مشاهدات من السودان (عرس بت صالح)

يوم الخميس المقرر لزواج شقيقى تبارك ، أقيمت الدعوة فى صالة كبيرة لعل إسمها المكتبة القبطية أو النادى القبطى بأم درمان ، ولما كان النادى واسعا وكبيراً فقد كانت هنالك صالتان ، وكان بكلا الصالتين مناسبة زواج ، الصالة الأولى كانت محجوزة لشقيقى تبارك ، وصالة مجاورة لزواج ميمون آخر لا نعرف أصحابه ، وبما أنى الشقيق الأكبر للعريس فقد كنت اقف فى الواجهة لإستقبال المعازيم ، وبالفعل بدأ الناس يأتوننا زرافات زرافات ، ولكن كانت بعض الوجوه غريبة ، فلا هم من الأهل ولا هم من الأصدقاء ، يدخلون إلى الصالة ويتفرسون فى الوجوه ويدركون أنهم دخلوا مكاناً خطأً فيعتذرون ويخرجون ، ولما تكررت الحكاية ، سألت أحد الأشخاص الخارجين ، وقلت له يا ابن العم إنت العرس الجاى ليهو ده عرس منو؟؟؟ فقال لى والله أنا لا أعرف العريس ولا أعرف العروس ، نحنا جايين نجامل صاحبنا (صالح) أبو العروس ، فشكرته وإنصرف

بعد ذلك كنت أتفرس فى الوجوه وقبل ان يدخلوا وخوفاً من الحرج ، كنت اقول لهم إنتو جايين لى عرس بت صالح ، فيجيبوا بالإيجاب ، وأوصف لهم المدخل الصحيح فيشكرونى وينصرفون ،

تكررت هذه الحكاية مع عدد من الوفود ، حتى أتانى رجلا سودانيا طويلا وجميلا كباقى أهلنا ، إلا أن شكله غير مالوف لدى ، فكررت له المسالة نفسها وقلت له ، يا حاج إنت جاى لى عرس بت صالح؟؟؟

فكانت المفاجأة أن قال لى آى يا ولدى أنا صالح زاتو أبو العروس



فضحكنا سوياً وشرحت له الموقف ، ووصفت له المكان الصحيح ، ووقف معى للحظات ، ثم قال لى والله يا ولدى كان ما الناس راجينى بى هناك كنت قعدت معاكم هنا

!!!!

Quote: فكانت المفاجأة أن قال لى آى يا ولدى أنا صالح زاتو أبو العروس

العريس ناذر الظريف

تسلم على الطلة

ياخي وقفت قلبي انا قايل بتي اتزوجت من دون علمي

لوووووووووووول يا صالح

ياخ إن شاء الله يعرسوها جد جد

بس على شرط تكون عرسة تستاهلها وعريس يشبهك كده



تحياتى يا صالح لك ولكل صالح فى البلد

مبروك اولا لشقيقك
ثانيا كان تمشوا تقسموا عشاهم وتجيبوهو في صالتكم ؟؟

badr alkalika

تصدق يا بدر ، الحالة كانت أكتر من واحدة

بل كما فى ناس مشوا لى عرس بت صالح وجونا صادين عديل كدة

يا أبو الهش..

وبرضو الجماعة يقولوا ليك السودان ما ظريف

عليك الله العفوية دي... الواحد يلقاها وين..

أتهرينا رسميات.. وإنضباط في الغربة.... بالله

تكون معزوم في الغربة تتضاري وستين مرة تقرأ العنوان

وتتأكد عشان ما تتدخل بالغلط وتلقى نفسك مع ناس سين وجيم

يا هشام صحي الحالة صعبة والمسافة طويلة عشان نبقى بلد زي ما الكل بيحلم

لكن صدقني ساعتها نفتش لمواقف طيبة(بكسر الطاء) زي ده وما حنلاقيها أبدا..

ويلا عينك تشوف إذا بقينا حيين في الدنيا دي التباكي على الأطلال..

هشام

التهنئة موصولة لكل الأهل و خصوصا تماضر التي لم تحضر العرس

Quote: وبالفعل بدأ الناس يأتوننا زرافات زرافات ،

كلهم جو زرافاتا ؟ يعني وحدانا ما جوكم ؟

الأديب أبوجهينة

عجبتك زرافات زرافات



طيب أقول شنو؟ وأنا شايفهم داخلين كيمان كيمان



تحياتى يا أديب يا تلفزيونى يا جميل

Kamal Karrar

ياهو ده السودان ، أجمل بلد فى الدنيا وأحسن شعب فى الوجود



وياخ إن شاء الله طيبة الشعب السودانى لا تنقطع قط

قولوا آمين

الاخ هشام تحيات ومباركات
مبارك لى تبارك الذى عملها
بعد مامشينا من واشنطن ,, شفت الخيانات دى
كبف! متمنى احضر لى حفلة زى حقت تبارك دى والله
اصلى خرمااااان شديييييد, تحياتى وتبريكاتى
لكم جميعا وانشاء الله ربنا يجعلو زواجا ميمونا

كل الود
بكرى

الجميل السمندلاوى بكرى

تسلم يا جميل وإن شاء الله نحضر فرحك



تحياتى يا جميل