملة عائدات الخام المستخدم بالمصافي المحلية لشهر مارس (66.82) مليون دولار،
مقارنة بـ (95.94) مليون دولار لشهر فبراير، ليصبح نصيب حكومة
الجنوب من عائدات الصادر في مارس (34.98) مليون دولار، وفي فبراير (15.31) مليون
دولار ونصيبها من عائدات الخام المستخدم بالمصافي المحلية لشهر مارس (19.52) مليون دولا
ر، فيما بلغ نصيبها في فبراير (15.52) مليون دولار. وكشف د. الطيب ابو قناية وكيل وزارة
المالية في اجتماع اللجنة المشتركة لمراقبة وحساب قسمة صافي عائدات البترول لشهري فبراير
ومارس أمس عن سداد نسبة (58%) من جملة متأخرات حكومة الجنوب للعام 2008م بنهاية ابريل الماضي

انتهى
ملحوظة الارقام بالازرق صحيحة
وبالاحمر خطا
حسب التقرير ده فاجمالى الدخل 310 مليون وليس 263
يعنى 47 مليون اتلحست ..

نعم كثير من الاحيان عند طباعة الارقام الانجليزية فى وسط كتابة عربية تتشقلب فى اماكنها
ولكن لماذا لم تتشقلب باقى الارقام فى التقرير؟

ايضا
عائدات المصافى لشهر فبراير يقولون انها 95.94$ والرقم الصحيح هو 59.94
هذا الرقم غير مشقلب
هذا الرقم خطا فى التقرير
حتى لو الشقلبة بتحصل عليكم بشقلبة المشقلب حتى يستعدل
ومراقبة ومراجعة طريقة طباعة الارقام

صحصح يا عبد الرؤوف عوض
وركز معانا
مع انها ما فارقة شديد
قروش بترول والشعب ما شاعر بيها

اها نجى للارقام زاتها

دخل جمهورية السودان من البترول لشهر مارس 150 مليون...
(90 مليون صادر و 60 مليون بيع محلى)



مستغرب جدا انا

كيف 150 مليون دولار تمشى ليها دولة وحكومة زى حكومة السودان
لمدة شهر ....
ال 150 مليون دى براحة ممكن تروح بدلات سفر للمستشارين والوزراء

فى اكتوبر 2008 العائد كان اكتر من 600 مليون دولار فى الشهر

فى مارس 2009 العائد 263 مليون دولار....


ما عارف ليه الحكومة بتطمن فى روحا وفى الناس

دى كارثة ماشا على رجلين ..



ياخى لو العامل البسيط نقصو ليهو مرتبو للنص
بيتو حيتخرب

خلى دولة فى حجم حكومة السودان

امبارح كنت بتونس مع اخونا حاتم وجات سيرة الحالة البائسة التى
يعيشها العالم اليوم ..
قال لى انه لو لم يستطع النوم بالليل(لاى سبب) فانه يتخيل انه
تحصل على 20 مليون دولار ويبدا فى صرفها ..عندما يتم صرف
المليون الاول يكون فى سابع نومة..
وعدته باننى ساجرب هذه الطريقة السحرية التى يعانى منها الناس
السقد(بضم السين والقاف)


المهم ..

عندنا 150 مليون دولار دخل الحكومة(بالاضافة لشوية قروش من باقى الصادرات)

وعندنا 30 يوم لصرفها ....
بمعدل 5 مليون دولار فى اليوم ..

وعندنا 30 مليون مواطن(غير سكان الجنوب)
ولمن نقسم 150 مليون دولار على 30 مليون مواطن
يبقى نصيبه كل مواطن 5 دولار فى الشهر


فى زول قرب ينوم؟
ولا نواصل ؟

وعشان النومة تكون لزيزة وبدون هضاريب ..سنفترض ان الاموال
دى فى امان وبعيدة من الفاسدين والمفسدين وانها فى رعاية "الايادى
المتوضئة"
يعنى ال 150 دولار حتنصرف فى اوجهها الصحيحة

اها نبدا بمنو؟
نبدا بمنو؟
نبدا بمنو؟

اوكى نبدا بقوش لانو مهم جدا لحفظ الامن

10 مليون كفاية؟

اوكى

20 مليون لقوش ..
يصرف منها على جيشه الكبير الدحر بيهو المرتزقة لمن
دخلو امدرمان لانو جيشنا طبعا قام بعملية الاستدراج
وجيش قوش هو الحارب فى الشوارع..(والدليل الولو)

وبرضو قوش حيصرف على مكاتب الامن فى الخارج والسفارات
وشراء الشرفانيين من المعارضين
ولاننسى ميزانية المركز السودانى للخدمات الامنية(يسمى احيانا بالصحفية)
وميزانية "التعر***ة" للامريكان ...
وميزانية تجميل وجه السودان عند البسوى والمابسواش ..

