التشكيلي حسين ميرغني حسين .. جمال مدهش..صور

قضيت جزء جميل جداً من إجازتي رفقة هذا الفنان الإنسان الجميل حسين ميرغني..
وبطلب منه (يا معلم ما في داعي لكلمات زي الرائع والشفيف والوريف والحاجات دي)..أجد نفسي أمام خيار واحد..وهو أن أرفع لكم أو أرفعكم أجمعين إلى هذا السمو.. فتعالوا إلى عالمه الجميل نتصفح معاً جوانباً عبر فرشاة وألوان أحد فناني بلادي..

تفضلوا بالدخول..
ألوان موية سااااااااااااكت...غايتو البيغرق ما مسعوليتنا.. (الغرق داخل الفن على مسعولية صاحبه..أقعد ساكت)..غرق السرور أريتو..



موعودين بالكثير من مثل هذه الدهشة...شيلوا الصبر بس..

فاصل ونواصل...فاصل شنو ياناس..نواصل ساكت..

سمح شوفو دي..



طرب تقيل والله يا معلم..

رمضان حسن الله يرحمه غنى...الجمال والحب في بلادي..
وها هو حسين ميرغني يردد على طريقته الخاصة..



الموردة

وهنا:



أبو روف

أما هنا:



ثراء من جمال بديع في بورتريه بت الدينكا... الله الله يا حسين

وهذه الرابعة المدهشة... فهي أم من درافور... اللوحة دي سوقها حاااااار..العايزها يقول عوك..المسنجر عندكم..



وفاصل ونواصل..

لا حولاااا ..
شي بديع .. بديع ..

يا محمد ..
قول كل شي عن الزول السمح ده ..
عرفنا بيهو أكتر .. و واصل تنزيل الأعمال البديعة دي ..


شكرا على جرعة الجمال الماكنة دي ياخ .

العديل والسمح عماد..
إزيك يا عمدة..
ياخ أنا فعلاً سعيد إنه أول المتداخلين يكون زول زي عماد..فن وفهم وجمال شديد..

أها يا أخوي حسين ميرغني حسين دا.. خريج كلية الفنون الجميلة سنة 1989م قسم الجرافيك وقد عرف في الدفعة والكلية على أيامه بأنه من (أرسم الناس).. وله من الجمال في مجال التصميم ما إن مفاتحه لتنوء بالعصبة أولى القوة.. وقد (ضرب) السوق بدري.. مجلات ..جرائد..شركات..أعمال خاصة...منظمات أمم متحدة عديل ضاقها... اشتغل مع ناس اليونيسيف...إلى جانب عمله في مجالات العمل الطوعي وإعداد المكونات التدريبية والمعينات البصرية لأغراض التنمية المجتمعية..(عضو في مجموعة المبادرة التنموية)...له الكثير من الأعمال والمعارض داخل وخارج السودان..خاصة في نيروبي وأديس أبابا وأسمرا ويوغندا وإسبانيا..وغيرها..الغريبة عندي كان مطبق بالسيرة الذاتية بالإنجليزي...والله ممكن إذا لميت فيهو ..أترجم ليكم منه بعض الحاجات (للصالح العام) وكدا..
تزوج حسين ميرغني من الأخت التشكيلية منال مامون..ولهم من الذرية أربعة شباب جميلين جداً..مامون ومازن ومحمد وأصيلة..الله يحفظهم جميعاً..

الصورة دي في واحدة من خلطاتنا بحديقة أوزون في نمرة اتنين.. طبعا أنا خالط حسين بس..عشان أحياناً الولية قاعدة تتاوق في سودانيز أونلاين دا.. لكن الشيب بالمناسبة ما مقياس..لوووووووووول...



دي جدعة كدا بتاعة ريالستيك أبو كديس.. الشجرة



شكراً على الطلة الغشوة الدخلة يا عمدة.. وخليك قريب..الحاجات لسه كتييييرة..

* التعديل كلمة اليونيسيف بدل اليونيسكو...بس

keep up

عدنا...



جوبا

keep up

الأعزاء الجميلين..
نواصل..




مزيداً من الإدهاش البصري..

جمال الجمال...
حتى في الصحراء يرى جمالاً.. الله الله يا حسين...




لي قدام..

