Post: #1
Title: الكوميديا فضحتهم أمام أجانبهم في عيد بترولهم ..
Author: محمد ابراهيم قرض
Date: 08-31-2007, 07:47 AM
و يتواصل (بوبار) الإنقاذ بمعجزتها البترولية في السودان ، لينظم سندتها
احتفالا (ختاميا) بقاعة الصداقة دعيت له الوفود الرسمية من الدول (الصديقة)
التي تشاركهم (لهف) بترولنا و التكتم على عوائده ، و شاركت معهم أيضا فرق
فنونهم الشعبية من الهند و ماليزيا و غيرها ..
و لقد شهد هذا الاحتفال سعادة المشير البشير و حاشيته المقربة له من الوزراء
خاصة (المشاتر) عبد الرحيم و الرفيق بكري صالح ... و بالطبع كان عوض الجاز
نجم الحفلة و أم عروسها ..
ما علينا .. خاصة و نحن لا نزال نجهل سبب عدم انعكاس بترولنا هذا على حياتنا
الاقتصادية و المعيشية الضنكة ..
المهم في الأمر .. شاء القدر أن يوكل أمر توزيع جوائز الحفل لنجمي الفكاهة
جمال و عبد السلام جلود .. و كان قد شارك طارق كبلو في تقديم الفقرات الافتتاحية
بينما(برانا) ناجي كمزيع للحشو .. أقصد الربط ..
كان على (جلود) اختيار التذكرة الرابحة من (كورية القرعة) ، بينما كان على
جمال ازاعة الرقم الرابح .. و يبدو أنه كانت على تلكم التذاكر أرقام متسلسلة
تبدأ جميعها بثلاثة أصفار (0 0 0) ..
و نسبة لوجود أجانب وسط الجمهور ، كان على جمال أن يقرأ الأرقام الفائزة باللغة الانجليزية أيضا ، عسى أن يكون سعيد الحظ من ضمن هؤلاء الأجانب ..
و لعمري فإن قراءة الارقام باللغة الانجليزية هي مهمة سهلة لا تحتاج الى دخول
المدارس ، بل حتى أن الأطفال و الكثير من الأميين في بلادي يجيدون نطقها و يحفظون ترتيبها ...
لكن يبدو أن تلكم (الثلاثة أصفار) على يسار الرقم المتسلسل قد جهجهت أخونا جمال ،
و ما كان أيسر عليه أن يتجاهلها و هي مجرد أصفار على الشمال لا تفسد للتذكرة
الرابحة قضية ...
أصر و ألح أخونا جمال أن يزيع الرقم الفائز (بضبانته) متضمنا الثلاثة أصفار ..
فكبف قرأ أخونا جمال الرقم 000172 كمثال ؟؟؟
قرأه جمال أمام الملأ و ضيوفهم الأجانب ، و بكل الثقة على النحو التالي :
Three Zero
One
Seven
Two
و عندما طلب من صاحب الرقم الفائز الصعود للخشبة لاستلام جائزته ، صعد للخشبة شخصان .. أحدهما سوداني يحمل الرقم (000172) ، و الآخر ماليزي يحمل الرقم (00030172) ...
و لا زال أهل الإنقاذ محتارون في من هو صاحب الرقم الفائز ... و كل عام و الإنقاذ بخير !!!!..
|
Post: #2
Title: Re: الكوميديا فضحتهم أمام أجانبهم في عيد بترولهم ..
Author: Mekki M Alhassan
Date: 08-31-2007, 08:37 AM
Parent: #1
الاخ الفاضل د.محمد ابراهيم قرض
ياراجل والله فاقدينك في بوست الاسايطه
عموما لقد شاهدت جزء ليس بالكثير من تلك الاحتفالية الانقاذية بمناسبة 7 8 اعوام علي تصدير النفط ...
الكوكيديا جاءت بفرقة تيراب الكوميديا لتقديم فقرة تقديم الجوائز لارقام تذاكر الحضور وعلي ما اذكر جاءت بعد فقرة لفرقة هندية..
