Post: #1
Title: نــداء لذوي القلوب الرحيــمة...حالة تقطّع القلــب
Author: سجيمان
Date: 09-18-2007, 06:35 PM
Parent: #0
في زول في المنبر دا هنا..... اول حرف من اسمو....باء... باء بقر
وما بجيب اسمو
خايف البوبار يفسمو
زعل واتحرق في شان انا قلت موقع سودانيزونلاين فعلا يستحق يرشحوهو لجائزة حريات النشر في البوسطي الكاتبو ابو هريرة زين العابدين
باللوال قبل علي في صمة خشمي وقال لي يا سفيه..... قلت معليش اخليهو لي الله العارف السفيه منو فينا.... تاني وصفني بالمغفل قلت معليش يمكن يكون قايل نفسو تفتيحة وانا عارف هو يخربو لا تفتيحة ولا شيتين.... بقي لي في تولاتي قدر ما انضم تخفس علي ويشتمني... بشتيمة ماها في.... اخر حاجة بهتني وقال لي" امي"..... دي دخلت علي وحات الله... وحات الله انا لا امي ولا حاجة... هوي ها.... عاين جاي .. ما تشوفني كدي... والله الانقليسي العندي انت ما عندك... ولا كلكم القاعدين في امريكا ديل عندكم.... وحات الله داك الليلة لميت لي في خواجة امريكاني ضهبان بالسوق العربي وشبكتو ليك انقليسي ونضم كبار خليتو فاتح خشمو يعاين لي ساكت... حتى نورالدائم ود دفع الله كان ماشي معاي حلف علي علا اخلي الزول قال الخواجة حننو وحات الله لو ما حلف علي دفع الله كنت لي حسي قاعد انضم فوق الخواجة داك... اتاريهم الامريكان ديل يخربن ما بيعرفو انقليسي ...نحن خايفين منهم ساكت..... الواحد قدر ما يتواضع تجبروهو وتمرقوهو من طورو تخلوهو يتبوبر..في رمضان دا.... اها النقولك قوله انا لي حسي من كنت بقرا في الاوسطى ما دقوني في الاسبلينق غير ستة مرات بس.. انت دقوك كم مرة؟.... انت تلقاك في حصة الاسبلينق كنت تمسك حنكك وتقول ضرسي متاورني وتشيل دفتر العيادة وتزوق من الحصة.. انت قايل اللمور دي نحن ما عارفنها؟....وقالو انت حسعتية في امريكا دي وقت تمشي المطعم عشان تاكل ما بتعرف تقول شنو بالانقليسي.... كان جيعان ومشيت وداير جداد تاكلو ..تطلع فوق الطربيزة وتقعد تبطبط بايديك وتقبل علي الجرسون وتقول لو.. " كوككووووووك" يعني داير جداد....النوريك ليها عملن لي الله اسمها chicken......chicken.....اها شفتا الكومبوظيشن دا كيف؟....عشان تامن.....وبعدين تعال هنا.. مالك يا جنا بتطلع فوق الطربيزة وتبطبط؟؟؟......ما تبطبط في وطاة الله دي.......
بكري دايرين لنا انتحان كومبوظيشن انا وزولي حرف الباء دا كل يوم اتنين... فشان نشوف البجي اللول منو فينا؟ والله كان ما جا الطيش ما تديني ايدك......
موضوع البوسطي الاساسي
نداء لذوي القلوب الرحيمة:-
النضم دا ما ليهو علاقة بالموضوع..... يا اخوانا.... كل ما اقوم من الصباح القى حواجبيني نازلات لي تحت...وقربن ينزلن تحت العوينات.... والنصيبة الليمات دي انا قايم لي في فلهمة ..قاعد انضم واقعد ارفع حواجبي... خفت ان نزلن تحت العوينات انضم كيفن وارفعن كيفن؟.....غايتو الله يكفينا شر الما نقدرا..... داير يلم فيني عولاق اخر العمر يا ربي...؟؟؟...دحين يا جماعة كان فيكم دكتور اخصائي حواجبين صبي وعاجباهو روحو اليقول لي رايو....وانا من تالا قروش تب ما بقصر معاهو قدر العندي الملمها واديها ليهو واقعد اباطي والنجم.....عاد اخير حواجبيني يضيعن ساكت؟
وكان في زول في لندن اليسفرني لندن... وما يهمو... من الميطار يطلقني... وانا بجيه نفسي.. والله عندي انقليسي يحير ناس لندن ديل جت......