مزيداً من المشاهدة.. فيكم الخير..

كريمة...



والله محظوظين..

مكرر...

[url=

[url=

[url%3

[url=

[url=http%3

محمود مصطفى محمود
أنا ما بفهم شديد في الرسم وخاصة التشكيلي لكن لما ألاقي ناس رسم طوالي بحشر يدي في نص شعري وأقعد أبرّم وبتكلم عن أزمة العلائق ويوتيبيا الهاجس ... والحتة دي والجزئية ديك وبفنجط علي الباب عشان اتخارج لكن حسين ميرغني ببالغ .... زولك ده مجنون لا لا مجنوووووووووووووووووون


قول ليهو سامر قال ليك بتبالغ تسلم ايدك ...

انت الزول ده شغال وين؟؟؟ زي العندي شمارو

حسين ميرغني أستاذنا و الله و بنريده و نريد شغله...

واحدة من مجالات السوق الفتحها حسين للشباب( شغل الجلد) حسين يصنع بالجلد المعجزات و الله على ما أقول شهيد.
ثم إنه ألوان الموية دي علم واسع و صعيب ..
حسين من العارفين فيه يزار و يتبرك به.
التحية له أينما كان..
فهو فنان و جميل و عارف و حسين.

العزيز سامر عثمان..

تحية وتقدير..

Quote: أنا ما بفهم شديد في الرسم وخاصة التشكيلي

لذيذ.. يعني أنا خلاااااص شايفني بيكاسو؟؟ يا عم كلنا حيران في محراب الجمال في بلادنا الجميلة..

بس لما قلت:

Quote: لكن لما ألاقي ناس رسم طوالي بحشر يدي في نص شعري وأقعد أبرّم وبتكلم عن أزمة العلائق ويوتيبيا الهاجس ... والحتة دي والجزئية ديك وبفنجط علي الباب عشان اتخارج

بالغت عدييييييل ... وقطعت مصاريني بالضحك.. ياخ إنت لذيذ موش؟؟

Quote: لكن حسين ميرغني ببالغ .... زولك ده مجنون لا لا مجنوووووووووووووووووون قول ليهو سامر قال ليك بتبالغ تسلم ايدك ...

سلامك وصل وحسين قاعد يقرا تعليقاتكم أول بأول..

Quote: انت الزول ده شغال وين؟؟؟ زي العندي شمارو

في الحتة ديك زاتها...غايتو أنا لو الزول دا ما صاحبي وبريدو ،،، أب كباس ما يوديني بي هناك..

ياخ تسلم إنت... الزول في موقع استشاري وتصميم ونشر لمدرسة عالمية..

عشان ما تشطحوا ساكت... مدرسة مجتمع الخرطوم العالمية... ولا فخر..

فاضلابي الصغير..
كيفك ياخ؟؟ والله مشتاقين بالرغم من إني ما لاقيتك لسه..

Quote: حسين ميرغني أستاذنا و الله و بنريده و نريد شغله...

طيب وبعدين.... عامل شهادتك المجروحة دي... يا سيدي ونحن كذلك.. بس ما تقولوا ليهو الكلام دا قدامو..فإن فاخورته كبيرة خلقة..

Quote: واحدة من مجالات السوق الفتحها حسين للشباب( شغل الجلد) حسين يصنع بالجلد المعجزات و الله على ما أقول شهيد.

الليييييييييلة...يعني كان في داعي بالله؟؟ ياخ ديك كانت مرحلة وفاتت... أمانة ماك إطيقش..هسي نودي وشنا وين من حناكيش الدنيا دي؟؟..

Quote: ثم إنه ألوان الموية دي علم واسع و صعيب .. حسين من العارفين فيه يزار و يتبرك به.

أحسنت وأنصفت وكفيت ووفيت..
تحياتك واصلة يا راجل يا فنان يا أصيل..
لك الود

شفع الزمن دا الواحد لو شاف حاجة وعجبتو.. يقول ليك..وااااااااو...

أها دي واو المدينة...