دخل علي المسرح الكوميديان جمال عبد الرحمن وعبد السلام جلود
قام جمال قال لي جلود والله داير اسلم علي السيد الرئيس .. وقال ليهو من علي خشبة المسرح ازيك يا السيد الرئيس
بعده جمال قام قال لي عبد السلام انحنا عندنا وزارة بترول لي ما تكون عندنا وزارة للفول ..اثيوبيا عنده وزارة للبن .. ونحنا الصوامع عندنا مليانه فول..
ثم جهز عبد السلام جلود ( كورة) القرعة للتذاكر وسحب اول تذكرة وكانت 000372 قرأ جمال التذكرة ( ثري زيرو ثري سيفن تو ) قال لانوا في اجانب معانا ..طلع المسرح ولد شاب من عمر ناس اولي عالي كده اسمه قصي عماد الدين ..ساله جمال :انت العزمك هنا منو قال ليهو عمتي سميه خميس شغالة في وزارة البترول.
قام جلود ومعاهو واحد تاني قالوا ليهو فزت بي ثلاجة 14 قدم ..جمال قال ليهو لا ثلاجة شنو فزت بي بئر بتاعت بترول من جنوب السودان امسي استلمها ..بس جيب معاك كارو..
المهم انا ما شفت لحدي ما فقرتهم انتهت انو في تذكرة مشتركة مع غير سوداني الا اذا كان جو تاني بعد فقرة فرقة معهد اورباب الجميلة ..
قمت مشيت الشغل وقلت للمدام بالله سجلي لينا الغناْء في الحفلة دي..
الملاحظة المهمة انو البشير قاعد شماله رئيس جبهة الشرق موسي محمد موسي باعتباره مساعد رئيس الجمهورية وشماله د.عوض الجاز وزير البترول ويمين عوض الجاز امنه ضرار نائبة رئيس جبهة الشرق باعتبارها مستشارا لرئيس الجمهورية...هذه تسميتهم بالمناصب الدستورية بعد اداء القسم قبل يومين
هذه هي الكوميديا التي اعجبتني!!
|
Post: #3
Title: Re: الكوميديا فضحتهم أمام أجانبهم في عيد بترولهم ..
Author: manubia
Date: 08-31-2007, 08:49 AM
Parent: #2
Quote: أصر و ألح أخونا جمال أن يزيع الرقم الفائز (بضبانته) متضمنا الثلاثة أصفار ..
فكبف قرأ أخونا جمال الرقم 000172 كمثال ؟؟؟
قرأه جمال أمام الملأ و ضيوفهم الأجانب ، و بكل الثقة على النحو التالي :
Three Zero
One
Seven
Two |
even their comedians !!!
|
Post: #4
Title: Re: الكوميديا فضحتهم أمام أجانبهم في عيد بترولهم ..
Author: soma
Date: 08-31-2007, 09:44 AM
Parent: #3
سلام قرض كيفك وكيف اهلنا فى قضروف سعد ..
وينك ياخ انا بفتش عليك عشان اغيظك بى حاجات كتيرة
ما قريت بوست بورداب الرياض الكوكبة اللطيفه الحبوبة ولا عامل مطنش 
طبعا لاقيت صاحبك الظريف تمبس وقلت ليه حا امشى اغيظ ليك قرض
تلقاه قاعد فى صور عاصر الرطوبة والحر ..
ده لو ما كان الاعصار طفشو لى مصيرة
عارف يا قرض لما قريت البوست ده افتكرتك حتكتب عن تعليق جمال
فى نهاية تقسيم الجوائز
لما قال يا جماعه خلاص الجوائز خلصت..؟؟
مافى ناس مساكين لسة ما شالواأى حاجة ..