اها دى عشرين مليون طشت
فضلت 130 مليون

اها بعد قوش ..ندى الوزراء و وزراء الدولة
والدستوريين والمستشارين والولاة والحكام و وزراء
الولايات وحكام الولايات وكبار رجالات الدولة والولايات
والمحافظات ..
وللاختصار نقول كل الناس الفوق وما تحت

وحسب تقديراتى الشخصية هم كما يلى

وزراء ووزراء دولة و وظائف درجة سفير =8342وظيفة

حكام ولايات و وزراء ولايات 4626

مستشارين رئيس جمهوريه 1320
رؤساء شركات سيادية 3562
سفراء وناس بدرجة سفراء 3546
مستشارين بسفارات خارجية 6542
مدراء ادارات حكومية 6541
وكلاء وزارات ووزارات دولة و ولايات و محافظات 65489
باختصار العدد يزيد عن 150 الف وظيفة درجة اولى

نديهم كم؟
نديهم كم؟
نديهم كم؟


70 مليون دولار كفاية؟
خلاص نخليهم 80 مليون دولار

يكون كده فضل لينا 70 مليون دولار نصرف بيها البلد للشهر ده

ما بطال
ماشين كويس

اها فضل لينا 70 مليون دولار...
نوزعها كيف!!

ده سؤال ياخ !

نوزعها على النفرات طبعا

نفرة دعم البشير
نفرة دعم السودان
نفرة دعم الانقاذ
نفرة دعم الحركة الاسلامية
نفرة دعم تكفير ياسر عرمان
نفرة دعم إسحق أحمد فضل الله
نفرة دعم هيئة علماء السلطان
نفرة دعم التوجه الحضارى
نفرة دعم متمردى تشاد
نفرة دعم القضاء على الخنازير فى السودان
نفرة دعم الهيئة القومية للكهرباء فى محنتها
واخيرا وليس اخرا
نفرة دعم النفرات ...

وهكذا اتلحست ال 70 مليون












وما جانا نوم ...

47 مليون دولار الفرق الناتج من خطا الصحيفة

هل نطمع فى اعتذار للقارئ المسكين؟


بالتاكيد لا ...

من قبل قبضناهم متلبسين بسرقات ادبية

لا اعتزرو ...

ولا هببوهو لينا...

الحاجة الوحيدة العملوها ... خارجو السارق من وظيفته

اها نجى نوزع قروش حكومة الجنوب

دخلهم الكلى لشهر مارس 35 مليون دولار ...
دى حسى يوزعوها كيف؟

5 مليون مصنع بيرة بارده

3 قناة فضائية جديده لنج

15 مليون دعم لمنسوبى الحركة الشعبية





نعست
ماشى انوم

حبيبنا النصري سلام وشوق شديد
ليك والاسره والباقين..
قلت اسلم واقول ليك انا لي مده
في المخروبه دي ومتجنب اتنين
الجرايد والتلفزيون عشان انوم..
وبرضو مافي نوم..الله يجازي سد مروي
والعملها فينا..ياحليل سانت كاثرينز
هسع زي الوقت ده الباربيكيو شغال تش..
والزهجه نفكها في الفولز..
اخبار فرص العمل في الشمال شنو؟؟ سمعنا
في لي أوف كتير!!!!


تحياتي ومودتي لكم جميعا

اين محررى الراى العام الذين يتواجد عدد منهم معنا فى هذا المنبر

سلام يا عزو
كامل تضامنا معك فى قطوعات الكهرباء
عرفت انها ايام صعبة جدا جدا على الناس
بس ان شاء الله تكون استمتعت برؤية الاهل والحبان
المناخ الايام دى جميل جدا
لا حر
لا برد
شوية مطرة شكشاكة

بالنسبة للتوظيف هنا فى البرتا..
الوضع اتغير تماما مما كان عليه قبل
سنة واحدة ..
عشرات الالاف من الوظائف تم الاستغناء عنها...
واعلانان الوظائف الجديدة ليست كثيرة والمنافسة
عليها شديدة...
تقريبا كل القطاعات اتعرضت لتقليص التوظيف
وظائف قيادية
او متوسطة
او اولية..