بالجد وااااااااااااااوو

الله الله يا حسين

بالامس التقيت ذلك المدهش ....
كنت بغاليري الفنان مصباح (شمس غاليري)


سألته إنت ليه بتوقع بالعربي هنا وبهناك الانجليزي ؟ وكان قصدي أديه فرقة يتفسح علي ويطلع بي العالي .... وببساطة المبدعين قال لي "والله حسب البتجي " !!! ياخ ده لو سألوني أنا السؤال ده كان جهجهتهم في الهوية جنس جهجهة واتكلمت عن الإسقاط !!! عاجباني الكلمة دي شديد والعجب كلمة الإسفيري



هو رجل أبيض كلفافات التبغ اللايت الذي يتعاطاه

قلت له اتفرجت لوحاتك النزلا ليك محمود مصطفى فضحك وقال ... "دخلنا العولمة!!!" فقلت لنفسي :أتاريني سلاق بيض وعامل فيها بكري ابوبكر وابوجهينة وهباني ومنى خوجلي والجندرية وخالد ماسا .... والله انا المفروض اجري اجيب البوست البقع في الاوت !!!


رجل يحترم المواعيد ويقدر العمل الإنساني ولا يسأل عن الماديات

فهو هامة
وقامة
وزايد وسامة
وبدي المدائن لذيذ الدسامة
سألت البقسم رزقنا السلامة
ويحفظ حسينا ليوم القيامة



---------
ونحن طالعين كان في طين قام عداه حسين واتوسخ شوية ...أما أنا فلفيت بهنااااااك وقلت لنفسي ده كان اتوسخ من راسو لكرعيهو بقولوا فنان وجاتو نوبة فنية لكن أنا بقولوا ده شنو ده الوسخان ده؟؟ قرف!!!


مودتي لكما

سامر عثمان...
كيفك يا الحبيب..

Quote: كان جهجهتهم في الهوية جنس جهجهة واتكلمت عن الإسقاط !!! عاجباني الكلمة دي شديد والعجب كلمة الإسفيري

يجازي محنك.. لذاذة شديدة خلاص..

Quote: وبدي المدائن لذيذ الدسامة سألت البقسم رزقنا السلامة ويحفظ حسينا ليوم القيامة

ياخ إنت أمبارح كنت لذيذ...لكن الليلة لذيذ وفنان وشاعر ..

أشكر تواجدك هنا..

مضيئاً وضيئاً.. كما الشمس لا.. دي دايماً تغيب..
أقول ليك قمر؟؟ دا برضو بيراوغ ويمشي ويسيب..
فأحسن تكون..ولدنا الأصيل..تغامر تسامر تفتش تكوس..
تكاتل ظلاماً يعادي الشموس..
ونفسك جميلة...تحب الجمال...وأجمل حقيقة..جمال النفوس..

---------

يا سامر... عايز تبقينا شعراء بالقوة؟؟؟؟ عاد داير تغالط الله في حكمو؟؟

سلام مودة..

دي رفعة وطمع كمان في مزيد من المشاهدة... حتى عودة..



مودتي

جميلة جدا ..
قدرة عالية على السيطرة على الالوان والخيال..


شكرا يافنان...

مصطفى
سلام
وانت بالجد نكت فنان بديع
حسين ميرغنى
مرة قلت للامين شقيقى حسين ده ود رسام
قال لى حسين ده من اميز الطلاب الذين
مروا على فى الكلية
والامين كان رئيس قسم الرسم فى الكلية
وعشان يشكر رسم دى ما بتجى منو بالساهل
فلذا كان حريص على العمل مع حسين
لحسين ومنال والعيال محبتى
ولك الشكر على هذا الفرح
ولكن الاجازة ماعندك

مشدوه بروعة تقاسيم الامواج
غرف منها الحنا استعصت علي الاوتار
وضاقت بها المزامير
ولم يبق بالطار غير الاطار
دقت بين حلقاته
وامتزجت ببقايا شجون
لتتشكل اعباق فرحة وامل
_____________________________________
لك الشكر حسين وانت تستاتذ علينا بفنك

قبل مدة اهداني صديق لوحة بالماء من رسمه
واخر دلني على اعمال كرايون (crayons) او الوان شمع
وسرحت في ملكوت رباب والتوني رباب ...عشان ...تماضر , ياطلال : قبل الارشفة .!