زى ناس الحركة ديل .واشر عليهم
قال ديل ياخى مساكين لافين طول النهار بره فى الحر
ورجع تانى قال .. ولا انتو بتاخدو حقكم بالنهار؟؟
( طبعا قاصد ناس الحكرة)  
تانى قال ليهم يا جماعه هى والله العظيم انا مرخص
دى غايتو جمال بالغ فيها شديد..
انا اتوقعت يمسكوة من خشبة مسرحوا ديك ويكلبشوة
وبكره نسمع اعتقال المدعو جمال عبد الرحمن ..
بدل الفنان الكوميدى ..لكن الحمد لله ربك ستر
***
تخريمة على فكره انا حكاية طلعوا اتنين المسرح سودانى وماليزى دى برضو
ما شفتها .. الا يكون فى الاخر .. وما شاهدت البرنامج لى آخرة صراحة..
بالنسبة للاصفار النطقها جمال وجلود بالخطا ..دى عديل قاصدين بيها
مستوى التعليم النزل تحت التراب.. بس على الله الناس المعنيةتفهم
|
Post: #5
Title: Re: الكوميديا فضحتهم أمام أجانبهم في عيد بترولهم ..
Author: شهاب الفاتح عثمان
Date: 08-31-2007, 10:35 AM
Parent: #4
Quote: [فكبف قرأ أخونا جمال الرقم 000172 كمثال ؟؟؟
قرأه جمال أمام الملأ و ضيوفهم الأجانب ، و بكل الثقة على النحو التالي :
Three Zero
One
Seven
Two
] |
كان امامه على الاقل خمس خيارات
1 ان يقرا الرقم مباشره بدون الاصفار لانها على يسار الرقم وغير مؤثره.
2 ان يقراها زيرو زيرو زيرو ( ثلاث مرات).
3 او يقراها كحرفo بالانجليزيه ثلاث مرات..
4 او يقول triple zero
5 او يقول triple o
لكنه اختار خيار اخر فكان الحدث
وكان البوست..و
جل من لا يخطيء
|
Post: #6
Title: Re: الكوميديا فضحتهم أمام أجانبهم في عيد بترولهم ..
Author: محمد ابراهيم قرض
Date: 08-31-2007, 05:32 PM
Parent: #1
مكي ..
الشوق أكوام ..
باين عليك متابع بدرجة ممتاز ..
أما عن الأسايطة فنحن نحتجب عن المشاركة
الى أن يظهر الناس القدرنا !!!!
|
Post: #7
Title: Re: الكوميديا فضحتهم أمام أجانبهم في عيد بترولهم ..
Author: محمد ابراهيم قرض
Date: 08-31-2007, 05:44 PM
Parent: #1
| Quote: even their comedians |
Poor standards, my friend
|
Post: #8
Title: Re: الكوميديا فضحتهم أمام أجانبهم في عيد بترولهم ..
Author: محمد ابراهيم قرض
Date: 08-31-2007, 05:49 PM
Parent: #1
Quote: ما قريت بوست بورداب الرياض الكوكبة اللطيفه الحبوبة ولا عامل مطنش
طبعا لاقيت صاحبك الظريف تمبس وقلت ليه حا امشى اغيظ ليك قرض |
الرائعة سوما ..
ليك وحشة و الله ..
انتي ما سمعتي ؟؟
جدعوني جدعة بت لزينة ..
أنا حاليا في خصب .. مسندم ...
مالاقي وقت للنت ...
تحياتي للجميع طرفكم ..
لكن ما قلتي لي ..
نقلوكم السعودية ؟؟
ولا مشيتوا الحج ؟؟؟
تحياتي للجميع طرفكم ..
|
Post: #9
Title: Re: الكوميديا فضحتهم أمام أجانبهم في عيد بترولهم ..
Author: محمد ابراهيم قرض
Date: 08-31-2007, 05:54 PM
Parent: #1
شهاب ..
لو كان خطأ لما كان هذا البوست .. كلنا نخطئ ..