الحاجة الكويسة انو الامور رجعت طبيعية بالنسبة
للاسعار ..فالايجارات اصبحت متوفرة جدا جدا وباسعار
معقولة شديد واسعار وقود مستقرة حول 75 الى 85 سنت
للليتر الواحد ...

برغم ذلك ما زلت على رأى انو البرتا افضل من اونتاريو...
على الاقل نحن هنا فينا باقى "رقشة" ولم تتعرض الولاية لكارثة مثل
كارثة صناعة السيارات التى شلت اونتاريو..
ذهبت لسانت كاثرينز قبل عدة اسابيع والوضع الوظيفى غير مطمئن اطلاقا
هل تصدق حتى Sitel بدات تتخلص من الموظفين..
كنصيحة اخوية لمن ترجع من السودان ..تعال بجاى ..بس اوع من ادمنتون
فهى سانت كاثرينز البرتا ..
تحياتى
ونسمع منك

الاخ عوض

مامحتاجين رائهم


بس ما يكلفتونا تانى

لانو فى ناس زى كده قاعدين ليهم بالمرصاد والكالكوليتر ..

على الاقل لغاية ما يفرتكو لمة "الصحفيين الكيزان" دى ...

ويبقو زى باقى الجرائد
نص كيزان ونص شبه كيزان

النصري امين
تحياتي يا رجل
للاسف الفهم العام في الشارع السوداني للتعامل مع هذا الشان مقولة:
((شهرا ما عندك فيهو نفقة ما تعد ايامو))

سلام يا معاذ
وينك و وين كتاباتك النارية ديك؟


فعلا ..
الخبر كان ثانوى ولم يكن من العناوين البارزة
والناس ما اهتمت بيهو خالص ..
حتى هنا فى المنبر مافى ولا حتى بوست واحد انكتب حوله..

اكيد سبب عدم الاهتمام انو الناس زى ماقلت ..
شهرا ما عندك فيهو نفقة ما تعد ايامه..
مع انو خطير جدا جدا جدا


وده تاكيد انو الشعب لم يشعر بتغيير للافضل نتيجة
لصادر البترول ..
نفس المعاناة واشد
نفس العذاب ..
ونفس القهر ..

لا شئ يدعو الشعب لمراقبة ارقام الصادر
فبالنسبة لهم لو الصادر 800 مليون او 150 مليون
لن يكون هناك تغييير ..
الحال سيظل نفس الحال
قمة الياس و الاحباط

من حسنات البترول القليلة
علاج الاطفال المجانى فى المستشفيات
عدم منع التلاميذ الغير قادرين على دفع الرسوم من الجلوس من الامتحان..
غسيل مجانى لمرضى الكلى..
وغيرها من الاشراقات ..هنا وهناك ...
ولكن الحال بصورة عامة ظل كما هو بالنسبة لغالبية ابناء
الشعب ..


الان وبعد نقصان الدخل بمقدار النص ..
نتوقع ان تزيد معاناة الجمهور الى الضعف ..

النصرى امين
تحياتى
ربنا يدينا اجازة مماثلة يارب (نتمناها منى )
موضوع جيد والله وملاحظات دقيقة
تحياتى للاسرة

يا طلعت راجياك اجازة مدنكلة
مش زى حقتى ام 3 اسابيع
بس نصيحتى ليك
جهز قروشك وجوازك
وعلى السودان طوالى

الف دولار للاسبوع
لكن حتستمتع شديد




بالنسبة لاخبار صادر البترول
والله مستغرب لعدم اهتمام الناس بيهو
حتى الجريدة لم تكلف نفسها عناء مراجعة الارقام قبل نشرها
ولم تهتم بان تصحح نشر معلومات مغلوطة
لانه لا يهمها ولا يهم القارئئ ولا يهم المواطن
هى ارقام فى ورق
لا تغنى من جوع
ولا بتسقى عطشان
ولا بتولع لمبات

