منو شاعر اللوحة الشعرية دي؟

يا حلوة العينين..
يا غيمة وردية
أنا وإنتي كنا إتنين..
في جزيرة منسية
إرتاح عليها النيل
وقت الصباحية
يعزف هناك الموج ..
أنغام فرايحية
مركبنا بالتحنان ..
منشورة مطوية
/////////____________/////////
لما السحاب كوَم..
فوق السما إتلملم
شلع البرق ضوا..
من وجعوا إتكلم
وطلعنا نجري هناك
فوق الدروب صايحين
يا مطرة صبي..
ويا هبوووب هبي
والمطرة وقتين تنقط..
بتطلع الطفلة وتنطط
تبني فوق الرملة قبة
وتمسح القبة وتشخبط
وفوق أرض مبلولة دابا
بي إيديها تشيل تشخبط
وتبدأ تتهجي الكتابة
وتكتب أحلي حروف وتنسج
كلمة إسمها ..يمه..يابا
/////////____________/////////
جارين وفرحانين..
جارين وما عارفين
إنو المطر ببكي..
من شوقو للأنهار
دمعا عويناتو ..
ما برضو عندو هو دار
إشتاق ملاقاتو..
رسل جواب للنيل
والطابعة دمعاتو

/////////____________/////////

جارين وفرحانين..
جارين وما عارفين
ليه القطر بيقوم ..
والناس تودع فيهو؟
ليه القماري تنوح..
والكل بيدمع ليهو؟؟
ليه الشمس بتغيب..
والكون يغطي وشيهو؟؟
/////////____________/////////
وألعب معاك في الطين..
وألقالي تعريفة
نجريبا للدكان
وتقولي عايزة لبان
وأقول كمان نعناع
ونقسم النعناع..
لي كل زول في الحي
والمطرة برضو تصب لكل
زول في الحي
للساكن الأكواخ..
والعندو بيت دورين
ما بتفرز الغنيان
من الشقي المسكين
/////////____________/////////
وأهلك ينادولك..
يا بت تعالي البيت
ما تحومي في الحلة
سيبي اللعب في الطين..
فستانك إتبل!
وتفوتي زعلانة..
.والمطرة فوق خديك...
مرسومة ألوانا

وأتمني في سري..
أرجع معاكي البيت
نشرب كبابي الشاي..
أرقد كمان وأبيت..
نقرأ القصص بالليل
الأرنب الطيب..
الأرض والشجرة
وننوم غتانا الشوق..
لي بكرة والمطرة
لي بكرة والمطرة

أعجبتني القصة والرمزية العميقة جداالتي حوتها ..

فمثلا هنا وصف المطرة وهطولها بدون تمييز :

والمطرة برضو تصب لكل
زول في الحي
للساكن الأكواخ..
والعندو بيت دورين
ما بتفرز الغنيان
من الشقي المسكين..

فكأن الشاعر أراد أن يقول بل ويتساءل بتعجب عن توزيع الرزق , حينما يكون بيد البشر وحينما يكون بيد الله..

جميلة للغاية ومعبرة ..

ووصف هطول المطرة
وعلاقتها الحميمية بالنيل أيضا بهذه الصورة بليغ للغاية..

وكأنه مرسال وجواب للنيل وقطرات الماء هي عبارة عن طابع بريدي :



جارين وما عارفين
إنو المطر ببكي..
من شوقو للأنهار
دمعا عويناتو ..
ما برضو عندو هو دار
إشتاق ملاقاتو..
رسل جواب للنيل
والطابعة دمعاتو