لكنه جهل فاضح يا شهاب .. و شتان ما بين
الخطأ و الجهل الفاضح .. مش كده ؟؟
|
Post: #10
Title: Re: الكوميديا فضحتهم أمام أجانبهم في عيد بترولهم ..
Author: othman mohmmadien
Date: 08-31-2007, 06:55 PM
Parent: #9
سري زيرو
والعجب الأعجب حفلة سوداني وعالم الرياضة
الاعلام والبلد في يد سري زيرو وثلة من المهرجلين
|
Post: #11
Title: Re: الكوميديا فضحتهم أمام أجانبهم في عيد بترولهم ..
Author: اسعد الريفى
Date: 08-31-2007, 11:44 PM
Parent: #1
قرض
سلامات
الحاجات الجازية دى بتذكرنى ب (تاكلوا سجق) للمرحوم قمر سكسك
ده لو ذاكرتك حديدية قضروفية !!
|
Post: #12
Title: Re: الكوميديا فضحتهم أمام أجانبهم في عيد بترولهم ..
Author: محمد الامين احمد
Date: 09-01-2007, 00:14 AM
Parent: #1
تحية طيبة للجميع
طبعا هو جل من لا يخطئ
بعنى اسه الزول الكومديان ده غلط فى الانجليزى ، و انت غلطت فى العربى، كده حبايب
مفروض تبدل الـ (ز) بـ (ذ)
المهم ما علينا ، يا زول التذكرة حقت الماليزى ، قول لى كيف !!!
1 - عشان هو ضيف
2 - ارقام التذاكر لازم تكون كلها فيها نفس عدد الخانات (الا اذا غيرو السيستم)
بمعنى الماليزى رقمو مكون من 8 خانات بينما السودانى من 6 خانات !!!
الكلام ده معناهو انو السودانى مفروض رقمو يكون 00000172 ! ولا شنو ؟
|
Post: #13
Title: Re: الكوميديا فضحتهم أمام أجانبهم في عيد بترولهم ..
Author: محمد ابراهيم قرض
Date: 09-01-2007, 05:35 PM
Parent: #1
Quote: سري زيرو
والعجب الأعجب حفلة سوداني وعالم الرياضة
الاعلام والبلد في يد سري زيرو وثلة من المهرجلين |
عثمان ..
فاتتك عرضة الريس بالماليزي كمان ..
خوف بنات ماليزيا ياخي !!!!
|
Post: #14
Title: Re: الكوميديا فضحتهم أمام أجانبهم في عيد بترولهم ..
Author: محمد ابراهيم قرض
Date: 09-01-2007, 05:37 PM
Parent: #1
Quote: الحاجات الجازية دى بتذكرنى ب (تاكلوا سجق) للمرحوم قمر سكسك
ده لو ذاكرتك حديدية قضروفية !! |
أسعد ..
حليلك و حليل الذاكرة ..
ما فضل فيها شئ يذكر !!!
|
Post: #15
Title: Re: الكوميديا فضحتهم أمام أجانبهم في عيد بترولهم ..
Author: محمد ابراهيم قرض
Date: 09-01-2007, 05:51 PM
Parent: #1
Quote: بعنى اسه الزول الكومديان ده غلط فى الانجليزى ، و انت غلطت فى العربى، كده حبايب
كمزيع
ازاعة
يزيع
مفروض تبدل الـ (ز) بـ (ذ)
|
محمد الأمين ..
الكيبورد بتاعي أجنبي ..
ما بيجيب حرف الزال !!!!
Quote: ارقام التذاكر لازم تكون كلها فيها نفس عدد الخانات (الا اذا غيرو السيستم)
بمعنى الماليزى رقمو مكون من 8 خانات بينما السودانى من 6 خانات !!!
الكلام ده معناهو انو السودانى مفروض رقمو يكون 00000172 ! ولا شنو ؟ |
لا يا محمد الأمين ..
عائد السوداني 6 أرقام فقط ، بينما
عائد الحكومة و الماليزي 8 أرقام .. ولا شنو ؟؟؟
|
|