|
Post: #2
Title: Re: نــداء لذوي القلوب الرحيــمة...حالة تقطّع القلــب
Author: سجيمان
Date: 09-18-2007, 07:23 PM
Parent: #1
25 نفر
وما فيكم ولا واحد قلبو رحيم...يا كافي البلا
|
Post: #3
Title: Re: نــداء لذوي القلوب الرحيــمة...حالة تقطّع القلــب
Author: عبد المنعم سليمان
Date: 09-18-2007, 07:43 PM
Parent: #1
| Quote: .... كل ما اقوم من الصباح القى حواجبيني نازلات لي تحت...وقربن ينزلن تحت العوينات.... |
سجيمان والله بقيت زي المطربة صبــاح .. عملوا ليها عملية شــد لقو عفــشـــا وصل حواجبينا
|
Post: #4
Title: Re: نــداء لذوي القلوب الرحيــمة...حالة تقطّع القلــب
Author: سجيمان
Date: 09-18-2007, 08:47 PM
Parent: #3
*
|
Post: #5
Title: Re: نــداء لذوي القلوب الرحيــمة...حالة تقطّع القلــب
Author: اساسي
Date: 09-18-2007, 09:07 PM
Parent: #4
ياخي انا لمن شفت اخر صور ليك في البورد داك وفي تلفزيون النيل الازرق قايل حواجبينك ديل من كترة ما نزلن لي تحت قايلن قايمات تحت العيون
بقن لا لامات شنب ولا لامات رموش
في زول يقوم ليهو خنفس في جضومو؟؟
|
Post: #6
Title: Re: نــداء لذوي القلوب الرحيــمة...حالة تقطّع القلــب
Author: amin siddig
Date: 09-18-2007, 09:27 PM
Parent: #5
| Quote: .دحين يا جماعة كان فيكم دكتور اخصائي حواجبين صبي وعاجباهو روحو اليقول لي رايو... |
أنا لسه ما إتخصصت حواجبين لكن داير أتخصص فيك لأنو التخصص ده نادر و غالي
أوريك تعمل شنو ....
جيب ليك دهن مرفعين ، لخبطو بي بدرة عقارب سوداء ، و لخبطهم مع تبش مقطع في شكل مثلثات و أعمل قناع تبش ( بدل بتاع الخيار البيجيبوهو في الدعايات )
خليهو في وشك لي مدة ساعة
بعد داك غسلو بي موية ليمون .............
المشكلة في الحواجبين شنو ؟ الشعر كتير و نازل لي تحت ولا الجلد زاتو إترهل ؟
لو الشعر كتير بلو بي موية .... وسرحو لي فوق ، جيب مثبت شعر و أعملو فيهو قبل ما ينشف ... شكلوا بالإستايل الإنت عايزو
لو الجلد مترهل ....
كل يوم قبل ما تنوم ..... جيب مشابك غسيل شد بيها جلد الجبهة لحدي ما الحاجب ياخد وضعوا الطبيعي ونوم على كده
أربط عيونك بي قماش أشان كان المشبك إتملص بالليل ما يطير يقد عينك
وكرر الحركة دي كل يوم
حتلقا الجلد الزايد إتكوم في الجبهة ... بي نفس الطريقة رجعوا لي ورا لحدي ما يصل العنقرة ... بي هناك ما بكون مشكلة لأنها بتكون ملانة ( زوائد) و مطبات ، وكان الناس بيعاينو لي رقبتك ألبس ليك بالطو لياقتو طويلة زي بتاع المخبرين
ربنا يشفيك ................