ذهبت لمحل الفنون بعد ان قررت تجربة الماء.
كم احببتك اليوم عند رؤية اعمالك هنا.
لا يهمني لقاءك فعرفتك من بعض اعمالك
ومن اليوم انت من اصدقائئ فلا تتعب لزيارتي
فاطفالك معي يؤنسون وحدتي.
____________________

الاستاذ محمود
راجع بروفايلي وزودني بمدد الاتصال

دكين كتب:

Quote: جميلة جدا .. قدرة عالية على السيطرة على الالوان والخيال.. شكرا يافنان...

كتر خيرك

أووووووووووووه..طارق
أخو أستاذ اللمين..
كيفك يا أستاذ..

Quote: مرة قلت للامين شقيقى حسين ده ود رسام قال لى حسين ده من اميز الطلاب الذين مروا على فى الكلية

شهادة يعتز بها حسين كثيراً...

وأضفت:

Quote: والامين كان رئيس قسم الرسم فى الكلية وعشان يشكر رسم دى ما بتجى منو بالساهل فلذا كان حريص على العمل مع حسين

أتاريهو حسين مكنكش ليك في الشغل مع أستاذه من رواق لحدي كرمة..
ربنا يديم المحبة..
طبعاً أستاذ اللمين معروف بعباراته اللاذعة..وتعليقاته الساخرة..ويحكى أنه في أول حصة رسم مع دفعة ناس حسين في واحد إنتهى من الرسم بسرعة وقال لأستاذ اللمين أنا انتهيت..
أستاذ اللمين قال ليهو دقيقة طيب أمشى أجيب ليك البكالريوس من مكتب العميد..والعهدة على الراوي..نحن طبعا باعتبارنا أصحاب ناس حسين الذين تتشكل علاقتهم بأستاذ الأمين محمد عثمان من مزيج من الحاجات...يعني أستاذهم وفي نفس الوقت أخوهم الكبير.. وزميلهم..ورئيسهم في العمل..وفوق كل هذا وذاك..صاحبهم وصديقهم..عشان كدا لقينا نحن مساحة لذيذة في التعرف على أستاذ الأمين محمد عثمان...بس قمنا إنسلينا من السودان في ظروف عجيبة وطاردة..لك يا طارق ولأستاذ الأمين كل الود..

وفي حسادة واضحة هنا:

Quote: ولكن الاجازة ماعندك

بس إن شاء الله ما يكون وصلك شمار جبرة..

تحياتي وشكراً لمرورك الجميل من هنا...

وليد صفوت..

كيفك يا فنان..

قلت لحسن:

Quote: ذهبت لمحل الفنون بعد ان قررت تجربة الماء. كم احببتك اليوم عند رؤية اعمالك هنا. لا يهمني لقاءك فعرفتك من بعض اعمالك ومن اليوم انت من اصدقائئ فلا تتعب لزيارتي فاطفالك معي يؤنسون وحدتي.

جميل هذا الحكي..

ثم قلت لي:

Quote: راجع بروفايلي وزودني بمدد الاتصال

ففعلت ولنا عودة ووعد بالتواصل...
أبشر بالخير..

تحياتي وشكراً على التجول..

تراك يا عريبي
وانا اقول الزول دا غاتس وين ؟

الدب في مستودع العسل

اعمل حسابك ما تجيك كومة سكري

تقديري للزول الفنان دا

أماني الحسينة..
كيف حالك وحال الوليدات وأبوهم الفنان؟؟

والله أخدت لي غتسة سغيرونة ما بتستاهل حسادة قدر كدا.. لكن ساكت..

Quote: تراك يا عريبي وانا اقول الزول دا غاتس وين ؟ الدب في مستودع العسل

عسل وبسكويت....آآآآآآآآآآي

Quote: اعمل حسابك ما تجيك كومة سكري

وإنتي الصادقة..قربت تجيني كومة من الحساسية...وكمان بطني كانت مكركبة طوال فترة الإجازة تسعة عشر يوماً...


طبعامتاوقتك وطلتك كالعادة...لها فعل السحر على أي بوست..وعندما يكون البوست عبارة عن لوحات.. زي البيكون ناقص لو ما جات الجندرية أخدت ليها قدلة لتشكل أروع لوحة حضورية.... اتكيفتي صاح؟؟

والله العظيم غايتو..

تحياتي وشكراً..