لا مبالاة مبالغ فيها

كيف تعاملت جريدة الصحافة مع الارقام

الأربعاء 6 مايو 2009م، 12 جمادي الأولى 1430هـ العدد 5695
الخرطوم:الصحافة
سجلت عائدات صادر البترول لشهر مارس ما قيمته 90 مليون دولار
مقارنة بـ 47.54 مليون دولار صافي عائدات الصادر لشهر فبراير،
بينما بلغت جملة عائدات الخام المستخدم بالمصافي المحلية لشهر
مارس 66.82 مليون دولار مقارنة بـ 59.94 مليون دولار لشهر فبراير،
ليصبح نصيب حكومة الجنوب من عائدات الصادر لشهر مارس 34.98 مليون،
وفي شهر فبراير 15.16 مليون دولار، ونصيبها من عائدات الخام المستخدم
بالمصافي المحلية لشهر مارس بلغ في جملته 19.52 مليون دولار فيما بلغ
نصيبها في فبراير 15.52 مليون دولار.
وكشف وكيل وزارة المالية الدكتور الطيب ابو قناية في اجتماع اللجنة
المشتركة لمراقبة وحساب وقسمة صافي عائدات النفط لشهري فبراير ومارس
أمس، ان جملة التحويلات للولايات المنتجة في شهر مارس بلغت 2.48 مليون
دولار مقارنة بـ 1.56 مليون هي جملة ما تم تحويله للولايات المنتجة في شهر فبراير.
واعلن ابو قناية عن سداد 58% من جملة متأخرات حكومة الجنوب العام 2008م
بنهاية ابريل المنصرم. مبينا ان التحويلات المباشرة لحكومة الجنوب في شهر
مارس بلغت 74.22 مليون دولار، فيما بلغ الصرف المباشر والتحويلات المباشرة
لحكومة الجنوب في شهر فبراير 48.23 مليون دولار بفائض قدره 11.78 مليون دولار.
وبلغت جملة المبالغ التي تم تحويلها لصندوق دعم الوحدة في شهر مارس 2.894
مليون دولار مقارنة بـ 4.733 مليون دولار تم تحويلها للصندوق في فبراير.
من جانبه، اكد وكيل وزارة المالية بحكومة الجنوب سلفاتور مبيورديت، على مستوى
التنسيق في الاهداف بين اعضاء اللجنة مشيدا بدقة الارقام وشفافية حسابات اللجنة
في توزيع الانصبة.

جريدة الوسط الاقتصادى
الثلاثاء, 05 مايو 2009 06:17
(90) مليون دولار عائدات صادرات البترول لشهر مارس
الخرطوم: هنادي الهادي
...حققت عائدات صادارات البترول لشهر مارس المنصرم قيمة (90) مليون دولار
مقارنة بـ(47,54) مليون دولار لشهر فبراير، بزيادة (43) مليون دولار، وقالت
اللجنة المشتركة لمراقبة وحساب وقسمة صافي عائدات البترول إن جملة عائدات الخام
المستخدم بالمصافي المحلية لذات الشهر بلغت (66,82) مليون دولار، بينما بلغت
لشهر فبراير (59.94) مليون دولار، وبلغ نصيب حكومة الجنوب من عائدات الصادر
(34.98) مليون دولار لشهر مارس و(15.31) مليون دولار لشهر فبراير، ومن عائدات
الخام المستخدم بالمصافي المحلية (19.52) مليون دولار لشهر مارس و(15.52) مليون
دولار لفبراير.واعلن وكيل وزارة المالية والاقتصاد د. الطيب ابوقناية ان جملة
التحويلات للولايات المنتجة لشهر مارس بلغت (2.48) مليون دولار مقارنة بـ(1.65)
مليون دولار لشهر فبراير، وكشف الوكيل في اجتماع اللجنة المشتركة لمراقبة حساب
البترول امس عن سداد 58% من جملة متأخرات حكومة الجنوب للعام المنصرم، وقال ان
التحويلات المباشرة لحكومة الجنوب بلغت (74.22) مليون دولار، فيما بلغ الصرف
المباشر والتحويلات المباشرة للجنوب لشهر فبراير (48.23) مليون دولار بفائض قدره
(11.78) مليون دولار، واشار الى تحويل مبلغ (0.63) مليون دولار لمنطقة ابيي وفقا
للبروتوكول بواقع 2% بالتساوي لكل منطقة، مقارنة بـ(1.03) مليون دولار حولت
لمنطقة ابيي لشهر فبراير بواقع ذات النسبة لكل منطقة من ولايات جنوب كردفان و
واراب، دينكا نقوك، منطقة المسيرية. واكد ابوقناية ان جملة المبالغ المحولة
لصندوق دعم الوحدة لشهر مارس بلغت (2.894) مليون دولار مقارنة بـ(4.733) مليون
دولار لفبراير