بعد تجرب الخطة دي ورينا ال feedback
ملحوظة : كل المعلومات الوارد هنا لا يتحمل الطبيب أو إدارة الموقع المسؤولية القانونية أو المهنية عنها ، وينصح بمراجعة الطبيب مباشرة ....
شفت المهنية دي كيف
|
Post: #7
Title: Re: نــداء لذوي القلوب الرحيــمة...حالة تقطّع القلــب
Author: amin siddig
Date: 09-18-2007, 09:36 PM
Parent: #6
في حل أسهل
أصلو لو الحواجب بقت تحت العيون ممكن بس تجيب الخشم في الجبهة بي فوق
وبعد داك تقلب وشك 180 درجة .........
يكون وشك جديد
زي الفي مجلات الأطفال داك بتقلبو برضو يديك وش
الرجلين و اليدين و الجذع ما تشيل ليهم هم
أصلو أنا بلغني إنو نسبة لإنحناء ظهرك - و العهدة على الراوي - من بعيد بتشاف وشك زي الفي نص بطنك كده
يعني لمن أخصائي العظام يركب ليك المفصل الصناعي البخلي الوش يدور 180 بس حيقولو إنت بتمشي بالقلبة ........
ومالو .......موضة ......... في زول لاقي يبقى زي spider man
وتاني شي الحقائق نسبية يعني لي إنت المقلوب ، ما إمكن الناس هي الماشة بالقلبة و إنت الوحيد المستعدل ؟
|
Post: #8
Title: Re: نــداء لذوي القلوب الرحيــمة...حالة تقطّع القلــب
Author: Muna Khugali
Date: 09-18-2007, 09:44 PM
Parent: #7
رمضان كريم ..
|
Post: #9
Title: Re: نــداء لذوي القلوب الرحيــمة...حالة تقطّع القلــب
Author: amin siddig
Date: 09-18-2007, 09:58 PM
Parent: #8
sorry
حصل خطأ ما مقصود
لمن تلف الوش ( البيتقري بالجهتين) مية وتمانين درجة كده بيكون شكل زول عديل و متسق مع باقي الجسم
المشكلة النظر حيكون بالقلبة .... ألبس نضارة فيها عدسات بتعمل صورة مقلوبة ، ولمن تراعي البعد البؤري النضارة لازم تكون مسافة قدام العين أشان تقلب الصورة ....
|
Post: #14
Title: Re: نــداء لذوي القلوب الرحيــمة...حالة تقطّع القلــب
Author: سجيمان
Date: 09-19-2007, 03:58 PM
Parent: #6
امين صديق... بجي لي نضمك دا.. بالراحة وبالهداوة....بس روق واحلى
|
Post: #13
Title: Re: نــداء لذوي القلوب الرحيــمة...حالة تقطّع القلــب
Author: سجيمان
Date: 09-19-2007, 02:47 PM
Parent: #3
منعم يا مستعلواتي
عشان انا عيان وعندي ارتخاء في الحواجبين جايي تشمت فيني؟
|
Post: #10
Title: Re: نــداء لذوي القلوب الرحيــمة...حالة تقطّع القلــب
Author: سجيمان
Date: 09-19-2007, 10:28 AM
Parent: #1
وين دكاترة المنبر دا؟؟؟؟؟
|
Post: #11
Title: Re: نــداء لذوي القلوب الرحيــمة...حالة تقطّع القلــب
Author: Ali Alhalawi
Date: 09-19-2007, 12:04 PM
Parent: #10
مالك ؟؟ .. فى شنو ؟؟ .. قاعدييين
أخصائى رموش ينفع؟؟
|
Post: #12
Title: Re: نــداء لذوي القلوب الرحيــمة...حالة تقطّع القلــب
Author: amin siddig
Date: 09-19-2007, 12:18 PM
| Quote: وين دكاترة المنبر دا؟؟؟؟؟ |
يا عمي سجيمان إنت شكلك جربت العلاج ده بالجد ، جابت ليها مشكلة نظر ، أنا منسحب
|
|